Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الأحد، 3 مايو، 2009

المستبد و الشخصية التابعة


بما ان الفترة اللى فاتت دماغي واقفة عن التفكير فى اي حاجة .. قولت الواحد يخرج من اللى هو فى  ..بس ده ازاي ؟؟.. مالقتش غير حبيبتي القراية هي الوحيدة اللى بتقدر تخرجني من اللى انا فيه ده

و كان عندي اختيارين يااما اكمل كتاب " ماذا لو حكم الإخوان ؟؟ " او الكتاب اللى اتطلب مني من فترة اني اقراه لكن الصراحة كنت بكسل وهو "كتاب طبائع الاستبداد و مصارع الاستعباد"


و لاني مش في الحالة اللي تخليني اكمل الكتاب الاول فوقع الاختيار على التاني

و طبعا لما قريته عرفت ان قلبي كان حاسس اني بعد ماهقرا الكتاب ده هصدعكم فاختاره علشان عارف ان وحشكم صداعي D:


المهم انا مش هتكلم عن موضوع الكتاب نفسه اللى هو استبداد الحاكم .. لأ انا هتكلم عن الشخصية المستبدة اللي هي ممكن تكون صديق او زميل عمل .. الخ


صاحب الشخصية المستبدة دكتاتوري الطبع سادي التصرف من اول و أهم مبادئه في الحياة مقولة مكيافيللي " من الأفضل أن يخشاك الناس على أن يحبوك " 

علشان كده تلاقي ان معظم اللي حواليه (ان ماكنش الكل) اصحاب الشخصية التابعة .. و قليل قوووي لو لاقيته على علاقة مع اصحاب الشخصية القوية 
لانه من الصعب يمارس عليه اسلوبه و دايما بيبقي ليه الناصح الامين و ده طبعا ضد مبادئه فهو مابيسمعش ولا بيشوف غير نفسه فقط


الغريب فى الامر انه بيبقي عارف فعلا ان اللي حواليه بيأمنوا علي كلامه و بيسمعوا خوف منه مش احترام ولا اقتناع بأفعاله ولا كلامه .. 
علشان كده تلاقيه دايما بيشك فى اللي حواليه لأنه عارف انه اول لما يعطي ضهره لحد فيهم هيطعنه

المشكلة بقى في الشخصية التابعة بجد ..  ليه؟؟ ... لاني قبلت منهم كتير و للأسف فى منهم اللي يندرج اسمه تحت قائمة المناضلين من اجل التغيير


تفتكروا شخصية زى دي مش عارفة تتغلب على خوفها و تواجه شخص مالوش سلطة فى البلد .. هتقدر تواجه اصحاب السلطة ؟؟؟!!! 

 اممم ماظنش

المهم نيجي بقى للأسئلة اللي على اساسها نزل البوست ده

لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟


و ليه الناس بتحب النفاق عن الصراحة ؟

(و ماحدش بقولي علشان الصراحة بتوجع .. هقوله وجع ساعة ولا كل ساعة .. غير ان الشخصية اصلا بتبقى عارفة ان الناس بتنافقها )


تفتكروا مكيافيللى كان عنده حق فى المقولة دي ؟؟


من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟


تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟

ودمتم سالمين ):

هناك 111 تعليقًا:

مصعب صلاح يقول...

السلام عليكم
مساء الاناناس
تقريبا أول تعليق
يارب يكون أول تعليق

المهم

على فكرة ظهور الشخصية المستبدة دي دليل نقص
ليه ؟
لأن ببساطة مطلقة المستبد بيبقى أصلا حاسس انه عنده نقص ف أمور تانية وخايف ان الناس تعامله من جوانب نقصه وضعفه فيلجأ الي الاستبداد
تقبلي مروري

Sweet Violet يقول...

عليكم السلام و رحمة الله و بركاته

مش بحب الأناناس على فكرة ):

بس عموما مبروك اول تعليق (:

نيجى بقى للرد على البوست

انا معاك انه بيبقى نقص فى الشخصية نفسها

لكن انت بردو مش جاوبت على الاسئلة الاساسية للبوست )):

لف و ارجع تانى بقى

عاشقة الأحزان يقول...

السلام عليكم
انا فى الشغل الوقتى
أحجز مكان وارجعلك إن شاء الله
تحياتى حبيبتى

Sweet Violet يقول...

عليكم السلام و رحمة الله و بركاته

ترجعى بالسلامة ياجميلة

منتظركى (:

مسدس صغير يقول...

الشخصية المستبدة الديكتاتورية موجوده فى كل زمان ومكان.
ولكن المستبد هذا لا يمكن يصل لهذه الشخصية الا بمساعدة اخرين هم الذين يستبدهم
فإن كان هناك من يقومه ولا يسمع لاستبداده قُوّم. وان لم يكن فلا.
موضوع اكثر من رائع
ذكرنى موضوعك بمقوله لنجيب محفوظ فى رواية ثرثرة فوق النيل يقول " انا لا اتعجب من ان يعبد المصريون فرعون ولكنى اتعجب كيف صدق فرعون نفسه انه اله"
احييكى على البوست
انتهى زمن المثاثة.

شمس النهار يقول...

البوست ده فكرني بمثل شعبي لطيف
قال ايه يافرعون فرعنك
قال مالقيتش حد يصدني

اي مستبد لابد له من رعيه وتابعين
لو لم يجد او اللي وجدهم وقفوه عند حده
مش هيقدر يعمل حاجه وفي الحاله دي
هتبان شخصيته الحقيقيه
اللي هي اصلا مريضه جدا وضعيفه جدا

عاشقة الأحزان يقول...

السلام عليكم
قال رسول الله صلى الله عليه وسلم
لايكن أحدكم إمعةإن أحسن الناس أحسنه فإن أساءة أساء
صدق رسول الله صلى الله عليه وسلم
ده بجد اللى أقدر أرد على بوستك الرائع به
وبجد كلامك جميل قووى ياحبيبتى
تحياتى لكى
أختك إيناس

blue-wave يقول...

اولا حمد الله على السلامه
وبجد بجد وحشتينا
ثانيا بقى
أيه الإسئله الصعبه دى كلها؟؟
هوا كله اجبارى؟:))
بسم الله نبدأ

لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟

هاتجاهلها تماما
الحل للشخصية دى هو التجاهل
ساعتها هايحس بانه مالوش قيمه

و ليه الناس بتحب النفاق عن الصراحة ؟

لأنه اسهل
وبكدة بتريح الناس وتوصل لقلوبهم وماتزعلش منك حد
بس للأسف بتخسر اللى اهم من دا كله
بتخسر نفسك

تفتكروا مكيافيلى كان عنده حق فى المقولة دي ؟؟

ميكافيللى دا كان حيوان اساسا:))

من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟

الضعف

تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟

لأ طبعا
لأن اول خطوة فى طريق التغيير
الإيجابيه والمشاركه
واللى احنا بعيد عنها تماما

هييييييييييييييييه
خلصت
اخد كام من عشرة بقى؟؟

Soul.o0o.Whisper يقول...

السلام عليكم و رحمة الله و بركاته

هلا هلا بضدتى

و رجععععععععععععنا تانى لأيام الصدااااااااااااااع

ان ان اااااااااااااااان


طيب يا ستى ..مفيش مشاكل
عشان خاطرك بس نستحمل

المهم ..

شوفى يا ضد
زى ما قلتى ان الشخصية المستبدة شخصية ديكتاتورية
شايفة نفسها
و دا طبعا غلط
لأن حتى الرسول صل الله عليه و سلم كان ماشى بمبدأ الشورى و النصيحة

لكن طبعا مش كل المستبدين ماشيين بآراء غلط
أقصد وحشة يعنى
فى ناس شايفة ان ما ينفعش الصح يتطبق إلا بالمنهج دا
لكن طبعا بيكون عندها غلط
و بترفض ان حد يصلح لها

عشان كدا تلاقى فى ناس فعلا من اللى رافعين راية التغيير ماشى ورا الناس دى
لأنه شايفه قدوة فى الثبات على الحق
فى حين انه مستبد برأيه حتى و إن كان غلط


اما عن مقولة ميكافيلى
فطبعا غلط
لأن مفيش احسن من رسول الله صل الله عليه و سلم قدوة
و محدش فى الدنيا حب قدوته زى ما الصحابة حبوه

و بالتالى الحب أساس كل علاقة
و خاصة إذا كان قدوة


دمتى بود يا قمر
و منورة النت كله
:)

المعتصم يقول...

بسم الله الرحمن الرحيم
السلام عليكم ورحمة الله وبركاته
سويت هانم
تحياتى
ايه الكلام الجامد ده ؟؟؟
هو انتى بتحاولى تبقى مثقفه اليومين دول ولا ايه؟؟
ماتحاوليش مافيش فايده
مش همسكك جريدة الحلف لو عملتى ايه
ابداااااااااااااا
ههههههههههه
بس هو الموضوع جميل يعنى وزى ماتقولى كده كان نفسه ياعينى يناقش قضيه
نخش على الاسئله وكفاية تخبيط
لوقابلت الشخصية دى اكيد هيكون فيه بينا تصادم كبير
اما الناس ليه بتحب النفاق لانه بقىوالعياذ بالله تقريبا طبع فى كتير من الناس الا من رحم ربى
ميكيافيلى ده كان شخصية زباله وكل المبادئ اللى قالها واتكلم عنها فى كتابه المعروف الامير كلها بتدل على ضعف فى الشخصيه وعقد نقص فى نواحى كتير عند الانسان ده
اما السؤال الرابع فمش هجاوب عليه لاننا عارفين الاجابه وبنحاول نضحك على روحنا
تقبلى مرورى(واستبداد باستبداد بقى انا لغيت النسكافيه رسمى وان كان عاجبكم هه)
تحياتى ودمتِ بكل خير وود
والسلام عليكم ورحمة الله وبركاته

Bondoka يقول...

