أنا اللى جبت ده كله لنفسى 2

آآآه يانى شكلى ياجماعه لحد الشهر الغريب ده مايخلص هفضل اقول انا اللى جبت ده كله لنفسى )):

انا بجد مش عارفه ايه اللى بيحصلي الايام دى كل شئ غير طبيعى بالمرة ولا منطقى من اول التحركات اللى فى البيت لحد المدونة الغلبانة دى نفسها مروراً بالموبايل كمان .. و كله على بعضه

المهم  الحكاية وما فيها انى انا بيضرب بيا المثل .. بلاش تسرع و تقولوا ايه المشكله دى حاجه حلوة خالص جدا قوووى .. اصبروا و هتعرفوا انها حاجه وحشه جدااااااااا

امبارح كان خالى عامل حفله علشان هيسافر (ده على اساس انه هيقعد قرن مش 6شهور او سنه و هيرجع ) بس عادى ماهو كل مره بيعمل حفله لكن بتكون عائليه المرة دى كانت غير كده خالص .. بس بردو عادى ماهو الايام دى انا متوقعه اى شئ غريب

المهم فى القاعدة الكل قاعد يتكلم الغريب و القريب و الكلام جاب كلام لحد ما الكلام وصل ان الشباب بقى متسرع و طايش .. و اذا فجأة ألاقى تاتو الجميلة بتتكلم و بتضرب مثل على طيش الشباب (طبعا عرفتوا المثل كان عن مين)

انا طبعا تنحت و ازبهلت و بقول فى عقل بالى هو انتى لسه فاكره ياتاتو ده الموضوع فات من سنين .. كل ده وعااادى قولت اهو بردو تعتبر جلسة مغلقة .. لكن لقيت رولى حبيبتى بتكمل الحكاية اللى بتقولها جدتى .. و لما سألت هى عرفت ازاى .. قالت يابنتى ماهى لما كنا قاعدين فى النادى و لما بردو اتكلموا فى نفس الموضوع اضرب نفس المثل

آآآآه يامعدتى يااااانى ... يعنى الحمد لله بقيت مثل لطيش الشباب و تسرعه و نص مصر عرفت الحكاية ..طبعا عايزين تعرفوا ايه هى الحكاية علشان تشمتوا فيه زى البوست اللى فات .. هقولكم الحكاية و اهو بالمرة يبقى النص التانى عرفها و اكون مثل رسمى نظمى عبد الحكيم لطيش و تسرع الشباب

من يجى اربع سنين (اربع سنين و جدتى لسه فاكره . اللهم لا حسد) كنت مروحه البيت من بعد يوم شاااق من محاضرات لشغل و كنت خلاص هنام و انا ماشيه .. انا طبيعى لما بركب ميكروباص بركب قدام جنب السواق لوحدى بس اليوم ده الصراحة ماكنتش فايقة انى اتنك فقولت مش مشكله اركب ورا و خلاص .. ركبت و ركب جنبى واحد غريب الشكل و الملامح و الميكروباص طلع و انا سرحانة بره ألاقى فجأة ايد بتتحرك (لالالا تعالوا هنا ركزوا معايا ) ابص ألاقى الاستاذ بيحاول يمسك الشنطة و اول لما بصتله اتعدل.. قولت يابت جايز يكون كان بيجيب حاجة وخبط فيها ماهى بينى و بينه .. و كبرت دماغى

بعدها بشويه ألاقى نفس الشخص عمال بيعمل حاجه فى الكرسى اللى قدامه .. استغربت حاولت اركز و اشوف بيعمل ايه (الفضول وحشششش) ألاقى الاستاذ ماسك حاجه فى ايده و بيقطع جراب الموبايل بتاع اللى قدامه من تحت .. رحت بصه من الشباك و انا مش مستوعبه الموقف اصلا .. و طبعا لان البت شجاعة بتحبنى قوووى ظهرت فى الوقت ده

شجاعة : ايه ده !!! ده بيحاول يسرق الموبايل

انا : ايوة عارفه ... حد قالك انى فاكره انه بيلعب سلطح مثلا

شجاعة : طيب هتعملى ايه ؟؟ هتسكتى ؟؟؟!!

