Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الجمعة، 20 فبراير 2009

انا اللى جبت ده كله لنفسى)):

النهارده قررت اعمل عملية انتحارية واقنع ابى العزيز انى ارجع لشغلى القديم تانى

و طبعا لانى كنت فاكره ان النهارده زى اى يوم عادى و ان الحوار زى اى حوار عادى بيحصل بينا .. اتشجعت و اتكلمت

انا : ابى الجميل يااحلى الباباهات اللى فى الدنيا .. عايزة اتكلم معاك فى موضوع

بابا : خييييييير .. حكم انا عارف طقم الحنيه ده لازم يكون ورا مصيبة

انا : ليه بس ياحج ربنا مايجيب مصايب .. بص يابابيتو ياجميل انت هو احنا هنتناقش عادى يعنى و  ياتقنعني يااقنعك .. انا عايزة ارجع تانى الشغل

بابا و بكل هدوووء : لأ

انا : لأ ليه بقى ؟ انا زهقت من القاعدة دى اصلا .. و كمان انا عايزة اعرف انت رافض ليه ؟

بابا : و انا اوافق ليه من الاساس ؟؟؟ دى شغلانه كلها وجع دماغ

انا : صدقنى ماهيكون فى وجع دماغ ولا حاجه .. و كمان بقى انا بحب الشغل ده و عايزة ارجع له

بابا : و انا قولت لأ يبقى لأ

انا : بابا انت معودنا لما يكون فى رفض يبقى فى حوار و اقناع مش رفض و خلاص .. يبقى نتناقش و نتحاور و تقنعنى بالرفض .. وكمان وجع الدماغ مش سبب الصراحة للرفض اساسا بقى هه

بابا سكت سكوت مريب مرتحتلوش (وكان احساسى فى محله )

بابا : ماشى هنتناقش و نتحاور زى ماانتى عايزة لكن على شرط

انا : ايه هو ؟

بابا : انك تتكلمى براحه و بلاش طريقة السرعة و اكل الحروف بتاعتك دى

سمسمه اختى اللذيذة : اوبااااااا ليه بس كده يابابا جيت على الوجيعة

انا : مالكيش دعوة انتى ياخفيفة و كمان ايه اللى مقعدك معانا قومى من هنا .. و على فكرة بقى يابابا الشرط ده مش حلو خالص و انت كده واخد فكرة عنى وحشه جداا كل مافى الامر لما بتكلم بسرعة علشان احنا فى زمن السرعة و لازم نلحقه

بابا وهو مبتسم : و الله !!! ماشى اعمل نفسى مصدق الكلام و نغير الشرط .. قولى ستى بستلى بسبوسة او امر امير الامراء .. وأنا اتناقش معاكى يابتاعت زمن السرعة

(احم احم  انا مش لدغه و الله بس كل مافى الامر انى فعلا لما اتكلم براحه بعض مخارج الحروف عندى بتحسس اللى قدامى انى لدغه .. و بابا طبعا لما سكت كان بيفكر ازاى يخلينى ارفع الراية البيضا و اقفل موضوع الرجوع .. و للأسف اقدر )

انا : على فكرة بقى انا مش عايزة ارجع الشغل و اصلا انا بحب قاعدة البيت و مش عايزة اشتغل .. و على فكرة بقى دى مش معاملة نهائى هه بس

و الحوار اتقفل على كده بس انا لن استسلم ابدا .. و فضلت افكر طول اليوم ازاى اقنعه انى ارجع تانى .. وبعد تفكير قولت مافيش غير ماميتو الجميلة هى اى نعم رافضه هى كمان لكن قولت احاول معاها و هى بقى تبقى تكلمه . ودخلت لها المطبخ

انا  : ماميتو الجميلة مش عايزة اى حاجه اسعدك فيها

ماما : قولى عايزة ايه و بلاش طقم البكش بتاعك ده

انا : احم احم دايما فهمانى صح و الله .. بس ده مايمنعش انى اعملك حاجه و انا بتكلم معاكى

ماما : خلاص اعملى قهوة .. و اقولى عايزة ايه

المهم وقفت اعمل القهوة و بفكر ازاى ابدأ الكلام .. وماما بتشيل الحاجات فى المطبخ وفجأة حطت على ترابيزة المطبخ حلة و قالت لى ابقى اشيلها (مش اسكت انا و قول حاضر و خلاص ..لا ازاى لازم لسانى اللى دايما جيبلى مشاكل يتكلم )

انا : ماميتو انا بعمل القهوة و خلصت المكان اصلا ممكن تشيليها بقى و خصوصا انك خلصتى اللى فى ايدك

و طبعا لان اليوم ده غير عادى فلازم الموضوع مايعديش بسلام

ماما و هى سانده على الحوض و بابتسامة خفيفة : بعد ماتخلصى القهوة شيليها بردو

مش عارفه ليه امى كانت مصممة انى اشيلها .. وقفت اعمل القهوة و نسيت موضوع الشغل اصلا وبفكر ازاى اتخلص من الاضطهاد اللى بيحصل ده

انا : على فكرة ياماميتو ما انا ممكن اشيلها بس ماحطهاش صح ولا اساسا احطها فى مكانها مثلا

ماما و هى بتمد ايديها على المعلقه الخشب و بنفس الابتسامة : طيب انا عايزة اشوف هتشليها ازاى

طبعا انا شوفت المعلقه الخشب رحت زى الشطورة طبعا شلتها فى مكانها و بكلم نفسى

انا : كان فيها ايه لو شيلتيها من غير ماتتكلمى  ..لا ماهو بردو احساس الاضطهاد ده وحش قوى ازاى بس اسكت .. انا لازم اعترض ايوة امال ايه انا بعمل الحاجه تحت تهديد السلاح مش معاملة خالص دى

انا : انا شلتها اهو ...بس على فكرة بقى ياماميتو احنا كأفراد بيت واحد لازم فى تعاون و كمان بقى استخدام الصلاحيات دى مش معاملة خالص

ماما : فعلا هى مش معاملة .. انا بقى هوريكى المعاملة الصح

طبعا هى قبل ماتخلص الكلمة كنت قولت يافكيك لممارسه التمرين اليومى (اللف حوالين السفرة)

ماما : انتى فاكره انى كده مش هطولك ؟

انا بلسانى اللى عايز قطعه : هو منطقيا انك لو فعلا مديتى ايدك حتى لو بالمعلقة مش هطولينى لان السفرة مستطيلة و حتى لو دائرية ممكن ابعد شويه و بردو مش هطولينى

ماما و هى بتضحك من منظرى اللى بيعانى من الاضطهاد : ماشى يابتاعت المنطق .. انا بقى مش هتعب نفسى .. تعالى هنا علشان اضربك

انا : ايه ده ازاى يعنى دى بقى

ماما و هى بردو بتضحك : استخدام صلاحيات بقى .. يلا تعالى علشان اضربك

و طبعا لان الست دى امى ماكنش ينفع ارفض و رحتلها و انا خلاص هعيط ..ايوة ماهو احساس الاضطهاد وحش و ربنا

ماما بابتسامة خفيفة : تخيلى انى مبقاش ليا نفس اضربك دلوقتى ..خلاص روحى دلوقتى و لما يجيلى مزاج ابقى اناديكى

و سابتنى و دخلت المطبخ .. و انا واقفة مش مستوعبة اى حاجه و هو ايه اللى بيحصل فى البيت ده ..لالالالالا ده ظلم و الله .. و فضلت افكر و اخيرا .. وقفت على باب المطبخ

انا : على فكرة بقى ده ظلم و ديكتاتورية كمان هه

طبعا قولت الكلام ده و يافكيك بس المرة دى على اوضتى و قفلت الباب بالترباس ايوة ماهو انا عارفه اللى كان هيحصل فعلا المرة دى

