Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الأربعاء، 4 مارس 2009

قولا لا فعلا

بقينا فى زمن الكلمه المسموعة و الفعل الغير متاح فى جميع جوانب الحياة

الاباء بيربوا الابناء على عدم الكدب و احترام الثقة و الصراحة التامة و عدم الخوف و لازم تقول الحق و لو على رقابتك ..الخ

نيجى بقى للواقع .. المثل المعروف الاب او الام موجودين و بينكروا وجودهم لما حد يتصل .. المبرر انى مش قادر اتكلم او مش حابب اكلم اللى بيتصل او مشغول

الاب ليه علاقاته هنقول محترمه لكن مخفيه عن الزوجه و المبرر اصل مقدرش اعمل كده قدامها لانى بخاف على مشاعرها

الام ليها علاقاتها اللى بردو محترمه لكن مخفيه بردو عن الزوج و المبرر هو هو

(خيانة ثقة و كدب و عدم صراحة و ..الخ) يعنى قولا لا فعلا

الصداقه اسمى شئ فى الوجود وهتكلم عن صداقة البنات لان الأولاد قليل قوى الصراحة لما ألاقى فيها خيانة اصلا او اقوال لا افعال فيها

واحده  تفضل تقول اسس و قواعد الصداقه وحب لأخيك ماتحبه لنفسك ..الخ و تنصح الناس

نيجى نشوف الواقع .. تلاقيها بتخون او تغدر او تغير من الصديقه و ماتتمناش الخير ليها .. يعنى قولا لا فعلا

راجل تقعد تتكلم معاه عن المرأة وحقوقها تلاقى كلامه انه مؤيد حرية المرأة مدام فى حدود الشرع و الدين .. و لازم المجتمع يبطل تخلف و يعرف انها كائن حى زيها زى الراجل .. ممكن يكون فى علاقة مابين الجنسين مدام فى حدود الاحترام و يضرب بعرض الحائط العادات و التقاليد

نشوف الواقع .. نسخه مصغره من سى السيد ولا فى حرية و لا حقوق الشغل ممنوع و لو فى كلام يبقى ممنوع مع الجنس الاخر حتى لو كان قد ابوها .. و فى طبعا اللى لازم و مجبر بسبب ظروف المعيشة بيوافق ان المرأة تشتغل بيبقى واقف بالمرصاد اتكلمت مع مين و عملت ايه و هكذا ... قولا لا فعلا

شخصيه ما (راجل او ست ) تقعد تتكلم عن المبادئ و القيم و الاخلاق و المفروض و الواجب

ننزل الواقع .. تلاقيها بتضرب بعرض الحائط كل القيم و الاخلاق و المبادئ .. قولا لا فعلا

كل النماذج دى للأسف موجودة بينا فى الواقع و اشخاص ممكن نقابلهم فى الحياة كتييير .. يقولوا كلام و الفعل يكون العكس

مش عارفه ليه بجد احنا بقينا كده ليه الواحد مش قادر يكون قد كلامه .. ليه مدام احنا بنعمل حاجه بنقول عكسها .. ليه مدام الواحد مش مقتنع باللى بيعمله يعمله اصلا

بنعترض قوووى على الحكومة و المسؤولين انهم بيقولوا كلام و بيعملوا عكسه

و احنا نفسنا بقينا بنعمل كده .. و ده اللى بيأكد كلامى ان الاعتراض بشده هو القبول بعينه زى ماقولت فى بوست فات

و ماحدش يقولى فى مبادئ ممكن تتغير مع تغير الزمن لكن المبادئ اللى اتربينا عليها و اللى الدين بيقول عليها دى لا يمكن تتغير .. لا كل المبادئ دلوقتى بتتغير و ربنا يخلى ثقافة التبرير اللى بجد بقينا نستخدمها علشان نحلل كل فعل بنعمله و ماحدش يقول عليه غلط .. رغم الاقتناع انه غلط بس للغير مش لينا احنا

 ولا انتم ايه رأيكم ؟؟

و دمتم سالمين

هناك 142 تعليقًا:

عاشقه وغلبانه يقول...

يمكن اكون اول رد
هيييييييييييييه

عاشقه وغلبانه يقول...

مش كل الناس
الانسان الصادق مع روحه تلاقي فعله يتماشي مع قوله
اما الانسان اللي غاوي يكدب علي روحه ده حاجه تانيه

صبرني يارب يقول...

انا هناااااااااا

اول تعليق ولا ايه الظروف ؟؟؟؟؟؟

نروح نقرا ونيجى يا قمر

simply me يقول...

ياااااااااااه انا متهيئلى ان ماعدش حد بيتعامل بصدق خالص اليومين دول

وتلاقى كل حياته نفاق فى نفاق ويقول عليه ال ايه زوق وشياكه
وهو بيكلمك بوش ومن وراكى حاجه تانيه

وناس كتير تتكلم عن الصح والمفروض والواجب ووقت الجد مصلحته اول شئ ولو هيضر او باذى اى حد

عارفه بقى لو واحد تمسك بمدأ وحاول يعمل الصح ويعارض التيار السائد
يبقى رجعى ومتخلف وقفل وايه الكلام اللى بيقوله وبيعمله ده

ياستى ادينا بنحاول نكون صح ونشوف الدنيا هتعمل فينا ايه

Unknown يقول...

السلام عليكم
مفيش مبادئ بتتغير الا ان تغير الايمان والفكر كامل
اما التبرير فدا ببساطة لاننا مش عندنا ثوابت ولا ايمان بأشياء كلنا بنثرثر وخلاص وننزل على هوا
والا ما كان دا حالنا فى كل شئ

mohamed ghalia يقول...

ضد
معاكى حق ناس كتير بتقول كلام وتيجى تشوفى واقعهم تلاقيه مليش اى علاقة بكلامهم
فعلا مشكلة كبيرة
محتاجة ترتيب أوراق وثقافة
دمتى بكل الود
كان نفسى بجد اتعرف عليكى

رحلتنا في الحياة يقول...

بصى احنا فى زمن نبيع فيه القيم والمبادئ وكل شئ علشان الناس تعرف تعيش فى تصورها

*الطالبة عفو الله *زوزو يقول...

موضوع مهم فعلا

للاسف هذا ما اصبحنا نراه الكلام في ناحية و الواقع في ناحية تانية خالص

و لما نسال نفسنا ليه بنقول حاجات عكس ما بنفعل حقيقة مش بنلاقي جواب مقنع ممكن نقول الظروف او مواقف بتضطرنا انحنا نفعل حاجات عكس ما نقول

بس سبب غير مقنع طبعا

لازم نراجع انفسنا و نحدد شخصيتنا و لا نقول مالا نفعل

و ربنا يهدينا جميعا و يتبثنا على الحق

بوركتي حبيبتي فعلا موضوعك يستحق المناقشة

دمتي في حفظ الله

رئيس جمهوريه نفسى يقول...

اهو النوعية دي التى ينطبق عليها قول المولى تعالى يقولون ما لا يفعلون للاسف فى ناس بتتاخذ المبادي والمثل والكلام الكبير مجرد استعراض فى قعدت النقاش انما تيجى للفعل تلاقي لا شى فما يتاخذش من النوعية دى غير الكلام ويس

صبرني يارب يقول...

اها
دي اسمها ازداوجية الفكر والفعل

وبعدين فى نقطه تانيه مهمه احنا كبنى ادمين وكمجتمع متخلف زي ما انتم عارفين هههههههههههههه

عندنا قصور في التفكير وعدم حياديه فى الحكم على الاشياء

وانا كنت كتبت بوست عن التبرير ده برضه

تحياتي يا جميل

مسدس صغير يقول...

