مش لاقيه عنوان لأنه مجرد كلام و بس

فتحت الاجندة بتاعتى اشوف الواجب اللى كان مطلوب منى اعمله من بدرى

وهو الآتى :

* مبقاش عبيطة و اعيش حياتى و أفكر فى نفسى و بس

* الصراحة كلمه تتمحى من قاموسى "عشان مبقاش عبيطة برضه"

* عدم مراعاة شعور الاخرين

* الكدب الطريقه الوحيدة للوصول الى أحلامى

* أتلون كما الحرباء عشان اكسب قلوب الاخرين

بس للأسف معملتش الواجب دا

أعذرونى يا أساتذة الحياة  ..فاأنا تلميذه فاشلة

ـــــــــــــــــــــــــــــ

لما تلاقى شخص عزيز عليك بيتعذب و انت اللى صنعت عذابه بأيدك

و تلاقى نفسك فرحان و ضميرك مرتاح "مات"

لما تتلذذ بآلام الاخرين و تتفنن فى زيادة هذه الآلام

فأهلا بك في عالم السيكوباتيين

ــــــــــــــــــــــــــ

لما ألاقى الكدب متغلف بالصدق ..وقتها بفتكر كلمه عادل امام "صادق ياكداب"

طيب لما ألاقى الصدق متغلف بالكدب ... ياترى يتقال عليه ايه ؟؟؟

_______________

لما ألاقى شخص دايما تصرفاته بتناقض بعضها ..واحتار اقول هو كويس ولا وحش

مش عارفه ليه بفتكر وقتها محمد سعد بمقولته الشهيرة "ياواد يابت"

ـــــــــــــــــــــــــــــ

لما ألاقى كل المبادئ اللى فى الحياة اتقلبت للنقيض بتاعها ...

و لازم عشان اعيش فى ارض الواقع اعمله

اعذرونى مضطرة اخد اول ميكروباص طالع على ارض الاحلام

ـــــــــــــــــــــــــــ

 لما ألاقى المنافقين اصبحوا هم العقلاء فى هذا الزمن ..

و لابد ان اصبح من العقلاء

اعذرونى لا احب العقلاء ... و افتخر بكونى مجنونه من المجانين

ـــــــــــــــــــــــــــــــــــ

لما يتقال عليه هبله عشان ماخنتش قلبى ولا ضميرى ..

أقر و اعترف امام الجميع انى عاشقه هذا الهبل

ــــــــــــــــــــــــــــ

لما الانسان اللى بيحافظ على مشاعر الاخرين يتقال عليه قاتل

و الانسان اللى بيفكر فى نفسه و بس يتقال عليه قتيل

فانا اعتز بكونى سفاحه من الدرجه الاول

________________

و دمتم سالمين

هو دا ينفع ؟؟؟

اول امبارح و انا بتجول فى المدونات كان فى بوست بيتكلم عن الاسلام و الديانات الاخرى الموضوع كان قيم جداااا

 لكن و انا بشوف التعليقات لفت نظرى تعليق مدون كان غريب جداااا بيتكلم فى الدين و اصوله لحد كدا كويس

جيه فى الاخر راح متكلم بسخرية عن الديانات الاخرى

طيب هو دا ينفع ؟؟؟؟

نفس المدون لاحظت انه متعصب و بينتقد المدونين بشكل هجومى جداااا و باسم الدين برضه ..

طيب هو انا لما انتقد النقد دا و اغلط كدا فى كاتب الموضوع بصلح من فكره ؟؟؟ لا بقلب الدنيا لحرب ؟؟؟

امبارح اتفجأت بمدونه المفروض انها بتدعى للدين الاسلامى اشوف المواضيع ألاقيها كلها سخريه من الديانات الاخرى...

طيب مش هى برضه الديانات الاخرى دى ربنا هو اللى منزلها ؟؟؟ ينفع نسخر من كتاب ربنا نزله ؟؟؟

بغض النظر بقى عن صحة الكتاب ولا لأ ..بس مايصحش اننا نسخر ولا ايه ؟؟؟؟

ماهو برضه اصحاب الديانات الاخرى ياجماعه عندها ايدين و نت

يعنى صاحب التعليق ممكن يدخل واحد يروح مدافع عن دينه و بنفس الطريقه بتاعته و وقتها هايغلط فى الدين الاسلامى صح ولا غلط ؟؟؟

و ممكن برضه حد من الديانات الاخرى اللى صاحب المدونه بيسخر منها يروح هو كمان عامل مدونه و يسئ للدين الاسلامى رد على المدونه دى صح ولا لأ ؟؟

ربنا سبحانه وتعالى نهى عن كدا فى كتابه الكريم

"وَلَا تَسُبُّوا الَّذِينَ يَدْعُونَ مِنْ دُونِ اللَّهِ فَيَسُبُّوا اللَّهَ عَدْوًا بِغَيْرِ عِلْمٍ"

ياجماعه الدين مش تعصب و خناق و سخريه .. بلاش احنا اللى نفتح بأيدينا باب الهجوم على الدين الاسلامى

****************

النقطه التانيه اللى بجد انتشرت بطريقه مهووووله اللى هى السخط على البلد بكل اللى فيها ..

انا عايشه فى البلد و مش حابه احوالها لكن دا مش سبب انى افضل ليل نهار هاتك يا غلط فيها ...

بعض المدونين بنتقدوا البلد بشكل مهين قوى انا عارفه انك صعبان عليك حال البلد

و نفسك تصلحها بس هل الاصلاح هايجى باظهار العيوب بدون حلول ؟؟؟؟

اصل مدام انا بنتقد شئ يبقى شخصيه واعية و فاهمه يبقى المفروض برضه اقدم حلول

ولا هو الوعى دلوقتى  بقى انتقاد و ياريت انتقاد بشكل كويس لا بشكل متعصب قووووى و بس

اهو انا بفرغ شحنه الغضب اللى عندى و مش مهم التأثير بتاعها رايح فين

طيب مانكون واقعين شويه لما انا اكتب نقد بالشكل دا عن بلدى و اظهرها بالصورة دى

و يجى واحد من اى بلد تانيه يروح خابط قصيده هجاء فى مصر ..

وقتها انت هاتعمل اييييييييييييه ؟؟؟؟ اكيد هاتتعصب و هاتروح غلطان فيه و فى اهله لان ازاى يغلط فى بلدى .. طيب ازاى ؟؟؟

ماهو مش غلطان اذا كان انت يابن البلد دى نازل غلط فيها يبقى بتلومه ليه ..

ولا ماشى بالمثل ادعى على ابنى و اكره  اللى يقول امين ؟؟؟

فى بعض المدونات كانت معترضة بشده عن حال مصر و بشوف التعليقات لقيت تعليق كان صحبه صعب عليه الحال

و متهيألى كان نفسه يطلع اللى فيه النصيب و المشكله انى لما دخلت البروفايل لقيته  مش مصرى

طيب بالله عليكوا ينفع كدا ؟؟؟؟

ياجماعه احنا مش قاعدين فى قاعدة منغلقة و عاملين بنتكلم ...

احنا فى ناس بتشوفنا من جميع انحاء العالم ..

ماينفعش نعترض و ننقد بالشكل الهدام دا

هايجى حد يقولى يعنى اسكت ماتكلمش و ابقى سلبى ماهو دا اللى جايبنا لورا ...

هاقوله لا انا ماقولتش كدا و كمان هى الايجابية انك تنتقد بدون حلول ؟؟؟

الايجابية انك تنزل هاتك ياشتيمه فى البلد و الناس و بس  ؟؟؟

طيب هاتستفاد ايه لما تعمل كدا ؟؟؟ هل كدا انت غيرت ؟؟؟

ياريت فعلا اللى بينزل بوستات كدا فى البلد يقولى فين الايجابية اللى هو عاملها دلوقتى ؟؟

هاتلاقى مافيش اى حاجه حصلت ..إلا انى عرضت بلدى و اهلى للسخريه و خلاص

انتقد بس بأسلوب صح ..اتكلم و قول حلول عشان تثبت انك واحد واعى و مثقف و ايجابى مش حد بيتكلم و خلاص

و لا انتوا ايه رأيكم ؟؟؟

و دمتم سالمين

عدم الرضى و تقليد الاخر وجهان لعمله واحده

النهارده كان يوم الزهق العالمى عندى .. قولت اخد نفسى و انزل اتمشى شويه جايز افك لبست و نزلت

و اذا بالموبايل بيرن رديت لقيت صحبتى بتقولى ماتيجى نتقابل عشان انا مخنوقة و عايزة اتكلم معاكى قولت ماشى اكلم البيت و اقولهم و اشوف ....

 المهم كلمتهم و قالوا ماشى .. كلمت صحبتى و  اتفقنا نتقابل فى المكان بتاعنا ..

المهم نزلت قابلتها و بعد السلام و السؤال عن الاخبار دار الحوار التالى :

انا : مالك بقى ياقمر ايه مضايقك ؟

هى : مش عارفه حسيت انى كبرت قووووى

انا : ابص لروحى فجأة لاقتنى لاقتنى كبرت فجأة كبرت ..مالك بس ياعم عبد الباسط

هى : لا بجد و الله حاسة انى كبرت قووى و انى مش عايشه سنى

انا : ايوة ازاى يعنى ؟؟؟

هى : يعنى فى حاجات كتير قوى المفروض كنت اعملها و ماعملتهاش ... من و انا صغيره و انا فرضه على نفسى قيود مش عارفه اخرج منها ..

كل اصحابى كانوا عايشيين حياتهم إلا انا ...حتى لما كبرت ماعرفتش اخرج من قيودى و فضلت فيها ..

كل اللى يتكلم معيا بيحس انى اكبر من سنى بكتير ..انا حاسة انى مكلكعه و تعيسة ..

كان نفسى اخرج و اضحك و اعمل زى كل البنات اللى بشوفها ..نفسى اجرب و اغلط و اتعلم زى الكل ...مش اتعلم من تجارب الناس

انا : طيب و ليه مابصتيش انتى كدا رحمتى نفسك من تجارب ممكن تخليكى حزينة طول عمرك

ليه ماقولتيش ان دى رحمه من عند ربنا انه يخليكى تعيشى التجربة مع غيرك و تتعلمى من الدرس اللى هو خده

بدل ماتقعى انتى فيها و الله اعلم هاتخرجى منها امتى

هى : و ليه ماكنش زى البنات ماانتى شايفه (فلانة) عايشه حياتها بالطول و العرض و نفس سنى

لكن اللى يشوفها و يشوفنى يقول انى اكبر منها بسنييييين

انا : الله يكون فى عون اللى هايخدك ياشيخه

هى : ليه بقى

انا : يعنى لو فضل يفسح فيكى شهور و جت عليه ايام حصله ضغط شغل و ماخرجيش اسبوع مثلا ..

هايشوف ايام سودا و هاتفضلى بقى تقولى شوف جوز فلانة بيعمل ايه و جوز فلانة بيسوى ايه

هى : لا طبعا انتى بتهرجى يعنى هو عشان اسبوع انسى كل اللى عمله ..

اكيد هارضى و استحمل لحد ماالضغط يخلص و هو اكيد هايعوضنى

انا  : ماظنش لان لو انتى هاتكونى كدا و هاترضى كنتى رضيتى عن نفسك الاول و شوفتى الحلو اللى فيها

و قولتى الحمد لله على حياتك ماكنتيش بصيتى لغيرك اللى من سنك

و كنتى بصيتى للحلو فى حياتك مش الوحش

المهم بعد ماخلاص اتفكت من الضيقه اللى فيها قولنا نكلم اصحابنا و نتجمع بقى مدام نزلنا ..

و قد كان حضر الاصحاب بس معهم دخيله واحده زميله صديقه لينا قولنا عادى اهلا و سهلا ..

و بعد الكلام و الحكايات جيه الدور على زميله صديقتنا و قالت هاقولكم موقف ضيقنى قوووى ...المهم فضلت تحكى

و كانت بتحاول تقلد صديقتنا دى بس بأسلوبها هى و طبعا مش عايزة اقولكم على الاسلوب يخننننننننننق بمعنى الكلمه

لكن انا قولت جايز يكون دا اسلوبها عادى فوتى و اسكتى المهم فضلت تحكى و المفروض ان الكل يضحك على الموقف

لكن الصراحة كلنا من اسلوبها كأننا شربين شوب لمون بالملح وبعد ماحكت الموقف وخلاص قولت الحمد لله ...

وجيت سألت سؤال برئ و ياريت ماكنت سألت

بقولهم شوفتوا صحيح الاغانى اللى طالعه زكي يا زكي و علي يا علي مافيش مره ضد يا ضد (قولنا لزوم الاسم بطلوا تدقوا)

لقيت الاخت اللى فوق دى فجأة

..... : ايه دا ؟؟؟ انتى بتسمعى الاغانى دى ...لالالالالالا

( طبعا بأسلوب و لا كأنى كنت بأكل صراصير قدامها ..معلش عشان بس اوصلوكم القرف اللى كانت بتكلمنى بيه )

قولت يابت اهدى .... ايوة حضرتك بسمع الاغانى دى مالها

.... : لالالالالا دا تلوث سمعى على فكره لالالالالا بجد ماكنتش اعرف انك بتسمعى الحاجات دى (بنفس الطريقه برضه اللى فوق)

الله مطولك ياروح ...ايوة هى تلوث سمعى وبصرى و هوائى كمان اصلى بحب الاذيه لنفسى معلش بقى قدرى كدا ..

وكمان ماكنتيش تعرفى ايه ؟؟؟ انا لسه عارفاكى اساسا

و طبعا صحبتى راحت مغلوشه و غيرت الموضوع عشان القاعدة ماتقلبش لأنها عارفه اننا بنكره حاجه اسمها تصنع و زميلتها دى كان باين قوى تصنعها

المهم فضلنا نتكلم و نضحك لحد ماجت بنوته صغيره بتبيع ورد البنت دى احنا عارفنها و دايما بنحب نهرج معها

و طبعا لأننا بقلنا كتير ماتجمعناش فضلنا نسألها عن اخبارها و نضحك معها و كدا ..

المهم مشيت لقينا الاخت اللى فوق برضه راحت قايله

..... : ايه دا انتو ازاى تتكلموا كدا عادى وتهرجوا مع الناس دى

الكل تنح وسكت و طبعا لانى كنت ماسكه زرار لسانى من بدرى لكن ماقدرتش بقى لأنها زودتها

قولتلها بصى انا عايزة اقولك حاجه المحترم مابيقلوش على نفسه محترم

و ابن الناس الاصيل مابيقولش على نفسه انا ابن ناس و اصيل و الهاى كلاس مابيقولش على نفسه انا هاى كلاس ..

فياريت بقى تبطلى تقليد و تصنع لأنها حاجه تخنق

 و رحت سيبهم و ماشيه … انا عارفه انى كنت قليله ذوق معها لكن بجد ماقدرتش امسك نفسى

ماهو انا هاستحمل ماشى انها تتكلم معايا كدا لكن مش هاستحمل السخرية من ناس مالهاش ذنب فى حياتها اللى طلعت لقت نفسها فيها

و انا ماشيه و راكبه الميكروباص فكرت فى صحبتى اللى انا ذكرتها الاول

لقتيها مش راضيه عن حياتها و معترضة و بتبص لغيرها عشان كدا هى تعيسة

و فكرت برضه فى زميله صحبتى رغم انى متغاظه منها لكن فى نفس الوقت حزينة عليها

لانى لقيتها برضه بتحاول تكون حد غيرها … ممكن يكون عدم ثقة فى النفس لكن برضه هايبقى راجع انها مش قادرة تحب نفسها

و لا تقبل حياتها و اكيد برضه هى مش سعيدة عشان كدا بتحاول تسعد نفسها بالطريقة الغلط و هى التقليد و التصنع

و سألت نفسى ليه الواحد مايرضاش بحياته و يحبها زى ماهى

و يحاول يصلح من عيوبه من غير مايبص لحد و لا يقلده ؟؟؟

و فى الاخر نرجع نقول هو ليه الفرح مش رضى عنا و الحزن هو اللى معانا

مش لما نرضى احنا عن حياتنا الاول و بعدين نطلب من الفرح يرضى عنا

و لا انتوا ايه رأيكم ؟؟؟

و دمتم سالمين

تاج سبعاوى وصل يارداله

اول تاج لمدونه ضد التيار من صديقتى الجميله صاحبه مدونه doneaal7ob

أذكـــــــــر ستة أسرار قد لا يكتشفها من يقابلك لأول مره!!!

انا بسبب السؤال دا بالأخص سألت اصحابى كلهم عن الاسرار دى ..يعنى الاجابه للأمانة مغشوشة

1- مجنونه جداااااااااا بمعنى الكلمه : و دا طبعا مابيكونش ظاهر

لانى فى اول مقابله ببقى هاديه جدااا لحد بس ماخد على الجو و بعدين جنانى بيشتغل

2- صبورة جدااااااااا : ممكن اصبر على الحاجه حتى لو سنين عادى جدا ...

اصحابى بسبب الصفه دى نفسهم يولعوا فيا انا نفسى اوقات بتخنق من نفسى بسببها

3- لغز يصعب حله : ودا طلع عليا بسبب الحيرة فى تحليل شخصيتى و على فكره صفه الصبر دى سبب برضه ان الكل بيشوفنى لغز ..

اولا انا اللى يعرفنى فى الاول بيحس انه عارفنى من سنين و دا بيدى انطباع للى قدامى انه عرفنى كشخصيه

لكن بعد كدا بيحس انه تايه ..دايما اصحابى يقولولى اللى يفتكر انه فهمك يبقى مافهمش حاجه

دايما ردود افعالى و تفكيرى و مناقشاتى و كل حاجه فيا بتبقى غير متوقعه بالمرة

دا رأيهم مع انى شايفه انى عاديه خالص

4- دماغى ناشفة جداااا : لا تقولى زى الحجر لان الحجر ممكن يتكسر و لا تقول زى العيش المحمص لأنه برضه ممكن يتكسر

اما دماغى صعب كسرها ..اوقات  بتبقى ناشفة عليا انا كمان و ببقى عايزة اخبطها فى الحيطة لكن بخاف على الحيطة لتتكسر

5- خدومة: بحب أخدم القريب و حتى البعيد يعنى لو فيه فى ايدى حاجة ممكن أعملها مش هتردد لحظة

حتى لو كانت معرفتى بالشخصية دى معرفة سطحية بس مابهداش إلا لما أكون فكرت فى حل أو أى حاجة تخدم الانسان ده

الصفه اللى جايه دى مش مغشوشة لان من النادر ان حد يعرفها

6- بعشق لغة العيون : الصفه دى بالأخص من الصعب حد يكتفشها حتى لو بعد سنين مافيش بس غير اصحابى المقربين ليا اللى عارفينها

لانى اوقات بتعامل معهم بيها لكن غير كدا ماحدش يعرفها نهائى و مابحبش الصراحة اعرفها لحد..

و بجد الصفه دى سببت مشاكل كتييير مع  بعض الاشخاص و صدمتنى فى ناس كتييييير

من صغرى و انا مقتنعة ان كل حاجه فى الانسان ممكن تكدب ماعدا العيون و القلوب و بما ان القلوب ملك صاحبها

بالتالى من الصعب تعرف جواها ايه لكن العيون ملك اللى قدامك و من السهل تعرف بتقول ايه لكن طبعا لازم تكون بتفهم فى لغتها

سبع حاجات نفسك تعملهم!!!!

1- الحج

2- إن ربنا يتمملى بخير فى موضوعى

3-أعمل حاجة يكون بابا و ماما فخورين بيها و حبيبى طبعااااااا

4-أرجع أتلم مع أصحابى من تانى لأن مشاغل الحياة فرقتنا كتير

5-فى شخصية بجد نفسى اقابلها فى الحقيقة و ان شاء الله قريب يحصل

6-عايزة أبنى بيتى زى ما أنا بحلم بيه

7-أربى ولادى تربية صالحة ان شاء الله

سبع حاجات معرفتش تعملهم!!!!

هما هما نفس السبع حاجات اللى نفسى اعملهم و لسه ماعملتش منهم حاجة خالص

سبع حاجات دايما بتقولهم !!!؟

1-و الله!!!!!!! (ودى دليل على تركيزى للى قدامى)

2-شوف ازاااااى!!!!! (لما اسمع حاجة من حد وماكونش مستوعباها او مش مصدقاها اصلا)

3-سلمون بالزيت (دى بقولها لما حد بيقولى سلام او سلاموز)

4-طب ايه؟ (دى بقى لما اكون مش فاهمة حاجة او حد قال كلمة وسكت والمفروض انى افهم)

5-لا حول و لا قوة إلا بالله (على طريقة انور السادات / دى لما اشوف حاجة او اسمع حاجة  ماتدخلش العقل)

6-كركر و اللمبى (دى لما حد يقول نكتة بايخة او اى حاجه المفروض انى اضحك عليها وأنا ماليش نفس)

7-تيب (دى لما حد يكلمنى فى موضوع و عارفه مثلا ان الكلام مالوش لازمه بختصر و اقول كدا )

سبع مشكلات فى حياتك ممكن تحلهم بالفلوس!!!

 ماعنديش مشكله فى حياتى حلها الفلوس .. لما يكون فيه ابقى اقولكم

 سبع أماكن بتحبها!!!!!

1-شرم الشيخ

2- مرسى مطروح

3-اسكندرية

4-العريش

لان العامل المشترك بينهم هو بحرهم و هواهم و انا بحبهم جدا

5-البلد

6-بيتنا

7-الحسين

 سبع أشخاص بحبهم غير بابا وماما واخواتى!!!

1-حبيبى طبعا ربنا يرجعهولى بالسلامة

2-انسانة غالية جدا عليا و رغم بعدها عنى لكن دايما بدعى ربنا انها تكون سعيدة فى المكان اللى هى فيه

3-اصحابى اللى بجد بحبهم اوى

4-انسانة كان ليها مكانة عالية عندى بس للأسف ماحفظتش على المكانة دى لكن بردو انا حبيتها و بالتالى مش قادرة اكرهها و بدعى ان ربنا يهديها لنفسها

بس كده .. غير شباب و بنات و اطفال العيلة اللى طبعا بموت فيهم

 سبع حاجات بتحبهم قوى!!!!

1-البحر

2-الكتب

3-الهدوء

4-المناقشات الثقافية

5-افلام الخيال العلمى

6-الترحال

7-استكشاف كل ما هو جديد

 سبع مدونات بتحب تقرالهم!!!!

طبعا مش هقول الفيفوريت اللى عندى لأنها كلها فى الريدر بتاع جوجل و محدش هيقدر يشوفه غيرى

بس عموما المدونات اللى دايما بتابعها هى دى اللى بحبها و هما اكتر من سبعة

 اهدى التاج لمين بقى؟

رومانسى التفاؤل

 نونااااااااااا

ولد مصرى

Manamino

 

 و دمتم سالمين

العذاب الممتع

لالالالالا مش معقول اللى انا سمعاه دا ..اكيد انا بحلم ايوة انا بحلم

لا ماحدش يقول ان الصوت دا حقيقى طيب اعمل ايه اجيب مخدات البيت كله

مع انها برضه مش هاتمنع الصوت دا

استووووووووووووب

استنوا قبل ماتقوله مال ضد  اتجننت ولا ايه

الحوار اللى فوق دا مع نفسى فى تانى يوم و طبعا زى ماقولت فى البوست اللى فات

ان السيد بابا راسه و ألف خنجر ان مافيش نوم إلا بعد السحور و طبعا ماينفعش انام و فاضل على الفجر دقايق

يعنى نمت بعد الفجر الساعة 5 الكلام اللى فوق دا حصل الساعة 8 واخدين بالكوووووووووووا 8

يعنى تلت ساعات يابشر انام تلت ساعات بس لييييييييييييه

ثرى تو وان

بت يافتحيه انتى يابت

ماتردى يافتحيه و ارحمنى عايزة اناااااااااام يعنى هو اجى فى الايام العادية يتقلق رحتى

بحجه الفطار بدرى و الغدا بدرى و كل شئ بدرى اجى فى رمضان و اقول هارتاح الصبح ألاقى نفس النظام

ليه ياربى كدا بس هو انا عملت ايه فى دنيتى دا الفطار الساعة 5 المغرب ايه بيصحيهم دلوقتى بس

بت يافتحيه انتى ياااااااااااااااااابت

حد يقولى فين فتحيه هانم دى اروح ابوس ايديها عشان ترد

عايزة انااااااااااااااام يابشر

كنتى فين يامقصوفة الرقبة صوتى اتنبح عليكى

صوتك اتنبح !! دا انا اللى دماغى ورمت و عايزة انام حرام عليكوا

هوووووووووووس هدوووووء

 

ياااااااااااااااه مااجمل الهدوء  هنام اخييييييييرا

تشكتشكتشكتشكتشك

استوووووووووووووووب

لالالالا دى مش عطسه ولا  الكيبورد خرفت

دا صوت البشر اللى ماشين فى الشارع صايمين بقى

ومش قادرين يرفعوا رجليهم من على الارض فبيكحتوا الله يكون فى عووووووووووووونهم

ثرى تو وان

لالالالالالا دا كتير والله دا كتير لا بجد دا كتيييييييييييييييييير

طيب و ربنا ماانا نايمه  عشان ترتاحوا اتبطو بقى

قمت لقيت بابا فى وشى و بكل حب و ود

مالك ياضد ياحبيبتى ايه اللى مصحيكى بدرى كدا

استووووووووووووووووب

طبعا هو ماقلش ضد بس لزوم الاسم ...

غير بقى ان بابا كان بيسأل و وشه محمر من كتر كتم الضحك عليا لأنه عارف كويس انا ايه صحانى

لان السيناريو دا بيتكرر كل مره اروح فيها البلد

ثرى تو وان

لا مافيش ياابى العزيز انا قولت كفاية بس تلت ساعات نوم

دا حتى بيقوله النوم الكتير مضر على الصحة ..

انا هاروح اغسل وشششششششششى (معلش اصلى سنانى وجعانى و كنت بجز عليها)

انا كان مالى بس ياربى و مال العذاب دا ماانا قولت اجى فى العيد

اهو الواحد ينام بدرى ويصحى على القلق مش مشكله ماكنش استنى سحور و لا حاجه يلا النصيب

استووووووووووووووب

طبعا الكلام اللى فوق دا كان بينى و بين نفسى لان لو بابا كان سمع كنت اخدت محضره صله الرحم اللى اخدته قبل مااجى ..

بس دا ظلم صله الرحم يعنى نزور الاهل مش الاهل تقلق الراحة

ثرى تو وااااااااااان

بقولك ايه ياابى العزيز اللذيذ ممكن اروح اسلم على عمى ابو فتحيه اصلو وحشنى قووووى قووووى

طبعا ياحبيبتى روحى ربنا يهديكى دا عمك برضه و كمان تشوفى مراته لو محتاجة حاجه تساعديها

لبست و خرجت و انا كلى شوق عشان اشوف فتحيه حبيبتى اصلها روحى روحى روحى

(اكيد طبعا فهمتوا انا رايحه ليه..ايوة كدا خليكوا معيا على السلك)

ازيك ياعمى اخبارك ايه ..امال فين فتحيه

فتحيه ….. فتحييييييييييييييه تعالى بنت عمك بتسأل عليكى

فتحيه حبيبتى روح قلبى انتى لبسه الطرحه ليه انتى فى بيتكم ياماما ماينفعش تكونى لبسها كدا

(طبعا فتحيه عرفت ايه هيحصل لأنها متعودة برضه كل مره يحصل كدا)

انتى بتجرى فكرانى مش هايجيبك دا انتى لو طلعتى المرييييييييييييخ

و ربنا ماهسيبك حرام عليكى كل ماجى لازم اقلق بسببك

ماتتلمى فى بيتكم على الصبح

و بعد الجرى و الضرب اللى حصل بينى وبينها روحت و فضلنا انا اخواتى نوضب فى البيت بتاع البلد

لان طبعا مش هاينفع نعيد عليه كدا … ماهو الواحد ليه بيت واحد بيتوضب على العيد لكن انا ربنا رزقنى باتنين اللهم لا اعتراض

و بعد المغرب جت بنت عمى ( اللى هى انتيمتى دون عن بنات عمى كلهم )

اخدتنى عشان نروح نتجمع كالعادة شباب و بنات العيله فى المضيفه بتاعتنا

اصل التجمع دا مابيحصلش الا فى المناسبات و طبعا ان الاسره بتاعتى تيجى مناسبة من المناسبات .. روحنا المضيفه

 

اييييييييييييييييييييييه دا احنا دخلنا شارع عبد العزيز ولا المضيفه بتاعت العيله ؟؟ مالهم كترو كدا ليه

ياساتر عليكى انتى هتنقى على العيله و لا ايه ؟ يابنتى هما هما بس رمضان السنه دى الكل جيه فيه

يعنى مافيش حد مسافر عشان كدا انتى حاسة انهم كترو

ياشيخه !!! طيب كويس و الله ..

سمع هووووووووووووووس مش عايزة اسمع صوت و لا نفس و اللى يتكلم يرفع ايده

بدل ماوريكوا النجوم فى عز الليل انا بقول اهو انا وصلت يعنى النظام

اهلا اهلا بالهانم اللى ماكنتش عايزة تيجى غير فى العيد

(ابن عمى المسحوب من لسانه دايما بيقوم عليا الدنيا ماهو برضه روحى روحى روحى زى فتحيه كدا)

بصيت فى وش كل اللى قاعدين لقيت الغدر باين فى العيون

اوبااااااااااااا احنا فينا من كدا طيب انا بقول امشى من اولها احسن عشان الواحد نفسه يعيد مع الأ ....

هى الكلمه كانت الاهل لكن مالحقتش اكملها من كتر الاحضان اللى اخدتها من بنات العيله (ايوة الاحضان ربنا امر بالستر ياجماعه )

و بعد ماالتقويمه اللى قومها عليه اخدت مفعولها التمام و الكل اخد حقه منى

(طبعا من البنات .. دا انا نفسى كان ولد واحد يقف بس حتى لو هايروح يجيب ميه

عشان اطلع عليه اللى اتعمل فيه ..بس للأسف ماحدش نولنى مرادى)

قاعدنا بقى كل واحد يحكى الجديد السنه دى فى رمضان و طبعا المعروف ان الشعب المصرى دايما بيطلع  نكت

و يتريق على الاحوال اللى عنده حتى لو كانت محزنه فبالتالى قاعدنا نتريق على احوالنا و اللى بنشوفها كل يوم و نسمعه  

و اللى بيكتب برضه خواطر قالنا الجديد بتاعه

(ام لواحظ ... عندنا ناس موهوبة بمعنى الكلمه و عليهم خواطر فظيييييييييييييعه ماشاء الله )

فضلنا نقول فوازير ونلعب و طبعااااااااا القاعدة ماتنفعش من غير مقالب

دى بقى ليها بوست لوحده هابقى ان شاء الله اقولكم عليها

 بس عارفين و انا قاعدة نسيت تعب اليوم كله مااحلى اللمه

و الجميل فى الموضوع كمان انى قدرت ازوغ من بابا و نمت بدرى و كنسلت السحور

انجاااااااااااااااااز

سلام بقى و اراكم فى بوست تانى ان شاء الله

ودمتم سالمين

عودنا من جديد

الاول بعتذر عن عدم المتابعه الفترة اللى فاتت بسبب سفرى

و كل سنه و انتم طيبين بمناسبة العيد عارفه انها متأخرة بس اعمل ايه ماكنتش موجودة و ماعرفتش اعيد معكم للأسف

المهم بقى وحشتونى كتييييييييير قوى جدا خالص (:

احكلكم بقى على اول يوم فى الرحله الشاقة الممتعه من وقت ماطلعت من البيت و انا كل اشتياق ونفسى اغمض عينى و افتح عشان اكون فى البلد

عشان انام طبعا لانى مانمتش لأننا كنا بنجهز الشنط و بعدها الفجر و توضيب البيت لأننا مش هانعيد فيه يبقى لازم نسيبه على سنجت تلاتين (حكم القوى بقى)

المهم وصلنا البلد و دخلنا الشارع بتاعنا و لسه فى الاول و لقيت بقى الاطفال بتاعت العيله بيزفوا العربية (عمت ناهد ايجت عمت ناهد ايجت) مع تعطيش الجيم طبعا

مش عارفه اوصفلكم الفرحه اللى كنت فيها لان مهما قولت مش هاعرف اوصلها ليكم البلد ليها ريحه و جو فووووووووق الرائع

المهم وصلنا البيت و نزلنا الشنط و كنت ميته من العطش رمضان و سفر و الجو حررررررر بطريقه بشيعه ايوة هى اسمها بشيعه

قولت اصلى العصر و اترمى على السرير

صليت و قولت انام و لسه بقول ياهادى ألاقى حاجه فوق راسى و منشنه على ودنى و بصوت عالى عايز شلاطه (دا محمد ابن بنت عمى)

لا حول و لا قوة إلا بالله يابنى روح لامك هنا مش بيت شلاطه امشى ياض

يقول و بيصرخ و فى ودنى برضه عاااااااااااااااايز شلاااااااااطه

طيب روح جيب المترجم بتاعك و تعالى اكون نمت شويه و افهم انت عايز ايه .. يقولى عايز شلاطه

ايه ياض انت عليك عفريت اسمه عايز شلاطه هى ايه الشلاطه اللى انت عايزها دى

لقيت سمسمه اختى الجميله المترجم بتاع اطفال العيله كلها بتقولى عايز شوكولاته

ياشيخه اه يامصلحجى طيب امشى بعد الفطار اجيبلك شلاطه الدنيا صياااااااااااااااااام قوم بقى سيبنى انام

فضل يعيط و يقول عايز شلاطه و طبعا قولت مدام مافيش نوم لأنه مش هايسكت قولت اقوم اجبله شلاطه و افك الشنطه بتاعتى و اهو كمان اكون فاضيه بعد المغرب عشان لسه هاروح اسلم و ناس هاتيجى تسلم

المهم بعد المغرب لقيت بابا بيقول اجهزوا عشان نروح نشوف جدكم لأنه تعبان

قولت فى سرى بدأنا اصل جدى فى نص الشارع و شارع العساسيه اللى هو بتاع العيله و لا شارع منصور كدا اللى فى القاهره

المهم جهزنا و طبعا الكلام دا بعد المغرب بنص ساعة وصلنا لجدى على الساعة 10 ايوة ماهو مش معقول هانعدى من غير مانسلم و ماشاء الله البيوت جنب بعضها مافيش فراغ و كلهم من العيله مافيش حد غريب و طبعا تخرج من البيت دا نلاقى اللى قدامه و بعدين اللى جنبه و بعدين اللى قدامه ...الخ

و اخييييرا وصلنا لجدى سلمنا عليه و قبل مانقوم دخل عمى و لازم تيجوا عندنا عمى دا فى اخر الشارع

و انا اقول لبابا طيب بكره نكمل عايزة انام

يقولى عيب عمك يزعل ... رحنا لعمى الكلام دا كان الساعة 10:30 خرجنا من بيت جدى رحنا لعمى الساعة 1 ماهو برضه ماينفعش نعدى مانسلمش نفس الالخ اللى فوق دى برضه حصلت و احنا ماشين

و بعد ماخلصنا من بيت عمى روحنا الحمد لله هنام بقى لقيت بابا بيقول مافيش نوم قبل السحور

ياحج يهديك يرضيك انا جعانه نوم مش اكل و هو لايمكن ابدا

طبعا دا كان اول يوم و اخر يوم اللى هو امبارح حصل فيه نفس اللى حصل لأننا لازم نسلم قبل مانمشى

بس تعرفوا ان العيد فعلا وسط العيله ليه طعم مختلف و خصوصا بعد صلاه العيد لما يتجمع شباب و بنات العيله و نروح نسلم على بيت بيت و نعيد عليهم حاجه كدا حلوة قوووووووووووى

طبعا فى مواقف كتيييييييير حصلت و حاجات كتير اتعلمتها هابقى احكيلكم عليها  ان شاء الله  لانى راجعه مدمره و بكتب و انا بنام على الكيبورد اساسا

* ان شاء الله بكره هارد على التعليقات اللى فى البوست اللى فات و هالف بقى على المدونات عشان اشوف اللى فاتنى واسلم عليكم طبعا واحد واحد

و دمتم سالمين