Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الاثنين، 20 أكتوبر، 2008

عدم الرضى و تقليد الاخر وجهان لعمله واحده

النهارده كان يوم الزهق العالمى عندى .. قولت اخد نفسى و انزل اتمشى شويه جايز افك لبست و نزلت

و اذا بالموبايل بيرن رديت لقيت صحبتى بتقولى ماتيجى نتقابل عشان انا مخنوقة و عايزة اتكلم معاكى قولت ماشى اكلم البيت و اقولهم و اشوف ....

 المهم كلمتهم و قالوا ماشى .. كلمت صحبتى و  اتفقنا نتقابل فى المكان بتاعنا ..

المهم نزلت قابلتها و بعد السلام و السؤال عن الاخبار دار الحوار التالى :

انا : مالك بقى ياقمر ايه مضايقك ؟

هى : مش عارفه حسيت انى كبرت قووووى

انا : ابص لروحى فجأة لاقتنى لاقتنى كبرت فجأة كبرت ..مالك بس ياعم عبد الباسط

هى : لا بجد و الله حاسة انى كبرت قووى و انى مش عايشه سنى

انا : ايوة ازاى يعنى ؟؟؟

هى : يعنى فى حاجات كتير قوى المفروض كنت اعملها و ماعملتهاش ... من و انا صغيره و انا فرضه على نفسى قيود مش عارفه اخرج منها ..

كل اصحابى كانوا عايشيين حياتهم إلا انا ...حتى لما كبرت ماعرفتش اخرج من قيودى و فضلت فيها ..

كل اللى يتكلم معيا بيحس انى اكبر من سنى بكتير ..انا حاسة انى مكلكعه و تعيسة ..

كان نفسى اخرج و اضحك و اعمل زى كل البنات اللى بشوفها ..نفسى اجرب و اغلط و اتعلم زى الكل ...مش اتعلم من تجارب الناس

انا : طيب و ليه مابصتيش انتى كدا رحمتى نفسك من تجارب ممكن تخليكى حزينة طول عمرك

ليه ماقولتيش ان دى رحمه من عند ربنا انه يخليكى تعيشى التجربة مع غيرك و تتعلمى من الدرس اللى هو خده

بدل ماتقعى انتى فيها و الله اعلم هاتخرجى منها امتى

هى : و ليه ماكنش زى البنات ماانتى شايفه (فلانة) عايشه حياتها بالطول و العرض و نفس سنى

لكن اللى يشوفها و يشوفنى يقول انى اكبر منها بسنييييين

انا : الله يكون فى عون اللى هايخدك ياشيخه

هى : ليه بقى

انا : يعنى لو فضل يفسح فيكى شهور و جت عليه ايام حصله ضغط شغل و ماخرجيش اسبوع مثلا ..

هايشوف ايام سودا و هاتفضلى بقى تقولى شوف جوز فلانة بيعمل ايه و جوز فلانة بيسوى ايه

هى : لا طبعا انتى بتهرجى يعنى هو عشان اسبوع انسى كل اللى عمله ..

اكيد هارضى و استحمل لحد ماالضغط يخلص و هو اكيد هايعوضنى

انا  : ماظنش لان لو انتى هاتكونى كدا و هاترضى كنتى رضيتى عن نفسك الاول و شوفتى الحلو اللى فيها

و قولتى الحمد لله على حياتك ماكنتيش بصيتى لغيرك اللى من سنك

و كنتى بصيتى للحلو فى حياتك مش الوحش

المهم بعد ماخلاص اتفكت من الضيقه اللى فيها قولنا نكلم اصحابنا و نتجمع بقى مدام نزلنا ..

و قد كان حضر الاصحاب بس معهم دخيله واحده زميله صديقه لينا قولنا عادى اهلا و سهلا ..

و بعد الكلام و الحكايات جيه الدور على زميله صديقتنا و قالت هاقولكم موقف ضيقنى قوووى ...المهم فضلت تحكى

و كانت بتحاول تقلد صديقتنا دى بس بأسلوبها هى و طبعا مش عايزة اقولكم على الاسلوب يخننننننننننق بمعنى الكلمه

لكن انا قولت جايز يكون دا اسلوبها عادى فوتى و اسكتى المهم فضلت تحكى و المفروض ان الكل يضحك على الموقف

لكن الصراحة كلنا من اسلوبها كأننا شربين شوب لمون بالملح وبعد ماحكت الموقف وخلاص قولت الحمد لله ...

وجيت سألت سؤال برئ و ياريت ماكنت سألت

بقولهم شوفتوا صحيح الاغانى اللى طالعه زكي يا زكي و علي يا علي مافيش مره ضد يا ضد (قولنا لزوم الاسم بطلوا تدقوا)

لقيت الاخت اللى فوق دى فجأة

..... : ايه دا ؟؟؟ انتى بتسمعى الاغانى دى ...لالالالالالا

( طبعا بأسلوب و لا كأنى كنت بأكل صراصير قدامها ..معلش عشان بس اوصلوكم القرف اللى كانت بتكلمنى بيه )

قولت يابت اهدى .... ايوة حضرتك بسمع الاغانى دى مالها

.... : لالالالالا دا تلوث سمعى على فكره لالالالالا بجد ماكنتش اعرف انك بتسمعى الحاجات دى (بنفس الطريقه برضه اللى فوق)

الله مطولك ياروح ...ايوة هى تلوث سمعى وبصرى و هوائى كمان اصلى بحب الاذيه لنفسى معلش بقى قدرى كدا ..

وكمان ماكنتيش تعرفى ايه ؟؟؟ انا لسه عارفاكى اساسا

و طبعا صحبتى راحت مغلوشه و غيرت الموضوع عشان القاعدة ماتقلبش لأنها عارفه اننا بنكره حاجه اسمها تصنع و زميلتها دى كان باين قوى تصنعها

المهم فضلنا نتكلم و نضحك لحد ماجت بنوته صغيره بتبيع ورد البنت دى احنا عارفنها و دايما بنحب نهرج معها

و طبعا لأننا بقلنا كتير ماتجمعناش فضلنا نسألها عن اخبارها و نضحك معها و كدا ..

المهم مشيت لقينا الاخت اللى فوق برضه راحت قايله

..... : ايه دا انتو ازاى تتكلموا كدا عادى وتهرجوا مع الناس دى

الكل تنح وسكت و طبعا لانى كنت ماسكه زرار لسانى من بدرى لكن ماقدرتش بقى لأنها زودتها

قولتلها بصى انا عايزة اقولك حاجه المحترم مابيقلوش على نفسه محترم

و ابن الناس الاصيل مابيقولش على نفسه انا ابن ناس و اصيل و الهاى كلاس مابيقولش على نفسه انا هاى كلاس ..

فياريت بقى تبطلى تقليد و تصنع لأنها حاجه تخنق

 و رحت سيبهم و ماشيه … انا عارفه انى كنت قليله ذوق معها لكن بجد ماقدرتش امسك نفسى

ماهو انا هاستحمل ماشى انها تتكلم معايا كدا لكن مش هاستحمل السخرية من ناس مالهاش ذنب فى حياتها اللى طلعت لقت نفسها فيها

و انا ماشيه و راكبه الميكروباص فكرت فى صحبتى اللى انا ذكرتها الاول

لقتيها مش راضيه عن حياتها و معترضة و بتبص لغيرها عشان كدا هى تعيسة

و فكرت برضه فى زميله صحبتى رغم انى متغاظه منها لكن فى نفس الوقت حزينة عليها

لانى لقيتها برضه بتحاول تكون حد غيرها … ممكن يكون عدم ثقة فى النفس لكن برضه هايبقى راجع انها مش قادرة تحب نفسها

و لا تقبل حياتها و اكيد برضه هى مش سعيدة عشان كدا بتحاول تسعد نفسها بالطريقة الغلط و هى التقليد و التصنع

و سألت نفسى ليه الواحد مايرضاش بحياته و يحبها زى ماهى

و يحاول يصلح من عيوبه من غير مايبص لحد و لا يقلده ؟؟؟

و فى الاخر نرجع نقول هو ليه الفرح مش رضى عنا و الحزن هو اللى معانا

مش لما نرضى احنا عن حياتنا الاول و بعدين نطلب من الفرح يرضى عنا

و لا انتوا ايه رأيكم ؟؟؟

و دمتم سالمين

هناك 89 تعليقًا:

كـــيــــــــارا يقول...

