بقى كده يا ست هانم .. هنية تتعب و ماحدش يسأل عليها .. ماكنش العشم و الله ده انا قولت ان عم محمد البوسطجى هيزهق من كتر الجوابات اللى مبعوتالى .. يلا حصل خير ماهو انتوا بردو معذورين و مشغولين بالمشاكل اللى بتحصل فى البلد اللى الواحد مش عارف هتخلص امتى .. الله يكون فى عونكم
ألا صحيح يا ست هانم مش انتى بتقولى ان فى ناس متنورين زى اللى بنشوفهم فى التلفزيون كده بيقروا كلامى ؟؟
طب قوليلهم يا ست هانم هنية مش هتحكى حاجة المرة دى هى بس عايزة تسأل كام سؤال محشورين فى زورها و ياريت ينورونى وحد فيهم يرد عليا
يوم الجمعه الشيخ بتاع الجامع قعد يسأل الشباب هما ليه متجوزوش و انهم كده هايخشوا النار .. هو يا ست هانم شيوخ الجوامع عايشين معانا فى البلد دى بصحيح ولا هما جايين منين ؟؟
و لا هو يا ست هانم مشاكل البلد خلصت و الحياة بقت فل و الشباب هو اللى بيدلع ؟؟
ولا بتوع التلفزيون اللى كل كلامهم صوت الحريم حلال ولا حرام و ان النقاب لازم ولا لا .. هو يعنى يا ست هانم خلاص بقينا بنراعى ربنا فى كل حاجة و مافضلش إلا الحاجات دى .. يعنى خلاص مابقاش فيه سرقة ولا كدب و العيشة بقت تمام و الفقر راح و كل حاجة بقت حلال فى البلد علشان نتكلم فى الصوت و النقاب ؟؟
و بمناسبة صحيح التلفزيون – ماهو الله يسامحه التعب حوجنى ليه – أمبارح واحد من الناس المثكفين فضل يقول مصر بتتقدم مصر بتتقدم .. يعنى ايه يا ست هانم يعنى خلاص هتتجوز واحد بن حلال ولا بردو هتاخد واحد من نفس العيلة "بنت الناس الطيبين" دول ؟؟
و لا هو يقصد بأن مصر بتتقدم ان ممكن يعنى نقوم من النوم نلاقى مصر بقت فى السعودية ؟؟
اصل الصراحة يا ست هانم انا مش عارفة ازغط الكلمة اللى قالها بعد كده .. علشان كده انا مش فاهمة
اصله بيقول مصر بتتقدم و البلد بيتصلح حالها .. بيتصلح حالها فين بس يا ست هانم ولا مين اللى بيصلح حالها ده .. اشحال مش عارفين يصلحوا مسورة المية المكسورة و قاطعين الميه علينا بقالهم اسبوع هيعرفوا يصلحوا حال بلد بحالها ؟؟
هى الناس دى عايشه معانا بصحيح يا ست هانم ولا هما قصدهم علي مصر غير مصر بتاعتنا ؟؟
ولا اقلب لقناة تانية ألاقى خناقة مابين المسلمين و بعضهم و المسحيين و بعضهم و المسلمين و المسحيين على ايه بقى ؟؟ على ان العدرا ظهرت ولا لا ؟؟
يعى انا عايزة افهم حاجة المسلمين و المسحيين اللى بيقولوا انها ظهرت ماشى ظهرت ايه بقى التغيير اللى حصل ؟؟ يعنى مثلا مشكلة العيش انتهت و الناس بقت عارفة تعيش ولا اللى بيقولوا عليها دى اسمها ايه ..آآه الفتنه الطائفية خلصت و بقينا بنحب بعض و مافيش نفسنه ما بينا ؟؟
و اللى بيقولوا انها ماظهرتش ماشى ماظهرتش ايه بردو التغيير اللى حصل ؟؟ هو احنا خلاص مابقاش فى حاجة نتكلم فيها فبقينا بنتخانق مع بعض و خلاص ؟؟
ولا موضوع السور اللى بيتعمل فى سينا هو راخر .. يعنى سؤال بس يا ست هانم هو الريس بتاعنا مابيفهمش إلا فى الطوب و الاسمنت و الحديد ؟؟ اصل كل ماحد بيتكلم يقولك انجازات الريس، طيب ايه هى يا عم الحج.. يقولك عملك كبارى و صلحلك الشوارع و اهو بيعمل سور !! .. أصل لو مابيفهمش إلا فى كده يبقى الراجل عداه العيب بردو و مافيش لوم عليه و يشكر انه مابيحبش يفتى فى حاجة مش عارفها و بيصلح اللى بيفهم فيه .. و نبقى ندور احنا بقى على ريس يمسك معاه بس يكون بيفهم فى حكم الشعب و معيشته
و الناس اللى بتقول مش عايزين السور ولازم يتهد .. كانوا فين الناس دى لما الحكومة كانت بتبنى السور علينا احنا و ماقلوش ليه يقف ولا يتهد و سيبينه يعلى لحد ماقرب يوصل للسما ؟؟ ولو هما الفلسطنين ولاد مصر و احنا ولاد (دول) ؟؟؟
ولا الحكومة اللى بتقولك السور علشان نحمى البلد طب و شعب البلد مابتحمهوش ليه ولا هما شغلتهم حماية الاراضى وبس .. طب حد يدلنا على حكومة شغلتها حماية شعب البلد من اللى بيحموا ارض البلد و احنا نجبها
و كله كوم بقى و اللى طلع يقولك ان البلد فيها شغل بس الشباب هو اللى بيدلع .. صح يا ست هانم الشباب هو اللى بيدلع بأمارة ابلة جيهان اللى بتدلع اخر دلع .. ابلة جيهان دى المفروض انها مدرسة فضلت تدور على شغل و مالقتش و لما عرفت ان خلاص مافيش فايدة و مش عارفة تعيش اشتغلت فى البيوت .. لا يا ست هانم مش بتعلم ولاد الناس فى بيوتهم دى بتشتغل عند ولاد الناس فى بيوتهم يعنى بتمسح و تنفض و تطبخ و بدل ما هى اسمها ابله جيهان بقى اسمها الشغالة جيهان و يقولك الشباب بيدلع و مصر بتتقدم
صحيح صدق اللى قال
ازاى يابا اكون متعلم .. قاله تعالى فى الهيافة و علم