ماما : يعنى انتى هتفضلى طول حياتك جوه .. بس لماتخرجى انا هوريكى الظلم اللى على حق

و من وقتها ياعالم و انا محبوسة فى الاوضة بقالى ساعة ونص  و الميه خلصت و همووووت من العطش .. و البت شجاعة عماله تزن فى ودنى

شجاعة : ماحدش بيموت من معلقه خشب لكن ممكن يموت من العطش

انا : ايوة يا شجاعة بس بردو برستيجى

شجاعة : ماهو انتى السبب بلسانك اللى مابيسكوتش ده استحملى بقى ..و كمان الميه ولا برستيجك

و طبعا لقيت ان شجاعة عندها حق و عشان الميه كل شئ يهون

علشان كده قررت انى اخرج دلوقتى اجيب الميه وربنا يستر

 بس لو ماضفتش التعليقات خلال 3 ايام اعرفوا ان خلاص رحت فى خبر كان

اما لو ضفتها بعد يوم و نص كده يبقى الحمد لله الموضوع وصل للكسر فقط لاغير و انا مازلت حيه ارزق

و فى الحالتين المدونة امانة فى رقبتكم خدو بالكم منها  كل يوم ادخلوا اطمنوا على الشمع اللى فوق ده علشان لو خلص تغيروه بدل ما الدنيا تضلم هنا اكتر ماهى مضلمة

اما بقى لو ضفت التعليقات عادى فى وقتها بدون تأخير فاعرفوا ان مفيش فايدة و هفضل بردو تعباكم و مصدعاكم و قلقاكم فى مدونتكم هتعملوا ايه قدركم بقى ((:

** و ادى جزاء اللى مايسمعش كلمة بابا يقولها )):

و دمتم سالمين

هناك 116 تعليقًا:

Soul.o0o.Whisper يقول...

هههههههههههههههههههههههههههههههههههه



مافيش فايدة
طول عمرك ضد ياااااااااا



يا سويتىىىىى
ههههههههههههههههههههه



بئا تعملى كدا فى طنط؟؟؟
والله عندها حق
هههههههههههههههه


بس مستنيينك بعد أكتر من 3 أيام
يوووووووووووه
قصدى يعنى لو بعد يوم ونص ماشى
قصدىىىىىىىىىى
ماتتأخريش علينا يعنى

هههههههههههههههههههه






دمتى بود يا قمرى

Soul.o0o.Whisper يقول...

:)

;)


مبروووووووووووووك


D:


خالص ودى

Kiara يقول...

هههههههههههههههههههههه

ياحيني ياعني انتي عطشانه دوقتي

لا وايه انتي بتحبي الميه موت كل عشر دقايق لازمن تشربى يبقي كدا انتي هتموتي واه منها الشجاعه

انا هقوم بقي اصلي عطشانه وهروح افتح التلاجه واشرررررررررررررب اءاءاءاءاءاء

ربنا يصلح حالك وباباكي يوافق علي انك ترجعي الي شغلك اللي متاكدا انك كنتي لاقيه فيه نفسك :)

mohamed ghalia يقول...

ههههههههههههههههههههههههههههههههههه
وش بيطلع لسانه
عشان تسمعى كلام ماما وبابا
ربنا يسعد أيامك دايما
وتلاقى حد يحن عليكى بشربة ماااااااااء
دمتى بكل الود أختى

mohamed ghalia يقول...

هو الواحد ميعرفش يسبق كيارا أبدا فى التعليقات
يارب تتحبس هيا كمان هههههههههههههههه

mohamed ghalia يقول...

أنا رايح أكتب موضوع عن التفاؤل والسعادة هههههههههههههههههههههه
يلا خليكى محبوسة كده

Sweet Violet يقول...

طبعا هرد على كل واحد شمت فيا لحد الان

ياساتر على الناس مش معاملة دى على فكرة

بس احب اطمنكم بقى .. ماما لما خرجت كانت نايمه

نيهاهاهاهاهاها

ليا عودة للرد على التعليقات

مسدس صغير يقول...

يا ترى انتى لسه فى القوضه وللا خرجتى؟؟

انا مع رأى شجاعة تسلمى نفسك عند باب القوضة وامرك لله يمكن تشربى اصل المية احسن من البريستيج..

غير كده انتى محسسانى ان انا مش ابنى او انت مش ضنايا..
هو مين ابو مين يعنى؟؟

ليه الانطهاد ده هو انتى بنت خالتك..

.....

ربنا يستر

الازهرى يقول...

من الواضح ان مامتك وباباكى فاهمينك صح جدا
وان شغل التلات ورقات بتاهك مش بخيل عليهم
خااااااااالص

المهم يا ستى واضح ان الديمقراطية بتاعتك وراثة فى العيلة

وانا على فكرة عندى معلقة خشب من ايام المسرح زى بتاعت سمير غانم فى المتزوجون
وطبعا وبكل الحب والاخلاص ممكنابعتها لماما هدية فى اقرب مناسبة ممكنة
وطبعا انا مفيش فى نيتى اى شىء غلط او شر لا سمح الله

لكن من الواضح كمان انك بتحبيها وبتسمعى كلامها حتى لو الموضوع فى ضرب

اسيبك بقى تستنى العلقة فى هدوء

صوت من مصر يقول...

يا ستى عادى كله ماشى يعنى اعملى زى حالى انا ده
افعل ما اريد ولو اتنطط قدامى قرود بجد
وللاسف البنت الى بتشتغل بتكون واعيه للمجتمع مش قاعده لا بتهش ولا بتنش

رحلتنا في الحياة يقول...

هههههههههههه فكرتنى بنفسى ما امى بس الفرق انى امى يأست انى اتغير وبقيت تكبر دماغها منى ااقولك حاجة كل حاجة تتحل بالتفاهم حاولى براحة وانتى هتفذى اللى عايزه

عاشقه الرومانسيه يقول...

ههههههههههه
ياعينى والله صعبتى عليا
والعطش ده وحش قوى
ههههههههه
ماما بتاعت الانتى دمها شربات
ربنا يخليها لك
وانا لو منها كنت قفلت عليكى بالمفتاح من بره
علشان تبقى حبسه بجد

انا اول مره تقريبا اجى هنا
وان شاء الله مش الاخيره

عاشقه الرومانسيه يقول...

ياريت تبقى توضحيلى ليه التغير الشامل ده
الصوره والاسم وكل ده ليه
انا كنت باشوف تعليقاتك وباسمع عنك
وماعرفتكيش الا لما لقيتك كاتبه على المدونه كده
انتى متخفيه ليه؟
عليكى تار؟
ههههههههههههههه

Sweet Violet يقول...

سووووووول
-------------
ههههههههههههههههه

طبعا مافيش فايده يابنتى هو قالها و مااااااااااااات

يعنى لا راجعه للكلمة ابدا

و كويس انك لحقتى نفسك و قولتى سويتىىىىىىىى

شكلى هتعقد من حرف الياء كمان
^^^^^^^^^

ايه ده هو انا عملت حاجه

انتو كلوا عليا ولا ايه

عااااااااااااااااااااااااااااااااا

^^^^^^
آآآآآه على الشماته ياربى

و انا اللى قولت انكم هتقولوا ترجعى بالسلامه

ماشى ماشى

شكلى هقلب تانى لضد التيار ههههههههههههه

^^^^^^^^
الله يبارك فيك

و مانجلكيش فى تخريف للمدونة ابداااااااااااااااااااا

Sweet Violet يقول...

خيااااااااااااااااااااارا

---------------
ايوة هى خيارا .. بقى انتى كمان شمتانه فيا

ينهار ابيض على البشر

ماشى ماشى

^^^
و ايه التشريد بتاعك ده ؟؟؟

كل شويه اشرب ميه منه له

مش هقول غير منه له

و كمان بتغظينى

انا خلاص شربت ميه الحمدلله بدون اى خسائر

نيهاهاهاهاهاهاها

بس ربنا يستر بقى لماتصحى امى )):

^^^^^
اميييييييييين

ادعى لى ياخيارتى

Sweet Violet يقول...

محمد
-----------
اعوذ بالله

ايه الناس اللى اول لماتعلق تغيظنى

ماشى .. انا بقى هزود عليك الرسوم الاداريه

علشان تشمت كده

^^^^^^^
انا مالى بقى كيارا هى اللى ترد على الدعوة دى

بس ازاى يامحمد تدعى على كيارا انها تتحبس بس

لالالالالا ياراجل دى كيارا بردو

(علشان تشمت كويس)

^^^^^^^
على فكرة انا شربت الحمدلله و بدون خسائر كمان ها ها

بس بس انا ماكنتش متوقعه الفرح فيا كده

)):

Sweet Violet يقول...

مسدس صغير
------------
لا خرجت الحمدلله والمهمه قامت بنجاح (:

بس ربنا يستر فى بعد كده بقى ):

على فكرة انا ماعنديش خالات

و كمان اشمعنا بنت خالتى .. ليه مش عمتى مثلا.. او عمى او خالى؟؟

و كمان بقى ايه انت مش ابنك ولا هو مش ضانك و لامين راح فين اصلا

انت بتقول اييييييييييييييييييه؟؟

الترجمه لو سمحت يعنى و ياريت تنزل بسرعه

و بردو مافيش ايس كريم

علشان بردو انا حاسه بشماته فى تعليقك

Sweet Violet يقول...

الازهرى
-----------
اكيد طبعااااااااااا .. ماما وبابا بقالى فتره عارفهم يعنى قول كده عشرة عمر لازم يكونوا فاهمنى

^^^^^
ياااااااااااااااااااااه .. بقى عايزة تجيب المعلقه دى لماما

ده انت طلعت شايل فى قلبك جامد قوى منى

مع انى مش بهدى النفوس ولا حاجه

مافيش نيه شر ..بس بس ده الموضوع ده اتصدمت منه فيكم

بس )):

^^^^^
اكيد مش االست دى امى شقيانه طول عمرها ماشلتش غير همى وانا اخر صبرها

يبقى لازم اسمع كلامها طبعا حتى لو للضرب بسلاح مطبخى )):

Sweet Violet يقول...

صوت من مصر
------------
شكرا لتعليقك

بس انا مافهمتش ليه للأسف ؟؟ هى حاجه وحشه ولا ايه ؟؟

Sweet Violet يقول...

ايوشة
-----------
لالالا انا امى لا تيأس الحمدلله

عندها امل انى اتغير و هتغيرنى يعنى هتغيرنى (:

ان شاء الله هحاول تانى فعلا بس هختار اليوم بقى و يكون زى الايام العاديه

لان للأسف اليوم ده كان غريب جدااااا

حتى المدونة كانت مش مظبوطه

Sweet Violet يقول...

عاشقة الرومانسية
-------------
طيب مدام صعبت عليك يعنى

مش تدخلى كده بكوبايه ميه ولا ايه ... ايه الصعبان الحاف ده

ايوة ايوة امى شربات طبعا مش جابتنى لازم تكون شربات

اصلى انا على رأى صبرنى .. متواضعه جدااااا (:

^^^^^

طيب ليه كده بقى مااحنا كنا ماشيين حلو و صعبان عليك

عايزانى اتحبس

حتى انتى شمتانه فيا

لالالا ماكنش انعمش ولا لبس نضاره

تؤتؤتؤتؤتؤتؤتؤتؤ

ماشى ماشى

و على رأى الله يرحمها .. يوم ليك و يوم عليك

^^^^^^^^^^^^^
نيجى بقى للتعليق اللى موت ضحك منه

طبعا انا وضحت عندك

لكن سؤال بقى ... كيف يعنى بتسمعى عنى ؟؟؟

و حلو ولا وحش

قرى و اعترفى ... لحسن ارجع تانى ضد التيار

والمدونة بتاعتك تتصادر زى المدونات التانيه

^^^^
منورة ياقمر بزيارتك الاول و ارجو ماتكنش الاخيرة

بس بردو هتقرى و تعترفى حتى لو منورة ... ضد التيار هتفضل ضد التيار

حتى لو غيرت الاسم .. هع

عاشقه الرومانسيه يقول...

تعجبنى ثقتك فى نفسويتك ياضد ياحبيبتى
سمعت عنك من الناس اللى انا باكلمهم على الميل ممكن تكون سيرتك بتيجى وطبعا بالخير
وباشوف تعليقات ليكى فى مدونات كتير
بس اسم ضد التيار كان اجمل من الخيله الكدابه دى يابنتى
ممكن تسمحيلى يعنى
انتى ممكن تغيرى وتعملى نيو لوك زى ما انتى عايزه
لكن الاسم بلاش يتغير لان الناس عرفتك بيه
خليها ضد تانى
لو مش عايزه بلاش ده بس مجرد اقتراح
اوعى تزعلى منى

والله انا قلت انك ممكن تكونى متخفيه علشان ماما ما تعرفش توصلك ده فى حاله ان مفيش تار عليكى يعنى

دمك شربااااااااااااات
والبوست خفيف قوى وعجبنى قوى قوى

Sweet Violet يقول...

احم احم عجبتك بجد ؟؟؟

طيب ايه بقى هو انتى صعبانه عليك عجباك .. حاف كده دايما

طيب شوكولاته كوبايه ميه .. اى حاجه يعنى مش معامله دى )):

امممممممممم على الميل و كمان تعليقات

لالالالا ده موضوع كبير كبير كبير .. هشغل كرومبو شكلى ويكتشف مين راح فين و ليه

بس سيبك انتى بشكر طبعا اى حد قال اى حاجه و بشكر عينك اللى شفتنى

علشان تيجى ياشربتاتا انتى

اما بقى موضوع الاقتراح .. طبعا انا جاوبت عندك وحبر الكيبورد غالى دلوقتى يعنى هومش كتر حبر و خلاص

ده ايه الطمع ده ياخواتى

مش كفايه لحدالان مش عارفه اخد من ازهرى مصنع الحبر ):

متخفيه ازاى بس .. دى هى هى المدونة بجملها و خفيتها و ضلمتها بردو آه و الله

كان نفسى انورها لكن لقيت شموع قولت كفايه عليكم مش كتر كهربا هو

اهو انتى اللى شربات بقى على فكرة هه بس

بجد سعيده ياقمر انك نورتينى فى المدونة الضلمه دى ((:

عاشقه الرومانسيه يقول...

مش كتر حبر ومش كتر كهربا....
انتى بخيله ولا ايه؟
وعموما انا كنت جايبه معايا قله علشان تشربى بس وقعت اتكسرت منى فى الطريق

ياسيتى انا راضيه بالمدونه ضلمه ضلمه
هبقى اجيب الكشاف بتاعى معايا
ههههههههههه

Unknown يقول...

يابنتى شغل اية وبهدلة اية خليكى يعنى عاجبك حال الى بيشتغلوا
تحياتى للمدونة الجميلة بجد

حواء يقول...

السلام عليكم


عسل ياسويتي
أول زياره لمدونتك لكن مش هتكون الاخيره تحياتي ياقمر

وردشان smilyrose يقول...