المبادئ ثابتة ثبوت الجبال لا يمكن ان تتبدل او تتغير ولكن الذى يتغير هو مدى نظرتنا للمبادئ من وجهة نظرنا فكما اشرتى ان شخصا قد يرى الحوار اللائق المحترم مع سيدة او انسة عاديا نفس الشخص لا يقبل بأن يحدث هذا من زوجته وهكذا
..
اشكرك على البوست الاكثر من رائع والهادف
ولنا فى رسول الله صلى الله عليه وسلم القدوة والاسوة..

blue-wave يقول...

فيه بيت شعر بيقول
لا تنه عن خلق وتأتى مثله
عار عليك اذا فعلت عظيما

للأسف البيت دا ماشى على ناس كتير اليومين دول هما اجبن من انهم يلتزموا بكلامهم ف بيحاولوا يطبقوة على غيرهم وبس
بوست رائع كالعادة وازداد روعه النهاردة وطبعا انتى عارفه ليه:))

سمكه واحده يقول...

الصديق المذيف كالظل يمشي ورائي عندما اكون في الشمس ويختفي عندما اكون في الظلام,
بالنوسبه للصداقه فانها بعتبرها من اسمي واهم وانقي العلاقات الانسانيه

بالنسبه للكلام فأحنا بنكلم اكتر ما بنعمل ودي حقيقه مؤسفه

بس بيني وبينك كلمتين كده ومعرفش ممكن تفكيري ميعجبكيش او تستغربيله
انا عن نفسي لو كنت راجل وارتبطت بواحده ست مثلا علي سبيل المثال مش هوافق انها تعرف حد ولا حتي راجل كبير سننا ولا يحزنون وكمان تقطع علاقتها نهائيا باي حاجه تانيه وبحترم الراجل اللي تفكيره كده حتي لو كان تفكيره استبداي طلما في النقطه دي برحته بقي بس مش بغباء لاء بس تقطع اي حاجه علي سبيل الصداقه الزماله الكلام ده كله

اما لو عن نفسي وارتبطت بقي براجل فمش عارفه لاني مقدرش اخليه يقطع علاقته باي حد لو اتكلمنا انها زماله او علاقات انسانيه مش اكتر بس منكرش اني ممكن اموت من الغيره بس محبش اظهر ده لان اكتر حاجه الراجل بيكرها في الست حب التملك والشكوي الكتير والقمصه المتكرره وانها تحسسه بالسيطره والخنقه وانه مش حر
اما الست تموت في تملك واستبدادالرجل لها وخاصه في النقطه دي تحديدا لان تركيبه الست تختلف عن تركيبه الرجل ودي حقيقه وواقعه
عذرا لاطاله

سمكه واحده يقول...

اه وبالنسبه لان في مبادئ بتتغير معتقدش لو الواحد مؤمن بمبدئ اكيد مش هيتغير لان المبادئ مش بتتغير مهما اتغير الزمن

المعتصم يقول...

بسم الله الرحمن الرحيم
السلام عليكم ورحمة الله وبركاته
سويت
تحياتى
والله معاكى حق
كلنا بدون استثناء بنعمل ولو جزء من اللى بتقولى عليه ده قولا لا فعلا
يعنى فى البيت الكذب حرام واللى يكذب يروح النار بس لو جه عمو فلان قوله بابا مش هنا
طب مش ده كذب وهروح النار
لأ دى كذبه بيضه ومافيهاش حاجه
والتانى فى الشغل لازم نعمل ولازم نسوى واول ماالمدير بتاعه يقوله انت كده ممكن تاخد جزا ويأخر الترقيه
يبقى ياباشا انا مش همضى معاهم على الشكوى دى خالص دا انا بتاعك ياباشا
وغيره وغيره وغيره
والصداقه انتى بتتكلمى على البنات بس لأ فيه كده برضو فى الاولاد وبنفس النسبه كمان
مش عارف دى بقت ثقافه دارجه وبقيت فى نظر الناس حاجه عاديه ومحدش بيقف قدامها او يقول هو ليه بيحصل كده
واللى بيتمسك بمبادئه الناس بتقول عليه عبيط (وده حصل معايا انا شخصيا انى كنت فى موقف معين ولو حصلت حاجه انا بقول عليها غلط انا كان ممكن استفيد من وراها ماديا كويس خالص بس انا طبعا قلت دى غلط وماينفعش ياخراااااااااابى على اللى اتقال عليا عبيط واهبل ومايعرفش مصلحته اصله على نياته اصله ده متوكل وعامل فيها بتاع ربنا )
هههههههههههههههههههههههههه
خلاص بقت الثقافه السايده اننا نقول على الغلط تفتيح مخ وفهلوة وشطارة ونقول على الالتزام بالمبادئ طيبه وعبط
الموضوع بقى صعب ومافيش حد بيقتنع بكده وحتى اللى مقتنع بيخاف يتكلم علشان محدش يقول عليه عبيط ومش مفتح
بوست هايل ياسويت
تقبلى مرورى وتحياتى
ودمتى بكل خير وود
والسلام عليكم ورحمة الله وبركاته

عاشقه الرومانسيه يقول...

على فكره رغم انى اتفق معاكى ان فى نماذج من دى فعلا
بس برضه فى ناس لسه كويسه
اعرف واحده بتفضل مصلحه صديقتها على مصلحتها الشخصيه وتؤثرها على نفسها
دى انسانه بتقدر قيمه الصداقه فعلا وعارفه حق الصديق فعلااااا
بس للاسف اللى زيها قله قليله جدا او تكاد تكون نادره

البوست تحفه
الله ينور عليكى ياقمر

اناضيفتك على الميل ابقى كلمينى اوك؟

تحيـــــــاتـى

غير معرف يقول...

والله بجد تسلم ايدك ياضد
كلام في الجون الازدواجيه بتاع تفكير الافراد اللي اكيد اتنقلت للمجتمع وبقت عامل زي المرض المعدي هي نتيجه اجيال اتربت غلط وهتربي ولادها غلط وولادها تربي ولادها غلط ودوخينا يلمونا وعلي فكر الغلطان بس هو اللي بيحاول يوجد لنفسه الف مبرر لكن الصح مش محتاج لمبررات عشان ياكد الصح النور مش عاوز شمعه عشان نمشي فيه سلام ياقمر

Soul.o0o.Whisper يقول...

سويتىىىىىىىىىىى

فعلا معاكى حق فى كل كلمة قولتيها

بأستغرب فعلا
الناس تلاقيها بتقول كلام
و تنقد الناس على أفعالها
فى حين لما تيجى تبصى
تلاقيها بتعمل اللى كان مش عاجبها من شوية

مش عارفة دا ايه بالظبط



بجد ربنا يرحمان من التناقض اللى احنا فيه دا




خالص ودى يا قمر

Kiara يقول...

هروح الشغل واجي ارووووووود

بحبك ياانتيمتي الغاليه

الميكروباص يقول...

احيانا لا يوجد رأي محدد للناس أو اسس يتم بناء الكلام على اساسها
ولكن بنفصل رأينا حسب الموقف اللي احنا فيه
يعني انتي حاليا تكلميني عن حقوق المرأه اوافقك في الرأي عشان الامور تمشي وارضيكي والامور تنتهي
ولكن ده لا علاقه له بما سأفعله مستقبلا!
ولا تسألي عن السبب
هو احنا كده

حواء يقول...

بجد برافوا عليكي
فعلا ثقافة التبرير مشكله كبيره جدا
انتي عارفه مره في خناقه من خناقانتي انا وجوزي
اللي ولا مره لقيته بيعترف بغلطه
لقيت اخويا كان قاعد والكل بما فيهم جوزي متوقع اني هعقد ابرر اصلي هو عملي اصل سوالي اصل كذا
سكت وقولت اه انا غلطت وبصيت لجوزي وقولتله كبسه صح
لقيته اتكبس بجد ومكنش متوقع ردي ولا واحد في الميه
وقولتله كنت فاكرني هقاوح واجادل صح
وبصراحه لقيت مبدأ الاعتراف بالغلط اقصر طريق لاحترام نفسي لنفسي وانتهاء المشاكل
وعلي الاقل مش هتكون منافق بينك وبين نفسك
لان لو حصل العكس تأكدي ميه في الميه اننا هنوصل في الاخر للعلاج عند دكتور نفسي
بس أنا مستغربه جدا من حاجه
فين الضمير مع الناس ديه
ليه الواحد يقعد يفكر بالساعات علشان بس يغلط اللي قدامه ازي
أو يلاقي مبرر للي بيعمله علشان يبقي قدام الناس راجل مبيغلطش
هو فيه حد مبيغلطش
المعصوم من الخطأ خلاص مااااااااااااات
تحياتي ياسويت

روابط يقول...

