Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الثلاثاء، 9 ديسمبر، 2008

لعبة شطرنج

- كش ملك ...مش قولتلك يابنى بلاش تلعب معايا أنا

- طب تعالى يافالح العب معايا و اهو أخرج من اللى أنا فيه

- تعالى ياسيدى شكلك أنت كمان ناوى تتغلب...ألا صحيح عملت ايه مع داليا؟

- ماكدبش عليك ياهيثم بحاول أرضيها بكل الطرق لكن مش عارف..الموضوع لسه مأثر

- ما أنا قولتلك يا وائل البنات كلهم واحد...تجاهلها شوية هتجرى وراك...بلاش تكون ضعيف كدا...أوباااااا من أولها كده... بقولك ايه انسحب أحسنلك لإنك مغلوب مغلوب هههههههههه

- ههههه لاااااااااااااا أنسى أنا بقاتل لآخر نفس

ـــــــــــــــــــــــ

- ريهام ازيك فينك يابنتى عاش من شافك

- ازيك ياداليا عاملة  ايه؟

- الحمد لله...مالك كده شكلك حزين ..فى ايه..اتخانقتى مع هيثم تانى؟

- هيثم.... هيثم مصمم يتعامل معايا على إنى جماد مش إنسانه ليا إحساس ... بس خلاص... أنا بعتله آخر رسالة و لو فضل مصمم يبقى كدا هو  اللى اختار

- لا ان شاء الله الميه هاترجع تانى....ما أنتم كل مرة بتزعلوا و ترجعوا تانى

- لا ياداليا .. المرة دى الريح شديدة و الأمواج عالية و البحر مستعد فى أى لحظة للانقلاب المميت

ـــــــــــــــــــــــــــــ

- ياهيثم اسمع الكلام ريهام مختلفة عن اللى أنت عرفتهم..نفسها عزيزة عليها و لو حست إن كبريائها و كرامتها اتهانوا... مش هتستنى معاك و هتخسرها

- ماحدش يعرفها غيرى...هى هاتزعلها كام يوم زى كل مرة و ترجع تانى..أنا اتعاملت مع كتير من بنات حوا و كلهم زى بعض... تهتم بيهم يبعدوا تسيبهم يقربوا

- و الله شكلك مش عارف حاجة و بتصرفاتك دى فعلا هتخسرها

- لا متخفش ياوائل على صاحبك ..أنا بعرف أتصرف فى الوقت المناسب

ــــــــــــــــــــــــــ

- ريهام موجودة لو سمحت

- أيوة فى مكتبها

- طيب يارولى هقفل دلوقتى و اكلمك بعدين

- من الواضح إن أنا بس اللى مابيتردش على اتصاله...التصرفات دى مابتعجبنيش و إنتى عارفة كويس..أنت عايزة ايه بالضبط ؟

- أولاً حمد لله على السلامة ده أنا افتكرتك هاجرت...عموماً بالنسبة لسؤالك...أعتقد إن رسالتى وصلت و طبعا كالعادة ولا كأنى قولت حاجة و الكلام بيدخل من ودن و يخرج من التانية..لكن خلاص بقى كفاية و دى كانت اخر فرصة ليك عندى..من هنا و رايح مالكش دعوة بأى تصرف أعمله .. كل واحد فينا من طريق

- ده آخر كلام  عندك ؟!...ماشى ياريهام براحتك

__________

- ازيك داليا؟ ...ايه دا الجميل شكله فرحان..ايه الجديد؟

- اتكلمنا امبارح و صارحنى بكل حاجة و الحمد لله الأمور بدأت ترجع لطبيعتها

- كويس أنا بجد فرحانة .. و امتى الفرح بقى؟

- هو كان عايز يتفق على ميعاد الفرح امبارح مع بابا .. بس قولتله نصبر شويه لحد ماكل حاجه ترجع تانى زى ماكانت ..اللى حصل ماكنش سهل و الثقة اتهزت..لكن امبارح بدأنا أول خطوة فى رجوعها .. و هو قدّر دا و وافق ..المهم إنتى عملتى ايه ؟؟

- خلاص الموضوع انتهى نهائى

- مش معقول ازاى ؟؟!!!!!!!