برده اول تعلييييييييق


:-P:-P:-P:-P:-P

ومش هرد هه بس عشان تشرديني وسط المدونات

هه بس

ضد التيار يقول...

هههههههههههههههههههههه

انتى طلعتى امتى يابنتى ؟؟؟

مبروك عليكى اول تعليق

و كمان يعنى ايه مش هاتردى هنا الرد اجبااااااااااااااارى

انا بقولك اهو

و كمان اعملك ايه مش انتى اللى نشرتى فيرس (يانى ) الله

مش معامله دى ):

يلا نعمل هدنه وامرى لله

و منتظرة برضه عودتك (:

كـــيــــــــارا يقول...

انا مش عارفني انا تت مني انا مش انا

ايوه ايوه دي الاغنيه اللي لما احب اهيس اقوم اسمعها

وياليلللللللل

ربنا يمسيكي بالخير ياصبحتي فسدتي اخلاقي وسمعتيني اغنيه فلللللللللللللللللل:-P

----

بتفكريني في اول حوار بواحده صحبتي من الجامعه بتتصل بيا بتسالني عن احوالي وطبعا السوال ميخلاش مفيش دبله شمال ولا يمين اقول لسه تقولي انتي بتتقمري علي ايه قلتلها يبنتي الموضوع في الاول والاخر نصيب

فل لحد كده تقوم سالني عن الدراسه اقولها نجحت وخلاص قريب باذن الله هكون مسجله الماستر

تقولي يابختك انا كان نفسي اكمل بس البت سهيله بقي اعمل ايسه وكمان جوزي مش موافق

الله يقطع الجواز علي سنين الجواز علي اللي عاوز يتجوز

لا حول ولا قوة الا بالله انتي مش كنتي دلوقتي بتساليني اتجوزت ولا لا دلوقتي بتقولي علي الجواز لا

قلتلها ربنا يخليك جوزك وارضي بيه كمان مش ده اللي انتي كنتي بتحبيه من ايام اعدادي يعني كبرتي واتربيتي علي حبه وربنا رزقك ببدر ربنا يحرسهولك ويخليه ليكي ارضي بحياتك عشان تكني سعيده مع جوزك تقوم ممصمه شفايفها كده زي الستات الكبيره وتقول طيب منا راضيه اهو

----------
اول بنت

مش عندها رضي ودايما بتبص للي في ايد غيرها لكن هل فكرت غيرها مبسوط ولا لا
--------

مايمكن البنت اللي قالت عليها اللي يشوفها يقول اصغر مني دي اصلا مش سعيده هو السعاده ابتسامه علي الوجه فقط مايمكن مش من القلب يمكن بتداري حزنها بابتسامتها
-------

كل انسان ربنا اداله 24 قيراط كلنا زي بعض في الللي ربنا وهب له المال في الصحه في العلم في الرضا في راحه البال المهم اننا نرضي مش بقول نتخاذل ومنبقاش طموحين لكن مش نكون باصين لغيرنا مش يمكن غير نا مش مبسوط
--------
نيجي لاخت التانيه اللي مش عاجبها العجب ولا الصيام في رجب

وسع وسع للكلمه اللي فللللللللل

انا بحب الاذيه لنفسي ههههههههههههه

عسل يابت ياضد انتي اممممممموه

---------

التصنع

ليه اكون حد غيري مش بزمتك هحس بتقل علي قلبي

ليه ماكنش انا قدام الناس

يعني هي اول اما قلتليها انك بتسمعي علي ياعلي

هو وسري يعني مش حتي لو الاغاني دي مش بتتشغل في البيت بس علي الاقل بتتشغل في الافراح وكلنا بنفرح عليها ونرقص ونظبط البونيه اللي بتتجوز

هي مش حضرت افراح خالص ولا ايه

ولا لما بتروح فرح بتحط قطن في ودنها اصل الاغاني دي اياه بيئه

بلا قرف

مش عارفه هو لما تكون بطبيعتها هيحصل ايه بالعكس الناس هتحبها لان الناس بطبيعتها بتحب البساطه والروح اللي مفهاش اي تصنع



والله مش عارفه اقول ايه هو شلل علي الصبح وشلل علي الليل

ليه ياضد كده ياضدد منا كنت بحبك ياضد يعني هو الضغط ناقص ياضد ولا المراره في مكانها يعني


---------

انا رديت اهو ومسمعتش كلام نفسي الشريره

اخد مصاصه بقي ;;);;)

كـــيــــــــارا يقول...

هههههههههههههههههههههه

انتى طلعتى امتى يابنتى ؟؟؟

--------

طلعت من شويه كنت في الدولاب وقالو ضد نزلت بوست فطلعت من بين الهدوم ايه طلعتي امتي دي هو انا عفريته عاااااااااا

------------

مبروك عليكى اول تعليق

-------

الله يبارك فيكي

-----------

و كمان يعنى ايه مش هاتردى هنا الرد اجبااااااااااااااارى

انا بقولك اهو

----------

انا ردييييييت اهو
------

و كمان اعملك ايه مش انتى اللى نشرتى فيرس (يانى ) الله


-----------

ههههههههههههههه ايوان

-------
مش معامله دى ):

يلا نعمل هدنه وامرى لله

و منتظرة برضه عودتك (:

-----------

لا مس تزعلي بقي امممممممممموه

لورنس العرب يقول...

لا يوجد من يصلح من عيوبه لأنه نادرا ما تجدي انسان مقتنع أن عنده عيب
ولكن يوجد من ينظر إلى عيوب الآخرين بشده
ولا يوجد من يرضى بما قسمه الله له بسبب النظر إلى الآخرين
فالنظر للناس هو المشكله الكبرى- ووضعك في المقارنه بينك وبين الآخرين يسبب لك أزمه
ودائما ما تكون المقارنه بينك وبين الأعلى منك ماديا
فلا يوجد من يقارن نفسه بمن هو أقل منه في مستوى المعيشه
لأنه لو حدث لقال الحمد لله على ما أنا فيه
لكنها طبيعة بشر

ABOALI يقول...

حوار منطقى
وهو حديث الساعة
لو يا ضد التيار التيار ضد على راى الاغانى
ولو للحظة ونظرتوا بصدق للطفلة اللى كانت بتبيع الورد وشفتوا تعبها علشان وردة وشفتوا انى لم تجد اباء يعلموها او يكفوها ذل التشرد وبيع الورد لو نطرت صديقتك لها وعرفت انها من المنعمين لكان الوضع تغير
شوفى حكمة قارون لما نظر الناس الى ماله
انظرى الى مصعب بن عمير هو الغنى ابن الغنى فى ساعة موته
لم يجدوا له غطاء يكسو كل جسمه
فاءذا غطوا الراس ظهرت الارجل والعكس


بس مع كل ده
لو نظرتوا فوق فى سما صافيه او منظر جميل اكيد بطاريات الابتسامة هاترجع تانى

السعادة لا تتعلق بالسن

المهم
سيبك انتى
مش عاوزين صديق معاكوا

~*§¦§ Appy §¦§*~ يقول...

بص يا قمر صباح الخير الاول
هقولك على حاجه يمكن انتى شايفه انها بتتصنع انتى ادرى بيها
بس فعلا فيه ناس مش بتحب الاغانى دى وانا بتقرف منها هههههههههههههه
وما بسمعها بيجيلى هسترية ضحك مش عارفه ليه
المهم اذا كانت متكلفه فانتى مش محتاجه تقولى لها كده لانه بيبان زى ما انتى قولت بس انتى استعملتى اسلوب غلط كنت خليك ذكيه وازنقيها فى اسئله صعبه هتبينى ليها قد ايه هى ضعيفه
من غير ما تجرحيها ولا انتى تطلعى وحشه
وعموما مش عيب ان الواحد ميكونش كويس ويحاول يبقى كويس
قوليلى افتكرتى الباس وورد ولا لا هههههههه
اقولك ابعتيها ليه وانا احفظها لكى

nona يقول...

يافتاح يا عاليم يا رزاق يا كريم اية الناس الاى مش بتبات فى بيوتهم دية على طول فى الشارع و بايتة فى المدونة منك لية لية برضة

بصى يا ضد هى صاحبتك مشكلتها انها بتبص للى حواليها او ممكن حد بيقولها مالك معقدة كدة لية مش شايفة فلانة و علانة
و كمان جايز حد من اهلها يقولها فكيها عشان تتجوزى زاى فلانة و اللهى بتحصل
بس قوليلها مادام هى شايفة انها صح ما تبصش على حد تانى
عارفة هى لو اتحطت فى ازمة واحدة هتتقعد بقيت عمرها فاخليها كدة احسن

اما البنت التانية من راى ماكنتيش رديتى عليها خلاص و كان كفاية تجاهلة و كنتى استاذنتى و مشيتى و بعد كدة اطلبى من صديقتك انها ما تجبهاش معكم فى اى خروجة تانى
و مالها ذكى ياذكى
هى ماسمعتش عن الواد الاى بيغنى على امة الاى لازم يجيبوا الشبكة و الفرح عليهم عشان امة ترضى
ناقص كمان يتجوزوا بدالة هههههههههههههههههههههههه
المهم انتى عاملة اية دلوقتى سيبك سيبك تعالى انا عازمكى على سندوتش فول و طعمية معتبر

smilyrose يقول...

يااااااااااااااااه

كل مرة اجى متأنخرة ايه دا بقى

كدا مش ينفع

كل مرة البت كيارا

الأول

smilyrose يقول...

على فكرة فيه ناس كتير فعلا مش مقدرة

نعمة ربنا عليها

يعنى كفاية انها مش عاشت الألم والجرح

والمرار من التجارب المريرة

اللى ممكن تتعرض ليها

بتبقى اثارها كبير جدا

وبعدين البساطة واروح الحلوة

مفيش اجمل منهم

حتى اسألى البت كيرا اللى مجننانى

ههههههههههههههههه

smilyrose

روح الحب الصادق

الازهرى يقول...

عزيزتى

الشعور بالاختناق من وقت لاخر يحدث مهما تعددت الاسباب واحيانا بدون سبب
المهم هو اللجوء وقتها الى ما تحبين ليزول سريعا
اعاذنا الله تعالى منه دوما

للاسف التصنع اصبح موضة ودائما ما يكون مفضوحا وغير مقبول على الاطلاق لانه يشعرنا باننا غير ما نحن عليه

وافضل شىء هو ان اكون على طبيعتى هذا غالبا ما يجعل الناس من حولى متمسكين بى اكثر وحبوننى وقد جربت هذا كثيرا فى حياتى وكان ناجحا دائما وبدون اى استثناء

تحياتى على الموضوع الجميل
بالمناسبة ايه طعم الليمون بالملح
وانوه الى اننى لا اعتقد ان الهدنة يمكن ان تستمر بين مشاكستين
والايام بيننا

كـــيــــــــارا يقول...

smilyrose

يااااااااااااااااه

كل مرة اجى متأنخرة ايه دا بقى

كدا مش ينفع

كل مرة البت كيارا

الأول

----------

ايه يابت ياسميلي مالها كيارا بس

عاااااااااااااااااا

احمد على نصار يقول...
أزال المؤلف هذا التعليق.
احمد على نصار يقول...

هيييييه : وما الدنيا الا سيرك قومى كبير اه واللهى كبير.

اه منكو انتو يا بنات تحبو تعملو من الحبه قبه وكبه وكده لكن لى سؤال القصه دى هى من وحى خيالك ولا يعنى ابداع شخصى ليكى ولا واقع وحصل فى وقت ما
فى كل الحالات اقول لصاحبتك مش حتقدرى تغيرى حاجه اعملى كما قال الرائع برنارد شو : سر تعاستنا ان احنا عندنا الوقت اللى نقول فيه احنا سعداء ولا تعاسنا خليها تحاول تبقى روشه طحن وعلى طريقه الجماعه دول انهى تعليقى ب قشطه يا مان( مان ايه بس ده ناسى انك بنت)لكن تمشى كده وكده

esraa يقول...

الرضا هو فعلا كلمة السر للسعاده

لو كل واحد يرضي عن نفسه واللي ربنا قسمه له وده مايمنعش انه يكون عنده طموح انه يبقي احسن
أكيد كان كل الناس عاشت حياتها سعيده

Zanooba (Zeinab sab9n) يقول...

إيه الحزن ده كله و ليه الملل ؟؟ بصي هو أهم حاجة إن الواحد يحاول يلاقي الحاجات الصغيرة اللي في الحياة الجميلة و يركز فيها و يحاول يحسن من العيوب الكبيرة ....
و ده رأي ...مستنية تنوريني في مدونتي

the sniper يقول...

الزهق ده عادى المهم عدم السامح له بالدوام صح ولا ايه.......

ويارب تدوم الصحبه الحلوة بينك وبين كيارا.......


تحياتى

mohamed ghalia يقول...

فعلا عندك حق كل واحد لازم يعيش حياته زى مهيا يحاول بس يطور فى حياته مع الوقت ويصلح عيوبه
بس ده لا يمنع إنها حاجة كويسه إننا نقف مع نفسنا كل فترة ونشوف عيوبنا ونفسنا نغير إيه
جميل قوى الكلمة غلى قولتيها لصاحبتك احمدى ربنا انك بتشوفى تجارب غيرك
فى حكمة بتقول الحكيم من اتعظ بغيرة
وكمان حلو قوى احساسكم بالطفلة
بس براحة شوية على البنت صاحبة صديقتك كان ممكن توجيهها بأسلوب ألطف من كده وتكسبيها كصديقة جديدة
أحسن إلى الناس تستعبد قلوبهم.
تحياتى
وإن شاء الله هنزلك أغنية بإسمك المجهول
دمتى بود وفى سعادة

mohamedgado يقول...

بصراحه انا اول مره ازور مدونتك
موضوعك ده جميل وعلى فكره انت صح من بداية الموضوع لاخره
وانا فى اوقات كتير مابقدرش املك نفسى زيك كده
وممكن اعمل اكتر من كده رغم انه بيزعل ناس كتير لكن انت معاكى حق
تحياتى

elsha3er يقول...

السلام عليكم انا شايف ان مش ممكن يكون صحبتك دى عندها حق وانها فعلا مش عايشة حياتها وسنها انا احيانا بحس الاحساس دة خصوصا لما ابقى فى مؤتمر ولا حاجة الناس قدامى بحس ان انا كبير عن سنى اوى وانى عجزت انا شايف انها ما غلتط فى حاجة

اما البنت التانية والله الناس دى انا بكرها كره العمى بس هو فعلا انتى بتسمعى الحاجات دى انا مش قصدى حاجة بس فعلا هى تلوث سمعى بس ممكن تتقال من غير انعرة كدابة بس انتى مهما كان كنتى فضلتى ما سكة الزرار لحد الاخر

احمد الشاعر

الفارس الملثم يقول...

