Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الجمعة، 9 أكتوبر 2009

أمومة مفتقدة المعنى

طبعا ياست هانم أنا كنت قولتلك المرة اللى فاتت انى هقولك حكاية مرواحى عند عم مدبولى ..بس سامحينى مش قادرة احكى اى حاجة النهارده لان دماغى مقلوبه من صبحية ربنا .. أصل خالتى ام مسعدة شيعتلى و روحتلها و زي عادتها فضلت تلعن فى مسعدة و اللى جابو مسعده ..

اصل مسعده من ساعة مانزلت مصر هى و جوزها وهى مارفعتش سماعة التليفون تكلم امها و ابوها مع انها كل يوم لازم تكلمنى و يوم مااقولها اتصلى اطمنى على امك يابت دى مقهورة بسببك تقولى انتى ياهنية اللى بتقولى كده اشحال كل حاجة كانت قصادك .. اقولها ايوة بس دى امك يابت هو انا بردو هقولك يعنى ايه امك يابتاعت المدارس ترد تقولى بقولك ايه ياهنية كفايه ياختى عليها ولادها التانين وقفلى بقى على الموضوع دهو .. اتكتم انا و اقفل معاها اصل البت معذورة بردو من و هى صغيرة شايفة المر مع امها ..

حاكم خالتى فتحية – ام مسعدة- كانت دايما مهتمية بولادها الصبيان و هملة البت مسعدة مع انها البت الوحيدة هتقوليلى و فين ابوها هقولك موجود بس هو مالهوش دعوة بإى حاجة و كل ماحد يكلمه يقوله خليها تتعلم عشان لما تكون فى بيت جوزها .. بس الحق يتقال بردو هو كان بيتدخل لو خالتى فتحية لمحت ان مسعدة تقعد من التعليم و ممكن يولع البيت نار .. كانت تيجى من المدرسة تعمل البيت و تشوف طلبات اخوتها و ايام الامتحانات كانت تقومها من على المذاكرة عشان تشوف اخوتها لو عايزين شاى ولا أكل عشان يركزوا وهى مش مهم ..روحى يامسعده هاتى طلبات يامه انا لسه جاية ما محمد مارحش المدرسة النهارده و مرتاح بدل اللعب ابعتيه.. البت ياعينى بعد الكلمتين دول تترن العلقة و توديها بردو و ماكنتش تنام الا لما اخوتها يخلصوا و يناموا ويايولها لو نعست – دى لو مرات ابوها مش هتعمل كده- بس هنقول ايه الحنيه اصلها حاجة ربانى ..

البت خدت الدبلون و عليها دورت على شغل و اشتغلت و ده كان مرار تانى ياعينى تقوم من النجمة عشان توضب الدار عشان لما ترجع يدوب تعمل الاكل و ترتاح .. ترجع تلقاه يضرب يقلب و وتوضبه تاني و تعمل الاكل .. و خالتى فتحيه قاعده تدلع و تدادى فى الصبيان .. ده حتى فى الجواز ماسبتهاش كانت عايزة ترميها و خلاص خطبتها لواحد مالهوش شخصية و اخوه هو اللى مماشيه على هواه و لما قولتلها ياخاله العيلة دى معروفة فى البلد كلها انها مش كويسة ترد تقولى ده انتى اللى غيرانه منها عشان اتخطبت و عايزة تفشكلى الجوازة حلفت من وقتها انى ماليش دعوة بالموضوع ده .. بس ربنا بردو مايرضاش بالظلم اخو الواد اتخانق مع اخو مسعده و باظت الجوازة..

وجيه ابن الحلال اللى هى معاه دلوقتى , بس هي يعني سابيتها؟ ابدا .. مسعده كانت عايشة هنا الاول فى البلد كانت خالتى تعامل جوزها كويس و مسعده نفس المعامله بتاعت زمان مافيش تغيير و دايما بردو اخوتها الشباب بينهم لحد ما مسعده زنت على جوزها يشوف شغلانه بعيد عن البلد و اهو ربنا كرمهم و نزلوا مصر و بقالهم سنه كلمت امها مرة واحده بس اول لما نزلوا سمت بدانها حلفت بعدها ماتتصل بيها تانى – الله يرحمك يامه عمرها و الله ياست هانم مافرقت بينى و بين اخواتى مع انى كنت بعيده عنها ولا حتى فكرت مرة واحده فى نفسها وبس بالعكس كانت حياتها كلها ليا انا و اخواتى - انا مابقتش فاهمة هى الامومة ايه أكل و شرب و بس و مدام الام بتعمل كده يبقى خلاص مافيش حاجة اسمها حنيه و ياريت مع العيال بس لا ده كمان مع اجوازهم مش اكلتك و شربتك خلاص يبقى انت فى حالك و انا فى حالي .. و بعدين يرجعوا يشتكوا من اجوازهم و العيال!!!

و على راى المثل اللى قال :

الواحدة الانانية ماتنتظرش من جوزها و عيالها حنية

هناك 69 تعليقًا:

Ahmed يقول...

ديه مش امومه

ديه حاجه كده ربنا حرمها من نعمة الاحساس بالامومه

ابتلاها بحجر مكان القلب

حروف يقول...

اول تعليق يااارب

حروف يقول...

يوةةةةةةةةةةةةةةةةة

تالت بقا

حروف يقول...

بقالي كتير ميلعبتش في مدونات

حروف يقول...

هيييييييييييييييييييييييية

حروف يقول...

وحشتني اللعبه دية انا بحجز

حروف يقول...

انا نسيت العد

حروف يقول...

حقرا وبعدين اعلق سلاموززززز مؤقت ههههه

حروف يقول...

استني اكملهم 10

حروف يقول...

رقم عشرة
هيييييييييييييييييييييييية

Sweet Violet يقول...

أحمد أبو العلا
^^^^^^^
لولا ان المعاملة مع الصبيان فيها حنيه كنت قولت زيك ان مكان القلب حجر

بس تخيل انا لحد الان مش عارفة النوع ده من الامهات يتقال عليهم ايه
v_v

Sweet Violet يقول...

حروووف
^^^^^
لولا انك وحشانى كنت قولت لااااااااااا لازم رسوم على التعليقات الزيادة
^_^

المدونة مدونتك ياقمر العبى براحتك

منتظرك ياجميلة
^_^

Kiara يقول...

معتقدش انها تستحق لقب ام اصلا وربنا مع ست هانم اللي مستحمله هنيه المتهنيه الها بتفكرني ب هههههههههههههههههههه ولا بلاش

غير معرف يقول...

لما هى انا نيه تستنى ايه تانى من جوزها

ربنا يرحمنا من الامومه اللى شكلها كدا دى

وحشانى ياسويت ايه الغيبه دى

مش بشوفك عندى خالص

يارب تكونى بخير

حنين

romansy يقول...

تصدقى بالله
انا حبيبت البت دى الرغايه قوى
الصراحه اسلوبها جامد وبتوصل المشكله بكل سلاسه بس فى مليون كلمه وبس
بس يلا مش مشكللتنا دى
عارفه كما تدين تدان
بس اسلوب الحوار جميل قوى
وكمان الامثال الجديده
اللى بتقولها البت

Gihad N. Sohsah يقول...

اممممممممممم


كأنك كنت معي!!!

كنت لسة بتناقش في الموضوع دة النهاردة مع احد افراد عيلتي


الفكرة ان الناس في الارياف ربو الولاد على انهم اعلى من اخواتهم البنات

يعني عيب الولد يمسك المقشة ويكنس
عيب اما يجيب لنفسه كوباية مية
عيب اما يجيب لنفسه منديل يكح فيه ولا يعطس فيه

واما يشخط في اخته او حتى امه يتلقى كلمات التشجيع , اصله كدة رااااااجل

بتكون النتيجة أشخاص معندهمش قدرة على تحمل المسئولية , مستهترين

والبنت يا اما بتعيش عشان تدور في نفس الدايرة , وتقنع نفسها باستمتاعها بدور المغلوبة على أمرها

أو تعيش كارهة نفسها وكارهة كونها مكسورة الجناح

أو تعيش متمردة وقليل منهن من يصل للاتزان

فالمنظومة الغلط , طلعت مرأة غلط و رجل بردة غلط

يكونو مجتمع غلط ويخلفو عيال يربوهم -في الغالب غلط- وتفضل الدنيا غلط في غلط

----------------

ولكن لو رجعنا بصينا للقصة الرائعة

نلاقي ان البنت مسعدة من النوع الاخير

اللي هو تمرد ولم يستطع الوصول بعد للاتزان , لأن مفيش سبب في الدنيا يخلي البنت تقاطع امها

" وإن جاهداك على أن تشرك بي ما ليس لك به علم فلا تطعهما وصاحبهما في الدنيا معروفا"

ودة لو أمروها بالشرك اللي هو الذنب اللي ربنا مش بيغفره

فهي أكيد البنت مظلومة ولكن بردة ظلمت أمها

-------------

دمت بود

رحلتنا في الحياة يقول...

انا قتلو ان هانم دى حكيمة وذكية من المرة اللى فاتت :)
الحقيقة معرفش بجد موضوع ان ممكن ام تكون قاسية على اولادها بالشكل ده
يمكن فعلا فى الصعيد لسه التفرقة فى المعاملة بين الولد والبنت موجودة بس مش لدرجة تخلى البنت تكرهه امها يعنى

مسدس صغير يقول...

أم؟؟؟
يمكن
ههههه
احييكى على البوست
سلاموز

حاسوباتيه يقول...

مش عارفه هو لسه فيه التفكير الغريب والحرام ده اعوز بالله بجد ناس غريبه والحاجات دي هتتحاسب عليها يوم القيامه والبنت دي لانها كويسه ربنا رزقها بواحد كويس وربنا يسامح مامتها

صبرني يارب يقول...

وحشااااااني موت يا جميل والله

اخبارك ايه

وايه الكلام الجميل ده

كنت هاموت من الضحك على طريقة الكلام جبتيها ازاي

حقيقى الاوضاع دي موجوده وانا شوفتها بعينى

للاسسسسسسسسسسسسف

حياه بلا عنوان يقول...

السلام عليكم ورحمه الله وبركاته
سبحان الله فى حد كده بجد انانى قوى كده
بجد ربنا يهدى يارب
تحياتى

lonely girl يقول...
أزال المؤلف هذا التعليق.
lonely girl يقول...

هو بجد مش عارفه يا فيلوت
بقايا التفكير الذكورى المتخلف ده لسه ليهم وجود معانا
اللى شايفين البنت مش زى الولد
والبنت تخدم اخواتها وتشيل كل الحمل
وملهاش حق تعليم ولا حق حياه آدميه اصلا
الست اللى ذى دى قطعا افتقدت الشعور بأمومه حقيقه ربت عندها عقده بتظهر فى تصرفتها الاسقاطيه دى مع بنتها
ربنا يعافينا من جهل امثالهم
سورى يا قيلوت
حذفت التعليق اللى قبلها لانى لقيت ملغبطه فى حروف كتير
والتعليق شكله سخيف اوى D:

الازهرى يقول...

أعتقد إن المثل بيختصر كلام كتير عن المعنى

بس المهم
تفتكرى الأم كان سلوكها كده ليه أساسا ؟

صوت من مصر يقول...

دى مش امومه دى اميه

عاشقه الرومانسيه يقول...

للاسف
دى مش ام
الام مشاعر وحب ورعايه وتفاهم
مش اكل وشرب وبس

kmt يقول...

السلام عليكم ورحمة الله وبركاته

مستنية الباقي

تحياتي

دعاء العطار يقول...

اول مره ازور فيها مدونتك شدنى اوى اسلوبك فى الكتابه

ان شاء الله الزياره هتتكرر كتير ومش هتكون الاخيره

بالنسبه بقى للبوست فدى بجد حرام يتقال عليها كلمة ام

كان فيه حديث عن الرسول انا مش متذكره نصه اوى معناه

ساعدوا اولادكم على البر بكم

لكن للاسف فيه ناس بيبقى قلبها حجررررررررررر

محمود حسن العدل يقول...

السلام عليكم ورحمة الله وبركاتة

الامومة مش مجرد اسم الامومة كلمة فيها حاجات كتير .
دى مش امومة ابدا
البوست جميل بجد شدنى جدا وانا بقراءة

ثانيا
البقاء والدوام لله فى خال حضرتك
اللهم ارحم كل موتنا
تحياتى الى شخصك الكريم

طـائر الليــل الحـزين يقول...

اقولك ايه بس
فى الحكايات دى الواحد شاف وسمع كتير
خصوصا عن حكايات الامومة
فى ناس نقول عليها
امومة مفتقدة المعنى
وفى ناس تانية نقول عليها
امومة بكل المعنى
معادلة بقى
هتتحل امتى والا هتفضل كده الله اعلم

قلم رصاص يقول...

انا عارف انه فيه ناس لسه كده

لكن انا مبحبش كده

وعشان كده أعلن انها أم مش كده (يد إبهامها لأسفل )

هههههههههههه

من زمان مبتكتبيش ليه

ربنا يوفقك

دمتي على خير

نـــــور يقول...

ايوه صح ياختى
الواحده الانانيه ماتنتظرش من جوزها وعيالها مهلبيه ولا حتى ملوخيه
:))

وحشانى يابنتى
وومش هقول غير العنون مناسب جدا

غير معرف يقول...

بيد الأم وحدها أن تجعل من البيت جنة لأسرتها أو بالعكس جحيما مستعراً
فما رأيك بالأُم التي لاترضى بتزويج إبنتها إلا أن أن يكون الشخص المتقدم: يحمل شهادة التي يجب أن لاتقل عن شهادة إبنتها، ووسيم وو.. مبررة لظلمها بحبها لإبنتها ومستغلةً تأدب إبنتها معها
أشكرك جداً جداً على طرحك لهذا الموضوع.. مع تمنياتي لكم بدوام التوفيق

المعتصم يقول...

السلام عليكم
ازيك ياسويت هانم
يارب تكونى بخير
فعلا فيه امهات بتعمل كده ومش عارف على اى اساس
وفيه تانيين بيعملوا العكس
يعنى البنت تبقى مدلعاها على الاخر غير الولاد
طب ياستى ماينفعش لازم برضو تعلميها شغل البيت وكده تقولك لما تكبر وتتجوز تبقى تتعلم
للاسف فيه ناس كتير عندنا بيفرقوا بين ولادهم فى المعامله ومش بيربوهم على اسس صح وده بيعمل مشاكل كتير بين الاخوات بعد كده
ربنا يصلح الحال ويهدى النفوس
وابقى سلميلى على هنيه
ســـــلام

mahasen saber يقول...

بقلك ايه انتى بترسمى على حرقة دمى انتى وبيرو ولاا ايه
بتكلموا بعض من ورايا وتتفقوا عليا شكلكوا كدا

انتى عارفه ان دمى بتحرق على نار شمعه فتوصينى ااقرا بوست معتبر كدا وانتى عارفه ان قلبى قلب خسايه ومبيستحملش ..شكلك هتبقى مرات ابن معتبره ومن دلوقتى بتعرفى اليى بيوجعنى وتودينى ليه

يا شيكو يا حبيبتى زمان قالوا الحنيه مبتتشحتش ورفاهية القلب والحنان مبيتبعش عشان كنت اشترى للام دى عشرين كيلوا هديه

بس ما تيجى نحاول نخلقلها العذر او نصنعلها اى دافع حولها للكتله دى

اصل يا بنتى استحاله استحاله يكون فيه ام كدا
مصدقتش الامومه بتفجر طاقات حنان جو البشر
انما مش كدا ابدا ..لا معتقدش قوى كدا

mahasen saber يقول...

طب بصى قولى لهنيه المتهنيه تدعيلها بطيبة القلب
وان بركان حنان ينفجر جوه قلبها

قولى امييييييييييييييييين بالذوق احسن

mahasen saber يقول...

يا ست شيكو
يا ست شيكو

بيرو بيه بيقلك خلى بالك من امى وحطيها فى عنيكى الجوز اصلها غلبانه قوى قوى والقطه بتاكل اكلها ..لا لا مش من طيبتها ده من قلة عقلها
هههههههههههههه
لما اديكى معاد اغتنمينى يا بنتى والحقينى لانى بقيت بنام على روحى اصلا

اه ابنى بيقلك فوتك بعافيه

Sweet Violet يقول...

كيااااااارا
^^^^^^
امممممم
ممكن نقول تستحق لقب نص ام
^_^
و مالكيش دعوة بهنية هه
بلاش حقد بقى
D:

Sweet Violet يقول...

حنونة
^^^^
اللهم امين

بعتذر عن التقصير فى حقك
و ان شاء الله مش هيتكرر تانى
^_^

Sweet Violet يقول...

رومانسى التفاؤل
^^^^^^^
اممممممم
طيب دى هتدان ازاى بقى ؟؟

و كمان مليون كلمة ايه بس دى حتى بتتكلم قليل قوى
^_^

Sweet Violet يقول...

صانعة الأحلام
^^^^^^
انا معاك فى الكلام ان فى الغالب فعلا بيكون فى الارياف
لكن بردو بيكونوا ناس متعلمين و فى المدينه وبردو نفس الطريقة فى التربية
هو اعتقد نظام مجتمع كامل .. مش فئة واحدة بس منه اللى تفكيرهم كده

معاك ان مسعدة اكيد التصرف بتاعها غلط بس مش معاك انه ظلم للأم
لان الام هى اللى ظلمت نفسها بتربيتها الغلط ليها اللى كان لازم تشوف النتيجة بتاعتها
v_v

Sweet Violet يقول...

آيوشة
^^^^^^
هو مش كره اكتر من انه تمرد على وضع مرفوض زى ما قالت صانعة الأحلام

و طبعا هنية بتشكرك ياآيوشة على رأيك فيها يلا بقى نبقى المرسال و امرنا لله
^_^

Sweet Violet يقول...

مسدس صغير
^^^^^^^
يمكن و جايز كمان
v_v
نورت
^_^

Sweet Violet يقول...

حاسوباتيه
^^^^^^
هو للأسف فى أغرب من التفكير ده كمان
v_v

Sweet Violet يقول...

صبصوبتى الجميلة
^^^^^^^
و انتى وحشانى اكتر ياجميلة
يارب تكونى بخير دايما و نتقابل قريب بقى
v_v

من المسلسلات بقى و منامينو ربنا يبارك له كان بيظبط الاسلوب لو وقع منى
^_^

Sweet Violet يقول...

حياة بلا عنوان
^^^^^^
عليكم السلام و رحمة الله و بركاته

فى اكتر من كده
v_v

Sweet Violet يقول...

lonely girl
^^^^^^^
هو عموما خلل فى شخصية الام و الاب كمان
ماينفعش نرمى كل اللوم على الام لان الاب بردو موجود و من المفترض انه يتدخل بردو فى التربية
v_v

ولا يهمك ياقمر التعليقات تحت امرك امسحى و اكتبى زى ماانتى عايزة
^_^

Sweet Violet يقول...

الازهرى
^^^^^
زى ماقولت ل lonely girl هو خلل فى الشخصية
و كلامى عن نماذج الامهات اللى مش فاهمين يعنى ايه امومة اصلا
مش على اللى بيعملوا تفرقة فقط
لان الامومة جزء كبير منها فطرى اكتر من انه تعليمى
v_v

Sweet Violet يقول...

صوت من مصر
^^^^^^^
اى نعم
v_v

Sweet Violet يقول...

عاشقه الرومانسيه
^^^^^^
صح يادودو

وحشانى موت على فكرة
v_v

Sweet Violet يقول...

kmt
^^^^
عليكم السلام و رحمة الله و بركاته

ان شاء الله الباقى قريب
بس كنت ارجو تقولى رأيك فى موضوع الحلقة المرة دى
v_v

Sweet Violet يقول...

dodoo
^^^^^
اهلا بيك فى اول زيارة و ان شاء الله نتواصل دايما

زى ماقولت قبل كده
مش هقدر اقول قلبها حجر لان التعامل مع الاولاد غير البنت
و بردو مش هقدر اقول على النماذج التانية بردو ان القلب حجر
لكن ممكن اقول زى ماقولت فى البوست بتكون شخصية انانية
v_v

Sweet Violet يقول...

محمود حسن العدل
^^^^^^
عليكم السلام و رحمة الله و بركاته

الله امين

حمدلله على السلامة
و ارجو يكون سبب الغيبة الطويلة دى خير
^_^

Sweet Violet يقول...

طائر الليل الحزين
^^^^^^
هتفضل كده اكيد
دى سنه الحياة
v_v

بس السؤال بقى حضرتك
احنا هنفضل كده كتير ؟؟
مش عارفة اوصلك على فكرة
v_v

Sweet Violet يقول...

قلم رصاص
^^^^^^
هههههههههههههههههه
ايه كل الكدهات دى

انت اللى من زمان مش جيت بقى
ده انا كل شوية اكتب
^_^

Sweet Violet يقول...

نور هانم
^^^^^
امشى امشى امشى
وحشاك ايه بس
صلحوا بقى حاجتكم
كنت بجد عايزة اطمن عليك ياوحشة
v_v

Sweet Violet يقول...

سراج
^^^^^
اى أم طبيعية بتكون عايزة الافضل لبنتها
لكن ماينفعش فى نفس الوقت الافضل ده يكون عائق فى حياة البنت
موضوع التعليم انا موافقها فيها الصراحة لان مش كل الرجال اللى ممكن يقبلوا يرتبطوا بواحدة مافيش تكافؤ تعليمي مابينهم
و كتير علاقات بتفشل بسبب الموضوع ده يااما الزوج بيحس بالغيرة او الزوجة تحس انها دايما هى الاعلى !!!
v_v

Sweet Violet يقول...

المعتصم
^^^^^^
عليكم السلامة و رحمة الله و بركاته

الحمدلله يارب انت تكون بخير

هو ياريت مابين الاخوات بس ده بيكون سبب كمان فى العقوق
و الغريبة انه بعد كده بيرجعوا يشتكوا !!!!

من عويناتى
^_^

Sweet Violet يقول...

محاسن هانم صابر
^^^^^^^^
ههههههههههههههههههه
طبعا انا و خبيطى بقى مش لازم نتفق ولا ايه
و كمان ايه بنتكلم من وراك دى
هو لازم كل مكالمة تكونى معانا ولا ايه
لالالالالالا انتى من اولها كده
v_v

هههههههههههههههه لالالا سلامة دمك ياقمر
بس انا قولت بقى ام و لازم تشوفى ايه الحكاية بتاعت الامهات دى

قولت فى التليفون و نقول هنا كمان
ماينفعش اخلق للغلط عذر او مبرر او دافع
الغلط غلط ياسنسونتى ولا ايه ؟؟؟

لا فى ام كده و اكتر من كده
v_v

ههههههههههههههه اميييييييييييييين بالذوق احسن
نيهاهاهاهاهاهاهاهاها

ياجميلة انتى فى عويناتى من غير مابيرو يقول كمان
^_^

خلاص بقى ماانا عرفت معاد النوم عندك
و ان شاء الله هلحق لا تقلقى يابنتى ماانا اتعديت من النص ساعه بتاعتك
^_^

Unknown يقول...

الام هى مصدر الحنان والاستقرار فى الاسرة فاذا لم تعرف الام طبيعتها اخلت بنظام الاسرة كلها
واصل والسلوكيات فيها مختلة
زى ما حصل مع الام دى
اللهم عافنا


تحياتى

أبو العريف يقول...

معقوله لسه ام مسعده دي ما انقرضتش

انا اعتقد انها انقرضت

احنا م الارياف اه

لكن دلوقت

البت زي الولد

ماهيش كماله عدد

بل بالعكس

الواد اللي بقي كماله عدد

MaNoOoSh يقول...

يا ترى توأمي القمر عاملة ايه
وحشتيني جداااااااا يا ضد

Sweet Violet يقول...

نهر الحب
^^^^^^
معاك طبعا .. و الاخطر من كده
لما تكون فاهمة ان سلوكها صح

نورتى
^_^

Sweet Violet يقول...

أبو العريف
^^^^^^
طبعا لسه موجود
لا و كمان فى نوع معدل منها فى عصر التكنولوجيا
و ده فى كل مكان مش الارياف بس
v_v

Sweet Violet يقول...

منووووووووووووووووووش
^^^^^^^
وحشااااااااااانى موت
انا بخير
طمنينى انت عليك
بعتلك ميل .. وصل ولا لأ ؟؟
و يارب ترجعى تانى معانا بقى
v_v

мαησηα يقول...

اقولك ايه ؟ انى مش مستغربة

اه والله اصل انا قاهرية وعايشةف طنطا ف الريف ف قرية تتبع لطنطا

وشفت اللى عمرى ما هاشوفه من قسوة امهات


وغيرة بين الاخوات بسبب التفرقة للاسف

وع فكرة مش بيفرقوا ببين البنات والولاد بس

لا هما مزاج عندهم يفرقوا وخلاص

ممكن ولد وسط البنات والولاد

ممكن بنت وسط بردو اخوتها من الجنسين عادى

مع انى كنت اعتقد اننا بما اننا من سكان المدن بنبقى جامدين ف عواطفنا والفلاحين دول مثال الطيبة والحنية والتماسك الاسرى

لكن للاسف اتغيروا زى ما كل حاجة اتغيرت واتغيروا بشناعة للاسف

تسلمى يا ضد بجد بحييكى ع الاسلوب

تسلم الايادى يا سكر

Sweet Violet يقول...

للأسف بردو انا مش مستغربة اللى بتقوليه
لانى شوفت منه كتييييييير

تسلمى على المرور ياقمر
و دايما منورانى
^_^

التميز المثالي للخدمات المنزلية يقول...


شركة تنظيف فلل بالجبيل

شركة مكافحة حشرات بالجبيل

شركة تنظيف سجاد بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة تنظيف شقق بالجبيل

شركة مكافحة حشرات ببقيق

شركة تنظيف منازل ببقيق

شركة تنظيف شقق ببقيق

شركة مكافحة النمل الابيض ببقيق

شركة مكافحة حشرات بسيهات

شركة مكافحة النمل الابيض بسيهات

التميز المثالي للخدمات المنزلية يقول...

شركة تاج للتنظيف بالدمام 0551844053


شركة تنظيف منازل بالدمام

شركة تنظيف شقق بالدمام

شركة تنظيف بالدمام

شركة رش مبيدات بالدمام

شركة مكافحة حشرات بالدمام

شركة تنظيف فلل بالدمام

شركة عزل اسطح بالدمام

شركة عزل خزانات بالدمام

شركة تسليك مجارى بالدمام

شركة تنظيف سجاد بالدمام

شركة مكافحة النمل الابيض بالدمام

شركة تنظيف واجهات زجاج بالدمام

شركة تنظيف مجالس بالدمام

شركة تنظيف خزانات بالدمام

شركة رش دفان بالدمام

شركة تسليك مجارى بالدمام 0551844053