ـــــــــــــــــــــــــ

- أنت فين ياراجل قلقتنى عليك... قافل التليفون و أجازة و منقطع عن الكل..مالك؟

- أنا و ريهام سيبنا بعض خلاص

- لاااا أقعد و قولى ايه اللى حصل

- بعد ماسيبتك المرة اللى فاتت كلمتها ماكانتش بترد نهائى..رحت لها على الشغل و شدينا مع بعض.. و قولت أسيبها تهدى زى كل مرة و بعدها نتكلم و مشيت...و لما روحت البيت لقيت سبقنى صندوق فيه الدبلة و صورى و كل حاجة تربطها بيا..و كارت مكتوب عليه " قدرت تنزع حبك من قلبى و أنت معايا...للأسف"

- بجد أنا حزين من اللى سمعته ده..قولتلك و حذرتك ماسمعتش كلامى

- بقولك ايه غير الموضوع..تعالى نكمل لعب

- تعالى........ كش ملك

- ايه!!! ازاى ؟؟!!!! دى عمرها ماحصلت و كمان الملك يموت بده ؟؟!!!! دا انا ياللى بيقولوا حريف شطرنج عمرى ماعملتها

- ماهو الشاطر فى اللى أشطر منه ياصاحبى..للأسف أنت دايماً فى اللعب بتعتمد على خبرتك و ذكائك بس و مابتحاولش تشوف دماغ اللى قدامك بتفكر فى ايه و بيلعب ازاى

- حتى اللعبة اللى دايماً بكسبها خسرت فيها !!!!

ــــــــــــــــــــــــــــــــــــــــــــــــــــــــــــــ

" الدنيا لعبة شطرنجية.. يوجد بها الكثير الذى يقبل بدور العسكرى و يوجد بها من يقبل بدور الملك و لكن يوجد ايضاً من لا يقبل إلا بدور الوزير ......فإذا اعتمدت على خبرتك و ذكائك فقط و تجاهلت الآخر ..فكن على يقين أنك الخاسر الوحيد فى هذه اللعبة"

و دمتم سالمين

الخميس، 27 نوفمبر، 2008

عذراً بائع الكلمات

0184

تقول أنك شهريار هذا الزمان

و تظن أنى سأفرح لكونى شهرزاد

لتعلم ياسيدى أننى أمقت هذه الشخصيات

فشهريار بالنسبةِ لى من الجبناء

يخفى ظنه و خوفه

وراء مسرور السياف

و شهرزاد  امرأةً حمقاء

تتصنع الود و الحب و تخادع

لتبقى على قيد الحياة

عذراً بائع الكلمات

أتسرد لى مفتخراً مغامراتك مع النساء؟

و تظن أني بذلك سأفرح !!!!!

هيهات أيها المغرور الموهوم

فأنا لا أهوى عربيداً للنساء

و لا أنا جاريةً فى حرملكِ قصرك

تنتظر إنجاب الولد لتصبح هى

ملكة النساء

عذراً بائع الكلمات

لا تعزف لى مقطوعاتك لتؤثرنى

فقبلك عزفوا أشهر المقطوعات

و لا تتودد لى بالكلمات و الأشعار

فكثيراً قبلك قد كتبوا أحلى الكلمات

عذراً بائع الكلمات

أنا لست تلك الطفلة التى

تنبهر بهكذا شخصيات

فلا تتقمص شخصية الملوك و الأمراء

فأنت لست إلا شخصاً

يغلف فقدان الثقة فى رداءٍ

من الغرور الواهم

ليخدع به الحسناوات

عفواً سيدى

أنا لست مراهقة بلهاء

و لا مهرةً جامحةً يسهل ترويضها

أنا امراة العذراء

أسكن فى قلعةٍ محصنة

ضد المتسللين الضعفاء

عليها حراس غلاظ

و يحيط بها قلاع من نار

هل تقدر حقاً على اقتحامهم

و فك طلاسم امرأة العذراء ؟؟!!