حلو الموضوع
وقابلته كتير فى حياتى

وتقريبا بدات اصدق ان كل الاصحاب كده
شخصيه قويه تسيطر على من حولها وبكده تدوم الصداقه لفترات طويله

الاسئله بقى:
قابلت الشخصيه المستبده... طبعا
عملت معاها ايه.. حاولت تسيطر عليا لكن لاقتنى لا اقبل فقررت انها تبعد عنى وتبعد كمان باقى الاصدقاء ذوات الشخصيه التابعه


ليه الناس بتحب النفاق اكتر
لانه ببساطه بيجى على هواهم وبيحسوا انهم فى احسن حال يعنى هيتعبوا نفسهم ويسمعوا الصراحه اللى اكيد هتكون بتنتقضهم ليه؟


مقوله ميكيافلى فيها كتير من الصحه وخصوصا على الشعب المصرى
ده شعب لازم يخاف عشان يمشى صح
انما الحب بيكون وسيله للتهرب من المسؤليات والواجبات والقائها على الاخرين بدعوى انى بحبك فلازم تساعدنى


اكيد الشخصيه التابعه دى لاما ضعيفه ولا تستطيع اخذ قرارتها بنفسها
او انها طيبه اوىىىىىى وبتحب تريح اللى قدامها على حساب نفسها


هتتغير البلد دى؟؟ ابداااااااا

كيــــــــــــارا يقول...

احم احم

انا مش مكلماكي من شويه مش قواتي انك هتنزلي بوست ماشي ماشي

اما ارووووووووووووق هاجي ارد عليكي اصل عندي كلام كتييييييييير

mohamed ghalia يقول...

فتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟


طبعا لالالالالالالالالالا
أنا دايما مقتنع انى الإصلاح دايما من تحت لما الناس تبقى كويسه مع بعضها ساعاتها نبقى نقول الدور على الحكومة

nona يقول...

اولا مفيش شخصية بتبان بسرعة غير بعد المعاملة فى كذا موقف
بس انا عن نفسى لو قابلتها مش هكمل معاها مبحبش الاستبداد والسيطرة اللى مالهاش لازمة

-------------------------
انا كمان نفسى اعرف ليه الناس بتحب النفاق عن الصراحة
انا بكره النفاق جداااااااااااا
وبكره التعامل بيه
ودى مشكلتى مع الناس انى مبعرفش اقولهم اللى يبسطهم فى وشهم ومن وراهم اقول كلام تانى

-------------------------
لا طبعا ميكافيلى معندوش حق فى كلامه
دة الواحد بيعمل مافى وسعه لكسب محبة الناس لانها من محبة الله وعلشان الدنيا مينفعش تتعاش غير بالحب مش بالخوف

-------------------------
انا مبكرهش فى حياتى غير الشخصية الضعيفة الهايفة
بكرههم بكرههم
بس طبيعى لما بيكون فى شخصية ضعيفة لازم تتبع الشخصية الاقوى لانها مبتقدرش تمشى نفسها


تحياتى

mahasen saber يقول...

ضد الغاليه وحشتينى وحشتينى وكمان وحشتينى يا بكشو
قلتى على المعاد وانا نمت عشان كده متصلتش ااكد منك هنروح ولاا لا
تتعوض ان شاء الله قبل ما تسافرى

lonely girl يقول...

دى كلها اسئله هنجاوبها؟؟؟

لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟

هتصرف معاها بمنتهى التجاهل اقل اهتمام حتى ولو بموقف مضاد للشخصيه فهو انتصار ليه وارضاء لرغباته المريضه ..

و ليه الناس بتحب النفاق عن الصراحة ؟
(و ماحدش يقولي علشان الصراحة بتوجع .. هقوله وجع ساعة ولا كل ساعة .. غير ان الشخصية اصلا بتبقى عارفة ان الناس بتنافقها )

نفاق ليه انا شخصيا اكره جداااااا النفاق حتى لو فى صوره مجامله مزعومه ..
ومعتقدش انه اللى بينافق بيحب ينافق الا انه اضعف من كونه يعبر عن رأيه بصراحه او يكون ليه موقف مستقل ..

تفتكروا مكيافيلى كان عنده حق فى المقولة دي ؟؟
دى وجهه نظر مريضه وناتجه عن شخصيه غير سويه اكيد ولا يجيد التعامل مع الغير

من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟
اكيد لانه اضعف من انه يواجه استبداد الانسان ده ويستقل بنفسه ..

تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟
اكيد لو نسبه الشخصيات دى زات فى حياتنا صعب جداااا نعمل حاجه

mahasen saber يقول...

بالنسبه للاستبداد يا مستبدتى قصدى يا ضدتى انا مره قابلت لا مرتيين او كتير قابلت الشخصيات المستفزه دى
بس حلها معايا التجاهل ثم التجاهل وده لسبب بسيط انهم مبيتغيروش فى الغالب وشخصيات متعبه للاعصاب جدا وانا اعصابى مش ناقصه اصلا

وبالنسيه للنفاق اعتقد ميحبش حاجه سىئه زى دى الا الشخصيه المريضه والضعيفه
يعنى الصراحه هيا الطريق لكل راحه

وكفايه اجابات كده
وحشتينى جدا جدا
ولقائك انتى والمقروضه نور والذيذه موجه فى الزقازيق كان من امتع ما يكون

يا ريت اشوفك فى القاهره يا حبيبتى
قيل ما تسافرى
اوعى تسافرىة من غير ما اشوفك اصل العريش برضه سفر يا ضد

Butterfly يقول...

الشخصيه المستبده أو بالمعنى اللى أنا مجرباه
اللى بتحب تظهر نفسها دى بكرها جدا
قابلتها كتير فى حياتى
وده أنا رأيى فيه انه بيبقى عدم ثقه فى النفس وعدم حب الخير لحد عاوز هو اللى يظهر دايما والناس تقعد تقول ده بيعمل وبيعمل وفى الغالب أصلا بتلاقيه هو نفسه تابع لحد معين وهكذا
والشخصيه دى غالبا ممكن توصل فى مواقف لقله زوق وقله أدب كمان .

ايوشة يقول...

بما انى بيقولوا عليا مستبدة فى بعض الاحيان هرجع ارد عليكى بالليل على رواقة كده ههههههههه
لا بجد بالليل ان شاء الله كوباية شاى واعيش مع الاسئلة واجاوب عليكى

أحمـــــــــــــد أبو العلا يقول...

احم احم
معايا الميكروفون
سامعاني كويس
ألووو

بصي ياستي

هتصدقيني لو قلتلك أن من وجهة نظري السذاجه المطلقه هيا السبب في أن الشخصيه التابعه تكون تابعه
أيوا
لما الناس تحب أنها تتحكم أو تقاد بشكل فيه اهانه لأبسط حقوقهم ويرضوا ويكسلوا ويقولوا اللي نعرفه أحسن من اللي منعرفوش, ديه السذاجه وده اللي بيشجع القائد على أنه يستمر في طريقته

aMr tA3LaB يقول...

يعني ما شاء الله عليك غبتي سنة وجاية تطلعي علينا ضد التيار احنا مالنا بالاستبداد ما احنا زي الفل اهو وحلوين اوي مع بعض وساعة الغلط بنطرطش زلط ولحمنا مر ومبيتكلش
سيبك من الي فوق بوصي للتحت

بالنسبة ليا محدش يفرض رايه علا ليه لاني اصلا بعيش حر في كل حاجة وبعدين هتصرف معاه العين بالعين والسن بالسن والانف بالانف


النفاق يا ضد التيار هي حالة لا ارادية من المجاملة الصريحة المملة
اصبحت تسري في شرايين الناس وهي كنوع من فيروس معاهم معاهم عليهم عليهم
وبعدين النفاق ده في كل حتة انا شفت ناس كتير بتنافق على مدونات شفتها بعيني عشان ده يظبط ده خلاص داقت بيه الدنيا عشان جاي يظبط في البلوجر


في زمن مكيافيلي كان طبعا معاه حق لانه كان في زمن قبل الثورة الصناعية والحرووب والمشكل الاوربية الاوربيةلكن دلوقت معتقدش لانه كله بيحب يفكر ويقدر يبعد مع العلم بوجود بعض التابعين

لانه اصلا مينفعش يكون قائد نفسه مينفعش شخصيته كده لازم تتسحب من ودانه زي الجاموسة ويبقى عامل زي الجاموسة في الساقية عمال يلف وهو مش فاهم حاجة

معتقدش اننا اصلا هنعرف نتغير لو متخلصناش من القيود النفسية والوهمية

تحياتي ده انتي رغاية اوي

marmar يقول...

لو قابلت شخص كده مش هحاول ابني معاه علاقه وهات وخد وهتبقى العلاقه لو كانت فيه علاقه هتبقى على اد السلام عليكم
الناس في الزمن ده بيحبو يدارو ويخبو ولو قالو الصراحه الناس هتفتكرها وحشه وسيئه وبالتالي عايزين يطلعو بأجمل مظهر يتخيلوه عشان بريستجهم ادام الناس
مش عارفين ان بكده بيضحكو على نفسهم قبل ما بيضحكو على الناس
لانهم في نفسهم عارفين انهم ناقصين حاجه وانهم غلط ومنبوذيين
ربنا يكفينا شر الناس دي
بصي حولي مجال قرايتك لميكي وبطوط
اهو حاجه تفرح الواحد ومش تغمو
لو عايزه مساعده فأنا اكتر من يساعدك في الموضوع ده هههههههههههههه
من كم يوم وقع تحت ايدي كتاب
لماذا يكذب الرجل وتبكي المراه
بجد كتاب رهيب جداااااااااا
مش عارفه اخلصو ونفسي اخلصو بس لولا الملامه يا هو لولا الملامه هههههههههههههه
الا قوليلي صحيح انتي منين وبتعملي ايه وبس خلاص
هتصاحبيني يعني

ايوشة يقول...