زي انتي ما قلتي في نهاية البوست , القضيه هي في الرضا , يعني ربنا ماداش كل انسان كل حاجه ..

زي مفيش انسان كامل مفيش انسان كله عيوب , الانسان جواه اشياء جميله واشياء سيئه وعليه قدر الامكان انه يبقي سعيد بمميزاته دي ويحاول يتخلص من عيوبه

وكمان محدش يعرف فين الخير وفين الشر , فقد نتمني حدوث اشياء فيها كل الشر , او نحزن لحدوث اشياء تحمل كل الخير لنا ..

وفعلا في ناس بيبان التصنع في كل تصرفاتها , بمعني انهم يحسسوك انهم اللي بيفهموا في كل حاجه وانت اللي مش فاهم حاجه وانهم كلهم ذوق وانت انسان بيئه بس طبعا ده اكتر بكتير عند البنات مممممممممممممم...

بوست جميل اوي بجد

تسلم ايدك

ضد التيار يقول...

كيارا

----------------

هههههههههههههههههههههه

و الله الاغانى دى بتبقى فعلا عباره عن تهيس مش اكتر

-------

معكى حق فى كلامك

للأسف احنا بنشوف الظاهر و نحكم عليه و بس

و للأسف السياسه دى بقت فى كل حاجه فى حياتنا

----------
ههههههههههههههههههه

عجبتك قوى انى بحب اذى نفسى ياساتر على البشر دا انتى بتحبنى حب

دا بدل ماتقولى لا و تنصحى و تخافى عليا من نفسى ماشى ماشى

مع انى زعلانه لكن برضه اممممممممممموة هه ):
-------

و اى تقل انا لما مثلا لما حد يجربنى انى اكلمه باسلوبه عشان اقدر اتعامل

معه

بحس انى واحده تانيه خاااااااااااالص و بيبقى مش طايقنى نهائى

لالالالا شكلها مابترحش افراح

بصى هى ماشى نقول تعترض على الاغانى دى و كل حاجه

لكن فى اسلوب المفروض اعترض بيه لكن هى عشان بتقلد تقليد اعمى

فكان الاعتراض بطريقه مستفزة جدااااااااااا

و ربنا يهدى

---------------

هههههههههههههههههههههههه

بعد الشر عليكى من الشلل

بس تعالى هنا ايييييييييييه كل الضدضاد دى

دا انا كرهت اسمى ياشيخه و انا بقرأها حسيت بتتتتتتتتتقل قوى

بس صحيح نسيتى ياضد فى اخر كلمه P-:

------------

شطورة

بس برضه مافيش مصاصه P-:

ضد التيار يقول...

كيارا من جديد

--------------------

ههههههههههههههههههههههههههههههههه

عفريته هههههههههه انتى كنتى عندك شك انك مش عفريته ولا ايه

P-:

انا اقصد طلعتى امتى لانى كنت لسه بظبط اساسا فى الموضوع لقيت ردك

بايته فى المدونه ههههههههههههههههههه

لا بجد بقى دايما يارب تكونى اول تعليق و لايهمك ياقمر

امممممممممموة و ادى بوسه كمان

بعد كدا على فكره هافرض ضريبه على كل بوسه مش معامله دى

P-:

ضد التيار يقول...

لورنس العرب

-------------------

عندك حق فى كلامك و ان فى ناس بتحب تصطاد للناس عيوبها

و دول كتييييييييييييير

لكن اختلف انها طبيعة البشر

لان فى ناس عارفه كويس بعيوبها و بتعترف بيها و بتحاول تصلح من نفسها

و ناس راضيه عن حياتها زى ماهى

و ناس بتحمد ربنا على اللى هى فيه لانها شايفه اللى اقل منها ازاى

و كل دول بشر

هى من طبيعة البشر انه عايز كل حاجه و دا يندرج تحت مسمى الطموح

و دا مش عيب ... ولا ايه؟؟؟

لكن مش من الطبيعى اننا مانرضاش بحياتنا

هما ماشى الاغلبيه للأسف مابقتش راضيه لكن برضه مش نخليها طبيعة لينا

ضد التيار يقول...

ابو على

----------------
(لو يا ضد التيار التيار ضد على راى الاغانى )

حاولت افهم الكلمه دى لكن ماعرفتش

هى الاغانى بتشقلب الكلام ؟؟؟

--------

ماهو للأسف و زى ماقولت لكيارا فى التعليق

انها بتقلد تقليد اعمى و بالتالى التقليد وصلها انها تتكبر على

طفله مالهاش ذنب فى اللى هى فيه

----

معك طبعا ان السعاده لا تتعلق بالسن و لا حد قال كدا

امممممم موضوع السما دا نبقى نتناقش فيه لما نتقابل انا وهما بقى و عليك

خير ):

لالالالالالالالالالالالالالا احنا فى جروب عنصرى بحت

ضد التيار يقول...

آبى

----------------

صباح النور ياجميل

لا انا ماقولتش التصنع لانها مابتحبش الاغانى دى

لالالالا هى حتى و هى بتحكى الحوار كان باين قوى التصنع للكل

الاغانى دى كانت مجرد حاله تهيسيه بحت مش عشق ليها

لكن اسلوبها ماخلنيش يبقى ليا نفس انى افسرلها

و كان واضح من كلامى لو هى اخدت بالها انى بتريق لما قولت مافيش ضد

ياضد

انا عارفه انى اسلوبى غلط و اعترف بكدا

لكن بجد ماقدرتش امسك نفسى لما اتكلمت على الطفله دى كدا و كان

اسلوبها وحش جداااا

و ماكنش فيا دماغ انى حتى اتعامل معها و لا ازنقها

طبعا مش عيب الواحد لما يحاول يصلح من نفسه لكن للأسف فى ناس بتفتكر انه عيب

----------
الحمد لله مافتكرتش ههههههههههههههه

بس جهازى رجعلى تانى (:

اممممم من الواضح ان الذاكره عندك قويه

دا مش قر دا حسد بس D:

ضد التيار يقول...

نوناااااااااااا

---------------

هههههههههههههههههههه ايه يابنتى التطفيش العلنى دا

ماشى ياستى طفشى طفشى بس اياكى اشوفك بايته فى مدونه حد انا

بقولك اهو (وش شرير)

يعنى تفكير المجمتع نفسه هو السبب فى عدم رضى الانسان عن حياتها

يعنى هى لما تفكها كدا ممكن تتجوز؟؟؟

دا اى عقل يقول كدا بس

و الله انا حاولت بقدر الامكان بالفعل اخرجها و افهمها انها ترضى فعلا بحايتها

مدام صح

و لو فى حاجه هى شايفها غلط تصلحها

عارفه و دا اللى انا قولته انها تقول الحمد لله انها بتتعلم من تجارب الغير

كان نفسى لكن للأسف ماقدرتش

ماهو دا اللى حصل و صدقيتى نفسها قالت انها مش هاتجبها تانى لكن اليوم دا كان لازم لانها كانت معها فى مشوار ):

ههههههههههههههههههه انا ماسمعتش على فكره عنه

هو مين دا ؟؟؟؟ (شوفتى الاحرجات اللى انتى حطانى فيها مش كنتى تقولى هو مين و انتى بتتكلمى)

مش معامله دى

عااااااااااااااااااااااااااا

لالالا مش عااااااااااااااااا دا فى عزومه

ماشى بس فين و امتى و عند مين؟؟؟؟؟

شفتى مابصدق انا ههههههههههههههه

ضد التيار يقول...

smilyrose

--------------

معلش ياقمر المهم انك جيتى

بصى انا عندى فكره اغتليها بس ماتقوليش بقى انى قولت هه

خلى السر بينى و بينك فى التعليق D:

--------

معكى حق فى كلامك وياريت فعلا اللى كدا يحاول يعيش حياته و يحبها

اممممممم اسأل كيارا ؟؟؟

طيب ماتقولى انتى بقى و سرك برضه فى التعليقات ماتخفيش D:

ضد التيار يقول...

الازهرى

------------
انا معك ان الواحد يكون مخنوق كتير بتحصل للكل و ممكن فعلا بدون سبب

ماهو انا برضه بيجى وقت واتخنق من كل حاجه لكن من غير اشمعنا

انا هنا بتكلم ليه نبص لغيرنا و نقول اشمعنا ؟؟؟ ليه مانرضاش بحياتنا

ماهو كدا هانفضل على طول فى حزن لاننا بدأنا نقول اشمعنا فلان او فلانه

ولا ايه؟؟؟

مش عارفه هى موضه ولا لأ بس عموما انا معك فعلا ان الانسان لما بيكون على طبيعته بيبقى افضل بكتييييييييير

امممممم طعم اللمون بالملح

خليها مفجأة و جربه هاتلاقيه راااااااائع

جربه جربه على ضمنتك D:

هههههههههههههههههههههه انا قولت برضه استحاله تكتب تعليق من غير ماتهدى النفوس

هاتستمر و الدليل قالوله D:

romansy يقول...

اهلا يا ضد يا مخنوقه
بقى بتسمعى الاغانى اللى كلها رقص دى وتبقى مخنوقه طب بقى ازاى
على العموم يارب دلوقتى تكونى كويسه
وتكون صاحبتك كمان كويسه
وخليها تركز فى مشوارها بس
اكيد هتنجح
واكيد كمان هيه ناجحه فى حياتها علشان من الاول مش كانت عايشه سنها زى ما بتقول
انت عارفه يا ضد
لو كل انسان بص قدامه بس ومش بص حواليه اكيد فيه حاجات كتير هتتغير

ضد التيار يقول...

احمد على نصار

--------------

هى الدنيا ايه بالظبط ؟؟؟ انا احترت معكم كل شويه حد يقولى ما الدنيا الا كذا

)):

اممممممم هو انا قولت النهارده يوم الزهق العالمى

يعنى حصل فى نفس ذات الوقت

على فكره انا لما بنزل موضوع من وحى الخيال بعمل تنويه عنه فى البوست (:

روشه طحن؟؟؟

دا ايه النصيحه الجامده ..حرام عليك دا بدل مااقولها خليكى على حياتك اروح مبوظه حياتها

على فكره صديقتى دى من الناس اللى بحب تفكرهم قوى و اسلوبهم بس مش عارفه ليه هى مش شايفه دا

ربنا يارب يهديها للطريق الصح

مان تمشى كدا و كدا؟؟؟؟؟؟؟؟؟؟؟؟؟؟؟؟؟؟؟؟؟

متأكد ؟؟

بسنت يقول...

و فى الاخر نرجع نقول هو ليه الفرح مش رضى عنا و الحزن هو اللى معنا



مش لما نرضى احنا عن حياتنا الاول و بعدين نطلب من الفرح يرضى عنا
-------------------
كلامك الاخير دا هو المختصر المفيد فعلا
الواحد لما بيراجع حياته بيلاقى الحمد لله فيها حاجات كتيره كويسه
واحسن من غيره
بس موجه الضيق دى ودى معايا من اول اليوم بردوا للاسف ساعات مش بلاقيلها سبب واضح وظاهر علشان احله

بوست جميل وعجبنى اوى اسلوبك
دمتى طيبه

ضد التيار يقول...

esraa

------------------
الرضا هو فعلا كلمة السر للسعاده

ياريت فعلا الكل يرضى عن حياته عشان يقدر يكون سعيده

ربنا يهدي الجميع

ضد التيار يقول...

Zanooba (Zeinab sab9n)

-------------------

و انا اتفق معكى فى الرأى

لكن انتى بتقولى ليه الحزن ماهو انتى لما تلاقى حد قريب منك حزين اكيد اتى كمان هاتكونى حزينه

و لما تلاقى حد بيحاول مايبقاش هو اكيد هاتكونى حزينه عليه

بس الحمد لله مافيش ملل و لا حاجه

ماانا رحت بس برضه ماعرفتش لحد الان

مين سنيه الكشريه دى

عااااااااااااااااااااااااااااااااااااااا

ضد التيار يقول...

the sniper

-----------------

صح

امين يارب

بس من غير فيرس (يانى) اللى نشرته مابين المدونين عليا ):

ضد التيار يقول...

mohamed ghalia

----------------

طبعا الواحد المفروض يقف مع نفسه ويصلح عيوبه

لكن مش يقف مع نفسه عشان يبص لغيره و يعترض على حياته ولا ايه؟؟؟

صدقنى انا كنت ساكته عليها و فعلا كنت ناويه اخدها براحه لكن للأسف اللى قالته عن الطفله عصبنى ماقدرتش اسكت

و معترفه انى كنت قليله ذوق معها لكن بجد الاسلوب استفزنى

ايه دا هيبقى فى اغنيه ضد ياضد (:

ضد التيار يقول...

mohamedgado

------------------

هو بص موضوع انك ماتقدرش تملك نفسك دى فعلا شئ غلط


عشان كدا انا قولت فى الاخر انى عارفه انى كنت قليله ذوق واعترفت بالغلط دا

لان لازم الواحد يكون صبور على اللى قدامه

ولا ايه؟؟؟

ضد التيار يقول...

احمد الشاعر

----------------
لا يااحمد انا شايفه انها غلطانه عارف ليه؟؟

لانها قالت اشمعنا فلانه

و كمان مقياس السن اللى هى اتكلمت بيه من الاساس مش صح

يعنى هو انا عشان اعيش سنى لازم اعيش الحياه بالطول و العرض من غير

قيود؟؟؟؟

و لا لازم اجرب و اغلط بنفسى و ماتعلمش من تجارب الناس ..هل كدا انا

بعيش سنى؟؟؟؟

-----------
انا مافهمتش المثل اللى قولته عن نفسك

عشان كدا مش هاقدر اتكلم فيه

عموما ياريت توضحه

------------------
و مين بيحب المتصنع

ربنا يهديهم

انا عارفه انها تلوث سمعى لكن زى ماقولت فى ردى على آبى

الاغانى لو سمعتها فاهى حاله تهيسيه مش اكتر لانى اساسا بفضل اضحك عليها و اتريق

اما لما انا قولت الكلام دا لاصحابى فكان واضح قوى التريقه لانى فى الاخر قولت مافيش مره ضد ياضد

هو فعلا كان المفروض افضل ماسكه زرار لسانى لكن طريقتها فى الكلام مستفزة

انا عارفه انه مش مبرر عشان كدا اعترفت بالغلط دا

ضد التيار يقول...

الفارس الملثم
------------


اكتر بكتير عند البنات

لا بقى برضه فى ولاد كتيييييييييييييير كدا

العنصريه هاتشتغل دلوقتى انا عارفه ((:

نتكلم بجد اتفق معك فى كل كلمه قولتها


تسلم انت على المرور

ضد التيار يقول...

رومانسى التفاؤل

---------------

هههههههههههههههه مين قال انى مخنوقه انا متغاظ فيه فرق

P-:

لو كل انسان بص قدامه بس ومش بص حواليه اكيد فيه حاجات كتير هتتغير

و دا فعلا اللى حاولت اقوله من خلال البوست

ضد التيار يقول...

بسنت

-----------
الواحد لما بيراجع حياته بيلاقى الحمد لله فيها حاجات كتيره كويسه
واحسن من غيره

----------
فعلا و الله بس للأسف البعض مابيشوفش الكويس و دايما بيبص للوحش فى

حياته لانه بيبص لغيره

-------------
بس موجه الضيق دى ودى معايا من اول اليوم بردوا للاسف ساعات مش

بلاقيلها سبب واضح وظاهر علشان احله

------------
بصى الصراحه انا مش فاهمه الحته دى

انا عارفه الفهامه عندى و اخدها شهاده الايزو فى عدم الفهم

ممكن توضيحى اكتر ):

--------
نورتى ضد التيار (:

طـــائر الليــــل الحـــــزين يقول...

صديقتى ضد التيار .........
واللهى يا قمرايا حوار جامد .
خصوصا ان فى ناس كتير ماشيين بالمنطق ده
ومبيشفوش غير السلبيات اللى فى حياتهم . عشان الاجبيات طبعا بيكونوا شايفنها فى ايدين ناس تانية .
احلى ما فيكى انك دايما تجيبى حاجات من الواقع . من الكلام اللى بيحصل كتير قدامنه . بجد انتى دايما متميزة .
معلش مش عارفة اطول عن كده انت اكيد فاهمة ....
بس حبيت انى اكون متواجدة دايما معاكى فى مواضوعاتك الجامدة
تحيـــــاااتى

Walad_Masry يقول...

بنسوار يا نينه

فعلا مشكلة كبيرة جدا غن الواحد مايرضاش باللي ربنا سبحانه وتعالى قسمهوله وكمان التقليد والاصطناع ده شئ فظيع

لأن فيه كذب

الانسان بيحاول يكذب على اللي حوليه ويفهمهم غير الواقع

للأسف الناس دي بتكون مريضة ومحتاجة لعلاج

وللأسف كمان إن العلاج ده بينبع من إيمانهم بالله

يعني لازم جرعة الإيمان تزيد عندهم علشان يتخلصوا من اللي هما فيه

الدنيا قصيرة قوي وممكن تكون أقصر مما نتخيل ومحدش هياخد منها غير اللي ربنا سبحانه وتعالى كتبهوله يبقى ليه بقى الناس تبذل مجهود وتضيع وقتها في التتنافس على جناح بعوضه مع إن كل اللي هنطول منها عبارة عن حفرة متر في مترين

ربنا يهدي

تحياتي

اقصوصه يقول...

انا معاكي بكلامك فعلا

لو حاولنا ننتبه للنقص الموجود بحياتنا ونحاول تقويمه بطرق سليمه

ع الاقل بنطلع بنتيجه

اما لو فكرنا انه غيرنا عنده وعنده وحياته احس من حياتنا ويملك اشي احنا ما نملكها

بنزيد احساسنا سوء اكيد..!!

شمس النهار يقول...

اولا واخيرا الرضا بما قسم الله لنا
والشكر علي نعمه
ولآن شكرتم لازيدنكم
لو كل واحد رضي بحياته وحبها
لو قاسيه يعتبرها امتحان من الله وياريت ينجح في الامتحان
هيجد هدية النجاح امر يفوق تصوره وخياله
بس يعمل ده وهو واثق في رحمة الله
وان ماكنش في الدنيا يبقي الجنه ونعيمها

الطالبة عفو الله يقول...

موضوع قيم اختي و يستاهل المناقشة فعلا
بجد بجد الناس مبقاش حد راضي بما قسم الله له
مش عارفين ان ربنا ادة كل واحد نصيبه
و مفيش حد كامل
الكمال لله وحده
ليه ديما بنبص للي احسن منا و نبقى متغاظين عشان هما احسن منا
ليه منبصش للي اسوء منا و نقول الحمد لله على النعم الي احنا فيها
الله المستعان

افتكر كلام صحبتي نور الله يذكرها بالخير كانت تقولي ديما يا زوزو خليكي على طبعتك و متقلديش حد الي حيحبك حيحبك زي منتي
بحلوك و مرك

مفيش احلة من الواحد يكون على طبيعته و راضي بما عنده و حابب نفسه

ربنا يبارك فيك حبيبتي
دمتي في حفظ الله

حـــــدوتـــــة يقول...

السلام عليكم

صاحبتك الاولنية
يمكن يكون عندها مشكلة فعلا وانا لو منك كنت هشوف هى فعلا معقدة ومكلكعه زى ما بتقول ولا هى متغاظة من البنات اللى عايشة حياتها
وبعد ما اعرف ده اقولها رأيي

صاحبتك التانية
دى حركات بنات متشغليش بالك بيها

سلالالالالالالالالالالالالالالالالالالالالالالالالالام

قطرات من شواطئ الحياة يقول...

أيه داااا ؟؟ انت بتركبي ميكروباس؟؟؟ لالالالالالالالالالالالالا ماكنتش أعرف عنك كدا أبدا
هههههههه
بهزر والله لا تفتكريني منهم ;-)

عارفة آخر جملة في البوست هي الخلاصة فعلا لما نرضى عن حياتنا الأول الفرح حيرضى عننا !!!

بنت مصريه يقول...

عندك حق والله ف كل كلمه انتى قولتيها
والموقف اللى انتى عملتيه دا انا لو منك كنت هعمله
لانى موتى وسمى التعالى على الناس
ليه يعنى كنت مين انا عشان اتكبر على فلان او علان
عندك حق والله

بوست هايل احييكى

»-(¯`v´¯)-»Ahmed.3LaM»-(¯`v´¯)-» يقول...

سعات الواحد منا بيحس انه مش متوافق مع نفسه مش راضي عنها ومش راضيه عنه
ويقول لو عملت كذا زي الواد كذا
واعيش حياتي وانفض للمجتمع

وانت ايه عرفك ان الواد التاني ده مبسوط في حياته مش يمكن قرف منها وعايز يبقي زيك وعايز يقلدك انت وشفت بقي ويا سبحان الله انت الي عايز تقلده

لو رضيت عن نفسك هتحس بسعاده
ولو عرفت ان في ناس عايزه تقلدك
هتحس بنعيم

اصل لو انت رضيت عن نفسك هيرضي عنك الاخروووووووون

ahmed_k يقول...

فعلا معاكي حق
التصنع وعدم قبول الذات أمر حقير
لأن الله سوى بين العباد
فمن فضل في أمر قلل في أمر آخر
وهكذا لأن الله هو العادل
فلا فضل لأحد على أحد
وقد اخبرنا النبي عليه الصلاة والسلام
(رب اشعث أغبر لو أقسم على الله لأبره)
فقد يتقبل الله دعاء من يحقره الناس ويرد دعاء من يعظمونه

سعيد بالتعرف على مدونتك
وتقبلي خالص تحياتي

خواطر ليست عابرة يقول...

عجبني كتييير فعلا الحوارات اللي درات واسمحيلي آخد منها جزء حسيت فيه بذكاء عشان أنا بقابل ناس فعلا بتتعامل كدة ومش بعرف أرد عليهم ازاي

(المحترم مابيقلوش على نفسه محترم

و ابن الناس الاصيل مابيقولش على نفسه انا ابن ناس و اصيل و الهاى كلاس مابيقولش على نفسه انا هاى كلاس)

(فياريت بقى تبطلى تقليد و تصنع لانها حاجه تخنق)
أكثر ما يخنق الانسان انه يشوف أصدقائة بيتصنعوا الجمل ومش بيتصرفوا بطبيعتهم
تحياتي علي البوست الجميل

ضد التيار يقول...

طـــائر الليــــل الحـــــزين
-------

اولا حمدلله على السلامه

فعلا كتير قوى بيشوف الاجابيات اللى عند غيره و بينسى يشوف اجابيات

نفسه

ولا يهمك ياقمر و حمدلله على السلامه مره تانيه

دايما يارب التواصل و المحبه بينا (:

ضد التيار يقول...

ولد مصررررررررررى

--------------

اهلا باللى دايما متأخر

المشكله اللى بيحاول يكذب على الناس دا بالتقليد و التصنع بيبقى باين

حتى لو هو ماهر بيجى يوم و بيكشف نفسه

و على رأيك ربنا يهدى

بس برضه مش هاسيب حقى واخد بالك (وش شرير)

ضد التيار يقول...

اقصوصه

-------------

طبعا اتفق معكى فى كلامك

منورة بزيارتك الاولى ضد التيار (:

ضد التيار يقول...

شمس النهار

---------------

اكيد معكى حق فى كلامك

و ياريت فعلا كل واحد يرضى بحياته وقتها حاجات كتير هاتتغير

ضد التيار يقول...

الطالبة عفو الله

-----------------

اللى بيبص للأحسن منه و بيكون متغاظ دا بيبقى عدم ثقه فى النفس او حقد

و دول ابشع من اللى ذكرتهم انا

و فعلا كلام صحبتك صح ربنا يخليهالك يارب و دايما تكون الصديق الصدوق

تحياتى

☼♫♪ عمــاد الدين يــوسف ☼♫♪ يقول...

هي النفس البشريه ، متطلعه للمعالي ديما وغير قانعه بممتلكاتها ، مع انها وارد جدا في لحظات تخسر كل حاجه وتعرف اد ايه هي كانت في نعمه ، لكن سبحان الله في خلقه
وفعلا صدقت الحكمه :
القناعه كنز لا يفنى

تحياتي

ضد التيار يقول...

حدوتة

-------------
لا ماهى صحبتى من زمان و عارفه و واثقه انها مش مكلكعه و لا معقده

اما بقى موضوع الغيظ دا استحاااااااااااله لانها انسانه جميله و بتحب الخير للكل

ماانا عرفت و قولتلها رأيى (:

ههههههههههههههههههه حركات بنات على اساس ان القاعده ولاد مثلا؟؟؟

مااحنا بنات زيها ليه يعنى مابنعملش الحركات دى ؟؟؟؟

ضد التيار يقول...

قطرات من شواطئ الحياة
--------------

ههههههههههههههههههههههههه

و الله اول لما شفت التعليق موت من الضحك

عارفه طبعا انك بتهزرى بس تخيلى فعلا موضوع الميكروباص دا ممكن كانت تعترض عليه ماهو برضه بيشغل الحاجات اللى هى معترضه عليها

ربنا يهدى

منوره ياقمر ضد التيار (:

ضد التيار يقول...

بنت مصريه

----------------
ليه يعنى كنت مين انا عشان اتكبر على فلان او علان

تعرفى ان المفروض كنت كلمتها كدا بس لان الموقف كله كنت متنرفزة منه رحت خبطه الطوبه و سيبها و ماشيه

يلا بقى اهو نصيب

اشكرك على مرورك ياقمر

ضد التيار يقول...

»-(¯`v´¯)-»Ahmed.3LaM»-(¯`v´¯)-»

----------------
ياااااااااااااه اخيرا حد اتكلم بصيغه المذكر

اصل لو انت رضيت عن نفسك هيرضي عنك الاخروووووووون

لالالالالالا اختلف معك فى دى بقى لان الاخرين مابيرضوش فى جميع الحالات للأسف

بس لو رضيت عن نفسك هاتكون سعيد بحياتك

ضد التيار يقول...

ahmed_k
------------
انا اللى سعيده بتعليقك

و تشريفك لمدونتى المتوضعه (:

ضد التيار يقول...

خواطر ليست عابرة

----------------
طبعا اقتبس زى ماانت عايز

لكن نصيحه بلاش تتعامل كدا لان فعلا انا حسيت بذنب كبير انى خبط الطوبه دى فى وشها

هو اى نعم الموقف ينرفز بس برضه الواحد ماينفعش يبقى جارح

للأسف انا لما مشيت حسيت بالكلام اللى بقوله دا

فياريت لو هاتتعامل مع حد كدا تحاول تصبر عليه بلاش تعمل زيى

ضد التيار يقول...

عمــاد الدين يــوسف

----------------
القناعه كنز لا يفنى

جبت الخلاصه فعلا

(green eyes) يقول...

:) :) :)

طبعا هتقولي مين اللي طالعه تضحك دي
اصلي بضحك علشان انا كمان دلوقتي حاسه بزهق مووووووووت وقولت ادخل اقرا لناس جديده علشان اموت الاحساس دا لاقيتك انتي كمان زهقانه

واللي خانقني اكتر البنت اياها دي

يالا شكلي كدا مش هعرف اطلع الاحساس دا من عندي

:)

لورنس العرب يقول...

بالعكس
انا شايف ان نادرا ما فيه عيب في الانسان ما بيتصلح
عشان كده بنقول لنفسنا خد اللي ادامك على عيبه
احيانا فيه ناس بتحاول تتصلح لكن الاصلاح يمكن أن يكون في عيوب عامه وليست عيوب في الشخصيه نفسها كالبخل أو حب التسلط أو الانانيه
دي حاجات صعب انها تتصلح


راجعلك تاني

princess يقول...

اول زيارة:)
حكاية ان الواحد يبص لغيره دى كتير اوى للاسف كمان متهيالى كتيرة فى البنات
يعنى مثلا صاحبتك لو فكرت شوية لازم تقوم تصلى ركعتين شكر لربنا لان هيا عاقلة جدا لدرجة تبان اكبر من سنها واخطائها مش كتير
لكن ازاى الانسان دايما مش بيعجبه حاله
اما عن التصنع (الموقف بتاع صاحبة صاحبتك)فمقولكيش انا بكره حياتى لو قعدت مع ناس كده بفضل ساكتة لانى لو اتكلمت ممكن اتعصب ياما بقوم خالص
تحياتى:)

طوبة ذهب وطوبة فضة يقول...

القناعه حقا كنز لا يفنى وهى اكبر نعم الله علينا وان شعرنا تللك القناعه تسرب الى نفوسنا الرضا عن كل شىء واولها الرضا بالقضاء والقدر وان ما نحن فيه هو احسن وضع لنا لان الله هو الذى اختاره لنا وما ربك بظلام للعبيد فتلك القناعه تسرب الى نفسك الثقه والطمانينه ولا تشعرى باى نقصان فتلك نعمه وليس كل البشر يتمتعوا بتلك النعمه تلك هى الحقيقه عزيزتى فمن تمتع بالقناعه هناء براحه البال تحياتى ودومتى سعيده

حنين.. يقول...

موضوع جاى على الجرح
وعندى قصه....... بس لو قولتها, هغتاب صاحبتها فبلاش
استنى
هنا
تعالى
انتى وحشانى اوى
وكمان بشكرك اوى اوى اوى
انك سالتى عليا
ربنا يخليكى يا قمر
والله انا كنت تعبانه اوى بس الحمد لله
بقيت تمام التمام
وبصى يا (ضد)
حلوه ضد دى
صح
ههههههههههههه
الرضا سر السعاده
كمان
بلومك معلش,
انك رديتى عليها كدا
لانك كنتى ممكن تعرفيها ان طريقتها دى غلط بس بطريقه تانيه
لكن والله الواحد ساعات بيتصرف فى مواقف غلط,
وخللك بالك انك ممكن كنتى تكونى سبب فى تغيرها ,
بس المهم
ااننا نتعلم
دمتى سالمه قمورتى
حنين

أختكم فى الله يقول...

والله الحوارر ده بيدور بينى وبين ناس صحابى باردو من وقت للتانى

بس الاسباب بتختلف
انتى عارفة

اصلا فيه حالة زهق عام

المهم انتى لسة مخنوقة ولا خلاص ؟؟؟؟


تقبلى مرورى يا حبيبتى

EMMY BABY يقول...

والله بجد موضوع رائع

للاسف ناس كتير اوى مبترضاش بحالها ونصيبها واللى ربنا قسموهلها يعنى مثلا اللى مبتخلفشى طبعا نفسها تخلف واللى مخلفة تقول يقطع العيال وسنينها

واللى جايبة ولاد تقول ياريت خلفتى بنات بدل وجع القلب ده البنات نسمة

واللى جايبة بنات تقول يامخلفة البنات يا شايلة الهم للممات

هههههههههههههههههه ومحدش عجبه حاله

بالنسبة لاول حوار انا شايفة انها مفروض تكون سعيدة يعنى انا بفضل ربنا الناس بتدينى اكبر من سنى فى عقلى واقل من نى فى روحى وبرضه بتعلم من خبرات اللى حواليا ده بيوفر عليا كتير جدا

هى مشكلة صحبتك انها عملت لينك غلط مابين انها تبقى عاقلة ومابين انها تبقى مكلكعة لو قدرتى تفكى اللينك ده هتبقى راضية

اما بالنسبة للبنت التانية فعامة النوعية اللى بتظهر نفسها وتحاول يكون ليها راى مضاد لمجرد انها تظهر دى فعلا بتكون عندها قلة ثقة بالنفس لانها متخيلة ان الناس هتحترمها بالحاجات اللى بتعملها

هى محتاجهة تزيد ثقتها بنفسها وتحس بحب الناس ليها وتعرفان حب الناس تقدر تكتسبه وهى على طبيعتها

تحياتى

ايمى

د/ رامي شهاب الدين يقول...

عارفة .. صحبتك المخنوقة اللى كبرت فجأة وكذلك التانية دى مشكلتهم واحدة ، وإن إختلف المنظور

انهم مش عايشين على سجيتهم، مش عايشين حياتهم

نصيحة لصحبتك إنها تحاول تدور على وسيلة توصلها لحالة ممكن نسميها السلام مع النفس

أما التانية دى بقى ، فبصراحة بيصعب عليا حالهم ، طول الوقت مش على طبيعتهم ، وبيبقوا عاملين زى الاراجوزات ، حاولى تنصحيها إنها تكون نفسها ولا تتصنع
free ur mind and be ur self

دمتى بكل الود .. تحياتى

خواطر ليست عابرة يقول...

صديقتي ضد التيار
أشكرك علي تعليقاتك الجميلة علي مدونتي
وفيه حاجة نفسي أعرفها منك خاصة بعالم التدوين اللي أنا جديد فيه
ممكن؟؟؟؟؟؟؟؟؟؟ظ

ضد التيار يقول...

(green eyes)

-------------

اوبس ))):

يعنى انا السبب دلوقتى فى زياده الزهق عندك )):

ان شاء الله هاتعرفى ياقمر (:

ضد التيار يقول...

لورنس العرب
--------------

يعنى فى ناس بتحاول تصلح ؟؟؟

صعب تتصلح معك فى دى لكن فى محاوله يبقى كدا فى معرفه بالعيوب من

الاساس

يبقى برضه هارجع اقول انه مش طبيعة البشر

ولا ايه؟؟؟

ضد التيار يقول...

princess

-------------
نورتى باول زياره (:

ماهو دا اللى بقوله لو كل واحد عجبه حاله هانلاقى حاجات كتير اتغيرت

ضد التيار يقول...

طوبة ذهب وطوبة فضة

------------

معكى حق فى كل كلمه

ياريت فعلا الواحد يرضى بحياته زى ماهى و يقول الحمدلله

ضد التيار يقول...

حنين

------------

جبت اهو

ايوة ماانا عارفه عشان كدا كنتى بتسألى ياوحشه

زعلانه انا منك )):

يابنتى دا واجب عليا السؤال بلاش بشكرك و الكلام دا بضايق انا ):

الف الف سلامه عليكى و حمدلله على سلمتك ياقمر (:

هههههههههههههههههههههههههههه على فكره انتى و كيارا

هاتكرهونى فى اسمى هههههههههههههه الله يكون فى عونكم دا انا بحس بتقل لما بقوله اساسا

فى بعض الاوقات الواحد مابيقدرش انه يسيطر على نفسه

و للأسف انه بيكتشف دا بعد مايكون الموقف راح مفعوله ):

حمدلله على السلامه مره تانيه و بلاش تأخير بقى

ضد التيار يقول...

أختكم فى الله

------------------

لا الحمدلله لما كتبت البوست ارتحت لانى فعلا كنت محتاجه اتكلم

اشكرك على السؤال ياقمر (:

و يارب حاله الزهق العام تروح بقى )):

ضد التيار يقول...

emmy baby

---------------
هههههههههههههههههههههه

واللى جايبة بنات تقول يامخلفة البنات يا شايلة الهم للممات

انا بسمع الكلمه دى كتيييييييير من امى

بس الحمد لله عندنا ولاد و بنات (:

طبعا معكى حق فى كلامك

و ان شاء الله اعمل بالنصيحه و احاول افك اللينك دا (:

ضد التيار يقول...

د/ رامي شهاب الدين

--------------

هو دا اللى قولته لصحبتى انها فعلا تحاول تحب نفسها

اما التانيه فاانا حاولت بطريقه غلط للأسف لان الموقف كان مستفز

و اكيد ان قبلتها تانى هحاول طبعا اتكلم معها براحه

لانى اتعلمت من غلطى فى اسلوبى المره دى

اشكرك على النصيحه (:

ضد التيار يقول...

خواطر ليست عابرة

--------------

ياريت اكون قدرت اوصلك اللى انت عايز تعرفه بسهوله

و اى سؤال انا موجوده و ان شاء الله اقدر اسعدك

The Queen يقول...

كلامك عقلاني وجميل جدا

بس للاسف في كتير من الناس دي في حياتنا دلوقتي
وانا بشوف ده في صحباتي كانوا ايام المدرسة والجامعه حاجه وبد ما اشتغلوا كلهم تقريبا اتأثروا بالجو المحيط بيهم وكله بقى بيقلد اي حد هو معجب بيه في شغله ولغى شخصيته وهويته
ربنا يصلح حال الجميع
وارق تحية لشخصك الكريم

حـــــ الــجــنــة ـــــور يقول...

السلام عليكم
إزيك يا ضد بجد موضوعاتك دايما هايله يا قمر
تعرفي إن التصنع بقى حاجه عاديه بين الناس وده راجع لعدم الثقه في النفس
وأنا بقول إن العيب مش في الدنيا لأنها فانيه العيب فينا إحنا لمسكين في الدنيا وبعدين المؤمن مصاب يعني لما يكون الحزن مصاحبنا ده خير لأن ربنا بيجرب فينا ويقوي في إيمانا من مصائب الحياه
ربنا يديم علينا الفرح والسعاده
والرضى
في أمان الله وحفظه

mahasen saber يقول...

شوفى هو الاحساس باننا كبرنا ده طبيعى وبيمر بيه ناس كتير بالاخص الناس الحساسه والطموحه لانهم بيحسوا ان العمر مر بيهم من غير ما يوصلوا لليى عايزينه
........والعمر مش بيتقاس بالكبر ولاا بالصغر المهم اتعمل فيه ايه وقضيناه فى ايه
.....انا حبيت اعلق على الجزئيه دى بس

ضد التيار يقول...

the queen

----------
ربنا يصلح حال الجميع

اللهم امين

منورة بأول زياره لضد التيار

(:

ضد التيار يقول...

حـــــ الــجــنــة ـــــور

-----------
عليكم السلام و رحمه الله وبركاته

فعلا العيب فينا احنا مش فى الدنيا

لو احنا قولنا الحمدلله على حالنا كل حاجه هاتتغير فى حياتنا

ربنا يديم علينا الفرح والسعاده
والرضى

اللهم امين

ضد التيار يقول...

mahasen saber
------------

معكى انه امر طبيعى الاحساس اننا كبرنا

لكن مش معنى كدا اننا نبص للغير و نقول اشمعنا

شكرا لتعليقك و وجهه نظرك (: