Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

السبت، 15 نوفمبر، 2008

مش بالدموع يامحسن



محسن وعمرو اتنين كانوا أصحاب .. لكن فجأة و بدون سابق إنذار اتفرقوا, ليه و عشان

ايه الله أعلم ..فى يوم و ليلة حصل الفراق و مافيش حد عارف السبب .. المهم

فجأة الأصحاب كلهم لقوا محسن عمال يبكى على الأطلال و يقول ان عمرو غدار

و عمرو أصلا ماحدش سامع له حس ..و لما ينزل القهوة و يجى حد يقوله ايه اللى حصل

 يقوله قدر الله و ماشاء فعل و بس

الكل أخد عن عمرو فكرة هباب من كتر كلام محسن عليه

لحد ماجيه واحد من الأحباب .. اسمه حسين راح لمحسن

وقاله حرام الراجل عمره ماغلط فيك و انت اللى بتكشف نفسك و تقول على المستور بلاش حد يوقعك فى الكلام ...

 سكت محسن شويه و بعدها فتح فى النواح و قال ده صديق عمرى انا عمرى ماتوقعت منه كده خان العشرة و ..و..و...

طبعا حسين ماعجبهوش الكلام

و قاله يابن الحلال الراجل خرجك من حياته خلاص و انت مصمم تتدخل بالعافية و بتروح لنفس القهوة و تتكلم مع أصحابه لتظهر عيوبه ...

واحد ظالم زيه ليه شاغل بيه تفكيرك  ماتسيبه و بكره ربك هايجيبلك حقك لو كنت فعلا مظلوم .. بلاش تلاحقه فى كل مكان

وسابه و قام

راح لعمرو  و قاله لازم يوضع حد لكل الكلام .. و انه عارف و متأكد انه لو اتكلم هايقلب الكل على محسن و يظهر حقيقته فى خداعه

رد عمرو  و قاله ..مالناش دعوة ياحسين و اللى يصدقه يروح يقعد معاه و فى حياتى انا مش محتاجة ..

و كمان انا حياتى فيها حاجات أهم شاغلة تفكيرى و أنا أكبر من كل الكلام

حسين ماعجبهوش الكلام .. وقاله انت كده طالع ظالم و سيرتك فى الحته و فى كل بيت

عمرو : ياحسين ياصاحبى اللى يفكر شويه هايلاقى الحقيقة بتبان ..لو انا فعلا ظالم ليه شاغل تفكيره و ليه دايما قاعد على بابى و ليه مصمم ينزل يقعد فى القهوة وسط اصحابى ؟؟؟

حسين : الناس ليها الظاهر و انت لازم تظهر الكلام .. و تكشفه للمخدوعين فيه

عمرو : ياحسين ياصاحبى أكون فى عين الناس ظالم و انتظر نصر الله بدل ماأكون منافق

حسين : و ايه اللى هايخليك منافق ؟؟؟ انت واحد بتدافع عن نفسك

عمرو : ماهو لو دافعت عن نفسى يبقى هاظهر كل اسراره ... و من صفات المنافق اللى الرسول ذكرها..

 إذا حدث كذب، وإذا وعد أخلف، وإذا ائتمن خان، وإذا عاهد غدر، وإذا خاصم فجر   ...

انا بقى هاعمل كل ده و هابقى زيه ..يبقى انهى الاحسن ؟؟؟

^^^^^^^^

و استمر محسن فى سرد اكاذيبه و استمر عمرو  فى السكوت و عدم اشغال نفسه بالمهاترات بتاعت محسن ..لحد ماظهرت الحقيقة فعلا

^^^^^^^^

الحكاية مش من وحى الخيال لأ ... هو واقع كلنا بنشوفه و أوقات كتير البعض بيقع فيه..

فعلا لو شوفنا ان كل من يبكى على الاطلال و يقول انه مسكين و مظلوم و مخدوع.. رغم انه مش سايب اللى ظالمه ده و عمال ماشى وراه زى المعزة و عيالها ... فى الآخر بيطلع هو الظالم

و الانسان اللى بيبقى ساكت و مريح دماغه من المهاترات بتاعته وتربيته ماتسمحلوش من الأساس انه يشنع عليه حتى لو هو بدأ فى ده  بيتقال عليه اوقات ضعيف او ضميره مات او فعلا ظالم .. فى الآخر بيطلع هو المظلوم

^^^^^^^^^

يبقى الدرس المستفاد من الحكاية ايه ؟؟؟

ماناخدش بالظواهر لان

مش كل من بكى على الأطلال مظلوم .. ولا كل من رفض الدفاع ضعيف أو ظالم

و لا انتوا ايه رأيكم ؟؟؟

و دمتم سالمين

هناك 106 تعليقات:

شبــ اون لاين ـــاب يقول...