هههههههههههههههههههههههههههه

انت عارفة يا ضد والله عمرى ما ضحكت

كدا ربنا يحضك بتفكرينى بنفسى مع باب

دايما عامله زى الشريك المخالف

بس ماما طيبة جدا ومش بتضرب بالمعلقة

الخشب بتجيبنا من شعرنا عشان تقدر

تضربنا بس بجد انا فرحانة بيكى قوى

خلتينى اضحك من قلبى ولأول مرة من فترة

طويلة جدا

تستاهلى مسيرة ضد يا ضد ضد يا ضد

دايما مشاكسه يا ضد

وحشتينى يا طفلة

أختك

وردشان

smilyrose

روح الحب الصادق

*البت المشمشية *حلوة بس شقية * يقول...

]اعينى يا اوختشى
عشان مش بنسمع كلام بابا وماما
شكلك هتاخدى علقه منى وتضربى

EMMY BABY يقول...

هههههههههههههههههههههههههههههههههههههههه

والله انتى فظيعة بجد وشكلك زى العسل انتى ومامتك وبابك واختك كمان


حبكت المنطق وانتى بتضربى

لا وبعد كل ده مقلتلهاش اصلا انتى عايزة ايييييييه


اتشجعى واطلبى متخافيش المرة الجاية بالحلة

هو كان شغل ايه يا ضد ؟؟؟؟؟؟؟؟؟

ربنا يارب يوفقك

الحمد لله انك رجعتى بدل الدنيا ماكانت تظلم اكتر فعلا لانك علطول منورة المدونة

تحياتى

ايمى

*الطالبة عفو الله *زوزو يقول...

سكرة هههههه بس عفريتة هههههه لالاانا مش معاهم ومش شمتانة فيك يا حيني يا حبيبتي لو كان بادي كنت ابعتك المرة و مكنتيش تطلعي من الاوضة

Unknown يقول...

ههههههههههههههههههههه
هههههههههههههههههههه
خفة دم غير عادية والله
ربنا يوفقك ويكرمك
ابقي اسمعي كلام بابا بأه
ربنا ييسرلك
وابقي طلي علينا بأه
ممكن
سلام

Ahmed يقول...

هههههه
(وش بيطلع لسانه)(وش بيضحك وبيتمرمغ في الأرض)
هههههههه

انا اللس جبت ده كله لنفسي

أصل هوا البني ادم كده
لساااااااااااان وبقية اعضاء تدفع تمن عمايل اللسان
واللسان هو الوحيد الي جوه البؤ بعيد عن أي اذى

هئ هئ هئ هئ

ابقي طمنيني (على المعلقه الخشب)
ههههه

romansy يقول...

بكره ترتاحى
وتعيشى فى بيت الزوجيه لما يجى ابن الحلال

Butterfly يقول...

هههههههههههههههههههه

بس والله عندك حق ;)

حـــــدوتـــــة يقول...

السلام عليكم

الصراحة انا معجب بطريقة والدك فى الحوار
الراجل من اول جمله خلاكى تبقى فى موقف الدفاع لحد ما نسيتى الموضوع الاساسى

سلالالالالالالالالالالالالالالالالالالالالالالام

simply me يقول...

ههههههههههههههههههه

فكرتينى بنفسى وانا اصغر شويه من دلوقتى


هههههههه كنت حاسهه بنفس الاضطهاد ده
بس تقدرى تقولى انا ماما هى اللى حاسه بالاضطهاد دلوقتى

هههههههههههههه
الحمد لله انك خرجتى سليمه

kmt يقول...

السلام عليكم ورحمة الله وبركاته

ضد ليه غيرتي اسمك
بس حلو برده

عارفه الموضوع خدني للفكرة دي
ان اوقات بنفكر في شيء وبيكون لوقت مصيري وهدف كبير لكن بعض الحاجات الصغيرة بتقابلنا وتخلينا نبعد عن هدفنا والمشكلة انه يتوه منا في زحمة الحاجات دي

تحياتي
الى اللقاء

maha zein يقول...

وعملالي الاشكيف ابو شوال
طالما يتخافوا من المعالق الخشب بتتكلموا ليه
انا مش عارفة الشغل ده بتاع ايه ووحش ليه
بس طالما والدك شايف كده يبقه خلاص اسمعيه وخلاص بقه لا تضربي في ليلتك
اسمعوا الكلام بقه

أم فريده يقول...

ساعات الواحد بيعمل حاجات ومش بيفكر فى النتايج
فى حد يا بنتى يعمل اللى انتى عملتية دة فى حد يقف قدام الهرم ويقول انا ممكن احركة من مكانة

بس من الواضح انك بخير لانك رديتى على التعليقات اللى فاتت

ولو انتى بجد عايزة ترجعى الشغل اوعى تتنزلى وكررى المحاولة بطريقة تانية

صدقينى الشغل بيفرق كتيير

تحياتى

ألـــــــوان الحيــــــــاة يقول...

ايه ده هو العطش يعمل كده فى الناس

مش عارفه اصلى مش بعطش وبشرب كل ما افتكر يعنى انى مشربتش من زمان فمش حاسه بيكى صراحه

يلا عموما طنط اما تصحى هتظبطك

يلا سلام

aMr saYed يقول...

يا نهااااااااااااااار ابيض يا نهاااااار ابيض مش قادر امسك نفسي وخصوصا اني تخيلتك كده انثة في مقتبل العمر تفضل تلف ورا السفرة من تمانين لتلات الاف لفة في الدقيقة ده انتي غلبتي ماتور المروحة الفريش المهم انك نسيتي من كتر الجري واللف حوالين السفرة و حلتيش المشكلة يعني انهزمتي في معهركة البابيتو ومعركة الماميتو دايما كده فاشلة ومهزومة المرة الجاية بقا لازم يبقى لييك موقف حطي اكل وشرب وشاي وبوتاجاز وتلاجة جوه الغرفة بتاعتك و قوللهما على كل حاجة وزوغان على الاوضة

يلا بقا كفاية رغي قشطة باي

تحياتي

المعتصم يقول...

بسم الله الرحمن الرحيم
السلام عليكم ورحمة الله وبركاته
البوست دمه خفيف خالص
بس انا عاوز اعرف حاجه معلش
اكيد الوالد فيه عرق صعيدى صح؟؟؟؟؟
علشان المواقف الديموقراطيه دى معرفه عن الصعايده
وخصوصا فى شغل بناتيتهم
اما ست الكل فممكن ماتكونش تبع الصعيدى لان عندنا مش بيضربو بالمعلقه الخشب عندنا بيستعملو حاجات خفيفه يعنى كده غطا الحله وفى النفوخ طوالى او المغرفه الاستنليس الكبيرة او ممكن يكونو بيهزرو بسكينة المطبخ
انما الشر بتاع والدتك ده مش تبعنا اصل احنا ناس طيبين
على فكرة هو الظاهر النهارده يوم التهييس فى المدونات تقريبا فيه حاجه فى الجو هى السبب ههههههههههه
تقبلى مرورى وتحياتى
ودمتى بكل خير وود
والسلام عليكم ورحمة الله وبركاته

blue-wave يقول...

ههههههههههههههههههههههههههه
والله انتى زى العسل
كل دا علشان الشغل؟؟؟
علشان يعرفوا انتى اد ايه بتضحى:))
بجد دمك زى العسل
وانا استمتعت جدا بالتواجد فى المدونه التحفه دى:))

حسام غانم يقول...

بغض النظر عن موضوع رجوعك شغلك

وبغض النظر عن موضوع الاضطهاد

وبعض النظر عن الحبس


إيه موضوع ضد ده ؟

:)

طوبه فضه وطوبه دهب يقول...

اسمعى كلام بابا وماما احسن لك يابنتى مدام انتى مش قد الاضطهاد ماتحطيش نفسك فى وش المدفع احسن لك طاطى يابنتى احسن لك

saragebaly يقول...

هههههههههههههه
ههههههههههههههههه

بجد مش قادرة ابطل ضحك

ايه كل دة؟؟

وفي الآخر برضو مفيش شغل

طيب كانت من اولها بدل الحبسة واحساسك بالاضطهاد بالشكل دة


ربنا يسعدك دايما وترجعي الشغل من تاني

بس من غير حبس ولا اضطهاد

تحياتي ليكي يا جميلة
دمتِ بكل الحب

سارة

اسماء عوني يقول...

احم احم
شوية اسئله كده علي ما قسم
انتي كنتي بتشتغلي ايه اصلا ؟
ما هو المكان الجغرافي بالتحديد لموقع السفره في الشقه ؟
مين شجاعه ؟
ترباس اوضتك ... ماينفعش مامتك كانت تكسر الباب زي احمد السقا وتدخل اكمل العمليه ؟
لما خرجتي من الباب ولقيتي مامتك نايمه ( اصل انا قريت التعليقات ) ليه ماهربتيش او مثلا مثلا ماعملتيش عمليه عكسيه ؟
المهم دي طبعا اكيد انتي عارفه اول زياره وطبعا اكيد هاجي تاني .
جاوبي علي الاسئله اللي فوق دي
انا خبيره استراتيجيه سابقه في المعارك دي
وربنا يخليلك بابيتو وماميتو

Sweet Violet يقول...

عاشقه الرومانسيه
-------------
لالالا مش بخل .. ده بس تعب ليكم (:

ايوة طبعا مش لازم اتعبكم و اقلقكم ولا ايه؟؟

لالالالالالا اتكسرت منى .. حد خطفها و انا جايه.. نسيتها فى مدونة تانيه

ماعنديش انا الكلام ده .. انا عايزة القله بتاعتى ماليش فيه انا بقى

عوووودى بالقله ياعاشقه .. انا بحذر

^^^

هههههههههههه ياااااااااااااااه لو الكل يعمل زيك كده و يجيب الكشاف معاه

مش كنت وفرت الشمع اللى فوق ده ((:

يلابقى ماهو لازم ادلعكم بردو .. علشان ماتقولوش انى بحرمكم من حاجه لا سمح الله يعنى

(:

Sweet Violet يقول...

ايوية
--------
لالالالا قاعدة البيت مش حلوة بردو

الشغل ارحم كتييير منها

نورتينى ياقمر (:

Sweet Violet يقول...

زوجه
---------
عليكم السلام و رحمه الله و بركاته

ربنا يكرمك يارب

بس انتى اللى عسل بقى هه بس (:

لالالا مش اول زيارة ولا حاجه

انا عارفه ان تغيير الاسم ده هيلغبط كتييير

بس عموما انتى تنورى على طوووول

Sweet Violet يقول...

smilyrose
------------

طيب كويس بقى انك ضحكتى كده هنا (:

لالالالالالالالالالالالالالالا شعر مين لالالالالالالالالا

لا اقبل بذلك ... كووووووووله الا الشعر ابدااااااااااااااا

انا ممكن استحمل اى سلاح لكن الشعر تؤتؤتؤتؤتؤتؤتؤ

اممممم فرحانه بيا ولا فيا ؟؟؟ هه اعترفى

بس يعنى علشان ضحكتى ابقى استهال المسيرة

عااااااااااااااااااااااااااااا

يعنى اخليكى تعيطى احسن بقى ههههههههههههه

طبعااااااااااااااا يابنتى مش ضد التيار

انتى الل وحشانى ياقمر انتى (:

Sweet Violet يقول...

البت المشمشية
------------
ليه كده بقى ... هو ظلم يعنى ولا ظلم يعنى

ال اخد علقه ال

فى ايه هو انا من وقت ماغيرت الاسم الكل بقى عليا كده

لالالالالالالالالالالالا .. هرجع تانى ضد و ارجع اولع فى المدونات

انا بقول اهو

Sweet Violet يقول...

ايمى الجميلة
-------------
طبعا مش ماميتو هى اللى سألت .. يبقى لازم الاجابه تكون نموذجيه D:

ايوة ماهو الاحساس بالضطهاد ينسى اى حاجه الصراحه

ان شاء الله نتشجع تانى و ربنا يستر بقى

شغلانه وجع دماغ على راى بابيتو العزيز D:

ياااااااااااااه اخيرا حد مش شمتان.. ايوة كده رفعتى من نفسوياتى

ربنا يخليكى ليا يارب ياايمى ياجميلة انتى

Sweet Violet يقول...

الطالبة عفو الله
----------
اهو انتى اللى سكرة بقى هه بس

ربنا يخليكى يارب .. طيب ماهو الميل فى البروفايل ابعتى بقى عليه على قد ماتقدرى ميه

لانى ان شاء الله ناويه اكرر التجربه تانى و ربنا يستر

Sweet Violet يقول...

كاتب مصرى
--------------
يااااااااااااااارب

حاضر ياسلام انت بس تأمر

هطل و ازهق .. بس استحمل انت بقى القلق (:

Sweet Violet يقول...

Eng. Ahmed Abo El-Ella
----------------
هههههههههههههههههههههههههه

ياساتر .. فى حد يبدأ التعليق كده ياربى

ايييييييييييه الشماته دى

ينهار و كمان ينهار و كمان ينهااااااااااااااااااااار

ماشى ماشى ... ماهو الدنيا يوم و يوم بقى على فكرة هه

^^^^
انت هتقولى على موضوع ان البنى ادم لسان

لالالا و انا الحمدلله لقبى لسان و طلع له بنى ادم

و دايما جيبلى المشاكل .. انا مش عارفه انا مستحملنى ازاى الصراحه

بس اهو هنعمل ايه قدر

^^^^
المعلقه الخشب بردو... بس بس شماته شماته يعنى اللى باينه فى تعليقك دى

بس ليك يووووووووووووووووووووووووووووووووووم

Sweet Violet يقول...

رومانسى التفاؤل
-----------

تفتكر ؟؟؟

انا مافتكرش الصراحه ):

Sweet Violet يقول...

Butterfly

--------------
الحمدلله فى حد قال ان عندى حق (:

ربنا يكرمك يارب و ترفعى انتى كمان من نفساويتى

Sweet Violet يقول...

حدوتة
-----------
عليك السلامة و رحمه الله و بركاته

و انا كمان بيعجبنى طريقته قوووى

بصرف النظر عن الاضطهاد اللى بحسه منها ):

Sweet Violet يقول...

Bondoka
-------------
ايه ده و انتى اصغر شويه من دلوقتى

يعنى افهم من كده ان دلوقتى مافيش اضطهاد .. اشمعنا انا بقى عااااااااااااااااا

ماهو نفس السن تقريبا ... كده بقى الاحساس بالاضطهاد اكتر عندى )):

هههههههههههه ليه بتعملى ايه لماما علشان تحس كده

الحمدلله عرفت افلت من المعلقه الخشب D:

Sweet Violet يقول...

kemet
-----------
عليكم السلام و رحمه الله و بركاته

نيولوك بقى ياقمر.. الحمدلله ان الاسم الجديد عجبك (:

فعلا هو ده اللى حصل و بيحصل فى حاجات كتير معانا

عجبتنى نظرتك للموضوع بجد

(:

Sweet Violet يقول...

مهااااااااااااااا
------------
هههههههههههههههههههههه مين الاشكيف ده ياحجه

انا كنت عامله ضد التيار بس و الله ):

انا عارفه يااوختشى ناس مش قد الكلام بتتكلم ليه

لازم يتهددوا بالمعلقه الخشب علشان يسكتوا

طيب خلاص ماتزوقيش انتى بتزعقى ليه دلوقتى

هنسمع الكلام .. ياساتر على الناس

هو يبقى انتى و اللى فى البيت كمان

مش معاملة خالص دى

)):

Sweet Violet يقول...

زوجة عنيدة
-----------
اولا بقى انا عجبنى الاسم موووووووووووووووووت بجد

نيجى بقى للتعليق

شوفتى بقى ماهو لسانى اللى عايزة اخلص منه السبب فى كل ده

هو و البت شجاعه اللى بتوقفنى فى وش المدفع وتخلع

ان شاء الله هحاول تانى معاهم و ياااااااااااارب فعلا اقدر اقنعهم

Sweet Violet يقول...

roody hanem
----------
مش بتعطشى !!!!!

بتشربى لماتفتكرى !!!!

مشربتيش من زمااااااااااااااااااااااان !!!!!!!!!

(وش مزبهل)

انا لو فضلت خمس او عشر دقايق بالكتير و ماشربتش ممكن يحصلى حاجه

ده انا كنت هموووووت لما قاعدت الفتره دى عطشانه

لالالالالا الحمدلله الموضوع خلص بدون اى خسائر نيهاهاهاهاهاها

Sweet Violet يقول...

aMr tA3LaB
--------------
اتنين يانهار ابيض ؟؟؟

طيب ياعم حاسب لتقع بقى و المدونة من قزاز اصلا

بلااااااااااااااااااش التخيل احسن ... مين بس قال انى لفيت كل المرات دى هه

آه شوفت انهزمت فى اول المعركة لكن لا لسه فى باقيه ان شاء الله

و هرجع منصورة او العريش لسه مش عارفه الصراحه

لكن اكيد مش هكون فاشلة و لامهزومة ده انا ضد التيااااااااااااااار

طيب ماتختصر و قول اعزل فى شقه تانيه بقى اريح هههههههههههه

و انا كمان قشطه باى ياسلام ... اشمعنا انت يعنى

Sweet Violet يقول...

المعتصم
----------
عليك السلام و رحمه الله و بركاته

اعتقد لأ و اعتقد ايوة .. يعنى من الاخر مش عارفه

بس هبقى اسأل .. لكن انت متأكد الاول من المعلومة بتاعتك ولا ايه ؟؟؟

اما بقى بخصوص شر ماميتو انا بحبه على فكرة مش عايزة انا الطيبه دى ابدا هههههههه

ايوة ايوة انا اخدت بالى من الظاهرة دى .. بس من الواضح ان بلوجر هو السبب

و عامل حاجه فعلا فى الجو .. بس و الله حاله كويسه .. اهو بدل الحزن اللى حصل فى الفتره الاخيرة عند المدونين

عليكم السلام و رحمه الله و بركاته

Sweet Violet يقول...

blue-wave
------------
من الواضح ياعمرو انك انت كمان اتلغبط

فى المدونة .. و ماعرفتهاش )):

بس عموما يعنى حتى لو عرفتها اكيد بردو استمتعت (:

بس ايه تحفه دى .. انا مدونتى مش تحفه انا و لا هو علشان الشمع يعنى

):

Sweet Violet يقول...

حسام غانم
----------
بغض النظر عن غض النظر عن موضوع الرجوع

و بغض النظر عن غض النظر عن موضوع الاضطهاد

و بغض النظر عن غض النظر عن موضوع الحبس

نجاوب على السؤال ((:

المدونة كانت اسمها ضد التيار و انا كان اسمى ضد التيار

بس هو ده الموضوع (:

Sweet Violet يقول...

طوبة ذهب وطوبة فضة
---------------
لااااااااااااااااااااااااااااااااااااااااااا

ضد التيار تطاطى آآآآآآآآآآآآآآآآآآآآآه يانى

لالالالالا انا اسمع الكلام ماشى لكن اطاطى لااااااااا ينكن ابدا

بس ان شاء الله هما اللى هيسمعوا كلامى (:

Sweet Violet يقول...

سارة
--------
الاول حمدلله على السلامة ياقمر

ماهو انا ماكنتش اعرف ان ده كله هيحصل

كنت فاكرة ان اليوم ده زى باقى الايام )):

اللهم امييييييييييين

نورتى ياقمر

Sweet Violet يقول...

اسماء عونى
--------------

ههههههههههههههههههه مش انا يابيه و الله

دى البت شجاعه هى السبب و هى اللى قالت كده انا مالى انا

خلاص خلاص هعترف و امرى الى الله

طيب مافيش حذف 5 اسئلة مثلا من مجمل الاسئله اللى موجوده (:

طيب طيب هجاوب من غير كلام ماهو اضطهاد فى البيت و فى بلوجر كمان

نيجى لاول سؤال

كنت بشتغل يابيه هناك عند الناس اللى بتجيب وجع دماغ لنفسها

و بيقولوا انها بتبحث عن المتاعب (:

^^^^
اول لما تدخلى كده على وشك من ناحيه النص هاتلاقى السفرة (:

^^^^^^^^^^
البت شجاعه اللى هى اخت الواد شجاع

اللى هو يعنى متشجع كده

^^^^^^^^^
لا انا ترباس اوضتى ضد الكسر .. ده من تميمه يعنى اصلى مايتكسرش ((:

^^^^^^^^^
و كمان قريتى التعليقات يعنى مش كفايه اسئله من المنهج و كمان من بره المنهج

مش معامله دى

خلاص خلاص هجاوب قولت )):

ماكنش ينفع انى اهرب علشان الهروب حسن الادله

اما بقى عمليه عسكريه ... وضح مع الشرح الوافى المعنى D:

^^^^^^^^^^
كل ده من اول زيارة امال لما توصلى ان شاء الله للزيارة الاولى هتعملى فيا ايه

((:

جاوبت اهو .. النتيجه امتى بقى

^^^^^
كويس يعنى خبرة بقى و هستفيد منك (:

نورتى ياقمر بالزيارة الاولى اللى ان شاء الله مش هتكون الاخيرة طبعا (:

IIOrganzAII يقول...

هههههههههههههههه

بجد ضحكتيني اوي

كنت بقالي فترة مضحكتش

روابط يقول...

يا بنتى, كنتى شلتى الحلة من الاول وخلاص, يا سلام عالبنات ودمغتهم
أهى جت على دماغك

ولا دايم الا وجه الله

شمس النهار يقول...

اولا بشكرك علي مكالمة الصبح بصراحه كانت جميله ولفته طيبه منك
البوست لطيف وبعدين ماينفعش تعاكسي ماما وهي في ترسانة الاسلحه الفتاكه(المطبخ)معلقه خشب كده كبشه كده
الامر مايسلمش
ربنا يخليكم لبعض

ريكو يقول...

ههههههههه
صحيح أنا اللى جبت دا كلة لنفسى
بوست جميل
والمدونة شربات
دمتى موفقة

عاشقه وغلبانه يقول...

انا احتج واشجب وادين
ازاي يسيبوكي لحد ما الميه تخلص
ده حتي ضدد حقوق الانسان

انا متضامنه معاكي

اهئ اهئ

صحيح قوليلي هو ايه الشغل اللي عايزه ترجعيله واهلك مش موافقين
يعني بتشتغلي ايه...؟؟

مذكرات مشاغب يقول...

يعني بعد ده كله وفي الاخر برده مستني اعرف ليه مرجعتيش الشغل
وكل ده ضرب يا عيني
لا ووالدتك تقولك تعالي هنا عشان تنضربي
لا فعلا قهر ولا اللي بيحصل في سجن ابو غريب
ولا حتى جوانتانامو
على الاقل فيهم مايه
تحياتي

أميرة الجنة يقول...

بجد مش قادرة امسك نفسى من الضحك
ايه يا ضد اللى انتى عملتيه ده
بناقص الشغل ده يا حاجة
ربنا معاااااااااااااااااااكى
تقبلى تحياتى
دمتى عسولة

MaNoOoSh يقول...

انتى صحيح غيرتى اسمك بس هتفضلى بردو ضد يا ضد
وبعدين انتى كمان لمضة مش ضد بس يا ضد
بس دمك زى العثل بردو

فشكووول يقول...

ايه ده يا بت يا حلاوه انت دمك زى السكر .. لالالالالا زى العسل ... لالالا...زى المنجه...انت عرفتى نقطة ضعف الباباوات ورحتى عشان تسلطى الماماوات على الباباوات عشان تروحى الشغلانات .. بس المامامات كانت ناصحه وما ادتكيش فرصه
على فكره .. موضوع الافراج عن ايمن نور يظهر انك عارفه التكه اللى فيه .. هو افراج صحى وشروط الافراج الصحى .. ان ممكن لما يزول السبب .. ممكن بقى يا حلوين يرجع السجن وحيرجع فى الوقت المناسب اللى انا وانت وكل الناس عارفاه. . صح .. صح الصح
تحياتى يا حلاوه

عمرو يقول...

يا بنتى مافيش فايده
مهما ولادى حاولوا يتشطروا عليا برضو بأبقى فاهمهم و فاهم حيلهم لأنى أنا نفسى كنت بأعمل كده مع أبويا الله يرحمه و أكيد برضو هو كان بيعمل كده مع أبوه اللى الله برضو يرحمه و لا شك أن جدى كان بيعمل كده مع أبوه و هكذا وصولا لأبينا آدم عليه السلام و عياله اللى واحد فيهم خلص على أخوه
أكيد يا سويت فيوليت باباكى يملك من التجارب و الخبرات الحياتيه ما يزيد عنك بحك فارق السن و سعة المعرفه رغم اٍحترامى الشديد لآراء و فكر الأبناء و وجهة نظرهم و أولهم الواد أبنى الكبير اللى بيمشى بالعربيه بدون أى سوائل كالبنزين و الماء و الزيت و يقولك لها رب أسمه الكريم .. وجهة نظره كده و لازم تحترم برضو
بس عجبتنى دخلتك على بابا بالذات الطلعه الأولانيه :))

arsenalwy يقول...

ههههههههههه

دمك زى العسل طب قوليلى انتى فين وانا هحاول اعمل عملية انتحارية واوصلك مياه

أحمد الصعيدي يقول...

السلام عليكم
الهي ربنا ماينشفلك جوف....ويبعد عنك الخوف... ويرزقك حبة من اللي اسمه كسوف....

علشان بابا وماما يوافقوا علي الشغل
سيدتي الغالية شكرا لمرورك علي مدونتي وعلي فكرة أنا مستني الجزء التاني من الفيلم بتاعك ..

الرسم بالكلمات

blue-wave يقول...

أتلغبطت فيها ومعرفتهاش ازاى يعنى؟؟؟

احمد على نصار يقول...

ده صراع الاجيال اللى بيقولوا عليه ديما، البوست فكرنى بفيلم اسمه الزواج على الطريقة الحديثه، كان يشبه الحالة دى ، على كل حال الست ملهاش غير بيتها / هما بيقولوا كده ديما فى الامثال
تحياتى

Sweet Violet يقول...

ليالى القمر
------------
الحمدلله انى قدرت ارسم البسمه على وجهك (:

نورتنى ياقمر

Sweet Violet يقول...

حازم سويلم
----------
ماهو انا قولت كده بردو

بس صحيح نعمل ايه بقى فى دماغ البنات دى ((:

Sweet Violet يقول...

شموسه
----------
لا شكر على واجب ياشموستى

و كمان انا اللى بجد بشكرك على اهتمامك الجميل ربنا يخليكى ليا يارب

ماهو المشكله بقى ان المعاكسه مابتحلاش الا فى المطبخ

شكلى ناويه على الابادة التامه ليا

بس الحمدلله مرت بسلام (:

و يخليكى ليا ياااااااارب

Sweet Violet يقول...

ريكو
--------
انتى اللى شربتاتا

و مدونتك جميلة جداااا

نورتى (:

Sweet Violet يقول...

عاشقه و غلبانه
----------
ايوة ايوة شوفتى الظلم و القهر اللى بيحصل لى )):

الحمدلله فى حد متضامن معايا

مش البت شجاعه اللى دايما توقفنى قدام المدفع و تفلسع هي

اجابه السؤال وصلتلك فى البريد العاجل على المدونة عندك (:

Sweet Violet يقول...

مذكرات مشاغب
------------
عاااااااااااااااااااااااااااااااا

و كمان

عااااااااااااااااااااااااااااااااااااااااا

انا كده احساس القهر بيزيد بالكلام ده

بس الغريبه بقى كل اللى داخل متضامن مافيش كوبايه ميه جبها فى ايده و هو جاى

مش عارفه .. مش معامله دى هو يبقى انتم و البيت كمان

)):

Sweet Violet يقول...

أميرة الجنة
----------
لاااااااااااااا بناقص ايه

مش هستسلم انا بعد اللى حصلى ده

ده قهر و ظلم

ايوة ايوة ادعى لى من قلبك هه

اهو انتى اللى دمتى عسولة هه بس

نورتى ياقمراية (:

Sweet Violet يقول...

MaNoOoSh
------------
قوليلهم بقى علشان مش مصدقين لما بقول انى بردو ضد مهما حصل

انتى اللى دمك سكر بقى هه

نورتى (:

Sweet Violet يقول...

عم فشكول
-----------
ربنا يخليك يارب

هههههههه و ياريت عرفتها و عرفت استخدمها

لالالا ان شاء الله المرة الجايه انا اللى هنتصر بقى (:

ماشى لكن ده الظاهر اما الباطن ايه ؟؟؟

الله اعلم ..مع الايام بقى هنشوف

نورتنى و الله (:

Sweet Violet يقول...

عمرو
-------
لالالا ان شاء الله هيكون فى فايده

معاك طبعا فى كلامك و انا عن نفسى بتعجبنى دماغ بابا جداااا

و اسلوبه فى النقاش عامه ..بس ده مايمنعش ان الواحد يحاول يدخل بردو المعركه ليثبت وجهة نظره

بابا اوقات بردو بيقولى وجهة نظر و لازم احترمها بس ده مش معناه انى هاخد بيها )):

مدام عجبتك الطلعه الاولانيه اللى هى اساسا معملتش اى تأثير للأسف )):

ادعى لى بقى انى انتصر و يوافق (:

منور (:

Sweet Violet يقول...

arsenalwy
-----------
ههههههههههههههههههههههه

لا ما انا خلاص الحمدلله شربت

بس ده مايمنعش بردو انك تجهز نفسك للعملية التانيه (:

Sweet Violet يقول...

شجر الليمون
----------
عليكم السلام و رحمه الله و بركاته

انا اللى بشكرك على رد الزيارة

اما بقى عن الجزء التانى ... ان شاء الله قريب بس الايام دى تعدى على خير

علشان مايحصلش زى المرة دى (:

Sweet Violet يقول...

blue-wave
-------------
كتير اتلغبط فى المدونة وماعرفش انها ضد التيار

و من الرد بتاعك انا حسيت بكده )):

ونفساويتى تعبت بقى هه

عاااااااااااااااااااااااااااااااااااااااا

Sweet Violet يقول...

احمد على نصار
-------------
امممم ماليش فى الافلام العربى

بس عموما زى ماانت قولت هو ده صراع الاجيال فعلا

لكن بردو فى نوع من القهر و الاضطهاد ):

نورتنى (:

المعتصم يقول...

بسم الله الرحمن الرحيم
السلام عليكم ورحمة الله وبركاته
سويت
تحياتى
ايه ؟ هو انتى لسه محبوسه ولا ايه؟؟
اوعى تكونى طاطيتى وخسرتى المعركه ؟؟
بقالك فترة كده محدش سامع صوتك على بلوجر لا انتى ولا كيارا
كده الواحد ممكن يقلق ؟
طب لو فيه حاجه قولولى علشان اعمل حسابى
ولا تكونش الميه اتقطعت من عندكم ؟؟
كده انا هقلق بجد
هههههههههههههههههههههههههه
تحياتى ودمتى بكل خير وود
والسلام عليكم ورحمة الله وبركاته

اقصوصه يقول...

هههههههههههههه

99 رد

اللهم لا حسد

ممكن كباية ماي بطريقك؟

Sweet Violet يقول...

المعتصم
-----------
عليكم السلام و رحمه الله و بركاته

اممممممم مش عارفه ليه حاسه بشماته جااااامده المرة دى

ههههههههههههههه صح ؟؟

انا موجوده اهو و الله و حتى برد على التعليقات (:

ضد التيار لا يمكن تستسلم فى المعركه ابدااااااااااااااا

كيارا الحمدلله بخير و الله لسه قافله معاها تخيل ((:

هقولها تظهر بقى علشان ماحدش يفتكر انى اقتلتها فعلا و اخدت المدونة ((:

لالالا الحمدلله الميه موجوده .. مش انا قولت فى الاول انى حاسه بشماته جامده مااااشى

بجد اشكرك على السؤال الشمتان ده هههههههههههه

عليكم السلام و رحمه الله و بركاته

Sweet Violet يقول...

اقصوصه
------------
ههههههههههههه

حتى انتى ياقصوصه ياجميلة شمتانه فيا

عااااااااااااااااااااااااااااااااااااااااا

طب اعمل ايه فيكم بس اعمل ايه

عااااااااااااااااااااااااااااااااااااااااا

بس مااااشى ماهو يوم ليك و يوم عليك

نورتى ياقمرايه (:

¤¦¤Ebtehal ¤¦¤ يقول...

هيهيهيهيهي

والله انتوا عيله زي العسسسسسسسسسسل

لا وبابابيتو وماماميتو جي تجنن...

:D

المعتصم يقول...

يعنى انا بسأل علشان اطمن عليكى قوم انتى تفتكرينى شمتان !!!!!!!!
طب ياستى حقك عليا
وبعدين انتى رجعتى تانى لحكاية ضد دى
مش انا قولت لك انك مش هتقدرى تبطليها
وبعدين وديتى المدونة التانيه فين بتاعة الخواطر
هو صحيح انا مدخلتش عليها خالص بس كنت متعود لما بدخل عن طريق الاسم بلاقى اتنين مدونة دلوقتى لاقيت واحده بس
ايه هما سرقوكى ولا ايه ؟؟؟؟
امال بس فالحه تقولى ضد ومش عارف ايه وبحتل المدونات وانتى اتسرقتى
ههه هههه هه ههه هههه ههه ههه هه
ســـــــــــــــلام

marmar يقول...

هقول الجمله اللي قلتها ف نص مدونات البلد
أأسف على التأخير بسبب ظروف دراسيه عويصه للغايه
بس بجد انتي ثكررررر ضحكتيني بجد هههههههههههههههههه


بس سؤال رخم
هو ايه الشغل ده ؟
معلش فضول
مشش عايزة تردي عااااااادي بجد

تحياتي ليكي يا سكرة

Sweet Violet يقول...

¤¦¤ThoLog¤¦¤
-------------
انتى اللى عسل ياقمرايه انتى

و بجد انا فرحانه انك نورتنى فى المدونة

(:

Sweet Violet يقول...

المعتصم
----------
اممممم يعنى السؤال برئ مش شماته !!!!!

طب عينى فى عينك كده ((:

و ياسيدى خلاص نمشيها مش شماته علشان خاطرك بس

اما حكايه ضد اكيييييد مش هقدر ابطلها

ده طبع بعيد عنك ..لو عملت ايه ضد فى دمى دايما

الخواطر لان حصل بعض اللغبطه للناس و بيدخلوا عليها و افتكروا انى قافله المدونة بتاعتى

فقولت نشلها من البروفايل عندى ..بس هى موجوده بردو على فكرة بس مختفيه

ضد التيار عمرها ماتتسرق ابداااااااااااااااااااااااااااااااااا

انا بس اللى احتل المدونات لكن لاااااااااينكن حد يحتل مدونتى

نيهاهاهاهاهاهاهاهاهاها

Sweet Violet يقول...

marmar
--------------
ولا يهمك ياقمر و ربنا معاك يارب

اهو انتى بقى اللى سكر و عسل كمان هه بس (:

امممم هو شكلك ماقرتيش التعليقات

جرنالجيه بعيد عنك و عن السامعين و عنى اميييييين

نورتى ياقمر (:

فتــافيت (رحاب الخضري) يقول...

ههههههههههههههههههههههههههه

مافيش فايدة يا روحي اصلا.. خلقنا لنعترض احنا

بس ايه اخبار السيادة دلوقتي؟؟ كسر ولا كدمات ولا غرز؟؟؟

اسلوب حلو اوي واحلى مافي الموضوع ان مدونتك ضلمة زي.. بس انتي حاطة لهم شمع.. انا نوووووووووووووو

كل واحد يجي عندي بالكشاف بتاعه نيهههههههههاي هلاحق انا فلوس على الشمع ولا على شبكة مراسلين فتافيت

ميرسي على الزيارة يا جوووووومر

وكده صحاب بقى غصب واتدار عاااااااااا

Unknown يقول...

ههههههههههههههههه
علي فكره دي خطه باباكي ومامتك عاملينها عشان ينسوكي موضوع الشغل
(:

mahasen saber يقول...

عايزه ترجعى شغلك القديم

رجعى المدونه لاسمها الاصلى

وبعدين مبتشيليش الحله ليه انتى لو تحت ايدى هخليكى تشيلينى كمان يعنى انا والحله هههههههههههههه عقاب ليكى

وحشتينى يا قمر
امممممممممممممممممممموه حبيبتى يا ناس

Sweet Violet يقول...

فتافيت
---------
ايواااااااااااان طبعا لازم الاعتراض ده

لالالا الحمدلله الموضوع مر بسلام بدون اى خسائر (:

ياااااااااااااااه كان نفسى اعمل كده بس قولت بردو ندلعهم شويه احسن يقولوا بخل ولا حاجه ههههههههههه

انا اللى بشكرك انك نورتينى ياقمر

Sweet Violet يقول...

esraa
-----------
اممممم تفتكرى ؟؟

لالالا بس انا عارفه انهم استحاله يعملوا فيا كده

ايوة ايوة ماشيه انها مش خطه علشان ماتعبش )):

نورتى ياقمر

Sweet Violet يقول...

محاسن الجميلة
------------
هههههههههههههههه طيب ايه بس العلاقه مابين الشغل و المدونة

ههههههههههههههههههه مش عارفه و الله بنات عايزة تكسير الدماغ صحيح

فيها ايه لو كنت شلتها

انتى و الله اللى وحشانى جدااااااااااااااااااااااااا

ربنا يعلم انا بحبك قد ايه ياجميلة انتى

اممممممممممممممممممممموة

ريكو يقول...

حبيبتى سويتى
واللة انا مش شايفاة ابدا طيش شباب بالعكس انا شايفاها شجاعة المفروض تفتخرى بيها وتكونى بيها مثل اعلى للشباب اللى بقى مطنش كل حاجة اليومين دول
وقاقى اللة شر اولاد الحرام
تسقيف واعجاب