عزيزتى

فى زمن المسخ, لا تسألى عن الأخلاق والقيم فى زمن تهاوى فيه الجميع, وأصبحت أغلى أمانينا ان نتجنب السقوط قدر الأمكان

أكثر ما يثير دهشتى, ليس الأنحدار الرهيب الذى نحياه نحو الهاوية, ولكن ان الكل ينتظر مصيره بلا أدنى مبالاه

تحياتى

الازهرى يقول...

الازدواجية فى مجتمعنا اصبحت امرا غريبا بالفعل وهذاعلى نطاق واسع الى حد كبير

وللاسف لا ينبته الاباء الى تلك الامور وانعكاسها على ابنائهم وما تغرسه فى داخلهم من حيرة تجاه المبادىء وتطبيقها فى المجتمع

تحياتى دوما

بنوتة يقول...

السلام عليكم
عارفة انا كنت لسة كاتبة بوست من كام يوم اسمه لا تفعل اما انا سأفعل
عن التناقضات الكتيرة فى تربية الاطفال وشرحت موضوعه طويل شوية بالمواقف
لكن انتى فعلا اتكلمتى عن الناس العادية كمان يعنى تلاقي بنات لما تشوف بنت وولد مع بعض ده عيب وحرام أما هما عادى ولما تيجى تسأليهم يقولولك جست فريند
يعنى حرام للناس وحلال ليهم والناس بتغلط لكن هما لالا احنا عارفين الصح والحدود احنا متربيين وكل واحد بيقول على نفسه كده
دى الرخص ايللي كل واحد بيديها لنفسه وبتحكم على الناس بالظاهر رغم انهم ممكن يكونوا احسن مننا
عشان كده الناس لو اتبعت الحلا والحرام مش هيحصل اى خلط
"الحلال بين والحرام بين "
تحياتى ليكى

princess يقول...

هيا المشكلة كمان ان الاباء بطلع ولادها كده
هديكى مثال بسيط التليفون بيرن فى البيت والاب يقول لابنه اى حد انا مش موجود
وبعدين لما الولد يكدب يبقى عيب وغلط
طب ماحضرتك يا استاذ بتكدب قدامه
ايه ازدواجية التفكير دى
فعلا اغلب الناس بتتكلم وبس
انا عندى واحد يعمل حاجة غلط وهو مقتنع احسن ما واحد يعمل حاجة صح لمجرد انه يتقال عليه انه بيعمل حاجة صح
تحياتى:))

elsha3er يقول...

كلامك مظبوط والمبادئ لا تتبدل بس هى دى الحياة اما حكاية غيرة الصحاب وكدة دة بقى بيترتب على اختيار الصديق من الاصل

بس انا اوافقك فى كل كلمة


تحياتى


احمد الشاعر

فتــافيت (رحاب الخضري) يقول...

كنت هاكتب بوست زي ده والله بس المتفجرات طيرته من دمااااااااغي

احنا ياروحي في زمن المسخ

مافيش قيم ولا مبادئ والله

ربنا يستر علينااااااااا

EMMY BABY يقول...

الله الله الله

بجد موضوع تحفة والله وكان علطول شاغل بالى وانتى شقتيه باسلوب جميل اوى وشامل

للاسف مش هقدر اقلك لا لان الواقع فعلا بقى كدة نقول حاجة ونعمل عكسها

ولا فى مبادىء ولا بتاع

ربنا يرحمنا من عنده

تحياتى

ايمى

عمرو يقول...

كوكتيل من الأمراض النفسيه بقينا بنلاحظها فعلا فى شخوص حياتنا اليوميه
اللى بتتكلمى عنه ده فعلا مرض العصر اللى هو اٍزدواجية الفكر و الشخصية
ثقافه سادت المجتمع ككل و تحتاج للكثير من المجهود لاٍنتزاعها خاصة أن لا أحد يهتم
بوست كويس بجد

أم فريده يقول...

ازيك يا جميل عاملة اية

بصى دة مرض العصر دة والعصور اللى فاتت وكمان اللى جاية

زى سى السيد فى ثلاثية نجيب محفوظ

كان فى البيت حاجة وبرة حاجة تانية وبيحرم على ابنة الكبير اللى هو بيعملة

عشان كدة مش بصدق كلام اى حد بسهولة التزييف بقى كتير اوى

Sweet Violet يقول...

عاشقه و غلبانه
----------
مبروك عليك ياقمر اول تعليييييييييييييق (:

أكيد طبعا ياقمر انا ماقولتش ان الكل كده على فكرة

بس انا بقول ان فى نماذج كده للأسف

المشكله بقى ان اللى بيكدب على روحه بيصدق نفسه انه مش كداب اصلا

نورتى ياقمر (:

Sweet Violet يقول...

صبرنى يارب
------------
للأسف طلعتى تانى تعليق بعد الارضى ((:

ههههههه انا كده فعلا هبدأ اصدق اننا مجتمع متخلف ((:

معاك فى الكلام .. لكن الحل ايه ؟؟؟

هراجع المدونة بتاعتك و اشوف البوست

و اهو توفير بردو لحبر الكيبورد علشان الواحد ماينزلش بوست مخصوص بقى عن ثقافه التبرير (:

دايما كده يارب موفرة ليا الحبر امييييييييييين

نورتى (:

Sweet Violet يقول...

Bondoka
------------
لا فى لحد الان ناس بتتعامل بصدق لكن قليل قووووى

و اعتقد ان الانسان الصح المفروض مايهتمش اصلا بكلام الناس يقولوا عبيط يقولوا رجعى مش مهم .. المهم انه يفضل على مبادئه

نورتى (:

Sweet Violet يقول...

نهر الحب
----------
عليكم السلام و رحمه الله و بركاته

لو كل واحد قدر يبدأ بنفسه و يصلح فيها الحال هيتغير

لو رجعنا تانى للقيم و الاخلاق و المبادئ اللى الاسلام قال عليها

الحال بردو هيتغير

ربنا يهدينا

نورتى (:

Sweet Violet يقول...

محمد
---------
و انا و الله يامحمد بجد زعلت جدااا لما عرفت انكم كنتوا موجودين و انا متعرفتش عليكوا

يلا حصل خير (:

Sweet Violet يقول...

ايوشة
-----------
العيب مش فى الزمن العيب فينا احنا

احنا اللى بقينا كلام من غير فعل

المبادئ بقت مجرد اشعار فقط نكسب بيها هتاف الناس و حبهم المؤقت

نورتى (:

Sweet Violet يقول...

الطالبة عفو الله
------------
مهما كان المبرر عمره مايكون مقنع

(و ربنا يهدينا جميعا و يتبثنا على الحق )

اللهم امين

نورتى(:

Sweet Violet يقول...

رئيس جمهوريه نفسى
-----------
النماذج دى بتخسر احترامها لنفسها قبل ماتخسر احترام الاخرين بعد مابتظهر افعالهم

نورت (:

Sweet Violet يقول...

مسدس صغير
-------------
عليه الصلاة و السلام

كده يبقى الشخص نفسه متناقض و مش مؤمن بالمبدأ من الاساس

و زى ماقولت بيحلل لنفسه اللى بيحرمه على الغير

ازاى انا اشوف ان ده شئ عادى و فى نفس الوقت غير مقبول بالنسبه ليا ؟؟؟

نورت (:

Sweet Violet يقول...

blue-wave
-------
هما مش اجبن اكتر من انهم ماشين هو الكلام عليه جمرك

ايوة عارفه ((:

و بجد اشكرك على الكلام التانى اخجلتم تواضعنا والله (:

نورت

Sweet Violet يقول...