صحيح عندك حق يا ضد التيار


فكرتك وصلت

و لازم كلنا منبقاش زى محسن المنافق ده



فكره جميله و معلومه مفيده فى قصه رائعه



-----------------------
كان معك من امام الكيبورد
واحد مخه لاسع شويه
شبــ اون لاين ــاب
الاسكندريه
-----------------------

ضد التيار يقول...

الحمدلله ان الفكره وصلت (:

و أكيد ماحدش يحب يبقى محسن

و لازم مانخدش بالظاهر برضه عشان مانظلمش امثال عمرو

نورت ضد التيار

princess يقول...

الفكرة وصلت
بجد اوحش حاجة الواحد يكون مفتكر اللى قدامه حد كويس ويطلع كده
وبعدين الصداقة دى من اسمى العلاقات اللى فى الدنيا
وممكن بسببها حد يدخل الجنة
تحياتى على البوست

¶¶ღِِAhMeD 3LaMღ¶¶ يقول...

سعات الواحد لو سكت بيكون غلط لان السكوت تأكيد
وسعات الواحد لو مسكتش بيكون الكلام والدفاع تاكيد بردو
حاجه تحير
يعني نسكت ولا لاء ندافع ولا نهاجم ولو دافعنا بيكون هجوم ولا دفاع وبس من غير هجوم
حاجه تحير بردو

عن نفسي لا انتظر وادافع واهاجم وعلي البادي تدور الدوائر والناس ليها الي ظاهر والبادي اظلم وهوه الي جابو لنفسه ودبور وزن علي خراب عشه
مش بستحمل حد يتكلم في سيرتي مهما كان هوه مين ولازم اخد حقي وابين مدي صحة موقفي

ضد التيار يقول...

princess
----------

الحمد لله ان الفكرة وصلتك
اكيد كلام سليم والصداقة من اسمى العلاقات
واكيد الواحد لو اتخدع فى انسان عزيز عليه بيتوجع

نورتى ضد التيار

ضد التيار يقول...

¶¶?ِِAhMeD 3LaM?¶¶
----------------

الفكرة من البوست اننا ماناخدش بالظاهر
يعنى مانصدقش دموع الظالم ونصدق كلام المظلوم

و على فكره كلامك سليم جدا

نورت ضد التيار

مؤمنه يقول...

السلام عليكم ورحمة الله وبركاته

مش بالدموع يا محسن

فعلا معاكى انا فى كلامك

المفروض ما نخدش بالظواهر والاحسن اننا نحتفظ باحكامنا على الناس لنفسنا الى ان تتضح كل الظواهر

فان لم يكن له عذر اعرفه فعسى ان يكون هناك عذر لا اعرفه

دومتى باطيب حال

والسلام عليكم ورحمة الله وبركاته

Purplewaves يقول...

في مثل بيقول خدوهم بالصوت ليغلبوكم وهو ده تقريبا اللي محسن عمله، حاول يخبي على اللي عمله بالكلام عنه في كل مكان ومع اصحابه ولكن عمرو كان اذكى منه بكتير وقدر انه يلتزم الصمت لحد ما ربنا رجعله حقة، وصلت الرسالة ياافندم :))


تحياتي

حاجات عيال يقول...

انا مش محسن انا مش محسن
انا بس بوضح ان الفكرة وصلت
وتمام

سلام سلام

saragebaly يقول...

الفكرة وصلت
لو بقينا زي عمرو هنحافظ على الصداقة حتى بعد انتهائها

فكرتك جميلة وطريقة السرد رائعة

دمتِ بكل الحب

سارة

طـــائر الليــــل الحـــــزين يقول...

ضـــد التيـــــار
الله عليكى زى عادتك دايما مواضيعك فى الجون . وخصوصا البوست ده . قد ايه فى معانى كتير بينسوها كتير بقوا زى محسن اول ما يحصل حاجة ما بنهم تلقيه عمال يجرح ويظلم فى عمرو وطبعا الوحش بيوصل عن طريق اللى زى حسين بسرعة الصاروخ .
واللى زى عمرو فعلا مبقوش كتير
جميله قوى الصفات اللى قالها الرسول (ص) إذا حدث كذب، وإذا وعد أخلف، وإذا ائتمن خان، وإذا عاهد غدر، وإذا خاصم فجر ... انا بقى هاعمل كل ده و هابقى زيه ..
بصراحة الفكرة الجميلة اللى فى البوست اكيد وصلت للكل
وانا مع عمرو الصاحب او الصديق اللى يعمل معاية كده
ميلزمنيش بعد كده عمره وبيعجبنى المثل اللى بيقول
عتاب الندل اجتنابه
وهو مع الوقت كل اللى حواليه هيعرفوا الفرق بينه وبينى
اقصد بين محسن وبين عمرو
تحيـــــاااااتى
على البوست الجامد ده
وتسلم ايديكى يا قمر

سميرة يقول...

المظهر اوقات كتير بيكون خادع
بس بالتجارب والخبرات اليومية في حياتنا اكيد هانقدر نميز بين الصدق والنفاق
دمتى بكل الود

blue-wave يقول...

صح طبعا
وياريت كمله يتعلم من القصه دى

Butterfly يقول...

فعلا عندك حق والله
انا من الناس اللى مش بحب أتكلم كتير وبكتم فى نفسى كتير ولما بتكلم مش عشان أشتكى بس عشان أخد نصيحه صح وأتأكد انى مغلتش ولناس معينين الحمد لله بس ه مؤخرا بعد ما أتصدمت فى ناس كتير .

elsha3er يقول...

انا بصراحة معاكى فى كل كلمة بس اللى عجبنى اكتر اسلوب عرضك للموضوع بجد احييكى


احمد الشاعر

esraa يقول...

ماهو المفروض انك طالما ماسمعتش الحكايه من الاتنين ولا سمعت وجهتي النظر يبقي ماينفعش نحكم علي حد

لكن هتقولي لمين؟

mahasen saber يقول...

الله يا ضد
وكم من محسن وعمروفى حياتنا بس محسن اكتر واليى زى عمرو شبه انقرضوا

الازهرى يقول...

العزيزة ضد التيار

تذكريننى بقول الحق سبحانه وتعالى
" ياأيها الذين امنوا ان جاءكم فاسق بنبأ فتبينوا ان تصيبوا قوما بجهالة فتصبحوا على ما فعلتم نادمين "

فليس كا من يشكوا مظلوم

تحياتى على الموضوع الجميل

لكن ايه حكاية فراق الاصحاب الذى يتكرر فى مواضيعك منذ فترة
ارجوا ان يكون الامر خير

مولان يقول...

معاكي حق مش بالدموع يامحسن

لازم كلنا نفكر شويه قبل اما نحكم مش بالظاهر ابدا

الرومـيصاء يقول...

جزاكى الله خير
كلامك فعلا صحيح
بس كنتى اخترتى اسم غير محسن
لانه اسم مش ماشى مع القصه

يعنى المفروض
انه الانسان بيكتسب صفات اسمه
دمتى بكل الود

smilyrose يقول...

فعلا يا توأمت روحى

اذا كنا كلنا بنقول ان اللى مش

بيدافع عن نفسه ضعيف او جبان

او حتى ظالم فدا شئ مش كويس

وياريت كلنا نتعلم ان الصبر

واللجوء الى الله هو افضل شئ

مش البكاء وتشويه صورة اناس لم

يضرونا بشئ

المهم وصلت الرسالة

وياريت كلنا نطبقها فى حياتنا

دمتى حبيبتى

smilyrose

روح الحب الصادق

من غير عنـــوان يقول...

قصة مفيده رائعة
فيه مثل بيقول
ضربني وبكى وسبقني واشتكى

شمس النهار يقول...

ازاي ممكن ادافع عن نفسي حتي لو انا اكبرمحامي في الدنيا
ماينفعش
يبقا ماكناش اصحاب اصلا
اصحاب يعني عارفين بعض كويس

وميض ابتسامة يقول...

عزيزتى

زمان قالوا فى الامثال ...

ضربنى وبكى وسبقنى واشتكى ..

وقالوا.. ياظالم لك يوم ..دى حقيقة

ودعوة المظلوم مفيش بينها وبين ربنا حجاب .... ودى عن تجربة

ربنا يكفينا شر كل ظالم .. آمين

Lola يقول...

اكيد كلامك صح يا ضد التيار ..انا مؤمنه بيه جدا كمان...بس مع الإيمان دا شفت حكايات ليها العجب كان الوقوف فيها ضد التيار انتحاااار حقيقى.

عارفه..انا مش عارفه ليه كل الحاجات فى الحياه بقيت مليانه غش كده.

هى فعلا القضيه عمرها ما كانت بالدموع..ياريت نتعامل من قلوبنا بحب وصدق وامانه.

لولا

ضد التيار يقول...

مؤمنه
--------------

وعليكم السلام ورحمة الله وبركاته

فان لم يكن له عذر اعرفه فعسى ان يكون هناك عذر لا اعرفه

تمام اوى المقولة دى

نورتى ضد التيار فى زيارتك الاولى

واتمنى انها ماتكونش الاخيرة

ضد التيار يقول...

Purplewaves
-------------

تمام ماهو لكل ظالم نهاية

وربنا مابيضيعش حق المظلوم ابدا

نورتى ضد التيار

ضد التيار يقول...

حاجات عيال
---------

طيب الحمد لله انها وصلت

نورتى ضد التيار

ضد التيار يقول...

طائر الليل الحزين
-----------

وطبعا الوحش بيوصل عن طريق اللى زى حسين بسرعة الصاروخ .
^^^^^^^^^^^^^^^^^^^^^^^^^^^
بس حسين حاول يفهمه الموضوع وحاول يقنعه انه يوضح وجهة نظره

ويدافع عن نفسه لكن عمرو اكتفى بالسكوت وانتظار ظهور الحق

واكيد كلنا لازم نمشى على نهج الرسول صلى الله عليه وسلم

اوضاع كتير هتتغير وتبقى احسن كمان

وانا متفقة معاكى فى كلامك كله

نورتى ضد التيار يا قمر

ضد التيار يقول...

سميرة
----------

تمام انا معاكى بس كتر التجارب والخبرات اكيد بتتعب

نورتى ضد التيار

ضد التيار يقول...

blue-wave
-------------

يا ريت الكل فعلا يتعلم

نورت ضد التيار

ضد التيار يقول...

Butterfly
-----------

مش عيب ان احنا ناخد بآراء الناس اللى حوالينا

علشان ناخد نصيحة لكن العيب اننا نشوه صورة الناس زى ماعمل محسن

نورتى ضد التيار

ضد التيار يقول...

احمد الشاعر
-----------

اشكرك على ذوقك

والحمد لله ان البوست نال اعجابك

نورت ضد التيار

ضد التيار يقول...

esraa
---------

تمام عندك حق فى كلامك

لازم نسمع من الناحيتين علشان نقدر نقيم الموقف كله

نورتى ضد التيار

ضد التيار يقول...

mahasen saber
--------------

لا هما مش شبه انقرضوا هما موجودين

لكن علشان امثال محسن كتروا مابقيناش شايفين اللى زى عمرو

نورتى ضد التيار يا قمر

ضد التيار يقول...

الازهرى
-------------

معك حق فى كلامك

و بخصوص السؤال

لانها نماذج شايفاها قدامى علشان كده اتكلمت عنها

نورت ضد التيار

ضد التيار يقول...

مولان
----------

تمام كده الله ينور عليكى

نورتى ضد التيار

ضد التيار يقول...

الرومصياء
------------
جميل ان الاسم لفت نظرك

لكن غالباً الخداع بيكون من اشخاص لا تتوقعى منهم الاساءة

ارجوا ان تكون الفكره وصلت

نورتى ضد التيار

ضد التيار يقول...

smilyrose
-----------
صديقتى الغاليه

الحمد لله ان الرساله وصلت

نورتى ضد التيار

ضد التيار يقول...

من غير عنوان
----------
الحمدلله ان القصه نالت اعجابك

و المثل فعلا ينطبق على امثال محسن

نورت ضد التيار

ضد التيار يقول...

شمس النهار
---------
الله عليكى بجد

و فعلا لو اصحاب صح يبقى كل واحد عارف التانى

و لو اصحاب صح برضه ماينفعش نتكلم على بعض لو حصل زعل او فراق بينا

نورتى ضد التيار

ضد التيار يقول...

وميض ابتسامة
--------------
طبعا معك حق فى كلامك


ربنا يكفينا شر كل ظالم .. آمين


اللهم امين

نورت ضد التيار

ضد التيار يقول...

lola
--------
ياريت طبعا نتعامل كده

اما بقى موضوع الحياه مليانه غش و خداع ليه

لان الأنا هى المسيطره على البشر

نورتى ضد التيار

عمرو يقول...

ده اللى زى محسن ده كتير أوى أوى بالذات بين زملاء العمل يا ساااااااتر
عارفه لما بأتعرض لحاجه زى كده و لا بأهتم و بأرمى ورا ضهرى
أسلوبك حلو أوى فى السرد

dalia يقول...

المشكلة ان الناس مش بتسيب الواحد في حاله في ناس تخصص غلاسة فضوليين أكثر من اللازم يقعدوا زن زن عمال على بطال يسألوا ايه اللي حصل وليه ما انتوا كنتوا كويسين وفي ناس تخصص استفزاز لما يلاقوا انك مصممه على عدم الحكي يقوموا يتكلموا في وجودك عنك بالاشارات لغاية ما تزهقى وده على فكره بحصل في موضوعات كتير خاصة لو كانت مشروع جواز ربنا يكفيينا شر الناس وكلام الناس

kemet يقول...

السلام عليكم ورحمة الله وبركاته

والله مش ديما السكوت من دهب ولا ديما الكلام من الفضة

بس المهم نعرف امتي نتكلم وامتي يبقي احسن نسكت

تحياتي
الي اللقاء

رابطة مدوني الدلتا يقول...

نعم هناك اوقات يكون الصمت فيه ابلغ واقوي تعبير ولكن ايضا هناك من يتحدث بحكمة ليغير الكثير والكثير

___________________________

اذا كنت مدون من احدي محافظات الدلتا يسعد رابطة مدوني الدلتا دعوة حضراتكم لحضور اجتماعها المقبل الموافق 22 نوفمبر لمزيد من التفاصيل ومعرفة الموضوعات المطروحة للمناقشة وضوابط الاجتماع نتمني زيارتكم لمدونة الرابطة

http://eldeltabloggers.blogspot.com/2008/11/blog-post.html

لورنس العرب يقول...

مممممممممممممممممممممم

مش بحب آجي متأخر !!

نهر الحب يقول...

صحيح فى بكاء للتماسيح
مش بكاء مظاليم لكن بكاء ظالمين
تحياتى لك

خواطر ليست عابرة يقول...

أحييكي بداية علي اختيار الموضوع
ثانيا عاوز أقول ان فيه خطأ كلنا بنقع فيه لما بنرتكب حماقات في حق آخرين ولما ييجي حد يلومنا نرد ونقول (قدر الله وما شاء فعل)

يعني لازم نجد مبرر لأخطاءنا حتي وان كانت في حق آخرين

تحياتي

عقل مهوي يقول...

ساعات بيبقي عمر هو محسن ومحسن هو عمر
لو محسن اتعرض لظلم كبير من عمر فعلا
ولو الناس بتبقي متعاطفه مع عمر
بيبقي محسن عاوز يوصل للناس مدي الظلم الواقع عليه
فبيشكي لطوب الارض

مش دايما المظاهر خداعه

انا ودماغي يقول...

و الله أنتى رائعة و البوست حلو جدا
فكرنى بموقف حصل معايا كدة بتضايق كل ما بفتكره بس البوست ده هدانى على فكرة ......السكوت فى الحالات دى أحسن كتييييييير أوى للطرفين





















وحشتينى مووووووت

romansy يقول...

انا كده زعلت من نفسى
بجد
بقى اجى متاخر
ومعرفش انك عامله بوست جديد

اسف بقى يا ضد
ياريت تعذرينى

بس ابقى طمنينى عليكى

habiba يقول...

ازيك

ده حقيقى

تعرفى لو كل واحد ساب ربنا ياخدله حقه وراعى ربنا اوى
اكيد كان ربنا نصره
انا مع عمرو جدا
وبعدين القرآن بيقول
"هل ننبئكم بالاخسرين اعمالاز اللذين ضل سعيهم فى الحياة الدنيا وهم يحسبون انهم يحسنون صنعا"...الكهف

شمس النهار يقول...

يعني ايه مش فاهمه
في حاجه يابنات طمنوني عليكم
وايه اللي حصل لمدونة كيار

اقصوصه يقول...

فعلا موضوع مدونتك مهم

في ناس وايد ماشيع مبدأ خذوهم بالصوت

اذكر حديث عن النبي خذناه بالمدرسه

ما اتذكر نصه بالضبط بس مضمونه

ان لو اثنين تخاصمو وراحوا للنبي

عشان يحكم بينهم..

وكان واحد منهم افصح وابلغ من الثاني

والرسول حكم له مع انه هو الظالم

ومع ان الحق عليه وهو مش مظلوم

فالله يعرف منو الحقيقه اكيد

ولو انحكم للظالم عن طريق الخطا

بانه الحق معاه

فهو جدام ربه بعده ظالم اكيد

صباح الصباح يقول...

صباح الانوار

عجبنى جدا جدا الالوان الجميلة اللى مكتوب بيها البوست

بس ليا طلب صغنن اد كدهو ممكن

قلتى ممكن

حلو اى

ممكن تغيرى صورة البروفايل عشان باهتة اوى وملا محها مش باينة تقريبا خالص.. ممكن يا ستى تحطى منظر طبيعى او بيبى او كدة يعنى

اصل الصورة دى مش عارف بتجيب لى اكتئاب اوى ..

ارجو ما كونش ضايقتك

Soul.o0o.Whisper يقول...

السلام عليكم و رحمة الله

الله ينور عليكى
صححححح لسانج على رأى الخليجيين
هههههههههه

بجد هو دا اللى بيحصل
و شفت نماذج من دى كتير فى حياتى

بتقولى اللى تربيته ماسمحتلوش
تسمحيلى أعدلها لتصبح دينه مايسمحلوش

أيوا مشكلتنا إننا بنتربى على صح و غلط
مش على حلال و حرام
و ديننا أمر بكدا و لا لا

فى حين لو بصينا على كافة أمور حياتنا هنلاقى بصمة الدين تشير و بقوة إليه




شكرا ليكى على البوست الرائع


خالص تحياتى

mero-moory يقول...

السلام عليكم و رحمة الله و بركاته

المغزى اللي عايزة توصليه بجد مفيد وفادني جدا وعندك حق فيه

اتبسطت كتير اووووووي بالقصه الجميلة دي وفعلا دي موش خياليه لانها حصلت معايا دي من حياتنا ويمكن حصلت لمعظمنا

بجد بشكرك على المعنى اللي ادتهولي جزاكي الله خيرا

في رعاية الله

حـــــ الــجــنــة ـــــور يقول...

السلام عليك غاليتي
يقال ضربني وبكى سبقني وإشتكى ده العادي في الوقت الحالي الظالم يبكي على الأطلال والمظلوم يتفهم غلط الله المستعان دي بقت ظاهرة الموسم
سلمت يمناك على بوستك القيم والمفيد
تقبلي مروري وخالص إحترامي

شخـا بيــط مـحـجـوب يقول...

اولا مبروك على تغير الصوربس احنا اتعودنا على صورة الملثم على طول كنا نعرف مدونتك منها بس دى بردو جميلة جدا

ثانيا فعلااوحش حاجةان الواحد ينخدع فى الناس ممكن فيها يفقد الثقة حتى فى نفسة

تحياتى ليكى

شخابيط mahgoub

المحارب المتيم يقول...

ضد التيار

أنتى عارفة ساعات يكون السكوت من ذهب

بس أحيانا يكون الكلام والشدة من ماس

انا معاكى بلا أختلاف

بس دى أضافة فقط

مش كل حاجة ممكن نسكت عليها

تحيتى

سأتابع من بعيد

طوبة ذهب وطوبة فضة يقول...

هى دى فعلا مشكله الشعب المصرى الكلام الكتير اللى مالهوش اى داعى تسلم ايدك وبجد وحشتينى

EMMY BABY يقول...

ضد التيار

والله تحفة تحفة تحفة زى مانتى ققلتى واقعية جدااااااا

لا دى من قلب الواقع انا فعلا بتحط فى المواقف دى كتير

بس اسلوبك كمان فى عرضك للمشكلة عجبنى اوى

وبالله عليكى ياضد متكونيش زعلانة منى على التاخير والله غصب عنى

انا اسفة فعلا

تحياتى يا اجمل ضد

ايمى

انا حرة يقول...

عجبتنى فكرتك اوى..بس الموضوع بيفرق حسب الاشخاص اللى فيه
فكونك هتقتنعى بالكلام و تمثيل دور الضحية من عدمه هيتوقف على درجة معرفتك بالشخص نفسه..هل دى طريقته دايما..هل هو متبع مثل خدوهم بالصوت لا يغلبوكم عشان يخبى غلطاته فى حق غيره
لان زى ما ناس قبلى قالوا فى حاجات ما ينفعش يتسكت عليها و فى شخصيات عاطفية اوى بطبعها و الكلام اقصى ما ممكن يعملوا كنوع من انواع الفضفضة مش اكتر

لكن اكيد مش كل من قال انا مظلوم يبقى عمره ما ظلم..الحكاية محتاجة شوية بصيرة مش اكتر

مخنوق كيك يقول...

عين العكل .. لا حكيكي يعني

المفروض مناخدش بالظاهر .. عندك مثلا البطيخة من بره حلوة وخضرا .. بس من جوه ساعات بتطلع قرعه حتي بعد ما نطبل عليها .. تخيلي !!

مثال تاني . انا مثلا مخنوق كيك . بس في الحقيقة مخنوق جدا جدا جدا . ومش طايق نفسي . مفرقتش كتير تصدقي ؟

بس في الاخر اقولك . لا تبكي علي اللبن المسكوب وياما في السجن مظاليم .

وفي الاخر اهدي الموضوع ده لماما ناديه وماما سعاد واقولهم كل سنه وانتوا طيبين بمناسبة يوم العبور

باي وسي يو سون

Soul.o0o.Whisper يقول...

ضد التيار

صديقتى العزيزة
فعلا وجهة نظرك ممكن تكون صح بالنسبة للسعادة
بس كدا بنكون أتكلمنا عن سعادة جزئية
أو وقتية

لكن أعتقد إن السؤال كان عن حياتك بوضع عام



بالنسبة بئا للسؤال التانى
يرجى قراءة أول رد ليا

و أنا معاكى لو كان السؤال عن الدفاع
إنما دا عن الاستعداد

و طبعا أنا ماقولتش إن المصريين مش بيحبوا بلدهم

بالعكس
ألذ حاجة فى المصريين فعلا
إن مهما بيحصل فيهم بردوا بيعشقوا بلدهم



و بعدين ماتزعليش يا حبيبة قلبى
إن شاء الله هأكمل سرد بقيت النقط
بس واحدة واحدة عشان ماتزهقوش




خالص تحياتى

مـجـنـووون يقول...