أم انك لا تملك سوى قيثارك

و بعضا من الكلمات

و تظن بهم أنك ستفوز بقلب

امرأة العذراء

عفواً فقلبى أنا لا يملكه سوى

فارس حامل سيف الشجعان

عذراً بائع الكلمات

لا تجعل غرورك المتصنع

يهوى بك فى بئر غباء

و اوقف رسائلك البلهاء

و اذهب فى طريقِ آخر

علك تجد هناك

امرأة ترضى

ببائع كلمات

السبت، 15 نوفمبر، 2008

مش بالدموع يامحسن



محسن وعمرو اتنين كانوا أصحاب .. لكن فجأة و بدون سابق إنذار اتفرقوا, ليه و عشان

ايه الله أعلم ..فى يوم و ليلة حصل الفراق و مافيش حد عارف السبب .. المهم

فجأة الأصحاب كلهم لقوا محسن عمال يبكى على الأطلال و يقول ان عمرو غدار

و عمرو أصلا ماحدش سامع له حس ..و لما ينزل القهوة و يجى حد يقوله ايه اللى حصل

 يقوله قدر الله و ماشاء فعل و بس

الكل أخد عن عمرو فكرة هباب من كتر كلام محسن عليه

لحد ماجيه واحد من الأحباب .. اسمه حسين راح لمحسن

وقاله حرام الراجل عمره ماغلط فيك و انت اللى بتكشف نفسك و تقول على المستور بلاش حد يوقعك فى الكلام ...

 سكت محسن شويه و بعدها فتح فى النواح و قال ده صديق عمرى انا عمرى ماتوقعت منه كده خان العشرة و ..و..و...

طبعا حسين ماعجبهوش الكلام

و قاله يابن الحلال الراجل خرجك من حياته خلاص و انت مصمم تتدخل بالعافية و بتروح لنفس القهوة و تتكلم مع أصحابه لتظهر عيوبه ...

واحد ظالم زيه ليه شاغل بيه تفكيرك  ماتسيبه و بكره ربك هايجيبلك حقك لو كنت فعلا مظلوم .. بلاش تلاحقه فى كل مكان

وسابه و قام

راح لعمرو  و قاله لازم يوضع حد لكل الكلام .. و انه عارف و متأكد انه لو اتكلم هايقلب الكل على محسن و يظهر حقيقته فى خداعه

رد عمرو  و قاله ..مالناش دعوة ياحسين و اللى يصدقه يروح يقعد معاه و فى حياتى انا مش محتاجة ..

و كمان انا حياتى فيها حاجات أهم شاغلة تفكيرى و أنا أكبر من كل الكلام

حسين ماعجبهوش الكلام .. وقاله انت كده طالع ظالم و سيرتك فى الحته و فى كل بيت

عمرو : ياحسين ياصاحبى اللى يفكر شويه هايلاقى الحقيقة بتبان ..لو انا فعلا ظالم ليه شاغل تفكيره و ليه دايما قاعد على بابى و ليه مصمم ينزل يقعد فى القهوة وسط اصحابى ؟؟؟

حسين : الناس ليها الظاهر و انت لازم تظهر الكلام .. و تكشفه للمخدوعين فيه

عمرو : ياحسين ياصاحبى أكون فى عين الناس ظالم و انتظر نصر الله بدل ماأكون منافق

حسين : و ايه اللى هايخليك منافق ؟؟؟ انت واحد بتدافع عن نفسك

عمرو : ماهو لو دافعت عن نفسى يبقى هاظهر كل اسراره ... و من صفات المنافق اللى الرسول ذكرها..

 إذا حدث كذب، وإذا وعد أخلف، وإذا ائتمن خان، وإذا عاهد غدر، وإذا خاصم فجر   ...

انا بقى هاعمل كل ده و هابقى زيه ..يبقى انهى الاحسن ؟؟؟

^^^^^^^^

و استمر محسن فى سرد اكاذيبه و استمر عمرو  فى السكوت و عدم اشغال نفسه بالمهاترات بتاعت محسن ..لحد ماظهرت الحقيقة فعلا

^^^^^^^^

الحكاية مش من وحى الخيال لأ ... هو واقع كلنا بنشوفه و أوقات كتير البعض بيقع فيه..

فعلا لو شوفنا ان كل من يبكى على الاطلال و يقول انه مسكين و مظلوم و مخدوع.. رغم انه مش سايب اللى ظالمه ده و عمال ماشى وراه زى المعزة و عيالها ... فى الآخر بيطلع هو الظالم

و الانسان اللى بيبقى ساكت و مريح دماغه من المهاترات بتاعته وتربيته ماتسمحلوش من الأساس انه يشنع عليه حتى لو هو بدأ فى ده  بيتقال عليه اوقات ضعيف او ضميره مات او فعلا ظالم .. فى الآخر بيطلع هو المظلوم

^^^^^^^^^

يبقى الدرس المستفاد من الحكاية ايه ؟؟؟

ماناخدش بالظواهر لان

مش كل من بكى على الأطلال مظلوم .. ولا كل من رفض الدفاع ضعيف أو ظالم

و لا انتوا ايه رأيكم ؟؟؟

و دمتم سالمين

الثلاثاء، 11 نوفمبر، 2008

من أنتِ

Picture1 

وقفت حائرة أتساءل من تكونين ؟؟

هل أنتِ بالفعل ملاكى الحزين

أم أنكِ تتلونين ؟

و فى أى جبهة تلعبين

أم لكِ جبهتك الخاصة

التى منها تنطلقين ؟؟

من تكونين ؟؟؟

أصديقتى أنتِ حقاً ؟؟

أم أنكِ تتصنعين !!!!

و ماهذا القناع الذى ترتدين

هل كنتِ تخفيه ؟؟ أم أنه قناعك الدائم

و أنا التى أصبت بالعمى اللعين !!!!

بالله عليكِ من تكونين ؟؟

جئتِ إليّ باكية من الظلم المهين

فأخذتكِ إلى عالمى لتستريحين

فهل بهذه الدموع كنتِ تخدعين !!!!

و تنصبين لى المكيدة و لوقوعى تنتظرين ؟؟

فمن تكونين ؟؟؟

أنا حائرة الآن بين الشك و اليقين

لا أعلم لماذا كنتِ تتوددين !!!!

و كنتِ لقناع الطيبة ترتدين !!!!

و للقصص الزائفة تسردين !!!!

أم أنكِ لا تعلمين ما تفعلين ؟؟!!!!

فاحذرى مع من تلعبين

و لكِ أن تتأكدى مهما تكونين

فأنا آخر من تخدعين

**********************

*بسبب البوست اللى فات و ان الكل افتكر انه رسالة موجهه

فحبيت اعمل تنويه ان البوست اللى فات و الخاطرة دى مش موجهه لشخص بعينه

دول مجرد خواطر و فضفضة

و دمتم سالمين

الخميس، 6 نوفمبر، 2008

كلام على الماشى

11343626ds5

قابلتها و اتكلمنا .. غضب عتاب لوم كل دى مشاعر كانت بيننا

قالت  كتير و فضلت ساكتة اسمع و بس

قولت كتير و فضلت ساكتة تسمع و بس

و فى اخر اللقاء نزلت دموعى و دموعها

لأننا سمحنا للكبرياء الدخول و نسينا اننا اصدقاء

اتعلمنا من الموقف ده ان للصداقة حقوق علينا لابد ان نحفظها

ــــــــــــــــــــــ

كذب الكاذب كذبة فأصبح الكاذب صادقاً لنفسه !!!!

و اصبح هو الضحية و بكى بعد ما أمات ضميره !!!!

و صدق الصادق بصدقه فأصبح فى عين الناس كاذباً !!!!

و اصبح هو المتهم بالقتل عمداً .. فيا للعجب على الزمان و ظلمه!!!

ـــــــــــــــــــــ

عندى حاله من الحزن رغم انى فى قمة السعادة

مش تشاؤم بالعكس متفائلة و حاسة بتغيير كويس

لكن جوايا حزن مش عارفه احدد مصدره

ممكن لانى حاسة بظلم نفسى

ممكن لانى شايفة حد قريب منى بيتظلم و مش قادرة اعمل حاجه

حاسة انى مقيده و مش عارفه افك القيد ده لانى مش عارفه امسكه

ــــــــــــــــــــــــــــ

كلمه اخيرة لصديقتى الغالية .. اتركى الاحداث تتعامل مع نفسها

و عاجلاً ام اجلاً سيقع القناع و تظهر الحقيقة

فالاقنعه لا تدوم ابداً

الخميس، 30 أكتوبر، 2008

مش لاقيه عنوان لأنه مجرد كلام و بس

فتحت الاجندة بتاعتى اشوف الواجب اللى كان مطلوب منى اعمله من بدرى

وهو الآتى :

* مبقاش عبيطة و اعيش حياتى و أفكر فى نفسى و بس

* الصراحة كلمه تتمحى من قاموسى "عشان مبقاش عبيطة برضه"

* عدم مراعاة شعور الاخرين

* الكدب الطريقه الوحيدة للوصول الى أحلامى

* أتلون كما الحرباء عشان اكسب قلوب الاخرين

بس للأسف معملتش الواجب دا

أعذرونى يا أساتذة الحياة  ..فاأنا تلميذه فاشلة

ـــــــــــــــــــــــــــــ

لما تلاقى شخص عزيز عليك بيتعذب و انت اللى صنعت عذابه بأيدك

و تلاقى نفسك فرحان و ضميرك مرتاح "مات"

لما تتلذذ بآلام الاخرين و تتفنن فى زيادة هذه الآلام

فأهلا بك في عالم السيكوباتيين

ــــــــــــــــــــــــــ

لما ألاقى الكدب متغلف بالصدق ..وقتها بفتكر كلمه عادل امام "صادق ياكداب"

طيب لما ألاقى الصدق متغلف بالكدب ... ياترى يتقال عليه ايه ؟؟؟

_______________

لما ألاقى شخص دايما تصرفاته بتناقض بعضها ..واحتار اقول هو كويس ولا وحش

مش عارفه ليه بفتكر وقتها محمد سعد بمقولته الشهيرة "ياواد يابت"

ـــــــــــــــــــــــــــــ

لما ألاقى كل المبادئ اللى فى الحياة اتقلبت للنقيض بتاعها ...

و لازم عشان اعيش فى ارض الواقع اعمله

اعذرونى مضطرة اخد اول ميكروباص طالع على ارض الاحلام

ـــــــــــــــــــــــــــ

 لما ألاقى المنافقين اصبحوا هم العقلاء فى هذا الزمن ..

و لابد ان اصبح من العقلاء

اعذرونى لا احب العقلاء ... و افتخر بكونى مجنونه من المجانين

ـــــــــــــــــــــــــــــــــــ

لما يتقال عليه هبله عشان ماخنتش قلبى ولا ضميرى ..

أقر و اعترف امام الجميع انى عاشقه هذا الهبل

ــــــــــــــــــــــــــــ

لما الانسان اللى بيحافظ على مشاعر الاخرين يتقال عليه قاتل

و الانسان اللى بيفكر فى نفسه و بس يتقال عليه قتيل

فانا اعتز بكونى سفاحه من الدرجه الاول

________________

و دمتم سالمين