انا : عايزة ايه منى الساعة دى .. اعمل ايه يعنى ؟

شجاعة : ترضى حد يعمل فيكى كده ؟

انا : لا طبعا ..بس اعمل ايه انا .. اعمل زى الافلام العربى و اصرخ و اقول امسسك حرامى

شجاعة : لا بس بردو لازم تتصرفى اعملى اى حاجه

رحت بصه لايده و بصتله .. راح باصص ليا بنظره مكر و رسم ضحكه خبيثة على وشه

وفجأة لقيت اللمبة نورت فوق دماغى .. رحت بسرعة واخده منه النظرة و الابتسامة كوبى بست على طووول و رحت حاطهم على وشى و بكل هدووووء خبطت على كتف الراجل اللى بيتسرق و قولتله .. خالى بالك من الموبايل لو سمحت

لقيت انكل الحرامى راح راجع لورا و بعدها طلع حاجه من جيبه و رفعها وتناها بخفه يد غرييييبة و راح حاططها تحت التى شيرت .. و طبعا شجاعة كالعادة خلعت بعد ماتصدرت انا فى وش المدفع .. فضلت افكر اعمل ايه .. لحد ماقولت مابدهاش بقى و بصوت عالى ..انت يعنى بتخوفنى بالبتاعه اللى فى ايدك دى ولا ايه

هنا بقى الميكروباص كله اخد باله و الراجل اللى كان بيتسرق فهم انا ليه قولت كده و قال للسواق يطلع على القسم .. بس من الواضح ان السواق يااما بارد يااما كان معاه الله اعلم .. عمل نفسه عبيط لحد ما الصوت طبعا بقى عالى جداا .. لقيته و بكل برود

السواق : تعالى اركبى قدام ياابلة و خلاص

انا : هو ايه اللى خلاص .. انت شارب حاجه على المسا ..ده حرامى و بقول طلع حاجه من جيبه و حاطها تحت التى شرت

و طبعا بعد زعيق من الناس للسواق .. لقيت انكل الحرامى بيقول اقف هنا يااسطى انزل .. ووقف فعلا السواق و نزل بدون ما اى حد ينطق .. و انا طبعا سكت قولت و الله بقى مدام اللى كان بيتسرق سكت برحته يسبوه طليق يكتفه انا مالى

المهم نزل الحمد لله و فجأة ألاقى ستو الحاجه اللى قدام بتصوووووت و الشاب اللى قدامى ماسك القزاز اللى جنبى علشان يفضل مقفول و ابص ألاقى انكل الحرامى شكله كان مضايق منى مش عارفه ليه و مصمم انه يسيب علامة فيا باى طريقه .. و طبعا السواق البارد كان ماشى براحه لحد ما الناس زعقوا فيه و قالوله يسرع .. و الموضوع عدى بسلام الحمد لله و نزلت

روحت البيت متنحه و مش عارفه هو مين كان فين و ايه اللى حصل .. ماما اول لما دخلت بتسألنى و أنا و لا هنا .. و بعد مافوقت من اللى حصل قولتلها على الحكاية و طبعا كالعادة ماما وصلت على تاتو و تاتو وصلت على نص مصر الحمد لله وبقيت من يومها و انا مثل لطيش الشباب و تسرعه من غير ماانا اعرف إلا امبارح

و ادى اخرة لسانى و صداقة البت شجاعة

و اسمع اغنيه و انا كان مالى ماكنت فى حالى

و انزلوا بعدها بتتر صعبان عليا نفسى علشان هعيط اهئ اهئ

و دمتم سالمين

انا اللى جبت ده كله لنفسى)):

النهارده قررت اعمل عملية انتحارية واقنع ابى العزيز انى ارجع لشغلى القديم تانى

و طبعا لانى كنت فاكره ان النهارده زى اى يوم عادى و ان الحوار زى اى حوار عادى بيحصل بينا .. اتشجعت و اتكلمت