والله إلي أعرفه علشان الواحد يكون عادل في حل المشكله أو سماع المشكله

أنه لازم يسمع من الطرفين بتوع المشكله ، ويوجهم ببعض ، وطبعا كل وأحد عايز يقول علي نفسه أنه كويس وأن التاني إلي غلطان


******************

المفروض من حق الصداقة والأخوة لما واحد يسيب التاني ويتفرقوا أنه مينشرش أسراره إلي ااتمنه عليها لأنه بكده يكون خاين

***********

والرسول عليه الصلاة والسلام قال ( أحبب حبيك هون ما عسي أن يكون بغيضك يوما ما ... وأبغض بغيضك هوناً ما عسي أن يكون حبيبيك يوما ما )

يعني الي يحب يحب براحه وميقولش كل أسراره ونقاط ضعفه للي بيحبه لأن الزمن بيتغير وممكن إلي بتحبه النهارده وميه ميه معاه يكون عدوك في يوم من الأيام ونفس الحكاية لو حصل العكس


تقبلي مروري
مجنوووون

elsha3er يقول...

عايز اشوف جديدك قريب

تحياتى


احمد الشاعر

محمد عبد الباسط يقول...

احسنتم
نفس الموقف حصل لاتنين اعرفهم ولما قالوا للساكت انت ساكت ليه اتكلم رد عليه قال لهم
انا مش هارد ومش هاشغل نفسي بالكلام اللى يتقال عليا انا ( عندى هدف كبييييير مشغول بتحقيقه مش فاضى للكلام )

ياريت فعلا كلنا نتوقف عن القيل والقال وكثرة السؤال ونركز فى اهدافنا

لكم منا جزيل الشكر والتحية

حلم كبير

Rania يقول...

قصد جامدة فعلا و فيها دروس كتير قوى مستفاده
تسلمى يا جميله

تحياتى

~*§¦§ Appy §¦§*~ يقول...

طيب ومين بقى هيعمل بيها
صدقنى محدش بيعمل كله يقول اه فعلا انما محدش شايف تصرفاته
المهم انا لسه عارفه موضوع كيارا دلوقتى هغير اللينك

mahasen saber يقول...

ايه يا قمر
اخبارك ايه وحشانا مفيش اى كلام جديد ليه

ذو النون المصري يقول...

كلام سليم
و القصه ياما بتتكرر
و لازم نترك الظاهر في التعامل مع الناس

سمكه وحده يقول...

فعلا يا ضد مش لازم ناخد بالظاهر
معلومه مفيده وجميله
جزاكي الله كل خير
وحشتيني ياقمر
سمكه

ضد التيار يقول...

عمرو
----------

وانت هتقولى على زملاء العمل؟
اللى زى محسن دول مليون

نورت ضد التيار

ضد التيار يقول...

dalia
---------

والله انتى عندك حق فى كلامك
وعلى رأيك خصوصا لو كان الموضوع جواز
تدخل الناس بيسبب مشاكل كتير
واوقات كمان بيسبب انفصال الطرفين عن بعض

نورتى ضد التيار

ضد التيار يقول...

kemet
----------

وعليكم السلام ورحمة الله وبركاته

تمام الله ينور عليكى
كلام سليم

نورتى ضد التيار

ضد التيار يقول...

رابطة مدونى الدلتا
-----------

تمام كلامك مظبوط

نورت ضد التيار

ضد التيار يقول...

لورنس العرب
--------

ممممممممممممممممم
معلش فى البوست الجديد تبقى تيجى بدرى

نورت ضد التيار

ضد التيار يقول...

نهر الحب
-----------

معاكى حق فى كلامك
بس المهم اننا ماناخدش بالمظاهر
لان مش كل من بكى مظلوم ولا كل ساكت ظالم
نورتى ضد التيار

ضد التيار يقول...

خواطر ليست عابرة
-------------

انا مافهمتش بصراحة تعليقك
لكن بالمجمل كده عايزة اقول حاجة
مفيش حاجة اسمها نجد مبرر لأخطائنا
المفروض نعترف بأخطائنا ونحاول نصلحها مش نبررها
اتمنى اكون قدرت افهم التعليق صح

نورت ضد التيار

ضد التيار يقول...

عقل مهوى
--------------
انا معاك ان مش دايما المظاهر خداعة
لكن اسمحلى اقولك حاجة
مش معنى ان انا اكون شخص اتظلمت والناس متعاطفة مع المظلوم
اشكى لتوب الارض واسوأ سمعة اللى ظالمنى
لان انا شايفة كده ان يوم ما الحقيقة تبان هكون انا الظالمة

نورت ضد التيار

ضد التيار يقول...

انا ودماغى
-----------

الحمد لله ان البوست عجبك
وارمى ورا ضهرك ماتفكريش فى حاجة تضايقك


وانتى كمان وحشتينى موووت

نورتى ضد التيار

ضد التيار يقول...

