كل سنه و انا طيبه بقى (:

الاول و قبل اى حاجه احط التورته بتاعت امى لأنها بعتتها

من 12-8-2008 و من اليوم دا وهى كل يوم تقولى كل سنه و انتى طيبه.. ربنا يخليها ليا يارب امممممممموة احلى بوسه ليها (:

طبعا السنه اللى فاتت اللى كان اخر ثانيه فيها من شويه ..كان فيها احداث منها السعيد  و منها الحزين..و بالأخص اخر الايام كانت غير محببة ليا بالمرة..

عشان كدا اقر و اعترف انا ام حنونه (زى ما قالت صورة فى تعليقها و بجد احلى لقب ليا) الاتى:

انى مسامحه كل شخص اساء ليا او كان سبب  فى جرحى او تعبى

انى مسامحه اى شخص حاول يشوه صورتى قدام الناس

انى مسامحه اى شخص حاول انه يدخل فى حياتى و يبوظها

انى مسامحه كل الناس على اى حاجه و كل حاجه

و اتمنى ان اى حد انا زعلته منى بقصد او بدون قصد يسامحنى و يفتح صفحه جديدة خالص مش فيها غير كلمه مسامح و بس

و انا السنه اللى فاتت بصفحاتها كلها قلبتها و فتحت صفحه جديدة مكتوب فيها انى مسامحه و بس

اليوم عيد ميلادى السعيد لكن للأسف فى اشخاص كنت اتمنى وجودهم معايا .. جدتى اللى فارقتنى من سنين و الصراحة من بعدها مش حسيت بطعم الفرح إلا لما حبيبى ظهر فى حياتى .. لكن من الواضح ان عيد ميلادى اتكتب عليه مش يكمل بالفرح لان حبيبى للأسف مش هايكون معايا فى اليوم دا )):

و بمناسبة عيد ميلادى النص سعيد )): كتبت :

فى عيد ميلادى الرابع و العشرين

كان نفسى يكون حبيبى هنا و تبقى الفرحه فرحتين

لكن القدر قال كلمته و سابلى دمعتين

لجدتى دمعه فراق و لحبيبى دمعه حنين

فى عيد ميلادى الرابع و العشرين

********

فى عيد ميلادى الرابع و العشرين

فضلت و اقفه على الباب مستنيه

افتح لكل البشر الليله ديه

يمكن ألاقى حبيبى فجأة قصاد عنيه

لكن للأسف طلعت مجرد امنيه

**********

فى عيد ميلادى الرابع و العشرين

بقولها بكل ثقة و يقين

و اوعدك و وعد الحر دين

أنك هتفضل حبيبى مهما تطول السنين

فى عيد ميلادى الرابع و العشرين

*******

طبعا بما ان جدتى اكبر منى بيوم واحد بس :D العيد ميلاد اتعمل الخميس 28 عشان العيله ..

لكن انا مش هاسيب حقى و بردو  هاعمل عيد ميلادى اليوم الجمعه 29 مش كفاية ان الساعة هاتتغير يعنى عيد ميلادى هايبقى ناقص ساعة بحالها )):

و بما انى كريمه جداااا و الدليل انى هاكل لكل المدونين التورته و الجاتوه بتاعهم  ومش هاكل لنفسى بقى لانى عامله دايت ((:

تنويه لازم جدا جدا جدا

تم تمرير تاج من روح و ريحان ليا ... شكلها هى دى هديه عيد ميلادى )):

و تم تمرير تاج بردو من مش عارف ليا.. دا كان بدل الفانوس )):

ان شاء الله هايتم الاجابه عليهم بس بعد عيد الميلاد (:

و طبعا احب اشكر انتيمتى و صديقتى كيارا انها نزلت بوست عيد الميلاد بتاعى فى المدونه عندها ..دايما كدا بتحرجنى معها بس بردو مهما تعمل مش هاتاخد تورته بالشوكولاته لأنها بتاعتى :-p

قل بأصلك

مش هتكلم معاك ولا هتكلم عليك

مثل و اعمل ملاك و انا هتفرج عليك

قل بأصلك واجرح فيا يمكن ترضى غرورك بيا ..

خطط و ارسم و اقعد فكر ممكن تقتل قلبى ازاى

عايزك كل دقيقة تبيعنى اعمل فيها برئ و اخدعنى ..

 انا نفسى اعرف انت بتعرف بعد دا كله تنام ازاى

مهما هاتعلى هتنزل تانى اللى بيكسر قلب التانى ..

 واللى بيظلم حد برئ و اللى بيعرف يبقى انانى

لازم كل الدنيا تزله و بينداس من العالم كله ..

و اللى عمله فى كل الناس هيجيله يوم لازم يحصله

ايه يعنى خسرت واحد كان كداب كبير ..

بس انت خسرت واحد كان بيحب بضمير

كبرت اوى فى عنيا مش عارف اقولك ايه

 بس اللى عملته فيا انا بحييك عليه

دايما حماده هلال لازم يكون له اغنيه فى اى شريط  جديد

بتبقى بجد عليا قوى... مش عارفه صدفه غريبة فعلا

بس فعلا من اول ماسمعت حماده

وهو دايما لازم ينزل اغنيه تخصنى قوى قوى قوى

فرح فرح فرح هييييييييييييييه

 

اولا احب اعتذر للجميع انى هتاخر فى الرد على التعليقات

و مش هاكون متابعه الفترة اللى جايه اصل فرح طمطم ياجدعاااااااااااان

طمطم دى صديقة الدراسة هسافر العريش عشان اجهز معها للفرح

 اخيرا لقيت قصه حب تنتهى بفرح الحمد لله

يلا عقبال كل بنوته و شاب لسه مش اتجوزه

بجد انا فرحانة جدا اليوم السبب الاول عشان طمطم

والسبب التانى انى هاروح لصحبى البحر ياااااه بقالى كتير مش اتكلمت معه

سلامى للجميع و يلا بقى امشى لحسن البت عمال ترن وتقولى انتى لسه فى القاهرة

اشوفكم على خير .. وان شاء الله لما ارجع هاجيلكم واحد واحد فى مدونته

و يارب السعادة تكون معكم دايما ومش تسيبكم  

هو فى ايه؟؟؟

بقالى يومين كل لما ادخل مدونة ألاقى

يا أما غضب على البلد اللى مش عايزة تتعدل ..

يا أما غدر و خيانة من الحبيب

مافيش مرة ادخل ألاقى قصيدة حب ..

هو خلاص ياجماعة اصبحنا فى زمن

انعدم فيه الحب و الأمان ؟؟؟

و لا هو مرض اصاب كل المدونين ؟؟؟

أنا عندى إحباط لوحدى و الحمد لله زاد

و حبة الأمل اللى عندى شكلهم فى سكرات الموت

و هاينتهوا قريب بسبب اللى بشوفه

مش هاقول العيب فينا ولا فى الزمن لأنه بقى سؤال قديم

و خلاص عرفنا الاجابة بس احنا اللى بنتصنع الزهايمر

عشان نصبر نفسنا

لكن هاقول لحد امتى هنفضل كدا نهرب من الحوار

ونقفل على حزننا لحد مايموت يا اما احنا اللى نموت ؟؟

لحد امتى هايفضل التسامح اللى بين البشر

فى غرفة الانعاش و مش هايفوق ؟؟

لحد امتى هانفضل نسمع صوت نفسنا و بس ؟؟؟

لحد امتى هانفضل نقول الحب دا كان زمان مش دلوقتى ؟؟

دا على اساس ان بشر زمان غير بشر دلوقتى

هما من كوكب و احنا من كوكب تانى!!!!!

نفسى أعرف لحد امتى ؟؟

اعتذار واجب

أنا أسفه انى دخلت حياتك

أنا أسفه  انى توقعت انك تتغير

أنا أسفه انى حاولت أكون أقرب لك من اى حد

أنا أسفه ان كل مابيحصل حاجه 

كنت برجع و اصلحك و بفتكر انه سوء ظن منى أنا

أنا أسفه انى مش صدقت حد و صدقت صوت قلبى

أنا أسفه انى اخدت جزء من اهتماماتك

مع انى اخر حاجه بتفكر فيها

رغم انك اول حاجه بفكر فيها

أنا أسفه انى حبيتك اكتر من نفسى

أنا أسفه انى خسرت كل الدنيا عشانك

أنا أسفه انى كنت بخاف اجرحك بالكلام

أنا أسفه انى كنت بحاول انى اكون لك كما تريد

على فكره الأسف دا مش ليك

الأسف لنفسى لانى انا السبب فى اللى هى فيه

ما الدنيا إلا حفلة تنكرية

 

منذ الصغر و أنا أسمع عن الحفلات التنكرية فهى عبارة عن لبس الأقنعة و ظهور الأشخاص على غير طبيعتهم و رغم معرفتى بها إلا أننى لم أذهب إليها يوماً كنت فقط أراها فى الأفلام و أحلم أن أحضر مثل هذه الحفلات لمشاهدة هؤلاء المقنعين و ماذا يفعلون.

أما الآن لقد عرفت أن الدنيا ما هى إلا حفلة تنكرية و لكن الفرق بينها و بين التى كنت أراها أن هؤلاء الأشخاص الذين يرتدون الأقنعة معروف أنهم مقنعون و أيضاً من المعروف أنهم بعد الحفلة سوف يخلعونها و يظهرون على حقيقتهم ، أما فى هذه الدنيا فلن نكتشف هؤلاء المقنعون إلا نادراً، فهم بارعون فى إخفاء وجههم الحقيقى و بارعون فى تبديل الأقنعة حسب الموقف و المكان و الأشخاص.

فمنهم من يرتدى قناع الطيبة و هو بداخله قسوة لا حدود لها..و منهم من يرتدى قناع الوفاء و هو بداخله مثال للخيانة..و منهم من يرتدى قناع الناصح الأمين و هو بداخله الفاسد الحقود،فالأقنعة كثيرة و من يتقن استخدامها فى هذا الزمن كثيرون أيضاً.

و فى نظرى أن مثل هؤلاء بداخلهم نقص وشرخ فى شخصيتهم ..ياالله إنهم بالفعل أُناس مثيرون للشفقة، فهم فى قرار أنفسهم يعلمون من هم جيداً و لكنهم يتمتعون بخداع الناس و تبديل الأقنعة- و لكن- الأسوأ من الذين يرتدون الأقنعة على علم بيها ، الذين يرتدون الأقنعة و يتوهمون أنهم بالفعل بلا قناع و أن هذه هى شخصيتهم الحقيقة، فهؤلاء أخطر بكثير فهم يؤذون بدون قصد و لا معرفة و لكن سرعان ما ينكشف أمرهم أمام الجميع و لكن بعد فوات الأوان أو كما يقال بعد (خراب مالطة) فإن ايذائهم أبشع و أخطر بل و مدمر أيضاً.

والسؤال هنا: ماذا يستفاد هؤلاء الأشخاص من كل هذا ؟؟؟؟ فهم عاجلاً ام اجلاً سوف ينكشفون و يبتعد عنهم الناس و يعيشون فى وحده و عزله بعد ذلك..لأن ثقة الناس بهم أصبحت معدومة..فلقد خسروا أنفسهم و الناس من حولهم بسبب أقنعة واهمة.

رسالة أخيرة لكل من يرتدى قناعه المزيف..اخلع القناع و عش كما أنت بشخصيتك و حاول أن تتغير بدونه لتبقى أنت الشخص المحبوب بدون اى قناع و تذكر أنه من عاش بوجهين مات لا وجه له...و تذكر أيضاً أن المنافقين أعدت لهم نار جهنم خالدين فيها

 أيها المقنع قف و راجع نفسك قبل فوات الأوان

  

الصمت بداية للعد التنازلى

قالوا ان الصمت ابلغ لغات الكلام...وأن الكلام من فضه والسكوت من ذهب ... لكن فى بعض الاحيان الصمت بيكون بداية العد التنازلى لهدم العلاقة بينك وبين حبيبتك

لما حبيبتك تلاقيك مش مهتم وهى بتحاول تلفت نظرك وأنت مصمم تعيش فى عالمك وبس .. عشان بتحبك ها تلتزم الصمت

لما حبيبتك تحس انها لازم تهتم باهتماماتك وتخاف على شعورك وأنت بتعمل عكس كدا معها..عشان بتحبك ها تلتزم الصمت

لما حبيبتك تحاول تفهمك بطرق غير مباشره هى عايزة ايه منك وأنت مصمم ماتفهمش ...عشان بتحبك ها تلتزم الصمت

لما حبيبتك تحس انها مجرد شئ ثانوى فى حياتك  وان فى حاجات كتير قبلها ..عشان بتحبك ها تلتزم الصمت

لما حبيبتك تحس انك مابتتعبش عشانها وتتعب عشان ناس تانيه..عشان بتحبك ها تلتزم الصمت

ولما صوتها يتغير وأنت ماتحسيش دا... ولما دموعها تنزل وأنت ماتشفهاش ولما ..ولما ..ولما ...و بردو عشان بتحبك ها تلتزم الصمت

لكن نتيجة الصمت دا ايه؟؟.......حاجه من الاتنين

يا اما انها تقتل صمتها بكلمات و تنهى العلاقة

يا اما تختفى وبدون سابق انذار وتسيبك مع حياتك واهتماماتك

البعض هايقول المفروض نتعاتب..هااقول مش هاينفع

لان العتاب وقتها هايكون فات أوانه ..لأنها حاولت قبل كدا كتير تفهمك من غير ماتجرحك وأنت مافهمتش وفضلت زى ماانت نفسى ثم الآخرين ..أما حبيبتك مدام ساكتة يبقى كويسة وسعيدة..مع انها حتى لو اتكلمت هايتقال انها نكدية او بتشتكى كتير ..يعنى هاتلوم عليها بردو .. عشان كدا اخدت طريق الصمت...مش ضعف منها ..لكن عشان تقولك لقد بدأ العد التنازلى لعلاقتنا

وأنت بأيدك توقفه .. وبأيدك تسيبه شغال لحد ما العلاقة تنتهى