الى اصحاب النوايا الحسنة .. ارحمونا !!

 

اتنين اصحاب واحد منهم فى ناموسة علي خده عمالة تمص فى دمه قام التاني عايز يقتلها راح "طراااااااااااااخ" علي خد صاحبه .. يا تري صاحبه اللي اخد "قلم معتبر" فى لحظة الغضب هياخد بالفعل و لا النية ؟!!

.....

موظف بيكره مديره لكن لان مديره "اهبل شوية" فوجوده مفيد ليه لأنه بيعمل مصالح من الباطن على حسه .. و فى يوم مديره بيعدي جت عربية فجأة بسرعه قام الموظف جري شد المدير و انقذه .. يا تري المدير "اللي تم انقاذ حياته " فى اللحظة دي هياخد بالفعل و لا النية ؟؟!!

......

واحدة بتعدي الشارع و مش واخدة بالها من الاتوبيس اللي جاي قام اللي وراها عايز ينقذها راح زققها علي الرصيف التاني فخروج عربية صغيرة من جنب الاتوبيس و "هووووب" قامت شايلاها .. يا تري اللي عملت الحدثة "لو فضلت عايشه " او اهلها " لو ماتت" هياخدوا بالفعل و لا النية ؟؟!!

.....

يا اصحاب النوايا الحسنة .. عمركم سمعتوا عن قانون للبشرية بيقول ( لكل " نية حسنة" بفعل سيء رد فعل مساوي"لها" فى المقدار ) ؟؟

و بما اننا بشر .. فالقوانين عندنا بتكون بالظاهر :

نية حسنة + فعل سيء = نية سيئة

نية سيئة + فعل حسن = نية حسنة

....

فى المواقف ( 1,3 ) لو الاشخاص عاقلين شوية و هيسمعوا ممكن يخففوا رد الفعل بعد ما عرفوا ان النية كانت حسنة .. لكن لازم هيكون فى رد فعل علي الفعل

فى الموقف (2) استحالة الموظف هيقول للمدير ده انا انقذتك لان حياتك مهمة بالنسبة لي .. فبالتالي المدير هيتعامل مع الموظف انه انقذ حياته بغض النظر عن النية اللي هيشوفها حسنة

...

يا اصحاب النوايا الحسنة .. ربنا وحده اللي بيحاسب علي النية لأنه اعلم بالداخل  .. ام البشر فاليهم الافعال الظاهرية لان ليهم الظاهر  "اللي مش دايما بيشفوه صح بردو !!"

فأرجوكم يا "اصحاب النوايا الحسنة " فكروا شوية فى الفعل علشان يترجم نواياكم صح .. يا اما اتحملوا نتائج افعالكم لو تسببت فى ضرر للأخرين .. لان النية الحسنة وحدها لا تكفي !!

و دمتم سالمين