Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الاثنين، 27 سبتمبر 2010

تخيلوا مش لاقيالكوا عنوان يا بلوجرية !!!!

n751037039_2377307_5173

بدون أى مقدمات نفسي اسأل سؤال

هو النفاق و الكدب و الخداع و الخيانة ..الخ من الصفات اللى بقت موجودة فى عالمنا عادى كده

موجودة فى اى نوع بالضبط من البشر ؟؟

هل بلوجر أخد الصفوة الخيّرة بتاعت الدنيا و سايب الناس التانية الوحشة و مانعها من الدخول ؟؟

طب لو فعلا كده .. أمال المدونين اللى بيشتكوا و بالأخص فى الفترة الأخيرة من المدونين اللى ماسكين سيرة البشر على الشات و التليفونات جايبين الكلام ده منين ؟؟

خيالهم واسع مثلاً ولا ناس تانية هى اللى بتنتحل شخصية المدونين و تدخل تتكلم على لسانهم ؟؟

طبعا البعض إن ماكنش الكل- عرف إن شمس النهار تعرضت لقلة أدب من بعض المدونين اللى مش عندهم أى فكرة عن احترام الكبير و ماسكين سيرتها فى الشات و التليفون و عاملين يرسموا تخيلات لشخصيتها و حياتها

الكلام ده لو مع شخصية تانية غير شموسة كنت قولت ممكن أكون أنا مش فاهمة حاجة و فى حلقة ناقصة فى الموضوع

لكن لأني عارفة كويس شمس و عارفة كويس إنها عمرها ما بتدخل شات و المرة الوحيدة اللى عملتها لما كانت مسافرة و كان لازم أطمن عليها كنا بنعانى و هى بتتكلم و هما خمس دقايق بكتيره

و عارفة كويس قوى و اللى متابع شمس عارف بردو إنها عمرها ما خلت حياتها مشاع زى بعض المدونين و فضلت تطلع أسرار بيتها بره على المدونة و المرة الوحيدة اللى كانت بتتكلم فيها كانت يا إما سؤال سأله جوز بنتها أو توتا لموقف حصل فى اللقاء

غير كده أتحدي أي حد يقولى شمس النهار كتبت بوست و حكت قصة حياتها أو موقف فى حياتها الشخصية

عمرها ما هرجت مع أي حد تهريج خارج بالعكس عامله حدود للتهريج و الكلام مع الصغير قبل الكبير

ولا هى لازم تكون زى المدونين اللى أخده بلوجر و الشات مصطبة و قلبوهم قعدات حريم و رجالة .. الحمد لله دلوقتى الرجالة بقت أنيل من الحريم فى قعدات المصاطب

المصيبة بقى لما الحاجات دى تطلع من ناس المفروض إنهم قدوة لينا .. و من ناس للأسف المفترض إنهم محترمين على المدونة بس مسافة مايروحوا الشات بيتقلبوا 180 درجة

فى المدونة قال الله و قال الرسول و هما أكتر ناس لا بيطبقوا كلام ربنا ولا الرسول

انا عمرى ما تخيلت إني ممكن أنزل بوست كده فى المدونة رغم إني اتأذيت كتير من البعض و اللى كان دايماً بيمنعنى من الكلام إنه يا اما اللى هرد عليهم كبار و أنا الصراحة أهلى مربيني على احترام الكبير حتى لو هو مش محترم .. يا اما من صغيرين و مراهقين و لسه مش بلغوا سن الرشد العقلى فدول عمري ما كنت هنزل نفسي لمستواهم

أما بقى لما يحصل ده فى حد كبير فى السن و محترم جدااا يبقى هنا لازم وقفة مع قلة أدب بعض المدونين سواء كبار أو صغيرين

الغريبة بقى فى الموضوع بردو لما شموسة تنزل إن ناس بعتت شتايم على الميل عندها و ناس بتدخل عندها و تكلمها فى التليفون و فى ضهرها بيجيبوا سيرتها .. و نيجى بقى للتعليقات على البوست اللى بالشكل ده مافيش شخص واحد غاب عن الرد وهما هما الأشخاص اللى بيدخلوا كل مرة

الله أمال مين اللى بيعمل ده و بيتكلم عليها ؟؟؟ ولا هى جايبة كلام من بره و بتتهم بيه المدونين يا حرام ؟؟

ولا هو النفاق خلاااااص لزق فيكم لدرجة إن الكرامة انعدمت عندكم .. أصل للأسف الناس اللى بتعمل كده معروفة بالاسم بس اللى مانع شموسة إنها مش من نوع اللى بيقعد على المصاطب علشان تشرد فى المدونة و تدخل فى حلقة من الردح زى ما بيحصل من البعض

فياريت لو بجد الناس دى عندها ذرة من الدم و الكرامة تحترم نفسها و تبعد عنها و تخرج من المدونة عندها و تمسح تليفونها .. لان بجد منظركم بقى غبي قوى

و ياريت الناس بتاعت شات المصاطب يتلموا شوية و اذا كانوا فاكرين إن كلامهم مش بيخرج بره شباك الشات يبقوا موهومين .. لان كل كلمة بتتقال فى الشات المجموعه كلها بتكون عارفاها

و اللى أخدين التليفون مصطبة بردو ياريت يعرفوا إن كل كلمة بتتقال أثناء المحادثة مسافة ما بتتقفل بتوصل بردو للمجموعة كلها

أمال احنا عرفنا منين أسماء اللى اتكلموا على شموسة ؟؟

فياريت بقى كل واحد يخليه فى عياله و بيته أو شغله و يهتم بيهم و يسيب الناس فى حالها

ممكن المرة دى حظكم وقع مع ناس مابتحبش اسلوب المصاطب .. لكن مين عارف المرة الجاية هتقعوا مع مين ؟؟ ولا هيعمل فيكم ايه على العام ؟؟

ربنا يهديكم لنفسكم و يخرب الكيبورد بتاعكم لو مابطلتوش انعدام الدم ده و فضلتوا بردو تدخلوا عندها و تحاولوا تتكلموا عليها

انا عمرى ماشوفت نفسنه بالشكل ده .. صدقونى مهما تعملوا عمركم ماهتوصلوا لمستواها أبداً أصل دى حاجة فى الدم

و الأصل الانسان بيتولد بيه مش بيكتسب ابداااااااااااا

:)

هناك 34 تعليقًا:

أنا - الريس يقول...

بعد السلام والتحية
طبعا ان مش هقول اي حاجة لأن الناس دول خسارة يترد عليهم لانهم مرضي نفسيين .
ثانيا سلمي لي علي شموسة المدونات العربية وقولها بسام بيقولك



(( وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ{155} الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّـا إِلَيْهِ رَاجِعونَ{156} أُولَـئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَـئِكَ هُمُ الْمُهْتَدُونَ{157} )) البقرة

وكله متحوش عند الذي لا ينسي الخير ولا الشر .

بلغيها سلامي

أنا - الريس يقول...

قال تعالى ( وتحسبونه هينا وهو عند الله العظيم ) .

قال الله تعالى: (إِنَّ الَّذِينَ يَرْمُونَ الْمُحْصَنَاتِ الْغَافِلاتِ الْمُؤْمِنَاتِ لُعِنُوا فِي الدُّنْيَا وَالآخِرَةِ وَلَهُمْ عَذَابٌ عَظِيمٌ) (النور/23).

أنا - الريس يقول...

وإِن لم أصن جاري بكل صيانة * أصون بها عرضي فمالي من عرض

-------
وقال اخر

يا فضلةَ الماءِ في الإناءِ إذا * ما الكَلبُ فيهِ لسانه وَلغا

إن نِلتَ من عِرضي المحالَ فمن * يجيب من قال باطِلا وَلغا

وأنتَ عندي أذَلُّ من جمل * أَثقله وِسقُ حِمله فرغا

إن كنت في هجويَ ابتدأتَ فمِن * هجائك اللّؤم منه قد فَرَغا

-----------
وقال اخر

وساقط نال من عرضي فقلت له * اليك عني فليس السب من شيمي

أعرضت عنه ولو أني عرضت له * سقيته حمة الأفعى من الكلم

----------

فوا أسفي لو كنتُ للمالِ مبقياً * لما مزّقت عرضي براثنُ أنذال

--------

معلش انا من ضقتي معرفتش اجمع رد واحد فاعذروني علي الثلاث ردود .

Sweet Violet يقول...

الريس
^^^^^
فعلا هما مرضي بس للأسف المرة دى زاد مرضهم قوووى و كان لازم يترد عليهم
بس يارب يفهموا و يكون فى شوية كرامة

و حاضر هوصلها سلامك
اما عن الردود ولا يهمك المدونة مدونتك
:)

Butterfly يقول...

انا مش عارفه ايه الموضوه ولا ايه اللى حصل
بما انى بعديه بقالى فتره
كل اللى اقدر اقوله
ربنا يهدى الجميع

Sweet Violet يقول...

Butterfly
^^^^
يارب يهديهم او يبعدهم
:(

adel يقول...

من كان منكم بلا خظيئة فليرجمها اولا

والانسان يري القشة اللي في عين اخوها وميشوفش الخشبة اللي في عينه

دول ايتين من الانجيل بتصرف
معناهم واضح

كلنا بنغلط و انا مش بقول ان شمس اصلا بتعمل شئ غلط
ولا بدافع عن الغوغاء-اي كان هما مين- اللي عملوا كده
وهما غوغاء لان دي تصرفات ناس مش طبيعية و اقل ماوصف بالدونية

بس فعليا ياجماعة اللي فيكم مش بيغلط يجي يخاسبها و بدل ما يستخبي ورا كيبورد باسم مستعار و حياة مستعارة تماما
يطلع للمواجهة بما انه متاكد انه صح

بس اللي بيتولد في الضلمة بيموت في الضلمة
ميستحملش يطلع للنور ولا يعرف الناس المحترمة

اللهجة حادة بس انا عذرك عشان انا عارف انكم اكتر من قريبين و ده يقول ان لسه في ناس كويسة و بتخاف علي بعض

واعتقد بالنسبة لناقلي الكلام بقي وده موضوع تاني اصلا : ياريت نتبين الكلام اصله فين و رايح فين
لان بعيدا عن شمس
ففي كلام كتير بيتنقل بيبقي يخص ناس و مدونات وعيب قوي
لان مظنش حد يرضي كده علي والدته او علي اخته و الدنيا بتلف
واللي هيطلع كلامه هتتطلع عليه من وراه من نفس اصحابه
واللي بينقل كلام مش عارف صح ولا غلط بكرة هيطلع عليه كلام ومش هيفرق صح ولا غلط لانه هيسمع برضه زي ما حصل بسببه

P A S H A يقول...

الفاضلة / سويت ﭬيوليت

إزيك ؟
يا رب تكوني بخير إن شاء الله

إذا سمحتِ لي أنا ليا رأي في الموضوع ده .. جايز يكون مختلف شويه عن الزملاء الأفاضل اللي سبقوني بتعليقاتهم وأثرت الموضوع بدون شك .. جزاهم الله جميعاً وجزاكي كل خير على مشاعركم الصادقة الطيبة . آمين

مش هاقدر أتكلم عن الموضوع لإني ما كنتش طرف فيه ولا حضرته بنفسي - ومش باشكك في مصداقية كلامك والله العظيم أبداً - أنا عرفت الموضوع بالصدفة من هنا .. ووضح لي البوست اللي قريته عند الأستاذه / شمس النهار .. والتي مكانتها عندنا أسمى من أي كلام يوفيها حقها.

لكن دي رابع مرة أصادف نفس الموقف خلال شهور وبرضه باسمع طراطيش .. وفي النهاية تقيد الواقعة ضد مجهول !!
- الأول / زميل فاضل يهدد ويتوعد شخص ما في مدونته – لم يذكر اسمه وقتها – ثأراً لبعض الزميلات الفضليات .. كان هذا الأخير مصدر إزعاج لهن .. ووصل الأمر – على حد قوله - لتسجيل مكالمات تليفونات وأحاديث على الشات .. إلى أن قامت إحدى الزميلات بفضحه علانية على صفحات مدونتها .. ثم العفو عنه علانية أيضاً بعدما أعتذر لها ........... مااااااااااااااااااشي
الثاني / زميلة فاضله .. تشكو في إحدى اللقاءات من التصرفات الصبيانية لمدون – لم تذكر اسمه - لم أحضر الموقف أيضاً ولكني أثق في روايتها – وما دفعها على كتمان الموضوع .. هو إنها أخذت منه موقف حاسم جعله يكفها أذاه .. وحرصاً على سمعتها من القيل والقال على صفحات الشات والتليفونات ............... مااااااااااااااااااااااااشي
والثالث / زميلة فاضلة .. منهارة من مطاردة أحد الأشخاص لها – ولا تعرفه ولا يعرفها - في المدونة والفيس بوك .. ويبتزها ببعض المعلومات والإشاعات التي قد سمعها عنها من آخرون !! وكانت قد كتبت بوست في مدونتها تهدده فيه ثم حذفته خشية على سمعتها ........ ماااااااااااااااااشي
الرابع / هذا الموقف !
---- يتبع ----

P A S H A يقول...

1- أنتِ عارفه إنك بالبوست بتاعك ده ممكن تكوني حطيتي كام واحد موضع شبهات ؟؟
2- عارفه كام واحد – وأنا من ضمنهم – بيضرب أخماس في أسداس ؟؟ وبقى كل بريء عاوز يدخل علشان يحلف ميت مليون يمين إنه مش هو اللي عمل كده ! .. وإنه ما يعرفش أ/ شمس النهارخالص – حتى لو يعرفها – ولا معاه رقمها عشان ينفي عنه الشبهة ؟؟ .. وإن أكثرهم – وبرضه أنا من ضمنهم – قد فكر أكثر من مرة وتراجع عن كتابة أي تعليق .. خشية أن يقال عليه – وهو برئ - : اللي على راسه بطحه !! .. وأصبح كثيرون مطالبون بالدفاع عن أنفسهم في جريمة لم يقترفوها .. وعن ذنب لم يذنبوه !! .. في حين .. إن الفاعل .. ولا هو هنا أصلاً .. عشان عارف إن خجلكم وأدبكم وحياءكم هايمنعكم – زي ما منع كتير قبلكم تعرضوا لذات الموقف ومحتمل اسوأ – إنكم تشهروا بيه .. أو حتى تلمحوا مجرد تلميح !!
3- هاتقولي لأ !! .. الناس المحترمه معروفه واللي مش محترمه برضه معروفه وما حدش جاب سيرتك ولا سيرة غيرك ؟؟ .. ماهي دي المشكلة !! .. طب وأنتي تعرفي اللي بيقرا دماغه هاتروح فين و في مين ؟؟ .. أو عاوز يصدق إيه ؟؟ .. أو بيدور على إيه عشان يتكلم فيه ويزود عليه من عنده عشان ينقله لحد تاني ؟؟ .. هل أنتِ عامله في مدونتك مضاد للخبثاء والمتطفلين وذوي النوايا السوداء والـ ..... ؟؟
4- طب إفرضي .. مجرد إفتراض .. إن شخص وقح وبذئ ومعتوه .. شاء سؤ حظنا إنه يكون عنده مدونة .. وجه كتب كده علانية : أنا قطعت علاقتي بالمدوِنة الفلانية – دون ذكر اسمها - لإني اكتشفت أن سمعتها مش كويسه !! .. بالله عليكي موضوع زي كده ممكن يستفز كام بنت !! .. طبعاً البنت الشريفة العفيفة ولا هايهمها ولا هاتتأثر ولا هاتفكر ترد .. مظبوط .. بس هاتبقى إدت الفرصة إن الإشاعة تزيد .. مش بالتكذيب لكن بالسكوت عنها !!
5- هل أنا لو عملت بوست زي ده هابقى حليت المشكلة ؟؟ .. هل أبقى جبت حق أ/ شمس النهار وكثيرات غيرها سبق الخوض في سيرتهن وإزعاجهن والتطاول عليهن بما لا يليق ؟؟ .. هل قدرت أجيب حق بنات ناس كثيرات ومن أسر محترمة وقعوا فريسة – دون ذنب - لإنسان غير مسئول ؟؟ .. هل أبقى قدرت أحررهن من الخوف ؟؟ .. من فضيحة جريمة لم يقترفوها أو يكن حتى مجرد شريكات فيها ؟؟ .. طبعاً لأ
6- لو هانفترض جدلاً .. إن فيه 10 بنات بيتم التحرش بهن كل يوم في القاهرة .. في وسائل المواصلات والشارع وخلافه .. لو واحدة بس راحت القسم وعملت محضر تفتكري هايبقى فيه تحرش بعد كده ؟؟
7- طيب .. فيه كمان نقطة مهمة .. خلينا نستبعد أ/ شمس النهار من الموضوع .. ونحط أي واحدة تانيه مكانها .. سين أو شين أو نون من البنات المحترمات اللي ما حدش في بلوجر كله يعرفها ولا عمره شافها .. وإنفعالها من بشاعة موقف مشابه حصل لها في حياتها دفعها إنها تكتب بوست زي ده .. تفتكري .. بتوع المصاطب مش هايجيبوا سيرتها ؟؟ مش هاتبقى مصدر جديد للتسلية ما بينهم ؟؟ .. ولو ألف واحد تعاطفوا معاها وصدقوا روايتها .. هاتلاقي عشرة على الأقل بيتهموها وبيزودوا على الكلام اللي قالته .. واحنا شعب عاطفي وبنصدق أي كذبه بشرط تتحكي كويس .. ويا سلام لو من شخص معروف ومفترض إنه محل ثقة .. بناخد كلامه قرآن !!
8- مممممممم .. باعتذر جداً عن اللغة الإنفعالية في التعليق .. ومش باقلل من قيمة مجهودك والله العظيم .. بس الموقف مستفز لأقصى درجة .. ورد الفعل (.....) .. فكرني ببتوع السياسة : نشجب وندين ونستنكر !!! .. يمكن حبيت أناقش هنا موضوع كلنا معرضين ليه .. ما حدش مستثنى منه !! .. وما أقدرش أفرض رأيي على حد !! .. لإن كل واحد مسئول عن نفسه .. ولا أقول لك : احنا نعمل زي صبحي في المسرحية .. اكتبي اسامي كل المدونين الأبرياء وسيبينا نخمن :) .. أو قولي لنا على أسامي مدوناتهم وبلاش تقولي اساميهم عشان التشهير :) .. أنا جاي أهدي النفوس :)
---- يتبع ----

P A S H A يقول...

أاحترم جداً جداً جداً صمت أ/ شمس النهار .. ففيه أبلغ رد على ما حدث .. ربنا يا رب يكرمها ويروق بالها ويحفظها من كل سؤ اللهم آمين .. وأرجوها ألا تلتفت لما حدث .. "ولا تزر وازره وزر أخرى" صدق الله العظيم .. معلش اصبري واحتسبي .. هو المؤمن دايماً مصاب .. وباقول لها إن فيه ناس كتير بتحبك ويعز عليها زعلك يا ست الكل .. يا شمس التدوين كله :)
ملحوظة صغننة : والله العظيم تلاته ما أنا يا ست الكل إلهي يا رب الويندوز بتاعي يقع لو كنت طرف في الموضوع :).. أنا أصلاً أصلاً ما اتشرفتش باسم حضرتك .. وما شفتكيش غير دقايق يوم لقاء الزراعيين من شهور :)
كلمة أخيرة : هل يوجد أسوأ مما نحن فيه ؟ .. بالطبع ! .. الإستمرار فيما نحن فيه !
"إبراهيم عيسى"

*******


شاكر حسن إستضافتك وسعة صدرك أختي الكريمة
دمتي بكل خير
خالص تحياتي وعميق تقديري وإحترامي
:)
شريف

قلم رصاص يقول...

يقول تعالى :

(ويمكرون ويمكر الله والله خير الماكرين)

صدق الله العظيم

ربنا يكفينا شر هؤلاء
وربنا قادر على المنافقين

كل تقدير وتحيه لموقفك النبيل مما حدث ويحدث من امثال هؤلاء

تقبلي مروري وتحيتي

Sweet Violet يقول...

عادل
^^^^
ماهي دى المشكلة ياعادل
ان كل واحد شايف نفسه ملاك و مش غلط
والصراحة اللوم مش عليه بس
اللوم على الناس اللى مصممة ان فى ملايكة على الارض و بتفضل تأكد للشخص ده انه ملاك
لحد مايصدق لدرجة انه ممكن ياخد دور منقذ العالم و يخلص البشرية من شرورها
:\

اللى بينقل كلام او بيتكلم على حد مابيهموش الدنيا بتلف ولا لأ
هو عارف كويس كما تدين تدان لكن نفسه بتخيله انه فوق ده كله
:\

لازم اللهجة تكون كده مع النوع ده ياعادل
لان الواحد خلاااااص جاب اخره منهم
:(

Sweet Violet يقول...

باشا
^^^
انا بخير الحمدلله
و يارب تكون انت كمان بخير

*****
انا مش بحط حد فى الشبهات على فكرة
اولا: انا ذكرت في البوست ان الكلام لأشخاص معينة و انا قولت انهم معروفين بالاسم
غرض البوست اني افهمهم انهم معروفين و بلاش النفاق اللى بيحصل
ان كل واحد يراجع نفسه بعد ماشاف البوست اعتقد انها حاجة كويسة مش وحشة
لان ممكن يكون قال كلمة مش قاصد منها حاجة تكون عملت مشكلة
اوقات كتير حسنة النية بتكون شعلة للضرر اصل النية ربنا بس اللى يعرفها
اما البشر فدول ليهم حسابات تانية .. و علشان ابعد نفسى عن الشبهات يبقى لازم احسب كل خطوة بعملها مع البشر

ثانيا :موضوع ان كل واحد يدخل يحلف انه مش هو و الكلام ده
صدقني انا مش عاملة محكمة للمدونين ولا حتى اللى غلطوا
انا زى ماقولت هما معروفين يعنى ماحدش محتاج يدخل يقول والله مش انا اللى عملت
البوست رسالة ليهم فقط .. انهم يبطلوا اللى هما بيعملوا لانهم مش زى مافكرين بيتعملوا فى الخفاء
لا هما خلاص ظهروا للنور و اتعرفوا المفروض بقى يحافظوا شوية على اللى فاضل من منظرهم

ثالثا : انا فى العادى لما ينزل بوست ماببقاش عارفة اللى بيقرا دماغه رايحة فين
و لكن انا مش مطالبة ياشريف اني ادخل فى دماغ الجميع
انا ياما بوستات اتفهمت غلط لما نزلتها بس كل واحد حر
لان البوستات فى المدونة انا مقتنعه جداا ان كل واحد بيقراها حسب اللى هو شايفه
مش حسب المقصود فعلا
اما بقى اللى ممكن هنا حد يدخل و بيدور على حاجة يتكلم فيها يبقى ده من الاشخاص اللى انا اتكلمت عليهم فى البوست
يعني مش هيلاقى حاجة يتكلم فيها
انا مش عاملة فى المدونة اى انتى فيرس لكن انا جربت الصمت قبل كده معاهم و للأسف افتكروا انه ضعف و ان ماحدش عرفهم .. الخ
فكان لازم يترد عليهم علشان بعد كده يعرفوا ان السكوت عمره ماكان ضعف او عدم معرفة
النوع ده من الناس لازم يقف عند حده لان السكوت قصاده بيكون ذنب

اعذرنى مش معاك ان البوست ده كده مش جاب حقها ولو جزء بسيط طبعا
لان اللى حصل لها و اللى مأثر عليها لحد الان مش سهل
لكن البوست ده اضعف الايمان ماهو انا عمرى ماهنزل ولا انا و لا هي لمستواهم علشان نتكلم معاهم بنفس اسلوبهم الغير متحضر بالمرة
ولا عمرنا هنبقى زيهم و نتكلم عن اللى بيعملوا ووقتها هيكون كلام بدليل و هيكون طالع من لسانهم
لكن انا دايما مقتنعه ان كل واحد حر فى حياته بشرط ان الحرية دى ماتجيش على حسابى انا
البوست ليس الا تحذير ليهم لان الاسامي معروفة توضيح امور يعنى

بص ياشريف اننا شعب عاطفي معاك فيها
لكن مش علشان الشعب اللى انا فيه عاطفي يبقى اسكت عن حقي او حق اللى يخصنى
و حتى الكتابة اتمنع منها علشان خاطر النوعية دى من الناس
اللى عايز ياخد تسلية ياخد و اللى عايز يدخل يتكلم تانى يتكلم
انا مش هخرس الناس .. لكن هحذر اللى بيتكلم
ولو مش رجع عن اللى هو فيه و استمر يبقى مش يلوم غير نفسه
اللى انت بتقوله ده اسمه سلبية علشان ماديش فرصة لحد يتكلم يبقى ماردش اصلا على اللى بيتكلم قبله
ولا انى ادافع او احكى عن موقف
بص ياشريف انا اول بوست نزلته لهنية معظم اللى دخل افتكر ان انا هنية و الحكاية تخصنى وا تفتح الشات عليا
هل ده معناه انى امنع بقى انزل هنية او حتى اكتب حاجة و كل مااجى اكتب انزل تنويه ان الحاجة دى مش تخصنى ولا تخص حد بعينه
لا كل واحد بتفكيره و فى اللحظة دى التفكير المريض بيظهر و بيتعرف

انا مش عملت اى مجهود علشان يتقلل منه ياشريف
و ياسيدى لو على صوتك العالى فى المدونة ولا يهمك المدونة مدونتك
اتكلم زى ماانت عايز فيها
:)
بس على فكرة انا مش عملت زى الحكومة
اصل انت شايف اول طالعه او قرصة الودن ليهم
حد عالم بقى لو ماحدش لم نفسه ايه هيحصل ؟؟؟

المؤمن دايما مصاب
الواحد مش معترض عليها
بس الكلمة دى اخدنها للأسف مبرر لسلبياتنا
علشان كده الوحش كتر و بقى براحته و الكويس بقى جنب الحيط
علشان المؤمن دايما مصاب !!


نورت ياشريف المدونة
بحضورك و تعليقاتك
:)

Sweet Violet يقول...

قلم رصاص
^^^^

صدق الله العظيم

اللهم امين

نورتنى
:)

همسات وبحــ الحياه ــر يقول...

لاتأسفن على غدر الزمان لطالما رقصت على جثث الاسود كلابا وتحسب برقصها تعلو على اسيادها ولكن تبقى الاسود اسود والكلاب كلاب

ربى انى مغلوب فأنتصر

علفكرة مدونتككك حلوة والتانية حلوة اوى اوى
تحياتى

مـجـنـووون يقول...

والله انا لي رائي في الموضوع ده

كان لازم الموضوع ميكبرش بالشكل ده واحسن رد علي الناس الزبالة دي هي انكم متعبرهمش ولا تعمللهم قيمة

( ولو كل كلب القمته حجرا لاصبح مثقال حجراً بديناراً )


ثانيا :
طول ما انتم اتكلمتوا في الموضوع يبقي لازم تقولوا اسماء الناس دي علشان الناس تعرفهم وتحذر منهم وكل واحد يعرفهم يحتقرهم ويعملهم بالمثل

ده رائي المتواضع
وحسبي الله ونعمة الوكيل في كل واحد يتكلم علي واحدة او واحد ويجيب سيرتهم بحاجه مش حلوه

تقبلي مروري
مجنووون

الميكروباص يقول...

أولا: البلوجر لم يأخذ الصفوه، لكنه اخذ مجموعات من الناس بيفكروا زي بعض -أو قريبين من بعض- او ان الواحد نفسه يقابلهم ويشوف مثلهم في العمل وبره البيت لكنه مستحيل فوجدهم على البلوجر، والتجمعات دي يمكن هي السبب في تقليل شعور الوحده عند الناس او انهم بيعرفوا ان فيه ناس بتفكر مثلهم وسط الزحمه والمشاكل الرهيبه الموجوده دي
ثانيا: انا مرة واحده دخلت عليا في مدونه الاتوبيس ونزلت فيا شتيمه، ومسحت بيا الارض امام الناس،وواحد تاني دخل مدونة الميكروباص وسب الدين لي ولأمي وعائلتي، وغيره وغيره وغيره
وده بيدل على انه في كل مكان الناس والقذره موجوده
ولو اعطيت لهم الحريه ولم تعمل اشراف على التعليقات هايسوقوا فيها
ولهذا السبب الناس بيعملوا اشراف على التعليقات
وده يثبت اننا اميين- لو اخدنا حريتنا هانبوظ الدنيا

محمد أبو الفتوح غنيم يقول...

أنا مش فاهم أي حاجة

:)

بس بجد ميصحش

sweet angel يقول...

ادخلي شوفي اخر 5 مواضيع عندي

ربنا يهدي الجميع

Sweet Violet يقول...

همسات وبحــ الحياه ــر
^^^^^

ربنا يخليك ياقمر ده من ذوقك
:)

نورتيني
:)

Sweet Violet يقول...

مجنووون
^^^^
للاسف جربنا الطريقة دي لكن مانفعتش معاهم
:\

لا طبعا ماينفعش اذكر اسماء لان كده ايه الفرق بيننا و بينهم ؟؟
الموضوع ليس الا توضيح للي سمع و تحذير للي اتكلم
و اما نشوف اخرتها ايه معاهم

نورتني
:)

Sweet Violet يقول...

لورنس العرب
^^^^^
ايوة انا معاك لكن هل ده معناه ان كل اللى في بلوجر ملايكة مش بشر ؟؟
هل بلوجر بقى المدينة الفاضلة ؟؟؟

فعلا احنا لسه مافهمناش الحرية صح
علشان كده بنستخدمها غلط
:(

نورتني
:)

Sweet Violet يقول...

محمد أبو الفتوح غنيم
^^^^^
هههههههههههههههههه

اومال ايه اللى مايصحش ؟؟

نورتني
:))

Sweet Violet يقول...

sweet angel
^^^^^
دخلت
:(

فعلا ربنا يهدي الجميع

نورتي
:)

ميرو انتكة يقول...

ربنا يهدي الجميع

تحياتي

Adabclub يقول...

بعد التحية
مدونة رائعة
اردت فقط ان اسجل مروري

Foxology يقول...

يا خبر ابيض !!

الغريبة اننا لما كنا مع شمس كنا بنقول نفس الكلام ان فى ناس على البلوج بوش وبرة البلوج بوش تانى ودى حاجة عاملة زى ماكيت كدة للحياة العادية

انا بعتبر الناس اللى من النوعية دى مرضى نفسيين فعلا ولا تعليق

rack-yourminds يقول...

بصراحه المفروض ان المدون يحاول بقدر الامكان يبعد كل تفاصيل حياته الشخصيه عن مدونته ,لانه فيه نوعيات من المدونين قد تستغل تلك المعلومات وتسئ الي صاحبها
____________

بخوص الاخت شمس النهار فياريت لا تبالي لتلك النوعيات من المدونين وان شاء الله ربنا يعينها ويصبرها علي تلك الاساءاءات

_____________

فيه مدونين مهووسين بالشات ويتخذون المدونه جسر لها
__________

تحياتي وسلامي

طوبه فضه وطوبه دهب يقول...

شموسه مش محتاجه حد يبرر موقفها لانها باختصار ام واخت كبيره وقمه الادب والاحترام ومفيش كبير ولا صغير فينا ما بيحبهاش اما المرضى النفسين دول موجودين فى كل حته وكل مكان يارب تكون بخير ويكفى ان كل اللى بيحبوها عرفنها كويس جدا

Sweet Violet يقول...

ميرو انتكة
^^^^^^
اللهم امين

نورتي
:)

Sweet Violet يقول...

عمار مطاوع
^^^
اهلا بيك في المدونة

نورتني
:)

Sweet Violet يقول...

Foxology
^^^^
فعلا هما مرضى نفسيين
بس للأسف افعالهم بقت كتير و لا تحتمل
:(

نورتني
و بجد سعيدة انى اتعرفت على اينو و عليك
:)

Sweet Violet يقول...

rack-yourminds
^^^^^^^
للأسف حتى اللى مش بيقول حاجة عن حياته زى شمس النهار بردو بيحصلوا كده
:(

*****
فعلا فى كتير دخلوا التدوين علشان كده و بس
ربنا يبعدهم عنا و يهديهم
و بخصوص الكلام اللى خاص بشمس ان شاء الله هيوصلها
:)

نورتني
:)

Sweet Violet يقول...

طوبه فضه وطوبه دهب
^^^^^^^
فعلا هى مش محتاج اى مبرر
و الدليل ان البوست مش برر اى شئ هو بس تحذير ليهم لانهم اتعرفوا خلاص
:D

هي بخير الحمدلله و ان شاء الله راجعة قريب
:)

نورتيني
:)