وووووووووورجعنالكم تانى علشان ارد على اسئلتك الصعبة دى اللى هى اصعب من ثانوية عامية


لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟


ولا حاجة عادى اللى بيستبد بيستبد على نفسه وبيكره كل الناس فيه يعنى هو اللى خسران

و ليه الناس بتحب النفاق عن الصراحة ؟

(و ماحدش يقولي علشان الصراحة بتوجع .. هقوله وجع ساعة ولا كل ساعة .. غير ان الشخصية اصلا بتبقى عارفة ان الناس بتنافقها )
لا ساعات النفاق بيكون تملق علشان المصالح وده اللى ماشى فى الزمن ده نافق وتملق هتعيش وتحقق مصالحك



تفتكروا مكيافيلى كان عنده حق فى المقولة دي ؟؟
طبعا طبعا ازاى اعيش فى وسط ناس كرهانى فى لحظة هيتمردوا على استبدادى ومش بعيد يقتلونى :)



من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟

جايز خايف ومعندوش شخصية يقدر يحقق بيها اللى عايزه وشايف ان الاتباعية دى هتحقق مصالحه حتى لو على حساب كرامته


تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟
البلد مش هتتغير الا لما كل الناس تكون ايد واحدة وتعرف صح الحق والعدل وتبطل سلبية وظلم فى بعضنا الاستبداد ده ظلم

MaNoOoSh يقول...

بيتهيئلى لو قابلت شخصية مستبدة هتصادم معاها لانى مطيقش حد اصلا يدينى اوامر.

اما بقى الناس بتفضل النفاق عن الصراحة ليه فدة بيبقى سببة المصلحة.. لكن ساعات المجاملات بتبقى مطلوبة لان الصراحة الفجة انا بعتبرها وقاحة.

وليه الانسان يرضى يكون تابع فدة بردو سببة المصلحة اكيد.
تحياتى يا قمر

مـجـنـووون يقول...

الإنسان من طبعه بيحب السلطة
وبيحب يكون هو صاحب ارئي الأول والأخير

وأصعب حاجه هي استبداد انسات للأنسان

في ناس كده بتحس انها أعلي من كل الناس

وعلي فكرة في ناس تانيه بتحب تكون ديما تابعه ومن غير ما تبقي تابعه لحد متعرفش تعيش

تقبلي مروري
مجنووون

romansy يقول...

صباح الخير على احلى سويت
عندك حق والله احنا فى زمن الشخصيه المستبده دول كتير قوى وانا عن نفسى قابلت منهم كتير
دايما بيفرح قوى لما اوامره تتنفذ وبيفرح اكتر فى اذيه الناس بس المشكله فى الشخصيه التابعه كل واحد يقول وانا مالى يا عم
ادينى بقضى اليوم وخلاص
ميكافيلى عنده حق لغايه لما يظهر عكس دا

صبرني يارب يقول...

الشخص المستبد ده او السادي او الى بيستقوى على الناس

بوصفك له انه اساسا مش سوي وعليه هايطلع منه بلاوي كتير


صدقنى محتاج بس يلاقي قدامه حد قوي عن حق مش قوي بمركزه ولا سلطته ولا فلوسه ولا قلة ادبه

هايبقى عامل قدامه زي القطه وما يقدرش يقوله بممممممممممممم

قابلت الشخصيه دي

وما قدرش يقول معايا بمممممممم الحمد لله

وبالنسبه للشخصيات الضعيفه

اعتقد انهم بيستسهلوا الضعف

واحد من العمال يقول...

السلام عليكم
أختيار موفق وتلك أجاباتى

** لو قايلت الشخصيه المستبده حدخل فيه شمال وعلى الملأ علشان يفكر كويس قبل مايفكر يطور فرعنته عليا

**الناس بتحب النفاق عن الصراحة لأن النفاق أحياناً بتكون ليه مكاسب لحظيه وعلى المدى البعيد أيضاً يعنى أستثمار
بس فى النهايه بيخسر أحترامهم لأنفسهم

**ميكافيلى أصلاً أنسان ومفكر نفعى ولا يسعى إلا الى المصلحه والمصلحه فقط

**السبب فى أن أنسان يختار إنه يكون تابع أنه فى الأصل أنسان خامل وغير قادر على التفكير فيرى أنه من الأسهل أن يكون تابع ويريح نفسه من الأختيار والتفكير والبحث ووجع الدماغ

** لا أحنا محتاجين للشخصيه الفاعله عموماًوالمؤمنه أن الأستقرار ضد طبيعه التطور والتقدم
ومحتاجين فقط للحريه والديمقراطيه لأنها بتلفظ السيء حتى لو أخطأنا وأخترناه
وأبقى طلى علينا
وتقبلى تحيتى ومرورى
ودمتِ بخير

مصعب صلاح يقول...

السلام عليكم
ولا تزعلى حضرتك أنا هجاوب ع الاسئلة
السؤال الاول : لو قبلت شخصية مستبدة هاعلن دايما رافضي لقراراته ودا هيخليه يحس انه مش مسيطر ولا حاجة
السؤال التاني : الناس بتحب النفاق لأن الناس بتهرب من الحقيقة وبتحب اللي يرفع من قيمتها فحبوا النفاق والمجاملات بس برضه مش لازم نعمم
السؤال الثالت : مكيافيلي قال الكلمة دي لأنه كان عنده حب الظهور وشخصيته كان فيها نقص دا رأيي
السؤال الرابع : السبب إن الانسان جه مش عنده ثقة في قدراته
الخامس : ياختصار لأ
تقبلي مروري

فوبيا - سايكولاند يقول...

يا سويت
مساء الفل والجمال عليكى يا جميل
اول ما قولتى المستبد جت فى دماغى حكايه المستبد العادل وهل فعلا يوجد مستبد عادل فى حياتنا وليه ما يكونش مستبد عماد مثلا ليه عادل هو اللى مكوش على حكايه مستبد ديه انا هحاول اقرا الكتابين دول اللى انتى كاتبه عنهم بس انا عايز اديلك لينك كتاب اسمه الطاغيه
http://www.4shared.com/file/51043041/4b337b19/____--_.html?s=1
الكتاب ده رهيب يا سويت وده لينك هديه ليكى وادعيلى

.. هعزف لنفسي يقول...

السلأم عليكم
بجد موضوع رائع ويارب يحقق أهدافه وانا بحب المواضيع دي جدا
بس انا داخل بس اسجل قراءة
لاني داخل من موابايل بس قولت لازم ارد انتو عارفين الامتحانات بئي
بس هقول حاجه صغيره وارجع اكمل بعدان قال رسول الله افضل الجهاد كلمة حق عند سلطان جائر صدق رسول الله
راجع تاني باذن الله

.. هعزف لنفسي يقول...

السلأم عليكم
بجد موضوع رائع ويارب يحقق أهدافه وانا بحب المواضيع دي جدا
بس انا داخل بس اسجل قراءة
لاني داخل من موابايل بس قولت لازم ارد انتو عارفين الامتحانات بئي
بس هقول حاجه صغيره وارجع اكمل بعدان قال رسول الله افضل الجهاد كلمة حق عند سلطان جائر صدق رسول الله
راجع تاني باذن الله

من غير عنـــوان يقول...

أفادكم الله

ياريت كل المدونات فيها الإضافات دي والتي تزيد من معلومات القارئ...

شكرا

أمنياتي

قلم رصاص يقول...

السلام عليكم

اول تليق مكرر
ههههههههههههه

احيي حضرتك على المدونة الرائعة هذه
واحييكي أكثر ان اول بوست اعلق فيه عندك يكون بهذه الروعة فكرته

بخصوص الأسئلة

1-لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟

ج: انا شخصيا هستمع ليه واطلق العنان لصاحب هذه الشخصية كي ينطلق في الحديث كي يفرغ مابداخله ..أي بهدف الاحتواء . ولست اعتقد ان الهجوم خير وسيلة للدفاع أسلوبا يصلح مع هذا النوع من الشخصية لأنه بالتأكيد سيصبح صدام أكثر منه حوار.

2- و ليه الناس بتحب النفاق عن الصراحة ؟

ج: اعتقد ان السبب في ذلك هو اغة المصالح وليس بالضرورة المصالح المادية بل يكفي هدف اراحة الرأس من صداع الجدل حول ماهو صراحة واقناع الطرف الأخر بحتمية ايماننا بيها جدير بالارتكان الى النفاق ..

دا طبعا غير أسباب جوهرية اخرى انه اعتقد ان النفاق ازدادت حدته بتطور الحياه وتطور أساليب المعيشة وتغير الأنماط واختلاط الغربي بالشرقي ،، فهناك مبدأ اسلامي يقول :

شر الأمور محدثاتها وكل محدثة بدعة وكل بدعة ضلالة كل ضلالة في النار

واعتقد ان هذا يمت بصلة ما للنفاق

3- تفتكروا مكيافيلى كان عنده حق فى المقولة دي ؟؟

انا شخصيا أكره هذا الرجل ، لأنه أسس لمبادئ شيطانية اعتقد انها وراء انقلاب العالم رأسا على عقب .. فمبادئه تدعو دائما للشر والسادية والقوة في الحياة الانسانية، وغالبا فعل معظم المفكرون الغربيون التي قامت الاطماع الاستعمارية لدولهم على افكارهم والغزو الفكري وصراع الحضارات احدى صور هذه الأطماع.

وبالتالي كان هذا الرجل على خطأ

4- من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟

ج: اعتقد انه من بين الأسباب وراء ذلك هو ايجاد هذا الشخص لبعض القواسم المشتركة بينه وبين الشخص الأخر(المستعبد له) وبالتالي يعتقد في نفسه ان بتمسكه بتبعيته له ان ذلك من قبيل اشباع رغباته الدفينه بالقوة الذاتية حتى ولو كانت هذه القوة ليست ملكا له او في يده حتى لو كانت في يد أخر مستعبدا له. والله اعلم!

5- تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟

ج: الاختلاف سمة من سمات الحياة لابد عن ووجدها وهكذا هي طبيعة الخليقة منذ بدء وجودها ، لكن انا أؤيد رأي أخي محمد غاليه فيما قاله : بأن التغيير ان أتى لابد ان يأتي من تحت أي من الشعب لأن الشعب هو صاحب الحق الأصيل في السيادة طبقا للنظرية السياسية المجردة
والحكومة بالطبع جزء من الشعب ويمكن أن يأتي منها التغيير ، ولكن التغيير ان أتى منها غالبا سيكون تغيير فئوى ينظر للأمور من منظور ضيق يخدم في الغالب مصالح هذه الفئة التي تنتمي اليها الحكومة.....أما الشعب ان أتى منه التغيير فبيكون ذو نفع عام يهدف لصالح المجموع . والله اعلم!


عارف اني طولت جدا على حضرتك لكن معذرة دي اول زيارة والموضوع كمان عجبني جدا

مزيد من التوفيق

في حفظ الله

قلم رصاص

mayada يقول...

الاول سلامه دماغك ياقمر

بعدين انا جيت امبارح قرأت الموضوع
ومعرفتش ارد ففكرت ورجعت تاني
المهم
خدي الاجابات في العضل بس اطلع الالفي هنا لغزك
1_ انا عن نفسي بتصرف بمبدا العين بالعين
والسن بالسن والبادي اظلم فبدل هو عاوز يمشيها هو كده يبقي هو كده انا كمان لان النوع ده مبيبقاش بيحب النقاش
بحس ان عنده جنون عظمه فبقصر
2_النفاق الناس بتفضله لانه بيريح وبيحقق لهم مصلحتهم العصر ده عصر المصلحجيه يعني يقولك وانا هشغل بالي ليه انا ليه اوصل للي عاوزه ان شاالله يولع حتي تلاقي الناس صريحه اخر حاجه مع الناس اللي بتحبهم وتخاف عليهم بس
3_ هي المقوله صح بس بمنظور تاني
الحب متعلق بالعاطفه والهوي مش حكم فيصل ممكن تكوني بتحبي حد منافق وكداب واووووووووو عشان هو والدك فاهمني
لكن يخشي بيتحكم فيها عقل ومنطق وواحد بلس واحد اكول اتنين
وده مش شرط اخشي حد عشان هو مسيطر او زي سلطه او بيمارس ضغط
ممكن بااخشي حد عشان تفكيره شخصيته احترامه وهكذا
4_ عشان مصلحته او تربيته وشخصيته
هو اتعود ان هو يكون متبوع او اعتمادي او ممكن يكون بيمشي اموره
5_ الاستبداد والتباعيه احنا اللي ساعدنا علي وجودهم (مش كتير حتي تسمعي كلمه وانا مالي ) احنا شعب توكلي فبقت حقيقه مش من حقنا نعترض عليها واحنا زي ماتقولي استريحنا علي كده
لكن نتغير معتقدش لان مش عشان الاستبدا بس لا عشان احنا كمان زي ماقلتلك كل واحد عجبه حاله علي كده
يلا سلاموز عشان صدعتك

maha zein يقول...

الشخصية المستبدة دي بعرف اتعامل معاها اذاي
الشخصية المستبدة اوعي تنوليها الفرصة انها تستبد عليكي
وقفيها ديما عند حدها

micheal يقول...

اسألتك صعبة أوي
بس أنا بميل لراي جمال حمدان في تحليل الظواهر دي وهو أن الشعب المصريس بيبص للحاكم والحكومة نظرة رعوية علي أنه بابا أو ماما اللي لازوم يلبوله كل رغباته لأنه مسئول منهم ودي نظرة فيها تواكل كتير وأعتقد أن خالد صالح كان عنده حق لما قال الشعب المصري ماسك في إيدين الحكومة كأنها أمه اللي خلفته حتي لو الحكومة دي ماشية علي حل شعرها..مدونتك جميلة
تحياتي

Sweet Violet يقول...

مسدس صغير
------------
اتفق معاك فى كلامك علشان كده دايما مصدر قوته اصحاب الشخصية التابعة او المنافقين

نورت (:

Sweet Violet يقول...

شموسة
---------
اكيد طبعا معاك فى كلامك

بس انتى مش قولتى ياشموستى لو قبلتى الشخصية دى هتتصرفى معاها ازاى ؟؟

نورتى (:

Sweet Violet يقول...

عاشقة الأحزان
---------------
عليكم السلام و رحمة الله و بركاته

صدق رسول الله صلى الله عليه و سلم

نورتى ياجميلة (:

Sweet Violet يقول...

blue-wave
------------
الله يسلمك (:

اممم مش عارفة مش متفقة معاك فى موضوع التجاهل لان من وجهة نظرى التجاهل هنا مش هايفيد فى شئ

بالعكس هو بردو هيفضل مستمر فى الاستبداد .. لكن المواجهه معاه هتكون افيد بكتير

لان بكده انت بتظهره قدام نفسه اللى هو اوقات بيصدقها للأسف

^^^^^^^^
هو ممكن فعلا علشان ماحدش يزعل

لكن استحالة يكون للوصول لقلوب الناس لان النفاق عمره ماهيكون هو الطريق

بالعكس ده الصدق و الوضوح هو اسهل طريق للوصول لقلوب الناس

و طبعا معاك ان المنافق بيخسر نفسه قبل الاخرين

^^^^^^^^^^^

النتيجة سرية على فكرة ((:

نورت (:

Sweet Violet يقول...

سوووووووول
----------
عليكم السلام و رحمة الله و بركاته

هلا سوووووووووووولتى

طبعا يابنتى لازم ترجع تانى ايام الصداع

امال ايه .. هى ضد التيار بتلعب ولا بتلعب هنا نيهاهاهاهاهاهاهاها

^^^^^
طبعا معاكى فى كلامك عن الشخصية المستبدة

لكن فى نقطة الناس اللى بتبقى ماشية ورا المستبد و شايفاه قدوة دول المخدوعين فيه

و بيقولوا امين على افعاله و كلامه لانهم شايفين انه صح و بيحترموا كمان

لكن اللى اقصده هنا اللى بيبقى عارف كويس قوى ان الشخصية دى على خطأ مثلا و بيقول امين

للخوف منه فقط لا غير (يعنى قط قدامه و اسد من وراه)

^^^^^^

ربنا يخليكى ياقمر

نورتى ياقمراية (:

Sweet Violet يقول...

المعتصم
----------------
عليكم السلام و رحمة الله و بركاته

بس بس جريدة ايه و حلف ايه

ده انا اتصدمت بالبوست اللى انت منزله ... يلا كنت رئيس خفيف على كرسى ((:

^^^^^
امممم طبعا هى وجهة نظرك و مش هقدر اتكلم فيها (رغم ان فى سؤال وقع فى النص مش عارفة راح فين ماعلينا)

لكن مش معاك اننا بنضحك على روحنا لاننا عارفين ان التغيير مش هيحصل الا لو بدأنا بنفسنا

ولاننا مش قادرين نتحكم فينا فبنطلع كل العقد على الناس التانية ((:

^^^^^
مين لغى ايه و فين و امتى ؟؟؟!!!!

ده كان زماااااااااااااااان ممكن لكن دلوقتى خلاص كل شئ انكشف و بان

نورت (:

عليكم السلام و رحمة الله و بركاته

Sweet Violet يقول...

Bondoka
-------------
كل الاصحاب شخصيات مستبدة يعنى ؟؟؟!!!

ماظنش دى خااااالص

اما بقى الشخصية القوية اللى بتحاول تسيطر على اللى حواليها دى استحالة

هى الشخصية المستبدة ماشى لانها اصلا شخصية غير سوية بالمرة و جواها خلل و بتحاول تعوضه بكده

اما صاحب الشخصية القوية فهو شخص سوى و استحالة شخص سوى يكون تفكيره السيطرة على الاخر

^^^^^^^
لما الشخصية المستبد ة تقابل حد بيعارضها رد الفعل الطبيعى انها تبعد

و بتحاول بشتى الطرق تبعد اللى حواليها عن الشخصية دى كمان و هنا مش استبداد اكتر منه خووووف

لانها بتكون عارفة كويس انهم تابعين و بالتالى من الممكن يمشوا ورا الشخصية التانية و بكده هتكون هى وحيدة

^^^^^^
الشعب المصرى لازم يخاف علشان يمشى صح !!!!

