Sweet Violet's favorite quotes


"من السقوط أن يسخر المرء مواهبه العظيمة من أجل غايةتافهة ."— محمد الغزالي

الأربعاء، 25 فبراير 2009

أنا اللى جبت ده كله لنفسى 2

آآآه يانى شكلى ياجماعه لحد الشهر الغريب ده مايخلص هفضل اقول انا اللى جبت ده كله لنفسى )):

انا بجد مش عارفه ايه اللى بيحصلي الايام دى كل شئ غير طبيعى بالمرة ولا منطقى من اول التحركات اللى فى البيت لحد المدونة الغلبانة دى نفسها مروراً بالموبايل كمان .. و كله على بعضه

المهم  الحكاية وما فيها انى انا بيضرب بيا المثل .. بلاش تسرع و تقولوا ايه المشكله دى حاجه حلوة خالص جدا قوووى .. اصبروا و هتعرفوا انها حاجه وحشه جدااااااااا

امبارح كان خالى عامل حفله علشان هيسافر (ده على اساس انه هيقعد قرن مش 6شهور او سنه و هيرجع ) بس عادى ماهو كل مره بيعمل حفله لكن بتكون عائليه المرة دى كانت غير كده خالص .. بس بردو عادى ماهو الايام دى انا متوقعه اى شئ غريب

المهم فى القاعدة الكل قاعد يتكلم الغريب و القريب و الكلام جاب كلام لحد ما الكلام وصل ان الشباب بقى متسرع و طايش .. و اذا فجأة ألاقى تاتو الجميلة بتتكلم و بتضرب مثل على طيش الشباب (طبعا عرفتوا المثل كان عن مين)

انا طبعا تنحت و ازبهلت و بقول فى عقل بالى هو انتى لسه فاكره ياتاتو ده الموضوع فات من سنين .. كل ده وعااادى قولت اهو بردو تعتبر جلسة مغلقة .. لكن لقيت رولى حبيبتى بتكمل الحكاية اللى بتقولها جدتى .. و لما سألت هى عرفت ازاى .. قالت يابنتى ماهى لما كنا قاعدين فى النادى و لما بردو اتكلموا فى نفس الموضوع اضرب نفس المثل

آآآآه يامعدتى يااااانى ... يعنى الحمد لله بقيت مثل لطيش الشباب و تسرعه و نص مصر عرفت الحكاية ..طبعا عايزين تعرفوا ايه هى الحكاية علشان تشمتوا فيه زى البوست اللى فات .. هقولكم الحكاية و اهو بالمرة يبقى النص التانى عرفها و اكون مثل رسمى نظمى عبد الحكيم لطيش و تسرع الشباب

من يجى اربع سنين (اربع سنين و جدتى لسه فاكره . اللهم لا حسد) كنت مروحه البيت من بعد يوم شاااق من محاضرات لشغل و كنت خلاص هنام و انا ماشيه .. انا طبيعى لما بركب ميكروباص بركب قدام جنب السواق لوحدى بس اليوم ده الصراحة ماكنتش فايقة انى اتنك فقولت مش مشكله اركب ورا و خلاص .. ركبت و ركب جنبى واحد غريب الشكل و الملامح و الميكروباص طلع و انا سرحانة بره ألاقى فجأة ايد بتتحرك (لالالا تعالوا هنا ركزوا معايا ) ابص ألاقى الاستاذ بيحاول يمسك الشنطة و اول لما بصتله اتعدل.. قولت يابت جايز يكون كان بيجيب حاجة وخبط فيها ماهى بينى و بينه .. و كبرت دماغى

بعدها بشويه ألاقى نفس الشخص عمال بيعمل حاجه فى الكرسى اللى قدامه .. استغربت حاولت اركز و اشوف بيعمل ايه (الفضول وحشششش) ألاقى الاستاذ ماسك حاجه فى ايده و بيقطع جراب الموبايل بتاع اللى قدامه من تحت .. رحت بصه من الشباك و انا مش مستوعبه الموقف اصلا .. و طبعا لان البت شجاعة بتحبنى قوووى ظهرت فى الوقت ده

شجاعة : ايه ده !!! ده بيحاول يسرق الموبايل

انا : ايوة عارفه ... حد قالك انى فاكره انه بيلعب سلطح مثلا

شجاعة : طيب هتعملى ايه ؟؟ هتسكتى ؟؟؟!!

انا : عايزة ايه منى الساعة دى .. اعمل ايه يعنى ؟

شجاعة : ترضى حد يعمل فيكى كده ؟

انا : لا طبعا ..بس اعمل ايه انا .. اعمل زى الافلام العربى و اصرخ و اقول امسسك حرامى

شجاعة : لا بس بردو لازم تتصرفى اعملى اى حاجه

رحت بصه لايده و بصتله .. راح باصص ليا بنظره مكر و رسم ضحكه خبيثة على وشه

وفجأة لقيت اللمبة نورت فوق دماغى .. رحت بسرعة واخده منه النظرة و الابتسامة كوبى بست على طووول و رحت حاطهم على وشى و بكل هدووووء خبطت على كتف الراجل اللى بيتسرق و قولتله .. خالى بالك من الموبايل لو سمحت

لقيت انكل الحرامى راح راجع لورا و بعدها طلع حاجه من جيبه و رفعها وتناها بخفه يد غرييييبة و راح حاططها تحت التى شيرت .. و طبعا شجاعة كالعادة خلعت بعد ماتصدرت انا فى وش المدفع .. فضلت افكر اعمل ايه .. لحد ماقولت مابدهاش بقى و بصوت عالى ..انت يعنى بتخوفنى بالبتاعه اللى فى ايدك دى ولا ايه

هنا بقى الميكروباص كله اخد باله و الراجل اللى كان بيتسرق فهم انا ليه قولت كده و قال للسواق يطلع على القسم .. بس من الواضح ان السواق يااما بارد يااما كان معاه الله اعلم .. عمل نفسه عبيط لحد ما الصوت طبعا بقى عالى جداا .. لقيته و بكل برود

السواق : تعالى اركبى قدام ياابلة و خلاص

انا : هو ايه اللى خلاص .. انت شارب حاجه على المسا ..ده حرامى و بقول طلع حاجه من جيبه و حاطها تحت التى شرت

و طبعا بعد زعيق من الناس للسواق .. لقيت انكل الحرامى بيقول اقف هنا يااسطى انزل .. ووقف فعلا السواق و نزل بدون ما اى حد ينطق .. و انا طبعا سكت قولت و الله بقى مدام اللى كان بيتسرق سكت برحته يسبوه طليق يكتفه انا مالى

المهم نزل الحمد لله و فجأة ألاقى ستو الحاجه اللى قدام بتصوووووت و الشاب اللى قدامى ماسك القزاز اللى جنبى علشان يفضل مقفول و ابص ألاقى انكل الحرامى شكله كان مضايق منى مش عارفه ليه و مصمم انه يسيب علامة فيا باى طريقه .. و طبعا السواق البارد كان ماشى براحه لحد ما الناس زعقوا فيه و قالوله يسرع .. و الموضوع عدى بسلام الحمد لله و نزلت

روحت البيت متنحه و مش عارفه هو مين كان فين و ايه اللى حصل .. ماما اول لما دخلت بتسألنى و أنا و لا هنا .. و بعد مافوقت من اللى حصل قولتلها على الحكاية و طبعا كالعادة ماما وصلت على تاتو و تاتو وصلت على نص مصر الحمد لله وبقيت من يومها و انا مثل لطيش الشباب و تسرعه من غير ماانا اعرف إلا امبارح

و ادى اخرة لسانى و صداقة البت شجاعة

و اسمع اغنيه و انا كان مالى ماكنت فى حالى

و انزلوا بعدها بتتر صعبان عليا نفسى علشان هعيط اهئ اهئ

و دمتم سالمين

هناك 135 تعليقًا:

saragebaly يقول...

هههههههههههههههه
هههههههههههههههههههه

ايه دكله

بجد انتي مشكلة

Sweet Violet يقول...

هههههههههههههه

مشكله ايه بس هو انا عملت حاجه

ده انا اللى مظلومة عاااااااااااااااااااا

نورتى ياقمرايه (:

حواء يقول...

ههههههههههههههه
هههههههههههههههه
ياااااه لو كان علم عليكي
علي راي الست كنتي تحبيها زواقه ولا عياقه ولا واحده يحتار فيها الاطبه

♥..~*شـــوشـــو هـــانــم*~..♥ يقول...

ههههههههههههههههههههههههههههه
انتي تحفه عالاخر
بس شاطرة والله عجبتيني
يعني كنتي تسكتي يعني لأ طبعا
اللي انتي عملتيه هو الصح
انا لومكانك كنت هعمل كدا

ومتزعليش نفسك هما بيضربو فيكي المثل في حاجه مش وحشة اوي عاديه يعني

دي أول وآخر زيارة أصدي ومش آخر زيارة بإذن الله

تحيتي لك..

mohamed ghalia يقول...

ههههههههههههههههههههههههه
نص مصر عرفت
متقلقيش وأنا هقول للنص التانى هههههههههههههههههههههههههههههه
يا متسرعة (وش بيطلع لسانه)
ربنا يسعد أيامك والأيام الى مش عجباكى دى تعدى على خير
دمتى بكل الود

حروف يقول...

انا جيتتتتتتتتتتتتتتتتتتتتتتتتتت
ممممممممممممم ربنا ستر المرة دية بس المرة اللي جاية يااختشي خلي باللك ليكون سفاح المعادي نقل اعمالة عندكم
مممممممممممممممممم
بس ساعات ناس بتعمل نفسها مش شايفه والكل يقول خليني في نفسي
يالا ربنا حيوقف معاكي ولاد الحلال
يارب

المعتصم يقول...

بسم الله الرحمن الرحيم
السلام عليكم ورحمة الله وبركاته
سويت
تحياتى
هههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
بجد الجماعه الكبار دول قربو يجنوننا
يعنى الواحد يعمل حاجه صح يقولو عليه طايش ومتهور
واذا سكتنا نبقى جبنا وخوافين وكان المفروض اننا نتصرف
بجد انا محتار معاهم قوووووووووى
نفس الوقف ده حصل مع اخويا بس كان الحرامى بيسرق حاجه كده من ورشه جنبنا بالليل وهو جرى وراه واخد منه الحاجه دى والحرامى من لبخته وقعت منه المحفظه وابويا قعد يقوله وانت مالك افرض كان ضربك بمطوة ولا حاجه كان هيبقى ايه العمل ساعتها
انما بعد كده لما اتعرف الحرامى واتمسك ابويا طبعا وهو قاعد مع الناس كان بيتفشخر بابنه الشاطر (وفى البيت يذله)مش عارف ايه ده نعمل معاهم ايه دول
الله يكون فى عونك وعوننا يارب
بس برضة انتى لازم بعد كده تعملى حسابك ويكون معاكى سيلف دفنس شوفى ايه اللى يناسبك(مطوة/طبنجه/سنجه/بندقيه راجعى بوست محسن وعزة عندى للمعلومات التسليحيه)واحنا فى الخدمه نبعتهولك على طول
هههههههههههههههههههههههههههههههه
ربنا يعدى اليومين دول على خير
تحياتى
ودمتى بكل خير وود
والسلام عليكم ورحمة الله وبركاته

رحلتنا في الحياة يقول...

ههههههههههه ياخبر بس تعرفى ده مش تسرع ولا حاجة ده شجاعةفعلا منك وقليلة جداااااا فى اغلب الناس فى الزمن ده ومش تتنزلى عنها ومتخفيش ربنا يحفظك دايما

simply me يقول...

الحمد لله انك طلعتى سليمه

ايه الشجاعه دى بجد برافو عليكى
على الاقل انتى عملتى اللى عليكى وهما اللى سابوه يمشى

فين بقى التهور وطيش الشباب ده
لا على فكره ظلمينك

ماتخافيش لو قابلت حد من النص اللى عرف هدافع عنك ولا يهمك خالص
انت جدعه

أم فريده يقول...

طيش طيش ولا يهمك
انتى مش عملتى اللى ضميرك سمح بية

ولايهمك انتى صح اصل مش ممكن الواحد يشوف حاجة غلط ويسكت

تحياتى

غير معرف يقول...

اها لو كان علم عليكي ياختي
هههههههههههههههههه
كان ساب لك تذكار صغنن كده
يعني اي حاجه من ريحه الحبايب
هههههههههههههه
بعد الشر عليكي يامتسرعه

عاشقه وغلبانه يقول...

لا طبعا ايه وانتي مالك دي
يعني الراجل يتسرق وانتي ساكته

اللي عملتيه صح ومش تسرع ولا حاجه

اعتقد كده

غير معرف يقول...

هههههههههههههههههههههههه
طب و الله أنتى جادعة.....بس أنا لو منك كنت دبحت السواق....يابااااااااااااااى على دى ناس إيه...و الله نرفزنى أوى


و هارد لاك على الموبايل....حد يوقع موبايله من الدور التالت يا مؤمنة

kmt يقول...

لاسلام عليكم ورحمة الله وبركاته

يعني الناس الكبيرة شيفا الايجابيه
طيش
المموقف اللي عملتيه ايجابي جدا وشجاع جدا
مش طيش ابدا
لو كل الشباب طايش الطيش ده ماكناش فضلنا ع الحال العسل ده :)

تحياتي
الى اللقاء

tarek alghnam يقول...

اول مرة ادخل مدونتك
ماشاء الله عليى
بوست رغم مافيه الا انك عبرتى بخفه دم
وبعدين لو كل انسان قال انا مالى كانت الدنيا خربت
تحياتى ليكى ولمدونتك الرائعه

Ahmed يقول...

لأ لأ
طيش ايه وبتاع ايه؟
اللي انت عملتيه عين العقل
ياريت بنات مصر زيك

كان زمان شباب التحرش ماشيين يلفوا حولين نفسهم

سلميلي على البنت شجاعه وقوليلها تجمد وتدافع عن نفسها

نـــــور يقول...

مبروك تغيير الاسم
على فكره يبدو ان موبايلات العالم كله ضربت اليومين دول
انا كمان موبايلى فى الضياااع:(

معلش بقى ربنا يعوض علينا يااختشى

ghorBty يقول...

كان الله في العون

الناس اصلها ماشيه بالعكس

دا مش اسمه طيش يا بنتي دا واجب والله

لو كل حد شاف الغلط واتكلم ما كنش دا حالنا

ربنا يبارك لك

بس اللي صعبان عليا بجد الموبيل كان غلبان ومسكين ما كنش يومه دا

الحمد لله

عاشقه الرومانسيه يقول...

حلوه شجاعتك والله مش طيش ولا تسرع
بس حاسبى بعدين شجاعتك تقلب معاكى غم فى الاخر
ههههههههههههههههه
وانا عندى تتنكى وتقعدى فى كرسين لوحدك ولا انك تأذى نفسك يابنتى
الحمد لله قدر ولطف

وردشان smilyrose يقول...

بت يا ضد

ايه دا كله يانهار ابيض

ربنا معاكى

اكتر من كدا وربنا يعينك

هههههههههههههه

smilyrose

روح الحب الصادق

Unknown يقول...

انتي موقفك صح تماما علي فكره
مش طيش ولا تهور ولا أي حاجه من دي خالص
الحمدلله انها عدت علي خير

بالنسبه للموبيل معلش بقي أخد الشر وراح
ان شاء الله ربنا هيعوض عليكي بأحسن منه

Kholios يقول...

فعلاً أنت اللى جبت ده كله لنفسك يا Sweet Violet ليييييييييه بقى
من لحظة الابتسامة اللطيفة من أنكل الحرامى كان المفروض ده يكون المدخل لحضرتك و بعدها غمزة جميلة وبعدها 50 50 مع أنكل الحرامى أنت عارفة أن البلد حالها واقف و الظروف صعبة لكن للأسف أنت معرفتيش تستغلى الموقف صح. :(
حاولى تتعبى اليومين الجاييين وتركبى نفس الخط بتاع الميكروباص بس تركبى ورا وبلاش تناكة أكيد هتلاقى سبوبة حلوة.

مسدس صغير يقول...

يا سلام عليكى يا شجاعة..
ايوا يا بنتى صح كده
انا عايزك متسيبيهاش الا فى العباسية..
انقحى عليها كده كل يوم لما توديها طره..

هههههههه

هو انتى بقى اللى فتنتى عليه للراجل اللى كان قاعد أدامنا؟؟
دا انا كنت هقطعك بس حظك حلو السواق جرى بسرعة..

هههههههههه

وسلميلى على الايس كريم

maioya يقول...

هههههههههه
كويس انه مغزكيش بمطوه ولاحاجه
كنتي هتفضلي متعلمه عشان تبقي من انصار الشجاعه
:D
مش عارفه لو انا مكانك كنت هعمل ايه
بس ممكن اسيبه يلقط رزقه :lol:

romansy يقول...

عايشه يا ضد
اتارى انا عرفت وانا هنا
جتلى رساله على الموبايل
وهينزلوا كليب كمان قريب
ايه اللى بيحصلك انتى وكيارا دول
اقولك ادبحى ارنب وفرقيه
جايز يحصل جديد

موناليزا يقول...

فداكى الموبايل يا حبيبتى خد الشر وراح
اما عن تصرفك فانا مش شايفة فيه حاجة وحشة دى جدعنة مش موجودة عند ناس كتير
ربنا يحميكى

marmar يقول...

انتي جريييييييييييئه موت
بجد مكنتيش خيفا؟
انا مره وانا في مصر ركبت المترو مع خالتي فسحه كده وطلع اتنين عيال شكلهم ميكملش خمستاشر سنه بادوات غريبه حديد بقى وسلاسل شكلهم كانوا دخلين يحاربو اصلا
وراحو عند طفل صغير خدوا منوا كل اللي معاه وقطعوله قميصه كمان ونزلوه
والولد نزل يعيط
بجد المنظر ده مش هنساه حقيقي
انتي مفروض يدوكي جايزة اكبر شجاعه في الدنيا مش يضربوا بيكي المثل زي تاتو ههههههههههههههههههههه ربنا يخالهاك يارب وتضرب فيكي امثله كل شوية ههههههههههههههههههههه
تحياتي ليكي

الربان يقول...

تحياتي

و الله انا أحيي فيك هذه الشجاعة التي
رحلت عنا و لا حول ولا قوة الا بالله العلي العظيم...

الكثيرين من الرجال قد يترددوا في القيام بما قمتي به...

و غالبا السائق بيكون عارف هذا الشخص
انا لا اقصد انه مشترك معه لكن اقول انه بعرف انه من معتادي الاجرام...و من ثم يخشي السائق علي نفسه لان مثل هذا
المجرم يمكن ان يتربص به لاحقا...

ارفع لك القبعة و احييك و الحمد لله علي
سلامتك.

تحياتي و تقديري

شمس وقمر يقول...

لا بجد و الله اللى عملتيه هو اللى صح
بس تبقى خدى بالك بعد كده
مادام صديقتك الانسة شجاعة
خلى زميلك الاستاذ حرص
كده المعادلة تكمل
بالتوفيق يا قمر

thunder يقول...

هو صح بس مجاش من رجل ودا مش تفرقة اللى اقصده هما خافوا وكمان ملاحظ السواق كانه معه فاحمدى ربنا بجد انه كان فى عدد كبير فى الميكروباص وربنا يحفظك المشكلة بقة فى اللى كانوا موجودين وكانهم مش موجودين عارفة وبعد الشر عنك فى حادثة حاصلت على طريق الفيوم واحد عامل كدا بس الفرق انه كان معه سلاح ميرى المهم ربنا عدها ليكى على خير بعد كدا امشى ومعاكى ار بى جى لان النخوة فى البلد شبة معدومة تقريبا وربنا يستر

Kiara يقول...

اممممممممموه

اول تعليق بعد خروج الجهاز من المشتفسي

معلش ياقمر عمره كدا ربنا يعوضك خير باذن الله

safa7_karmooz يقول...

ههههههههههههههههههههههههههههههه

بس انتى صح على فكرة مش غلط ..

اما لموبايلك العزا بتاعه وين؟؟

lonely يقول...

عارفة وانا بقرا البوست كنت خايفة عليكى قوى وخصوصا لما طلع الحاجة اللى تحت التيشيرت
بس رد فعل الناس اللى كانوا معاكى هو اللى غريب شوية
وغريب ليه ماخلاص بقينا فى دنيا الامان فيها بيتقاس بالمسطرة

وعلى فكرة مدونتك جميله وشيك جدا :)

فشكووول يقول...

ازيك يا حلاوه
الازهرى بعتنى عندك وكنت فاهم ان فيه خناقه بينك وبين الازهرى ولقيت الحرامى عايز يسرق موبايل الراجل اللى قدامك ولقيت شجاعه صاحبتك اللى ساكنه فى ضميرك ولقيتك مفشكله خالص .. وما فيش بينك وبين الازهرى حاجه ..
خلاص جت سليمه .. تحياتى

من غير عنـــوان يقول...

مهم الواحد يتعلم من دروس الحياة

وحكاية ان نص مصر عرفت دي.. وماله
كله بثوابه
(:

أمنياتي

mahasen saber يقول...

احمدى ربنا ان الموبايل اليى وقع من التالت مش انتى يا مسطوله

كنت سايباه يتشمس ههههههههههههه
هههههههههههههههههههههههههههه

mahasen saber يقول...

تعالى هنا انتى نزلتى البوست ده امتى

تعيشى وتنزلى بوستات من ورايا

mahasen saber يقول...

وبعدين الاخ بتاع الميكروباص افهم انه كان بيتحرش بالشنطه
ههههههههههههههه

انا نازله القاهره بكره
عارفه هتنور بس هشوفك ولاا ايه

mahasen saber يقول...

واه مش هبعتلك رقمى خديه من كيارا او شموسه انما بعينك انى اديهولك

انا مبديش ارقامى لحد بيوقع موبايلاته من التالت

الازهرى يقول...

يا نهار ابيض
الحمد لله ربنا سترها

لكن تصدقى شجاعة كان معاها حق المرة دى
ولو ركزتى فى موضوعى الجديد فى ذكريات وبعيد عن القصة تلاقى هو ده السؤال

اللى انتى نسيتى تجاوبى عنه
لو حد شاف ظلم ويقدر يمنعه يقف ويتفرج والا يتحرج علشان الظالم يبطل يتمادى ويتجبر على الناس ؟

مستنى اجابتك هناك

e3lamy ah yany يقول...

ههههههههههههههه
مش عارفة ليه فى الزمن دا اكتر حكمة بسمعها عيش ندل تموت مرتاح
انا طبعا مش هقولك اللى انتى عملتيه صح ولا غلط لانك اكيد فخورة بنفسك قدام نفسك .
تعرفى انا حصلى موقف مشابه لدا بس انا اللى اتسرقت كنت بصلى فى جامع الكلية وشنطتى جمبى لان مبدأ انك تستأمنى حد على حاجة فى الزمن دا مش مضمون ومسافة ما سجدت بس قمت والله ما لقيتش الشنطة وفؤجت ان البنت اللى خدت الشنطة لمت كل الشنط اللى كانت جمب شنطتى معاها يعنى واحدة طالعة بقفة شنط محدش يسالها انتى راحة فين لقيت البنات واقفين بره الجامع كل واحدة بتقول الحقوا دا فى بنت شكلها حرامية وواخده شنط كتير يا حرام
ساعتها كان نفسى اولع فى البنات دول مش فى البنت اللى سرقت علشان البرود والسلبية اللى هما فيها دى .
وصدقينى محدش هيحس بقيمة الموقف دا الا اللى جربه وقدر يحط نفسه مكان الشخص اللى هيتسرق دا .
وطبعا مش عايزة اقولك انا اتبهدلت ازاى عشان الموضوع ده وقد ايه طلعت مهملة لدرجة انه جالى عقدة بقى اهون عليا ارجع اصلى فى البيت واطخ المشوار دا كله اهون من انى اصلى فى جامع الجامعة .
موضوعك قلب عليا المواجع بس استمتعت بيه جدا لانك اسلوبك فى السرد شيق وممتاز .
ارق تحياتى .

Soul.o0o.Whisper يقول...

سويتىىىىىىىىىىىى


ايه دا يا بنتى
هو أنتى كمان صاحبة شجاعة
طب خللى بالك بئا
عشان عاوزة ناس جامدة جامدة يعنى

هههههههههههههههههههههه

بجد موقف جامد
بس اثبتى جدارة ..فى طيش الشباب يعنى مش حاجة تانية
ههههههههههههههههههههههه




ياللا تعيشى و تاخدى غيرها
ههههههههههههههههه







خالص ودى يا قمرى

”*°•.˜”*°•..سونه..•°*”˜.•°*”˜ يقول...

السلام عليكم .
بجد انتى مشكله فى كل حاجه اسلوبك عسل
وموقفك سكر بس الشجاعه مطلوبه عادى ولا يهمك وربنا معاكى المهم تحفظى على نفسك وترجعى سليمه
وتحياتى ليكى تقبلى مرورى
سلامممم سونه .

عمرو يقول...

اٍحمدى ربنا ألف حمد و ألف شكر أن موقف حرامى الموبايل عدا على خير
طبعا أنتى عملتى الصح و المفروض يتعمل و كان لا قدر الله حصل لك حاجه كنتى حتبقى بتتحملى نتيجة اٍختيارك أنك تكونى شجاعه
الحمد لله بجد أنها عدت على خير

Tamer Nabil Moussa يقول...

تعرفى ممكن يكون السواق دة تبع الحرامى والاثنين تبع بعض ومضقضينها كدة ههههه

لاحول الله يارب

خلى بالك بعد كدة

تحياتى

arsenalwy يقول...

هههههههه

ايه الجراءة دى

احسدك على جرائتك معتقدش ان اى بنت ممكن تعمل اللى انتى عملتيه وحتى مش اى ولد

برافو عليكى

واحمدى ربنا ان موبايلك وقع مش اتقلب منك ساعتها كنتى هتضايقى اكتر

اسألى مجرب

شمس النهار يقول...

معلش فداكي

Unknown يقول...

فين طيش الشباب فى الموضوع؟؟؟؟
هو كويس لو كنتى سكتى وطنشتى وبقيتى سلبية يعنى وللا ايه؟؟؟
دة مش طيش دى انسانية

Sweet Violet يقول...

زوجه
------------
ههههههههههههه

الحمدلله فعلا ان ربنا سترها معايا

بس مش عارفه ليه بجد كان مضايق قوى كده

ده انا منعته انه يعمل حاجه غلط حتى (:

نورتى ياقمر

Sweet Violet يقول...

*shosho*
-----------
ربنا يخليكى ياقمر يارب

نورتى ياقمر باول زيارة و ان شاء الله يتم التواصل بينا

(:

Sweet Violet يقول...

محمد
------------
ههههههههههههههههههههه

لالالا ماخلاص انا قولت للنص التانى بلاش تتعب نفسك

مش عارفه ايه الناس اللى دايما شمتانه فيا دى

اشكرك على الدعوة يامحمد بجد

نورت (:

Sweet Violet يقول...

حروووووووووف
-------------
نورتى ياقمر و حمدلله على السلامة

الحمدلله فعلا ان ربنا سترها

للأسف كتير بيعملوا نفسهم دلوقتى مش شايفين الغلط عموما

وهو ده اللى دايما جايبنا لورا

نورتى ياقمرايه

Sweet Violet يقول...

المعتصم
------------
عليكم السلام و رحمه الله و بركاته

الواحد فعلا بيحتار قووووى معاهم

لكن بردو كلامهم بيبقى نابع من الخوف علينا مش اكتر

انا رحت على فكرة الموضوع و مالقتش اى سلاح ينفع نهائى ):

يااااااااااااااااارب فعلا الايام دى تعدى على خيييييييييييير

عليكم السلام و رحمه الله و بركاته

Sweet Violet يقول...

ايوشة
------------
ان شاء الله مش هتنازل عنها و ربنا يسترها بقى

نورتى ياجميل (:

Sweet Violet يقول...

Bondoka
------------

الحمدلله هلاقى حد يدافع عنى (:

نورتى ياقمر

Sweet Violet يقول...

زوجة عنيدة
-------------

اشكرك على تأييدك ليا (:

نورتى ياجميلة

Sweet Violet يقول...

mayada
-----------
هههههههههههههههههه

انا فعلا فضلت افكر بعدها ياااه لو فعلا كان حصل كده

الحمدلله ان ربنا ستر من ريحه الحبايب ((:

نورتى ياقمر

Sweet Violet يقول...

عاشقه و غلبانه
------------
هو اعتقد صح بردو من وجهه نظرى

لكن هرجع و اقول ان ده ممكن يكون نابع من خوفها عليا

نورتى ياقمر

Sweet Violet يقول...

أنا و دماغى
-----------
تخيلى بقى و انا بكتب فعلا اتنرفزت وقولت ازاى اسكت على بروده ((:

يلا بقى خيرها فى غيرها

مش انا اللى وقعته بس اهو نصيبه بقى اعمل ايه

الحمدلله

نورتى ياجميلة

Sweet Violet يقول...

kemet
-----------
عليكم السلام و رحمه الله و بركاته

هما بيقولوا طيش علشان خايفين علينا

وعلى رأيك .. بس بردو فى امل ان الحال يتغير ان شاء الله

نورتى ياقمر

Sweet Violet يقول...

tarek alghnam
------------
اشكرك على كلامك

و اكيد طبعا لو كل واحد قال انا مالى الدنيا يبقى خلاص خربت رسمى

ربنا يهدينا يارب

نورت باول زيارة (:

Sweet Violet يقول...

Eng. Ahmed Abo El-Ella
------------

معاك لكن بردو لو الاعلام و الناس بطلوا يتهموا ان البنت هى السبب

بردو الشباب كان احترم نفسه و بطل اللى بيعملوا

اما شجاعه بقى حاضر هقولها (:

Sweet Violet يقول...

habiba
----------
الله يبارك فيك ياقمر

ماتزعليش ان شاء الله موبايلك هيقوم بالسلامه (:

نورتى ياجميله

Sweet Violet يقول...

ghorbty
----------
عاااااااااااااااااااااااااااااااااا

انا فعلا صعبان عليا قوووى الموبايل لانه عزيز عليا قووووووى

يلا الحمدلله

نورتى ياقمر

Sweet Violet يقول...

عاشقه الرومانسيه
-------------

ماهو انا دايما بتنك بس للأسف بقى الواحد لما بيكون تعبان فعلا

مابيفكرش فى تناكه ..بس الحمدلله بعد الموقف ده حتى لو بموت

ابداااااااااااا لازم اركب قدام

نورتى ياقمر

Sweet Violet يقول...

smilyrose
----------
ايوة ادعى لى كده (:

نورتى ياقمر

Sweet Violet يقول...

esraa
------------
الحمدلله

نورتى ياجميل (:

Sweet Violet يقول...

Kholios
--------

لالالا انا احسن لى افضل اقول انا اللى جبت ده كله لنفسى

و الحمدلله غيرت خط السير من زماااااااااااان و مش هرجع تانى ابدااااااااااااا

نورت (:

Sweet Violet يقول...

مسدس صغير
-------------
شمااااااااااااااااااااااااااااااته شماته و باينه قوووووى كمان

ياساتر على البشر ههههههههههههههههه

ايه ده هو انت بقى اللى طلعت الشئ العجيب ده من جيبك ؟؟؟

بس عرفت تتنيه ازاى هه ..لا بجد جباااااااااااااااااار

ده كده مافيش ايس كريم خااااااااااااااااااااااااااااااالص

قول بقى لشجاعه تجبلك هى ((:

Sweet Violet يقول...

maioya
-----------
ههههههههههههه

و ترضى بردو يتسرق منك الموبايل بتاعك وحد يكون شايف ده و ساكت

تؤتؤتؤتؤتؤتؤتؤ كل ده علشان خايفه من علامه

ده حتى علشان الواحد يكون مميز عن الاخرين ((:

نورتى ياقمر

*البت المشمشية *حلوة بس شقية * يقول...

ههههههههههه
لا اله الا الله
معلشى يابنتى
بتحصل مع احسن المودنات
ولا تزعلى نفسك

المعتصم يقول...

يعنى لا المطوة ولا الطبنجه تنفع معاكى ؟؟
امال سيادتك عاوزة ايه ؟؟
قولى واحنا نوفره برضو يمكن يكون ده نوع جديد نكتسح بيه السوق ويكون لينا السبق
وهيبقالك نسبه من الارباح وعلى فكرة الحاجات دى مكسبها زى الفل
الا هو انتى عملتى ايه فى موضوع الشغل والمعلقه الخشب ؟؟
(ده سؤال برئ جدا)
ســـــــــــــلام

EMMY BABY يقول...

ههههههههههههههههههههههههه

ياعينى على الشجاعة ربنا يكرمك والله

ياريتنا كلنا طايشين

ربنا يرجعلك النمر بتاعت الموبايل بالسلامة ياختى

تحياتى

ايمى

بنوتة يقول...

هههههههههههههه
واضح ان السواق كان معاه
يا اما متعود على كده
بس برافو عليكى انك قولتى عليه
تحياتى ليكى

صباح الصباح يقول...

بجد يا بنتى

جدعة اجمد حاجة

انا مبسووووط بيكى موت

بسمة انور يقول...

ههههههههههههههههههه


ههههههههههههه

هههههههههههه


هههههههههههههههههههههههه

اية الشجاااااااااعهة دى يا بطله

لاء بجد حلوة اوى الطيش دة

Sweet Violet يقول...

رومانسى التفاؤل
------------
هههههههههههههههه ارنب

طيب انا مبحبش الارانب اعمل ايه دلوقتى

ينفع فرخه ((:

نورتنى

Sweet Violet يقول...

موناليزا
----------
اشكرك ياقمر على دعوتك ليا نورتى (:

Sweet Violet يقول...

مرمر
----------

طبعا مش هنكر انى اول لما شوفت البتاعه اللى طلعاها دى

خوفت جداااا و خصوصا انى مكنتش متوقعه و اول مره اتعرض للموقف ده

بس ماظهرتش ده ليه علشان فعلا مايتهورش عليا (:

و الحمدلله عدت على خير

نورتى ياجميل (:

Sweet Violet يقول...

الربان
----------
ماهو الخوف للأسف اللى بقى عايش فينا

هو السبب فى حالنا دلوقتى

ربنا يهدينا يارب

نورت (:

Sweet Violet يقول...

شمس و قمر
-------------
حلوة المعادلة دى بجد

بس للأسف الاستاذ حرص بينى و بينه عداوة مش عارفه ليه

مع انى ماعملتش ليه حاجه

بس اهو هحاول اصلحه علشان يرحمنى من الشجاعه شويه

نورتى (:

Sweet Violet يقول...

thunder
-------------
انت هتقولى ده اللى انا سمعته من الناس بعد ماهو نزل

بجد صعب عليا الحال بتاعنا .. الخوف بقى هو اللى مسيطر علينا

ربنا يسترها

نورت (:

Sweet Violet يقول...

كيارا
--------
حمدلله على سلامه الجهاز ياجميله (:

Sweet Violet يقول...

safa7_karmooz
--------------
فى توكيل نوكيا الدور الاول بعد الارضى (:

Sweet Violet يقول...

lonely
-----------
اشكرك على خوفك و رأيك فى المدونة

نورتى ياقمر (:

Sweet Violet يقول...

استاذ فشكول
-----------
لالالا ربنا مايجيب مابينا خناق ابدا

كل مافى الموضوع انه كان عايز يضرب مثل معين بس للأسف جبها فيا

و هى دى ضريبه الاصدقاء )):

يلا بقى ربنا يسمحه

نورتنى (:

Sweet Violet يقول...

من غير عنوان
-------------
هههههههههههههههههه فعلا كله بثوابه

نورت (:

Sweet Violet يقول...

محاااسن
-----------
الاول بجد بشكرك انك استحملتى صداعى امبارح

نيجى بقى لتعليقك

ههههههههههههههههههه لالالالا مش بيتشمس هى غلطه حركيه من دراعى

يلا الحمدلله جت سليمه
^^^^^

ماهواكيد تستغربى نزل امتى بسبب توقيتك المختلف طبعا (:
^^^^^
هههههههههههههه لالالا مين ده .. انا لا ينكن الشنطه بتاعتى يجرالها حاجه ابدا

ماخلاص بقى التوقيت بتاعك قام بالواجب و فضلت القاهره مضمله ((:

^^^^
بقى كده ماشى يامحاسن

بس انا بقى اخدته من الاميل زى ماقولتلك ((:

نورتى ياجميله

Sweet Violet يقول...

الازهرى
-------------
بغض النظر عن اللى حصل فى البوست وانك تضرب المثل بيا

انا طبعا جوبت عليك هناك

بس انا لن اتنازل عن حقى ابدا

و المصانع هتيجى يعنى هتيجى (:

Sweet Violet يقول...

e3lamy ah yany
-------------

فى الجامع ؟؟؟؟؟!!!!!

لا حول ولا قوة الا بالله

ربنا يرحمنا برحمته

نورتى ياقمر باول زيارة (:

Sweet Violet يقول...

سوووول
---------
لالالالا اخد غيرها ايه بس

حرام عليكى .. دى انتى بتحبينى حب

ماشى ماشى .. بس لما اكلمك

نورتى ياجميل بس بردو لما اكلمك علشان اعيش واخد غيرها دى

Sweet Violet يقول...

سونه
------------
عليك السلام و رحمه الله و بركاته

اشكرك ياقمر على كلامك و الدعوة الجميله دى

نورتى المدونة بزيارتك الاولى (:

المتبهدلون في الأرض يقول...

دا الدنيا بلاوييييي

بس سيبك أنت ,,,أنتي راجل(مش أقصد يعني) قصدي تصرف رجاله

وسمعني سلام ::

علم عليّ ..عالم عااااالااااااي عالم عااااااالااااااااي عالم علي لما قبلني وعلّم علالاااااااااااااي

Sweet Violet يقول...

عمرو
-----------
فعلا انا بعد الموقف و حتى لما بفتكره بقول الحمدلله

لان طبعا دول ممكن يعملوا اى حاجه

نورت (:

Sweet Violet يقول...

Tamer Nabil
------------
الحمدلله و ان الله هخلى بالى بعد كده

بس ربنا مايجيب بعد كده (:

نورت

Sweet Violet يقول...

arsenalwy
-------------
الحمدلله على كل شئ

بس بلاش حسد بقى لحسن تقلب لو حصل تانى ((:

نورت

Sweet Violet يقول...

شموستى
---------
الحمدلله (:

Sweet Violet يقول...

enjy
----------
انا معاكى انها انسانية

لكن هرجع و اقول ان لاهل اوقات بيسموها طيش و ده نابع من الخوف على الابناء

نورتى (:

Sweet Violet يقول...

البت مشمشية
--------------
ههههههههههه حاضر مش هزعل نفسى

نورتى (:

Sweet Violet يقول...

المعتصم
-------------
هههههههههههههههههههه

سؤال برئ امممممممممممم ماشى ماشى

الحمدلله المعلقه الخشب حصل صلح معاها

اما بقى الشغل الصراحه مافيش حاجه لحد الان بتقول انى هارجع تانى

بس اهو الواحد بيحاول

^^^^
اما بقى موضوع السلاح .. انت قولت ان ضرب النار كويس و البنت ممكن تمسك طبنجه

امممم نفكر فى الموضوع ده .. الصراحه عمرى مامسكتها

بس مدام انت قولت الدروس عليك يبقى خلاص موافقه طبعا

و طبعا مجانى ايوة امال ايه

لازم استخدم ضد التيار بردو ((:

منورنى دايما (:

Sweet Violet يقول...

ايمى الجميلة
--------------
هههههههههههههه لالالا الحمدلله الخط سليم

لكن للأسف الارقام كانت على الجهاز مش الخط )):

بس الحمدلله .. استرجعت شويه منها

ربنا يسهل بقى فى الباقى لحسن الواحد حاسس ان الكل افتكره دلوقتى و ارقام غريبه بقت ترن وتبعت رسايل

و مش عارفه مين اصلا )):

نورتى ياجميلة

Sweet Violet يقول...

بنوتة
--------
انا قولت كده بردو (:

نورتى ياقمر

Sweet Violet يقول...

صباح الصباح
-----------
اشكرك جدااااا

نورت (:

Sweet Violet يقول...

BAsMA
------------
ههههههههههههههههه مش بطله ولا حاجه

ده انا كنت مرعوبه جدااااااا

نورتى ياقمر (:

Sweet Violet يقول...

المتبهـدلـون فـي الأرض
-----------
دى اغنيه جديدة ولا ايه ((:

نورت

Muslima يقول...

بجد انتى جامدة جدااااااااا
برافوا عليكى بجد
دى شجاعة منك

عجبتينى حقيقىD:>


دمتى بخير

أسير الجراح يقول...

مش عارف اكتب عن البوست


ولا اكتب عن جمال المدونة


بجد مش عارف

بس بجد روعة


اسير الجراح

فتــافيت (رحاب الخضري) يقول...

ههههههههههههههههههههه
هههههههههههههههههههههههههههه
هههههههههههههههههههههههههههههه
هههههههههههههههههههههههههههههههههه
بس كفايا بقى ضحك
شجاعة ديه اخر حاجة.. خليكي ماشية وراها دايما
ديه بت عسسسسسسسسسسسل

mostafa rayan يقول...

لاء طبعا انتي مش غلطانةاللي انتي عملتيه دةهو الصح اللي كان
لازم يتعمل لو كلنا سكتنا على الغلط هينتشر وهيبقي هوالصح
لازم نبطل سلبية ونعرف نوفف الحرامي عند حده لوانتو كلكو كنتو اتوحدتو على الحرامي دةوصممتو تروحوالقسم كان هيتعلم مايحطش ايده تاني في جيوب الناس
لك كل التحية والود

mahasen saber يقول...

عملتى ايه معرفتش اكلمك لانى

هقولك فى التليفون سلام يا قمر

ألـــــــوان الحيــــــــاة يقول...

ايه الشجااااعه دى يا شجاعة

بجد جباره

بس ابقى خلى بالك بعد كده احسن حد يحب يسيبلك تذكار فى وشك

انا جايالك اهو فى اول يوم فى الشهر الجديد ان شاء الله يكون احسن من الشهر اللى فات

elsha3er يقول...

لا طبعا دة مش طيش انتى عملتى اللى يرضى ضمير اى حد ويرضى ربك الساكت عن الحق شيطان اخرص


انا لو مكانك حقول وانا مالى اة والله يعنى لو ضربنى بالمطوة فى وشى حستفاد اية

بس انتى كدة عملتى الصح

ههههههههههه

تحياتى

احمد الشاعر

basma saghir يقول...

اقولك الحق
انتي شجاعة بجد..انا لو مكانك مكنتش اتحركت من مكاني ده انا كان ممكن اقول للسواق ينزلني انا بدل ما اتسرق ولا الحرامي ده يغزني بحاجة :(

لألألأ فعلا فعلا احيكي على شجاعتك

kmt يقول...

السلام عليكم ورحمة الله وبركاته

شكــــــــــــــــرا
انا بخير الحمد لله
بجد شكرا

تحياتي
الى اللقاء

¤¦¤Ebtehal ¤¦¤ يقول...

ههههههههههه

والله انا لو مكانك يا فيوليت

كنت مت و اتشليت و جالي رعب اذلي و عمري ماكنت هعرف اقف علي رجلي تاني

O_o

بجد دي حاجه كويسه انك خليتي الراجل ياخد باله..

بس بلاش تعمليها تاني لحسن-بعد الشر- تروحي فيها..

:D

كوارث يقول...

هههههههههههههههههههههههههههه
الموضوع تحفة
طيش شباب فعلا
بالنسبة لموضوع الطيش ده فانا مش معاه خالص
رغم ان فيه شباب عايزين الولعة بس ده لا يمنع ان اللي محرك المجتمع دلوقتي والعالم كله الشباب وكداب اللي يقول غير كدا !
يمكن عشان التكنولوجيا دي اتولدت معانا او عشان اي سبب تاني بس ده الواقع
بالنسبة لموضوع الحرامي ..
فكتر خيرك ..
والبقاء لله ..
اللي اختشوا ماتوا ..

mohamed ghalia يقول...

إنتى جيتى حفلة توقيع الكتاب ولا لا
؟

يــوم جــديد يقول...

المشكلة كلها في شجاعة اللي بتخلع ساعة الجد دي وولا بيجرى لها أي حاجة
ما تبقيش تسمعي كلامها يا بنتي مدونتك محتاجاكي :)

Sweet Violet يقول...

Muslima
------
اشكرك ياقمر على رأيك و زيارتك

(:

Sweet Violet يقول...

أسير الجراح
------------
أشكرك على رأيك فى المدونة

نورت (:

Sweet Violet يقول...

فتافيت
----------
هههههههههههه كله ده ضحك

حاضر همشى وراها بس ربنا يستر و مايبقاش الاخر سد ((:

Sweet Violet يقول...

mostafa rayan
------------
معاك طبعا لو فعلا كلنا عرفنا نوقف كل حرامى او ظالم عند حده

كانت حاجات كتير قوووى اتغيرت فى البلد دى اصلا

نورتنى (:

Sweet Violet يقول...

محاااااااااااسن الجميلة
------------
وحشانى على فكرة

طبعا كان ليك عذرك ياقمر

ولايهمك ياجميلة

Sweet Violet يقول...

roody
-------
هههههههههه يارب فعلا يكون احسن من الشهر اللى فات

انا الصراحه متفائله خيييير

نورتى (:

Sweet Violet يقول...

احمد الشاعر
-------------

اشكرك على التأييد

بس على فكرة ربنا فى الوقت ده صدقنى بيكون حفظك لان انت بتتكلم فى الحق و بتمنع حاجه غلط

نورت (:

Sweet Violet يقول...

بسمة
----------
لالا ياقمر اتشجعى كده و خليها على ربنا

و صدقينى هيقف جنبك مدام انتى بتمنعى شئ غلط

نورتى (:

Sweet Violet يقول...

kemet
--------
و عليكم السلام و رحمه الله و بركاته

لا شكر على واجب ياجميله

و الحمدلله انك بخير

(:

Sweet Violet يقول...

ثلوج
--------
ههههههههههههه المره الجايه ان شاء الله هبقى اخد بالى و افكر اعمل حاجه مش تضر

لكن بجد ماقدرش اشوف غلط و اسكت .. ده انا كده ممكن اروح فيها اصلا

نورتى ياقمر (:

Sweet Violet يقول...

كوارث
---------
اشكرك على زيارتك

بس الصراحه انا مافهمتش ايه علاقه التكنولوجيا و ان فى شباب عايزة الولعه و موضوع طيش الشباب

مش فاهمه الصراحه

بس عموما نورتنى (:

Sweet Violet يقول...

محمد
---------
ايوة كنت موجوده

بس بقى لانى بجد زعلت جداااا انى ماشفتكش انت ولا ايمى ولا ازهرى

يلا حصل خير

بس بردو لما اشوف عمرو و كيارا ليهم حساب معايا كبير

Sweet Violet يقول...

يوم جديد
----------
هههههههههه لالالا بس هى اوقات بيبقى عندها حق الصراحه

لازم اسمع الكلام وقتها

نورتى (:

الدرعمي يقول...

على فكرة أول مرة أزورك وأسلوبك في الكتابة مبهر أما عن الحرامي فيستحسن إنك متعمليش كدة وانتي لوحدك لأنه ممكن يؤذيكي بما لا تحمد عقباه وأماعن طيش الشباب فضروري لأن فينا النشاط والحيوية ودمنا لسة مولع بالشباب قبل ما نعجز وتعجز عقولنا معانا وأما عن شجاعة فجميل جدا جدا جدا أن يكون لك أصدقاء من نفسك ; اللي مصاحب نفسه أحسن من اللي معاديها ومكتفي بصداقة الآخرين @ في النهاية تقبلي تحياتي وإعجابي بما تكتبين @

مامة مازن يقول...

هههههههههههههههههههههههههههه
دا كان ممكن يغنيلك ماشى وسايبلك علامه ف حياتك
سلامى ليكى يا شجاعة يا عسل

Sweet Violet يقول...

الدرعمى
------------
نورت باول زيارة ليك

واشكرك على كلامك

اما بخصوص انى مش اعملها تانى ماهو انا فعلا اخدت الدرس خلاص

و اكيد طبعا جميل ان الانسان يكون مصاحب نفسه

لانها دايما بتكون خير صديق

نورت (:

Sweet Violet يقول...

مامة مازن
-----------
هههههههههههههههههههههه

الحمدلله ان ربنا ستر

نورتى بجد ياماما المدونة بزيارتك الجميلة و الخفيفة (: