Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الأحد، 3 يناير، 2010

هنية تحدثكم من أمام التلفاز

بقى كده يا ست هانم .. هنية تتعب و ماحدش يسأل عليها .. ماكنش العشم و الله ده انا قولت ان عم محمد البوسطجى هيزهق من كتر الجوابات اللى مبعوتالى .. يلا حصل خير ماهو انتوا بردو معذورين و مشغولين بالمشاكل اللى بتحصل فى البلد اللى الواحد مش عارف هتخلص امتى .. الله يكون فى عونكم

ألا صحيح يا ست هانم مش انتى بتقولى ان فى ناس متنورين زى اللى بنشوفهم فى التلفزيون كده بيقروا كلامى ؟؟

طب قوليلهم يا ست هانم هنية مش هتحكى حاجة المرة دى هى بس عايزة تسأل كام سؤال محشورين فى زورها و ياريت ينورونى وحد فيهم يرد عليا

يوم الجمعه الشيخ بتاع الجامع قعد يسأل الشباب هما ليه متجوزوش و انهم كده هايخشوا النار .. هو يا ست هانم شيوخ الجوامع عايشين معانا فى البلد دى بصحيح ولا هما جايين منين ؟؟

و لا هو يا ست هانم مشاكل البلد خلصت و الحياة بقت فل و الشباب هو اللى بيدلع ؟؟

ولا بتوع التلفزيون اللى كل كلامهم صوت الحريم حلال ولا حرام و ان النقاب لازم ولا لا .. هو يعنى يا ست هانم خلاص بقينا بنراعى ربنا فى كل حاجة و مافضلش إلا الحاجات دى .. يعنى خلاص مابقاش فيه سرقة ولا كدب و العيشة بقت تمام و الفقر راح و كل حاجة بقت حلال فى البلد علشان نتكلم فى الصوت و النقاب ؟؟

و بمناسبة صحيح التلفزيون – ماهو الله يسامحه التعب حوجنى ليه – أمبارح واحد من الناس المثكفين فضل يقول مصر بتتقدم مصر بتتقدم  .. يعنى ايه يا ست هانم يعنى خلاص هتتجوز واحد بن حلال ولا بردو هتاخد واحد من نفس العيلة "بنت الناس الطيبين" دول ؟؟

و لا هو يقصد بأن مصر بتتقدم ان ممكن يعنى نقوم من النوم نلاقى مصر بقت فى السعودية ؟؟

اصل الصراحة يا ست هانم انا مش عارفة ازغط الكلمة اللى قالها بعد كده .. علشان كده انا مش فاهمة

اصله بيقول مصر بتتقدم و البلد بيتصلح حالها .. بيتصلح حالها فين بس يا ست هانم ولا مين اللى بيصلح حالها ده .. اشحال مش عارفين يصلحوا مسورة المية المكسورة و قاطعين الميه علينا بقالهم اسبوع هيعرفوا يصلحوا حال بلد بحالها ؟؟

هى الناس دى عايشه معانا بصحيح يا ست هانم ولا هما قصدهم علي  مصر غير مصر بتاعتنا ؟؟

ولا اقلب لقناة تانية ألاقى خناقة مابين المسلمين و بعضهم و المسحيين و بعضهم و المسلمين و المسحيين على ايه بقى ؟؟ على ان العدرا ظهرت ولا لا ؟؟

يعى انا عايزة افهم حاجة المسلمين و المسحيين اللى بيقولوا انها ظهرت ماشى ظهرت ايه بقى التغيير اللى حصل ؟؟ يعنى مثلا مشكلة العيش انتهت و الناس بقت عارفة تعيش ولا اللى بيقولوا عليها دى اسمها ايه ..آآه الفتنه الطائفية خلصت و بقينا بنحب بعض و مافيش نفسنه ما بينا ؟؟

و اللى بيقولوا انها ماظهرتش ماشى ماظهرتش ايه بردو التغيير اللى حصل ؟؟ هو احنا خلاص مابقاش فى حاجة نتكلم فيها فبقينا بنتخانق مع بعض و خلاص ؟؟

ولا موضوع السور اللى بيتعمل فى سينا هو  راخر .. يعنى سؤال بس يا ست هانم هو الريس بتاعنا مابيفهمش إلا فى الطوب و الاسمنت و الحديد ؟؟ اصل كل ماحد بيتكلم يقولك انجازات الريس، طيب ايه هى يا عم الحج.. يقولك عملك كبارى و صلحلك الشوارع و اهو بيعمل سور !! .. أصل لو مابيفهمش إلا فى كده يبقى الراجل عداه العيب بردو و مافيش لوم عليه و يشكر انه مابيحبش يفتى فى حاجة مش عارفها و بيصلح اللى بيفهم فيه .. و نبقى ندور احنا بقى على ريس يمسك معاه بس يكون بيفهم فى حكم الشعب و معيشته

و الناس اللى بتقول مش عايزين السور ولازم يتهد .. كانوا فين الناس دى لما الحكومة كانت بتبنى السور علينا احنا و ماقلوش ليه يقف ولا يتهد و سيبينه يعلى لحد ماقرب يوصل للسما ؟؟ ولو هما الفلسطنين ولاد مصر و احنا ولاد (دول) ؟؟؟

ولا الحكومة اللى بتقولك السور علشان نحمى البلد طب و شعب البلد مابتحمهوش ليه ولا هما شغلتهم حماية الاراضى وبس .. طب حد يدلنا على حكومة شغلتها حماية شعب البلد من اللى بيحموا ارض البلد و احنا نجبها

و كله كوم بقى و اللى طلع يقولك ان البلد فيها شغل بس الشباب هو اللى بيدلع .. صح يا ست هانم الشباب هو اللى بيدلع بأمارة ابلة جيهان اللى بتدلع اخر دلع .. ابلة جيهان دى المفروض انها مدرسة فضلت تدور على شغل و مالقتش و لما عرفت ان خلاص مافيش فايدة و مش عارفة تعيش اشتغلت فى البيوت .. لا يا ست هانم مش بتعلم ولاد الناس فى بيوتهم دى بتشتغل عند ولاد الناس فى بيوتهم يعنى بتمسح و تنفض و تطبخ و بدل ما هى اسمها ابله جيهان بقى اسمها الشغالة جيهان و يقولك الشباب بيدلع و مصر بتتقدم

صحيح صدق اللى قال

ازاى يابا اكون متعلم .. قاله تعالى فى الهيافة و علم

هناك 28 تعليقًا:

Manamino يقول...

اولا الف مليون سلامة عليكي ياست هنية والله مانعرف والا كنا كلفنا خاطرنا وجيبنالك اتنين كيلو برتقان وجينا يعني هو احنا عندنا كانم هنية بس
...........................
بس والله عندك حق ياست هنية
احنا اصلا شعب تافه
الدنيا عندنا ماشية بالبزرميط
يعني بنيجي في الهايفة (ونعلم ) زي المثل مابيقول ولو اننا في بلدنا مابنقولهوش كدة بس ماشيها كدة بقي علشان الرقابة
...........................
العذرا ظهرت ولا ماظهرتش ده هايفرق في ايه
ناس مصدقة وناس مكدبة
وناس تقعد تقولك اصل الحكومة هي اللي عملت كدة علشان تلهي الشعب
طيب بزمتك ياهنية مش اللي بيقول كدة بيبقي هو نفسه ادي فرصة للحكومة انها تلهيه
ماهو لو ناصح وعارف ان الحكومة قاصدة تلهيه كان عدي الخبر ولا كانه سمع حاجة وبكدة يبقي ضحك علي الحكومة
.........................
الشيوخ بقي بتوع الجوامع وقسس الكنايس وغيرهم من الناس المغيبين دول
دول يا امي موظفين
انت ماتعرفيش ياست هنية يامتهنية انت انهم موظفين عند الحكومة
................................
وبعدين بقي موضوع النقاب وصوت الحريم حدانا في البلد ده زيه زي غيره من الحاجات الفكسانة (ودي كلمة من قاموس الشباب السيس اللي انت ماتعرفيهوش ياهنية )
الدين بالنسبة لنا بقي مجرد شوية اشكال ياست هنية
يعني واحد يربي دقنه وواحدة تلبس نقاب وواحد يروح الجامع في مواعيد الصلاه ولا يروح الكنيسة في مواعيد الصلاه وبس
شوفيه بقي برة الجامع ولا برة الكنيسة
تلعني اليوم اللي عرفتيه فيه
كلنا نسينا ان الدين هو المعاملة
الدين بقي شوية كلام وبس
اقولك ايه بس ولا ايه ياست هنية
اقولك
انا هاروح اتفرج علي التليفزيون احسن

(Joudy) يقول...

والله يانورا حاجة بقت غريبة فعلا بندور على الحاجة اللى لاتضر ولا تنفع ونمسك فيها ونعملها مشكلة والمفروض إننا ندور على صالحنا ونعمله نبسط حياتنا بدل ماهى متعقدة فوق دماغنا ويحاولوا يبسطوها علينا إحنا كمان يعنى اللى يحب يعمل مشروع مش يعقدوه يبسطولوا الأمور يشجعوا مش يخوفوا لو بس معقدوهاش وبسطوها حياتنا ومشاكلنا هتتحل

دمتى بكل الخير والسعادة

يوميات الحارة يقول...

الاغرب اننا فى 2010
يعنى كل اللى حاصل فى السنوات الماضية هيفضل هو هو على حاله قائم للسنوات التالية لا جديد
والاجمل انهم بيطلبوا منا نظرة تفائل
لان فى انجازات وفى ناس وافكار قادرة تحول الظلام الى نور وكوادر منتشرة فى كل ربوع مصر بس لازم من الامل هنفضل نردد لعشرات السنين نفس الكلام ولا جديد
شوية وجوه بتتغير فى مقاعد زى مقاعد الكراسى الموسيقية وزير يتشال ووزير يجيى ومصر هى مصر
لافى كوادر ولا فى تغير
دا كلمات هبقى انشرها لاقيتها بتناسب التبوك

ايها الشيب وقد اصبت بسهمك طفلا يحبوا فى ظل الغروب

ايها المعين وقد نضبت اين فجرى من تلك الدروب

مصر لا ابكيكى كهلتن انتى درت الاوطان فى زمن الكروب

قد كساكى الشيب لكن حسنك ارخ الصعاب

مصر الفتية لا تغيبى اسقطى ذك السراب

تحياتى تقبلى مرورى

نـــــــــــــور يقول...

حبيبتى والله الست هنيه المتهنيه بقت بتفهم اكتر من ناس كتير مثقفين عايشين فى البلد
قوليلها الف سلامه وان اللى بتحبها زعلت عشانها ;)

الا هى كان عندنها انفلونزا خنازير ولا ايه؟:)

عامله ايه انتى
انا مش هرد على اى حاجه من اللى الست هنيه سألتهم لسبب واحد هو انى بقيت شايفه ان السكوت افضل كتير من الكلام اللى مابيغيرش واقع

كل سنة وانتى طيبه يانورا ياحبيبتى ياعسل انتى ياللى واحشانى:)

๓คภ๏ภค يقول...

وحشتييييييييييييييييييينى

يا هنية اخص عليكى كل دى غيبة

وبعدين انا البوسطجى طهق منى

اسألى حتى الست هانم

الف مليوووووووون سلامة عليكى يا

هنية ان شاء الله ياختى الراجل المثكف

اللى قعد يقول مصر بتتقدم

وبعدين يا اوختى احنا اللى بندلع

اييون والنفس بقه

ااااااااه يانا عايزة اقول كلمة مش

ولابد بس مش هاقولها نظرا لان الناس

اللى بتيجى بعدى ممكن تاخد فكرة مش

ولابد عنى مع انها كلمة عادية جدااااا

انا حقى اعترض وبشدة عااااااااااااااا

عارفة لو غيبتى تانى

اديكى خفيتى وبقيتى زى الفل

هاحرمك من الشوكولاته

قلم رصاص يقول...

حندلله على السلامة
وكل سنة وانتي طيبه

طب مش كنتي تعملي تنويه واحنا كنا نيجي نطمن

في حفظ الله

Sharm يقول...

كل سنة وانتم طيبين و جزاك الله خيرا على البوست

شمس النهار يقول...

ماشي ياست هنيه

كلها مصايب قصدي قضايا مهمه


لكن ماباليد حيله


احنا هنغير الشعب المدلع ده

ونجيب شعب كويس وابن حلال كده
علشان نريح الحكومه

ماهي برضه بنتنا هنرميها
لاهنرمي الشعب

سلامي

همسات ساكنه يقول...

سلامات يا ست هنيه
طلعتي مثقفه اكتر م الست هانم
الاحسن من ده كله
الواحد ميشوفش تليفزيون
لحسن يقولوا بنتدلع وبدل ما بنشتغل عطينها فرجة ع الـ قيل والـ قال

blue-wave يقول...

الله ينور عليكى
اهو انتى لخصتى كل حاجه فى الجمله الأخيرة
مشكلتنا الهيافه
بنمسك فى الهايفه
ونسيب المهم
الشيوخ اللى بينادوا بزواج الشباب
كلام جميل لكن منين؟
اللى بيقولوا السور
رائع بس بنحبس مين؟؟
اللى بيخدوا قشور الدين
سايبين اصل التدين ليه؟؟
اللى بيقولوا العدرا ظهرت
مع اعتراضى لأنها بشر ومستحيل الخرافه دى
لكن بافتراض انها ظهرت فعلا
استفادوا ايه؟؟؟؟
بوست يقلب المواجع يا ضد

P A S H A يقول...

ألف سلامة عليكي




حمداً لله على سلامتك


السلام عليكم ورحمة الله وبركاته

:))

صوت من مصر يقول...

حاسس انى غبى

الشجرة الأم يقول...

الله ستي هنية دي يتخاف منها جامد .. الواحد لازم يعملها ألف حساب!!!

تحياتي لك عزيزتي على هذه التدوينة اللذيذة.

وأعتذر في التاخر على الرد في الفيس بوك لإنشغالي بالتدوين.. دمتي بخير

ميمى واحمد يقول...

حفلة صغننة ل د / ستيتة ..

قولوا كل سنة وهيا طيبة في البوست ده

mohamed ghalia يقول...

فعلا احنا بنتكلم فى فروع قبل منتكلم فى اصول

أبو العريف يقول...

الله يا ست نورا الست هنيه دي متنوره جداااا وبتقول حكم

وسألت الاسئله اللي بدور في دماغنا كلنا من زمان

تحياتي لهنيه

aMr tA3LaB يقول...

يا ست هنية المعملية مش الي هيا الناس كلها بتتقدم بمصر
هو انتي معرفتيش ان مصر ديه بلد تانية غير بلدنا عايشين فيها لوحدهم بقصورها وشوارعها ومن غير زحمة ولا مطبات ولا سؤال عن حاجت رخمة ولا اي حاجة من الحاجات ديه
الست هنية جبتي التايه مش عايشين معانا في البلد هما عايشين في البرج العالي بيتكلموا منه وخلاص

adel يقول...

مفيش تعليق الا ....

انتي فين ؟؟؟؟
اكيد فاهمة !!!!!!!!!!!!!!!

قررت أكون عانس يقول...

أمبارح واحد من الناس المثكفين فضل يقول مصر بتتقدم مصر بتتقدم .. يعنى ايه يا ست هانم يعنى خلاص هتتجوز واحد بن حلال ولا بردو هتاخد واحد من نفس العيلة "بنت الناس الطيبين" دول ؟؟

ضحكتني جدا بجد

انا اتهبلت من كام يوم واتفرجت عالتلفزيون المصري ولسه لحد دلوقتي بحاول انزل الضغط

عارفة كل دولة قبل ماتسقط شيوخها بيفضلوا يتخانقوا على حاجات غريبة جدا .. نرفع السبابة ازاي .. نقول في التشهد سيدنا محمد ولا محمد من غير سيدنا وحاجات مش أساس الدين أبدا

بتكلموا في فرعيات فرعيات الفرعيات

وكأن الدنيا خلت من المشاكل .. يعني محدش بيقولنا اللي بيعمله فينا النظام حلال ولا حرام

من سرقة وقتل وتعذيب وسجون

والمشكلة انها مش مكتفية بتعذيب وسجن وتجويع شعبها

لا راحت كمان للجيران تعمل فيهم اللي بتعمله فينا

ربنا يخلصنا من النظام واعلامه على خير

الطالبة عفو الله يقول...

لا حول و لا قوة الا بالله
مش لاقية كلام اقول
ربنا يصلح الحال
انتي فين طيب يا ختي ليه طولتي الغيبة عننا طمنينا عليك خير ان شاء الله

صباح الصباح يقول...

عجبنى اوى البقين اللى فى الاخر

هية دى مصر يا عبلة

MaNoOoSh يقول...

ازيك يا ضد
ليكي وحشة كبيييييييييييييييييييرة

MR.PRESIDENT يقول...

هنية قلبت المواجع .
والدهر يا ناس واجع .
حتي بلاط الملك ساقع .
لا جهل نفع معاهم
ولا حتي علم نافع .

لسه مقلفها حالا للمدونة ولهنية .

sookra يقول...

هنيه المتهنيه
سلامتك الف سلامه
وحشانى ياشيخه
اما عن اللى بتقوليه فبرده انا موش هاارد عشان بقينا بنتكلم وموش لاقيين اى تغيير بيحصل
اوعى تغيبى تانى
ماشى

الازهرى يقول...

أٌقول لك
انا عندى يوم طويل شمس عارفاه
اخلصه وبعدين اتكلم

بس قلت اسلم الأول

اتفقنا ؟

الازهرى يقول...

أولا شيخ الجامع غلطان فى حكاية النار دى
لان الحكم الدينى يجعل حرام على المستطيع الخائف من الوقوع فى الفتن عدم الزواج ولم يقل شيئا عن عقوبته
وللأحوال الأخرى أحكام أخرى
أما بخصوص انتهاء المشاكل فالمشكلة الكبرى التى تواجهننا هى تجزيء المشكلة
فلو التزم الجميع الدين الصحيح بكل احكامه لا ان يأخذ بعض ويترك بعض فالصوت والحجاب جزء وليس كل ولكن يجب الإهتمام به أيضا
أما عن الشباب فأنا الأكثر حيرة فيهم
فهناك أعمال لا تجد من يعمل بها وهناك شباب لا يجد عملا والمشكلة عدم ملائمة هذا لهؤلاء وبالعكس فالمشكلة الكبرى هى عدم التوزيع الصحيح بين نسب التعليم ودخول الشباب فى مجالات لا تجد سوقا
كما أن المشكلة الأكبر هى التعليم وقد واجهتها عندما اختبرت العديد من الشباب فى تقدمهم لأعمال معينة فالشهادة التى يحملها تجعلك تنبهر به وربما بتقدير عالى أما خبرته فصفر فى كل شىء حتى فيما يختص بمجال دراسته فكيف أقبله ستقولي لى نوع الدراسة
أتفق معك ولكن مذا عن الدراسات الجانبية واتقان ما درس بالفعل
المسألة كلها تتلخص فى رأيى فى الثقافة العامة الموجودة عندنا
لا بد من أن يتعلم الشباب المثابرة وعدم الإنتظار لمن يعلمهم ويثقفهم ويجد لهم عملا ويزوجهم ووووو
إلى آخر ما حدث
أما بخصوص السور فحديث لم أفهمه جيدا حتى الأن
ولنا فى ذلك حديث آخر

حرروف يقول...

الف مليون سلامه عليكي بجد وحشاني والله العظيم انا عارفة اني مقصرة جامد

مش تزعلي

البوست بقا مسخرة حلو اوي اوي اوي اية الدماغ دية
لا بجد جامد

وحشاااني

الازهرى يقول...

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