و تفتكرى بكده الشعب فعلا مشى صح دلوقتى ؟؟؟

الصراحة انا شايفة انه العكس ده غلط اكتر من الاول

^^^^^^
اختلف معاكى ان الشخصية التابعة ممكن تكون طيبة قووووى

لان عمر الشخصية الطيبه ماتكون منافقة .. اما الشخصية التابعة ضعفها اوقات بيخليها منافقة من الدرجة الاولى كمان

نورتى ياقمر (:

Sweet Violet يقول...

خيااااااااااااااااااااااااااااااااارا
----------
انا نفسى مش كنت اعرف انى هنزل البوست الصراحه D:

منتظركى ياقمر (:

Sweet Violet يقول...

محمد
---------
و انا اتفق معاك جدااااااااااااا فى كلامك

نورت (:

Sweet Violet يقول...

nona
----------
ماهو اكيد مافيش شخصية بتبان بسرعة

لكن انا بتكلم بعد المعاملة و انها فعلا ظهرت انها مستبدة

هو عموما مافيش سيطرة و استبداد ليهم لازمة اصلا (:

^^^^
هى الشخصية الضعيفة غير الشخصية الهايفة

بس عموما انا نفسى مش بحب الانواع دى من الشخصيات بردو

نورتى ياقمر (:

Sweet Violet يقول...

سنسونتى
----------
انتى اللى وحشانى مووووووووووووووت جدا خالص قوى كمان

و الله مش بكش بس فعلا انا كنت منتظرة شموسة تأكد علشان اكلمك انتى و كيارا

لكن مش حصل فقولت يبقى اكيد مش هينفع بس (:

^^^^^^^
ههههههههههه ماشى اشوفها ضدتى لحد مااشوفك بس ((:

رغم بردو انى مش شايفة ان التجاهل هو الحل .. لكن مدام قولتى اعصابك مش ناقصه يبقى سماح D:

^^^
عمر النفاق مايكون طريق لكل راحه بالعكس ده طريق لكل شر

^^^^^^
امممم ماشى كفاية هنا اجابات

بس لما اشوفك ان شاء الله هتكملى على فكرة اجباااااارى

بجد ياجميلة انا اللى كنت فعلا سعيدة جدااااا و انا معاكم (:

ان شاء الله هقابلك قبل السفر فى القاهره

بس ايه حكاية العريش سفر!!!! لالالالالا ده انا واخده وعد

و طبعا اتأكد الوعد بعد ما كلمتك كمان نيهاهاهاهاهاها

نورتى ياجميلة (:

Sweet Violet يقول...

lonely girl
-----------
دول 5 بس مش كتير خالص (:

التجاهل بردو ... من الواضح ان المعظم متفق على نفس التصرف

مع انى مش عارفة ليه شايفة مش هو الحل ممكن لان التجاهل بيقتصر عندى على شخصيات معينة اللى هما فعلا يستحقوا التجاهل

و انى مش اضيع وقتى معاهم

^^^^^^
الانسان التابع لشخص ما .. مش شرط يكون الشخص ده مستبد وهو ضعيف انه يواجهه

هو عموما بيكون ضعيف انه ياخد اى قرار فى حياته و بالتالى اى حد اقوى منه حتى لو بالتظاهر بيبقى هو تابع ليه

^^^
ارجو انها تقل مش تزيد

نورتى ياقمر (:

Sweet Violet يقول...

Butterfly
-------------
هو فعلا بيبقى تابع لشخصية ما لكن الشخصية دى دايما بتكون مش ظاهرة غير انه بيبقى تابع بدون علم منه

يعنى هو نفسه مش عارف انه تابع و فاكر انه فعلا كلامه من دماغه فقط لاغير لانه للأسف بيبقى مصدق نفسه

اما موضوع قلة الادب و الذوق فهو مش غالبا هو دايما بيكون ده علشان كده تلاقى اللى حواليه دايما بيخافوا يعترضه عليه قدامه علشان كده

نورتى (:

Sweet Violet يقول...

ايوشة
---------
هههههههههههههههه انا بردو اوقات على فكرة بيقولوا عليا كده

بس طبعا مش بيكون المقصود بيه المعنى الحقيقي بتاعه (:

^^^^^^^^^
هههههههههههههه ليه بس دى الاسئلة سهلة جداااااااا

صح اللى بيستبد اوقات كتييير نفسه بيكون ليها نصيب من الاستبداد ده

و طبعا لما بيظهر الحقيقة بتاعته بعد كده للى حواليه فعلا الكل بيبعد عنه

^^^^^^^
عجبتنى قوووى اجابتك على سؤال الشخصية التابعة و بجد اتفق معاكى و بشدة كمان (:

نورتى ياقمر

Sweet Violet يقول...

أحمـــــــــــــد أبو العلا
-----------------
ايوااااان اسمعك بوضوح

حووووووووووووووووووول ((:

هو مش كسل اكتر من الخوف من المجهول ده على المستوى العام

اما على المستوى الاجتماعى بيكون خوف من الشخص ده و ان ظهر شخص اخر على الساحة اكتر استبداد هتلاقيهم وراه بردو و يتقلبوا على الاول

نورت (:

Sweet Violet يقول...

aMr tA3LaB
---------------
هههههههههههههههههه سنة ايه بس و كمان ماهو انا لازم اصدعكم امال ايه

ضد التيار على الفاضى ولا ضد التيار على الفاضى يعنى ((:

بنطرطش زلط ههههههههه عجبنى قوووى المصطلح ده اول مرة اسمعه على فكرة (:

سيبنا من اللى فوق نبص على اللى تحت

موضوع النفاق فى المدونات اكيد هتلاقى منه لان اللى بيبقى منافق فى الحياة العادية بردو هيكون منافق فى الحياة الافتراضية بردو

هههههههههههههههه انا اللى رغاية ماشى ماشى

نورت (:

Sweet Violet يقول...

مرمر
----------
هههههههههههههههههههه صحيح مالهم ميكى و بطوط

ده انا بحبهم موت و ان شاء الله اخد بالنصيحة اهو على الاقل اريح دماغى شوية

بس بردو ده مش يمنع انى اصدعكم ((:

سمعت عن الكتاب ده بس الصراحة مش حاولت اقراه

بس ان شاء الله مدام بتقولى رهيب نشوفه و نكمله احنا علشان ابقى ارخم عليك بيه ((:

^^^^

انا منين ؟؟؟؟!!!!

انا من البلد انا من البلد نيهاهاهاهاهاهاها

هو ايه انا منين دى يابنتى

امال ايه لما انزل مصر هشوفك و الكلام ده

و جاية دلوقتى تقولى انتى مين

ايه الناس اللى عندها الزهايمر ده ياربى



و كمان ايه بتعملى ايه دى هو انتى مين بالظبط ؟؟؟

لالالا كده هبدأ اقلق بقى و انا لما بقلق بقلق على فكرة ((:

انا قاعدة اهو برد عليكم فى المدونة P:

ايوة طبعا هصحبك و على فكرة مافيش اختيارات ده اجبااااااااااااااااااارى

ضد التيار بقى و براحتى (:

نورتى ياقمر

Sweet Violet يقول...

منووووووش
------------
المجاملة مطلوبة ماشى لكن مش تزيد عن حدها و طبعا الصراحة لازم اصلا تكون باسلوب كويس

لكن مش معنى ان مثلا انا شايفة ان الانسان ده غلط لكن علشان مش يزعل اقوله لا انت صح و امين على افعالك

علشان مش اكون قليلة ذوق ولا ايه؟؟؟

اما الشخصية التابعة اوقات بيبقى فعلا مصلحة لكن كتييير بيكون خوف وعدم ثقة فى النفس

نورتى ياقمراية (:

Sweet Violet يقول...

مجنووون
-----------
معاك فعلا ان الانسان طبعه السلطة و التحكم

و لو مش عرف يتحكم فى الموضوع ده هيكون مستبد و مكروه

وهو ده بقى اللى انا بستغربه ان طبع الانسان مش تابع

يبقى ايه اللى يخلى شخص يرتضى بالتابعية ؟؟؟

و رغم انى بقول الخوف لكن بردو ده مش مبرر

لان الانسان ممكن يتغلب على خوفه

نورت (:

Sweet Violet يقول...

رومانسى التفاؤل
-------------
مساء النووووووور بقى علشان فرق التوقيت (:

ميكافيلى عنده حق لحد مايظهر العكس !!!!!

يعنى انت شايف ان الناس فعلا مش بتيجى غير بكده

و العكس مش ظهر !!!!

مش عارفة لكن اختلف معاك الصراحة فى النقطة دى

نورت (:

Sweet Violet يقول...

صبرني يارب
--------------
فعلا لو قابل حد شخصيته قوية دايما بيقف عن حده

علشان كده تلاقى اللى حواليه من الشخصيات التابعة فقط

لكن القوية مافيش علاقة معاه و ان وجد بتكون علاقة متوترة جدااااا

نورتى (:

Sweet Violet يقول...

واحد من العمال
----------------
عليكم السلام و رحمة الله و بركاته

عجبنى قوووى اجباتك و تحليلك المنطقى فعلا

بس اختلف معاك فى رد الفعل مع المستبد الصراحة

لان هنا اى نعم هيقف عند حده معاك لكن هيزيد فى العدوانية مش هيعالج ):

و ان شاء الله هزورك طبعا

نورت بزيارتك الاولى (:

Sweet Violet يقول...

