Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

السبت، 17 أكتوبر 2009

عندما يصبح الجهل نعمة

هقولك بقى ياست هانم حكاية عم مدبولى .. لما ستى ماتت و علشان ماينفعش أفضل فى الدار لوحدى قالوا خالى يقعد معايا , انا سمعت كده و جالى الوسواس- ايوة ماهو اللى شوفته مش شوية- قولت اذا كان ابويا عمل كده يبقى مش بعيد عمك ولا خالك كمان يبقوا زيه و انا بحبهم ومش عايزة بردو يحصل فى الامور امور .. بعد كده هبقى مقطوعة من شجرة و اهلى عايشين !! ..

فكرت وقولت اروح عند خالتى بهيه اهى ست كبيرة و ولادها ماحدش يعرف عنهم حاجة و اهو بردو أخدمها .. أمى ماكنتش موافقة الصراحة و جاتنى كذا مرة و تقولى يابت انتى عارفة سمعة البيت ده هباب , ازاى بس تقعدى هنا؟! .. اقولها يامه كلها اشاعات الست زى الفل مافيش اى عيبة عليها..

ماهو اعمل ايه ياست هانم كان لازم اقول كده ماهو نار خالتى بهية ماكنش فيها خوف عليا ..لحد ما يوم كنت قاعدة قدام الدار و خلاص كان فاض بيا و بفكر اعمل ايه ماهو آنى مش قادرة استحمل الغلط ده ..لقيت عم مدبولى ناده عليا وقالى بتهببى ايه قدام دار بهيه يابت .. رحت قولتله انى قاعدة هنا بخدمها ..

زعق فيا و كان عايزنى أروح بيت اهلى و انا رفضت .. المهم يمين شمال لحد ما قال خلاص لمى هدومك و هتقعدى عندى ورحت معاه .. عارفة ياست هانم لما مات عم مدبولى حسيت قد ايه كنت فى نعمة مش حاسه بيها .. ماكنش ينفع اقعد عند حد من اهلى فقولت انى قاعده فى اوضة على سطح عمارة من عماير المحافظة دى ..

و انا ولا كان اصلا معايا سحتوت اجيب بيه لقمة .. ده كان بيجى عليا ايام لقمه العيش دى بوقى مايشوفهاش آى والله و انا نفسى دايما عزيزة عليا ماكنش ينفع اطلب من حد حاجة كنت الصبح فى البلد و بليل بطلع على اى سطح أتاوه فيه و اهى كانت ماشية و لما تزنق قوى معايا و خلاص احس انى هقع من طولى كنت اروح لخالتى فى البيت او حد من صحابى و اتحجج ان اللى انا فيه ده علشان ماحدش ليه نفس ياكل حاجة من كتر اللى شافه يغصبوا عليا وقتها انى اكل و هما لقمتين والله ياست هانم كانوا بينزلوا يقطعوا فى جوفى بس اعمل ايه ماهو علشان اقدر اقف ..

لحد  الحمدلله ما لقيت شغل فى مصنع .. كنت الصبح بشتغل فيه و لما يجى وقت المرواح أدارى عن العيون لحد مايقفلوا  و ابايت فيه .. وفضلت على دا الحال لحد ماربنا كرمنى و اجرت فعلا اوضه فوق السطوح وعشيت الحمدلله فيها.. انتى عارفة اللى انا مريت بيه ده حسسنى بالناس الغلابة اللى كان عم مدبولى واقف معاهم هما آى كانوا بيصعبوا عليا بس ماكنتش بحس بيهم قوى كده .. بعد ماشتغلت كنت باكل طقه بس وبحوش علشان اساعدهم بس طبعا ماكنش زى عم مدبولى يعنى ههههه ..لحد مابقى ربنا فتحها عليا زى ماانتى شايفه كده و بقى الحال ميسور الحمدلله ..

العجيب بقى ياست هانم لما اشوف واحد داق الوجع و يتمناه للكل .. يعنى عندنا واحده هنا فى البلد جوزها خانها هى آى الخيانه وحشة لكنها قالت هتسامح و تفضل معاه كبرت فى عين البلد كلها إلا ان بعد سنين نلقاها بتخونه آى والله ياست هانم و لما أتكلموا معاها قالت زى ماهو شاف حياته اشوف انا كمان حياتى أتضح ياست هانم ان سكوتها ده علشان مافيش فرصه تردها ..ولا الواد مسعود البت اللى كان خطيبها سابيته وراحت أتجوزت واحد تانى اغنى منه و لما ربنا فتح عليه بقى يروح يوقع مابين اى اتنين بيحبوا بعض و أهو داير آذيا فى خلق الله .. و البت سعاد خطيبها خانها وسابها و اتجوز جارتها و صحبتها و من وقتها و هى اللى تعرفها مخطوبة تحاول تخطف منها خطيبها و هلم جره ...

و العجيب اكتر ان كلهم بتوع مدارس و متنورين و الله ياست هانم من كتر الواحد مابيشوف من المتنورين بيحمد ربنا انه ماكملش علامه .. ال علشان انا دوقت مر ادوق الناس زيه ..صحيح صدق اللى قال :

لو غدار غدر بك ماتخلى الحقد يعمى قلبك

هناك 70 تعليقًا:

وردشان smilyrose يقول...

اول تعليق

هيييييييييييييه

وردشان smilyrose يقول...

تصدقى

والله البت دى وجعت قلبى

بس عندنا حق فى كتير من اللى

بتقوله اسواء شئ

بنشوفه فعلا من الناس المتعلمين

واسواء جرح من شخص بيكون فاهم

ومدرك لكل شئ بيعمله

فعلا ممكن يكون الجهل نعمه

Mr.ProiD يقول...

و ما الدنيا إلا مسرح كبير يا ست هانم

و اسأل مجرب و لا تسأل طبيب زي ما بيقولوا

من تجاربي في الحياة اكتشفت إن مدرسة الحياة اصعب كتير من أي تعليم و الإمتحانات فيها النجاح فيها اكبر بكتير من أي درجة علمية

و في إنتظار باقي الدروس الحياتيةو الأسلوب المميز في سرد الأفكار

تحياتي

غير معرف يقول...

صباح الخير يا ست الكل ....موضوعك زى كل موضوعاتك بيقول حاجة تضرب الدماغ بس فى شكل بنبونايه دراميه بسيطة جدا بمنطق كفر الهنادوة وان كان لفكرك المتمرد على الواقع المرير بصمة واضحة ....محتاج اقرا تانى واحييكى على فكرك ورؤيتك للامور بمنطق رائع ومبروك المدونة الجديده
تحياتى

الميكروباص يقول...

بصراحه قصه حلوه وموضوع واقعي
واكثر ما عجبني فيه هو اني حسيت ان اللي بيحكي بيحكي وهو وافق امامي من اللهجه المكتوبه
لكن الغدر لا يرتبط بالعلام والجهل
دي من ضمن الصفات اللي موجوده في الانسان يا اما يظهرها أو انه يجعلها نائمه
ونفس وما سواها فألهمها فجورها وتقواها


تحياتي لك

غير معرف يقول...

لو غدار غدر بك ماتخلى الحقد يعمى قلبك

عارفه بتعجبنى اوى الامثال اللى بتقوليها فى لاخر خاصه بتاع

الست الانانيه متستناش من جوزها حنيه

هههههههههههههههههههههه

نـــــور يقول...

لا ياسويتى على فكره
الحاجات الغريبه فى التفكير والحقد اللى بيعمى القلوب ده مش مرتبط بإن اللى بيعمل كده متعلم ولا لأ
النضيف بيبقى بالفطره نضيف والقذر مهما نضفوا جلده من بره بيفضل قذر

الا قوليلى انتى مألفه الحكايه دى ولا دى حقيقه
اصلها لو حقيقه هاجى ازورك مخصوص عشان اشوف الست دى اصلى حبيتها اوى :)

Ahmed يقول...

حكايات بهيه بتفتح ابواب كتيره مقفوله وبتطلع حقيقه مستخبيه

طوبه فضه وطوبه دهب يقول...

بجد خلتيها صعبت علينا فعلا اللى يعيش ياما يشوف والدنيا ياما فيها بلاوى بس سيبك انتى اسلوبك حلو اوى فى السرد تسلم ايدك

المعتصم يقول...

انا مش عارف هنيه دى طلعت لنا منين
ادينا مكملين لما نشوف اخر هنيه فين
كملى

Soul.o0o.Whisper يقول...

عارفة يا ضد


المشكلة مش فى العلم و لا الجهل

المشكلة فى التربية ، و الحياة بتعلم اللى مايتعلمش


للأسف الدنيا بئت وحشة ... اه ماننكرش
لكن أكيد فى خير و لازم ندور عليه رغم انه ابرة فى كوم قش


و الطيبة مش بتتعلم ، الطيبة فى القلب ، لكن بتموت لما صاحبها يخنقها و يموتها


الجهل مع تربية كويسة ، و معرفة بربنا
بجد بيكون الانسان دا رائع جدااااااا


يارب نكون كدا


دمتى بكل الود يا قمر

تأثير الفراشة يقول...

ده مسلسل بقى يا سويت :)

فكرة جميلة جدا ، و باحب جدا الحكمة اللى بتغرسيها فى البوست

اتكلمتى عن مرض خطير ربنا يعافينا منه يارب ، فكرة إنه طالما هو اتأذى يبقى لازم يؤذى كل الناس، و ده و العياذ بالله فكر شيطانى - بدون مبالغة- لأن ابليس بعد ما رفض أمر الله بالسجود لآدم، طلب من ربنا طلب، كان يقدر يطلب المغفرة و التوبة - زى ما سيدنا آدم طلب بعد ما أكل من الشجرة- و لكنه طلب أن ينظره الله إلى يوم القيامة، ليه؟؟ علشان زى ما هو هيروح النار، يقعد لذرية آدم علشان يشدهم للنار زيه

فإبليس أخطأ، و آدم -عليه السلام- أخطأ و لكن شتان ما بين رد فعل الاثنين

شكرا ليك على المعانى الجميلة اللى بتعمليها بأسلوب مميز جدا

تحياتى لك

صبرني يارب يقول...

جميل جميل جميل
حلو اوي يا ضد والله عاجبنى بجد

جووووووو اون

صوت من مصر يقول...

الجهل نعمه احينا يكون فى الصالح الامور مش كلها كده يا معلمى

мαησηα يقول...

استنى بقه انا عايزه افهم الحاجة متهنية دى كلمتين ههههههههه

الجهل مش جهل ف التعليم اللى احنا بندرسه ده لا والله يا اوختى الجهل ف قلوب الناس وعقولها

مثلا اعرف دكتور جامعة جارنا متخيلة دكتور جامعة ولسه بيشتم ويضرب مراته علشان خلفتها بنات الجاهل المتخلف

والبواب يقولك كل نعمة ربنا حلوة ربنا مايحرم حد من الخلفة

وهو ولا بيعرف يمسك القلم حتى !!

يا متهنية المش متهنية التعليم عمره مابينور الدماغ اذا كانت هى اصلا مضلمة مضلمة ههههههه

استمرى سويتى متبعاكى ومستمتعة جدااااااااا

kmt يقول...

السلام عليكم ورحمة الله وبركاته

متابع
يا باشا
مش تتاخر

تحياتي

aMr saYed يقول...

بجد جميلة اوي السلسة ديه بقترح عليكي انك تسميها حكاوي المسطبة بس بجد جميلية وتسلسها رائع طيب ما تحاولي كده تكتبي حاجة كبيرة رواية او حكاية كده وربنا يوفقك لان اسلوبك رائع في العامية جدا

أبــــو ضـــيــاء يقول...

قولي يا رب , على رأي دكتور قال , لو افتكرت نفسك انك مصري فانت غلطان , في شعب تاني في البلد دي عايش معانا , هو اللي اسمه الشعب المصري

تعليقا على تدني ثقافة المجتمع المصري , وقلة المثقفين اللي بجد فيه

Cute Kitty **sookra يقول...

هو مين جاى مع مين ؟
لما امى بتتضايق منى بتقولى هو دا التعليم يامتعلمه يابتاعه الكليات موش بتقول المدارس دا على اساس ان تعليمى كله كان فى الكليات .
الجهل فى القلب وفى العقل ولايمكن تعليم ولاغيره يغيره
تقبلى مرورى

قلم رصاص يقول...

القيم والاخلاق لاتمت بصلة للعلم او الجهل

وكنا زمان بنسمع حاجات حلوة زي مثلا يقولك اخلاق القرية .. الأدب فضلوه على العلم .. الخ الخ الخ

قصة جميلة

جزاكِ الله خيرا

ومبسوط انك رجعتي تدوني باستمرار زي الاول

دمتي في حفظ الله

دعاء العطار يقول...

بجد الموضوع عجبنى اوووووى

فعلاً فيه ناس كتير لما بتمر بتجربه بتكره كل الناس وبيكون عندها حاله عدوانيه من كل اللى حواليها وبتتملى بالحقد من كللل الناس

بس الناس دى اكيد هى نفوسها مش صافيه من الاساس والتجربه اللى مروا بيها بتكشف عن جوهرهم

بس على فكره ده مالهوش علاقه بالتعليم دى ليها علاقه بالشخصيه نفسها

تحياتى لقلمك المبدع

الجواز و سنينه يقول...

بصى يا ست هانم
تسلم اديكى على الاسلوب الجميل
و إن كنت مختلفه معاكى فى النتيجه
عمر ماكان الجهل نعمه
بس قله التربيه هيه النقمه
و حتى لو مافيش حد يربى
فيه نفس عارفه الصح و الغلط
و فيه نفس سويه و نفس لاء
مش كل من غنى بعد فقر افترى
و لا كل فاقد الشئ لا يعطيه
ممكن يحاول يعطيه زى ماكان نفسه فيه
بس المهم تكون النفس سويه برغم الظروف
بس ايه البت اسلوبها فى الكلام مخمخنى
تسلم اديكى يا قمر

marmar يقول...

اكبر درس في الحياه انك تنخدعي في شخص بتحبيه بجد وبعد كده تقفي من جديد على رجلك وتعرفي ان كل اللي فات ده ولااي حاجه

بجد يا سووووووووويت وحشتيني اوي ونفسي اتكلم معاكي كتير بس مش بلاقيكي
عامله ايه يا قمر انتي واخبارك ايه
وحشتيييييييييينيي بجد

وحي القلم يقول...

السلام عليكم
والله فعلا الجهل في الحالة دي نعمة

نوادر يقول...

(لو غدار غدر بيك متخلى الحقد يعمى قلبك)عبارة جميلة لكن الجهل مش هو اللى حماها من الحقد والسودوية اللى كانوا المتعلمين من حولها بيتسمو بيها لكن اللى حماها هى القلب الابيض الصافى والطيبة والفطرة التى لا تلوثها البيئة الموحيطة بيها يعنى لا الجهل ولا المتعلم لكن الاقلب والضمير هما المسئولون عن السلوك البشرى

donya يقول...

اول زياره
وشكلها مش الاخيره

بوست جااااامد

هو الجهله نعمة ونعمة بتريح صاحبها جداااااا

اسلوبك جيد جدا وبشد من اول الي اخر حرف

*تحياتي

Sweet Violet يقول...

توأمتى الغالية
^^^^^^
مبروك عليك اول تعليق
^_^

اوقات بيكون اكيد الجهل نعمة
v_v

Sweet Violet يقول...

Mr.ProiD
^^^^^
و رغم صعوبتها الا انها افضل مدرسة
^_^

Sweet Violet يقول...

أحمد حسن البنا
^^^^^^^^
اشكرك كتير على رأيك
و ربنا يطمنك على الوالد و يكمل شفائه على خير
^_^

Sweet Violet يقول...

لورنس العرب
^^^^^^^
معاك طبعا
لكن واحدة غير متعلمة لما تشوف المتعلمين بيعملوا كده
اكيد لازم تحمد ربنا على نعمة الجهل
v_v

Sweet Violet يقول...

حنين
^^^^^
ياسلام مدام كده اتفضليهم ياقمر
^_^

Sweet Violet يقول...

نووووووورتى
^^^^^^
"النضيف بيبقى بالفطره نضيف والقذر مهما نضفوا جلده من بره بيفضل قذر "

اتفق معاك جداااااااا فى الجملة دى
لكن بردو مش هننكر ان الجهل اوقات بيكون نعمة فعلا


ماقولتلك منتظرك لما نشوف هتيجى ولا لأ
هنية المتهنية فى الاحزان كل حكايتها واقع مع تغيير بسيط لازم يحصل طبعا
^_*

Sweet Violet يقول...

أحمد أبو العلا
^^^^^^^^
وهو ده هدفها فعلا
^_^

Sweet Violet يقول...

طوبه فضه وطوبه دهب
^^^^^^^^^
تسلمى ياقمر
^_^

Sweet Violet يقول...

المعتصم اخويا الكبير
^^^^^^
مالك بس ؟؟
عموما هكمل بس مش اوعدك انك تعرف اخرتها
لان انا نفسى مش عارفة اخرتها فين
v_v

Sweet Violet يقول...

سوووووووول
^^^^^^
و لو العلم بدل الجهل ده هيكون اروع

ياااارب ياسولتى

Sweet Violet يقول...

تأثير الفراشة
^^^^^^
اى نعم مسلسل
^_^

انا اللى اشكرك على تعليقك الجميل
^_^

Sweet Violet يقول...

صبرنى يااااااارب
^^^^^^^^
3 جميل لالالالا انا كده هتغر

^_^

من عويانتى ياصبصوبتى

Sweet Violet يقول...

كيمووووووووو
^^^^^^^^
هو انا قولت كله ؟؟
لكن لان الغالب كده فهنيه اللى مش متعلمة افتكرت ان السبب هو العلام
v_v

Sweet Violet يقول...

๓คภ๏ภค
^^^^^^
علشان كده ممكن تلاقى البواب لو شاف الدكتور
يقول الحمدلله على الجهل كمان

العجيب ان لسه للأسف الناس بتحكم على اللى قصادها بتعليمه مش اخلاقه
v_v

و كلامك هيوصل لهنية بالبريد المستعجل لا تقلقى
^_^

Sweet Violet يقول...

kmt
^^^^
عليكم السلام و رحمة الله و بركاته

حواضر

^_^

Sweet Violet يقول...

aMr tA3LaB
^^^^^^
ماهى اسمها بالفعل هنية المتهنية فى الاحزان
^_^

نحاول ان شاء الله بس لما نشوف الاول هنية اخبرها ايه
^_^
اشكرك بجد على رأيك

Sweet Violet يقول...

أبو ضياء
^^^^^
اعتقد انه فى العالم العربى كاكل مش مصر بس
اما عن الاخلاق فده فى العالم كله بردو مش مصر بس
ولا ايه ؟؟

نورت
^_^

Sweet Violet يقول...

سااااااسو
^^^^^^^
لا انا ماما مش بتقول كده
انا اللى بقول الكلمة دى لاخواتى و اصحابى ههههههههههه
بس بقول المدارس مش الكليات .. علشان مش اكبرهم قوى يعنى
علشان بس تعرفى قد ايه ماما بتكبرك
^_^

صحيح عرفتى مين جاى مع مين ولا لسه ؟؟؟
D:

Sweet Violet يقول...

قلم رصاص
^^^^^^
كنا زماااااااااان
نفسى مرة نقول حاليا بس يكون لصفه كويسة
v_v

Sweet Violet يقول...

dodoo
^^^^^
للتجربة فايدة لصاحبها انها بتعلمه الدرس
و فايده للأخرين لانها بتظهر معدن صاحبها
v_v

Sweet Violet يقول...

الجواز و سنينه
^^^^^^
من المفترض ان العلم بيفتح العقل
علشان كده قولت عندما يصبح الجهل نعمة
لان الجاهل لما بيشوف المتعلم كده
لازم يقول ان الجهل نعمه

تسلمى على المرور ياجميلة
^_^

Sweet Violet يقول...

مرمر
^^^^^
انتى اللى وحشانى ياوحشة انتى
و عايزاك بقى ترجعى تانى زى الاول
v_v

الحمدلله انا بخير
ويااااارب انتى كمان تكونى بخير و الايام تجرى بسرعه بقى
علشان تبقى معانا زى الاول
^_^

Sweet Violet يقول...

مصعب صلاح
^^^^^^
عليكم السلام و رحمة الله و بركاته

اى نعم
^_^

Sweet Violet يقول...

نوادر
^^^^
معاك بس من المفترض ان العلم زى ماقولت بيفتح العقل
اللى بيه بيكون الانسان المتعلم عنده القدرة انه يتحكم فى سلوكه للأحسن
v_v

على فكرة مش عارفة ارد عندك بسبب الكلمة التأكدية
ياريت لو شوفتى التعليق تلغيها لان مكان كتابة الحروف مش ظاهر عندى
وعامل مشكله
v_v

Sweet Violet يقول...

دنيا
^^^^
اهلا بيك فى اول زيارة
و اشكرك على رأيك الجميل
و ان شاء الله يتم التواصل
^_^

Butterfly يقول...

انا فعلا مقتنع
ان احيانا الجهل بأشياء احسن من العلم بيها
بس طبعا هى مش قاعده يعنى والموضوع ملوش داعوه بالعلام
الموضوع تربيه وأخلاق ودين قبل اى حاجه!

☼♫♪ عمــاد الدين يــوسف ☼♫♪ يقول...

عمر العلم او عدمه ما كان مرتبط بالغدر او صفات الناس ، للاسف الغدر من رأيي صفه مكتسبه عمرها مكانت في الفطره السلميه اللي فطر الله الناس عليها ، بس التحايل على العيشه خلانا اكتسبنا صفات وطباع غاية في الغباء والضراوة .. ربنا يعفي

تحياتي لطريقة سردك الشيقه

طـائر الليــل الحـزين يقول...

يا عينى يا عينى
على الافادة اللى بين السطور
بصراحة فى منتهى الجمال
ماشى يا ستى
برده هقولك واحشانى
بس زعلانة

صوت من مصر يقول...

اظن ان فى ناس متعلمتش بتفهم اكتر من المتعلمين
وانا واحد منهم

حـــــــــــب الملائكه يقول...

السلام عليكم
انا اول مرة ادخل مدونتك الجميلة دى
بس بصراحه كلامك جميل اختيارك للبوست جميل
يلا سلام بقى تقبلي مرورى
الجزاااااار عودة اللقب للاسم
FATHI

kmt يقول...

السلام عليكم ورحمة الله وبركاته

معرفش
لقتني عايزة اقولك
بحبك
بس
تحياتي
الى اللقاء

رابطة هويتي اسلامية يقول...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

HeBa يقول...

لو غدار غدر بك ماتخلى الحقد يعمى قلبك

الأمثال بتقول الخلاصة وبتجيب من الأخر

الفكرة حلوة أوي والبوست جامد

تحياتي

mahasen saber يقول...

يا نهارى واحد جوزها يخونها تقوم تخونه دى مصيبة ايه دى يا ست هانم
دى بتنتقم من روحها مبتنتقمش منه

يا واقعه سوده يا ولاد خيانه حاجه تغضب ربنا والعياذ بالله

قال متنوريين قال وبتوع مدارس دول بتوع مدارس جهنم
ربنا يهدى ويغفر ويرحم

mahasen saber يقول...

فوتك بالعافيه يا ست هانم كلامك وجعنى و خربش فى قلبى

miroooo يقول...

السلام عليكم
انا اول مره ازورك بس عجبنى اوى البوست ده تحفه والله والقصه وجعت قلبى واثرت فيا بجد الناس بقت وحشه اوى للدرجه دى بس باردو فى ناس كتير كويسه ولازم يكون عندنا امل نقابلهم فى يوم من الايام ويملا الحب الدنيا كلها ربنا يوفقك دائما يارب تقبلى مرورى واتمنى تنورينى فى مدونتى

Kiara يقول...

بيب بيب اعوعااااااااااااااااااااا

انا جه ياهنيييييييييييه يامتهنيييييييييييه


يوه البت من رغيها نستني

انا جه يانتيمتىىىىىىىىى


بجد اللي يشوف بلاوي الناس تهون عليه حاجات كتير

هنيه قالت حاجه مهم ان اللي اتكوي من حاجه بينتقم من الناس مش من اللي عملها

الواحد يسامح ويحتسب دا عند ربنا

بس افعال البشر وتصرفاتهم اغليها مش مرتبط بعلم انسان وجهله

كملي ياصحبتي

بنت مصريه يقول...

ههههههههههههههه
ايه الرغى ده والله انا لو م الست هانم دى اخبطها بحاجه اخليها تتكتم شويه هههههههبس بجد تحفه
تنفع سيناريو ف فيلم والله
ههههههههههههه

rovy يقول...

السلام عليكم
اسلوبك جميل قوى بجد و البوسا شدنى لأخر كلمه ..
بطلة قصتك قالت مواعظ والله ..
اصل الحكمه مش بقدر التعليم و لا حتى الثقافه .. فسبحان الله الذى يعطى الحكمة لمن يشاء ..

سلمت يداكى

تحياتى لكى

ياسمين يقول...

محتاجة استفسار منكم من فضلكم
اتفضلوا عندى فى المدونة
ضرورى وشكرا

ميمى واحمد يقول...

سويت فايلوت

برجاء قراءة هذا الموضوع
شكرا

تامر حسين يقول...

فعلا الي يعيش ياما يشوف
موضوع جميل
اتمني زيارتك الكريمه في مونتي يزيدني شرف
تحياتي

التميز المثالي للخدمات المنزلية يقول...


شركة تنظيف فلل بالجبيل

شركة مكافحة حشرات بالجبيل

شركة تنظيف سجاد بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة تنظيف شقق بالجبيل

شركة مكافحة حشرات ببقيق

شركة تنظيف منازل ببقيق

شركة تنظيف شقق ببقيق

شركة مكافحة النمل الابيض ببقيق

شركة مكافحة حشرات بسيهات

شركة مكافحة النمل الابيض بسيهات

التميز المثالي للخدمات المنزلية يقول...

شركة تاج للتنظيف بالدمام 0551844053


شركة تنظيف منازل بالدمام

شركة تنظيف شقق بالدمام

شركة تنظيف بالدمام

شركة رش مبيدات بالدمام

شركة مكافحة حشرات بالدمام

شركة تنظيف فلل بالدمام

شركة عزل اسطح بالدمام

شركة عزل خزانات بالدمام

شركة تسليك مجارى بالدمام

شركة تنظيف سجاد بالدمام

شركة مكافحة النمل الابيض بالدمام

شركة تنظيف واجهات زجاج بالدمام

شركة تنظيف مجالس بالدمام

شركة تنظيف خزانات بالدمام

شركة رش دفان بالدمام

شركة تسليك مجارى بالدمام 0551844053