Sweet Violet

مولاي انى ببابك لشيخ الابتهالات سيد النقشبندي

2011-01-09T06:44:00.000+02:00

علاقة مشوهة

2010-10-27T11:02:00.001+02:00

هو ...

يصطنع الهدوء

يصطنع عدم الفهم

يصطنع الغباء

و مش بعيد يكون

بيصطنع حبها !!!!

هي ...

عاملة مش واخدة بالها

عاملة مصدقة الكلام

عاملة مغيبة

ومش بعيد تكون

عاملة بتحبه !!!

يا تري دي تبقى حياة ؟؟!!!!

بحبكم يا اجمل اخوات واحلى صحبة

2010-10-05T10:12:00.001+02:00

* قلبنا على بعضنا ولا بيهمنا هنعيش ونشوف ياما

و بنحمد ربنا على المكتوب لنا و فى بعض بنتحامى

مع بعض للنهاية كل واحد ليه حكاية

اتعاهدنا من البداية انه يوم يوصلها

كدا اتعلمنا نبقى ويا بعض فى اى محنة

من زمان ماشينها و احنا مسلمينها لربنا

....

ربنا يخليكم ليا يا اجدع و اجمل اصدقاء و اخوات

* مقطع من اغنية سنين لمحمد فؤاد

تخيلوا مش لاقيالكوا عنوان يا بلوجرية !!!!

2010-09-27T20:09:00.001+03:00

بدون أى مقدمات نفسي اسأل سؤال

هو النفاق و الكدب و الخداع و الخيانة ..الخ من الصفات اللى بقت موجودة فى عالمنا عادى كده

موجودة فى اى نوع بالضبط من البشر ؟؟

هل بلوجر أخد الصفوة الخيّرة بتاعت الدنيا و سايب الناس التانية الوحشة و مانعها من الدخول ؟؟

طب لو فعلا كده .. أمال المدونين اللى بيشتكوا و بالأخص فى الفترة الأخيرة من المدونين اللى ماسكين سيرة البشر على الشات و التليفونات جايبين الكلام ده منين ؟؟

خيالهم واسع مثلاً ولا ناس تانية هى اللى بتنتحل شخصية المدونين و تدخل تتكلم على لسانهم ؟؟

طبعا البعض – إن ماكنش الكل- عرف إن شمس النهار تعرضت لقلة أدب من بعض المدونين اللى مش عندهم أى فكرة عن احترام الكبير و ماسكين سيرتها فى الشات و التليفون و عاملين يرسموا تخيلات لشخصيتها و حياتها

الكلام ده لو مع شخصية تانية غير شموسة كنت قولت ممكن أكون أنا مش فاهمة حاجة و فى حلقة ناقصة فى الموضوع

لكن لأني عارفة كويس شمس و عارفة كويس إنها عمرها ما بتدخل شات و المرة الوحيدة اللى عملتها لما كانت مسافرة و كان لازم أطمن عليها كنا بنعانى و هى بتتكلم و هما خمس دقايق بكتيره

و عارفة كويس قوى و اللى متابع شمس عارف بردو إنها عمرها ما خلت حياتها مشاع زى بعض المدونين و فضلت تطلع أسرار بيتها بره على المدونة و المرة الوحيدة اللى كانت بتتكلم فيها كانت يا إما سؤال سأله جوز بنتها أو توتا لموقف حصل فى اللقاء

غير كده أتحدي أي حد يقولى شمس النهار كتبت بوست و حكت قصة حياتها أو موقف فى حياتها الشخصية

عمرها ما هرجت مع أي حد تهريج خارج بالعكس عامله حدود للتهريج و الكلام مع الصغير قبل الكبير

ولا هى لازم تكون زى المدونين اللى أخده بلوجر و الشات مصطبة و قلبوهم قعدات حريم و رجالة .. الحمد لله دلوقتى الرجالة بقت أنيل من الحريم فى قعدات المصاطب

المصيبة بقى لما الحاجات دى تطلع من ناس المفروض إنهم قدوة لينا .. و من ناس للأسف المفترض إنهم محترمين على المدونة بس مسافة مايروحوا الشات بيتقلبوا 180 درجة

فى المدونة قال الله و قال الرسول و هما أكتر ناس لا بيطبقوا كلام ربنا ولا الرسول

انا عمرى ما تخيلت إني ممكن أنزل بوست كده فى المدونة رغم إني اتأذيت كتير من البعض و اللى كان دايماً بيمنعنى من الكلام إنه يا اما اللى هرد عليهم كبار و أنا الصراحة أهلى مربيني على احترام الكبير حتى لو هو مش محترم .. يا اما من صغيرين و مراهقين و لسه مش بلغوا سن الرشد العقلى فدول عمري ما كنت هنزل نفسي لمستواهم

أما بقى لما يحصل ده فى حد كبير فى السن و محترم جدااا يبقى هنا لازم وقفة مع قلة أدب بعض المدونين سواء كبار أو صغيرين

الغريبة بقى فى الموضوع بردو لما شموسة تنزل إن ناس بعتت شتايم على الميل عندها و ناس بتدخل عندها و تكلمها فى التليفون و فى ضهرها بيجيبوا سيرتها .. و نيجى بقى للتعليقات على البوست اللى بالشكل ده مافيش شخص واحد غاب عن الرد وهما هما الأشخاص اللى بيدخلوا كل مرة

الله أمال مين اللى بيعمل ده و بيتكلم عليها ؟؟؟ ولا هى جايبة كلام من بره و بتتهم بيه المدونين يا حرام ؟؟

ولا هو النفاق خلاااااص لزق فيكم لدرجة إن الكرامة انعدمت عندكم .. أصل للأسف الناس اللى بتعمل كده معروفة بالاسم بس اللى مانع شموسة إنها مش من نوع اللى بيقعد على المصاطب علشان تشرد فى المدونة و تدخل فى حلقة من الردح زى ما بيحصل من البعض

فياريت لو بجد الناس دى عندها ذرة من الدم و الكرامة تحترم نفسها و تبعد عنها و تخرج من المدونة عندها و تمسح تليفونها .. لان بجد منظركم بقى غبي قوى

و ياريت الناس بتاعت شات المصاطب يتلموا شوية و اذا كانوا فاكرين إن كلامهم مش بيخرج بره شباك الشات يبقوا موهومين .. لان كل كلمة بتتقال فى الشات المجموعه كلها بتكون عارفاها

و اللى أخدين التليفون مصطبة بردو ياريت يعرفوا إن كل كلمة بتتقال أثناء المحادثة مسافة ما بتتقفل بتوصل بردو للمجموعة كلها

أمال احنا عرفنا منين أسماء اللى اتكلموا على شموسة ؟؟

فياريت بقى كل واحد يخليه فى عياله و بيته أو شغله و يهتم بيهم و يسيب الناس فى حالها

ممكن المرة دى حظكم وقع مع ناس مابتحبش اسلوب المصاطب .. لكن مين عارف المرة الجاية هتقعوا مع مين ؟؟ ولا هيعمل فيكم ايه على العام ؟؟

ربنا يهديكم لنفسكم و يخرب الكيبورد بتاعكم لو مابطلتوش انعدام الدم ده و فضلتوا بردو تدخلوا عندها و تحاولوا تتكلموا عليها

انا عمرى ماشوفت نفسنه بالشكل ده .. صدقونى مهما تعملوا عمركم ماهتوصلوا لمستواها أبداً أصل دى حاجة فى الدم

و الأصل الانسان بيتولد بيه مش بيكتسب ابداااااااااااا

الحقيقة المزيفة !!!

2010-07-09T17:04:00.001+03:00

لم أتقن يوماً فن النواح و جلب عطف الآخر .. لكنى قررت أن أتعلمه لكى أفهم لماذا يصر البعض على استخدامه ؟!! ... فتنقلت بين جوانبه فرأيت أننى لكى أتعلمه لابد أن أرتدى ثلاث أقنعة :

قناع الملاك : أن يكون ظاهرى المحبة و التسامح مع الآخرين وفعل الخير هو مسكني الدائم .. أما باطني فهو يبث فى الخفاء سم سريع المفعول فى الآخر فيقع فريسة سهلة بالنسبة لي لكي أثبت للآخرين أنني لا أفهم ماهية الشر إلا من تعامل الآخر لي ولكنني أبدا لا أرتديه !!

قناع الضحية : يأتي غالباً بعد قناع الملاك فبعد وقوع الشخص المختار فى الفخ أسارع بالشكوى التى دائماً تبدأ بصدمتي و بكائي على محبة كانت جزائها جراح و تنتهى بمغفرتي لهذا الشخص فأنا لن أنسى أنني ملاك !!!

قناع الطيبة : هو قناع خاص للذين يعلمون جيداً أن الملائكة فى السماء فقط .. فأقنعهم بأن خبرتي فى الحياة لا تخرج عن خبرة طفل يرى كل الأشياء جميلة و الأشخاص أخيار دائماً فأبدو بالنسبة لهم ليس إلا ساذجة عديمة الخبرة وهنا تبدأ شبكتي اللامرئية فى التكوين لأصطاد بها كبش الفداء !!!

و بعد إتقانهم جيداً يمكنني التنقل بين جميع الأقنعة الأخرى بسهولة و يسر .. فعلمت وقتها أننى لن أتقنه أبداً .. فأنا إنسان لا حرباء و لن أتخلى عن إنسانيتي و أخسر ذاتي للحصول على عطف مؤقت من الآخر أو سعادة مؤقتة مبنية على عذاب الآخر !!!!

و تعلمت أن ليس كل من يرتدى قناع سيء .. بل من الممكن أن يكون إنسان أراد التجربة فتاهت نفسه بين أقنعة الفن فصدق

و تعلمت أيضاً أن حقيقة هؤلاء ستظهر فى النهاية سواء كانوا فوق الأرض أو تحتها !!

من سيسرق من ؟؟

2010-05-25T14:46:00.001+03:00

قررت الاستسلام لدنياها و استقبال قسوتها برضاءٍ تام

و لم تكن تعلم ان لحظة قرارها

هى نفس لحظة اعلام الطبيب لها

- انها مسألة وقت فالموت قادم ليحتضنك بحنانه

و يتركها فى سؤالها حائرة

هل حقاً ستستطيع ان تسرق الوقت و تنظم كراكيب روحها لتستقبله بروحاً صافية

ام سيسرقها الوقت ليضعها بين احضانه بروحاً ضائعة ؟؟؟

* بشكر كل اللى سأل عليا فى الفيس والميل والمدونة و بعتذر عن الغياب المستمر اللى للأسف هيطول شوية v_v

طراطيش كلام مجنون

2010-04-15T18:08:00.001+02:00

الواثقين من أنفسهم فقط هم الذين لا يفرضون أنفسهم على الآخرين

فمن أراد الانضمام لهم فأهلاً به .. أما من ابتعد فليس له إلا دعائهم بالخير له بالغيب

فحياة بدون أصدقاء أفضل من حياة تلف حبل معرفتهم على عنق الآخرين

و ما أكثر مدعى الثقة فى النفس !

^^^^^^^^^^^^^^

عندما يزرع الآخر خنجر فى قلبى سأبتعد و لكن سيبقى الواجب هو حلقة الوصل بيننا

و عند الاحتياج سأبقى أول من يقف معه

أما غباء القلب فيقابله عندى الموت

و الأموات لا يبعثون مرة أخرى فى الحياة الدنيا

^^^^^^^^^^^^

عندما تحدثت عن سلمى و إيمى اتهم الجميع سلمى بالجهل و الغباء لأنها صبرت

و أصابها الذهول فكيف ذلك؟ فهذه العلاقة مقدسة لابد من بعض التنازل و الصبر لكى تستمر ... و عند مرور الأيام و عندما فاض الكيل بسلمى و لم تعد تستطيع التحمل حقاً .. تكلّمت فوجدت أن الآخرين على حق فهى صبرت على علاقة واهمة حقاً

ظاهرها نفاق و رياء و باطنها خبثاً و دهاء !!

^^^^^^^^^^^^^^^^

ظن الآخرين أنهم يحتلون مكان الكره فى قلبها و عندما علمت بظنهم ابتسمت .. فكم قالت أنها إلى الآن لم يستطع قلبها أن يكره أحد ليس لأنها ملاك بل لأن هذا الجزء فى قلبها يحتله فقط الذنوب التى تندم عليها .. نعم فهى لا تكره إلا ما تندم عليه و إلى الآن لم يستطع إنسان أن يجعلها تندم على معرفته ... فغدر الآخر و خيانته و إساءته و جرحه ليس إلا دروس تتعلمها فى مدرسة الحياة و لولاهم ما كانت انتقلت إلى مرحلة متقدمة فى هذه المدرسة .. فكيف لإنسان أن يكره معلم كان له الفضل فى نجاحه و الانتقال إلى مرحلة دراسية أخرى ؟!

^^^^^^^^^^^

عندما يسيء الآخر لأحبابى فلا مرحب به فى حياتي .. و لكن عندما يسئ لى الآخر فلا أجبر أحد على طرده من حياته و لكن عندما يسيء لى الآخر فيرحب به قلبى و يحاول التودد له بالاشتياق و الحنين فبهذا قد كتب قلبى على نفسه الموت تحت أقدام العقل !

^^^^^^^^^^^^

عامل الناس كما تحب أن تعامل .. كم حاولت هذا و لكن كانت النتيجة إهانة كرامة و جراح فى القلب .. فقررت أن تعامل الناس كما يحبوا أن يعاملوا قررت أن تكون مرآة عاكسة لأفعالهم !!

^^^^^^^^^^^^

أن يكسر شخص إشارة مرور لا يعنى أبداً أنه سيسرق أو يقتل

فانتهاك الشخص لقانون واحد لا يعنى قابليته إلى انتهاك جميع القوانين

^^^^^^^^^^

عندما أحست أنها مراقبة فى بيتها الجديد عادت للقديم لتكتب فيه

فهى تريد أن تتنفس دون أن تجد من يحسب عليها أنفاسها

فأصبح القديم بالنسبة لها الهواء لكى تستطيع العيش فى الجديد أيضاً !!

حديث عقل لا يجيد التفكير

2010-02-04T20:24:00.000+02:00

يقال ان الشخص المغرور هو من زادت ثقته بنفسه فأغفل شعرة الفاصلة بينهم .

و لكن .. هل حقاً مابين الثقة بالنفس و الغرور شعرة ؟؟

بالنسبة لى فالإجابة بالنفى .. فإذا وجدنا شخص مغرور و حاولنا قراءة مابين سطور غروره سنجده أقل الأشخاص ثقة بالنفس بل هو لا يعلم من الاساس مفهوم هذه الثقة .. فهو لا يرى ان ابسط الناس اكثرهم ثقة بالنفس ، بل يرى ان الغرور هو هذه الثقة . فحاول ان تواجهه بهذا لتجد الإجابة الاعتيادية انه شخص واثق فى نفسه ليس إلا !!!

لذا فأنا لا ارى بينهم شعرة بل اراهم وجهان لعملة واحدة فمهما زاد وجه منها أو قل لا يلتقيان ابداً !!!!

ـــــــــــــــــــــــــــــــــــــــــــ

قالى لى صديقى انه يجب ان انظر للجانب المشرق فى العلاقة ولا أهتم بالجانب المظلم فيها بل أعطيه ظهرى ولا انظر له .. و لكن كيف أفعل هذا ؟؟

ألم يرى صديقى ان هذا الجانب سبب رئيسى فى خلق الجروح و هدم العلاقات ؟؟!!

نعم يجب ان اهتم بالجانب المشرق و لكن يجب ايضاً ان لا اغفل الجانب المظلم

فالطعنات دائماً تأتى من الخلف فى الظلام !!!

ـــــــــــــــــــــــــــــــــ

من السخرية عندما يجزم اصدقائك انك من الشخصيات التى يصعب معرفتها بسهولة و ان ردود افعالك غير متوقعه

و يأتى اشخاص معرفتك بهم لا تتعدى اياماً او بضع اسابيع يقسمون انهم يعرفونك جيداً و يبدأون فى تحليل شخصيتك و الأغرب انهم يدعون معرفة ردود افعالك

و فى اول موقف يحدث بينكم يخيب ظنهم و توقعاتهم فيسارعون بإلقاء اللوم عليك !!!

ـــــــــــــــــــــــ

اذا نشأت تعشق لعبة توصيل النقاط و حل المتاهات و مشاهدة الافلام و المسلسلات التى على نهج (c . I . A ) .. فهذا العشق اندمج مع شخصيتك فأصبح اسلوب حياتك على هذا النهج ، فكلمة ما من الممكن ان تقودك للحقيقة كاملة ، و من فعل ما تعلم احداث الحكاية ، فيلومك بعض الناس ويعتبرونك مخطأ فى حقهم لأنك قد افسدت عليهم خداعك !!

فلا سبيل إلا انك تعتذر لهم عن هذا الخطأ الشنيع و تعترف انك حقاً شخص لا يستحق شرف خداعهم !!!!!!!!!!!!!!!

ــــــــــــــــــــــــــــــــــــــــــــــ

تحدثنى كثيراً عن غموضه و اتركك لا لأننى اوافقك الرأى بل املاً منى ان تعرف اليقظة طريقها اليك .. و لكنها قد ضلت الطريق و انا سئمت من هذا الحديث حقاً

لماذا تراه غامضاً لان كلماته غير مفهومة بالنسبة لك .. اعذرنى يا سيدى فهذه مشكلتك انت و ليس غموضاً منه . هل حاولت يوما ان تغفل بريق كلماته المتكلفه و تقرأ مابين السطور ؟؟ حاول ستجد انه شخصيه مخادعه يستخدم بريق هذه الكلمات ليصنع هالة الغموض المزيفة .

هكذا هى لعبة الكلمات سيدى .. فأوضح الكلمات معنى تختزل فى مساحتها البيضاء عمقاً لا تستطيع الوصول اليه بسهولة .. فأول قوانينها الاسهل هو الاصعب دائماً

كذلك الشخصيات .. فالغامض له حيلة فطرية تجعلك تظن انه اوضح الناس و كتابه المفتوح سهل القراءة لدرجة انك تنصرف عنه و توفر مجهودك لقراءة ما هو أصعب.و عندما يأتى وقت فراغك و تقرر ان تقرأ هذا الكتاب ستنشط هالة الغموض و ستقف طويلا على كل سطر منه و تحاول ان تفهمه إلا انك فى النهاية ستعجز و تصدم

نعم نحن هكذا دائما يا سيدى يخدعنا سهولة الشئ فنهمله و نهتم بالأصعب الذى دوماً ما نصدم فيه بالنهاية و عندما نعود للأسهل نصدم فى الحقيقة انه كان الاصعب .. و لكن مع كل هذه الصدمات لن نتعلم و سنظل هكذا دوماً ننخدع و نصدم

فأرجوك يا سيدى لا تقول لى مرة اخرى انه يصنع هالة من الغموض حوله .. لان هالة الغموض هى من تصنع نفسها حول الشخصية و ليس العكس !

هنية تحدثكم من أمام التلفاز

2010-01-03T17:40:00.000+02:00

بقى كده يا ست هانم .. هنية تتعب و ماحدش يسأل عليها .. ماكنش العشم و الله ده انا قولت ان عم محمد البوسطجى هيزهق من كتر الجوابات اللى مبعوتالى .. يلا حصل خير ماهو انتوا بردو معذورين و مشغولين بالمشاكل اللى بتحصل فى البلد اللى الواحد مش عارف هتخلص امتى .. الله يكون فى عونكم

ألا صحيح يا ست هانم مش انتى بتقولى ان فى ناس متنورين زى اللى بنشوفهم فى التلفزيون كده بيقروا كلامى ؟؟

طب قوليلهم يا ست هانم هنية مش هتحكى حاجة المرة دى هى بس عايزة تسأل كام سؤال محشورين فى زورها و ياريت ينورونى وحد فيهم يرد عليا

يوم الجمعه الشيخ بتاع الجامع قعد يسأل الشباب هما ليه متجوزوش و انهم كده هايخشوا النار .. هو يا ست هانم شيوخ الجوامع عايشين معانا فى البلد دى بصحيح ولا هما جايين منين ؟؟

و لا هو يا ست هانم مشاكل البلد خلصت و الحياة بقت فل و الشباب هو اللى بيدلع ؟؟

ولا بتوع التلفزيون اللى كل كلامهم صوت الحريم حلال ولا حرام و ان النقاب لازم ولا لا .. هو يعنى يا ست هانم خلاص بقينا بنراعى ربنا فى كل حاجة و مافضلش إلا الحاجات دى .. يعنى خلاص مابقاش فيه سرقة ولا كدب و العيشة بقت تمام و الفقر راح و كل حاجة بقت حلال فى البلد علشان نتكلم فى الصوت و النقاب ؟؟

و بمناسبة صحيح التلفزيون – ماهو الله يسامحه التعب حوجنى ليه – أمبارح واحد من الناس المثكفين فضل يقول مصر بتتقدم مصر بتتقدم .. يعنى ايه يا ست هانم يعنى خلاص هتتجوز واحد بن حلال ولا بردو هتاخد واحد من نفس العيلة "بنت الناس الطيبين" دول ؟؟

و لا هو يقصد بأن مصر بتتقدم ان ممكن يعنى نقوم من النوم نلاقى مصر بقت فى السعودية ؟؟

اصل الصراحة يا ست هانم انا مش عارفة ازغط الكلمة اللى قالها بعد كده .. علشان كده انا مش فاهمة

اصله بيقول مصر بتتقدم و البلد بيتصلح حالها .. بيتصلح حالها فين بس يا ست هانم ولا مين اللى بيصلح حالها ده .. اشحال مش عارفين يصلحوا مسورة المية المكسورة و قاطعين الميه علينا بقالهم اسبوع هيعرفوا يصلحوا حال بلد بحالها ؟؟

هى الناس دى عايشه معانا بصحيح يا ست هانم ولا هما قصدهم علي مصر غير مصر بتاعتنا ؟؟

ولا اقلب لقناة تانية ألاقى خناقة مابين المسلمين و بعضهم و المسحيين و بعضهم و المسلمين و المسحيين على ايه بقى ؟؟ على ان العدرا ظهرت ولا لا ؟؟

يعى انا عايزة افهم حاجة المسلمين و المسحيين اللى بيقولوا انها ظهرت ماشى ظهرت ايه بقى التغيير اللى حصل ؟؟ يعنى مثلا مشكلة العيش انتهت و الناس بقت عارفة تعيش ولا اللى بيقولوا عليها دى اسمها ايه ..آآه الفتنه الطائفية خلصت و بقينا بنحب بعض و مافيش نفسنه ما بينا ؟؟

و اللى بيقولوا انها ماظهرتش ماشى ماظهرتش ايه بردو التغيير اللى حصل ؟؟ هو احنا خلاص مابقاش فى حاجة نتكلم فيها فبقينا بنتخانق مع بعض و خلاص ؟؟

ولا موضوع السور اللى بيتعمل فى سينا هو راخر .. يعنى سؤال بس يا ست هانم هو الريس بتاعنا مابيفهمش إلا فى الطوب و الاسمنت و الحديد ؟؟ اصل كل ماحد بيتكلم يقولك انجازات الريس، طيب ايه هى يا عم الحج.. يقولك عملك كبارى و صلحلك الشوارع و اهو بيعمل سور !! .. أصل لو مابيفهمش إلا فى كده يبقى الراجل عداه العيب بردو و مافيش لوم عليه و يشكر انه مابيحبش يفتى فى حاجة مش عارفها و بيصلح اللى بيفهم فيه .. و نبقى ندور احنا بقى على ريس يمسك معاه بس يكون بيفهم فى حكم الشعب و معيشته

و الناس اللى بتقول مش عايزين السور ولازم يتهد .. كانوا فين الناس دى لما الحكومة كانت بتبنى السور علينا احنا و ماقلوش ليه يقف ولا يتهد و سيبينه يعلى لحد ماقرب يوصل للسما ؟؟ ولو هما الفلسطنين ولاد مصر و احنا ولاد (دول) ؟؟؟

ولا الحكومة اللى بتقولك السور علشان نحمى البلد طب و شعب البلد مابتحمهوش ليه ولا هما شغلتهم حماية الاراضى وبس .. طب حد يدلنا على حكومة شغلتها حماية شعب البلد من اللى بيحموا ارض البلد و احنا نجبها

و كله كوم بقى و اللى طلع يقولك ان البلد فيها شغل بس الشباب هو اللى بيدلع .. صح يا ست هانم الشباب هو اللى بيدلع بأمارة ابلة جيهان اللى بتدلع اخر دلع .. ابلة جيهان دى المفروض انها مدرسة فضلت تدور على شغل و مالقتش و لما عرفت ان خلاص مافيش فايدة و مش عارفة تعيش اشتغلت فى البيوت .. لا يا ست هانم مش بتعلم ولاد الناس فى بيوتهم دى بتشتغل عند ولاد الناس فى بيوتهم يعنى بتمسح و تنفض و تطبخ و بدل ما هى اسمها ابله جيهان بقى اسمها الشغالة جيهان و يقولك الشباب بيدلع و مصر بتتقدم

صحيح صدق اللى قال

ازاى يابا اكون متعلم .. قاله تعالى فى الهيافة و علم

مباراة النهاية

2009-12-26T21:36:00.001+02:00

ساد الصمت

و بدأ العد التنازلى

تسارعت معه دقات القلوب

و احتبست الأنفاس

الكل يترقب النتيجة

..................................

ستحسم لصالح من ؟ .. هى وحدها تعلم

و لكنها أيضاً تعلم .. أن الوقت بدل الضائع قادر على تغيير النتيجة

!!!!!!!!!!!!!

فصل لم يكتمل بعد

2009-12-08T12:31:00.002+02:00

.... : محمد عايز رقمك

... : !!!! ليه !!!!

.... : علشان يقنعك أنك تطلعى معانا المعسكر

... : هيتصل بيا من ايطاليا علشان يقنعنى اطلع معسكر فى مصر !!!!!

.... : ما هو هيكون نزل و هيطلع معانا

... : و ايه علاقة ده بانى أطلع ولا لا ؟!! ... عموما أنا مقتنعة و لو ظروفى سمحت هطلع

ـــــــــــــــــــــ

.... : محمد عايز رقمك

... : ليه ؟!

.... : ماعرفش اتصل و صوته كان مخنوق و قالى أكلمك و استأذنك أنه ياخد رقمك لأنه عايزك فى موضوع مهم

... : مافيش مشكلة

ــــــــــــــــ

ـــ أنا على اخرى

... : !!!! من ؟!!!

و بدأ محمد يحكى عن سبب الضيقة و فضلوا يتناقشوا لحد ما وصلوا لحل و محمد بدأ يهدا

ـــ أنا أسف انى ازعجتك بخنقتى

... : بطل تهريج لا ازعاج ولا حاجة

ـــ لا بجد أسف .. بس بجد انتى الوحيدة اللى حسيت انى محتاج اتكلم معاها وقتها

... : أشكرك !!!!

ــــــــــــــــــــــــــــــــــــ

هى اخدت المكالمة بمنظور خالى من اى اقاويل لكن اللى حواليها عكسوا المنظور اجبارى .. كترة التلميحات و سيرة محمد بقت معاها فى كل مكان لدرجة انها كانت حاسة ان مية الحنفية هتنزل مخلوطة بسيرة محمد !!!

و علشان هى عندها سبب للرفض , قفلت ودانها عن كل اللى بيحصل حواليها .. و حاولت تلمح لسبب الرفض علشان يحتويها و يبقى الجدار العازل تقدر بيه تواجه الاحداث إلا ان سبب الرفض و كالعادة استخدم تلميحاتها ضدها اعتقادا منه انه بكده بيقربها و لكنه فى الحقيقة بيبعدها اكتر و اكتر !!!

ــــــــــــــــــــــ

ـــ أنا نازل الشهر الجاى

... : بجد , طيب تيجى بالسلامة

ــــ بس كنت عايز اصارحك بحاجة و اطلب منك طلب .. ممكن ؟

... : اتفضل

محمد كان كل مرة يكلمها كان بيفتح لها صفحة من كتابه و يقراها .. لكن المرة دى فتح الكتاب كله قصادها علشان تقراه , و فى الاخر قالها انه عايزها تكمل معاه باقى المشوار

ــــ أنا عارف ان الكل بيحاول يلمح لك بكده , و واثق انك فاهمة ده , أنا مش عايز الرد دلوقتى حتى لو كان بالقبول , انا هاخد الرد منك لما انزل سواء رفض او قبول .. و خلال الشهر هطلب ان ماحدش يحاول يضغط عليك , و انا هقطع اتصالى و هطمن عليك من بعيد لبعيد , علشان يكون قرارك نابع من جواك بدون اى تدخل خارجى .. و لو قولتى انك مقررة من دلوقتى , بردو مش هسمع القرار إلا و انا فى مصر

ـــــــــــــــ

هى فضلت مذهولة رغم انها فاهمة الاحداث لكن ماكنتش متوقعه ان الموضوع هيحصل بالشكل ده .. مسكت النوت بتاعها و كتبت

" هل شباب جيلى فعلا كلهم هجوا من مصر !! .. و لا أنا اللى مكتوب عليا لا تصلح للعيشة داخل البلد !! ( سؤال يطرح نفسه بقوة) "

ــــــــــــــــــــــــــــ

تانى يوم تراجعت الضغوط الصغيرة فعلا لإفساح الطريق للضغط الاكبر .. و هنا فتحت صفحة و قسمتها _ رغم انها مابتحبش تتعامل مع علاقاتها بالطريقة دى إلا ان "لكل قاعدة شواذ" _ و بدأت تكتب المميزات و فى الاخر كتبت " اى بنت بتحلم بالشخصية دى ".. و فى جانب العيوب كتبت فى النص " محمد بالنسبة لى ابن بلد و راجل و جار فقط لا غير!! " و سابت الصفحة و قامت

ـــــــــــــــــــ

و فى اخر اليوم شغلت اغانى و فتحت الصفحة بصت على العيوب و كتبت فى اول السطر " عيوبه طبيعية و ليست مرضية يمكن التعايش معاها " و عملت سهم رابط ما بينها و بين المميزات

اكتشفت ان العيب الوحيد خاص بيها مش بيه اللى هو "سبب الرفض"

و هنا قررت تشارك سبب الرفض فهي كل مرة كانت بتكتفى بتصرفها و علاجها للموضوع , لكن المرة دى الوضع مختلف " فضعف جدار حمايتها أدى الى تسرب امراض الاخرين لحياتها "

فتحت صفحة تانية و قبل ما تبدأ فى الكتابة غمضت عينها و اخدت نفس عميق لتتخلص من اى شعور سلبى جواها .. و فى الوقت ده انتبهت للأغنية اللى شغالة

" ببعد غصب عني و بودع لياليك و اللي فاضلك مني قلقي وخوفي عليك"

فتحت الميديا باستغراب هى مش فاكره انها حطت الاغنية دى .. بصت على كوكتيل الاغانى ... و بابتسامة رضى قفلت الصفحة ........

و دمتم سالمين

المنطقة اللامرئية

2009-11-13T23:35:00.002+02:00

تعيش حياة سعيدة هادئة تسير نحو هدفك برشاقة و تتخطى العواقب التى تقابلك بكل هدوء إلى ان تجد نفسك اخيراً أمام هدفك ، لا يفصل بينكم سوى خطوة واحدة ، فترفع قدمك لتخطوها و فى هذه اللحظه تنشق الارض و يهوى بك هدفك إلى قاعها .

فتصاب بالذهول و تستسلم للسقوط، و فى القاع تحاول استيعاب ما حدث و لكن دون جدوى .. فتظل تسأل كيف ؟ لماذا ؟ و أين ؟

فتأتى إرادتك من الخلف لتجيبك : كيف ؟ لأنك اغمضت عينك عن الحقيقة ، لماذا ؟ لان هدفك حقيقته وهم ، و أين ؟ رحلوا فقد انتهت مهمتهم .

و هنا تلتفت إليها و تحادثها: لكن ألم نصل إلى أهدافنا بالإرادة .. فكيف كنت أقاومك لأصل إلى هدفى ؟؟

فتجيبك و هى ترفعك للسطح مرة اخرى : لأنك كنت مغيباً .

و عندما تصل للسطح تنظر حولك لا تجد غير مكان ميت لا حياة فيه ، تحاول ان تتذكر لتفهم فتبحث يميناً و يساراً فى ذاكرتك عن الحلقة المفقودة و لكنك لا تستطيع ايجادها فتصرخ من داخلك أين هى ؟؟

و فجأة تجد امامك باباً ينفتح فتدخل فيه مصطحباً إرادتك لتجد مدينة تشبه مدينتك و لكن ألوانها باهته ، لا إنها بالفعل مدينتك و هاهم اهلها فتقترب منهم وتحادثهم و لكنهم لا ينتبهوا لك بل انهم ايضاً لا يرونك ! ، فتنظر فى الجهة الأخرى لتجدك متجه إليهم ، وهنا تتراجع للوراء فى ذهول تشاهد ما يحدث ..فتتذكر هذا الموقف و لكن هم كانوا فارحين فلماذا وجوههم مسودة هكذا بل و ما هذا الكلام الحاقد لا لا لم يحدث هذا .. فتنظر الى اليمين لترى موقف آخر فتجرى عليهم .. نعم هنا كانوا يبكون من أجلى و لكن ما هذا ؟؟ ما هذه الابتسامة و ما هذه الكلمات لا لم يقولوا هذا .. فتجرى بجنون إلى جهة اخرى لتراهم يتبادلون الأحضان و فى يد كل منهم خنجراً يطعن به بعضهم البعض و يضحكون !!!

فتنهار و تتسأل اين انا ؟ و ما هذا المكان اللعين ؟

فيختفى كل شئ و تظهر البصيرة لتجيبك : انت فى المنطقة اللامرئية حيث الحقيقة ، حقيقة الكلام ، حقيقة الافعال و حقيقة الأنفس .

و تسأل : و لكن كيف لا ارى هذا من قبل و انتِ معى ؟

فتجيبك : لأنك كنت مغيباً .

و تعود مرة اخرى لمكانك و تجلس حزيناً و تتسأل كيف أصبحت هكذا فأنا شخصاً ذو إرادة و بصيرة لم أكن ابدا شخصا مغيباً اين كان عقلى ؟؟

و هنا ينفتح لك باباً اخر فتدخل فيه مصطحباً الإرادة و البصيرة لتجد الماضى البعيد امام عيناك ، نعم هاهى مدينتك القديمة بنقائها كم كانت جميلة حقاً و اهلها طيبون اوفياء و لكن يوجد شئ ينقصها و بدونه لا تستطيع أن تحيا معهم ، حينئذ قررت ان تبحث عن هذا الشئ فى مدينة اخرى و تركتهم و بحثت كثيراً ولم تجده و كان اليأس على اعتابك فوجدت مدينة الماضى القريب فأوهمك عقلك بان ما تبحث عنه هنا فقررت الاستقرار فيها و كان عقلك يصور لك قبحها جمالاً و غدر اهلها وفاء .

وهنا اسرعت الى الخارج متسائلا كيف ؟ عقلى ؟ أهذا العقل الذى يرونه دائما صالح لا اصدق !!!

فيأتى العقل ليخبرك الحقيقة الصادمة : لست انا من فعل بل انت ، انت الشخص الذى لا يعرف الاستسلام ،فدائما تعطى أمر " لا تستلم" ثم توجهنى إلى الطريق و لكن هذه المرة وجهت الامر دون ارشادى الى الطريق ، لذا عندما وجدت اليأس قد ظهر أمامى تعاملت مع امرك دون تمييز للطريق ..

وسكت العقل و ساد الصمت المكان للحظات ، ثم جاء العقل مصطحباً وراءه البصيرة و الإرادة ليسألك : ماذا ستفعل الان ؟

فتجيبه : ماذا سأفعل ؟؟ فقد كان درساً قاسياً حقاً و جروحى لم تشفى بعد و لكن ..

كما قلت أنت اننى شخص لا يعرف الاستسلام ، لذا سأستوعب الدرس جيداً و لنذهب جميعا الان لنعيش الحاضر بأمل و روح لا تعرف الاستسلام.

و دمتم سالمين

لا تتعجب !!!!

2009-11-01T17:10:00.001+02:00

عندما تنهى علاقة قبل البدأ فيها فيتهموك بالغدر بهم .... لا تتعجب

عندما تكون مع نفسك و الاخرين صريحا فتلقب بالكاذب ... لا تتعجب

عندما تجد شخص من المفترض انه قدوة للأخرين ينصحك باللااخلاقيات .. لا تتعجب

عندما تجد "حيوان" يحمى انسان من ضرر انسان اخر ... لا تتعجب

عندما تجد ام تتنازل عن ابنتها من اجل اهوائها .. لا تتعجب

عندما تجد من يطالب بحقة هو الشخص الذى يأخد من الاخرين حقوقهم .. لا تتعجب

عندما تجد الخائن يبكى و يتألم من غدر الوفى .. لا تتعجب

عندما ترى من ينادى بالقيم السامية هو نفسه فى الواقع يهدمها .. لا تتعجب

عندما تراهم لا يهدئون اذا عومل حيوان باساءة بينما يدخلون فى سبات عميق اذا قتل انسان .. لا تتعجب

عندما تجدهم لا يعرفون شيئا عن حرية الفرد و حرية الجماعه و يتهموك انت بالجهل .. لا تتعجب

عندما تراه دائما يؤيد رأى الاغلبية لانه الاصح عن رأى الفرد و فى الوقت ذاته يرى ان المجتمع مخطئ ولابد أصلاحه من جديد .. لا تتعجب

عندما تجد أب يتغرب عن ابنائه بحجة تأمين مستقبلهم ولا يروه الا كنزيل فندق و يستنكر بعد ذلك معاملتهم له كبنك مال ... لا تتعجب

عندما ترفض اقناعهم لك بأن سم الافاعى هو فى الحقيقة عسل النحل فيتهموك بالغباء .. لا تتعجب

عندما تجزم انها ماعادت تهتم بهذة الشخصية و فى الوقت نفسه تتبع أخبارها .. لا تتعجب

عنما تجد من خان مبادئه هو الذى يبكى على ضياع المبادئ .. لا تتعجب

عندما ينهون الاخر عن النميمة وهم منغمسين فيها .. لا تتعجب

عندما يريدون منك الاقتناع بشخصيتهم القوية التى يحركها الاخرون .. لا تتعجب

عندما ترفض الانضمام لوسط ملوث فتتهم بعدم الاخلاق ... لا تتعجب

عندما ترى فى اعيونهم الرغبة و الاحتياج إليك و لكن لغدرهم اولويات اخرى .. لا تتعجب

عندما تدافع عن خصوصاياتك فتتهم بالانانية .. لا تتعجب

ارجوك لا تتعجب فهذا العصر مباح فيه كل شئ عدا التعجب !!!!

و دمتم سالمين

عندما يصبح الجهل نعمة

2009-10-17T07:41:00.001+02:00

هقولك بقى ياست هانم حكاية عم مدبولى .. لما ستى ماتت و علشان ماينفعش أفضل فى الدار لوحدى قالوا خالى يقعد معايا , انا سمعت كده و جالى الوسواس- ايوة ماهو اللى شوفته مش شوية- قولت اذا كان ابويا عمل كده يبقى مش بعيد عمك ولا خالك كمان يبقوا زيه و انا بحبهم ومش عايزة بردو يحصل فى الامور امور .. بعد كده هبقى مقطوعة من شجرة و اهلى عايشين !! ..

فكرت وقولت اروح عند خالتى بهيه اهى ست كبيرة و ولادها ماحدش يعرف عنهم حاجة و اهو بردو أخدمها .. أمى ماكنتش موافقة الصراحة و جاتنى كذا مرة و تقولى يابت انتى عارفة سمعة البيت ده هباب , ازاى بس تقعدى هنا؟! .. اقولها يامه كلها اشاعات الست زى الفل مافيش اى عيبة عليها..

ماهو اعمل ايه ياست هانم كان لازم اقول كده ماهو نار خالتى بهية ماكنش فيها خوف عليا ..لحد ما يوم كنت قاعدة قدام الدار و خلاص كان فاض بيا و بفكر اعمل ايه ماهو آنى مش قادرة استحمل الغلط ده ..لقيت عم مدبولى ناده عليا وقالى بتهببى ايه قدام دار بهيه يابت .. رحت قولتله انى قاعدة هنا بخدمها ..

زعق فيا و كان عايزنى أروح بيت اهلى و انا رفضت .. المهم يمين شمال لحد ما قال خلاص لمى هدومك و هتقعدى عندى ورحت معاه .. عارفة ياست هانم لما مات عم مدبولى حسيت قد ايه كنت فى نعمة مش حاسه بيها .. ماكنش ينفع اقعد عند حد من اهلى فقولت انى قاعده فى اوضة على سطح عمارة من عماير المحافظة دى ..

و انا ولا كان اصلا معايا سحتوت اجيب بيه لقمة .. ده كان بيجى عليا ايام لقمه العيش دى بوقى مايشوفهاش آى والله و انا نفسى دايما عزيزة عليا ماكنش ينفع اطلب من حد حاجة كنت الصبح فى البلد و بليل بطلع على اى سطح أتاوه فيه و اهى كانت ماشية و لما تزنق قوى معايا و خلاص احس انى هقع من طولى كنت اروح لخالتى فى البيت او حد من صحابى و اتحجج ان اللى انا فيه ده علشان ماحدش ليه نفس ياكل حاجة من كتر اللى شافه يغصبوا عليا وقتها انى اكل و هما لقمتين والله ياست هانم كانوا بينزلوا يقطعوا فى جوفى بس اعمل ايه ماهو علشان اقدر اقف ..

لحد الحمدلله ما لقيت شغل فى مصنع .. كنت الصبح بشتغل فيه و لما يجى وقت المرواح أدارى عن العيون لحد مايقفلوا و ابايت فيه .. وفضلت على دا الحال لحد ماربنا كرمنى و اجرت فعلا اوضه فوق السطوح وعشيت الحمدلله فيها.. انتى عارفة اللى انا مريت بيه ده حسسنى بالناس الغلابة اللى كان عم مدبولى واقف معاهم هما آى كانوا بيصعبوا عليا بس ماكنتش بحس بيهم قوى كده .. بعد ماشتغلت كنت باكل طقه بس وبحوش علشان اساعدهم بس طبعا ماكنش زى عم مدبولى يعنى ههههه ..لحد مابقى ربنا فتحها عليا زى ماانتى شايفه كده و بقى الحال ميسور الحمدلله ..

العجيب بقى ياست هانم لما اشوف واحد داق الوجع و يتمناه للكل .. يعنى عندنا واحده هنا فى البلد جوزها خانها هى آى الخيانه وحشة لكنها قالت هتسامح و تفضل معاه كبرت فى عين البلد كلها إلا ان بعد سنين نلقاها بتخونه آى والله ياست هانم و لما أتكلموا معاها قالت زى ماهو شاف حياته اشوف انا كمان حياتى أتضح ياست هانم ان سكوتها ده علشان مافيش فرصه تردها ..ولا الواد مسعود البت اللى كان خطيبها سابيته وراحت أتجوزت واحد تانى اغنى منه و لما ربنا فتح عليه بقى يروح يوقع مابين اى اتنين بيحبوا بعض و أهو داير آذيا فى خلق الله .. و البت سعاد خطيبها خانها وسابها و اتجوز جارتها و صحبتها و من وقتها و هى اللى تعرفها مخطوبة تحاول تخطف منها خطيبها و هلم جره ...

و العجيب اكتر ان كلهم بتوع مدارس و متنورين و الله ياست هانم من كتر الواحد مابيشوف من المتنورين بيحمد ربنا انه ماكملش علامه .. ال علشان انا دوقت مر ادوق الناس زيه ..صحيح صدق اللى قال :

لو غدار غدر بك ماتخلى الحقد يعمى قلبك

يا اهالي البلوجر العظيم

2009-10-15T01:24:00.007+02:00

يا اهالي البلوجر العظيم
الحاضر منكم يعلم الغايب
قرر والينا المبجل
فتح فرع جديد لمدونته المحبوبة في المدينة الاخري

" في لحظة جنون قلت"
ويدعوكم لحضور حفل الافتتاح بحضور وتشريف مولانا المعظم السلطان انا وعلي الحاضر انه يعلم الغايب بان اللي مش هاييجي هايتعدم رميا بالطماطم

وقد اذعر من بعذر
واديني قلت اهوة واما نشوف مين اللي هايطاوعه قلبه ومايروحش هناك ×_×

ودمتم سالمين
ياالله بقي علشان لسة عندي لفة طويلة في باقي شوارع المدينة

^_^

أمومة مفتقدة المعنى

2009-10-09T22:29:00.001+02:00

طبعا ياست هانم أنا كنت قولتلك المرة اللى فاتت انى هقولك حكاية مرواحى عند عم مدبولى ..بس سامحينى مش قادرة احكى اى حاجة النهارده لان دماغى مقلوبه من صبحية ربنا .. أصل خالتى ام مسعدة شيعتلى و روحتلها و زي عادتها فضلت تلعن فى مسعدة و اللى جابو مسعده ..

اصل مسعده من ساعة مانزلت مصر هى و جوزها وهى مارفعتش سماعة التليفون تكلم امها و ابوها مع انها كل يوم لازم تكلمنى و يوم مااقولها اتصلى اطمنى على امك يابت دى مقهورة بسببك تقولى انتى ياهنية اللى بتقولى كده اشحال كل حاجة كانت قصادك .. اقولها ايوة بس دى امك يابت هو انا بردو هقولك يعنى ايه امك يابتاعت المدارس ترد تقولى بقولك ايه ياهنية كفايه ياختى عليها ولادها التانين وقفلى بقى على الموضوع دهو .. اتكتم انا و اقفل معاها اصل البت معذورة بردو من و هى صغيرة شايفة المر مع امها ..

حاكم خالتى فتحية – ام مسعدة- كانت دايما مهتمية بولادها الصبيان و هملة البت مسعدة مع انها البت الوحيدة هتقوليلى و فين ابوها هقولك موجود بس هو مالهوش دعوة بإى حاجة و كل ماحد يكلمه يقوله خليها تتعلم عشان لما تكون فى بيت جوزها .. بس الحق يتقال بردو هو كان بيتدخل لو خالتى فتحية لمحت ان مسعدة تقعد من التعليم و ممكن يولع البيت نار .. كانت تيجى من المدرسة تعمل البيت و تشوف طلبات اخوتها و ايام الامتحانات كانت تقومها من على المذاكرة عشان تشوف اخوتها لو عايزين شاى ولا أكل عشان يركزوا وهى مش مهم ..روحى يامسعده هاتى طلبات يامه انا لسه جاية ما محمد مارحش المدرسة النهارده و مرتاح بدل اللعب ابعتيه.. البت ياعينى بعد الكلمتين دول تترن العلقة و توديها بردو و ماكنتش تنام الا لما اخوتها يخلصوا و يناموا ويايولها لو نعست – دى لو مرات ابوها مش هتعمل كده- بس هنقول ايه الحنيه اصلها حاجة ربانى ..

البت خدت الدبلون و عليها دورت على شغل و اشتغلت و ده كان مرار تانى ياعينى تقوم من النجمة عشان توضب الدار عشان لما ترجع يدوب تعمل الاكل و ترتاح .. ترجع تلقاه يضرب يقلب و وتوضبه تاني و تعمل الاكل .. و خالتى فتحيه قاعده تدلع و تدادى فى الصبيان .. ده حتى فى الجواز ماسبتهاش كانت عايزة ترميها و خلاص خطبتها لواحد مالهوش شخصية و اخوه هو اللى مماشيه على هواه و لما قولتلها ياخاله العيلة دى معروفة فى البلد كلها انها مش كويسة ترد تقولى ده انتى اللى غيرانه منها عشان اتخطبت و عايزة تفشكلى الجوازة حلفت من وقتها انى ماليش دعوة بالموضوع ده .. بس ربنا بردو مايرضاش بالظلم اخو الواد اتخانق مع اخو مسعده و باظت الجوازة..

وجيه ابن الحلال اللى هى معاه دلوقتى , بس هي يعني سابيتها؟ ابدا .. مسعده كانت عايشة هنا الاول فى البلد كانت خالتى تعامل جوزها كويس و مسعده نفس المعامله بتاعت زمان مافيش تغيير و دايما بردو اخوتها الشباب بينهم لحد ما مسعده زنت على جوزها يشوف شغلانه بعيد عن البلد و اهو ربنا كرمهم و نزلوا مصر و بقالهم سنه كلمت امها مرة واحده بس اول لما نزلوا سمت بدانها حلفت بعدها ماتتصل بيها تانى – الله يرحمك يامه عمرها و الله ياست هانم مافرقت بينى و بين اخواتى مع انى كنت بعيده عنها ولا حتى فكرت مرة واحده فى نفسها وبس بالعكس كانت حياتها كلها ليا انا و اخواتى - انا مابقتش فاهمة هى الامومة ايه أكل و شرب و بس و مدام الام بتعمل كده يبقى خلاص مافيش حاجة اسمها حنيه و ياريت مع العيال بس لا ده كمان مع اجوازهم مش اكلتك و شربتك خلاص يبقى انت فى حالك و انا فى حالي .. و بعدين يرجعوا يشتكوا من اجوازهم و العيال!!!

و على راى المثل اللى قال :

الواحدة الانانية ماتنتظرش من جوزها و عيالها حنية

فى البداية قالوا و قالت

2009-10-06T01:31:00.001+02:00

آنى بقى ياست هانم هنية المتهنية فى الاحزان من صغرى و الحكيم حرم عليه الرضاعه من صدر امي و كنت عايشة على اشي شوية لبن من جاموس ام عويس علي اشي شوية لبن من معزة ام عبد النبي, و الدنيا كتر خيرها مخلصهاش فرضعتنى هى طبيعى حزنها علشان كده قالوا عليه انى متهنية فى الاحزان حاكم ياست هانم اللى يرضع فى الصغر حزن الدنيا فى الكبر ميأثرش فيه غدرها .. طبعا عايزة تعرفى أنا ليه بدأت معاكى كده أصل الواد مرزوق جيه و قالى ان البت ذكية المستذكية وقفتك قبل ماتيجى و حذرتك منى و قالتلك انى الاحترام بينى و بينه بلاد

و الله عملت فيا معروف البت دى ده انا كنت محتارة هبدأ معاكى الحكاية منين .. بس دلوقتى قولت اقولك الاول ليه اهل البلد بيقولوا كده عليا عشان تتكلمى و انتى مرتاحة و مش خايفة

زمان و انا صغيرة كنت بلعب مع العيال فى البلد عادى لحد ماجيه يوم عم دسوقى ناده عليه انا و البت مسعدة رحنا نشوف عايز ايه دخلنا الدار و ادانا حلاوة وقالنا نعمل حاجات كده لقيت البت مسعده فجأة راحت شداني و جرينا من الدار قولتلها فى ايه يابت قالت لى ده راجل قليل الادب ..أنا مافهمتش تقصد ايه رحت قولت لامى على اللى عم دسوقى كان عايزه راحت رنانى حتة علقة و قالت لى اياك اشوفك هوبت نواحيه تاني وراحت مسكت فى خناقه و خلصت الحكاية .. بس كان معايا انا البداية

دخل الشيطان بين امى و ابويا و كل واحد راح فى وادى أنا مردتيش اروح مع امى و فضلت مع ابويا عشان اخدمه –اصل ستى و سيدى ميتين- و كبرت قبل الآوان بآوان بس انا كنت راضية و الحياة كانت ماشية لحد ما جيه اليوم اللى الشيطان دخل دماغ ابويا تانى و كان عايز يعمل عاملة عم دسوقى معايا فهربت منه و جريت على أمى و انا برتعش وقولتلها مش عايزة ارجع تانى و اتحججت انى تعبانه من شغل البيت وبس – ايوة ماهو انا مقدرش اقولها ابويا كان عايز ايه دى كانت الدنيا ولعت – و عدى ياايام و تعالى ياايام و يجى عريس لأمى و توافق عليه و انا فضلت عند ستى و كنت بزورها و اهو طلع جوزها مايتخيرش عن ابويا و عم دسوقى و منعت رجلى من عندها و كنت بشوفها لما تيجى عند ستى – الله يرحمها ماتت و فكرة انى زعلانة منها هى و ابويا علشان كده ماكنتش بروح لحد فيهم – المهم كبرت على ده الحال مابسكتش على الغلط حتى لو كان من كبير ..

لحد ماجيه عم مدبولى –الله يرحمه- دخل عليا و بيزعق و يقولى بت ياهنية انتى عملتى ايه يابت كل ماقابل حد فى البلد يقولى ماتلم هنية ياكباره بدل ماهى طايحه فى الكبير و الصغير كده – أصل عم مدبولى اخدنى عنده بعد ماسبت بيت ستى و دى حكاية تانية هبقى اقولك عليها- المهم قولتله اكيد بسبب عم صابر بعد ماقولتله الكلمتين فى عضمه بس اعمل ايه يعنى ماهو ياكباره مش محترم شيبته و عمال يعاكس فى الراحة و الجاية و بيرمى كلام و انا معدية قولتله اشحال ان مفيش شعره سودا توحد ربنا عشان نقول بتعمل كده بسببها راح واخد بعضه و مشى من وشى كنت اسيبه يعكسنى يعنى ياعم مدبولى ؟!!! ..

لقيته سكت كده شوية و كأنه ولا المصدوم فى حاجة و قالى لا مش عم صابر هو اللى قال دى صباح مرات جابر هى اللى دايرة فى البلد بتقول هنية مابتحترمش صغير ولا كبير .. قولتله آآآه ده عشان انا مرضتش ابقى المرسال أصل و انا معديه من قدام دارهم نادت عليا و كانت عايزانى اخد جواب من بنتها و اوصله لأستاذ عصام و انا قولتلها انا مش بوسطجى البلد ياخاله و سيبتها و مشيت غلطت انا فى ايه بقى ولا هو عشان الواحد مش مطوعهم فى هواهم ؟!!!

و من وقتها ياست هانم و هما مطلعين عليا كده عشان مابسكتش على الغلط أنما البنى ادم المحترم بشيله على دماغى من فوق و زمان قالوا فى الامثال :

ان ماكبرتش لسنك هتنداس من الاصغر منك

مراسم العزاء و 6 فوائد للأحياء

2009-08-09T16:17:00.001+03:00

اولا بعتذر عن عدم متابعتي الفترة اللي فاتت و غيابي المفاجئ

ودا لان خالي توفاه الله ربنا برحمه برحمته و يدخله فسيح جناته

بشكر كل الي سأل عني و اللي جيت علي باله بالخير و لو للحظة

بشكر اللي عزاني في التليفون و الميل و اللي جه البيت

ــــــــــــــــــــــــــــ

زمان كنا بنشوف فى الافلام لما حد يموت و الناس تروح تعزى فيه

بيكونوا قاعدين منهم اللى بيستمع للقرآن و ساكت و منهم اللى بيصبر الاهل و يدعى للميت ..

مش بس كنا بنشوف لا احنا كمان اتربينا على كده اننا نراعى مشاعر اهل المتوفى و نحاول نصبرهم و لو مش عارفين نقول ايه يبقى نكتفى بالاستماع للقرآن و الدعاء ليه و ليهم ..

اتربينا انه اصعب حدث ممكن يمر بيه الانسان هو الحدث ده .. و اتربينا ان الموقف ده ليه احترامه وقدسيته .. لكن مش كل حاجة اتربينا عليها او شفناها فى الافلام بتمثل الواقع !!

و كما قال المتنبى مصائب قوم عند قوم فوائد .. فا هتكلم اليوم عن الست فوائد للأحياء فى مراسم العزاء الواقعية

1 - استخدام الحدث لتبرير الفعل

بعد رجوعى البيت اكتشفت ان فى اشخاص اخدوا حالة الوفاة اللى عندى تبرير لفعل ليهم .. مع ان اصلا من وقت ماعرفوا الخبر مش تواصلت معاهم إلا بعد مارجعت البيت يعنى كان عدى اربع ايام .. و للأسف الشديد ياريت كان تبرير لجلب استعطاف الناس مع انه بردو فعل مريض لكن ده كان تبرير للضحك على اشخاص اخرين !!!

2 - العزاء فرصة لإقامة مجلس نميمة

فى العزى تسمع اخبار الناس جميعا .. اللى سابت خاطبها و اللى اتجوزت و اللى اتطلقت و اللى ضرب مراته و اللى اتجوز عليها .. الخ

و ياريت الكلام بصوت غير مسموع لا ده بصوت مسموع و بوضوح !!!!

3 - العزاء فرصة لاستعادة الذكريات

دخلت واحدة و اول ماقعدت سألت هو مات ازاى ؟ اللى جنبها قالتلها غرق .. وهنا لقيتها بدأت فى سرد الذكريات .. ياحبيبى بردو اخو مرات عم جد جارنا مات غريق السنه اللى فاتت .. و ابن خال عم جوز عمت جوز اختى مات غريق من تلات شهور .. الخ

و ياريت هى بس لا شاركها اشخاص تانين .. لحد ماحسيت ان نص الشعب مات غريق !!

4 - مجلس العزاء دار افتاء للواجب و الاصول

واحدة كانت واقفة جانبى اول لما لمحت احمد ابن خالو الله يرحمه بيكلم عمو مالت عليا وقالت لى : خالى احمد يغير هدومه و ينزل يقف مع اعمامه و ياخد عزى ابوه

سألتها ليه ده طفل حضرتك .. ردت عليا و قالتلى احمد ماشاء الله ذكى و هيفهم ده .. قولتلها بقولك طفل ده لسه طالع تانية ابتدائى .. قالت و هى مضايقة قوووى ده واجب و اصول !!!!

5 – مجلس العزاء فرصه لاستكتار الحياة على الاخرين

كنت قاعدة و اتنين قاعدين قدامى .. و فجأة ألاقى واحدة فيهم بتقول الدكتور مصطفى كان طيب و الله تصورى بيقولوا عمره ما اشتكى من حاجة ! ده ابوه و امه لسه عايشين .. سبحان الله السليم اللى عمره ما اشتكى من حاجة مات و التعبان عايش !!!!!

6 – فى مجلس العزاء فرصه لترك عنان الفضول و عدم مراعاة الشعور

مرات خالو غير صدمة موته إلا انها هى كمان شافت الموت بعنيها و كان اللى على لسانها مصطفى راح منى فى غمضة عين .. وهو بالفعل كده كان معاها و بيضحك و فى ثانية مابقاش موجود .. انهيارها كان واضح للجميع و كل ما احاول اسكتها شوية تيجى واحدة تعزيها و تقولها قلبى معاك هو غرق ازاى ياحبيبتى ؟!!!!

و هى تعيد المشهد و تنهار لحد ماجت تالت واحدة تسأل السؤال قولتلها مات وهو بيغطس مات على جنبه اليمين مات على الشمال فى الاخر غرق الطريقة هتفرق ؟

كان ردها فى منتهى الغرابه .. "انا بس كنت بطمن !!! "

هما دول الست فوائد اللى هنهيهم بكلمة قالها لى خالى " اللى مش يتعظ من الموت لا امل فيه "

بس الحق يقال .. الست فوائد دول شكلوا فايدة لشخصية كانت بتحاول تتماسك وتظهر القوة رغم انهيارها الداخلى و قدرت بسببهم تقف و تصبر الكل لدرجة ان ماحدش كان مصدق ان اللى مات ده كان من اقرب الناس ليها !!

ربنا يرحمه و يرحم جميع أموات المسلمين

امين

و دمتم سالمين

لا الأرض ملائكية و لا البركان بالطفل الوديع !

2009-07-14T09:37:00.001+03:00

كوكب النفس .. مدينة الحياة .. الماضي القريب

كان على كوكب النفس قبيلة تدعى الذات تبحث عن مكان لتستقر به , فذهبت إلى مدن كثيرة و لكنها لم تجد فى أي منهم ضالتها .. فكل المدن التى نزلت بها كان لابد أن ينقصها شيء ما ..

ففكر أهل القبيلة أن يغيروا اتجاههم فبدلا من البحث في المدن العامرة يبحثون فى الصحراء لعلهم يجدون هناك مدينتهم المنشودة ..و بالفعل حزموا أمتعتهم و رحلوا إلى الصحراء , و مر الأسبوع الأول ثم الثانى و الثالث و لم يجدوا شيئا و كادوا ان يصابوا باليأس و فكروا فى الرجوع, و لكن فى نهاية الأسبوع الثالث عندما استيقظ أهل القبيلة و جدوا أنفسهم أمام مدينة مهجورة أبنيتها شبه محطمة .. فقال أهل القبيلة لعلها هي ، فقرروا الاستقرار فيها و إعادة الحياة إليها .. و بالفعل بدأو فى العمل على ذلك و انشغلوا بإعادة بنائها .. و لم يسأل أحد قط عن سبب هجرة أهلها!!!!! .

^^^^^^^

مدينة الحياة .. الحاضر البعيد

استطاع أهل القبيلة إعادة بناء المدينة من جديد بل و جعلها من أجمل المدن على هذا الكوكب .. فتفننوا فى بناء المباني و زخرفتها , و زراعة الأرض و تهذيبها و تزيينها ، و لكن في بعض الأماكن كان يستيقظ أهل القبيلة فيجدون الأشجار قد أصابتها الشيخوخة ، و الأزهار فارقت الحياة ، فيقرر أصحاب المكان أن يبنوا عليه و يزرعوا فى مكان اخر , و لم يسأل أحد لماذا يحدث هذا ؟!!!! ..

و من وقت لآخر تحدث هزات أرضية و لكنها خفيفة يفسرها البعض أنها هزات عادية لا ضرر منها , و كان شغلهم الشاغل هو كيفية إعمار هذه الأرض و إعطائها الحياة .. و بالفعل استطاع أهل القبيلة أن يجعلوا المدينة حقاً اسماً على مسمى .

^^^^^^^^^^

مدينة الحياة .. الآن

كان أهل القبيلة يعيشون فى هدوء و سعادة و طمأنينة فهم أخيراً وجدوا الاستقرار الذي طالما حلموا به , و في يوم من الأيام استيقظ أهل القبيلة فوجدوا الهواء له رائحة غريبة على غير العادة , فشعر البعض أن هناك شيئا يحدث ، و في الساعات الأولى من النهار حدثت هزة أرضية شديدة جدااا ..وهنا انقسم أهل القبيلة إلى ثلاث فئات ..

الفئة الأولى قالت : إنه من الضروري البحث عن سبب هجرة أهل هذه المدينة لعلهم يتوصلون إلى شيء يوضح ماذا يحدث ؟ و بدأوا في البحث

الفئة الثانية قالت : إنه من الممكن أن يكون هذا اليوم يوماً صعبا و أن الرياح ستأتي و لكنها ليست بخبيثة ..

أما الثالثة فقالت : إنها ستمطر و هذا تفسير لرائحة الجو ،أما الهزة فهي ليست إلا مجرد استعداد من الأرض الأم لتلد لهم خيراتها بعد هطول المطر عليها ...

إلى أن جاءتهم الفئة الأولى بماضي هذه المدينة و حذرتهم أن أرضها ستلد بركانا عما قريب و لابد أن يرحلوا .. فلم ينصت لها أحد ! .. فرحلت الفئة الأولى و لكن بعد أن علمت جيدا أنه

"إذا أردت أن تنعم بالحاضر و المستقبل .. فلابد أن تعي الماضي جيداً "

أما الفئة الثانية فإنها أرادت أن تنتظر لترى هل ستلد بركانا حقاً أم أنها مخطئة .. إلى أن توالت الهزات و بدأت المباني في السقوط ، و هنا علمت أن وقت الوضع قد حان .. فحذرت الفئة الثالثة و لكنها لم تعط لها بالاً .. فرحلت الفئة الثانية و لكن بعد أن علمت جيدا أن

"لا أحد ينكر أن الفضول طبيعة بشرية و لكن إن لم نتحكم فى هذه الطبيعة , فسوف تقودنا إلى مالا يحمد عقباه "

أما الفئة الثالثة .. فهي دوما كانت ترى أنها أذكى من الجميع فكيف تنصت لفئة أقل منها ذكاء فهم فى نظرها ليسوا إلا جبناء, و ما يحدث هو غضب الأرض الأم على هؤلاء أما هم فلن يمسسهم سوء .. فهم من أعطوها الحياة من جديد .. وهم من ظلوا عليها و لم يرحلوا مثل الباقين ..

و بدأ البركان فى إرسال نيرانه معلناً عن مجيئه .. و هنا علمت هذه الفئة أنها كانت مخطئة فلا الأرض ملائكية كما كانت تعتقد و لا البركان بالطفل الوديع ! .. و لكنها علمت هذا بعد فوات الأوان فقد قتل البعض، أما من استطاع الهروب قد أصيب بجروح لا تشفى ، و تعلم بعد فوات الأوان أنه

"إذا أردت أن تعاند فيجب أن تحرر العقل أولا من التفكير الأحادي , و إلا ستكون أنت الخاسر الأكبر فى هذه الحياة"

^^^^^^^^^^

و أخيرا

المرأة تلد (الذكر و الأنثى) فعندما يأتي الجنين عكس ما كنا نتمنى نرضى و ننتظر , و لكن يبقى الرجل هو المسئول الوحيد عن هذا و ليست المرأة

الحياة كذلك تلد (الخير و الشر) فإن لم تلد ما نتمناه يجب أن نرضى و ننتظر , ولنعلم جيداً أننا المسئولون عن نوع الجنين دوما و ليست هى !

ودمتم سالمين

مشاهد

2009-06-27T15:32:00.001+03:00

(حب امتلاك او مصلحة .. لكن تبقى النتيجة واحدة مجرد دمية )

إياد و مها فى السنة الاخيرة من الدراسة مخطوبين من المفترض ان بعد النتيجة يتم الجواز .. لكن بسبب المشروع ظهر لاياد زميلات جدد ..كانوا شايفين اياد ملكية خاص ليهم ..لدرجة ان كل مرة يشوفوه قاعد مع مها لازم تيجى واحدة تقولها "سورى مها ..اياد عايزاك فى موضوع و تروح سحباه من ايده " ..

تسكت مها على امل ان اياد يفوق و ياخد باله و يوقف كل واحدة عند حدها ... لحد ماجت " القشة التي قصمت ظهر البعير " ..كان اياد متغيب عن الكلية و جيه تانى يوم و كان واقف هو و مها جت واحدة منهم و قالتله بحرارة "اياد وحشتنى قوى انت ماجتش ليه امبارح !!!!! " ..

وهنا انسحبت مها و بعتتله حاجته و كارت مكتوب فيه "رغم انى عارفة انها مجرد علاقة مصلحة .. إلا انى يوم ما ارتبط كنت عارفة بردو انى مرتبطة براجل (بما تحتويه الكلمة من معانى ) مش بدمية" !!!!!

^^^^^^

"يوما" عندها اصحاب كتير لكن ليها صديقة واحدة و هى "آسو" لكن ماكانتش ظاهرة على الساحة قوى .. كل واحدة من صاحبات "يوما" كانت شايفاها ملكية خاصة ليها .. "يوما" كانت بتحاول ترضى الجميع ..

لحد ماظهرت "آسو" على الشاشة هنا كانت الصعقة للكل ..لكن هيهات اصحاب "يوما" مابيحبوش يفرطوا فى ممتلكتهم ..حاولوا كتير يوقعوا مابينهم لدرجة انهم سوءوا سمعة "آسو" و قالوا عليها كلام من الباطل لا دليل له ..

"يوما" ماعملتش حاجة لصديقة عمرها رغم ان اللى حصل بسبب غيرة اصحابها اللى "آسو" ماكانتش تعرف حتى اسمائهم الا لما كان بيوصلها الكلام جيه على لسان مين !! ..

وهنا بعتت "آسو" جواب "ليوما" مكتوب فيه " صديقة العمر كان لازم انسحب بعد ماكتشفت انى طول العمر ده كنت مصادقة مجرد دمية "!!!!!

***************

(عندما تتحول الغيرة "على" الى الغير "من" .. تصبح العلاقة ليس لها محل من الاعراب)

عيسى و عزة اتجوزوا بعد قصة حب طويلة .. عزة كانت بتشتغل فى وزارة (... ) اما عيسى فكان بيشتغل فى الحى .. عدت سنين و عزة بقت سكرتيرة الوزير و اخدت امتيازات اكتر .. اما عيسى فكان محلك سر و الامتيازات اللى اخدها من الوظيفة كانت بسيطة ..

بدء عيسى يضيق على عزة فى التحكمات بحجة انها اوقات بترجع الساعة 6 و الميعاد الطبيعى كان الساعة 4 و انها بكده بتهمل بيتها .. رغم انه اصلا مابيرجعش البيت إلا على 8 او 9 و كان بيجى يلاقى كل حاجة تمام ..

و فى يوم حصلت خناقة جامدة مابينهم و كان كل كلام عيسى بمعنى او بأخر على وظيفتها الاعلى و امتيازاتها .. و خلصت الخناقة بتخيير عزة يااما الاستمرار فى الوظيفة او الانفصال !!!

و علشان الحفاظ على البيت و الاولاد تركت عزة الوظيفة .. لكن هيهات فشعور الغيرة كان اتمكن من عيسى .. واستمر عيسى فى اهانة عزة و محاولة التقليل منها قدام الجميع ومش بس كده كان بيوصل الامر انه ممكن يمد ايده عليها قدام الاولاد و تشويه سمعتها عند الاهل ..

فكانت نهاية العلاقة الانفصال !!!!!!

^^^^^^^

لوسى و روبى الاتنين محبوبين من الجميع و الكل شايف ان صداقتهم مثال حى للصداقة الجميلة .. لكن خلف الكواليس كانت غير ..

لوسى لما كانت بتلاقى الانظار اتجهت لروبى فى حاجة بتحاول بشتى الطرق انها تاخدها منها "مع وضع مليون خط تحت بشتى الطرق" ..

لما روبى تتعرف على اشخاص جديدة بتحاول لوسى تدخل مابينهم بحجة انها صحبتها و تبدأ فى لفت انظارهم ليها ..

و لتوضيح الصورة اكتر "امام الجميع لو روبى عطست تجرى لوسى تقولها الف سلامة .. خلف الكواليس لو روبى عطست و حد قالها الف سلامة بسرعة لوسى تعطس و تكح !!!! "..

و رغم ان روبى كانت عارفة ده إلا انها كانت بتحاول تفهم لوسى انها مش افضل منها بالعكس هى شايفة ان لوسى احسن منها فى حاجات كتير لكن كل المحاولات بلا فائدة ..

لحد ما وصل الامر لطعن روبى فى ضهرها بسكينة لوسى اللى كانت كاتبة عليها " اعذرونى انا كنت خايفة على مشاعر صديقتى " !!!!!!!

*************

و أخيراً

" ما فائدة السنين مادامت الحكمة مفقودة.. و ما فائدة المعرفة فى العقل الضيق !!!! "

ودمتم سالمين

بعيداً عن العنصرية اتحدث (:

2009-06-20T14:53:00.001+03:00

مبدئياً كده البوست اللى فات ماعجبنيش النقاش لأنه بجد على رأى شموسه كنتم داخلين عمر افندى مش نقاش ابدا ^_^

^^^^^

طبعا فى مدونين اعترضوا و بشده على بعض الاراء و قالوا نعكس الوضع منهم منامينو و لورنس العرب .. وبما ان محاسن كانت طلبت فى الجمهورية التانية اني اكتب عنا احنا و نشوف عايزين ايه من الرجاله الشريرين دول ((:

فقولت انزل موقفين حصلوا معايا شخصيا .. علشان نشوف فعلا البنات عايزة ايه بالضبط و بردو نشوف رأى الشباب فى البنات دى "زى ماحصل فى البوست اللى فات "

أول موقف

كنت بكلم صديقة ليا و ببارك لها لان فرحها قرب وبعد السلام و التهانى سألت عن الاحوال و ان كان فى موضوع ارتباط قريب ولا لا و بعدين قالت لى بالنص :

"خديها نصيحة من صديقة ليك .. لما تيجى تختارى جوزك متبصيش لشكله لان الشكل ليك و لغيرك .. ولا لثقافته لان الثقافة مش بتآكل عيش .. ولا الحب لان الحب بيروح بعد الجواز .. بصى لجيبه لان هو ده اللى هيعيشك !!!!!! "

تانى موقف

كنت بتكلم مع صديقة ليا بردو ماما كانت زقاها عليا علشان تعرف سبب رفضى للشخص المتقدم ايه .. هو فعلا كان تمام فى كل حاجة ماعدا شيء شخصيته ..انا الصراحة احب الانسان اللى ارتبط بيه يكون شخصيته قويه و فى نفس الوقت متفاهم ..قولتلها كده .. ردت بالنص :

" انت عايزة وجع الدماغ !!! ... يابنتى ماهو كده كويس هى فى واحدة تكره انها تكون هى المسيطرة .. انتى دماغك غريبة !!! "

طبعا الكلام ده بيأكد كلام منامينو و لورنس العرب ان فعلا فى بنات كده لكن مش المعظم زى الرجاله "شوية عنصرية بقى ^_^ "

السؤال هنا للجميع

ايه رأيكم فى الموقفين دول ؟؟

السؤال الخاص بالشباب

لو قبلت بنت و حبيتها وبعد كده حسيت ان تفكيرها كده "سواء مادي او سيطرة" هيكون تصرفك ايه ؟؟

السؤال للبنات

ايه هى المواصفات اللى عايزاها فى شريك حياتك ؟؟

ودمتم سالمين

* ياجماعة النقاش مفتوووح للجميع فى المدونة .. البوست اللى فات كان فى مدونين بتعترض و انا اللى برد لصاحب الرأى ..يعنى ياريت يكون فى متابعة بدل ما ارش عليكم ميه انا بقول اهو ^_^

تعددت الدوافع و الاجابة واحدة

2009-06-16T03:26:00.001+03:00

أنا مع ثقافة المرأة وتحررها على ألاّ تكون زوجتي

مقولة سمعتها فى برنامج و كان النقاش فى الحلقة عن عايزها مثقفة محدودة الجمال ولا جميلة محدودة (او عديمة) الثقافة

فكان رد كاتب صحفى مشهور : جميلة طبعا لان من وجهة نظره ان المرأة المثقفة مفتقدة للأنوثة و كان مقياسه مثقفات "وسط البلد" اللى دايما تحس انهم زى الرجال

وقال بالنص : مافيش اى معالم للأنوثة عليهم عاملين شعرهم ديل حصان و لابسين البنطلون الجينز و التى شرت "ده على اساس ان مافيش مثقفة محجبة" و غير كل ده مابيحطوش مكياج .. وأنا الصراحة ماحبش مراتى ماتحطش ماكياج !!!!!

و كان رد لاعب كرة مشهور : المهم عندى الجمال ... مثقفة او لا ده ليها هى !!

و كان رد دكتور : جميلة بردو .. اصل الثقافة مابتجبش عيال ؟!!!!!

و رد صحفى شهير "من جيل الزمن الجميل" : الجميلة .. لان ماينفعش يروح مثلا من الشغل يلاقيها فاتحة على برنامج ثقافى او مثلا الاخبار هو داخل البيت يرتاح من تعب الشغل و النقاشات طول اليوم مايبقاش بره و جوه !!!!!

تعددت الدوافع و الاجابة واحدة "المرأة الجميلة" هى الزوجة اما "المثقفة" فهى زميلة فقط لا غير !!!

السؤال بقى

ايه رأيكم فى الاراء اللى ذكرتها فوق دى ؟؟

و هل فعلا المرأة المثقفة بتظهر مناطق ضعف الرجل الشرقى "المحب للسيطرة بالفطرة ^_^" علشان كده بيتجنبها ؟؟

وسؤال خاص للمدونين الرجاله

عايزها مثقفة محدودة الجمال ولا جميلة محدودة (او عديمة) الثقافة؟ مع ذكر الاسباب هه ؟

و دمتم سالمين

* فى البوست ده هشيل المودريشين علشان النقاش .. بس مش عايزة خناق و دم انا بقول اهو انا لسه مبيضة المدونة

أحبك ... بقت لازمة بايخه

2009-06-02T15:06:00.003+03:00

ايوة فعلا كلمة احبك بقت لازمة

لما تلاقى شخص مابيهتمش بيك ولا بمشاعرك .. ويجى يقولك أحبك .. تبقى لازمة بايخه

لما تلاقى شخص دايما بيستهزاء باهتماماتك وأفكارك .. ويجى يقولك أحبك .. تبقى لازمة بايخه

لما تلاقى شخص وجودك زى عدمه بالنسبة ليه .. ويجى يقولك أحبك ..تبقى لازمة بايخه

لما تلاقى شخص كل اهتمامه نفسه وبس وأنت مجرد شخص بيرتاح معك فقط .. ويجى يقولك احبك .. تبقى لازمة بايخه

لما تلاقى شخص دايما فعله معك بيخالف كلامه .. ويجى يقولك أحبك ... تبقى لازمة بايخه

لما تلاقى شخص مايحبش يظهر حبه ليك امام الجميع .. ويجى يقولك أحبك .. تبقى لازمة بايخه

لما تلاقى شخص يحب يظهرك انك وحش فى نظر الناس وهو الأحسن ... ويجى يقولك أحبك .. تبقى لازمة بايخه

لما تلاقى شخص عايز ينتقم لنفسه حتى لو الانتقام دا هايضرك لكن مش مهم عنده ضررك ... ويجى يقولك أحبك ... تبقى لازمة بايخه

لما تلاقى شخص بيعملك بوش ومن وراك بوش تانى ... ويجى يقولك أحبك .. تبقى لازمة بايخه

و لما... و لما .... و لما ......

بس أنا بقى مش عايزة أسمع لازمة بايخه

مش عايزة حد يقولى أحبك مجرد كلمة من اربع حروف و بس

مش عايزة حد يقولى احبك إلا لما يعرف المعنى للحب دا

^^^^^^

** البوست ده قديم كنت نشرته قبل كده فى المدونة التانية .. لكن بعد ما دخلت عند هاجر و شوفت بوستها .. حسيت ان محتاجة فعلا اعادة نشر البوست دا

ودمتم سالمين

أمر و إنذار

2009-05-29T16:51:00.009+03:00

أمر البرنسيس شموسة إلى صاحبة مدونة ضد التيار

ــــــــــــ

لما كان الغرض الوحيد من انشاء المدونة التي يوفرها موقع بلوجر هو امتلاك مساحة حرة لتعبر فيها عن آرائك في المواضيع التي تقع ضمن اهتماماتك، فنحن قد صرحنا له وضع القوانين التى يرى لزوما وضعها ، فيجب عليكم حال وصول أمرنا هذا إليكم أن تطيعوا أوامره كما لو كانت صادرة منا، فمن يخضع له كأنه خضع لنا شخصيا، ومن خالفه يعد عاصيا لنا ويعامل معاملة العاصي، وقد أصدرنا أمرنا هذا إليكم للعمل بمقتضاه."

^^^^^^

و طبعا ياجماعة ضد التيار لا حياة لمن تنادي و بقت مخالفة للأوامر ..
اوم ايه جالها انذار على يد محضر من شموسة و نصه كالآتي :
إنذار برنسيس شموسة

ـــــــــــ

صاحبة مدونة ضد التيار - أتشرف بإخباركم أني علمت من بلوجر أنه قد تم مخالفة الأوامر و اهمال مدونتكم، فيجب علي فى هذه الحالة أن أنبه عليكم بوقف هذا الإهمال ، فإن لم يقف وتجدد يكون واجبا علي نشر نداء فى المدونة الخاصة بي "مع التفنن فى صياغته".

اللهم بلغت اللهم فأشهد

^^^^^^

و طبعا ياجماعة و على رأى المثل "خبطتين في الراس توجع"
و بما ان شموسة قالت لو حتى كلمة واحدة المهم ان القفل ده يتكسر و الأوامر تتنفذ
يااما كده يااما بلوجر كله هيتفرج عليه عاااااااااااااااااااااااااااااااااااااااااا
فقولت انزل بقى الأمر و الإنذار .. و اقول بجد واحشنى صداعي ليكم نيهاهاهاهاها
و كمان أقول لشموستى ألف سلامة عليك و ربنا يتم شفائك على خير
اللهم امين

و دمتم سالمين

المستبد و الشخصية التابعة

2009-05-03T14:18:00.002+03:00

بما ان الفترة اللى فاتت دماغي واقفة عن التفكير فى اي حاجة .. قولت الواحد يخرج من اللى هو فى ..بس ده ازاي ؟؟.. مالقتش غير حبيبتي القراية هي الوحيدة اللى بتقدر تخرجني من اللى انا فيه ده

و كان عندي اختيارين يااما اكمل كتاب " ماذا لو حكم الإخوان ؟؟ " او الكتاب اللى اتطلب مني من فترة اني اقراه لكن الصراحة كنت بكسل وهو "كتاب طبائع الاستبداد و مصارع الاستعباد"

و لاني مش في الحالة اللي تخليني اكمل الكتاب الاول فوقع الاختيار على التاني

و طبعا لما قريته عرفت ان قلبي كان حاسس اني بعد ماهقرا الكتاب ده هصدعكم فاختاره علشان عارف ان وحشكم صداعي D:

المهم انا مش هتكلم عن موضوع الكتاب نفسه اللى هو استبداد الحاكم .. لأ انا هتكلم عن الشخصية المستبدة اللي هي ممكن تكون صديق او زميل عمل .. الخ

صاحب الشخصية المستبدة دكتاتوري الطبع سادي التصرف من اول و أهم مبادئه في الحياة مقولة مكيافيللي " من الأفضل أن يخشاك الناس على أن يحبوك "

علشان كده تلاقي ان معظم اللي حواليه (ان ماكنش الكل) اصحاب الشخصية التابعة .. و قليل قوووي لو لاقيته على علاقة مع اصحاب الشخصية القوية
لانه من الصعب يمارس عليه اسلوبه و دايما بيبقي ليه الناصح الامين و ده طبعا ضد مبادئه فهو مابيسمعش ولا بيشوف غير نفسه فقط

الغريب فى الامر انه بيبقي عارف فعلا ان اللي حواليه بيأمنوا علي كلامه و بيسمعوا خوف منه مش احترام ولا اقتناع بأفعاله ولا كلامه ..
علشان كده تلاقيه دايما بيشك فى اللي حواليه لأنه عارف انه اول لما يعطي ضهره لحد فيهم هيطعنه

المشكلة بقى في الشخصية التابعة بجد .. ليه؟؟ ... لاني قبلت منهم كتير و للأسف فى منهم اللي يندرج اسمه تحت قائمة المناضلين من اجل التغيير

تفتكروا شخصية زى دي مش عارفة تتغلب على خوفها و تواجه شخص مالوش سلطة فى البلد .. هتقدر تواجه اصحاب السلطة ؟؟؟!!!

اممم ماظنش

المهم نيجي بقى للأسئلة اللي على اساسها نزل البوست ده

لو قابلتوا الشخصية المستبدة دي في حياتكم ياترى هتتصرفوا معاها ازاي ؟؟؟

و ليه الناس بتحب النفاق عن الصراحة ؟

(و ماحدش بقولي علشان الصراحة بتوجع .. هقوله وجع ساعة ولا كل ساعة .. غير ان الشخصية اصلا بتبقى عارفة ان الناس بتنافقها )

تفتكروا مكيافيللى كان عنده حق فى المقولة دي ؟؟

من وجهة نظركم ايه السبب ان الانسان يرتضى ان يكون تابع لشخص على انه يكون مستقل بذاته ؟؟؟؟

تفتكروا طول ما الشعب (مش الحكومة) فيه الشخصية المستبدة و التابعة و السلبية هنقدر فعلا نغير و لو 1% من البلد دي ؟؟؟

ودمتم سالمين ):

أنا أسفة

2009-04-28T07:09:00.001+03:00

و مين قال ...

اني حزينة .. انا فرحانة و بغني

و مش فارقة ويايا

مين فارق / مين موجود

.........

و ضى العين اهو منور و مش مطفي

و مش بتحايل على الضحكة

عشان تطلع .. و أداري فيها احزاني

ده انا ضحكي كمان عالي .. و سناني اهى باينة

من كتر الفرحة اللى ملياني

و مين قال اني مش خاينة

طب اسأل قلبي هيقولك

دى خانتني و صانت عقل "قاسي"

ظاهر قوة خافي ضعفي

و دايس قوووى على جرحي

و مين قال طريق الحزن عنواني

ده فرحي ويايا من صغري

و الحزن تايه عن بابي

.......

و مين قال اني مابكدبشي

لا انا بكدب و كدبي باين فى كلامي

و بتصنع كمان قوة

و انا أضعف حتي من ضعفي

و عيني بردو حرقاني
و دموعي معنداني

و بتحايل ليها تنزل تطبطب على خدي / تحضني

لكن بردو مافيش فايدة

و دقات القلب بتبطء و مش قادرة اتنفس

فبترجا يلم النبض المتفرفت على جرحي

يرد يقولي .. و ايه الفايدة ؟!

ماروحك خلاص ضاعت منك و مش راجعة

و نفس الاحساس جيه تاني

ف يوم مافرقت الجدة دموعي و قلبي عندوني

و روحها ودعت روحي و خادتها

جت ترجع تاهت مني .. و كان حلمي

لما اشوف انا عينها

ترجعلي روحي من تاني

لكن فارقت و فارق حلمي وياها

و صمت دموعي يحرقني و يسألني

طب فرقوا ليه ؟!!

........

فاستغفر و اجري أتوضا و اصلي

و فى السجدة اتحايل على ربي

تجيني فى حلمي تحضني

ابوس ايدها / اعاتبها

ليه يا امي تفرقي قبل ماتزوري

قلب كان نفسه يكون جنبك

و يشرب من حنان قلبك

ماهو حكي كتير عنك / وحسيتك

و كان حلمي اني اقابلك و اسمع

" بت انتي " و افرح بيها مدام منك

لكن هو مايقولهاش

و بدعي كمان تتقابل هي و الجدة

يجولي في حلمي نتسامر

اناكفهم / اضحكهم .. و نتفارق

على وعد بميعاد تاني

فى حلم جديد

و بدعي انه يسامحني

عشان ابعد من السما عنه

و خايفة اقرب يجي يسند على كتفي

و انا مش قادرة اسندني

فيقع مني

ما انا طول الطريق ماشية و بعاني

من فراق جدة .. و مافوقتش

خبطت ف فراق غالية

وقعت

و مش قادرة اقوم تاني

أنا أسفة

بعكشة و اعتذار

2009-03-12T23:36:00.001+02:00

لابس توب مهوش توبك

و متخفى ورا الجدران

حافظلك كلمتين فى النوت

وبتقولهم فى كل مكان

و فى الامكان كمان تخدع قلوب تانيه

بتوبك الزايف

و مش عارف ولا شايف

بان طريقك اخره سد

و صورتك العالية راح تنزل لسااااابع ارض

^^^^^^^^

سيبكوا بقى من البعكشه اللى فوق دى

الاول كل سنه و انتم طيبين متأخر بقى ):

و بجد انا بعتذر لعدم متابعتى الفتره اللى فاتت دى لبوستاتكم ولا حتى للمدونة عندى بسبب مرض جدو .. بس الحمدلله هو بقى بخير ..

شكر خاص لشموسه و كيارا اللى كنت بوصلهم قلقى الدائم ...

و محمود و المعتصم و ازهرى على سؤالهم ..

و طبعا ابو شوشو علي اهتمامه وسؤاله

وبشكر منوش و احمد الشاعر و زوجة عنيده لسؤالهم عني

وبعتذر عن القلق اللي سببته ليكم بغيابي

دمتم سالمين

قولا لا فعلا

2009-03-04T00:25:00.001+02:00

بقينا فى زمن الكلمه المسموعة و الفعل الغير متاح فى جميع جوانب الحياة

الاباء بيربوا الابناء على عدم الكدب و احترام الثقة و الصراحة التامة و عدم الخوف و لازم تقول الحق و لو على رقابتك ..الخ

نيجى بقى للواقع .. المثل المعروف الاب او الام موجودين و بينكروا وجودهم لما حد يتصل .. المبرر انى مش قادر اتكلم او مش حابب اكلم اللى بيتصل او مشغول

الاب ليه علاقاته هنقول محترمه لكن مخفيه عن الزوجه و المبرر اصل مقدرش اعمل كده قدامها لانى بخاف على مشاعرها

الام ليها علاقاتها اللى بردو محترمه لكن مخفيه بردو عن الزوج و المبرر هو هو

(خيانة ثقة و كدب و عدم صراحة و ..الخ) يعنى قولا لا فعلا

الصداقه اسمى شئ فى الوجود وهتكلم عن صداقة البنات لان الأولاد قليل قوى الصراحة لما ألاقى فيها خيانة اصلا او اقوال لا افعال فيها

واحده تفضل تقول اسس و قواعد الصداقه وحب لأخيك ماتحبه لنفسك ..الخ و تنصح الناس

نيجى نشوف الواقع .. تلاقيها بتخون او تغدر او تغير من الصديقه و ماتتمناش الخير ليها .. يعنى قولا لا فعلا

راجل تقعد تتكلم معاه عن المرأة وحقوقها تلاقى كلامه انه مؤيد حرية المرأة مدام فى حدود الشرع و الدين .. و لازم المجتمع يبطل تخلف و يعرف انها كائن حى زيها زى الراجل .. ممكن يكون فى علاقة مابين الجنسين مدام فى حدود الاحترام و يضرب بعرض الحائط العادات و التقاليد

نشوف الواقع .. نسخه مصغره من سى السيد ولا فى حرية و لا حقوق الشغل ممنوع و لو فى كلام يبقى ممنوع مع الجنس الاخر حتى لو كان قد ابوها .. و فى طبعا اللى لازم و مجبر بسبب ظروف المعيشة بيوافق ان المرأة تشتغل بيبقى واقف بالمرصاد اتكلمت مع مين و عملت ايه و هكذا ... قولا لا فعلا

شخصيه ما (راجل او ست ) تقعد تتكلم عن المبادئ و القيم و الاخلاق و المفروض و الواجب

ننزل الواقع .. تلاقيها بتضرب بعرض الحائط كل القيم و الاخلاق و المبادئ .. قولا لا فعلا

كل النماذج دى للأسف موجودة بينا فى الواقع و اشخاص ممكن نقابلهم فى الحياة كتييير .. يقولوا كلام و الفعل يكون العكس

مش عارفه ليه بجد احنا بقينا كده ليه الواحد مش قادر يكون قد كلامه .. ليه مدام احنا بنعمل حاجه بنقول عكسها .. ليه مدام الواحد مش مقتنع باللى بيعمله يعمله اصلا

بنعترض قوووى على الحكومة و المسؤولين انهم بيقولوا كلام و بيعملوا عكسه

و احنا نفسنا بقينا بنعمل كده .. و ده اللى بيأكد كلامى ان الاعتراض بشده هو القبول بعينه زى ماقولت فى بوست فات

و ماحدش يقولى فى مبادئ ممكن تتغير مع تغير الزمن لكن المبادئ اللى اتربينا عليها و اللى الدين بيقول عليها دى لا يمكن تتغير .. لا كل المبادئ دلوقتى بتتغير و ربنا يخلى ثقافة التبرير اللى بجد بقينا نستخدمها علشان نحلل كل فعل بنعمله و ماحدش يقول عليه غلط .. رغم الاقتناع انه غلط بس للغير مش لينا احنا

ولا انتم ايه رأيكم ؟؟

و دمتم سالمين

أنا اللى جبت ده كله لنفسى 2

2009-02-25T08:51:00.001+02:00

آآآه يانى شكلى ياجماعه لحد الشهر الغريب ده مايخلص هفضل اقول انا اللى جبت ده كله لنفسى )):

انا بجد مش عارفه ايه اللى بيحصلي الايام دى كل شئ غير طبيعى بالمرة ولا منطقى من اول التحركات اللى فى البيت لحد المدونة الغلبانة دى نفسها مروراً بالموبايل كمان .. و كله على بعضه

المهم الحكاية وما فيها انى انا بيضرب بيا المثل .. بلاش تسرع و تقولوا ايه المشكله دى حاجه حلوة خالص جدا قوووى .. اصبروا و هتعرفوا انها حاجه وحشه جدااااااااا

امبارح كان خالى عامل حفله علشان هيسافر (ده على اساس انه هيقعد قرن مش 6شهور او سنه و هيرجع ) بس عادى ماهو كل مره بيعمل حفله لكن بتكون عائليه المرة دى كانت غير كده خالص .. بس بردو عادى ماهو الايام دى انا متوقعه اى شئ غريب

المهم فى القاعدة الكل قاعد يتكلم الغريب و القريب و الكلام جاب كلام لحد ما الكلام وصل ان الشباب بقى متسرع و طايش .. و اذا فجأة ألاقى تاتو الجميلة بتتكلم و بتضرب مثل على طيش الشباب (طبعا عرفتوا المثل كان عن مين)

انا طبعا تنحت و ازبهلت و بقول فى عقل بالى هو انتى لسه فاكره ياتاتو ده الموضوع فات من سنين .. كل ده وعااادى قولت اهو بردو تعتبر جلسة مغلقة .. لكن لقيت رولى حبيبتى بتكمل الحكاية اللى بتقولها جدتى .. و لما سألت هى عرفت ازاى .. قالت يابنتى ماهى لما كنا قاعدين فى النادى و لما بردو اتكلموا فى نفس الموضوع اضرب نفس المثل

آآآآه يامعدتى يااااانى ... يعنى الحمد لله بقيت مثل لطيش الشباب و تسرعه و نص مصر عرفت الحكاية ..طبعا عايزين تعرفوا ايه هى الحكاية علشان تشمتوا فيه زى البوست اللى فات .. هقولكم الحكاية و اهو بالمرة يبقى النص التانى عرفها و اكون مثل رسمى نظمى عبد الحكيم لطيش و تسرع الشباب

من يجى اربع سنين (اربع سنين و جدتى لسه فاكره . اللهم لا حسد) كنت مروحه البيت من بعد يوم شاااق من محاضرات لشغل و كنت خلاص هنام و انا ماشيه .. انا طبيعى لما بركب ميكروباص بركب قدام جنب السواق لوحدى بس اليوم ده الصراحة ماكنتش فايقة انى اتنك فقولت مش مشكله اركب ورا و خلاص .. ركبت و ركب جنبى واحد غريب الشكل و الملامح و الميكروباص طلع و انا سرحانة بره ألاقى فجأة ايد بتتحرك (لالالا تعالوا هنا ركزوا معايا ) ابص ألاقى الاستاذ بيحاول يمسك الشنطة و اول لما بصتله اتعدل.. قولت يابت جايز يكون كان بيجيب حاجة وخبط فيها ماهى بينى و بينه .. و كبرت دماغى

بعدها بشويه ألاقى نفس الشخص عمال بيعمل حاجه فى الكرسى اللى قدامه .. استغربت حاولت اركز و اشوف بيعمل ايه (الفضول وحشششش) ألاقى الاستاذ ماسك حاجه فى ايده و بيقطع جراب الموبايل بتاع اللى قدامه من تحت .. رحت بصه من الشباك و انا مش مستوعبه الموقف اصلا .. و طبعا لان البت شجاعة بتحبنى قوووى ظهرت فى الوقت ده

شجاعة : ايه ده !!! ده بيحاول يسرق الموبايل

انا : ايوة عارفه ... حد قالك انى فاكره انه بيلعب سلطح مثلا

شجاعة : طيب هتعملى ايه ؟؟ هتسكتى ؟؟؟!!

انا : عايزة ايه منى الساعة دى .. اعمل ايه يعنى ؟

شجاعة : ترضى حد يعمل فيكى كده ؟

انا : لا طبعا ..بس اعمل ايه انا .. اعمل زى الافلام العربى و اصرخ و اقول امسسك حرامى

شجاعة : لا بس بردو لازم تتصرفى اعملى اى حاجه

رحت بصه لايده و بصتله .. راح باصص ليا بنظره مكر و رسم ضحكه خبيثة على وشه

وفجأة لقيت اللمبة نورت فوق دماغى .. رحت بسرعة واخده منه النظرة و الابتسامة كوبى بست على طووول و رحت حاطهم على وشى و بكل هدووووء خبطت على كتف الراجل اللى بيتسرق و قولتله .. خالى بالك من الموبايل لو سمحت

لقيت انكل الحرامى راح راجع لورا و بعدها طلع حاجه من جيبه و رفعها وتناها بخفه يد غرييييبة و راح حاططها تحت التى شيرت .. و طبعا شجاعة كالعادة خلعت بعد ماتصدرت انا فى وش المدفع .. فضلت افكر اعمل ايه .. لحد ماقولت مابدهاش بقى و بصوت عالى ..انت يعنى بتخوفنى بالبتاعه اللى فى ايدك دى ولا ايه

هنا بقى الميكروباص كله اخد باله و الراجل اللى كان بيتسرق فهم انا ليه قولت كده و قال للسواق يطلع على القسم .. بس من الواضح ان السواق يااما بارد يااما كان معاه الله اعلم .. عمل نفسه عبيط لحد ما الصوت طبعا بقى عالى جداا .. لقيته و بكل برود

السواق : تعالى اركبى قدام ياابلة و خلاص

انا : هو ايه اللى خلاص .. انت شارب حاجه على المسا ..ده حرامى و بقول طلع حاجه من جيبه و حاطها تحت التى شرت

و طبعا بعد زعيق من الناس للسواق .. لقيت انكل الحرامى بيقول اقف هنا يااسطى انزل .. ووقف فعلا السواق و نزل بدون ما اى حد ينطق .. و انا طبعا سكت قولت و الله بقى مدام اللى كان بيتسرق سكت برحته يسبوه طليق يكتفه انا مالى

المهم نزل الحمد لله و فجأة ألاقى ستو الحاجه اللى قدام بتصوووووت و الشاب اللى قدامى ماسك القزاز اللى جنبى علشان يفضل مقفول و ابص ألاقى انكل الحرامى شكله كان مضايق منى مش عارفه ليه و مصمم انه يسيب علامة فيا باى طريقه .. و طبعا السواق البارد كان ماشى براحه لحد ما الناس زعقوا فيه و قالوله يسرع .. و الموضوع عدى بسلام الحمد لله و نزلت

روحت البيت متنحه و مش عارفه هو مين كان فين و ايه اللى حصل .. ماما اول لما دخلت بتسألنى و أنا و لا هنا .. و بعد مافوقت من اللى حصل قولتلها على الحكاية و طبعا كالعادة ماما وصلت على تاتو و تاتو وصلت على نص مصر الحمد لله وبقيت من يومها و انا مثل لطيش الشباب و تسرعه من غير ماانا اعرف إلا امبارح

و ادى اخرة لسانى و صداقة البت شجاعة

و اسمع اغنيه و انا كان مالى ماكنت فى حالى

و انزلوا بعدها بتتر صعبان عليا نفسى علشان هعيط اهئ اهئ

و دمتم سالمين

انا اللى جبت ده كله لنفسى)):

2009-02-20T01:32:00.001+02:00

النهارده قررت اعمل عملية انتحارية واقنع ابى العزيز انى ارجع لشغلى القديم تانى

و طبعا لانى كنت فاكره ان النهارده زى اى يوم عادى و ان الحوار زى اى حوار عادى بيحصل بينا .. اتشجعت و اتكلمت

انا : ابى الجميل يااحلى الباباهات اللى فى الدنيا .. عايزة اتكلم معاك فى موضوع

بابا : خييييييير .. حكم انا عارف طقم الحنيه ده لازم يكون ورا مصيبة

انا : ليه بس ياحج ربنا مايجيب مصايب .. بص يابابيتو ياجميل انت هو احنا هنتناقش عادى يعنى و ياتقنعني يااقنعك .. انا عايزة ارجع تانى الشغل

بابا و بكل هدوووء : لأ

انا : لأ ليه بقى ؟ انا زهقت من القاعدة دى اصلا .. و كمان انا عايزة اعرف انت رافض ليه ؟

بابا : و انا اوافق ليه من الاساس ؟؟؟ دى شغلانه كلها وجع دماغ

انا : صدقنى ماهيكون فى وجع دماغ ولا حاجه .. و كمان بقى انا بحب الشغل ده و عايزة ارجع له

بابا : و انا قولت لأ يبقى لأ

انا : بابا انت معودنا لما يكون فى رفض يبقى فى حوار و اقناع مش رفض و خلاص .. يبقى نتناقش و نتحاور و تقنعنى بالرفض .. وكمان وجع الدماغ مش سبب الصراحة للرفض اساسا بقى هه

بابا سكت سكوت مريب مرتحتلوش (وكان احساسى فى محله )

بابا : ماشى هنتناقش و نتحاور زى ماانتى عايزة لكن على شرط

انا : ايه هو ؟

بابا : انك تتكلمى براحه و بلاش طريقة السرعة و اكل الحروف بتاعتك دى

سمسمه اختى اللذيذة : اوبااااااا ليه بس كده يابابا جيت على الوجيعة

انا : مالكيش دعوة انتى ياخفيفة و كمان ايه اللى مقعدك معانا قومى من هنا .. و على فكرة بقى يابابا الشرط ده مش حلو خالص و انت كده واخد فكرة عنى وحشه جداا كل مافى الامر لما بتكلم بسرعة علشان احنا فى زمن السرعة و لازم نلحقه

بابا وهو مبتسم : و الله !!! ماشى اعمل نفسى مصدق الكلام و نغير الشرط .. قولى ستى بستلى بسبوسة او امر امير الامراء .. وأنا اتناقش معاكى يابتاعت زمن السرعة

(احم احم انا مش لدغه و الله بس كل مافى الامر انى فعلا لما اتكلم براحه بعض مخارج الحروف عندى بتحسس اللى قدامى انى لدغه .. و بابا طبعا لما سكت كان بيفكر ازاى يخلينى ارفع الراية البيضا و اقفل موضوع الرجوع .. و للأسف اقدر )

انا : على فكرة بقى انا مش عايزة ارجع الشغل و اصلا انا بحب قاعدة البيت و مش عايزة اشتغل .. و على فكرة بقى دى مش معاملة نهائى هه بس

و الحوار اتقفل على كده بس انا لن استسلم ابدا .. و فضلت افكر طول اليوم ازاى اقنعه انى ارجع تانى .. وبعد تفكير قولت مافيش غير ماميتو الجميلة هى اى نعم رافضه هى كمان لكن قولت احاول معاها و هى بقى تبقى تكلمه . ودخلت لها المطبخ

انا : ماميتو الجميلة مش عايزة اى حاجه اسعدك فيها

ماما : قولى عايزة ايه و بلاش طقم البكش بتاعك ده

انا : احم احم دايما فهمانى صح و الله .. بس ده مايمنعش انى اعملك حاجه و انا بتكلم معاكى

ماما : خلاص اعملى قهوة .. و اقولى عايزة ايه

المهم وقفت اعمل القهوة و بفكر ازاى ابدأ الكلام .. وماما بتشيل الحاجات فى المطبخ وفجأة حطت على ترابيزة المطبخ حلة و قالت لى ابقى اشيلها (مش اسكت انا و قول حاضر و خلاص ..لا ازاى لازم لسانى اللى دايما جيبلى مشاكل يتكلم )

انا : ماميتو انا بعمل القهوة و خلصت المكان اصلا ممكن تشيليها بقى و خصوصا انك خلصتى اللى فى ايدك

و طبعا لان اليوم ده غير عادى فلازم الموضوع مايعديش بسلام

ماما و هى سانده على الحوض و بابتسامة خفيفة : بعد ماتخلصى القهوة شيليها بردو

مش عارفه ليه امى كانت مصممة انى اشيلها .. وقفت اعمل القهوة و نسيت موضوع الشغل اصلا وبفكر ازاى اتخلص من الاضطهاد اللى بيحصل ده

انا : على فكرة ياماميتو ما انا ممكن اشيلها بس ماحطهاش صح ولا اساسا احطها فى مكانها مثلا

ماما و هى بتمد ايديها على المعلقه الخشب و بنفس الابتسامة : طيب انا عايزة اشوف هتشليها ازاى

طبعا انا شوفت المعلقه الخشب رحت زى الشطورة طبعا شلتها فى مكانها و بكلم نفسى

انا : كان فيها ايه لو شيلتيها من غير ماتتكلمى ..لا ماهو بردو احساس الاضطهاد ده وحش قوى ازاى بس اسكت .. انا لازم اعترض ايوة امال ايه انا بعمل الحاجه تحت تهديد السلاح مش معاملة خالص دى

انا : انا شلتها اهو ...بس على فكرة بقى ياماميتو احنا كأفراد بيت واحد لازم فى تعاون و كمان بقى استخدام الصلاحيات دى مش معاملة خالص

ماما : فعلا هى مش معاملة .. انا بقى هوريكى المعاملة الصح

طبعا هى قبل ماتخلص الكلمة كنت قولت يافكيك لممارسه التمرين اليومى (اللف حوالين السفرة)

ماما : انتى فاكره انى كده مش هطولك ؟

انا بلسانى اللى عايز قطعه : هو منطقيا انك لو فعلا مديتى ايدك حتى لو بالمعلقة مش هطولينى لان السفرة مستطيلة و حتى لو دائرية ممكن ابعد شويه و بردو مش هطولينى

ماما و هى بتضحك من منظرى اللى بيعانى من الاضطهاد : ماشى يابتاعت المنطق .. انا بقى مش هتعب نفسى .. تعالى هنا علشان اضربك

انا : ايه ده ازاى يعنى دى بقى

ماما و هى بردو بتضحك : استخدام صلاحيات بقى .. يلا تعالى علشان اضربك

و طبعا لان الست دى امى ماكنش ينفع ارفض و رحتلها و انا خلاص هعيط ..ايوة ماهو احساس الاضطهاد وحش و ربنا

ماما بابتسامة خفيفة : تخيلى انى مبقاش ليا نفس اضربك دلوقتى ..خلاص روحى دلوقتى و لما يجيلى مزاج ابقى اناديكى

و سابتنى و دخلت المطبخ .. و انا واقفة مش مستوعبة اى حاجه و هو ايه اللى بيحصل فى البيت ده ..لالالالالا ده ظلم و الله .. و فضلت افكر و اخيرا .. وقفت على باب المطبخ

انا : على فكرة بقى ده ظلم و ديكتاتورية كمان هه

طبعا قولت الكلام ده و يافكيك بس المرة دى على اوضتى و قفلت الباب بالترباس ايوة ماهو انا عارفه اللى كان هيحصل فعلا المرة دى

ماما : يعنى انتى هتفضلى طول حياتك جوه .. بس لماتخرجى انا هوريكى الظلم اللى على حق

و من وقتها ياعالم و انا محبوسة فى الاوضة بقالى ساعة ونص و الميه خلصت و همووووت من العطش .. و البت شجاعة عماله تزن فى ودنى

شجاعة : ماحدش بيموت من معلقه خشب لكن ممكن يموت من العطش

انا : ايوة يا شجاعة بس بردو برستيجى

شجاعة : ماهو انتى السبب بلسانك اللى مابيسكوتش ده استحملى بقى ..و كمان الميه ولا برستيجك

و طبعا لقيت ان شجاعة عندها حق و عشان الميه كل شئ يهون

علشان كده قررت انى اخرج دلوقتى اجيب الميه وربنا يستر

بس لو ماضفتش التعليقات خلال 3 ايام اعرفوا ان خلاص رحت فى خبر كان

اما لو ضفتها بعد يوم و نص كده يبقى الحمد لله الموضوع وصل للكسر فقط لاغير و انا مازلت حيه ارزق

و فى الحالتين المدونة امانة فى رقبتكم خدو بالكم منها كل يوم ادخلوا اطمنوا على الشمع اللى فوق ده علشان لو خلص تغيروه بدل ما الدنيا تضلم هنا اكتر ماهى مضلمة

اما بقى لو ضفت التعليقات عادى فى وقتها بدون تأخير فاعرفوا ان مفيش فايدة و هفضل بردو تعباكم و مصدعاكم و قلقاكم فى مدونتكم هتعملوا ايه قدركم بقى ((:

** و ادى جزاء اللى مايسمعش كلمة بابا يقولها )):

و دمتم سالمين

شكر .. و فضفضة

2009-02-15T06:40:00.001+02:00

اولا بجد بشكر كل اللى دخل و قال رأيه فى البوست اللى فات

و الحمد لله فى امل هو اى نعم الموضوع هياخد وقت اكيد

بس انا متفائلة خير ان شاء الله

ادعوا لهم ان ربنا يتمم لهم على خير ويرجعوا بقى يلبسوا الدبل تانى علشان ايديهم بقى شكلها وحش قووووى )):

^^^^^^

امبارح و انا قاعدة فى المستشفى عند جدو لاقتنى فكرت فى الموت

و فكرت عملت ايه و ايه لسه ماعملتهوش ولقيت ان فى حاجات كتير

انا لسه مقصرة فيها و ناويت ان شاء الله انى ابدأ اعملها

لان فعلا الواحد مش عارف العمر فاضل فيه قد ايه

وبعد كده لاقتنى بفكر ان فى حاجات كتير هتوحشنى بردو

منكفتى (اللى جايه من منكفه يعنى) لكل فرد فى العيلة بلا استثناء

اصحابى و لقبهم ليا (انتى لسان و طلعله بنى ادم) علشان كل كلمة لازم اعلق عليها

هتوحشنى كلمة مبحبش لشموسه فى المطبخ و هى تقولى مافيش حاجه اسمها مبحبش لازم تحبى

منكفتى فى محاسن و زمانها المختلف و كيارا و التوهان اللى هى فيه

وسوووول و دلع الاسم اللى لحد الان ماعرفناش هيبقى ايه

و ولد مصرى و اعتراضى الدائم عنده فى التعليقات

و ازهرى و الحبر اللى كل شويه اقوله ماوصلش و هو يقول هرفع قضيه علشان وصل

احتلالى للمدونات و طلبى الدائم لمحمد انه يدفع الرسوم الاداريه

ولأول مرة هتوحشنى مسيرة ضد ياضد (:

هتوحشنى محاضرات جدو كل يوم

بجد لقيت ان فى حاجات كتير قووووى هتوحشنى

وحاجات كتير قوى فى حياتى حلوة بجد ..بس للأسف انا اللى كنت مش واخدة بالى منها لانى كنت بفكر فى الاحزان

بجد اكتشفت فعلا ان مافيش حاجة تستاهل انى افضل عايشه فى الاحزان ..

و انى لما امر بتجربة حزينة اقف واخد منها الدرس و اعدى البر التانى و اقول الحمد لله عديت

و اكمل طريقى و اشوف الحلو اللى فى حياتى و احمد ربنا عليه و ارمى ورا ضهرى الاحزان

يلا بقى كفاية كده صدعتكم

و بجد بشكر تانى كل واحد دخل و قالى رأيه فى البوست اللى فات

و ربنا يخلينى ليكم يارب و افضل تعباكم و مصدعاكم كدا على طول

قولوا اميييييييين (:

و دمتم سالمين

حيرااااااانة

2009-02-11T21:11:00.001+02:00

احساس وحش قوى لما تنجرحى من الانسان الوحيد اللى حبتيه بجد

و رغم كل عيوبه بتفتكرى مميزاته علشان تقدرى تعيشى معاه

مع ان كل اللى حواليك واهلك بيقولولك ماحدش بيتغير و هتتعبى

لكن انتى بردو كنتى بتقنعى نفسك انه اكيد هيفوق لنفسه و يتغير

و فجأة ميقدرش كل ده .. و فاكر انك لما تسامحى ضعف منك

مش لأنك بتحبى بجد

الاصعب من الاحساس ده لما تقررى البعد .. و تحاولى توسعى دائرة علاقاتك و تموتى نفسك فى الشغل على امل انك هتقدرى تنسى

تكتشفى ان لسه مكانه فاضى .. لكن زى ماكنتى بتقنعى نفسك انه هيفوق بردو بتقنعيها انك هتقدرى تنسى

و رغم ضحكك و تمثيلك حاله النسيان و انك خلاص عايشه حياتك .. إلا انك من جواك تايهه

قالت الكلام ده ليا و بدأت فى البكاء ... حاولت اهون عليها و اخرجها من اللى هى فيه

ورغم انها حاولت تتظاهر انها بقت كويسة إلا انى عارفة انها مش كده

و من وقت ما سبتها وأنا مخنوقة و حاسة بالعجز

^^^^^^^^^^

اصعب احساس لما الانسان يكتشف ان كان بين ايده جوهرة وهو اللى ضيعها

بجد الانسانة دى انا مش هلاقى زيها تانى .. كنت فاكر انى فهمتها لكن اتضح انى عمرى مافهمتها

غلطت في حقها كتير و ظلمتها معايا ومعترف.. و بجد ندمان عليها و نفسى انها تسامحنى

لما بعدت عنى حسيت فعلا بقيمتها .. عايز اكلمها و اقولها انى اتغيرت بجد بس خايف انها متصدقنيش .. و هيكون معاها حق فى كده بس بجد انا محتاجها جنبى

خايف يكون فات الاوان .. خايف من حاجات كتير قوووى .. مش عارف

قال الكلام ده و عينه مليانة بالدموع .. و لأول مره اشوف الانسان ده كده بس بجد صوته فعلا كان مخنوق قوووى و حسيت فعلا انه ندمان بجد و انه اتغير

طلب منى انى اتدخل فى الموضوع .. قولت هحاول لو فعلا لقيت انها مستعدة للكلام ان شاء الله اكلمها

^^^^^^

انا بقى دلوقتى مش عارفة اعمل ايه فعلا .. الاتنين من اعز اصدقائى و الاتنين زعلانة عليهم

انا عارفة انها اتظلمت كتير معاه بس بردو انا حاسة انه ندمان فعلا

و بجد صعبان عليا ان حب 3 سنين يتهدم بالشكل ده و خصوصا ان لسه الاوان مفتش

الاتنين لسه بيحبوا بعض .. اكيد فى حاجات اتكسرت لكن ممكن بردو انهم يصلحوها مع بعض .. ولا ايه ؟؟

مش عارفة اتدخل فعلا زى ماهو طلب منى

ولا انصح الاتنين من بعيد وخصوصا انى مابحبش موضوع الطرف التالت ده فى العلاقة لأنه مهما كان مش هيكون حاسس نفس احساسهم

ولا اعمل ايه ؟؟؟؟؟؟؟؟

كنت مترددة انى انزل الموضوع هنا بس بجد من اول امبارح و انا دماغى هتنفجر من كتر التفكير

و بجد محتاجة رأيكم فى الموضوع

و دمتم سالمين