انا : ابى الجميل يااحلى الباباهات اللى فى الدنيا .. عايزة اتكلم معاك فى موضوع

بابا : خييييييير .. حكم انا عارف طقم الحنيه ده لازم يكون ورا مصيبة

انا : ليه بس ياحج ربنا مايجيب مصايب .. بص يابابيتو ياجميل انت هو احنا هنتناقش عادى يعنى و  ياتقنعني يااقنعك .. انا عايزة ارجع تانى الشغل

بابا و بكل هدوووء : لأ

انا : لأ ليه بقى ؟ انا زهقت من القاعدة دى اصلا .. و كمان انا عايزة اعرف انت رافض ليه ؟

بابا : و انا اوافق ليه من الاساس ؟؟؟ دى شغلانه كلها وجع دماغ

انا : صدقنى ماهيكون فى وجع دماغ ولا حاجه .. و كمان بقى انا بحب الشغل ده و عايزة ارجع له

بابا : و انا قولت لأ يبقى لأ

انا : بابا انت معودنا لما يكون فى رفض يبقى فى حوار و اقناع مش رفض و خلاص .. يبقى نتناقش و نتحاور و تقنعنى بالرفض .. وكمان وجع الدماغ مش سبب الصراحة للرفض اساسا بقى هه

بابا سكت سكوت مريب مرتحتلوش (وكان احساسى فى محله )

بابا : ماشى هنتناقش و نتحاور زى ماانتى عايزة لكن على شرط

انا : ايه هو ؟

بابا : انك تتكلمى براحه و بلاش طريقة السرعة و اكل الحروف بتاعتك دى

سمسمه اختى اللذيذة : اوبااااااا ليه بس كده يابابا جيت على الوجيعة

انا : مالكيش دعوة انتى ياخفيفة و كمان ايه اللى مقعدك معانا قومى من هنا .. و على فكرة بقى يابابا الشرط ده مش حلو خالص و انت كده واخد فكرة عنى وحشه جداا كل مافى الامر لما بتكلم بسرعة علشان احنا فى زمن السرعة و لازم نلحقه

بابا وهو مبتسم : و الله !!! ماشى اعمل نفسى مصدق الكلام و نغير الشرط .. قولى ستى بستلى بسبوسة او امر امير الامراء .. وأنا اتناقش معاكى يابتاعت زمن السرعة

(احم احم  انا مش لدغه و الله بس كل مافى الامر انى فعلا لما اتكلم براحه بعض مخارج الحروف عندى بتحسس اللى قدامى انى لدغه .. و بابا طبعا لما سكت كان بيفكر ازاى يخلينى ارفع الراية البيضا و اقفل موضوع الرجوع .. و للأسف اقدر )

انا : على فكرة بقى انا مش عايزة ارجع الشغل و اصلا انا بحب قاعدة البيت و مش عايزة اشتغل .. و على فكرة بقى دى مش معاملة نهائى هه بس

و الحوار اتقفل على كده بس انا لن استسلم ابدا .. و فضلت افكر طول اليوم ازاى اقنعه انى ارجع تانى .. وبعد تفكير قولت مافيش غير ماميتو الجميلة هى اى نعم رافضه هى كمان لكن قولت احاول معاها و هى بقى تبقى تكلمه . ودخلت لها المطبخ

انا  : ماميتو الجميلة مش عايزة اى حاجه اسعدك فيها

ماما : قولى عايزة ايه و بلاش طقم البكش بتاعك ده

انا : احم احم دايما فهمانى صح و الله .. بس ده مايمنعش انى اعملك حاجه و انا بتكلم معاكى

ماما : خلاص اعملى قهوة .. و اقولى عايزة ايه

المهم وقفت اعمل القهوة و بفكر ازاى ابدأ الكلام .. وماما بتشيل الحاجات فى المطبخ وفجأة حطت على ترابيزة المطبخ حلة و قالت لى ابقى اشيلها (مش اسكت انا و قول حاضر و خلاص ..لا ازاى لازم لسانى اللى دايما جيبلى مشاكل يتكلم )

انا : ماميتو انا بعمل القهوة و خلصت المكان اصلا ممكن تشيليها بقى و خصوصا انك خلصتى اللى فى ايدك

و طبعا لان اليوم ده غير عادى فلازم الموضوع مايعديش بسلام

ماما و هى سانده على الحوض و بابتسامة خفيفة : بعد ماتخلصى القهوة شيليها بردو

مش عارفه ليه امى كانت مصممة انى اشيلها .. وقفت اعمل القهوة و نسيت موضوع الشغل اصلا وبفكر ازاى اتخلص من الاضطهاد اللى بيحصل ده

انا : على فكرة ياماميتو ما انا ممكن اشيلها بس ماحطهاش صح ولا اساسا احطها فى مكانها مثلا

ماما و هى بتمد ايديها على المعلقه الخشب و بنفس الابتسامة : طيب انا عايزة اشوف هتشليها ازاى

طبعا انا شوفت المعلقه الخشب رحت زى الشطورة طبعا شلتها فى مكانها و بكلم نفسى

انا : كان فيها ايه لو شيلتيها من غير ماتتكلمى  ..لا ماهو بردو احساس الاضطهاد ده وحش قوى ازاى بس اسكت .. انا لازم اعترض ايوة امال ايه انا بعمل الحاجه تحت تهديد السلاح مش معاملة خالص دى

انا : انا شلتها اهو ...بس على فكرة بقى ياماميتو احنا كأفراد بيت واحد لازم فى تعاون و كمان بقى استخدام الصلاحيات دى مش معاملة خالص

ماما : فعلا هى مش معاملة .. انا بقى هوريكى المعاملة الصح

طبعا هى قبل ماتخلص الكلمة كنت قولت يافكيك لممارسه التمرين اليومى (اللف حوالين السفرة)

ماما : انتى فاكره انى كده مش هطولك ؟

انا بلسانى اللى عايز قطعه : هو منطقيا انك لو فعلا مديتى ايدك حتى لو بالمعلقة مش هطولينى لان السفرة مستطيلة و حتى لو دائرية ممكن ابعد شويه و بردو مش هطولينى

ماما و هى بتضحك من منظرى اللى بيعانى من الاضطهاد : ماشى يابتاعت المنطق .. انا بقى مش هتعب نفسى .. تعالى هنا علشان اضربك

انا : ايه ده ازاى يعنى دى بقى

ماما و هى بردو بتضحك : استخدام صلاحيات بقى .. يلا تعالى علشان اضربك

و طبعا لان الست دى امى ماكنش ينفع ارفض و رحتلها و انا خلاص هعيط ..ايوة ماهو احساس الاضطهاد وحش و ربنا

ماما بابتسامة خفيفة : تخيلى انى مبقاش ليا نفس اضربك دلوقتى ..خلاص روحى دلوقتى و لما يجيلى مزاج ابقى اناديكى

و سابتنى و دخلت المطبخ .. و انا واقفة مش مستوعبة اى حاجه و هو ايه اللى بيحصل فى البيت ده ..لالالالالا ده ظلم و الله .. و فضلت افكر و اخيرا .. وقفت على باب المطبخ

انا : على فكرة بقى ده ظلم و ديكتاتورية كمان هه

طبعا قولت الكلام ده و يافكيك بس المرة دى على اوضتى و قفلت الباب بالترباس ايوة ماهو انا عارفه اللى كان هيحصل فعلا المرة دى

ماما : يعنى انتى هتفضلى طول حياتك جوه .. بس لماتخرجى انا هوريكى الظلم اللى على حق

و من وقتها ياعالم و انا محبوسة فى الاوضة بقالى ساعة ونص  و الميه خلصت و همووووت من العطش .. و البت شجاعة عماله تزن فى ودنى

شجاعة : ماحدش بيموت من معلقه خشب لكن ممكن يموت من العطش

انا : ايوة يا شجاعة بس بردو برستيجى

شجاعة : ماهو انتى السبب بلسانك اللى مابيسكوتش ده استحملى بقى ..و كمان الميه ولا برستيجك

و طبعا لقيت ان شجاعة عندها حق و عشان الميه كل شئ يهون

علشان كده قررت انى اخرج دلوقتى اجيب الميه وربنا يستر

 بس لو ماضفتش التعليقات خلال 3 ايام اعرفوا ان خلاص رحت فى خبر كان

اما لو ضفتها بعد يوم و نص كده يبقى الحمد لله الموضوع وصل للكسر فقط لاغير و انا مازلت حيه ارزق

و فى الحالتين المدونة امانة فى رقبتكم خدو بالكم منها  كل يوم ادخلوا اطمنوا على الشمع اللى فوق ده علشان لو خلص تغيروه بدل ما الدنيا تضلم هنا اكتر ماهى مضلمة

اما بقى لو ضفت التعليقات عادى فى وقتها بدون تأخير فاعرفوا ان مفيش فايدة و هفضل بردو تعباكم و مصدعاكم و قلقاكم فى مدونتكم هتعملوا ايه قدركم بقى ((:

** و ادى جزاء اللى مايسمعش كلمة بابا يقولها )):

و دمتم سالمين

شكر .. و فضفضة

اولا بجد بشكر كل اللى دخل و قال رأيه فى البوست اللى فات

و الحمد لله فى امل هو اى نعم الموضوع هياخد وقت اكيد

بس انا متفائلة خير ان شاء الله

ادعوا لهم ان ربنا يتمم لهم على خير ويرجعوا بقى يلبسوا الدبل تانى علشان ايديهم بقى شكلها وحش قووووى )):

 ^^^^^^

امبارح و انا قاعدة فى المستشفى عند جدو لاقتنى فكرت فى الموت

و فكرت عملت ايه و ايه لسه ماعملتهوش ولقيت ان فى حاجات كتير

انا لسه مقصرة فيها و ناويت ان شاء الله انى ابدأ اعملها

لان فعلا الواحد مش عارف العمر فاضل فيه قد ايه

وبعد كده لاقتنى بفكر ان فى حاجات كتير هتوحشنى بردو

منكفتى (اللى جايه من منكفه يعنى) لكل فرد فى العيلة بلا استثناء

اصحابى و لقبهم ليا (انتى لسان و طلعله بنى ادم) علشان كل كلمة لازم اعلق عليها

هتوحشنى كلمة مبحبش لشموسه فى المطبخ و هى تقولى مافيش حاجه اسمها مبحبش لازم تحبى

منكفتى فى محاسن و زمانها المختلف و كيارا و التوهان اللى هى فيه

وسوووول و دلع الاسم اللى لحد الان ماعرفناش هيبقى ايه

و ولد مصرى و اعتراضى الدائم عنده فى التعليقات

و ازهرى و الحبر اللى كل شويه اقوله ماوصلش و هو يقول هرفع قضيه علشان وصل

احتلالى للمدونات و طلبى الدائم لمحمد  انه يدفع الرسوم الاداريه

ولأول مرة هتوحشنى مسيرة ضد ياضد (:

هتوحشنى محاضرات جدو كل يوم

بجد لقيت ان فى حاجات كتير قووووى هتوحشنى

وحاجات كتير قوى فى حياتى حلوة بجد ..بس للأسف انا اللى كنت مش واخدة بالى منها لانى كنت بفكر فى الاحزان

بجد اكتشفت فعلا ان مافيش حاجة تستاهل انى افضل عايشه فى الاحزان ..

و انى لما امر بتجربة حزينة اقف واخد منها الدرس و اعدى البر التانى و اقول الحمد لله عديت

و اكمل طريقى و اشوف الحلو اللى فى حياتى و احمد ربنا عليه و ارمى ورا ضهرى الاحزان

يلا بقى كفاية كده صدعتكم

و بجد بشكر تانى كل واحد دخل و قالى رأيه فى البوست اللى فات

و ربنا يخلينى ليكم يارب و افضل تعباكم و مصدعاكم كدا على طول

قولوا اميييييييين (:

و دمتم سالمين

حيرااااااانة

احساس وحش قوى لما تنجرحى من الانسان الوحيد اللى حبتيه بجد

و رغم كل عيوبه بتفتكرى مميزاته علشان تقدرى تعيشى معاه

مع ان كل اللى حواليك واهلك بيقولولك ماحدش بيتغير و هتتعبى

لكن انتى بردو كنتى بتقنعى نفسك انه اكيد هيفوق لنفسه و يتغير

و فجأة ميقدرش كل ده .. و فاكر انك لما تسامحى ضعف منك

مش لأنك بتحبى بجد

الاصعب من الاحساس ده لما تقررى البعد .. و تحاولى توسعى دائرة علاقاتك و تموتى نفسك فى الشغل على امل انك هتقدرى تنسى

تكتشفى ان لسه مكانه فاضى .. لكن زى ماكنتى بتقنعى نفسك انه هيفوق بردو بتقنعيها انك هتقدرى تنسى

و رغم ضحكك و تمثيلك حاله النسيان و انك خلاص عايشه حياتك .. إلا انك من جواك تايهه

قالت الكلام ده ليا و بدأت فى البكاء ... حاولت اهون عليها و اخرجها من اللى هى فيه

ورغم انها حاولت تتظاهر انها بقت كويسة إلا انى عارفة انها مش كده

و من وقت ما سبتها وأنا مخنوقة و حاسة بالعجز

^^^^^^^^^^

اصعب احساس لما الانسان يكتشف ان كان بين ايده جوهرة وهو اللى ضيعها  

بجد الانسانة دى انا مش هلاقى زيها تانى .. كنت فاكر انى فهمتها لكن اتضح انى عمرى مافهمتها

غلطت في حقها كتير و ظلمتها معايا ومعترف.. و بجد ندمان عليها و نفسى انها تسامحنى

لما بعدت عنى حسيت فعلا بقيمتها .. عايز اكلمها و اقولها انى اتغيرت بجد بس خايف انها متصدقنيش .. و هيكون معاها حق فى كده بس بجد انا محتاجها جنبى

خايف يكون فات الاوان .. خايف من حاجات كتير قوووى .. مش عارف

قال الكلام ده و عينه مليانة بالدموع .. و لأول مره اشوف الانسان ده كده بس بجد صوته فعلا كان مخنوق قوووى و حسيت فعلا انه ندمان بجد و انه اتغير

طلب منى انى اتدخل فى الموضوع .. قولت هحاول لو فعلا لقيت انها مستعدة للكلام ان شاء الله اكلمها

^^^^^^

انا بقى دلوقتى مش عارفة اعمل ايه فعلا .. الاتنين من اعز اصدقائى و الاتنين زعلانة عليهم

انا عارفة انها اتظلمت كتير معاه بس بردو انا حاسة انه ندمان فعلا

و بجد صعبان عليا ان حب 3 سنين يتهدم بالشكل ده و خصوصا ان لسه الاوان مفتش

الاتنين لسه بيحبوا بعض .. اكيد فى حاجات اتكسرت لكن ممكن بردو انهم يصلحوها مع بعض .. ولا ايه ؟؟

مش عارفة اتدخل فعلا زى ماهو طلب منى

ولا انصح الاتنين من بعيد وخصوصا انى مابحبش موضوع الطرف التالت ده فى العلاقة لأنه مهما كان مش هيكون حاسس نفس احساسهم

ولا اعمل ايه ؟؟؟؟؟؟؟؟

كنت مترددة انى انزل الموضوع هنا بس بجد من اول امبارح و انا دماغى هتنفجر من كتر التفكير

و بجد محتاجة رأيكم فى الموضوع

و دمتم سالمين

فيلم المقابلة المنتظرة ((:

المكان : النادى الأهلي

الزمان : 5/2/2009 الساعة 8:33

الحدث : قاعدة بنقل أغانى بالبلوتوث .. و فجأة

(حبيت معاك يا حبيبي سنين خليني جنب عنيك خليني) كيارا هانم بتتصل علشان تقولي على المكان اللى هنتقابل فيه .. قالت ستى ستارز الساعة 1 .. و طبعا كان صعب 1 جدااا بس قولتلها هشوف و هحاول متأخرش

المهم شويه كده و روحنا علشان نشوف الفريق و هو بيتمرن و عماله أفكر  مش معقول يعنى المقابلة بكره اكيد فى حاجه غلط

المهم اول لما قعدت قولت اكلم محاسن و اشوف اللى أنا سمعته ده حقيقي ولا لأ

استووووووووووووب

مش عدم ثقة فى كيارا و لا تشاؤم مني .. كل ما فى الحكاية ان المفروض المقابلة دى ياجماعه اتفقت عليها أنا و محاسن هانم صابر قبل ما شموسه تنزل من الحج (حطوا مليون خط تحت قبل ماتنزل دى ) اننا لما شموسه ترجع بالسلامة هنتقابل معاها و طبعا لما المقابلة اتأخرت كده .. قولت اكيد اكيد محاسن تقصد لما تنزل من الحج المرة الجاية ان شاء الله مش المرة دى (:

ثرى تووو وان (:

اتصلت على محاسن و فعلا طلعت المقابلة يوم الجمعه الساعة 1 لكن انا قولت لمحاسن انى هاجى على 2 او 2:30 كده لان صعب قوووى الساعة 1 دى و قالتلي ماشى وقفلنا على كده

استووووووووووووب

بما ان شموسه قالتلى خدى بالك من مده ياضد فى البوست عندها .. كان لازم اوضح الحقيقة علشان هى فاكره بقى ان مواعيدى مش مظبوطه رغم اني الوحيدة اللى جيت فى الميعاد بتاعى بالضبط (معلش لازم بردو اهدى النفوس على كيارا و محاسن ^_^ )

ثرى توو وان (:

المكان : باب النادى

الزمان : نفس التاريخ لكن الساعة 9:52

الحدث : خلاص شطبنا و عايزين نروح بقى .. و فجأة

(قد منَّ الله علينا إذ بعث الهادى الأحمد) رسالة .. بشوفها لقيت كيارا بردو بتقول ان المكان بقى ستى سنتر ):

قولت فى عقل بالى ستى ستارز ستى سنتر اهو كله ستى مش مهم .. و انا فى الطريق بقى بفكر .. اقل من ساعة و المكان اتغير .. ربنا يستر بقى على الصبح مايكونش الميعاد كله اتغير  )):

^^^^^^^

المكان : اوضتى العزيزة

الزمان : نفس التاريخ بردو لكن الساعة 11:53

الحدث : انا و اختى بنرخم على بعض .. و فجأة

(حبيت معاك يا حبيبى سنين خليني جنب عنيك خليني) أكيد عرفتوا مين .. ايون كيارا .. انا قولت اوباااا  مالحقتش اتهنى بالفرحة وشكله اتلغى من بليل )):

انا : ألو

كيارا : ايوة ياضد (لزوم الاسم قولنا ) بقولك هو انا هركب ايه علشان اوصل لهناك

استووووووووووووب

اول معلومة عن كيارا .. انها اصلا اسمها كيارا توهااااان .. دايما تايهه ..و ممكن و انا بتكلم معاها تروح مني فجأة و نفسى اعرف لحد الان هى بتروح فين

(معلش بقى ياكيارا انتى عارفه ماينفعش الموضوع يعدى كده :P )

ثرى تو وان (:

المهم قولتلها تركب ازاى .. مع ان باباها كان قال طريقة تانية .. بس نعمل ايه فى الابناء بقى :D

^^^^^^^

المكان : اوضتى العزيزة بردو

الزمان : 6/2/2009 الساعة 8 ص

الحدث : بفتح الموبايل علشان اطمن على ان الميعاد لسه سارى

و الحمد لله كل شئ كان تماما .. و بدأت اجهز بعد الصلاة و نزلت وبردو حاسة ان فى حاجه غلط

(ياجماعه ماهو اللى شوفته من محاسن لحد ما الميعاد ده اتحدد ماكنش شوية يعنى)

و نزلت و لسه بوقف تاكسى لقيت التليفون بيرن .. كيااااااااااااارا .. قولت خيييير ربنا يستر .. لاقيتها طبعا بتسأل انا فين .. و شموسه طبعا جنبها بتقول مواعيدك مش مظبوطه

استووووووووووووب

على فكرة كيارا اعترفت فى البوست بتاعها انى فعلا قولت هاجى على 2 او 2:30 يعنى الحمد لله اعترفوا بالجريمة و انا بردو الوحيدة اللى جيت فى ميعادى نيهاهاهاهاهاهاها

ثرى تو وان (:

ركبت و لسه بنزل علشان اخد اول ميكروباص للمكان .. لقيت التليفون بيرن المكان اتغير بقى فى كوستا و الحمد لله ده كان اخر مكان و الحمد لله وصلت الساعة 2:16 (احم احم بوصل فى الميعاد مش زى ناس جت الساعة 1:15و طبعا دى كيارا .. ولا مثلا مثلا زى ناس جت فى النهار اللى هو عكس النهار الطبيعى زى محاسن كده ^_^ )

^^^^^^^^

طبعا اول حد شوفته كيارا اللى بجد كانت وحشاااااااااااااااانى موت جدا خاااااااااااالص

^^^^^^^

وبعدين دخلت بقى شوفت شموستى الجميلة و توتا بنتوتتها الجميلة زيها

و زى ماكنت متوقعه فعلا شخصية جميلة جداا و لذيذه و حبوبة قووووى .. مرحه لأبعد الحدود و طيوبة جدااا .. بجد بجد انا سعيدة انى اتعرفت عليها عن قرب و بجد مهما اقول مش هقدر اوصف جمال روحها و شخصيتها

توتا الجميلة.. حته سكره و لذيذه جدااااا

^^^^^^^

قاعدنا بقى نتكلم كتييير والجدير بالذكر ان شموسه ياجماعه بتعطى النصيحة بطريقه جميلة قوووى تحس بجد انها صديقه اكتر من انها اخت كبيرة يتنصح الاصغر منها

و طبعا قبل مانقوم اتفقت انى اخر واحدة هتنزل البوست ده .. وعلى رأى شموسه لؤم مدونين بقى :D

^^^^^^^^^

محاااااااااااااااااااااااااااااااااااااااسن هانم صابر

دورك بقى ياقمر فى اللقاء ... طبعا محاسن من وقت ما وصلت و انا سامعه انها على وصول .. مره واحده بس قالت ربع ساعة و هتيجى .. و بعد كده زى ما كيارا قالت نص ساعة.. هو من الواضح و اللى اكتشفته مؤخرا يامحاسن ان الزمن بتاعك مختلف عن الزمن اللى الواحد عارفه

محاسن اللى كنت منتظرها الفترة دى كلها علشان اللقاء يتم .. هى الوحيدة اللى ماحضرتش اللقاء ده ... طبعا ياسنسن انا مقدرة اللى حصل لكن مش هنكر انى متغاظة مووووت لان بجد كان نفسى تكونى معانا

^^^^^^

و احنا قاعدين عمرو اتكلم و بجد كانت مفاجأة غير متوقعه و بجد سعيد جدااا انى كلمته لأنه فعلا من الشخصيات اللى بحترمها حقيقى ( و طبعا انا ليا عند عمرو هدية عيد ميلاده و هو قال هيجبها .. خليكوا شاهدين عليه بقى ^_^ )

^^^^^^

و طبعا لما خلاص فقدنا الامل ان محاسن تيجى اصلا .. و كمان الوقت كان خلاص فى العد التنازلى للبيت عند كيارا و انا كان المفروض ورايا مشوار بردو .. رحلنا من كوستا

نزلت انا و كيارا التحرير نبحث  عن الكتاب المفقود  لحد ماخلاص فقدنا الامل

و كل واحد راح على بيته .. و انتهى اليوم على كده

و نراكم فى لقاء تانى ان شاء الله عن قريب

و دمتم سالمين

* كل واحد على مدونته بقى لو سمحتوا علشان بنقفل و هنرش ميه على فكرة ^_^