رومانسى التفاؤل
------------

انا الحمد لله كويسة المهم انت تكون كويس
ولا يهمك على التاخير

نورت ضد التيار

ضد التيار يقول...

habiba
-----------

الحمد لله يا قمر ازيك انتى
اكيد طبعا معاكى حق فى كلامك

نورتى ضد التيار

ضد التيار يقول...

اقصوصه
---------

فى ناس فعلا ماشية بمبدأ خدوهم بالصوت
والمظلوم اكيد ربنا هيجيبله حقه
بس انا مش عارفة الحديث اللى انتى قلتيه ده
يا ريت لو تعرفى تجيبى النص بالظبط

نورتى ضد التيار

ضد التيار يقول...

صبح الصباح
---------------

مساء الانوار...حسب التوقيت دلوقتى D:

الحمد لله ان الالوان عجبتك
وادينا غيرنا الصورة
ويارب مايجيلك اكتئاب تانى (:

نورت ضد التيار

ضد التيار يقول...

Soul.o0o.Whisper
--------------

وعليكم السلام ورحمة الله وبركاته

فعلا عندك حق فى كلامك
لو عرفنا ديننا كويس اكيد هتكون التربية صالحة

نورتى ضد التيار

ضد التيار يقول...

mero-moory
------------

وعليكم السلام ورحمة الله وبركاته

الحمد لله ان المغزى من القصة وصل
واكيد دى موجودة فى حياتنا يوميا مع اختلاف الاسامى

نورتى ضد التيار

ضد التيار يقول...

حـــــ الــجــنــة ـــــور
-------------

وعليكم السلام ورحمة الله وبركاته

تمام عندك حق
دى فعلا بقت ظاهرة

نورتى ضد التيار

ضد التيار يقول...

شخـا بيــط مـحـجـوب
------------

الله يبارك فيك
انا غيرتها تانى ويارب الجديدة تكون كويسة

اكيد احساس وحش جدا وهو انك تنخدع فى شخص وخصوصا لو كان قريب منك
بس على قد ما نقدر ماتوصلش الامور لفقدان الثقة بالنفس

نورت ضد التيار

ضد التيار يقول...

المحارب المتيم
----------

شكرا على الاضافة

و ياريت تاخد وقتك وترجع عن قرارك قريب

نورت ضد التيار

ضد التيار يقول...

طوبة دهب وطوبة فضة
-------------

طبعا معاكى حق بس مش الشعب المصرى بس

نورتى ضد التيار

ضد التيار يقول...

EMMY BABY
-----------

الحمد لله ان الاسلوب عجبك
واكيد انا مقدرة ظروفك علشان امتحاناتك

ربنا معاكى ياقمر (:

نورتى ضد التيار

ضد التيار يقول...

انا حرة
-----------

انا معاكى فى كل كلامك
لكن لو الشخصية اللى قدامك تتقن التمثيل
صعب انك تفرقى او يكون عندك بصيرة
اما لو كان بيفضفض مش اكتر فده كمان انسان لايؤتمن على شئ
بالتالى ماعتقدش ان ممكن حد يصدقه

نورتى ضد التيار

ضد التيار يقول...

مخنوق كيك
-------------

شكرا على امثلتك وعلى مرورك
بس الحقيقة انا تهت منك
بس ماعلينا
واهدى الموضوع زى ما انت عايز

نورت ضد التيار

ضد التيار يقول...

Soul.o0o.Whisper
----------------

وصلتلى وجهة نظرك
وعموما يا قمر مستنيه بقية النقاط

نورتى ضد التيار

ضد التيار يقول...

مجنووون
-------------

اكيد عندك حق فى كلامك
مفيش اختلاف

نورت ضد التيار

ضد التيار يقول...

احمد الشاعر
-----------

الجديد نزل (:

ضد التيار يقول...

محمد عبد الباسط
-------------

ياريت فعلا كلنا نعمل كده

نورت ضد التيار

ضد التيار يقول...

Rania
-------------

يسلملى مرورك انتى يا قمر

نورتى ضد التيار

ضد التيار يقول...

~*§¦§ Appy §¦§*~
--------------

ما انا عارفة بس احنا بنحاول نلفت النظر ليس إلا
ولعل وعسى يحصل اى تغيير

نورتى ضد التيار

ضد التيار يقول...

mahasen saber
--------------

انا الحمد لله كويسة
وانتى كمان واحشانى
والف مبروك ليكى كنتى منورة البرنامج

والجديد نزل (:

ضد التيار يقول...

ذو النون المصرى
------------

تمام عندك حق فى كلامك

نورت ضد التيار

ضد التيار يقول...

سمكه وحده
------------

انتى كمان وحشتينى يا قمر فينك؟
ياريت يكون غيابك خير