الكل طبعاً متفق أن الخيانة أنواع .. من جسدية لكلامية لفكرية لثقة ..الخ
من فترة كنت بسمع أسامة منير و كانت الحلقة عن الخيانة بيقول إن أصعب أنواع الخيانة هى الخيانة الفكرية
لأن محدش بيعرفها إلا لو لسان الواحد خانه و قال اللى بيفكر فيه فعلاً
بس من وجهة نظرى أنا إن أصعب أنواع الخيانة هى خيانة الثقة لأنها الوحيدة
اللى ممكن الإنسان يعطى ضميره عقار مبرر و يدخله فى غيبوبة وبالتالى بيبقى فاكر إنه صح .. ازاى ؟؟
أيام ماكنت بدرس أو بشتغل كنت بقابل بنات ممكن تكون كاتبه مثلاً رقم ولد عندها على الموبايل أو إيميل ولد باسم بنت .. تيجى بقى تسألها ليه ؟
تقولك علشان ياإما باباها أو الإنسان اللى مرتبطة بيه (سواء زوج أو خطيب) مش عايزها تكلم ولاد إلا بس فى نطاق مكان الزمالة
يعنى خرجتى من الكلية أو من الشغل يبقى الكلام انتهى بينكم .. و لو فى حاجات تتبعت سواء للدراسة أو الشغل على النت يبقى عبر الإيميل لكن شات لأ ..
طيب إنتى مش شايفة إنك كده بتخونى ثقته ؟؟
تقولك لأ أنا مابعملش حاجة غلط لأن كلامى مع زملائى فى نطاق الاحترام يعنى أنا مابخونش
طيب مدام إنتى مابتخونيش كاتبة ليه الاسم بنت مش ولد ؟؟
الإجابة بتبقى غريبة جدااااا ..
علشان بتحافظ على مشاعره و بتمنع حدوث أى مشاكل و خناق
و على فكرة برضه فى أولاد نفس النظام و لما مثلاً تسأل أى حد فيهم بيكون نفس الإجابات بنفس المبررات
و إنهم مابيعملوش حاجة غلط و بيكدبوا الكدبة البيضة دى علشان يحافظوا على مشاعر اللى معاهم و منعاً للخناق
طول عمرى أعرف إنى مدام أنا بعمل حاجة صح يبقى أعملها فى النور مش فى الضلمة و بدون ماأعطى نفسى مبررات أو أكدب .. لإنى صح
يعنى نفرض مثلاً لو الإنسان اللى مرتبطة بيه عرف وقتها هيكون ايه رد الفعل ؟؟
أولاً هكون جرحت مشاعره فعلاً لأنى خونت ثقته . و وقتها مش هيكون مجرد خناق لا ده ممكن يوصل لدرجة الانفصال
طيب نفرض بقى برضه إن الزملاء اللى احنا بنعاملهم بإحترام اكتشفوا ده وقتها هيكون منظرنا قدامهم ايه ؟؟
أنا عن نفسى لو قابلت ولد أو بنت بيعلموا كده عمر ماهيكون فى ثقة بينى و بينهم
لآن الخاين عامة قبل مابيخون الإنسان اللى معاه فهو بيخون نفسه و مبادئه و ضميره و متهيألى صعب قوى حد يثق فيه
طبعاً فى خيانة الثقة مابين الآباء و الأبناء و فى مابين الأصحاب و لكن أنا تناولت وجه واحد بس منها
وهو الوجه العاطفى لأنه المفروض أنه يكون أساس العلاقة فيه هى الصراحة و الوضوح و عدم الكدب و الخيانة
ياريت ناخد بالنا من عقار مبرر (أنا مابعملش حاجه غلط) .. لأنه أوقات هو اللى فعلاً بيوقعنا فى الغلط من غير مانحس
و لا انتوا ايه رأيكم ؟؟؟
و دمتم سالمين
هناك 102 من التعليقات:
الثقه هي قوام اي علاقه بين اتنين اي اتنين
تصدقي ان الحراميه والنصابين بينهم ثقه
وماحدش فيهم بيخون التاني
لكن للأسف ان خيانة الثقه دلوقتي بقلها تسميات دلع كتير
زي الكدب لما عملوا له الوان ايض واسود اصل الالوان لسه مادخلتش كفر ابو كدب
المهم
المشكله ان الخاين بيكون مستمتع جدا انه بضحك علي اللي بيخونه
ولما تكتشف الخيانه تسمعي العجب
اصل كنت خايف علي مشاعرك
اصلك لوعرفتي الحقيقه هتسيبيني
ماكنش عندي اختيار يااخونك وماتعرفيش يايكون التمن اني اخسرك للأبد...........الخ من الغباء الخاين
بس عايزه اقول ان اللي بيخون بيخون نفسه مش حد تاني عشان هو اللي بيخسر نفسه وكل شئ خان الثقه في سبيل الاحتفاظ بيه
اما الضحيه بيكون هوالكسبان كسبان ان ربنا كشف له الحقيقه ومافضلش علي عماه كتير
اقصر طريق لنجاح اي علاقه الصدق في كل شئ واخلاص النيه للأخر والوفاء
معاكى حق طبعا
بصى طالما الواحد كدب يبقى كده هو عاف انه غلط اكيد
تحياتى :)
اول تعليق محجووووووووووووووز
joker
كلامك صح مية في المية بس ايه رأيك بأه في وحدة بتعترض لحبيبها على انه يكتب على مدونته وبنات يعلقولوا هو كده يبقى خيانة ليها لو كتب وبنات علقولوه هو ذنبه ايه يعني يدفن موهبته ويدفن نفسه عشان خاطرها هو بيحبها جدا أو كان يعني بيحبها قوي بس لما عرفت انه مسابش الكتابة وان البنات بتعلق عند ثارت وغضبت وضيعت الدنيا وفعلا وصل للإنفصال..هو مكانش بيخون ولا بيعمل حاجة في الضلمة بس هيا الي شكاكة قوي ووصلت معاها لإنها تفتح الميل بتاعه بدون إذنه ولقت عليه ميل وحده زميلة عشان كان فيه ظروف اضطرته لإضافتها عشان عاوز حجات دراسية وقت ما كان مسافر بعيد عن الكلية فهمت طبعا الكلام غلط وبقت حكاية
حاول يصلح الوضع بس اتطين أكتر والحمد لله هو مرتاح حاليا لإنه لقى الي تفهمه وتقدر ده وتحبه زي ما هوه كده..
معلش طولت ودخلت في حجات فرعية بعيدة عن الكلام شوية
معلش
أنتظرك
مودتي
كان الامام ابن القيم
يقول قاوم الذنب وهو فكرة لانة ان فكرت به تحول لفعل
المهم ان الخيانة حاجة متأصلة فى النفس ناس بتكون حابة الخيانة ودا طبعها
اول تعليق يا ضد
هييييييييييييييه
ضد يا ضد
لحد كيارا ما تعود بس
وحشتونى قوى
اجمل حاجة يا ضد
انك متابعة انا والنجوم وهواك
زى انا والبت كيارا
واجمل ما فى الموضوع انك لمست موضوع
حساس جدا لانه فعلا شئ بيؤدى الى
الخطأ لان قبل خيانة الاهل
دى خيانة للنفس لان لو الفعل دا غلط
يبقى افضل من البداية مش يتم اصلا
والافضل نكون صرحاء مع من نعيش معهم
فى كل شئ حتى لا تهتز الثقة بيننا
موضوع رائع يا كميلة
تقبلى مرورى
smilyrose
روح الحب الصادق
السلام عليكم ورحمة الله وبركاته
يا رب اكون اول تعليق ولو مكنتش يبقى مبروك للسبقنى
بوست جميل اووووى
وفعلا احنا بنخلق لنفسنا المبررات علشان نهرب من الصح
وغير كده انا بكره الخيانه جدا
ياله مش هطول عليكى المره دى علشان الحق اذاكر بقى
فى رعايه الله
joker
الخيانه هى اصعب وابشع شئ فى الوجود
بس كدا
لكن بجد البوست رائع
بص سياسه الشماعه دي اكتر حاجه بكرها
يعني انا مثلا بكون عامله بلوه واقول اه
عملتها وعارفه انها غلط بس اندم
ده احسن بكتير من سياسه الشماعه
مبعملش حاجه غلط
اصل مش بضر حد
ده كدب ابيض
هما اللي وجه نظرهم غلط مش انا
انا بعمل كده لحد مااقنعهم
وماشبه ذلك صراحه اول مابسمع الكلام ده
ضغطي بيعلي موضوع جميل ياقمر
حجز اول تعليق وجايه تانى
لاء ده انتى عاملة مورديشن
اهى اهى اهى
السلام عليكم ورحمة الله وبركاته
معاكي في وجهة نظرك لكن لو فتحنا الكلام هايكون في اكتر من زاوية وماهياش مبرر وعقار مخدر
لكن ليس كل ماهو في النور صح وليس كل ما هو في الظلام خطأ
زاوية الاضائه علي الاشياء تحدد رؤيتها فتختلف على حسب زاوية الضوء وموقف كل انسان من زاويته
تحياتي
الي اللقاء
بجد معرفش يمكن يكون قدري كويس اني ابقى اول تعليق بس بجد موضوعك مهم بيتكلم عن مشكلة كبيرة جدا بس ده امتداد للتربية الي بيترباها الشخص وعلى فكرة المشكلة ديه قابلتني كتير اوي
مع البنات بس اسمحيلي اختلف معاكي على فكرةالخيانة من النوع ده خيانة من عدم الثقة . بمعنى ان مرة بنت طلبت رقمي ادتهولها لاقتها بتسجله باسم بنت قولتلها ليه قالتلي عشان في البيت و خطيبي وقولتلها بس ده اسمه عدم ثقة فيكي قالتلي فعلا بحس بكده قولتلها عندك حل من الاتنين يا متخديش رقمي يا تخديه وتسجليه باسمي وتوجيه الناس ان ديه علاقة في حدود الزمالةلاني برفض الشخص الجبان بس الحمد لله خطبها اتفهم الموقف تمام ومسحت رقمي هههههههههههه انا بهزر و جه يوم وقعد معانا وكان يوم حلو و بقت تاخد ارقمنا وتقوله عادي.
يااااااااه ده انا طولت اوي يالا كله لله
تقبلي مروري تحياتي
اصعب حاجه الخيانه وبالذات لما تكون من انسان وضعت ثقتى فيه
بس مش المفروض طالما متاكد انى بعمل الصح ومش بعمل غلط ليه بدارى بقى
واغير الاسم
تحياتى يا ضد على موضوعك
ويارب تكونى فى احسن حال
اممممممممممممممم
ضد .. أنا مش عارفة أنا التعليق رقم كام
بس قلت ألحق اى مكان الاول
هأقرأ و أرجع لك
وحشتينا يا قمر
اممممممممممممممم
ضد .. أنا مش عارفة أنا التعليق رقم كام
بس قلت ألحق اى مكان الاول
هأقرأ و أرجع لك
وحشتينا يا قمر
عدناااااااااااا
صح يا ضد
أنا معاكى فى كل كلمة قولتيها
أول لما قرأت سؤالك فى الأول
أنا فعلا قلت الثقة
صعب أوى أوى إنك تثقى فى انسان
و بعدين تكتشفى إنه مش محل للثقة دى
أيا كان هذا الشخص ليكى
بس بالنسبة لى اللى أصعب من خيانة صاحب أو حبيب
هو خيانة القدوة
شخص يكون قدوة ليكى
و اتعلمتى منه كتير
و بعدين تكتشفى انه غير اهل للثقة دى
كل حاجة اتعلمتيها منه بتتزعزع
و دا صعب اوى
لأنه بيزعزع ثقتك فى نفسك
شكرا يا قمر على البوست الهايل دا
و ماعدتيش تتأخرى عنا تانى
دمتى بود
اول تعليق
ياضد ياضد ياضد
مممممممممم يعني البلوج متفجرش ولا حصل انة اتولع ولا اي عملية مفخخة مممممممممم
طيب ياضد ياضد ياضد
بقوللك البوست حلو وكلامك صح جدا جدا وخلاني اخد بالي من حاجات مهمةفعلا
جزاكي الله كل خير
مممممممم
يمكن مكنش الاول اطلع التاني مثلا يا ضد
"وش بيطلع لسانه"
اقوللك حاجةحاسه ان في حاجة مضايقاكي يارب احساسي يطلع غلط
عارفه انا شايفه بقى الموقف ده ازاي
مش خيانة ثقه لا
ده هروب من المشاكل
ضعف فى مواجهة الحياه
فى الغالب الى بيحصل انها فى النهايه بتتحول او بيتحول الشخص الى كذااااااااااااب
ويعيش عمره كله يكذب علىالناس الى حواليه كذب فى كذب
ومافيش كذب ابيض وكذب اخضر كله كذب
وتبقى حياه مقرفه بقى لها كام وش
لو كانت هى شايفه نفسها صح فعلا وعندها اقتناع بنفسها ورايها
كانت ناقشة خطيبها او ابوها واقنعته برايها بالحكمه والكلمه القويه المهذبه
انما هى هربت من المشكله اصلاااااا
وده عمررررره ما يكون كذب ابيض
وعمره ما يكون محافظه على مشاعر حد
وانما هو بس تخدير للشريك
تحياتي لكى يا جميل
اشاااااااااااااااايط ياضد
وجون وجون وجون شاطته البت ضد
اخترق المرمي
جد بقي
عارفه ياضد ان اللي بيعمل كدا اصلا بيبقي من جواه عارف انه غلط لانه لو صح عمره ماكان هيلجا لكدا مطلقا
وفي الاخر ياضد لايصح الا الصحيح
الا كام حرف ض ودال قلتهم انا دلوقتي
مش هعد بقي اصلهم شويه صغنننه سلاموز
امممممممممممممممممممموه بوسه كبيله خالث عثان انتي وحثاني موووووووووووت
أهلا يا ضد التيار انا بتفق معاك جدا ان الكذب خيانة انت بتفكريني بموضوع كنت كتبته في مدونتى بعنوان اللحظات الخفية ادعوك لقرائته انت واصدقائك
http://dalia-akkad.blogspot.com/2008/10/blog-post_26.html
تحياتي
الثقة يالها من مدلول عميق
للاسف مش بيتعرف مين اهل الثقة من عدمه الا بالتعامل
الخيانة ابشع صفة بكل الوانها
وخيانة الثقة صعب جدا ان اى حد يسامح فيها
كمان اللى بيعمل كده ويفتكر انه حفاظ على المشاعر يبقى بيضحك على نفسه
لانه لو متاكد او متاكدة انهم بيعملوا شئ صح اكيد مش هيخبوه
بوست جميل بجد
تحياتى
السلام عليكم ورحمة الله
دى اول مرة ليا فى مدونتك
وبجد الموضوع بتاعك دا عجبنى جدااااااااا
وانا معاكى مليون المية
بجد انا شوفت الحاجات دى كتير جداا وبجد فعلا بدام عوزة تعملى حاجة او لو عاوز تعمل حاجة يبقى تقنع بيها اللى امامك مش تكدب عليه وتقول انا مش بعمل حاجة غلط
لا غلط بدام خبيت وستغليت ثقته فيك فى انك تعمل اللى هو او هى مش موافقة عليه
ايه يعنى هنتخانق شوية _ ايه يعنى هيحصل خلاف بس اكون انسان واضح مع نفسى ومع الشخص اللى بيتعامل معايا
الثقة دى غالية اوى وبجد لما بتتكسر مش بسهولة ترجع تانى
ومن اهم الحاجات اللى الشخص يحافظ بيها على اللى بيحبه انه يبنى الثقة دى
مش حاجة زى دى بسببها تهد الدنيا
موضوع جميل بجد
وياريت كلنا ننتبه له سواء بنت او ولد
مع ارق تحياتى
بالتأكيد هي مش حفاظ على المشاعر بس ليها اسم تاني وهو الضعف
اللي سايف انه مش بيعمل حاجة غلط ومع ذلك بيداريها يبقى جبان وضعيف ومش قادر يقنع الطرف الثاني باحقيته في ممارسة الشيء ده
بمعنى ان لو انا بثق في حبيبتي هسمح لها تكلم اصحابها الولاد عادي وهي كمان هتسمحلي اكلم اصحابي البنات لان في ثقة متبادلة وفي كمان تفاهم وتفهم لنوع العلاقة
موضوع رائع
تحياتي
انا معاكي يا ضد
مانا لو بعمل حاجه صح
وشايفه انني مش علط فـ حاجه
يبقي هخبس ليه؟؟
انا اتعلمت
ان لما كل حاجه يبقي فيها لعبكه وتساؤلات وكدب تبقي غلط ف غلط..
بوست جميل اوي يا ضد
دمتي بكل خير وود
تحياتي
يارب ابعد عننا الخيانة دى
لان الخيانة من اصعب الحاجات اللى ممكن الانسالن يتعرضلها فى حياتو
السلام عليكم
فعلا انا متفق معكي ان الواحد عندما يخن الثقة هي اعب انواع الخيانة
خاصةعندما تخون ثقه من وثق فيك
عندك حق فعلا الصراحة اهم شىء فى اى علاقة, ودى بالنسبالى نقطة حياه او موت لان لو ثقتى اتهزت فى حد صعب جداااااااااا ترجع تانى, بس عايزة اقولك ان اللى بيطلب الصراحة لازم يبقى عندة مرونة ويتقبل الصراحة دى علشان ميخنقش الطرف التانى بردو.
شمس النهار
--------------
كلامك سليم يا شموستى
بس النوع اللى انتى اتكلمتى عليه ده مش طبيعى
وعارف انه خاين بس على الاقل هو عارف انه خاين
بس فى نوع تانى ده اللى انا بتكلم عليه اللى هو فاكر انه صح
وانه هو كده فاكر انه مش بيخون يعنى مخدر ضميره يعنى
بس فى الحالتين زى ما قلتى اللى بيخون بيخون نفسه
اكيد الضحية وقت اكتشافه الخيانة دى بيكون كسبان انه اخيرا فهم
واكتشف انه بيتخان لكن فى اوقات بيكون اكتشاف الخيانة بعد فوات الاوان
يعنى بيفضل عايش فى كدبة وقت كبير وبيفوق منها بعدين اه هو كسب نفسه انه فهم
لكن اكيد خسر حياته مع انسان خاين وكداب
نورتى ضد التيار
princess
------------
اكيد طبعا لو كدب يبقى اكيد عارف ان فيه فى تصرفه غلط
نورتى ضد التيار
joker
-----------
وعليكم السلام ورحمة الله وبركاته
هو مبروك للى سبقك D:
وان شاء الله المرة الجاية تكون اول تعليق
الحمد لله ان البوست عجبك
ومين بيحب الخيانة حتى اللى بيخون نفسه مابيحبش انه يتخان
ربنا يوفقك فى الامتحانات ان شاء الله
نورت ضد التيار
كاتب مصرى
------------
تمام يبقى احنا متفقين على ان الكلام سليم
نيجى بقى للحكاية اللى انت قلتها
فى بنات بتقفل او بتقتصر تعليقاتها على البنات وبس
علشان حبيبها طلب منها ده واحتراما ليه بتعمل ده
لكن لو هى شافت ان التعليقات عنده مقتصر تقريبا على البنات
طبيعى جدا انها تغير وتشك كمان
ومعلش احنا مدونين وعارفين كويس اوى ان بعض التعليقات بتكون اوفر شوية
وممكن الأفورة دى تكون بتجرحها
وخوفا على مشاعرها هو المفروض انه يقدر ده من نفسه ويحاول يوصل لحل وسط
ماشى معاك ان موضوع فتح الميل ده يعتبر تعدى على الحرية الشخصية
لكن هو ليه مافكرش ايه اللى وصلها انها تعمل كده او تشك فيه من الاساس
وكمان مع وجود الشك لما فتحت الايميل لقت ميل واحدة عليه
طب هو ليه ماقلهاش من الاساس طالما الموضوع عادى
اكيد طالما حست انه مخبى عليها حاجة وكمان كانت موضوع شك بينهم لازم تفهم
وتستنتج ان الموضوع مش عادى وده مش ايميل عادى
عموما ربنا يوفقه مع حبيبته الحالية
ويارب تقدر تفهم وجهة نظره وتكون فى نفس الوقت بتغير عليه وبتحبه
وارجو انه مايتعكسش الوضع وهو يعمل اللى كان معترض عليه من حبيبته الاولى
ولا يهمك عموما الموضوع للنقاش وللحاجات الفرعية بتاعته
نورت ضد التيار
نهر الحب
---------
انا معاكى طبعا ان فى ناس بتكون حابة الخيانة وبتتلذذ بيها كمان
ودول ربنا يهديهم محتاجين علاج
انما الاخطر انه يكون بيخون وهو فاكر انه صح
نورتى ضد التيار
smilyrose
-----------
معلش يا جميل ماطلعشى اول تعليق
ان شاء الله تعوضيه المرة الجاية
ولا اقولك مفيش مرة جاية هه بس
علشان ضد يا ضد دى هو انا اخلص من خيارا تيجى انتى؟
عاااااااااااااااااااااااااااااااااااااااااااااااااااااا
وانتى كمان وحشتينى وحشتينى وحشتييييييييييييييييييييييييييييييييينى
واكيد اتفق معاكى فى كل اللى قلتيه يا توتا
نورتى ضد التيار
blue-wave
-----------
أوجزت فأنجزت
نورت ضد التيار
فعلا انا معاكى فى كل اللى قلتيه وعلى فكرة دلوقتى بقت منتشرة اوى حكاية تغير الاسامى دى
احمد الشاعر
السلام عليكم
موضوعك جميل جدا ودى اول زيارة ليا انا شايفة ان الواحد مدام مش قادر يبوح بالحاجة ايللي هو بيعملها يبقى مكسوف منالناس او خايف منهم وفى الحالتين الغلط كله عليه
تحياتى ليكى
السلام عليكم
ازيك يا ضد
لو الواحد فكر قبل ما يخون انه بيخون ضميره اولا محدش هيخون حد لانه بيخانته لغيره يبقى بيجرحه وبيكسره
تحياتى لكى
دودىىىىىىىىى
إنتى هنا؟؟؟
على العموم جيت أقولك إنى موافقة على الاسم إلى أن يتم اجتماع مجلس الادارة
ههههههههههههههههههه
سلام يا قمر
ضد الحبيبه ...
خيانة الثقه اه الكلمه دى كبيره تصدقى وجواها معانى اكبر بس عارفه ساعات كتير بيبقى المجتمع والضغوط هيا اليى بتفرض وبتخلق مجال خصب لنمو ونشأة الخيانه دى
وده زى ما وضحتى فى البوست
بس انا اعرف شئ واحد ان الانسان طالما مبيعملش حاجه تغضب ربنا يعملها ويعلنها ولا يهمه شئ
وان الشخص اليى يدفعنى للكذب والتلون حتى احافظ على علاقته فاعتقد قلة معرفته احسن
ووحشتينى جدا جدا قوى يا قمر
لو في نضوج اصلا و ثقة مش حتلاقي اي من الطرفين بيعمل كدة حتلاقي الاتنين اصلا ما بيبصوش في موبيلات و ايميلات بعض
لانه بيبقى في ثقة في نظافة الشخص اللي بترتبطي بيه
لو في شك يبقى بلاش احسن
انا شايفة ان ابشع انواع الخيانة هو الغدر و مش محتاجة تفسير
السلام عليكم
بوست جميل وبيمثل جزء كبير في مجتمعنا
انا بقي هسميها خيانة ثقه
وانا اعرف ان الاثم ما حاك في صدرك وخشيت ان يطلع عليه الناس
ايه رايك بقي كمان لما يكون اقرب انسان ليك
انا عن نفسي اكره الموضوع ده جدا جدا جدا
تحياتي
انا معاكي جدا ياضد ياجميله
كلامك موزون وصح مليون الميه
وان شاء الله لما يبقي في كده وكده واخده بالك انتي ده انا هعمل عمايل طب ده بس طب يعني مش عايزه اقلك انا هعمل ايه بس طه اصل بس يووووه متخليناش نقاطع بقي
ههههه
بجد تسلم ايدك طول الواحد مش بيعمل حاجه تغضب ربنا ميخفش وميدريش
عفارم عليكي
تحياتي
الاصعب من الخيانه هو عدم الثقه لما تكونى فعلا مابتعمليش حاجه غلط وتلاقى عدم الثقه محوطاكى بسبب ومن غير سبب يبقى ساعتها بس بتحسى ان اصعب من الخيانه هو سوء الظن الموضوع جميل اوى تسلم ايدك
الموضوع حيوى فعلا
واعتقد اننى اتفق مع شمس النهار فى رأيها
ورأيك انتى كمان لو ركزتى هتلاقى ان الاثنين واحد تقريبا
لكن فى النهاية هى خياتة
وكما يقول الطوارق فى بلاد المغرب العربى
"الجحيم نفسه يشمئز من خائن الأمانة "
*************************
والله واتعلمنا نهدى النفوس
فعلا مشكلة
مش انتي طبعا
اقصد موضوع الخيانة والكذب
لاني اعتقد انهم هما الاتنين وجهين لعملة واحدة
على اي حال موضوع جامد ومتفق معاكي فيه
تحياتي
فعلا الموضوع ده مهم جدا
ومنتشر جدا جدا
وانا مش بعمل حاجه غلط اصبحت المبرر لاغلب اخطائنا
تحياتي
صديقتى
الثقة أصبحت شئ مفتقد فى عالم اليوم, طبعا بنسب مختلفة فيما بيننا, وأتصور ان بداية الخيانة الحقة فى الأفكار, فهى التى تودى الى كل ما بعدها من كذب وغش وعدم ثقة وخلافه
تحياتى
mayada
------------
أكيد الواحد لما يغلط المفروض يعترف بالغلط ده مهما كان
علشان على الاقل مايعملهوش تانى
المشكلة بقى ان الشخص اللى بيستخدم السياسة دى بيبقى مقتنع جدااااا
انه فعلا مابيعملش حاجه غلط
نورتى ضد التيار ياجميل
البت المشمشية حلوة بس شقية
-------
ههههههههههههههه
معلش ياقمر كل مرة تقعى فى الحركه دى (:
ان شاء الله المرة الجاية تكونى اول تعليق
اللهم امين
نورتى ياقمر ضد التيار
kemet
---------
عليكم السلام و رحمه الله و بركاته
كنت اتمنى انك تظهرى بعض من الزاويا اللى تقصديها
لكن انتى هنا بتقولى انها مش عقار مخدر او تحت بند التبرير
اعذرينى مش معاكى فى الكلام ده
لان مدام انا كدبت و خبيت يبقى فى حاجة غلط فى الموضوع
الكدب معروف انه فى امور معينة مستحب
غير كده اعتقد انه بيبقى غلط
ولا انت ايه رأيك ؟؟؟
نورتى ياقمر ضد التيار
Mr.Fox
------------
اولا اهلا بيك فى ضد التيار
نيجى بقى للرد
لو شوفت فى الموضوع انا بقول ان الطرف الاخر بيعطى حرية فى حدود الزمالة
يعنى خرجت من مكان العمل او الدراسة يبقى خلاص العلاقه انتهت لحد كده
فى ناس ممكن عادى عندها ان الزمالة تستمر حتى خارج نطاق العمل و الدراسة
هنا مش موضوع انعدام ثقه فى الطرف الاخر او تحكم
اكتر من انه حدود للشخص نفسه المفروض مايعديهاش
و مدام انا وافقت على الحدود دى يبقى المفروض انفذها
يااما اعترض و احاول اقنع الشخص اللى قدامى بواجهة نظرى
ولا طولت و لا حاجة المدونة و التعليقات تحت امرك (:
نورت ضدالتيار
رومانسى التفاؤل
-------
وهو ده فعلا اللى اقصده
مدام انا بعمل الصح يبقى مش ادارى
و مدام وافقت بالحدود دى يبقى المفروض ألتزم بيها
ياأما كنت رفضت من البداية و بدأت اقول وجهة نظرى
نورت ضد التيار
سووووووووووووووول
-------
انتى التعليق رقم كتير قوى (:
انتى اللى وحشانى جداااااااااااااااااااا ياقمر
معاكى طبعا ياقمر ان فعلا خيانة القدوة بتبقى صعبه
لانى للأسف الشديد جربتها
)):
ان شاء الله مش هتأخر تانى ادعى لى انتى بس (:
و الحمدلله ان الاسم تم الموافقه عليه لحد الاجتماع
نورتى ياجميل ضد التيار
حرووووووووووووووووف
-------------
يعنى انا غلطانة انى قولت تتهنوا شويه بالمدونات وبعدين يتم التفجير فيها
مااااااااااشى
بعد كده لا رحمة عندى
و كمان ضد ياضد
عاااااااااااااااااااااااااااا
ده انتى ناويه تكون المدونة بتاعك اول المدونات يابنتى
الحمدلله ان البوست عجبك ياقمر
و يارب فعلا تكونى استفدتى منه (:
ولا الاول ولا التانى (وش بيطلع لسانه)
الحمدلله الشهر عدى على خير و الحمدلله بقيت تمام
اشكرك على احساسك العالى ياقمر
نورتى ضد التيار
صبرنى يارب
----------
هروب من المشاكل و الجبن و التبرير
بيحول الشخص الى كذاب و خاين و انانى
و استحالة شخص زى ده ممكن يخاف على مشاعر حد طبعا
الصراحه هو تخدير للشريك و الضمير بتاع الشخص نفسه
نورتى ياقمر ضد التيار
خيااااااااااااااااااااااااااااااااااااارا
----------
ايه يابنتى المباراة اللى انتى فيها دى
هو انتى كده دايما لازم تعملى قلق فى كل حته
جد بقى
زى ماقولت فى ردى على شموسه
فى اشخاص فعلا بتبقى عارفة انها غلط
و فى اشخاص تانيه و هى دى اللى بتبقى مشكله انها مقتنعه انها صح
و للأسف مابتفوقش الا بعد فوات الاوان
و زى ماقولتى فعلا لا يصح الا الصحيح
ياستى مافيش مشكله من الدال و الضاد مدام مش موجودين فى الاسم بتاعى
انتى اللى وحشاااانى موت
امممممممممممممممممموة و بوسه كبيرة ليكى انتى كمان ياقمرى
نورتى ضد التيار
dalia
---------
شوفت الموضوع ده فعلا و رديت عليه
وفعلا ده نوع من انواع خيانة ثقة الاهل
نورتى ياقمر ضد التيار
موناليزا
----------
اكيد اى شخص الواحد مش بيعرف انه كويس ولا وحش
الا بالتعامل معاه
نورتى ضد التيار
لحظة تأمل
----------------
الخيانة عامه صعب جدااااااااا حد يسامح فيها
اتفق معاك طبعا فى كلامك كله
نورتى ضد التيار
muslima
------------
عليكم السلام ورحمة الله و بركاته
اهلا بيك فى اول زيارة للمدونة و يارب تكون مش الاخيرة (:
طبعا اتفق معاك جداااااا فى ردك
و يارب فعلا كلنا ننتبه للموضوع ده
نورتى ياقمر ضد التيار
أنا حر
-----------
أكيد هو ضعف لانى مش قادر اقنع اللى قدامى بواجهة نظرى
لكن اسمحلى هنا مش انعدام ثقه فى الطرف الاخر
هى خيانة ثقه الطرف الاخر
لان هنا فى ثقه فعلا متبادله لكن فى حدود للتعامل
و الطرف الاخر للأسف خرق الحدود دى تحت بند انا مابعملش حاجه غلط
نورت ضد التيار
القلم السكندرى
---------------
نورت ضد التيار بردك و زيارتك الاولى
واتمنى ماتكون الاخيرة (:
هاجر
-------------
وحشااااااااااانى
و اكيد معاك فى كلامك ياقمر
و يارب تكونى بخير
نورتى ضد التيار
انت تسأل و الكمبيوتر يجيب
------------
ان شاء الله هاجى المدونة و اشوف موضوعاتكم
نورتوا ضد التيار
son's egypt
--------
و عليكم السلام ورحمه الله و بركاته
للأسف خاينه الثقة بتبقى للنفس اولا قبل ماتكون خاينة ثقة الطرف الاخر
نورت ضد التيار
MaNoOoSh
-------------------
أكيد طبعا اللى عايز الصراحة لازم يكون هو الاول بيتقبل الصراحة دى
نورتى ضد التيار (:
أحمد الشاعر
--------------
ربنا يهدى الجميع
حمدلله على السلامة
نورت ضد التيار بعد غياب طوووووووووويل
يارب تكون بخير
بنوتة
--------
و عليكم السلام و رحمه الله و بركاته
اهلا بيك فى اول زيارة لضد التيار
اتفق معاك طبعا فى رأيك ياقمر
نورتى ضد التيار (:
أميرة الجنة
----------------
عليكم السلام و رحمة الله و بركاته
الحمدلله .. ازيك انتى ؟؟
اكيد طبعا الواحد لو فكر الاول انه بكده بيخون ضميره قبل اى حاجه تانيه
ماحدش هيخون من الاساس
نورتى ضد التيار
محاسن
-----------
اكيد معاك طبعا فى كلامك
لكن مافيش حد بيدفع حد انه يكدب و يخون
المفروض يكون فى صراحه و وضوح فى العلاقه و قبل ماوافق على اى شئ اكون الاول مقتنعه بيه
ياكده يااما ماوافقش علشان مايحصلش خاينه منى
ولا انتى ايه رأيك ياجميل ؟؟؟؟
انتى اللى وحشانى ياجميلة
و بجد بعتذر عن عدم حضورى
و ان شاء الله على ميعادنا (:
نورتى ضد التيار
leeno
-----------
اكيد معاك فى كلامك
لكن على فكرة مش شرط يكون تغيير الاسم فى الموبايل او الاميل
علشان الطرف الاخر بيبص فيهم
هو بيبقى نوع من انواع الحرص
يعنى علشان لو الموبايل رن او الاميل مفتوح و حد شافه
اتمنى اكون قدرت اوصلك وجهة النظر
و اكيد طبعا مدام فى شك فى العلاقه يبقى عدم وجوده افضل بكتير
نورت ضد التيار
زوجه
-----------
عليكم السلام و رحمه الله و بركاته
ماهو للأسف خيانة الثقه بتبقى من اقرب الناس اللى احنا بنثق فيهم
واكيد الكل بيكره الموضوع ده جدا
حتى الشخص اللى بيخون هو نفسه تلاقيه بيكره الخيانه
نورتى ضدالتيار بزيارتك الاولى (:
سمكه واحده
------------
هههههههههههههههههههههههههههههه
وحشااااااااااااانى لمضتك فى التعليقات
و ان شاء الله هيكون ياستى بدون مقاطعه
تسلمى انتى ياقمر على التعليق
نورتى ضد التيار
طوبة ذهب و طوبة فضة
-------------
خيانة الثقه و انعدام الثقه اصعب من بعض الصراحة
نورتى ياقمر ضد التيار
الازهرى
-----------
أكيد طبعا الاتنين واحد
انت كان عند شك ولا ايه ؟؟
من بعض ماعندكم يافندم (:
هو انت كنت فاكر ان انت بس ولا ايه اللى بتهدى النفوس
و كمان فين الحبر ؟؟؟
ولا بردو هتقول امتحانات و كده
لالالا كده فى غرامة تأخير على فكرة
و كده غلط على مدونتك (وش بيحذر)
نورت ضد التيار
ولد مصرررررررررررررررررررررى
--------------
ههههههههههههههههه
ما انا عارفة انه مش انا P:
نورت ضد التيار
عاشقه و غلبانه
-------------
و للأسف انه المبرر ده هو نفسه اللى بيوقعنا فى الغلط
نورتى ضد التيار
حازم سويلم
--------------
تصورك صح اكيد لان اى تصرف الانسان بيعمله بيبقى نابع من فكره
نورت ضد التيار
كلام واقعي
مفهوش غلطة
بس انا بزود عليكي حتة كل انواع الخيانة بقه
يعني انا شيفة ان كل اشكال والوان وانواع الخيانة صعبة
يمكن يكون اسهلها الخيانة اللى انتي بتتكلمي عيلها
لانها هنا مبتكنش خيانة
يهي بتكون خداع
لان الخيانة شىء والخداع شىء اني
يعني اي حد مثلا ممكن يكتب اسم زميله باسم بنت عشان لو خطيبها شافه
طيب هي هنا مررها ايه
هي خايفة انه يشوف الرقم فيتخانق معاها لانه مثلا ممكن ميكنش مقدر ان دهزميلها في الدراسة واللى اكيد هتحتاجله من ضمن الناس اللى بتحتاج لهم
بتكلمه في الحدود جدا
وبادب
هي كده كدبت
مخانتش
يهمي خدعت خطيبها وكدبت عليه
لكن مخانتوش
يعني محبتش زميلها عليه
بس في النهاية الكدب العن واضل من الخيانة عندي
يعني عارفة لو انا فرضا حد خاني مثلا
وبعدين انا عرفت وراح هو كدب عليا
هولع فيه
لكن لو فرضا الشخص ده اعترف بخطاة وقال مش هيكرره
يمكن ساعتها مرجعش معاه ذي الاول او اصلا مش هرجعله
بس علي الاقل مش هستحقره لما افتكره
يعني الكدب عندي اصعب من الخيانة
وان كان الاتنين صعبين
بس طبعا فعلا انا مش ببرر ان الانسانة اللى كدبت دي صح
لا انا من الاول المفروض اكون متفقة مع الشخص اللى امامي
هو هيرضا اني مثلا اتكلم مع زمايلي ولا لا
ولو رفض
وانا ارتضيت يبقه مينفعش ابدأ اني اخون ثقته بس مش اخونه
يعني انا في النهاية شيفة ان خيانة الثقة فعلا غير خيانة الشخص ذاته
بصي مهما كان فعلا مفيش اي مبرر للكدب
والانسان اللى ثق فيا ده لو انا محافظتش علي ثقته دي فيبقه انا انسانة غشاشة وكدابة ومخادعة
اي حد بيداري حاجة عن اي حد يبقه الموضوع فيه اينا والاينا دي اياً كان مبررها اكيد مش تمام
لان محدش بيخاف من الحاجة الصح مهما كان
وطالما الاتفاق بين الاتنين دول كان علي انها مثلا متكلمش ولاد يبقه خلاص
لازم تحترم اتفقاها
انتي عاملة ايه
اول زيارة دي بردو ليا؟
ردي اول زيارة؟
عجيبة انتي مبترديش ليه
معاكى حق فى كل كلمة قلتيها يا ضد فعلا
بس هو فى نقطة عدم اقتناع يعنى لازم يكون فى نقاش مابين الطرفين لحد ما يوصلوا لحل يرضى الطرفين مش تسلط رأى ولازم تعملى كذا وخلاص لانها لو اقتنعت عمرها ماهتعمل حاجة من وراه بس هى كدة اتحطت مابين اختيارين يا اما اقتناعها ياما حبيبها
بتعجبنى موضوعاتك جدا
فعلا ميجبهاش الا ضد
وحشيييييييينى جدا على فكرة
امممواة
تحياتى
ايمى
انا متفقه مع كلامك جدا
انا برضه مقتنعه ان اى حاجه مادامت فى الضلمه ومش قادرين نواجه اللى قدامنا تبقى غلط واحنا مخبينها عشان غلط انما لو كانت صح عمرنا مهنستخبى ولا نفضل ندى لنفسنا مبرارات عشان نعملها
تحياتى فى اول زياره ليكى
أبو سنوفة...الدراع اليمين
--------
اهلا بيك فى اول زيارة لضد التيار
بغض النظر على ان خيانة الثقه اسهل ولا اصعب انواع الخيانة
لان ده بيختلف طبعا من شخص لأخر
لكن احب اوضح شئ انا هنا بقول خيانة ثقه الطرف الاخر بالفعل مش الخيانة بمفهومها العام
اى ولد او بنت عامه يكتبوا الاسم غير النوع معاكى طبعا انه كدب و ده دافع من الخوف من مواجهه المشاكل
و اعذرينى كده يبقى عذر اقبح من ذنب
يعنى مثلا لو الطرف الاخر اللى هو واثق فيه اكتشف ده وقتها ايه المبرر ؟؟
انه خايف ليزعل و بيحافظ على المشاعر
طيب بعد ما الحقيقة تظهر هيكون كده جرح الطرف الاخر
لا و كمان اتهزت الثقة بينهم و احتمال تنعدم و توصل للانفصال
هو الكدب اكتر من الخيانه
لانه بيبقى بدايه لحاجات كتير غلط و صعبه
نورتى ضد التيار
maha zein
---------
اكيد طبعا متفقه مع وجهه نظرك
اما بقى بخصوص عامله ايه بخير الحمدلله
بس تعالى هنا
هى المدونة بتاعتك قريبة قوى كده منى ؟؟
لدرجة ان صدا الصوت بتاعى وصل لهنا كمان P:
بجد سعيدة جدااا بزيارتك ياقمر
نورتى ضد التيار
ايمي
-----------
نورتى المدونه ياقمر بعد الغياب الطوييييييييييل ده
و يارب النحس يتفك بقى و ترجعى تانى D:
طبعا معاكى ان لازم يكون فى نقاش مابين الطرفين
و بالتالى المفروض الاتنين يلتزموا بالقرار الاخير
لكن مدام انا وافقت على حاجه يبقى ماجيش فى الضلمه اكسرها ولا ايه ؟؟
انتى اللى وحشااااااااااانى جدا ياقمر
بوسه ليك انتى كمان امممممممموة
نورتى ضد التيار
roody hanem
---------------
اكيد انا كمان متفقه مع وجهه نظرك
نورتى ضد التيار بالزيارة الاولى و ارجو ماتكونش الاخيرة
اممممم
الموضوع اللي تتناواله فعلا مهم
لازم الانسان يكون واضح مع نفسه اولا
ثم مع الاخرين
ويحاول ما يكون متناقض
تقبل مروري من هنا :)
اولا انا اتفق معكي تماما ان الخيانة الفكرية اصعب انواع الخيانة
بس تعرفي انا ملاحظة ان كتير مننا عنده ازدواجية في كل حاجة ، في التصرفات والكلام
يمكن دا نتاج مجتمع وثقافة وحاجات كتير
طبعا الصدق مع الذات والاخر اساس اي علاقة ناجحة ومستمرة
احييكي ع الموضوع
تحياتي
اقصوصه
------------
طبعا الانسان لازم يكون واضح مع نفسه
بس على فكرة فى المثل اللى قولته فى الموضوع
الانسان فعلا بيكون واضح مع نفسه و مقتنع انه مابيعملش حاجه غلط
لكنه للأسف مابيكونش واضح مع الاخرين
نورتى ضد التيار
سميرة
-----------
على فكرة انتى كده متفقه مع اسامه منير
لان انا بقول ان خيانة الثقه هى الاصعب ):
اشكرك على وجهة نظرك وتعليقك ياقمر
نورتى ضد التيار
هو التاخير على المواعيد بيعتبر خيانه ههههههههههههه
اعتقد خيانه مشروعه
كان نفسى اشوفك امبارح يا قمر
بس انا كنت جايه بالنهار ههههههههههه
محااااااااااسن
لاينكن ابدأ البوست نازل و هتكلم براحتى على اللى حصل منك
و ايوة طبعا خيانة و خيانة كمان و هتعرفى ليه من البوست ان شاء الله
ايوة ايوة عارفة انا النهار اللى هو عكس نهار البشر ههههههههههههههه
بجد ياجميلة و انا كمان و الله كان نفسى اشوفك جداااا انتى و خطيبى (:
ان شاء الله اشوفك عن قرييييب ياقمر
قشطة عليييييكى بتسمعى أسامة منير زيى.أنا بعشق البرنامج ده
بس ما علينا
على فكرة كلامك صح مية فى المية فى ناس لما حد يقولها متعمليش كدة و هى شايفة إن كدة ده صح و مش فى حاجة تعمله من وراهم...مدام أنتى شايفة إن دى صح يبقى تدافعى عن اللى أنتى شايفاه و تحاولى تقنعى اللى قدامك و لو وصلتوا لسكة سد يبقى خلاص تعملى اللى غيرك شايفه و دى مش حتكون إلغاء شخصية إنما المفروض مدام انتى و الشخص ده أين كان اتفقتوا على إعطاء الثقة لبعض و أتفقتوا على حجات تانية يبقى المفروض تحرتميه فى غيابه أكتر من وجوده و كدة كدة اى حاجة بتتعمل فى الغفا لازم حتتعرف سواء النهاردة او بكرة أو السنة اللى جاية حتى....ربنا بيستر الواحد كتير لكن لو معرفش غلطه بيفضحه
اولا اولا يعنى
بجد مدونتك جامده جدااا
مش عارف دى انا مش دخلتها من زمان ازى
المهم
انتى طبعا عندك حق بس طالما ليييكى ف البرمجة اللغوية العصبية
حتعرفى اللى قدامك بيفكر ف ايه ؟؟
مش عارف وصلت ولا لا
تحياتى
أنا و دماغى
-------------
هو الصراحه برنامج جميل فعلا
لكن للأسف انا كنت بسمعه لكن دلوقتى ناااادر لما انزل حلقه ليه ):
واكيد طبعا معاكى ان الواحد المفروض يااما يدافع عن قناعته يااما مدام رضى بالاتفاق يبقى يلتزم بيه
نورتى ضد التيار
المبرمج المحترف
-------------
الحمدلله ان المدونة نالت اعجابك
و اهلا بيك فى ضد التيار
مش كل الناس ليهم فى البرمجه اللغوية
لكن الاكيد ان اى حد بيعمل حاجة مش صح اكيد بيجى يوم و يتعرف
ايوة وصلت وجهة نظرك
نورت ضد التيار بالزيارة الاولى و ارجو ماتكونش الاخيرة
إرسال تعليق