مصعب صلاح
-----------
عليكم السلام و رحمة الله و بركاته

ربنا مش يجيب زعل ابداااااا

و بجد اشكرك انك لفيت و رجعت تانى (:

^^^^^^
الصراحة مش معاك فى موضوع الرفض الدائم لقرارته لان اوقات بيبقى فى قرارات فعلا صح

ومش معنى ان فى قرار فعلا انا اتفق معاه فيه يبقى كده هو مسيطر

بالعكس احساسه بعدم السيطرة لما ارفض القرار الغلط و أؤيد القرار الصح

لان هنا هيعرف ان المسيطر هو عقلى و شخصيتى مش هو .. و الدليل انى مش بقول امين على الصح و الغلط

^^^^^^
اكيد طبعا انا مش بعمم لكن مش هننكر بردو ان المعظم دلوقتى بقى ماشى بالنفاق

للمصلحة الشخصية او خوف من الشخص اكتر منه مجاملات

^^^^^^
مافيش انسان بيتولد مش واثق فى قدراته لكن ممكن نقول عوامل خارجية هى السبب فى فقدان الثقة دى

اشكرك لتانى مرة للاهتمام و العودة (:

Sweet Violet يقول...

فوبيا
--------
مساء النور عليك (:

ههههههههههههههه من الواضح ان الاسئلة طبع فيك مافيش فايدة

مهما اقول مش هينفع يتغير ابدا

بس مااعتقدش ان فى مستبد عادل على فكرة

ان شاء الله تقدر تقراهم

و اشكرك على اللينك انا نزلته و ان شاء الله هقراه قريب (:

نورت (:

Sweet Violet يقول...

هعزف لنفسي
----------
عليكم السلام و رحمة الله و بركاته

صدق رسول الله صلى الله عليه و سلم

ربنا يوفقك فى الامتحانات

و منتظرة عودتك ان شاء الله

نورت بالزيارة السريعة (:

Sweet Violet يقول...

من غير عنوان
-----------
اشكرك على مرورك

لكن كنت ارجو انك تجاوب على الاسئلة و اعرف وجهة نظرك ):

نورت (:

Sweet Violet يقول...

قلم رصاص
---------
عليكم السلام و رحمة الله و بركاته

رد على اول تعليق مكرر هههههههههههههههه

اشكرك على رأيك فى المدونة و البوست (:

^^^^^
معاك طبعا ان الهجوم مع الشخصية دى مش هيحل شئ بالعكس عواقبه هتكون مش حلوة

الاحتواء كويس للشخصية دى لكن بردو لازم يكون بحدود معينه علشان مش يقلب لنفاق ليه و يزيده استبداد

لان فى ناس للأسف فاهمة معنى الاحتواء غلط و بيكون مبرر لنفاقهم للشخصيات دى

^^^^^^^
معاك ان النفاق سبب من اسبابه المصلحة بجميع جوانبها

اما الاسباب الجوهرية فانا الصراحة اختلف معاك فيها

لان تطور الحياة عامة مش سبب نهائى للنفاق لان لو كده كنت تلاقى جميع البشر منافقين و ده مش صحيح

اما اختلاط الغربى بالشرقى فده ان كان سبب فهيكون سبب للصراحة مش النفاق

^^^^^^^
الطبيعة الانسانية دائما تميل للشر اكتر منها للخير علشان كده الواحد لازم يحجم نفسه

مكافيلى كان للأسف بينظر لجانب الشر فى الناس مش الخير .. لكن مش هنكر ان بعض مبادئه صح

مكافيلى نفسه فى المقولة دى رغم انه قال من الافضل انهم يخشوك لكن بردو قال ماينفعش انهم يكرهوك

لكن صاحب الشخصية المستبدة بياخد الجزء اللى على هواه فقط و يهمل الجزء الاخر

زيه زى اى شخص بياخد من مبادئه الجزء اللى يتمشى مع شخصيته و يجعله يخدم هواه فقط لاغير

علشان كده مش ينفع اقول ان مبادئه ورا انقلاب العالم رأسا على عقب

^^^^^^^^^^^
وجهة نظرك عن الشخصية التابعة اتفق معاك فيها

لان فعلا ده سبب من الاسباب ارتضاء الشخص بالتابعية

^^^^^^^^^
طبعا اتفق معاك و مع محمد فى الرأى

و دايما بقول ان التغيير الاكبر لازم يجى منا احنا مش منهم

^^^^^
لا طولت ولا حاجة و بجد سعيدة جدااا بتعليقك

نورت بالزيارة الاولى و ارجو التواصل الدائم (:

Sweet Violet يقول...

mayada
----------
الله يسلمك ياجميلة (:

المهم انك رجعتى تانى ياقمر بس ليه الشر ده بس )):

^^^^^^
بصى انا اختلف معاك فى موضوع المقولة الصراحة

انا معاك ان الحب متعلق بالعاطفة و الهوى

لكن هنا انتى بتقولى اخشى حد علشان تفكيره شخصيته احترامه

الاسباب دى تخلينى احترم الشخص لكن مش اخشاه ولا ايه ؟؟؟

^^^
ماهى كلمة و انا مالى دى نابعة من سلبية الشخص نفسه

لكن انا فعلا مش بقول عدم التغير سبب الاستبداد فقط لا و التابعية و السلبية اللى بيقنا فيها

لكن مش الكل بردو اللى عاجبه حاله لان فى ناس بتعترض عن حق و بتحاول فعلا تكون ايجابية

مافيش صداع ولا حاجة انتى نورتى (:

Sweet Violet يقول...

maha zein
----------
توقف عند حدها ازاى

هل بالهجوم ولا بالسياسة ؟؟؟

نورتى ياقمر (:

Sweet Violet يقول...

micheal
-----------
هو الحاكم فعلا مسئول عن الشعب و مطالب بتلبية رغابته مدام فى الصالح للبلد و ليه

وده حق مش تواكل ... التواكل لما الشعب يقعد فى البيت و بيقول ان الحكومة ملزومة بكل شئ

اما بقى موضوع انه ماسك فى ايدين الحكومة حتى لو ماشية على حل شعرها

اعتقد ان فى معارضه من الشعب على الحكومة ولو فعلا زى مابيقول كنت هتلاقى كل كلمة من الحكومة يتقال عليها امين و خلاص

و اعتقد ان اللى بيعمل كده فئة معينة من الشعب مش كله

و مش هقول ان اللى احنا فيه سببه الحكومة

بالعكس ده الشعب هو السبب فعلا بالسلبية المنتشرة فيه و عدم المطالبة بالحقوق الا القليل منه

نورت باول زيارة (:

marmar يقول...

ههههههههههههههههههههه
امشي يا بت يلا من هنا
انا الحكومه هيهيهيهيهيهي
هقبض عليكم كلكم واحطكم في السجن
اما ورييييييييييييييييييييتكم
قصدي يا زهايمر اسمك ومنين
ركزي ركزي
بت مزهمره خالص
صاحبيني يختي بس استحملي بقى هههههههههههههه

Sweet Violet يقول...

ههههههههههههههههههه

ايه الناس اللى جاية تحتل المدونة عينى عينك كده دى

طب انا قاعدة بقى هه P:

و كمان انا قولت من الاول الاسئلة دى مش مريحة بالمرة

آآآآآه انتى تبع الناس اللى هناك و انا بقول انك من الناس اللى هنا

بس بس انا مصدومة بس مش قوى يعنى D:

الاجابة وصلت

و كمان مين اللى عنده الزهايمر هو انا بردو اللى سألت انتى منين مرتين نيهاهاهاهاهاهاهاها

لو عايزة بقى فصيلة الدم و محل الميلاد و تاريخه بالمرة ماهو شكلك داخله على طمع اصلا ((:

استحمل و امرى لله الواحد مش هيقدر يعترض )):

marmar يقول...

لا متخافيش طبعا دحنا اخواااااااااااات يا معلم
ولله بدعيلك فعلا لانك سكوووره ولذيذه وحساكي فيكي شبه مني ومن تصرفاتي
رخمه زيي يعني ههههههههههههههههههههه
بس اول ما انزل مصر لازم لازم اشوفك اديني بقولك اهو من دلوقتي
هنزل في شهر سبعه نصو كده بأذن الله
هشوفك يعني هشوفك اجبااااااااااري
ادعيلي احقق حلمي قريب

Sweet Violet يقول...

يااااارب تحققى جميع احلامك ياقمر

اما بقى عن موضوع الرخامة اى نعم ده انا استاذة فيها اى والله هههههههههههههههه

و كمان اهو انتى بقى اللى لذيذة و سكر كمان هه بس

و انا اقول ليه بيقولوا فى الاخبار الشعب يعمل حسابه لان احتمال فى نص سبعه النور يقطع فى مصر اتارى بقى الموضوع كده طب مش تقولى من الاول هههههههههههههههههههههه

لالالا جد بقى ترجعى بالسلامة ياقمر و ان شاء الله هكون موجودة

الازهرى يقول...

تتصدمى لو قلت لك ان ميكافيللى عنده حق فى كلمته ؟
صدقينى لو الشخص حاكم احيان كتير بيبقى ده الحل الوحيد علشان امور الدولة تمشى وبيبقى حل صح احيانا

اما بالنسبة للنفاق فده لضعف النفوس الناس الناس خايفة وبتنافق والمستبد مغرور وبيحب يسمع كلام الناس الحلو عنه حتى لو كذب

اما بالنسبة للشخصية التابعة فدى فى رأيي لغز كبير ومحتاج قاعدة انا مش فايق لها دلوقتى
وبالنسبة لمرمر انصحيها بلاش تنزل مصر كفاية الخراب الموجود فيها
يعنى احنا ناقص نستورد كمان ؟

hager za3bal يقول...

ضد
انا مع رأي د. عمرو في كل كلمه قالها :)
بجد موضوع جميل اوي مع انه وجع دماغي
هههههههههههه

عوده قويه يا ضد :))

تحياتي

Sweet Violet يقول...

الازهرى
------
معاك فعلا ان احيانا الحاكم بيحتاج يتعامل بكده علشان يمشى امور الدولة
رغم انى بردو مش حابه المبدأ ده لان الشعب الحر عمره مابيمشى بكده

لكن هنا انا بتكلم عن الشخص العادى مش الحاكم اللى واخد المقولة دى مبدأ ليه للتعامل مع الناس

^^^^^^
ربنا معاك فى الامتحانات

وان شاء الله لما تفوق ياريت اعرف حل اللغز من وجهة نظرك (:

^^^^^
اوووووبس يعنى قصدك يعنى ان مرمر خراب

لالالالا يازهرى مش معقول دى مرمر جميلة و عسولة دى هتنور مصر ياراجل (حتة بقى اهدى النفوس فيها ^_^)

لما تخلص بس هى كمان امتحان ابقى اهدى النفوس براحتى بقى

نورت (:

Sweet Violet يقول...

هاجر
-------
حمدلله على السلامة ياقمر

وسلامة دماغك ياقمر من الوجع

نورتى (:

وليد الاسلام _هويتى اسلامية ومدونون من اجل فلسطين يقول...

السلام عليكم ورحمة الله دى اول زيارة لى على المدونة وان شاء الله تكون طيبة ومفيدة وخصوصا اننا بلديات بس حضرتك من شرق الشمال وانا من غرب شمال سيناء المهم نيجى لاسئلة حضرتك


لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟

اعتقد انه مفيش حل غير النصح والتوجيه والتوعية فان اصر فالساكت عن الحق شيطان اخرس وافضل الجهاد رجل قام لحاكم مستبد فقال له اتق الله فقتله يعنى منسكتشى عن الظلم




و ليه الناس بتحب النفاق عن الصراحة ؟


لانهم تربوا على كده تربوا على شى دخيل اسمه المجاملة يعنى نفاق بس بصورة مهذبة وطبعا لان المجتمع ماشى على كده للاسف قليل الى بيقف مع نفسه وقفة صادقة ويراجعها ويحاسبها
(و ماحدش يقولي علشان الصراحة بتوجع .. هقوله وجع ساعة ولا كل ساعة .. غير ان الشخصية اصلا بتبقى عارفة ان الناس بتنافقها )




تفتكروا مكيافيلى كان عنده حق فى المقولة دي ؟؟

اكيد طبعا


من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟


الهزيمة النفسية والوهم بعدم القدرة على انجاز الاعمال

تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟


طبعا لا مش حنقدر نغير الا لما الايجابية تسود فى المجتمع والمصلحة العامة تغلب على النزوات والاهواء الشخصية ونعرف الوضع الى احنا عايشين فيه وكل واحد يحس ان بلده هو حاكمها وعاوزها فى افضل الحال اما مبداء نفسى نفسى فهو الى الهلاك والدمار

ربنا يحميكى يارب ولو تسمحى اكون صديق للمدونة

kmt يقول...

السلام عليكم روحمة الله وبركاته

عارفه ان التعليق جه متأخر حبتين
بس بجد انا قرأت البوست اول مانزل بس الاسئله دي علشان ارد عليها لازم اكون فايقه لها.

بصي ياستي
انا عن نفسي فاشله في التعامل مع الشخصيات دي لاني فعلا لو اضطريت للتعامل معها اكيد اكيد هاننتهي لخناقه
لأن بطبعي بكره الاوامر
بس المشكله وخلينا واقعيين ان ممكن الشخصية دي تكون رئس في العمل او حتى اب او ام
وهنا بتكون المشكله كبيرة لأن لازم نتعامل
في علومالتنمية البشريه فيها علم اسمه فن الاتصال حاولت اقرأفيه لكن لنتي عارفه الطبع يغلب
يعني برده هتخانق او الحقيقه اني هاسيب المكان للمستبد يفرح بيه وانا عارفه ان دي سلبية

النفاق عن الصراحة
علشان المصلحة وبس " ان كان لك عند..."

ميكافللي كان عنده حق ؟لا طبعا لان الخوف بيولد الكره بيولد الكره والكره بيولد الغدر والغدر والامان مش ممكن يجمعم مكان واحد والقوة مش مستمرة زي الضعف ماهو مش مستمر

تابع مش مستقل
برده المصلحة لأن لو التابع ده جاتله الفرصه انه يكون متبعوع هايمارس نفس اللي كان بيتمارس عليه

الشعب
بصي
زي ما الشعب فيه المستبد والتابع في برده اللي مش مستبد وتابع
اصل هيا الحياة كده لازم اشياء تكون علشان تكون اشياء تانية وتالته تخرج من جوها
لأن من تحت التراب بتخرج الحياة

تحياتي
الى اللقاء

mira يقول...

المستبدين كتير اوى فى بلدنا وشخصية المستبد من وجهة نظرى بتكون اساسا
شخصيه حاسة بالنقص والحرمان فبيعوض
دة فى انتقامة من الناس والسيطرة عليهم واحاسه باللذة فى ذلهم وشخصية التابع له بتكون شخصيه عايزة تعيش بس على حساب غيرها وكمان تقدر تحس بالقوة اما على النفاق انا ما اقدرش اتعامل بيه مع حد
تمنياتى لكى بالتوفيق

mira يقول...

المستبدين موجودين فى بلدنا كتير اوى
ومن رأى شخصية المستبد بتكون شخصية
حاسة بنقص وحرمان وبيحس بقوة فى سيطرتة وذله للاخرين اما عن شخصية التابع فهى شخصية مستغلة وضعيفة
وعايز يعيش بس على حساب غيرة
واما بالنسبة للنفاق فهو شى صعب التعامل بيه

ايمان روحي يقول...

السلام عليكم ورحمة الله وبركاته
جد موضوعك مميز كتير
بس للاسف الايام هاي
كتير اللي بيخضع
وبلا اي مقاومه
فبالتالي لو الكل
نزل راسو حكي اه
وهو مش مقتنع عمرنا
اصلا مهنتقدم نص خطوة
لان الخضوع ضعف
والضعف مرفوض
نخضع مرة لكن مش كل مرة
تحيـاتي

صوت من مصر يقول...

هل الشخصيه مش موجوده ( نعم بالفعل ؟)
اراها يوميا فى كل شىء
ارجوك لاتتوقفى عن الابداع يوما ما

mahasen saber يقول...

مع اننا رغينا فى التليفون مع بعض امبارح
بس برضه واحشانى يا فيولتى يا مضروبه

صلحى الجهاز بئه

قطرات من شواطئ الحياة يقول...

بسم الله الرحمن الرحيم الإجابة توووونس

قطرات من شواطئ الحياة يقول...

ههههههه

نيجي للجد بأة

لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟

مبدئيا أنا أكتر حاجة بكررهها في حياتي العنف و بما إن من صفات الإنسان المستبد إنه سادي فأنا أكيد مش ححب أتعامل معاه و لو اضطريت حيكون فيه بحدود كبيرة جدا للتعامل و لو وصل الأمر إني أتعامل معاه بنفس طريقته حعملها

و ليه الناس بتحب النفاق عن الصراحة ؟
عشان مصلحتها


تفتكروا مكيافيلى كان عنده حق فى المقولة دي ؟؟
غلطان جدااااااااا

من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟
لو شخصيته ضعيفة و عارف إنه مش حيكون حاجة منغير ما يتبع شخص أقوى منه


تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟

لو وجههوا استبدادهم لحاجة صح زي مثلا عشان نواجه شخص ظالم ماينفعش يوقفه عند حده غير واحد مستبد
ممكن بس حاساها صعبة شوية بجد مش عارفة

Israa El-sakka يقول...

سلام عليكم
أنا أول مرة أزور المدونة أو بمعنى أصح اول مرة كانت من يومين :)) و أهنيكي على البوست لأنه عميق
أنا قعدت يومين كده بقلب الموضوع في دماغي بصي يا سويت فيلوت يا أختي أنا طول عمري كنت بتسائل إذا كان الشرطي اللي بيعذب المواطنين ده في بيته بيبقى كويس و لا بيبقى شرير كده و بيزعق و بيعلق ولاده و مراته زي الغلابة اللي بيعلقوهم في القسم اكتشفت أنه في حاجة أسمها سيكلوجية الجلاد بمعنى أنه الجلادين نسب منهم بتبقى سيكو يعني مجنون أو مريض لكن الأغلبية عايشين على حاجتين الإذعان و التبرير ..يعني مش بالضروري تكون شخصية سيكبواتية و نفس الشيئ ينطبق على الديكتاتور ...أما بخصوص مكيافيلي يعني أنا لا أطن أننا ناخد بكلامه لأنه أنتهازي جدا يعني هو المنظر اللي فصل السياسة عن الأخلاق و أدينا شايفين النتيجة أهو و هو سمعته و سمعة كلامه وحشة من ظمان حتى أنه في مسرحية يهودي مالطا جاء عل لسان البطل كلمة معناها أنت فاكرني مكيافيلي ولا إيه ؟!! بالنسبة اللي لو تعاملت مع شخصية مستبدة في الشغل ( لما نتخرج طيب الأول) مش حيبقى في أي مهنية لأنني بصراحة لما بسكت لحد مرة و أتنين و تلاتة الرابعة بطلع دبش الله يوريكي ..و ساعات قاذرات كمان :)) فالأحسن أني أحصر التعامل معاه لأني إحتمال أكله أرميه من البلكونة ( مفترية باينلي حطلع أنا المستبدة ولا إيه هههه) أما سياسيا هممم مش عاوزين زوار الفجر يشرفوكي في البلوج يا ست فيلوت

مستنية جديدك و أتمنى دوام التواصل

marmar يقول...

انت يا عم النايم فين البوستات هنا بقىىىىىىىىىىىى وراكي امتحانات ولا ايه يا بت ايوة يا عم تلاقيها ماشيه معاك ومش فاضلنا وفاضي للناس التانيه مااااااشي مااااااشي
ايه ده شكلي اتعديت منك وبقيت اقر هههههههههههههه لا طبعا بهرج انتي صبحتي وحبيبتي واختي ومش بقر على حد خااااااااااالص ولله ولله :(
طمنيني عليكي يا بت انتي
اخيرااااااااااااااااااا قربت انزززززززززززززززل مصرررر هيييييييييييييييييييييييه هيييييييييييييييييييه كلها خمس ست اسابيع واجيلك يا مصررررررر
ادعيييييييييييييييييييييييييلي

طوبة ذهب وطوبة فضة يقول...

الاتنين يعتبروا اشخاص مريضه الشخص المستبد بيعيش طول عمره حياه مزيفه متخيل انه فى ملكوت من حقه وملكه وان كل الناس جنبه وان كل حاجه بتاعته ما بيشوفش غير نفسه عشان كدا بيعيش ويموت ما يعرفش عيوبه ولا بيشوف راى الناس فيه اما التابع دا اصعب بيعيش عمر بحاله جبان منبوذ خايف يتكلم فيغلط فيعاقب فبيفضل طول عمره ساكت ويعيش ويموت من غير ولا كلمه اما بقى السلبيه فجد اكتر حاجه مرجعه بلادنا مليون خطوه لورا لو بطلناها من الصغير لحد الكبير هتفرق كتير اوى اوى

كاتب مصري يقول...

أهلا وسهلا ومرحبا بيكي مرة تانية في مدونتي فرحت قوي لما قرات تعليقك عندي
مع اني زعلت اني خليتك في حالة هسهس بس تعملي ايه باه كلنا كده
ربنا معاكي وياريت تنوريني دائما

عاشقة الأحزان يقول...

السلام عليكم


حبيبتى الغاليه
ممكن ادخل

اهو بقا انا دخلت واللى يحصل يحص


ممكن اسئل سؤال محيرنى

هو انا زعلتك فى حاجه

قطعتى عنى كده مره وحده

يارب يكون المانع خير بصراحه مش بحب حد يزعل منى خالص

ربنا يديم المعروف
ياريت تطمنينى عليكى ياحبيبتى

اختك
ايناس

حـــــدوتـــــة يقول...

السلام عليكم

دى اول زيارة ليا
وإنشاء الله مش الاخيرة

المدونة بتبان من اول بوست
وواضح انها مدونة ليها رأى
فى زمن الرأى فيه بقى مشكله
والاحسن ان الواحد يبقى ملوش رأى

شكرا لزيارتك لمدونتى
ويارب تكون عجبتك

ارجو التواصل دائما
سلالالالالالالالالالالالالالالالالالالالالالالالالام

فكرة من الزمن ده يقول...

سعيدة بزيارتك ليا
وسعيدة اكتر بدخولي لمدونة
متميزة تقول شيء مختلف


اولا صاحب الشخصية المستبدة موجودة وايضا صاحب الشخصية التابعة
ولان الشخصية التابعة مهيأة للانقياد تجديها تنجذب كفتات الحديد للمغناطيس تسير في حمى الاخر
وتتكون خلايا كل صاحب شخصية مستبدة قيادية يقود محموعة من التابعين يتبادلون المنافع في النفاق والحماية ولو كانت معنوية
وبالطبع الشخص المستبد هو يعلم انه على خطا فلا يهتم بان يصارحه الاخرون المهم ان يصل لما يريد
وبالطبع مقوله ميكافيلي تصلح في بعض الظروف لكني لا اتفق معهالانها ليست قانون
تحياتي

احساس لسه حى يقول...

عزيزى

موضوع مهم جدااا

بس مش عارف بحس ان فى حياتنا فيه مستبد نقى وجدع اللى بيخاف على حد وبيظن ان اللى رائيه صح ودايمن بيحاول يفرضه على الناس حبا فيهم

شوفى اكيد لكل انسان حريته وحقوقه والشخصية المستبدة بتدمر ناس بدون قصد او بقصد

لاكن عمر ما هينتهى من الدنيا الاستبداد لان الدنيا كده

والتصرف مع الشخصية المستبده حسب هو بالنسبالنا ايه واحتياجنا ليه اد ايه

تحياتى

سلام

hager za3bal يقول...
أزال المؤلف هذا التعليق.
تأثير الفراشة يقول...

السلام عليكم و رحمة الله و بركاته

الموضوع عرضتيه بشكل ممتاز ، الموضمون بجد رائع

بالنسبة لسؤالك عن الشخصية التابعة و ليه ما بنقدرش تتصدى للآخر، ففى رأى إن ده نابع من حاجة أساسية و هى ................................قلة الثقة بالنفس

تحياتى ليكى ، بالتوفيق لك دائما

جزاك الله خيرا

Sweet Violet يقول...

وليد الاسلام
-------------
اهلا بيك فى الزيارة الاولى للمدونة ^_^

بجد تعليقك كله فعلا منطقى

و عجبنى جدااا رد فعلك لو قبلت الشخصية المستبدة

و طبعا اهلا بيك صديق للمدونة

نورت (:

Sweet Violet يقول...

kmt
------
عليكم السلام و رحمة الله و بركاته

انا اللى الرد جه متأخر قوووى للأسف ):

مش شرط التعامل ينتهى بخناقة

و على فكرة مع الواقعية بردو ايام الشغل رئيس التحرير كان مستبد لكن انا بردو ماكنتش بسيب حقى و كنت بتناقش بكل هدوء و باخده بردو

اما بقى الاب او الام مش هقدر اتكلم فيه لانى الصراحة ماما و بابا مش مستبدين و عندنا لغة حوار

لكن مش عارفة لو كانوا كده ايه هيحصل ؟

و معاك ان الشعب انواع لكن الغالبية للأسف بتكون كده ):

نورتى (:

Sweet Violet يقول...

mira
-----------
متفقة معاك فى تحليلك

نورتى(:

Sweet Violet يقول...

ايمان روحي
-------------
عليكم السلام و رحمة الله وبركاته

الخضوع مرفوض نهائى مش مرة ولا كل مرة

نورتى (:

Sweet Violet يقول...

كيمو
--------
اكيد طبعا موجودة فى الواقع و كتير كمان

نورت (:

Sweet Violet يقول...

سنسن
-----------
طبعا انتى وحشااااانى موت دلوقتى بردو

و ياريت تسيبك من الجمهورية اللى هناك و تعودى لهنا ^_*

نورتى (:

Sweet Violet يقول...

قطرات من شواطئ الحياة
----------------
هههههههههههههههههههههه

الاجابة غلط نيهاهاهاهاهاهاهاهاها

طبعا اتفق معاك فى الاجابات

و بالاخص فى موضوع انه صعب

علشان كده بردو من الصعب ان البلد دى تتعدل ):

نورتى (:

Sweet Violet يقول...

Israa El-sakka
--------------
عليكم السلام و رحمة الله و بركاته

ماشى لكن فعلا الشخصية المستبدة شخصية ديكتاتورية من الدرجة الاولى

اما ميكافيلي زى ماقولت لقلم رصاص هو كان بينظر للبشر من جانب واحد بس

لكن بردو مش هننكر ان بعض من مقولاته صحيحة

اهلا و مرحبا بيهم .. خدمة المدونة 24 ساعه ((:

ان شاء الله التواصل يدوم

نورتى (:

Sweet Violet يقول...

marmar
----------
طبعا حمدلله على السلامة بقى لان التعليق اصلا متأخر (:

و ان شاء الله نشوفك فى الماتش الجاي ((:

Sweet Violet يقول...

طوبة ذهب وطوبة فضة
-------------
فعلا هتفرق لكن تفتكرى اصلا هنقدر نبطلها ؟؟؟

نورتى (:

Sweet Violet يقول...

كاتب مصري
-------------
اشكرك كتييير

و انا وضحت بقى موضوع الهسهس

نورت (:

Sweet Violet يقول...

عاشقة الأحزان
-------------
عليكم السلام و رحمة الله و بركاته

انوووووسة طبعا انا رديت عليك عندك

و ربنا مايجيب زعل ابدا

نورتى (:

Sweet Violet يقول...

حـــــدوتـــــة
-----------
عليكم السلام و رحمة الله و بركاته

امممم اعتقد انها مش اول زيارة

الاحسن ان الواحد يكون مالوش رأى ؟؟؟؟

اختلف و بشدة معاك

لان دى سلبية و الانسان السلبى انسان عايش ميت

نورت (:

Sweet Violet يقول...

فكرة من الزمن ده
----------------
اشكر بشده على كلامك (:

اتفق مع كلامك

و طبعا المقولة مش قانون لكن البعض يأخذها مبدأ للحياة !!!

نورتى (:

Sweet Violet يقول...

احساس لسه حى
------------
مافيش مستبد نقى او غير نقى

الانسان عليه ان ينصح مش يفرض على الناس آراءه

اما عن التصرف اعتقد انه كده هيكون تحت بند المصلحة الشخصية امممم

وجهة نظرك لها احترامها حتى لو مختلفة معاها

نورت (:

Sweet Violet يقول...

هاجر
-----

انا خلاص بقى ظهرت اهو (:

Sweet Violet يقول...

تأثير الفراشة
---------------
عليكم السلام و رحمة الله و بركاته

و انا اتفق معاك

نورتى (: