Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

السبت، 7 فبراير، 2009

فيلم المقابلة المنتظرة ((:

المكان : النادى الأهلي

الزمان : 5/2/2009 الساعة 8:33

الحدث : قاعدة بنقل أغانى بالبلوتوث .. و فجأة

(حبيت معاك يا حبيبي سنين خليني جنب عنيك خليني) كيارا هانم بتتصل علشان تقولي على المكان اللى هنتقابل فيه .. قالت ستى ستارز الساعة 1 .. و طبعا كان صعب 1 جدااا بس قولتلها هشوف و هحاول متأخرش

المهم شويه كده و روحنا علشان نشوف الفريق و هو بيتمرن و عماله أفكر  مش معقول يعنى المقابلة بكره اكيد فى حاجه غلط

المهم اول لما قعدت قولت اكلم محاسن و اشوف اللى أنا سمعته ده حقيقي ولا لأ

استووووووووووووب

مش عدم ثقة فى كيارا و لا تشاؤم مني .. كل ما فى الحكاية ان المفروض المقابلة دى ياجماعه اتفقت عليها أنا و محاسن هانم صابر قبل ما شموسه تنزل من الحج (حطوا مليون خط تحت قبل ماتنزل دى ) اننا لما شموسه ترجع بالسلامة هنتقابل معاها و طبعا لما المقابلة اتأخرت كده .. قولت اكيد اكيد محاسن تقصد لما تنزل من الحج المرة الجاية ان شاء الله مش المرة دى (:

ثرى تووو وان (:

اتصلت على محاسن و فعلا طلعت المقابلة يوم الجمعه الساعة 1 لكن انا قولت لمحاسن انى هاجى على 2 او 2:30 كده لان صعب قوووى الساعة 1 دى و قالتلي ماشى وقفلنا على كده

استووووووووووووب

بما ان شموسه قالتلى خدى بالك من مده ياضد فى البوست عندها .. كان لازم اوضح الحقيقة علشان هى فاكره بقى ان مواعيدى مش مظبوطه رغم اني الوحيدة اللى جيت فى الميعاد بتاعى بالضبط (معلش لازم بردو اهدى النفوس على كيارا و محاسن ^_^ )

ثرى توو وان (:

المكان : باب النادى

الزمان : نفس التاريخ لكن الساعة 9:52

الحدث : خلاص شطبنا و عايزين نروح بقى .. و فجأة

(قد منَّ الله علينا إذ بعث الهادى الأحمد) رسالة .. بشوفها لقيت كيارا بردو بتقول ان المكان بقى ستى سنتر ):

قولت فى عقل بالى ستى ستارز ستى سنتر اهو كله ستى مش مهم .. و انا فى الطريق بقى بفكر .. اقل من ساعة و المكان اتغير .. ربنا يستر بقى على الصبح مايكونش الميعاد كله اتغير  )):

^^^^^^^

المكان : اوضتى العزيزة

الزمان : نفس التاريخ بردو لكن الساعة 11:53

الحدث : انا و اختى بنرخم على بعض .. و فجأة

(حبيت معاك يا حبيبى سنين خليني جنب عنيك خليني) أكيد عرفتوا مين .. ايون كيارا .. انا قولت اوباااا  مالحقتش اتهنى بالفرحة وشكله اتلغى من بليل )):

انا : ألو

كيارا : ايوة ياضد (لزوم الاسم قولنا ) بقولك هو انا هركب ايه علشان اوصل لهناك

استووووووووووووب

اول معلومة عن كيارا .. انها اصلا اسمها كيارا توهااااان .. دايما تايهه ..و ممكن و انا بتكلم معاها تروح مني فجأة و نفسى اعرف لحد الان هى بتروح فين

(معلش بقى ياكيارا انتى عارفه ماينفعش الموضوع يعدى كده :P )

ثرى تو وان (:

المهم قولتلها تركب ازاى .. مع ان باباها كان قال طريقة تانية .. بس نعمل ايه فى الابناء بقى :D

