Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الأربعاء، 11 فبراير 2009

حيرااااااانة

احساس وحش قوى لما تنجرحى من الانسان الوحيد اللى حبتيه بجد

و رغم كل عيوبه بتفتكرى مميزاته علشان تقدرى تعيشى معاه

مع ان كل اللى حواليك واهلك بيقولولك ماحدش بيتغير و هتتعبى

لكن انتى بردو كنتى بتقنعى نفسك انه اكيد هيفوق لنفسه و يتغير

و فجأة ميقدرش كل ده .. و فاكر انك لما تسامحى ضعف منك

مش لأنك بتحبى بجد

الاصعب من الاحساس ده لما تقررى البعد .. و تحاولى توسعى دائرة علاقاتك و تموتى نفسك فى الشغل على امل انك هتقدرى تنسى

تكتشفى ان لسه مكانه فاضى .. لكن زى ماكنتى بتقنعى نفسك انه هيفوق بردو بتقنعيها انك هتقدرى تنسى

و رغم ضحكك و تمثيلك حاله النسيان و انك خلاص عايشه حياتك .. إلا انك من جواك تايهه

قالت الكلام ده ليا و بدأت فى البكاء ... حاولت اهون عليها و اخرجها من اللى هى فيه

ورغم انها حاولت تتظاهر انها بقت كويسة إلا انى عارفة انها مش كده

و من وقت ما سبتها وأنا مخنوقة و حاسة بالعجز

^^^^^^^^^^

اصعب احساس لما الانسان يكتشف ان كان بين ايده جوهرة وهو اللى ضيعها  

بجد الانسانة دى انا مش هلاقى زيها تانى .. كنت فاكر انى فهمتها لكن اتضح انى عمرى مافهمتها

غلطت في حقها كتير و ظلمتها معايا ومعترف.. و بجد ندمان عليها و نفسى انها تسامحنى

لما بعدت عنى حسيت فعلا بقيمتها .. عايز اكلمها و اقولها انى اتغيرت بجد بس خايف انها متصدقنيش .. و هيكون معاها حق فى كده بس بجد انا محتاجها جنبى

خايف يكون فات الاوان .. خايف من حاجات كتير قوووى .. مش عارف

قال الكلام ده و عينه مليانة بالدموع .. و لأول مره اشوف الانسان ده كده بس بجد صوته فعلا كان مخنوق قوووى و حسيت فعلا انه ندمان بجد و انه اتغير

طلب منى انى اتدخل فى الموضوع .. قولت هحاول لو فعلا لقيت انها مستعدة للكلام ان شاء الله اكلمها

^^^^^^

انا بقى دلوقتى مش عارفة اعمل ايه فعلا .. الاتنين من اعز اصدقائى و الاتنين زعلانة عليهم

انا عارفة انها اتظلمت كتير معاه بس بردو انا حاسة انه ندمان فعلا

و بجد صعبان عليا ان حب 3 سنين يتهدم بالشكل ده و خصوصا ان لسه الاوان مفتش

الاتنين لسه بيحبوا بعض .. اكيد فى حاجات اتكسرت لكن ممكن بردو انهم يصلحوها مع بعض .. ولا ايه ؟؟

مش عارفة اتدخل فعلا زى ماهو طلب منى

ولا انصح الاتنين من بعيد وخصوصا انى مابحبش موضوع الطرف التالت ده فى العلاقة لأنه مهما كان مش هيكون حاسس نفس احساسهم

ولا اعمل ايه ؟؟؟؟؟؟؟؟

كنت مترددة انى انزل الموضوع هنا بس بجد من اول امبارح و انا دماغى هتنفجر من كتر التفكير

و بجد محتاجة رأيكم فى الموضوع

و دمتم سالمين

هناك 44 تعليقًا:

EMMY BABY يقول...

هحجز اول تعليق

EMMY BABY يقول...

انا من رأيى انك تدخلى حتى لو هتضطرى تكدبى علشان تصلحى مابينهم


بس بجد حرام حاولى توصليلها ندمه

وحاول تفهميه انه لازم يستحملها لحد ما ترجع تانى زى الاول

ربنا يوفقك وتقدرى تصلحى مابينهم

حواء يقول...

السلام عليكم
انا عندي كذا رأي
الاول ان قصص الحب من غير اطار شارعي انا مبحبهاش خالص وبنصح الكل انه يبعد عنها لان مش هيكون في بركه في حاجه تغضب ربنا
اما لو بعدنا عن الراي الاول يبقي ادخلي طبعا جدا جدا ويابخت من وفق راسين في الحلال

Sweet Violet يقول...

ايمى
----

اهلا بيك اول تعليق (:

انا فعلا صعبان عليا ان بجد الموضوع ينتهى كده

لكن بردو هتدخل بطريقة مباشرة ولا لأ

ماهو ده اللى محيرنى اكتر حاجة

Sweet Violet يقول...

زوجه
----

عليكم السلام و رحمه الله و بركاته

هو ممكن يكون من الكلام مش واضح بس هما فعلا كانوا مخطوبين ):

ماشى بس بردو هرجع و اقول هل بطريقه مباشرة ولا من بعيد

لان بردو مهما كنت قريبه منهم خايفة مقدرش اوصل الاحساس صح مابينهم

و فى نفس الوقت خايفة جداااا يكون كان فى ايديا حاجه ليهم وانا قصرت

Kiara يقول...

عاوزه راييي

مش تتدخلي قوليله يكلمها هو وهما الانين يوصلوا للصح سوا بدل اما تضغطى علي طرف باقناعك له والله اعلم اللي جاي يكون ايه
بيكونوا ندمانين في الاول وبترجع ريما لعادتها القديمه


افرضي اقنعتيها ورجعوا وبعدها رجع زي ماكان

يبقي كدا انتي ظلمتيها هى

فهو يكلمها بنفسه افضل وهما يوصلوا للقرا الصح سوا بدون تدخل اي حد مهما كان

Sweet Violet يقول...

كيارا
------

انا بجد فكرت فى اللى انتى بتقوليه

لكن بجد مش عارفه انا حاسه انه فعلا اتغير و ندمان بجد ):

^^^^

معلش صحيح على اللى حصل

انا دماغى اصلا مش فيا اتلغبطت

بس الحمدلله لحقنا الموضوع فى اخر لحظة D:

Kiara يقول...

اوك ندمان

بس هسالك سوال

انتي تعلمي الغيب

لو قولتي اه اعلم الغيب

هقولك كلميها واقنعيها لان بعلمك للغيب هتتاكدي انه مش هيرجع زي ماكان

Sweet Violet يقول...

كيارا
-----

ما انا بقول مش عااااارفه مجرد احساس

لكن مش عايزة بردو يكون فى ايديا حاجه و اكون ماعملتهاش ليهم

فهمانى ؟؟؟

Kiara يقول...

فهماااااااكي بس هقولك حاجه

في حد بيتجوز مرات حد

يعني لو ليهم نصيب يكملوا هيكملوا صح ولا مش صح

دلوقتي واضح ان هي اتنازلت كتير واتحملت كتير وبتعاني كتير

هتكون بقي هي تحت رحمه سيادته لما يعرف قيمتها

وبيبانوا انهم عرفوا قيمه الواحده واول اسبوع دا لو كملوه وبيرجعوا زي ماكانوا

الطبع مش بيتغير انتي ناسيه شموسه قالت لينا ايه

عامه في كل الاحوال

القرار اللي هتكونيمرتاحه ليه ومش متردده فيه هو دا اللي تعمليه وتتحملي نتايجه كلها

سواء بالتدخل بينهم او لا

Unknown يقول...

أنا من وجهة نظري إنك تحاولي تقربي بينهم من بعيد لبعيد يعني التدخل في المواضيع دي بصورة مباشرة أحيانا بيجيب نتيجة معاكسة تماما وانتي عاوزة تصلحي الخلاف
حصل على فكرة معايا الموقف ده بيني وبين وحدة حبيتها وصدقتني وسامحتني بس غلطت تاني ومقدرتش تغفرهالي وسابتني يلا ربنا معاها الحمد لله على كل حال أهو الأيام بتعدي والواحد بيقابل حد تاني هي أقدار الله لازم الواحد لما يستنفد طرق المحاولة للإصلاح يقف ويعرف إن ده قدر ربنا وخلاص لحد كده وهو ده الي أنا عملته والحمد لله لقيت القدر مخبيلي جوهرة ثمينة جدا سبحان الله كل أقداره فيها رحمة
مودتي ومعذرة للإطالة

romansy يقول...

يا سلام يا ضد وعلى قلبك الكبير
عارفه الانسان لما بينجرح بيحاول ينسى فعلا بس عمره ما بيقدر الا لما يسترجع صورته فى ذهنه ويقدر يكمل حياته وهتفضل دايما صورتهفى قلبها متعلقه بيها دايما

ومش هتقدر تفارقها الا بقى بحب جديد او استقرار فى الحياه

princess يقول...

انا رايى ادخلى بس من بعيد

mahasen saber يقول...

ضد اتدخلى يمكن ربنا يصلح حاله وحالها المره دى

ويقدر قيمتها فعلا
ويكون ليكى الثواب

mahasen saber يقول...

بس فى اول البوست افتكرتها انتى

وحدثتنى نفسى وااقول ومش تقلى

اهلا دول هيبقوا علقتين بس كده خلاص سماح عن كل الضرب الاحق والماحق

ده انتى بسكوته حد يضرب بسكوته ده حتى تتكسر فى ايده

هههههههههههههه اتدخلى يمكن ربنا يوفقلهم خير وتكونى سبب

غير معرف يقول...

ضد

هي لسه بتجبه.. حتي لو بتمثل انها نسيت
وحتي لو اتحجرحت اوووووي..
مدام هو ندمان يبقي اتغير.. مدام بعدت عنه يبقي هو عرف قيمتها وهيحافظ عليها بعد كدا..

عارفه
كان لازم دا يحصل عشان يعرف قيمتها..

بصي
انا من رأيي
انك بينك وبينها تحاولي تتكلمي معاهم بحيث انها تبقي مهيئه انه يكلمها وتسمعله
وتخليه يكلمها ويصلح اللي بوظه..

زي مانتي قلتي
حب 3 سنين
حرام يضيع كدا..

ويااااااااااارب يقدم اللي فيه الخير ويسعدهم يارب..

دمتي بكل خير وود

المعتصم يقول...

بسم الله الرحمن الرحيم
السلام عليكم
تحياتى
اسمحيلى اقولك رأيى
انا شايف انك تدخلى من بعيد وتقوليله انه يثبت فعلا انه ندمان وانه اتغير وان هى لما هتشوف التغيير ده منه فعلا ممكن ترجع له
انما تدخلى فى الموضوع بشكل مباشر ده فيه مخاطره كبيره جدا لانه ممكن يكون ولا اتغير ولا حاجه بس هو مش قادر يصدق انها بعدت عنه بارادتها هى مش زى ماهو عاوز وبعد ماترجعله يرجع زى الاول ويجرحها اكتر من الاول وكلنا عارفين ان الطبع يغلب التطبع
تقبلى مرورى
ودمتى بكل ود
والسلام عليكم ورحمة الله وبركاته

elsha3er يقول...

لأ طبعالازم تدخلى دة من حقهم عليكى

وربنا يقدرك على فعل الخير


احمد الشاعر

مسدس صغير يقول...

بلاش تتدخلى احسن ..
انا رأيى كدة
......

غير معرف يقول...

إزيك يا ضد؟؟

بصى انا شايفة إنك متدخليش لأنه مش حيكون لصالحك و حقولك أنا شايفة إيه




أنا شايفة أنه آه ممكن يكون ندمان بس ممكن برضه بعد ما يندم و هى ترجع هو يرجع لطباعه الأول و واضح انها طباع وحشة أوى بدليل إن الكل بيقولها لا عليه...و الإنسان مش بيتغير بين يوم و ليله لأنى مش شرط عشان ندمت على حاجة أنى معملهاش تانى

فا لو رجع تانى حتبقى أنتى اللى فى وش المدفع

و هو لو عايزها بجد حيحارب عشانها حتى لو مش بيكى



و فى الآخر لو ليهم نصيب فى بعض لازم يتصالحو

بس بجد خرجى نفسك من الحوار ده

mohamed ghalia يقول...

بجد لازم تعملى المستحيل عشان ترجعيهم
وربنا معاكى

من غير عنـــوان يقول...

** موضوع قوي جداااااا

أما عن النصيحة فأكيد
إذا استنصحك...نصحته

وكمان للصاحب دائما نصيحة

أمنياتي

Teawater يقول...

بصي حاولي تصلحي بينهم بنك تعمللي لقاء صح بينهم او تفكريهم برابط شديد زي اولادهم او حبهم وذكرياتهم ده رأيي
وياريت تتقبلي مروري

الفراشة الصغيرة يقول...

انا رايى انك تمشى مع المثل اللى يقول
يا داخل بين البصله وقشرتها
ما ينوبك غير ريحتها


حاولى انه هو اللى يكلمها ويفهمها
مهما كانت مضيقه منه
طالما بتحبه هتسمحه

موناليزا يقول...

يعنى هما متجوزين ولا علاقة حب عادية ولا ايه؟
لو متجوزين طبعا تصالحيهم على بعض
ولو لا سيبيه منه ليها مباشرة وهى بقى تمشى ورا احساسها مش قلبها وبس

Unknown يقول...

اصعب احساس لما الانسان يكتشف ان كان بين ايده جوهرة وهو اللى ضيعها

أهم حاجه انه عرف ده قبل فوات الاوان
طالما انتي عارفه انها لسه بتحيه
خليه يكلمها
يمكن مش هيكون رجوعهم بالساهل

لكن هو لازم يصبر وهي طالما بتحبه وهو اتغير بجد يبقي هترجع في الأخر

dr_samarmar يقول...

أكيد لازم تحاولى بكل قواكىىى
تحاولى أوى

اتنين بيحبو بعض.... يسيبو بعض ليه

تحياتى :)

و ربنا يوفقك لدا ان شاء الله

شمس النهار يقول...

ماتحيريش نفسك
السؤال الاختلاف في الجوهر والطباع
يبقا مافيش فايده
الاختلاف حاجات ممكن تتغير بعيد عن جوهر الشخصيه والطبع ممكن الدنيا تمشي
بس عايزه اقول ان ماحدش بيتغير لا قبل والا بعد الجواز واللي فاهم انه ممكن يغير الطرف الاخر يبقا غلطان
هل الانسان ذو البشره البيضاء ممكن يتحول الي البشره السوداء
وعلي فكره اللي يقرر ده همه مش اي حد ليه عشان مهما اتحكي بيكون في تفاصيل ومشاعر مااتحكتش
مابينفعش تتحكي عشان همه اصلا مش واخدين بالهم منها مش عارفين يحكوها
وتراكمات كتير بتتسلل للعلاقه من غير مايخدوا بالهم
سيبيهم همه اللي يقرروا خلافتهم من اي نوع

مجلة الأم الصغيرة يقول...

بصراحة أنا خايفة أعلق
عشان عارفة زمانك بتقوللي إيه اللي جاب الوحشة دي هنا بقالها كتيير مش بتسأل و لا بتمر
طب بالراحة بس بلاش شتايم
أي أي أي
كفايا ضرب طيب و أنا هفهمك

احم احم
بجد أنا عارفة إني مقصرة معاكي و مع كل المدونات حتى مدونتي .. بس هي يمكن حالة زهق مش أكتر .. حتى علاقتي بالنت مابقتش زي الأول

المهم إني جيت النهاردة مخصوص أسلم عليكي و أقولك بجد وحشتيني جداااااااااا

أما عن البوست
قبل أي حاجة بحب أسلوبك أوي في حتى لو هو بالعامية بس بجد راقي أوي ماشاء الله
أما عن رأيي .. أنا عن نفسي بكره موضوع الطرف التالت أو الوسيط .. أعتقد ممكن تنصحي الاتنين بس من غير تدخل عشان هما أكيد أدرى ببعض
و عشان يختاروا يرجعوا لبعض لازم يكون قرارهم نابع من جواهم مية في المية منغير ضغط و لا تأثير خارجي

الازهرى يقول...

لو متأكدة أو احساسك قوى
استخيرى الله
وما يصل اليه احساسك قومى به
فان اراد الله الاصلاح على يديك فسيسهل الامر عليك والا صرفه عنك
وارجوا من الله ان يوفقك الى الخير لك ولهما

marmar يقول...

حبيبتي الرقيقه
انتي قلبك طيب اوي وبتحبي كل الناس
بس انتي بجد بما انها صحبتك وحبيبتك وهو عزيز عليكي لازم لازم لازم لازم لازم تدخلي جدااااااااا
وتعملي كل اللي تقدري عليه بجد
لان اصعب احساس لما اتنين بيحبوا بعض بجد سيبوا بعض
حتى لو كان لاي سبب
مفروض نيجي على نفسنا مقابل الانسان ده ونغيروا احنا بأيدينا ولو مقدرناش
نطلب منه التغيير والا ....

صبرني يارب يقول...

بصي يا جميل

حب الشوارع ده انا مش معاه خالص لانهم حتى لو بيحبوا بعض

فى اول فترة ملل او صعوبه فى سير العلاقه بينهم هوبا فركش وعقل عيال بقى بعيد عنك

لو اتدخلتي ما بينهم يبقوا يتنيلوا يتخطبوا دوغري ويتهببوا يتجوزوا

انما لو هاتتدخلي عشان لسه يفضلوا يحبوا بعض شفوي ويسنسنوا لبعض من ورا اهاليهم ابسلوتلي هايفركشوا تاني

عيال هبله وصداااااااااع

تعيشي يا قمر يا قاضي الغرام ياحنين انت ههههههههههههه

dalia يقول...

يا ضد التيار
هو ده كلام صالحيهم طبعا بس في حاجه انت مقلتيش سبب الخلاف يعني لو كان الخلاف بسيط ممكن يحصل التصالح بس لو كان حاجه فيه طبيعي مثل الكذب والخيانة عمر الصفات ديه ما بتتصلح حتى لو حلف الطرف الثاني والله العظيم تلاته انه حيتغير لان ده طبع في الانسان منذ طفولته وصديقتك هى اللى تستطيع تقولك ده
تحياتي يا حيرانه

قيس بن الملووووح يقول...

"عندما يمضي بنا قطار العمر تسقط منا الكثير من التفاصيل الصغيرة التي قد تحول حياتنا الي براكين في الوقت التي لا تتحمل فيه الهزات البسيطة"

MaNoOoSh يقول...

هو صحيح موقف صعب
بس انا راييى بردو انك تتدخلى لو انتى مقتنعة انه اتغير بجد

نـــــور يقول...

ازيك ياقمر
وحشتنى مدونتك الضلمه

بصى بقى
انا رأيى تتدخلى طبعا وتحاولى توصلى ليها ندمه ده لانهم ماداموا لسه بيحبوا بعض يبقى يقدروا يصلحوا اللى انكسر بينهم

كانت هتبقى المشكله كبيره وكنت هقولك مش تتدخلى لو انها خلاص بطلت تحبه بعد اللى عمله معاها
انما مادامت لسه بتحبه يبقى خلاص

حاولى تلمى شملهم تانى
ربنا يجمعهم على خير لو ده الخير ليهم
ولو مش الخير يبقى يهدى كل واحد فيهم للخير

وربنا يقدرك يارب

فشكووول يقول...

ازيك يا ضد التيار .. فعلا بيقولوا الطبع بيغلب التطبع .. بيبقى فيه عيب فى التكوين السلوكى وعشان يتغير صعب وبياخد وقت كتير
تحياتى يا ضد التيار

شبــ اون لاين ـــاب يقول...

♥Happy♫ ♥ ♥ VaLnTiNe♫ ♥ ♥ DaY ♥ ♥ ♥

Unknown يقول...

ادعيلهم بالصلاح والهدى
وادعيهم للصلاه والقرب من ربنا
وربنا يكتبلهم اللى فيه الخير دنيا واخره

ومفيش حد فى الارض هيمنع قدر ربنا الى ربنا رايده هيكون
المهم يقربوا من ربنا والحب الى بيكبر صح بيفضل كبير
لكن الى بيبدأ غلط حتى لو كانوا مخطوبين ربنا بيحرمهم من بعض بالمعاصى بتاعتهم
عشان كده يقربوا من ربنا احسن

وربنا يصلح ويكتب اللى فيه الخير
اختك : بنت الشمس



دعوه لمقاطعة الفلانتاين
الفلانتاين بدعه
وكل بدعه ضلاله وكل ضلالة فى النار
الحب كل يوم بين الزوج والزوجه ممكن نهاديهم فى اى وقت ومنأيدش البدعه دى
الام والاب مش محتاجين اعياد عشان نثبتلهم حبنا
اخواتنا واصحابنا وجيراننا
اسلامنا بيدعى للحب فى كل وقت
بكلمه بنظرة بابتسامه

قال صلى الله عليه وسلم ( الابتسامه فى وجه اخيك المسلم صدقه ) وقال ( الكلمة الطيبة صدقه )

عسى اكون بلغت اللهم فاشهد

طـائر الليــل الحـزين يقول...

ايه يا قمر
بجد واحشتينى جداااااا
وبجد من حظى أنى كنت مخنوقة من المذاكرة
وقولت لما اشوف المدونة اللى قربت أنساها من كتر ما أنا مش ببص عليها
وبالصدفة فى كلام حسيت أنى عايزة أقوله فنزلته فى بوست
وقولت ابص على مدونتك لقيت بوستك وعاجبنى جدااااا
وعلى فكرة القصة دى بقت شايعة قوى
بغض النظر عن التفاصيل بس شكلها بقت موضة أننا نعرف قيمة الحاجة الا لما تضيع من ايدينا وبعدين نرجع نندم
عارفة انا رأى انك لو فعلا تقدرى تعملى حاجة متتردديش لحظة وتحولى تخليهم يدوا لروحهم فرصة تانية
وربنا سبحانه وتعالى هو اللى هيقرر اذا كانوا هيكملوا والا لاء
تسلمى يا قمر
الحق امشى بقى
لحسن الوقت وانتى فاهمة
تحيااااتى

Maha Shahen يقول...

أبدئى محاوله مع كل واحد علي حدا الاول
علي الاقل تعملى تمهيد لموضوع انك هتتدخلى لأصلاح الوضع بينهم علشان لو لا قدر الله حد فيهم رفض الصلح او الرجوع تبقى شوية الصدمه هينه عليكى
لأنه رفضه هيكون قاطع وبكلام وكأنه زعلان منك انتى
حاولى بهدوء تجمعى الطرفين ويحاولوا يتفهموا مع بعض من جديد وربنا كريم
بالفعل الحب بيعمل المعجزات وممكن انسان يغيره فعلا الحب
لأن الحب بيتعامل مع القلب ويخليه رقيق ولين ويزيل منه القسوه الى حد ما

وبالتوفيق يا رب واكيد ربنا هيعينك لأنك قاصده الخير

تحياتى

طوبه فضه وطوبه دهب يقول...

اقولك نصيحتى اوقات كتير لما فى حاجات بتنكسر جوه البنت لو الدنيا اتهدت مش ممكن تتصلح تانى لانها بتسيب شروخ صعب اوى تصلحها وبتعمل جوانا شقوق حتى الزمن مابيقدرش يعالجها انصحى من بعيد واستنى رد فعل الطرفين لو لسه عايزين بعض هتحسيها لو هى لسه مش هاين عليها كرمتها يبقى خلاص الموضوع كده خلص مافيهوش كلام تانى

Soul.o0o.Whisper يقول...

ضد دودىىىىىىىى

أولا معلش على التأخير فى الزيارة يا قمر

ثانيا عاوزة أقولك إنى أتحطيت فى موقفك دا
و الاتنين عندى كنت باعتبرهم هدية من ربنا

رغم ان الموضوع كان فى اطار شرعى وفى النور


بس أحب اقولك ان ما ينفعش يكون فى طرف تالت فى الموضوع
صدقينى ما ينفعش


لازم البداية تيجى منه
و لازم هما الاتنين اللى يقنعوا بعض بإنهم لسه متمسكين ببعض



لأنك لو أدخلتى
صدقينى بتكونى الشماعة لو حصل حاجة
مهما كانت العلاقة بينكم و بين بعض
و هتخسريهم هما الاتنين


مش عارفة هتكون ايه وجهة نظرك
بس دى وجهة نظرى







خالص ودى يا قمر

aMr saYed يقول...

انا من راي هو انا جاي اقول راي بعد اما نزلتي البوست بسنتين يلا مش مهم اقول راي بقا بجد اصلحي ما بينهم لان كان قدامي حالة مشابه جدا للحالة الي معاكي بس للاسف معملتش حاجة وقولت هيرجعوا تاني زي ما عودونا و كده خلاص راح الحب هي اتخطبت وهو عمال يرتبط بالبنات و لسه بيحبها ارجوكي لازم تتدخلي من اجل انقاذ قلبين ممكن يبقوا حاجة

متبقيش سلبية وادخلي


يلا على رنات بقا


تحياتي