سمكه واحده
------------
معاك فى كلامك ان الست بتحب انها تحس ان زوجها بيغير عليها

لكن اختلف معاكى فى نقطه الراجل

المفروض اصلا من غير ما الست تتكلم هو اللى بيقطع من نفسه

معلش انا ماشيه مبدأ اللى مارضهوش على بيتى مارضهوش على بيت غيرى

و المبادئ لا تتجزأ

و طبعا المفروض انها ماتتغيرش زى ماقولتى لكن اللى بيغير مبدأ هو كان ماشى عليه يبقى اصلا هو مش مفتنع بيه من الاساس

ولا طولتى ولا حاجه ياقمر ده انتى نورتينى (:

Sweet Violet يقول...

المعتصم
----------
و عليكم السلام و رحمه الله و بركاته

موضوع صداقه الولاد بجد انا الظاهر و اللى شوفته قليل قوى لما لاقى اقوال لا افعال

معظم الخيانه او الغدر بشوفها بين البنات

ممكن لانى ماكنتش ولد قبل كده و مش متعمقه فى الصداقه اللى بينهم (:

^^^^
موضوع ان الانسان يخاف يتكلم علشان مايتقلش عليه عبيط

انا مقتنعه بحاجه ان مدام انا ماشيه على مبدأ و المبدأ ده صح و مش مخالف للدين ولا المجتمع

يبقى هتكلم .. قالوا عبيطه قالوا هبله مش مهم عندى بقى

ومنكرش انى خسرت حاجات كتير على المستوى الشخصى بسبب كلامى

لكن الصراحه انا متعودتش امشى مع التيار و انافق حد

لان كده انا نفسى هتحول قولا لا فعلا

و ربنا يهدينا امييييييين

عليكم السلام و رحمه الله و بركاته

Sweet Violet يقول...

عاشقة الرومانسية
--------------
انا على فكرة ماقولتش ان الناس كلها بقت كده

لا فى ناس لحد الان كلامهم زى افعالهم

لكن زى ماقولتى بيكونوا قليل قوووى

و انا قبلت الاضافه ياقمر واشوفك قريب ان شاء الله على الميل

نورتى (:

Sweet Violet يقول...

mayada
-----------

ربنا يبشرك بالخير .. يعنى لا امل فى اصلاح هذا المجتمع من هذه الازدواجيه ):

بس على فكرة يبقى كده المبادئ فعلا هتنقرض زي الديناصورات بالظبط

لان واحد بيقول كلام عن المبادئ اما الفعل بيضرب بيها عرض الحائط

و المجتمع دايما بافعاله مش بكلامه )):

بس بجد عجبتنى قوووى الكلمه دى

النور مش عايز شماعه علشان نمشى فيه

نورتى ياقمر (:

Sweet Violet يقول...

سووووووووووووووول
--------------
اللى هتعقدنى من الياء قريب (:

بصى انا الصراحه لما بشوف حد كده

دايما بقول انه مريض بمرض حب الناس فقط لا غير

يعنى بيتكلم بس علشان الناس تقول الله ده واحد صاحب فكر و مبدأ و ..و..و ألخ

وهو فى الحقيقه غير كده اصلا

نورتى (:

Sweet Violet يقول...

كيارا

--------------
و انا منتظرة ياقمريتى

و انا كمان بحبك

اممممممموة

Sweet Violet يقول...

لورنس العرب
------------
لا مش الكل كده

انا مدام معترضه على موضوع او مش مقتنعه بيه هقول انى معترضه و ليه

لكن علشان امشى الامور اوافق على حاجه رافضها ؟؟!!!

لا طبعا

نورت (:

Sweet Violet يقول...

حواء
-----------
بصى هو عموما الانسان اللى بيبقى كده سواء راجل او ست

بيبقى ضميره نايم فى قاع المحيط اصلا

عدم الاعتراف بالغلط ده غلط اكبر فى حق الانسان نفسه

نورتى بالنيولوك (:

Sweet Violet يقول...

حازم سويلم
-------------
ماهو لو الانسان انتظر مصيره بمبالاة ماكنش حصل الانحدار اصلا

نورت (:

Sweet Violet يقول...

الازهرى
-----------

لو الاباء فعلا اخدو بالهم من تصرفاتهم

اعتقد كان فى حاجات كتير اتغيرت

نورت (:

Sweet Violet يقول...

بنوتة
----------
عليكم السلام و رحمه الله و بركاته

طبعا اتفق معاك فى ردك و لو فعلا الواحد اتبع الدين فى كل اتصرفاته و كلامه

كل التناقض ده هينتهى

بس بشرط انه فعلا يتبع الدين صح مش يفسره حسب مذاجه

نورتى (:

Sweet Violet يقول...

princess
-----------
الانسان عموما الاحسن ليه انه يكون مقتنع باللى بيعمله قولا و فعلا

افضل من انه يبقى متناقض من داخله

نورتى (:

Sweet Violet يقول...

أحمد الشاعر
--------------
ماهو للأسف الانسان مابيعرفش مين الصديق الحقيقى غير بالتعامل

علشان فعلا يعرف هل الكلام زى الفعل ولا مجرد اشعار عن الصداقه

نورت (:

Sweet Violet يقول...

فتافيت
---------
اللهم امين

و معلش بقى المره الجايه لما تيجى تكتبى حاولى تشوف الامن عندكم (:

نورتى (:

Sweet Violet يقول...

ايمى الجميلة
-------------
اللهم اميييين

نورتى ياجميله .. بجد كان نفسى اشوفك فى اللقاء (:

Sweet Violet يقول...

عمرو
-----------
لو كل واحد بدأ بنفسه و رفض التعامل مع الاشخاص اللى بيفكرو و يتصرفوا كده

الثقافه دى هتنتهى من المجتمع ده كل

نورت (:

Sweet Violet يقول...

زوجة عنيدة
-------------
الحمدلله ياقمر (:

هى دى فعلا النتيجه انعدام الثقه مابين الكل

ربنا يهدينا

نورتى (:

ستيتة يقول...

الموف اللذيذة

ماهو ده زمن المصغرة يا سويت

الأقوال سهلة .. الأفعال صعبة

فيكتفي الحمقى بالأقوال ويلبسوها كرداء يداري مساوءهم

بس مش معاكي في حكاية حقوق النسوان
الراجل مهما اتكلم كتير جواه مخزون تخلف رجعي قديم .. يرجع لعصر احمس

وعليه مفيش ست بتحترم عقلها بتصدق البلا بلا والوك لوك اللي بيقوله

ومع هذا شفت وعاشرت رجالة محترمة من غير اي كلام بيظانتي بيحترموا زوجاتهم ومفيش شغل حلق حوش لا في الشغل ولا البيت

بيبقوا فترة كده صغنونة يشوفوا البنت اللي ها يتجوزوها
ولما بيلاقوها محترمة واستقلالية
يأما بيرضوا بيها على حالها "زيجة ناجحة"
ياأما يعترفوا بالحقيقة لنفسهم وانهم اضعف من انهم يتجوزوها "نعمة وخير وخد الشر وراح"
ياأما "وهنا المهزلة" يتجوزوا قال ايه ويحاول يغيرها "وهنا الصدام المروع وبتخلعه زي اي سنه مسوسة

حلو البوست ده
سوري ع التطويل
تحياتي

”*°•.˜”*°•..سونه..•°*”˜.•°*”˜ يقول...

السلام عليكم .
لو هنقول ليه هنفضل نقول ونقول
اكيد فى اسباب كتير بس كل واحد هيقول ظروف الحياه هى الى بتعمل كده فى الناس
وممكن يكون الشخص ده من جوه كويس بس من الى بيحصل حوليه بيطر يعمل كده
انا طبعااااااااا مش مع ان الواحد يغير كلامه لالالاء خالص .
وتعرفى عندك حق فى موضوع ان البنت او الصديقه بتغير ومش بتتمنى الخير للبنت الى هى عمله فيها اقرب الناس ليها اكتر من الولد
انا عن نفسى الخيانه كانت بتكون من البنت اكتر من الصديق . بجد كلامك حقيقى ويارب كل واحد يخلى بالو من افعاله اكتر من كلامه عشان الفعل هو الاساس مش الكلام .
تقبلى مرورى سونه .

Ahmed يقول...

قال الله تعالى : [ يَا أَيُّهَا الَذِينَ آمَنُوا لِمَ تَقُولُونَ مَا لا تَفْعَلُونَ * كَبُرَ مَقْتاً عِندَاللَّهِ أَن تَقُولُوا مَا لا تَفْعَلُونَ ] [سورة الصف : 2-3]

ازدواجية في حياتنا


اللهم لا تجعلنا ممن يقولون ولا يفعلون

الفراشة الصغيرة يقول...

تناول جميل للموضوع

س انتى عارفه المشكله ان مفيش حد يشوف عيوبه
وحتى الناس القريبه منه اللى هما المفروض مرايته ينفقوه علشان هو صاحب ليهم فازاى يعملوا كده

وبجد انا اخدتها قاعده قدامى اللى بيقول كتير
مش بيعمل حاجة من اللى بيقولها

بسمة انور يقول...

النفاق بقى امر طبيعى جدا
بس برده الحق علينا
احنا اللى خلينا حياتنا كدة بنيناها على الغش
ياريت نحاسب نفسنا الاول....ولا ايه؟

Kiara يقول...

للاسف يابت ياضد انتي

كلامك صوح ميه في الميه

والنماذج دي بتكتر اوي اووووووووووووي


المصيبه انه بيقعد يبرر يبرر لحد اما يصدق مبرره ويكون هو دا الصح وبيصدق الوهم اللي عقله صوره عشان الضمير ينام ويرتاح

عادي ياصبحتي طالما في شوشو شغال هنشوف كتير

elsha3er يقول...

لا كدة عندك حق انا معاكى بس فى ناس بيبان عليهم انا مش بقولك بالاحساس وكدة وكلام افلام لا والله اكيد كدة فى حياتك ممكن تكونى بصيتى لناس وما ارتحتيش ليهم صح

بس كلامك انا موافق علية


تحياتى

احمد الشاعر

د. ياسر عمر عبد الفتاح يقول...

كل ده من صور الشيزوفرينيا وإزدواج الشخصية وما يتبعها من تناقض الأفعال وإزدواج الحكم والكيل بمكيالين .. وايه الكلام الكبير اللى انا بقوله ده؟؟


الحاجات دى بقت من الطبيعى إنك تلاقيها
ومبقيناش نستغرب من التناقضات العجيبة فى حياتنا

وربنا يهدينا

بعبعه يقول...

يأمرون الناس بالبر وينسون انفسهم

اللهم نعوذ بك من ان نكون ممن يقولون ما لا يفعلون

تحياتي يا جميل

الربان يقول...

تحياتي

هذا هو انفصام الشخصية الذي يعاني منه الكثيرون.

قال تعالى : (يَا أَيُّهَا الَّذِينَ آمَنُوا لِمَ تَقُولُونَ مَا لا تَفْعَلُونَ* كَبُرَ مَقْتاً عِنْدَ اللَّهِ أَنْ تَقُولُوا مَا لا تَفْعَلُونَ)سورة
الصف.

لكن احنا اخدنا من الدين العبادات مثل الصلاة و الصوم و خلافه...

و تركنا المعاملات...مع ان الدين المعاملة.


تحياتي و تقديري

HeBa يقول...

معاكي حق

فعلا ناس كتير مبقتش بتتعامل بصدق دلوقتي

الواحد على وشك أنه يفقد ثقته في أغلب اللي حواليه

المشكلة إن فيه ناس بتشوف ده عادي

المهم إن الواحد بيحاول يتصرف بطريقة صحيحة وصادقة

Butterfly يقول...

انتى بتقلبى عليا المواجع ليه
الواحد مصدق انه بقى بينفض هههههه
على العموم دى حاجه فعلا من الحاجات اللى بتدايقنى أوى وهى منتشره أوى برده !!!

عروسة يقول...

معاكي حق معاكي حق هاتو دوا الضغط
بئا كدة يااختي رحتي التجمع وانا معرفش ماشي ماشي انا زحلانة خالص مالص ومفيش مسجات تاني
انا مين؟؟؟؟؟؟؟؟؟؟؟؟

Unknown يقول...

لان الصدق مع الناس مُكلف
اما الضحك على الذقون
والكلام اللى بيرضى
جمييييع الاطراف
فهو أسهل
وزمانا
ليس
زمن الابطال
ولا زمن التضحيات

M.a.r.y.o.o.o.m يقول...

والله يا بنتي كلامك 100 في 100
كل الناس كده
لا يغير الله ما بقوم حتى يغيروا ما بأنفسهم
تحياتي
اه نسيت اقولك
ده انا البت صحبتي اللي مفروض تكون صحبتي بتقولي انتي وشك لما بتجيبي النتيجة لحد بيبقي كويس قولتلها يعني المفروض الكلام ده ما بينا لما كلمت اختي وسألتها لقيتها بتتكلم بجد فحلفت اني مش هجيبها ولما بقولها قفلت في وشي السكه ربنا يهدي الجميع

شمس النهار يقول...

عندما يطابق القول الفعل
بيكون هنا الانسان متصالح مع نفسه ومع الاخر
مافيش ازدواجيه في الشخصيه
وده التوازن النفسي

aMr saYed يقول...

اخر تعليق
هههههههههههههههههههههه
ربنا يزيدك من نعيمه وعموما انتي بقا قد اصبتي

فعلا لا قولا

كتير اوي اوي نلاقيهم في حياتنا كده وفكرتيني بغناوة حلوة كنت بسمعها دايما بتقول

بابا تليفون قولوا مو هون بابا تليفون قولوا مو هون بابا يقولك هو مو هونيا بابا ما انت قولتي ان الكذب حرااام
بتيجي دايما على قناة طيور الجنة حلوة اوي

السلام ختاااااااام

kmt يقول...

السلام عليكم ورحمة الله وبركاته

اتأخرت شويه
بس جيت

فكرة الموضوع قريتها عندك من فترة بشكل مش مختلف كتير
بس واضح ان الموضوع مسبب لك قلق
بصي ياضد
احنا كا بني ادمين وبالذات المصيين اثرت فينا حاجات كتير وبقى عندنا كده زي ما تقولي انفصام
يعني البيت بشخصية والشغل بشخصية تاني والاصدقاء بتالته وهكذا ودا ناس كتير بتبقى محترفه ده بقصد
وناس تانيه بتكون بتعمله من غير ماتاخد بالها اصلا
اما اللي عايش بشخصية واحده مع الكل
زي كده
هو اللي بيتعب وبيعاني

انا ضد مسألة تبرير اي فعل
بس مش معاكي ان المبادئ ثابته او المفروض تكون لا
الموضوع في تشريعات الاهيه فدي ثابته على قدر علمنا
واحيانا بمرور الوقتفي بعض اشياء بتكون مفهومه بطريه وتتفسر بعد كجه بطريقه اخرى فهي برده مش كلها ثابته
الثبات في الكون ضد الكون نفسه لان الكون مش ثابت

الموضوع لو قعدت اتكلم فيه هاتكلم كتير لانه ليه كذا زاويه ممكن نبص منها
لكن
ودا مش تبرير
صحيح المجتمع ( كناس ) سلبياته اكبر من الايجابيات لكن مش كل اللي بيبان صح بيكون صح ومش كل اللي بيبان غلط بيكون غلط

تحياتي
الى اللقاء

kmt يقول...

السلام عليكم ورحمة الله وبركاته

مش عارفه كنت كتبت دلوقتي تعليق بس جوجل قالي خطأ ياريت يكون نزل
اما لو
فلي اكيد عوده مرة اخرى

تحياتي
الى اللقاء

حاسوباتيه يقول...

انا معاكي في كل كلمه قولتيها فعلا انتي صح لو كل واحد يقول الي بيعمله فعلا والي مقتنع بيه هنرتاح قوي مع بعض ياريت نعمل كده

eshrakatt يقول...

للاسف يا عزيزتى الجميع يبحث عن اطار شيك بحط فيه صورته ومش عارف ان الى حواليه شيفين الصوره مجرده عارفه تبع فيلم انا لا اكذب ولكنى اتجمل هل لو المجتمع بيقبل الافراد على مهياتهم هيكون الفرد مضطر للكذب معرفش بس هى اذدواجيه سافره

دمت جميله

طـائر الليــل الحـزين يقول...

ايه يا قمر
بجد بهنيكى عشان الموضوع ده فى الجووووون
عارفة ببص حوالية بشوف الكل ماشى كده بيقولوا غير اللى بيعملوه
مش عارفة ليه
نفسى اعرف الخلل ده جاى منين او ممكن الواحد يعالجه ازاى
والمشكلة اننا بنلقى امثلتنا العلية طبعا بيعملوا كده هما كمان
وللأسف منقدرشى ننتقدهم او نقولهم ان ده مينفعشى
تحيااااتى ليكى يا قمراية وعلى موضوعاتك الجاااااامدة

وردشان smilyrose يقول...

ضد يا حبيبة قلبى

اولا وحشتينى جدا

ثانيا برغم كل الظروف وما يحدث

الا انه هناك امل فمازال هناك من يتمسك بالقيم والاخلاق

لانها لو رحلت لانتهت الحياة

مازال الصدق والصراحة تنبض بداخلنا

اما الكذب فهو شئ بذيئ لا يحبه احد

وليس له وجود الا فى قلوب الخاسرين

تقبلى مرورى

smilyrose

روح الحب الصادق

صباح الصباح يقول...

اؤيدك اكيد .. وعن نفسى كتير باكتشف انى بانادى بحاجات كويسة واعمل عكسها من غير ماخد بالى انى الاولى اشوف تصرفاتى الاول قبل ما انصح الناس

arsenalwy يقول...

اظاهر ان انا جيت فى وقت مش مناسب

مالك النهاردة قلباها دراما

بس للأسف كلامك صح وبالذات المثل بتاع الاب والام حاجات غريبة والله كنت قاعد مع واحد صاحبى فقلى ان واحد صاحبنا تالت بيقوله كفاياك مشى كده لو عايز يبقى ترتبط رسمى المشكلة ان صاحبنا التالت ده ماشى بقاله اربع سنين من غير ارتباط ولا غيره

يعنى زى اللى يقولك صلى وهو مبيصليش

غريبة صح؟؟

-_- يقول...

كل واحد بيختلف عن التاني .. واحد قوله يسبق فعله و واحد فعله يسبق قوله

أميرة الجنة يقول...

لو جينا يا سويت وبصينا حوالينا هنلاقى ان كلنا هنقول لالالالالالا بالصوت العالى بس لجوه بعيد عنك بس برده فى ناس صادقة وجيلة قوى من جوه وبره

MaNoOoSh يقول...

حلوة كلمة ثقافة التبرير دى
تصدقى فعلا انها بقت موجودة فى كل البشر
ربنا يعافينا

حاجات جوايا يقول...

عندك حق فعلا فى ازدواجية فى المعايير
وبنسب مختلفة على حسب تربية كل واحد و عمق الوازع الدينى عنده

موضوع مهم وجميل يا ضد
ومدونتك جميلة جداااااااا

تقبلى مرورى الاول
وتحيتى
سالى

marmar يقول...

عذرررررررررررررررررررررررررررا
على التأخير
لا بجد معلش حقك عليا جت متأخره اربع ايام ولله ما اعرف جت ازاي كده
حقك عليا
المهم
بالنسبه للناس اللي بتتكلم عل فاضي والمليان ف دووووول كتيييييييييييير اوي ومبرراتهم بتكون اتفه من شخصيتهم
اانا على سبيل المثال كنت بعرف واحده صحبتي وفي يوم خانت عهد الصداقه اللي بنا وبقت تتكلم عليا من ورايا صحيح مش كلام كدب بس الفكره نفسها ان كتير مش بيقدروا يمنعوا
زله لسانهم عن فعل النميمه وبينموا عل ناس بطريقه بشعه
في ناس بتتكلم كتير اوي وساعه الجد بتلاقيها كتكوت مفرفر "حلوه مفرفر دي"
مبيعرفوش يعملو ربع اللي قالوه
ربنا يرحمنا من الناس دي
وحشااااني يا سكررررررررررررررره
بحبك في الله

من غير عنـــوان يقول...

ظاهرة...
وجايه من الخوف... وعدم الصراحة مع النفس...

مشكله...
محتاجه أطباء علم نفس...

وصراحة وفضفضه... عشان كل واحد يعرف إن أقصر الطرق هي الخط المستقيم...
أو زي ما قالوا

أن الألف بين الحروف تقدمت على باقي الحروف لإستقامتها

أمنياتي

طوبه فضه وطوبه دهب يقول...

يمكن يكون كلامك فى كتير من الصح بس الحل عندنا ان كل ام واب او كل مسئول يحاسب نفسه قبل ما يربى او يصدر اوامر يقول اللى بيعمله حتى لو غلط يكون قد المسئوليه ومشمعنى ان فى نماذج بينا كده يبقى كل الناس كده بالعكس لسه فى ناس كتير بتقول اللى بتعمله وبتعمل اللى بتقوله ولا يغير الله ما بقوم حتى يغيروا ما بانفسهم يبقى كل واحد لازم يعود نفسه ويصلح منها الاول وبعدين يحاسب اللى مسئول منه

المعتصم يقول...

بسم الله الرحمن الرحيم
السلام عليكم ورحمة الله وبركاته
سويت
تحياتى
اولا كل سنة وانتى طيبه بمناسبة المولد النبوى
ثانيا ايه اخبار جدو والعمليه
يارب يكون بخير يارب
وان شاء الله يبقى زى الفل وربنا يشفيه منها بسرعه
تحياتى ودمتِ بكل خير وود
والسلام عليكم ورحمة الله وبركاته

تامر علي يقول...

الكلام ده طبعاً مظبوط 100% لكن أسبابه ايه دي كتيييييييير جداً ....كل واحد فينا فعلاً بيقع في نفس المشكلة الأنفصال بين ما تفعله وبين ما تتكلم عنه ...يمكن علشان الكلام سهل جداً .... يمكن علشان النفاق الإجتماعي ...يمكن علشان الجبن ... يمكن جهل ...يمكن كل ده مع بعضه:)

marmar يقول...

كل سنه وانتي طيبه يا حبيبتي وبخير وسعاده ياااارب دايما ومن نجاح لنجاح ياااااارب
كل سنه وانتي طيبه وجميله وقلبك جميل
ويارب السنه الجيا اشوفك في بيت عريسك وتكوني مبسوطه يارب معاه
كل سنه وانتي طيبه ياحبيتي

سمكه واحده يقول...

ضد ياضد يا ضد
كل سنه وانتي طيبه يا جميل
اللهم صلي وسلم علي سيدنا محمد وعلي اله وصحبه وسلم ياريت كلنا انهارده نصلي عليه طول ليوم اقل حاجه نعملها
اللهم ارزقنا حبه
بقولك ايه
عندكوا اكل ايه
طب هاتي حته حلاه صغنتته؟
كل سنه وانتي سعيده انتي وجميع اللي بيحبوكي

maha zein يقول...

في وفي والله يا سويت
يعني في ناس بتقول وبتحاول تعمل بالى بتقوله
طبيعي يحصل انحراف
لاننا بشر
بس الاهم اننا نحاول
ونقول غلطنا

وعلي راى مدونة تظبيط
حق علي اصحاب الكؤوس ان يتناصحوا
يعني في ناس ممكن تنصح وتعمل وكده
بس متعملش بنصيحتها
يعني بردو الافضل اننا نظل ننصح بالخير
ونحاول نكون افضل

كل سنة وانتي طيبة يا صغننة

اللهم صلى وسلم وبارك على سيدنا محمد وعلى اله وصحبه اجمعين

dalia يقول...

ضد يا ضد ازيك وحشاني جدا ، كده تغيرى اسمك من غير ما تقوليلي وانا قولت مين Sweet Violet مين Sweet Violet مين ؟ مين ؟ المهم وضحت الرؤيا
شوفي انا معاك ان في ناس كتير بتقول كلام وتعمل عكسه بس مبن اللي بيحدد ده الطرف الاخر ، وصدقيني مفيش حد بيكون سعيد بوجود تناقض في تصرفاته
تحياتي

elsha3er يقول...

اتأخرتى جدا لعل الامر خير

طمنينا


تحياتى

احمد الشاعر

MaNoOoSh يقول...

اية دة هو انا رديت وللا مرديتش على البوست دة
الله يخربيت الزهايمر يا ناس
انا كنت فاكرة انى رديت
على العموم ارد تانى بردو مش مشكلة
انا جيت علشان انتى وحشتينى وقلت اجى اسلم
مش عادة يعنى الغيبة دى ياضد يا متنكرة فى البنفسج المعثل

Unknown يقول...

للاسف صفات وعادات طتير ظهرت فى حياتنا وشخصياتنا بقت مع الزمن شى عادى ومحدش بقى يستغرب منها
تحياتى

أم فريده يقول...

انتى رحتى فيت يا سويتى

مختفية بقالك كتير لعل المانع خير

طمنيني عليكى

Sweet Violet يقول...

ستيته حسب الله الحمش
-----------------
ماهو ده اللى انا بقوله فى كلام الرجل على حقوق المرأة

انه مجرد كلام فقط لاغير من غير مايكون مقتنع لمجرد انه يتقال انه رجل مش رجعى

بس لما تيجى عند الواقع و الافعال هتلاقى ضرب بكلامه عرض الحائط

و طبعا انا مش بعمم لان لسه فى ناس افعالها بتطايق اقوالها حتى لو كانت اقوال رجعيه

اما بخصوص اختيارهم للبنت اللى هايتجوزوها اعتقد ان اخر اختيار هو السائد

لان المعظم بيبقى اضعف من انه يعترف قدام نفسه بالحقيقه

و بيحاول فعلا يغير شريكه حياته ووقتها زى ماقولتى فعلا بيحصل الصدام و بينتهى الموضوع يااما طلاق يااما خلع

ولاطولتى ولا حاجه خدى رحتك (:

نورتى ياستوته باول زيارة

و ارجو ماتكونش الاخيرة

(:

Sweet Violet يقول...

سونه
----------
عليكم السلام و رحمه الله و بركاته

اكيد طبعا الموضوع ليه اسباب كتير

لكن انا لوحد قالى ان الظروف الحياه السبب هقوله ده مش مبرر

ماعرفش ممكن لانى اتربيت ان كلامى يكون زى افعالى مهما كانت الظروف اللى حواليا

علشان كده شايفه ان السبب ده غير مقبول

هو فعلا خيانه البنت بتكون اكتر من الولد .. بس انا هنا اقصد الصداقه اللى بتبقى من نفس النوع

يعنى بنت و بنت

و ولد و ولد

لكن من الواضح من رد معتصم انى فعلا جهله فى صداقة الولاد طلعت هى كمان فيها خاينه و غيره

نورتى ياقمر (:

Sweet Violet يقول...

أحمد أبو العلا
-------------
اللهم امين

نورت (:

Sweet Violet يقول...

الفراشة الصغيرة
----------
الصاحب اللى مايبقاش مرايه صحبه

يبقى دى مش صداقه لانها فقدت اول اسسها

نورتى ياجميله (:

Sweet Violet يقول...

basma
----------
اكيد طبعا لو الواحد بدأ بنفسه الاول

حاجات كتير هتتغير

نورتى ياقمر (:

Sweet Violet يقول...

كيارا
----------
للأسف الشديد بقينا نستخدم ثقافه التبرير فى كل حاجه فى حياتنا

استخدام غلط لخداع الناس و ارضاء ضميرنا

نورتى ياجميله (:

Sweet Violet يقول...

أحمد الشاعر
---------
ايوة فى ناس فعلا بيبان عليهم و من اول لقاء تحس انك مش مرتاح

لكن فى ناس تانيه للأسف بارعه فى التمثيل و دول بقى ماحدش يقدر يكشفهم الا بعد تعامل طويييييل

ربنا يهدينا و يهديهم

نورت و اشكرك للمتابعه (:

Sweet Violet يقول...

د . ياسر عمر عبد الفتاح
----------
ههههههههههههههههه هو كلام كبير و كلام حقيقى

المشكله ان الواحد فعلا بقى يشوف الغلط انه شئ عادى و طبيعى

و ده فى حد ذاته مشكله كبيره جدااااااا

نورت (:

Sweet Violet يقول...

بعبعه
-----------
اللهم امين

نورتى ياجميله (:

Sweet Violet يقول...

الربان
--------
المشكله الاكبر اننا مش اخدنا بس من الدين العبادات

لا احنا كمان بقينا نفسر الدين على هوانا علشان نحلل بعض الافعال

ربنا يهدينا

نورت (:

Sweet Violet يقول...

heba
---------
ماهى المشكله زى ماقولتى ان الناس بقت تشوف ده عادى

علشان كده المعظم بقى كده

نورتى (:

Sweet Violet يقول...

Butterfly
-----------
اسفه ياجميله انى قلبت المواجع

ربنا يهدينا و تكون افعالنا مطابقة لاقولنا

نورتى (:

Sweet Violet يقول...

عروسة
-----------
لالا مش تزعلى ياجميله

ان شاء الله هنتقابل قريب و نعمل احنا التجمع

اكيد عرفت انتى مين .. و حلوة الرساله الجديده على فكرة

نورتى ياقمرايه بالنيولوك (:

Sweet Violet يقول...

norahaty
------------
للأسف معاكى حق فى كل كلامك

الناس بقت تحب الانسان اللى يضحك عليها

مش اللى يكون صادق معاها

ربنا يهدينا يارب

نورتى (:

Sweet Violet يقول...

maryooom
-----------------
انتى قولتيها المفروض تكون صاحبه لكن للأسف فى الواقع هى مش كده

ربنا يهديها و يهدينا

نورتى ياجميله (:

Sweet Violet يقول...

شموسه
--------------
معاك حق طبعا

نورتى (:

Sweet Violet يقول...

aMr tA3LaB
----------------
هههههههههههههههه

مش أخر تعليق على فكرة ((:


القناة دى فعلا للكبار و الصغار


بس للأسف كنت بتفرج عليها فى البلد بس مش عارفه اجيبها عندى ):


نورت (:

Sweet Violet يقول...

kemet
-------------
عليكم السلام ورحمه اللى و بركاته

ولا يهمك ياقمر المهم انك نورتى (:

امممم بخصوص الفكرة بتاعت الموضوع انا ماتكلمتش خالص فيها

ممكن بس اختلط الامر عليك علشان انا وضعت بعض اللينكات لبعض المواضيع و انى ذكرت ثقافه التبرير عموما

لكن عامه السلبيات دايما بتكون مرتبطه ببعضها

واكيد طبعا الواحد لازم يكون مضايق لما يشوفها مش انا بس (:
^^^^^
معاك طبعا فى كلامك

بس زى ماقالت شموسه ان الواحد لو متصالح مع نفسه استحاله يكون غير بشخصيه واحده

اما المبادئ

احنا كامسلمين المفروض نمشى بالاسس المبادئ اللى الدين قال عليها

و دى لازم تكون ثابته وماينفعش نفسرها حسب الاهواء

اما المبادئ اللى المجتمع بيحددها دى لازم ناخد منها الصالح فقط

لان فى بعض المبادئ الغلط اصلا و متمشيش مع تعاليم دينا

ثقافه التبرير المنطقى عامه ده انا مش ضده على فكرة بس لو استخدم صح

مش نستخدمه علشان نخدع بيها الناس و اوقات كتير بردو نخدع بيها نفسنا
^^^^
الدين وضع لنا اسس نمشى عليها فى حياتنا كاكل وهى دى اللى لما نمشى عليها هتكون صح

عكس كده يبقى غلط


و الدين نهى ان الانسان اقواله تكون عكس افعاله

و دى من اشد السلبيات فى المجتمع

لان بينتج عنها على المستوى الاسره الكذب و انعدام الثقه مابين الاباء و الابناء .. وده فى حد ذاته ممكن يؤدى لعواقب غير محمودة

اما على المستوى الاجتماعى كاكل انعدام الثقه مابين الافراد و ده بردو عواقبه غير محمودة

^^^
التعليق أكيد وصل ياقمر .. هو يقدر جوجل مايوصلهوش ولا ايه ((:

نورتى (:

Sweet Violet يقول...

حاسوباتيه
-----------
لو كل واحد كان صادق مع نفسه و قدر العواقب اللى بتحصل من ورا ده

و بدأ بنفسه .. يبقى اكيد هيحصل ده و نرتاح

نورتى (:

Sweet Violet يقول...

eshrakatt
---------------
اممم

منين الكل شايف الصورة مجرده و منين المجتمع مش قابل الافراد على مهياتهم

بس عموما .. اوقات بيبقى فعلا الكذب علشان المجتمع

لكن طبعا ده مش مبرر .. (يخشون الناس كخشية الله أو أشد خشية)

يبقى ماينفعش الواحد يكذب علشان المجتمع

فى بقى اللى بيعمل كده للأسف لانه عنده شعور بالنقص وانعدام الثقه فى النفس

وهنا المجتمع مالهوش ذنب .. انما هو اللى شخص مريض لازم ليه علاج

لانه بيضر نفسه اولا و اخيرا

نورتى (:

Sweet Violet يقول...

طـــائر الليــــل الحـــــزين
--------------
ازيك ياقمر

بصى انا مختلفه معاكى فى موضوع القدوة اننا منقدرش نقولهم

لا ممكن لكن طبعا مع مراعاة فرق السن طبعا

لكن ماينفعش نهائى اننا نشوف الغلط و نسكت

نورتى ياجميله (:

Sweet Violet يقول...

smilyrose
-----------
انتى اللى وحشانى ياقمر و بجد سعيده جدااا انى اتعرفت على تؤام روحى عن قرب

اكيد طبعا فى امل و لسه فى ناس كويس افعالها بتطايق اقوالها

نورتى ياقمر (:

Sweet Violet يقول...

صباح الصباح
-------------
الحمدلله انك بتكتشف ده

و المفروض الواحد يشوف تصرفاته الاول طبعا قبل مايتكلم و ينصح الاخر

لان ده عقابه شديد

نورت (:

Sweet Violet يقول...

arsenalwy
-----------------
مش قالبها دراما ولا حاجه

بس هو الموضوع بقى منتشر قوووى للأسف

اكيد غريبه .. لان ابسط شئ ممكن بترد على شخص كده

طيب مدام انت شايف الصح ليه مابتعملهوش ؟؟

ربنا يهدينا

نورت (:

Sweet Violet يقول...

Sharm
-----------
معاك طبعا ان كل واحد يختلف عن الاخر

بس انا هنا مش بقول ان الافعال تسبق الاقوال

انا هنا بقول ان الافعال بتكون عكس الاقوال

نورت (:

Sweet Violet يقول...

أميرة الجنة
---------------
ماهو ده بردو اللى انا بقوله

بنتكلم و نقول لكن من جوه و الافعال غيييير

و طبعا انا مش بعمم لان فى لسه ناس صادقين

نورتى (:

Sweet Violet يقول...

MaNoOoSh
--------------
اللهم امين

نورتى (:

Sweet Violet يقول...

حاجات جوايا
-------------
الحمدلله ان المدونه عجبتك ياقمر

نورتى المدونة باول زيارة و ارجو ماتكونش الاخيرة

(:

Sweet Violet يقول...

marmar
---------
ولايهمك ياجميل المهم انك نورتى (:

اللهم لا تجعلنا ممن يقولون ولا يفعلون

ربنا يهدى الجميع

انتى اللى وحشانى ياجميله

بلاش بقى تتأخير كتير لان ده مش اول مره هه

نورتى ياقمرايه (:

Sweet Violet يقول...

من غير عنـــوان
---------------
المشكله محتاجه لمعالجين نفسيين مؤهلين اكتر من احتياجها لاطباء علم النفس

نورت (:

Sweet Violet يقول...

طوبة ذهب وطوبة فضة
--------------
ماهو ده اللى انا بقوله فعلا ان كل واحد ياخد باله اولا من تصرفاته قبل ماينصح و يربى

انا ماقولتش ان الكل بقى كده

لكن الاغلبيه للأسف بقت كده

نورتى (:

Sweet Violet يقول...

المعتصم
-----------
عليكم السلام و رحمه الله و بركاته

و انت طيب (:

الحمدلله عملها و بقى بخير

بجد اشكرك على السؤال (:

و عليكم السلام و رحمه الله و بركاته

Sweet Violet يقول...

تامر علي
-----------
هى بتختلف من شخص للأخر

بس فى الاغلب بيكون كله مع بعضه

نورت (:

Sweet Violet يقول...

marmar
-------------
و انتى طيبه ياقمرايه

و افرح فيك انتى الاول بقى (:

يارب دايما ايامك كلها سعاده وحب

Sweet Violet يقول...

سمكه واحده
-----------
هههههههههههههههههه مافيش فايده

ورايا ورايا اللقب )):

عليه افضل الصلاة والسلام

كل سنه و انتى طيبه ياجميله

و من عويناتى هكلك نصيبك من الحلاوة ياسلام انتى تأمرى ((:

Sweet Violet يقول...

maha zein
-----------
معاكى ياقمرايه فى كلامك

بس زى ماانتى قولتى لازم نحاول و كمان نعترف بالغلط

لكن فى ناس بتكون طبعها تتصايد الاخطاء للأخرين فقط لا غير

و انتى طيبة ياجميله

نورتى (:

Sweet Violet يقول...

dalia
-------------
انتى اللى وحشاااانى موت ياقمر

انا قولت فى تحديث فى بوست فات

بس انتى كنتى غايبه ياقمر (:

Sweet Violet يقول...

elsha3er
-----------
انا بخير الحمدلله

اشكرك يااحمد على السؤال بجد (:

Sweet Violet يقول...

MaNoOoSh
------------
لا رديتى ياقمر

مافيش زهايمر ولا حاجه (:

انتى اللى وحشانى ياقمر

و حمدلله على السلامه النت و الجهاز (:

Sweet Violet يقول...

ايوية
----------
ماهى دى المشكله اننا بقينا نشوف الغلط عادى

ربنا يهدينا

نورتى (:

Sweet Violet يقول...

زوجة عنيدة
-----------
انا بخير الحمدلله

اشكرك على السؤال ياجميله (:

MaNoOoSh يقول...

انتى غايبة فين كل دة يا سويت
وحشتينا يا عثل
لعل المانع خير

perlina يقول...

كلام فعلا صح ..
الناس دولقتى تلاقيهم بيقولوا حاجه و بيعملوا عكسها ..
قمة التناقض ..

البوست حلو اووى يا سويت ..
و المدونه جمييييلة و رقيقة ..