^^^^^^^

المكان : اوضتى العزيزة بردو

الزمان : 6/2/2009 الساعة 8 ص

الحدث : بفتح الموبايل علشان اطمن على ان الميعاد لسه سارى

و الحمد لله كل شئ كان تماما .. و بدأت اجهز بعد الصلاة و نزلت وبردو حاسة ان فى حاجه غلط

(ياجماعه ماهو اللى شوفته من محاسن لحد ما الميعاد ده اتحدد ماكنش شوية يعنى)

و نزلت و لسه بوقف تاكسى لقيت التليفون بيرن .. كيااااااااااااارا .. قولت خيييير ربنا يستر .. لاقيتها طبعا بتسأل انا فين .. و شموسه طبعا جنبها بتقول مواعيدك مش مظبوطه

استووووووووووووب

على فكرة كيارا اعترفت فى البوست بتاعها انى فعلا قولت هاجى على 2 او 2:30 يعنى الحمد لله اعترفوا بالجريمة و انا بردو الوحيدة اللى جيت فى ميعادى نيهاهاهاهاهاهاها

ثرى تو وان (:

ركبت و لسه بنزل علشان اخد اول ميكروباص للمكان .. لقيت التليفون بيرن المكان اتغير بقى فى كوستا و الحمد لله ده كان اخر مكان و الحمد لله وصلت الساعة 2:16 (احم احم بوصل فى الميعاد مش زى ناس جت الساعة 1:15و طبعا دى كيارا .. ولا مثلا مثلا زى ناس جت فى النهار اللى هو عكس النهار الطبيعى زى محاسن كده ^_^ )

^^^^^^^^

طبعا اول حد شوفته كيارا اللى بجد كانت وحشاااااااااااااااانى موت جدا خاااااااااااالص

^^^^^^^

وبعدين دخلت بقى شوفت شموستى الجميلة و توتا بنتوتتها الجميلة زيها

و زى ماكنت متوقعه فعلا شخصية جميلة جداا و لذيذه و حبوبة قووووى .. مرحه لأبعد الحدود و طيوبة جدااا .. بجد بجد انا سعيدة انى اتعرفت عليها عن قرب و بجد مهما اقول مش هقدر اوصف جمال روحها و شخصيتها

توتا الجميلة.. حته سكره و لذيذه جدااااا

^^^^^^^

قاعدنا بقى نتكلم كتييير والجدير بالذكر ان شموسه ياجماعه بتعطى النصيحة بطريقه جميلة قوووى تحس بجد انها صديقه اكتر من انها اخت كبيرة يتنصح الاصغر منها

و طبعا قبل مانقوم اتفقت انى اخر واحدة هتنزل البوست ده .. وعلى رأى شموسه لؤم مدونين بقى :D

^^^^^^^^^

محاااااااااااااااااااااااااااااااااااااااسن هانم صابر

دورك بقى ياقمر فى اللقاء ... طبعا محاسن من وقت ما وصلت و انا سامعه انها على وصول .. مره واحده بس قالت ربع ساعة و هتيجى .. و بعد كده زى ما كيارا قالت نص ساعة.. هو من الواضح و اللى اكتشفته مؤخرا يامحاسن ان الزمن بتاعك مختلف عن الزمن اللى الواحد عارفه

محاسن اللى كنت منتظرها الفترة دى كلها علشان اللقاء يتم .. هى الوحيدة اللى ماحضرتش اللقاء ده ... طبعا ياسنسن انا مقدرة اللى حصل لكن مش هنكر انى متغاظة مووووت لان بجد كان نفسى تكونى معانا

^^^^^^

و احنا قاعدين عمرو اتكلم و بجد كانت مفاجأة غير متوقعه و بجد سعيد جدااا انى كلمته لأنه فعلا من الشخصيات اللى بحترمها حقيقى ( و طبعا انا ليا عند عمرو هدية عيد ميلاده و هو قال هيجبها .. خليكوا شاهدين عليه بقى ^_^ )

^^^^^^

و طبعا لما خلاص فقدنا الامل ان محاسن تيجى اصلا .. و كمان الوقت كان خلاص فى العد التنازلى للبيت عند كيارا و انا كان المفروض ورايا مشوار بردو .. رحلنا من كوستا

نزلت انا و كيارا التحرير نبحث  عن الكتاب المفقود  لحد ماخلاص فقدنا الامل

و كل واحد راح على بيته .. و انتهى اليوم على كده

و نراكم فى لقاء تانى ان شاء الله عن قريب

و دمتم سالمين

* كل واحد على مدونته بقى لو سمحتوا علشان بنقفل و هنرش ميه على فكرة ^_^

هناك 58 تعليقًا:

romansy يقول...

ممكن اكون اول
تعليق


ل


رومانسى

romansy يقول...

دا كله فيلم
دا انتى بتحكى بالتفاصيل الممله ويقولوا ضد يا ضد
مالها ضد يا كيارا
زى العسل اهى

يا سلام على اللقاءت الجامده دى

وغي كده النغمه الخاصه بكيارا جامده طحن


متغبيش تانى ياضد
يعنى محاسن وكيارا وشمس يشوفوكى
واحنا لا
ماليش دعوه

كيــــــــــــارا يقول...

ههههههههههههههههههههههههههههههههه


موتينيب من الضحك علي ربنا يستر والمعاد كله مش يتغير

استني هقرا وارجع

الازهرى يقول...

اول تعليق

كيــــــــــــارا يقول...

هههههههههههههههههههههههههههههههه


بقي انا كيارا توهان بتفكريني بحاجه كدا يلا ماحلينا هههههههههههههههه

mahasen saber يقول...

هترشوا ميه على مين ههههههههههههههههه

هههههههههههههههههههه يا ظالمينى يا يا كاسرين بخاطر زمنى المختلف عن اى زمن

الازهرى يقول...

طيب كده مقلب واطلع مش اول تعليق

الازهرى يقول...

المهم هاقرا وارجع تانى

كيــــــــــــارا يقول...

عاجبك كدا بابا عمال يبص ويقول المجنونه دي بتضحك لييييييييييييييه

mahasen saber يقول...

تعاليى بئه ههههههههههههههههههههه
لا استنى مش هشد شعرك خالص ولاا شعر المقروضه كيارا

انا كنت هتجنن واشوفكوا والله بس الظروف جت عكس الجوابات خالص هههههههههههههههههه
وبعدين محدش مقدر اليى حصل الا شموستنا
انتى ضميرك بياكلك ومقدره نص نص واخده بالك من نص دى ههههههههههههههههههههه

كيــــــــــــارا يقول...

ههههههههههههههههههههههههههههههههههه


موتيني من الضحك

علي محاسن هههههههههههههههههههههه

انا مش رديت اشردك عشان عارفاكي وبرده مش في فايده احمل ايه في البت دي

كيــــــــــــارا يقول...

هههههههههههههههههههترشي ميه يعني احتليتي مدونتي وبتطرديني من مدونتك


عااااااااااااااااااااااااااااااا

mahasen saber يقول...

بعدين احنا اتفقنا اى لقاء تانى تبلغونى قبلها بسنه ونص ويا ريت تركزوا على النص ههههههههههههههههه

او تبيتوننى عند حد منكوا وياخدنى فى ايده الصبح وهو ماشى

بس يا بت يا جميله انتى طلعتى شكلك مالوف قوى قوى وشبه واحده صاحبتى بالضبط

ووصف شموسه ليكى مناسب ليكى جدا جدا يا حبيبتى ها حبيبتى
بس هتضربى برضه هههههههههههههه

mahasen saber يقول...

بس يا بنات انا شموسه بهرتنى بهرتنى وشخصيتها وجمالها ورقتها
جبولى حول زى اليى جالكوا من النص ساعه كده

بجد انا مشفتش ست بالرقى والجمال والدفء والنعومه والشياكه والانسانيه دى
بس معرفتنا بشخصيه بالرقى ده المفروض ناخده درس لينا ونتعلم منها وناخدها قدوه فى كل تصرفاتها

فعلا قعلا مناره انسانه قمه وفيها شموخ الملوك

مسدس صغير يقول...

لقاءات جميلة تزيد الود بين المدونين استمرو عليها بس ابقو افتكرونا بأى ايس كريم من مكرم عبيد وللا حتى من مدينة نصر مش فارقه..

mohamed ghalia يقول...

هو انتوا لسه بتتكلموا عن اللقاء كفاية بقى احسن هعيط
ربنا يكرمكم ويسعدكم
ودايما على الحب متجمعين

ضد التيار يقول...

رومانسى التفاؤل
---------------
اهلا بيك فى اول تعليق و تانى تعليق (:

طبعاااااا لازم التفصيل الممل امال فيلم ازاى ؟؟؟

ايه ده ايه ده .. احنا فينا من القر ولا ايه

قول بسم الله ماشاء الله ياراجل مش كده على فكرة ((:

و ان شاء الله مافيش غياب تانى

نورت ضد التيار

ضد التيار يقول...

كياااااااااااااااااااارا

-------------
اللى كانت محسسانى انى قاعده فى سنترال D:

يابنتى ماهو كان لازم الواحد بردو يخاف ماهو اللى اتلسع من الزبادى ينفخ فى ودن اللى جنبه ولا ايه ؟؟
^^^^

ايه هتنكرى انك توهاااان رسمى نظمى عبد الحكيم ؟؟؟

يابنتى بجد انا عايزة اشوف حل فى الموضوع ده P:

^^^^^
ايه ده هو باباكى لسه مايعرفكيش ولا ايه ؟؟؟

ماهو انتى مجنونة من زمان و كمان انا جيت جنبك

حد قالك تضحكى قدامه .. ايه الناس دى

^^^^^^
محاسن دى حبيبتى و الله بجد كان نفسى اشوفها

اسكتى بقى علشان كل مافتكر انها ماجتش بضايق

و كمان انا واخده منها تصريح انى اتكلم براحتى D:

طبعااااا مافيش فايدة يابنتى هو قالها و مات

يعنى لا راجعه فى الكلمة دى D:

^^^^^^^^^^^^
اى نعم هو كده عندك اعتراض هنرش ميه و هغرقك و كمان المدونة بتاعتك اتصدرت خلاص

فى مانع ؟؟؟

و روحى عيطى بقى جنب الووردبريس لو سمحتى

خلاص مافيش مكان فى بلوجر

نيهاهاهاهاهاهاها

نورتى ياقمر ضد التيار

ضد التيار يقول...

الازهرى
------------

هههههههههههههه معلش بقى المره الجاية ان شاء الله مايكونش مقلب و تكون فعلا اول تعليق

و كمان ماانت اخدت تالت تعليقات اهو من غير اى رسوم اداريه

و كمان كووووول ده بتقرا ولا ايه D:

منتظرك بعد القرايه (:

ضد التيار يقول...

محاااااااااااااااسن

-------------------

ههههههههههههههههههههههههههههههههههههههه

هرش ميه قدام المدونة الله مش العرض خلص خلاص

ولا احنا هنبات هنا .. انا ماصدقت كيارا صحيت من النوم و بقت تبات فى بيتهم ((:

على فكرة مصلحه لو خاطر الزمن ده اتكسر اهو يبقى فى امل انه يبقى زى زمنا ((:

^^^^^^
هههههههههههههههههههههه

ايه ده ايه ده احنا فينا من تعالى هنا

لالالالا الضرب و شد الشعر ممنوع

و كمان بعد اللى حصل يوم المقابلة براحتى بقى

مش كفايه ماشوفتكيش )):

و الله بجد انا اللى ضيقت جدااا انك ماجتيش

لالالالالا و الله انا و كيارا مقدرين بردو

لكن ده مايمنعش اننا بنعبر عن زعلنا بطريقتنا D:

لاااااااااااااااااااااااااااا بلاش النص دى

ده انا اتعقد منها ههههههههههههههه

^^^^^^^^^^^
قولى اتنين و نص سنه ونص دى بدرى قووووى على فكره

هههههههههههههههههههه

و كمان انا مابحبش الفكة كله صحيح من هنا و جاى لو سمحتى بقى

انا موافقه على الاقتراح التانى و تيجى بقى عندى و يبقوا يقبلونى لو شافوكى تانى نيهاهاهاهاهاها

اممممم ماكونش انا صاحبتك و متنكرة D:

على فكرة مدام قولتى حبيبتى و اهو على العام يبقى ممنوع الضرب نوهائى

يعنى خلاص تم العفو عنى D:

^^^^^^^
بجد مهما اقول مش هقدر اوصف اعجابى بشخصية شموسه و اد ايه عجبااانى جداااا

ماشاء الله عليها

ربنا يخليها لبناتها و لينا يارب

و ان شاء الله قريب نتقابل بقى بس يارب مايكونش زى المقابلة دى و يطول الميعاد ):

نورتى ياجميلة ضد التيار

ضد التيار يقول...

مسدس صغير
----------
ايه بقى الناس اللى داخله عينها فى الايس كريم دى )):

و كمان الايس كريم كان فى التحرير مش مدينة نصرD:

و فعلا زى ماقولت لقاءت المدونين فعلا بتزيد الود مابينهم

و ان شاء الله المرة الجايه نبقى ناكلك بقى ايس كريم (:

نورت ضد التيار

ضد التيار يقول...

mohamed ghalia
----------
اللهم امين

بس بلاش عياط بقى انا لسه رشه المدونة ((:

نورت ضد التيار

انا ودماغي يقول...

ههههههههههههههه

على فكرة شكلها كانت مقابلة تحفة بجد و انتوا كلكم ناس زى العسل و مواعيدكم مضروبة و قشطة

سمكه واحده يقول...

بحقد بحقد بحقد
احسن احسن احسن
بنق بنق بنق
بقي بتتقابلوا كمااان ايوه ايوه
وقوليلي بئي اتصلحتوا في الجونينه ولا لسه
كنتوا عاملين عصابه وضد وكيار ومحاسن وشموسه وحجات من دي
ياله بخطرها
القصد اما امشي لحسن انا اتغرقت مايه ايه ده الواحد ميعرفش يفك نفسه بكلمتين في المدونه دي يا ساتر اما الم الهدمتين بتوعي وامشي والارزاق علي اللله
المهم ان عيني وصلتلكوا ونقي وحقدي بس ده المهم
ياستي احلي حاجه الحب في الله والصحبه الصلحه الجميله والشخصيات اللي زي العسل دي بأمانه ربنا كلكوا زي العسل وناس جميله جدا ويسعد اي حد انه يتعرف علي الناس الشربتاتا دي ربنا يجمعكوا في الخير ديما يارب
تحياتي
سمكه الحقوديه

سمكه واحده يقول...

اه علي فكره مش انتوا لوحدكوا اللي عندكوا كوستا لا ياهانم فوقي اصحي احنا كمان عندنا كوستا ومن بكره الصبح هروح هقف عند كوستا باشا
اول ما يفتحوا ويرشوا ادام المحل ويبخروا عشان النفس هقعد ولا الحوجه لكوستا القاهره وحتي لو لوحدي هجيب جرتال واطلب قهوه واجحيب ورقه واقلم واعمل مهمه اه امال ايه

hager za3bal يقول...

بجد طريقتك في كتابة اللي حصل حلوه اوي.. حسيت انني بقرا حدوته :))

ربنا يكرمكم يارب ويزيد الود بينكم

تحياتي

princess يقول...

التقطيع ده تعبنى ستووووووووب ههههههه
شكله كان يوم حلو اوى
ربنا يديم المودة والحب فى الله
وخفوا على محاسن شوية هههههه

صباح الصباح يقول...

واضح انى بقالى كتير ماجتش وفاتتنى احداث كتير

انا مش فاهم اى حاجة يا انسة ضد

مين شموسةومين محاسن.. واية اللى فى النادى؟

ضد التيار يقول...

انا و دماغى
---------
ههههههههههههههههههههه

هى المقابلة فعلا كانت جميييييلة جداااا

اما بقى كلنا مواعيدنا مضروبه لالالالا اعترض

لان انا جيت فى الميعاد و شموسة بردو

اما بقى كيارا و محاسن هما الزمن عندهم مات اعتقد مش اضرب بس ((:

نورت ياقمر ضد التيار

ضد التيار يقول...

سمكه واحده
---------

ياساااااااااااااااااتر على الناس اللى اول ماتعلق تبدأ بالحقد و النق

ليه بس كده ياسمكمك

الله ماهو انتى لو فى القاهره و فى وسيلة اتصال كنتى جيتى ياقمر

بلاش بقى الحقد و النق ده((:

^^^^^
ههههههههههههههههههههههههههههههه

هو حد قالك تقفى قدام الخرطوم و انا برش

لالالا خلاص تعالى هبعد الخرطوم اهو و ادخلى بس بلاش تبوظى حاجه

انا لسه مرتبه المدونة بقى

^^^^^^
لا طبعا مافيش حاجة وصلت الحمدلله

و ده لان الجميلة اللى هى انتى مابتعرفش تنق ولا تحقد D:

^^^^^

اهوانتى اللى شرباتات بقى هه و عسل و جميلة كمان

لالالا تحياتى سمكه العسولة بلاش حقد بقى ههههههههههه

ضد التيار يقول...

سمكه واحده مره تانيه
--------------

ههههههههههههههههههههههههههههههههههههههه

انا صاحيه اهو و فايقه الله بتزعقى ليه بس

خلاص خلاص تعالى هنا و نروح اى فرع لكوستا فى القاهره

واخده بالك انتى من اى فرع دى

الا هو عندكم كام فرع نيهاهاهاهاهاهاهاهاها

و كمان ازاى ياهانم تروحى لوحدك

لالالالا ماعندناش احنا بنات تخرج لوحدها

ايوة امال ايه

مافيش خروج نهائى من باب البيت انا بقول اهو

نورتى ياجميلة انتى ضد التيار

ضد التيار يقول...

هااااااجر

-------------
اللهم امين

بس تعالى هنا ايه حدوتة دى

انا قولت فيلم و الله

عااااااااااااااااااااااااااااااااااااااااااااا

قولى بقى فيلم مش حدوتة علشان نفسى ماتتكسرش هه بس

نورتى ياقمر ضد التيار

ضد التيار يقول...

princess
---------
ههههههههههههههه الحمدلله

قدرت اتعب المدونين وهو ده المطلوب

نيهاهاهاهاهاهاهاهاها

هو فعلا كان يوم جميييل جداااااا

اللهم امين

نخف ايه بس هو احنا عملنا حاجه لمحاسن

كل مافى الامر اننا بس بس يعنى مضايقين انها ماجتش (:

نورتى ياقمر ضد التيار

ضد التيار يقول...

صباح الصباح
-----------
اولا حمدلله على السلامه

و ارجو يكون الانقطاع المفاجئ ده سبب خير

شموسة صاحبة مدونة (شمس النهار) لو دوست على اسمها هتروح على هناك

محااسن صاحبة مدونة (عايزة اطلق و) بردو لو دوست على الاسم هتروح هناك

و البوست بيحكى المقابلة اللى حصلت يوم الجمعه مابينا

النادى مافهوش حاجه ده بس كان المكان اللى كنت فيه وقت ماعرفت بميعاد المقابلة

ارجو اكون وضحت البوست (:

نورت ضد التيار

البت المشمشية حلوة بس شقية يقول...

ههههههههه
ايه التفاصيل دى كلها
انا عمالة اتخيل المشاهد
بس والله كيارا دى عسل
وانتى كمان سكررررررررررررررر
مكرررررررررر

EMMY BABY يقول...

هههههههههههههههههههههههههههههههههههههه

ايه ده انتم منهم انا بتغاظ جدا من كدة تغيير الميعاد كل نصف ساعة ده فال وحش ههههههههههه

وكمان لقاءات كدة من ورانا لن اقبل على فكرة

كويس انك قولتيلى على الاسم الحركى لكيارا

smilyrose يقول...

وحشتينى يا ضد

بس بجد زعلانه منكم

طب قولولى

كنت يلا بقى

المهم مقابلة جميلة وعقبال ما اشوفكم يارب

smilyrose

روح الحب الصادق

Butterfly يقول...

هههههههههههههههههههههههههههههه
يانهار أبيض .
أنا كان فى واحده بتعمل فيا حركات زى دى
فقطعت علاقتى بيها نهائيا ز
أنا جايه أهدى النفوس بس ههههههههه

وميض ابتسامة يقول...

جميلة مقابلة الاصدقاء والاحباب ..

ياريت تتكرر ... والدائرة توسع اكتر واكتر

المعتصم يقول...

بسم الله الرحمن الرحيم
السلام عليكم
احنا مش هنقول ان البوست حلو او نقول ان المدونه جامده(هما كده بس مش قايلين)احنا جايين نحذر ان سياسة وضع اليد اللى بتمارسيها دى (مع مدونة كيارا)ماتنفعش معانا
اما انك تحوشى ايدك من على المدونة او اننا هنفجر المدونة بتاعتك دى
وقد ازعر من زمر بس هه
والسلام عليكم ورحمة الله وبركاته

شمس النهار يقول...

والله يابنات انتم اديتوني اكتر من حقي
شكرا ليكم علي المجامله اللطيفه والكلام الحلو ده بس ده كتير عليا خالص
انتم اللي بنات مصريات اصيلات
علم ثقافه جمال خفة دم
فعلا استمتعت جدا بصحبتكم
وبشكرك علي البوست الجميل قوي ده

ضد التيار يقول...

البت المشمية حلوة بس شقية
----------------

ههههههههههههههههه

التفاصيل علشان الواحد يعرف يتخيل براحته بقى

شفتوا علشان بس ماتقولش ضد بتبخل علينا بحاجه

كيارا دى الجميلة بتاعتى

اهو انتى بقى اللى سكرررررر مكرررررررر

نورتى ياعسل ضد التيار

ضد التيار يقول...

ايمي
--------
هههههههههههههههههه لالالالا شموسة و انا مش منهم خالص

و كمان النص ساعه دى تنفرد بيها سنسن الجميلة ((:

ان شاء الله ياقمر فى لقاء تانى تيجى معانا (:

مش حرماكى من حاجة اهو (اخيرا هنتقم لحملة ضد ياضد ياكيارا)

يلا بقى عايزة الاسم ينتشر فى بلوجر كله

مافيش بوست يعدى من خير الاسم الجديد D:

نورتى ياقمر ضد التيار

ضد التيار يقول...

smilyrose
-------------
انتى اللى وحشااانى ياقمر

لالالالالالالا بدون زعل

انا بجد ماعرفش اى وسيلة للاتصال بيكى

بس بلاش تزعلى ان شاء الله المره الجايه البت كيارا تكلمك

او انا اقولك فى المدونة عندك

ماشى ؟؟

بوسه بقى ياقمر ليك و بلاش زعل

امممممموة

نورتى ياجميلة ضد التيار

ضد التيار يقول...

Butterfly
-------------
اهلا اهلا اهلا بالناس اللى بتهدى النفوس هههههههههههههه

لالالا ربنا مايجيب قطع و عندى امال ان شاء الله

المرة الجاية مايحصلش اللخبطة بتاعت المرة دى

نورتى ياقمر ضد التيار

ضد التيار يقول...

وميض ابتسامة
-----
ان شاء الله تتكرر و توسع (:

نورت ضد التيار

ضد التيار يقول...

المعتصم
--------------------
وعليكم السلام و رحمة الله و بركاته

بس ليه طيب الداخله دى

يعنى اول زيارة كده تهديد ووعيد

لالالالالالالالالالالالا تفجير و توليع و الكلام ده ماينفعش نوهائى

ضد التيار الوكيل المعتمد الوحيد فى بلوجر اللى بيفجر و يولع فى المدونات بتاعته

وقريب هاخد التوكيل من مكتوب و الووردبريس

و على فكرة بقى المدونة بتاعتك اتحطت فى القائمة اللى ان شاء الله هتنفجر قريب

و كيارا مدونتها اتصدرت يعنى اتصدرت

كلام نهائى و مافيش مفاوضات على فكرة

انا لااااا ينكن ارجع فى كلمتى ابداااااااااااااااااااااااااااااا

نيهاهاهاهاهاهاها ( شريرة شريرة يعنى )

و عليكم السلام ورحمة الله و بركاته

نورت ضد التيار بزيارة التهديد الاولى و ارجو ماتكونش الاخيرة

(الزيارة مش التهديد هه)

(:

ضد التيار يقول...

شموسة
----------
على فكرة بقى الكلام مش مجامله خالص لانك بجد شخصيه جميلة جداااا

و مهما قولت مش هقدر اوصف اعجابى بشخصيتك الجميلة

دايما منورة ضد التيار شموستى (:

ولد مصري يقول...

هجيب من الآخر

لأ مش قصدي من رش الميه


قصدي إن الصداقة شي جميل

ربنا يكرمكم ويجمعكم دايما على طاعته

تحياتي

ghorBty يقول...

ما شاء الله عليكم

ربنا يجمعكم علي الخير ويديم محبتكم

لفت علي كل مدونتكم وانت كنت حسن الختام سبحان الله

استمتعت بالموضوع جدا وكاني كنت معاكم

تقبلي مروري الاولي

غربتي

marmar يقول...

ههههههههههههههههه
انا استمتعت جدا بالقصه دي لولا اني قريتها عند كيارا بس اسلوبك مختلف عنها شوية
واعذروا سنسن بقى بجد حرام عليكم كلكم عليها ليه كده معلش يا سنسن اول ما انزل مصر واتفق معاكي على لقاء مش هاجي ههههههههههههه لا بهزر هاجي عشان اشوفكم كلكم واتعرف عليكم
تحياتي ليكي يا عسسسل

عايش... ولكن !!!! يقول...

ايه ده
انا قريت اللقاء ده عند كيارا وشمس ومحاسن بس بجد اظرف سرد للقاء
وبالتفصيل كمان
ربنا يديم المحبه بينكوا

ضد التيار يقول...

ولد مصررررررررررررررررى
-------------
ليييييييييييه بس؟ .. ماكنت تجيب من رش الميه

اهو تتغرق شويه .. دايما كده بتجبلى احباط )):

^^^^
اللهم امين

نورت ضد التيار

ضد التيار يقول...

غربتى
-----------

نورتى ياقمر بالزيارة الاولى

و ارجو ماتكونش الاخيرة

(:

ضد التيار يقول...

marmar
-------------
ان شاء الله تنورى مصر قريب

و نتعرف عليك .. و نحاول بقى نجرب موضوع المواعيد المضروبه دى معاك

ايون طبعا مش لازم نرحب بيكى ولا ايه D:

نورتى ياجميل ضد التيار

ضد التيار يقول...

عايش .. و لكن
-------------
اللهم امين

نورت ضد التيار (:

اسماء عوني يقول...

انا عاوزه اعرف ايه حكاية ضد دي

Sweet Violet يقول...

انا ضد التيار (:

بس تم التعديل بقى و بقيت سويت

وماتقوليش فرق شاااااااااااسع هقولك عادى جدا بتحصل فى احسن المدونات

باقى الاسئله بقى فوووووق (:

نروتى ياقمر