أنا مع ثقافة المرأة وتحررها على ألاّ تكون زوجتي
مقولة سمعتها فى برنامج و كان النقاش فى الحلقة عن عايزها مثقفة محدودة الجمال ولا جميلة محدودة (او عديمة) الثقافة
فكان رد كاتب صحفى مشهور : جميلة طبعا لان من وجهة نظره ان المرأة المثقفة مفتقدة للأنوثة و كان مقياسه مثقفات "وسط البلد" اللى دايما تحس انهم زى الرجال
وقال بالنص : مافيش اى معالم للأنوثة عليهم عاملين شعرهم ديل حصان و لابسين البنطلون الجينز و التى شرت "ده على اساس ان مافيش مثقفة محجبة" و غير كل ده مابيحطوش مكياج .. وأنا الصراحة ماحبش مراتى ماتحطش ماكياج !!!!!
و كان رد لاعب كرة مشهور : المهم عندى الجمال ... مثقفة او لا ده ليها هى !!
و كان رد دكتور : جميلة بردو .. اصل الثقافة مابتجبش عيال ؟!!!!!
و رد صحفى شهير "من جيل الزمن الجميل" : الجميلة .. لان ماينفعش يروح مثلا من الشغل يلاقيها فاتحة على برنامج ثقافى او مثلا الاخبار هو داخل البيت يرتاح من تعب الشغل و النقاشات طول اليوم مايبقاش بره و جوه !!!!!
تعددت الدوافع و الاجابة واحدة "المرأة الجميلة" هى الزوجة اما "المثقفة" فهى زميلة فقط لا غير !!!
السؤال بقى
ايه رأيكم فى الاراء اللى ذكرتها فوق دى ؟؟
و هل فعلا المرأة المثقفة بتظهر مناطق ضعف الرجل الشرقى "المحب للسيطرة بالفطرة ^_^" علشان كده بيتجنبها ؟؟
وسؤال خاص للمدونين الرجاله
عايزها مثقفة محدودة الجمال ولا جميلة محدودة (او عديمة) الثقافة؟ مع ذكر الاسباب هه ؟
و دمتم سالمين
* فى البوست ده هشيل المودريشين علشان النقاش .. بس مش عايزة خناق و دم انا بقول اهو انا لسه مبيضة المدونة
هناك 127 تعليقًا:
احجزززززززز
اول تعليق فى المدونه دى ياعالم
مره من نفسىىىى
هاروح اشوف وارجع
يارررررربى عليكى يا دودو
لحقتى
ههههههههههه
طب التانى بقى
هه
عاشقة الرومانسيه
---------
مبروووووووووك
ليك هدية على اول تعليق ^_^
حاجات جوايا
--------
هههههههههه معلش ياسالى
الكيبورد بتاعها ماشاء الله ^_^
مبروك التانى
و انا عند كلامى اى حاجة ماليش دعوة .. ماشى
^_^
و كان رد دكتور : جميلة بردو .. اصل الثقافة مابتجبش عيال ؟!!!!!
***********************************
ولا الجمال وحياتك
اهم حاجه حضرتك
علشان انت اللى هتجيب عيال
يعنى ولا ثقافه ولا جمال
رأيه استفذنى جداااااااااا
ماهى المثقفه هاتربى عيالك كويس ياغبى وتعرف تساعدهم علشان يكونوا شئ كويس فى المجتمع
هى عقده سى السيد دى مش هتروح مننا ابدااااااا
انا اتنرفزت
عايزه حد اعضه هه بقى
انا مستغربة جدا الاراء دى
دى ميقولهاش شاب فى مرحلة المراهقة
مش حد المفروض انه كبير وعاقل ومشهور وقدوة لفئة كبيرة جدا من الشباب
ما اعتقدش ان الرجل .. بمعنى الرجل الصح يعنى .. ممكن يفكر التفكير ده
الثقافة بتنطبع على فكر الزوجة وطريقة معاملتها لزوجها وتفهمها له وتربية ابنائها
يعنى مهمة جدا جدا جدا
الجمال طبعا مهم لسهولة التواصل الروحى واختراق القلوب
لكن الفكر والثقافة لا يقل عنه اهمية ابدا
ده غير ان الجمال له سن محدد ويزول
ويبقى العقل والفكر
ربنا يهديهم
طب شوفتى عمرو اديب امبارح والموضوع اللى كان طارحه ورايه فيه ؟؟؟؟
تقبل ان مراتك تكون نائب فى البرلمان واقوى منك ؟؟؟؟
مش هقول بقى المداخلات قالت ايه
الرجل اللى يرفض مراته تكون مثقة هيقبل يعنى تكون نائب فى البرلمان
هههههه
رجالة معندهاش ثقة فى نفسها
سيبووووووووووووووووووووووووووني عليهم يا جماعة محدش يحوشني
مجتمع المسكفين دة بلا قافيىة مجتمع بلاليني
انا متربية جوة المجتمع ده طول عمري
هم ناس بتوع كلام جميل جداااااااااااااااااا
انما جوة بيوتهم زي ما قالوا بالظبط فى البرنامج
انا مش زعلانة من انهم بيقولوا الحقيقة
بس عايزة اقولهم ان تفكيركم وتربيتكم هي السبب في ضياع الجيل الحالي واللي قبله
اصل المثقف منهم بيقعد يستني وحى الافكار وبينسى يربي عياله.. وحتى لو كان من بتوع الديموكراتية فهو بيستسهل الموضوع ده علشان ميربيش ويبقى ضميره مستريح فى نفس الوقت
وحتى المودام اللي بيختارها جميلة.. اول ما جمالها يقل شوية.. النكد والتبويز الازلي يبان فى خلقة البيه ليل نهار.
كفاية كده لحسن اتهور عليهم اكتر من كده
عارفه اولا انا مش مقتنع ان المثقفه هى الى بتلبس جينز وتيشرت وسايبه شعرها
ولا ان الجمال بيكون جمال الشكل والميكياج
اظن انى لما هختار هختار مثقفه ومش هيهمنى غير حاجه واحده طريقه تفكيرها نظرا لاننا هنكون واحد يعنى مينفعش انا اخد قرار من غير ما هاخد رايها ومش هينفع
اتجوز ( ده لو حصل ) واحده تقعد معجبه بنفسها وخلاص لا طبعا
والشكل مش كل حاجه
ــــــــــــــــــــــــــــــــــــ
انتى فين بقى كل دى غيبه
على فكرة كل الرجالة بتفكر كده واللى يقول غير كده بيكدب اه بجد وفكرى وشوفى حواليكى هل فعلا الشخصيات اللى عاملة نفسها مثقفة ومتحررة ترضى ترتبط بشخصية مثقفة زيها وليها شخصية مستقلة انتى قولتيها بيخافوا تكشف نقاط الضعف فيهم
هو بس اللى بيفهم هو بس اللى يفكر وهو بس اللى ليه الحق انه يكون ليه شخصية مستقلة
ومش بلوم الرجل انه يفكر فى الشكل ويسيب الجوهر ده حرية شخصية ليه واحنا كمان لينا حريتنا شخصية اننا مش هنتنازل عن الشخصيات اللى بالنا يعنى الست كمان من حقها تنقى وتختار وتقول ده يعجبنى وده لا ده شكله وحش وده زى القمر وده اصل دماغه هتتضرب من كتر الافكار انا عايزة واحد سطحى ومش بيفهم غير فى الحب والرومانسية والكلام الفارغ ويكون شاب روش طحن يعنى
طبعا الكلام ده اقصد بيه انك مش هنلومك على اختياراتك وكمان مش تلموا البنات على اختياراتها لما تسيب الشخصيات الكويسة من الشباب وتفكر ترتبط بشخص اى كلام كل واحد يقول يلا نفسى هههههههههه
اقولك بلا جواز بلا نيلة
سؤال غبى اللى البرنامج مصدره للناس ده مفيش نماذج بالجمود اللى السؤال طرحه بالشكل ده او بمعنى أصح
فى درجات
يا حلوة و سطحية يا اما مثقفة و متواضعة الجمال !
ده غباء
بالنسبة لى :
حلوة و ذكية و شخصيتها قوية
السلام عليكم
حلو البوست بجد
والموضوع المطورح جميل ولذيذ
والتعليقات بتاعت البنات والستات ممتازة
بس اسمحو لى اقول نقطة صغيرة
هل كل الرجال بنفس التفكير كما قال الكثير من المعلقات على الموضوع
هل الرجل بنظركم بهذه السطحية
ام ان هناك خلل ما ؟؟؟؟؟
للمعلومية
الرجل الحقيقي الواثق بنفسه بيسعى ان تكون زوجته وام اولاده باعلى المناصب
ومش مجرد الموافقة الكلامية بالعكس
بيساعدها فى تحقيق حلمها وفرض افكارها على المجتمع
لكن السؤال وبدون زعل ؟
** من هى المرأة التى تحاول الوصول لهذه الدرجة العلمية والفكرية
** من هى المرأة ذات الحرية القافية والثبات الدينى والتمسك بالقيم
هاكمل التعليق بس مضطر اخرج من المكتب الان
تحياتى وانتظرونى
ازيك يا قمر
زى ماقولتلك قبل كدة
فى ناس مش فاهمة ان الجمال مش فى الشكل
الجمال جمال الروح والشخصية
لان جمال الشكل زايل
فى مقولة بتقول ( اذا أردتم تعريفا للجمال فاسألوا العميان)
لان الجمال مش جمال الوجه
جمال الوجه دة نمرة اتنين بالنسبة لجمال البنت
وبعدين هو مفيش غير مثقفة محدودة الجمال أو جميلة محدودة الثقافة ؟؟؟؟؟
مينفعش تكون مثقفة وجميله
أقله تربى العيال كويس بدل متربيهم على الجهل والتخلف
وفى نفس الوقت تكون جميله تسر ناظريه
الرجالة عقولها باظت
تحياتى
اولا : التعليق عندك صعب اوي ياسويت
لازم اكتب بره التعليق وبعدين اخده كوبي عنك
المربع عندك مش بيكتب عربي
ياريت تغيري نظام التعليق يبقي في صفحه مستقله
ثانيا : ندخل بقي في موضوع البوست
فعلا الرجاله مش بتحب الست المثقفه وده لكذا سبب
اولا : لو انها مثقفه فهيبقي جزء من اهتمامتها الكتب والقرأه
وده هيأثر طبعا علي وقتها في انها تتزوق وتتعطر للبيه
مهي اصل الست دلوقتي بقت مجرد عروسه مولد للزوج
لازم تكون جميله وتحط روووووج بطعم الفروله
ههههههههههههههههه
حاجه تعل بجد
السبب التاني :
ان الراجل لو الست مثقفه مش هيعرف يقلل من قيمتها
او يقولها انتي مش بتفهمي حاجه
لانه متأكد انها مثقفه اكتر منه
وهنا هيبان اوي انه مريض ومحتاج يتعالج
علشان كده من الاول بيقول ابعد عن الشر وغنيله
ثالثا واخيرا: ان الراجل مش بيحبها مثقفه علشان متجدلوش ويعيش في دور سي السيد
كل اللي فات ده للرجاله المريضه ومحتاجه علاج وما اكثرهم في زمان ده
اما لو راجل عاقل وموزون وعارف انه راجل وسيد الرجاله كمان
ثقافة الزوجه عمرها مهتكون عائق وانما هتكون سبب اختيار الزوجه
لانها هتكون وعيه ازي تربي ولادها وازي تتعامل مع زوجها صح
ويعيشوا حياتهم صح
تحياتي
صبااااااااح الخيييييير
ايه الخناقه اللي علي الصبح دي
يفتاح ياعليم يارزاق ياكريم
استعنا علي الشقاء بالله
يعني الرجاله بتوع الفضئيات دول مش عايزين يهمدوا
طب ده سؤال خبيث جدا
يعني عايزين يقولوا ان الست الوحشه بتعمل مثقفه وهاله حوالين نفسها بتعوض انها وحشه عشان تلفت النظر يعني
ماالست الوحشه خبراء التجميل الحقيقه مش مقصريين معاهم خالص
هي بس تختار من الكتالوج
وبعدين
ده قصر ديل من الرجاله هو عايز واحده يستعرض عليها عضلاته
وواحده جميله يتباها بيها
الرجل الصح اللي بيحب يكون معاه روح جميله في البيت
تتكلم معاه ويونسوا بعض تكون هناك لغة مشتركه بينهم
مش يقول لها شوفتي الاوسكار تقول له اه ده السوبر ماركوا اللي في مصر الجديده
وبعدين مافيش ست وحشه ايه الكلمه الغريبه دي
الست روح وحنان وعطاء وتفاني
يافرحتي يتزوج تمثال في البيت
طيب لما الست تكبر والجمال يروح وهو يكبر هيعملوا ايه
وقت ان كبر الابناء وطلع علي المعاش هيقعدوا يعملوا ايه
مش هيلاقي حد حتي يقدر يتبادل معاه اي حوار
وبعدين مين اللي قال ان لازم المثقفه تبقا مش جميله
ماشاء الله بنوتاتي هنا في البلوجر ادب وجمال وثقافه
ربنا يحميهم
للأسف سطحنا كل حاجه في حياتنا حتي الثقافه عند المراه
نداء اختي المثقفه الغير محجبه وريهم انك تقدري تكوني شيك ومثقفه في نفس الوقت
اختي المثقفه المحجبه ياريت شرحه
طب عارفين الست الجميله جدا الغير مثقه اللي بيقولوا عليها دي هي من اذكا النساء عشان متجوزه راجل مغرور ومعقد ومستحملاه
ماهو لو مش مغرور ومعقد ماكنش دور علي واحده جميله دماغها فاضي
اصلا مافيش ست دماغها فاضي
عقل المراه يعمل ليل نهار
وبعدين جميله مش مثقفه مش
بس انتوا اقدروا علي الجواز ومسؤلياته الكبيره
اي خدمه ياشيكو:)
السلام عليكم
حبيبتى وحشتنى قووى
بجد مواضيعك جميلة قووى
وبالذات الموضوع ده
بجد اتنرفزت قووى من راى الشاب ده
الجمال جمال الروح
اهم حاجه الاخلاق والانسانه اللى تدر تكمل معاه الحياة
ياريت الرجاله تفهم صح وبلاش يبصوا ليها من جانب تانى
تحياتى ليكى
ايناس
الراجل المصري خصوصا مابيحبش ان مراته تكون أذكي أو أكثر ثقافه منه
وعمر الشعر المنكوش ماكان مقياس للثقافه
واكيد لما هيرجع البيت مش هيلاقيها بتتفرج علي برنامج سياسي
أصل البرنامج مش ظابط نفسه علي ميعاد رجعوعه البيت يعني
دي كلها مبررات غير واقعيه لأنهم بيخافوا انها تكون اذكي منهم او اكثر ثقافه
اولا وقبل ما اقول رايي في اي حاجة عايز اقول حاجة مهمة قوي
اسوأ حاجة في الدنيا اننا نطلق احكام عامة
يعني ماينفعش نقول الراجل المصري كذا وكذا والراجل العربي كذا والراجل الاوربي كذا والست المصرية مش عارف ايه
كل مكان فيه ناس كدة وناس كدة
ده حتي الشخص الواحد بيتغير رايه ومعتقداته من وقت للتاني ومن ظروف للتانية
ده اولا
ثانيا مش معني ان واحد شايف انه يهمه اكتر الست الجميلة فهو بكدة يبقي غلطان
لان دي اولويات
كل واحد بياخد اللي يناسبه اكتر ويقدر يكمل معاه حياته
مش معني اني انا بحب الست المثقفة اكتر فده معناه ان اللي يحب الجميلة يبقي غلطان
مش علشان انا بحب الملوخية يبقي كل اللي بيحبوا الكوسة وحشين
ثالثا بقي الناس اللي بيقولوا ان كل الرجالة المصريين كدة واللي بيقول غير كدة يبقي بيكدب
طيب ماتيجي نقلب الموضوع ونقلب السؤال
ونقول
البنت الصرية او العربية تحب ترتبط براجل مثقف وواعي ومخه كبير ومش لاقي ياكل ولا شوال مليان فلوس ؟؟؟؟
طبعا هاتلاقي الرجالة بس هم اللي بيردوا وبيقولوا البنات كلهم بيحبوا الفلوس ولو حد قال غير كدة تبقي بتكدب
الفكرة مش في الراي انما كلنا دايما بنصادر علي اراء غيرنا
ياريت ياجماعه كل واحد يقول رايه هو ومايخمنش اراء الناس التانيين
كل واحد مسئول عن رايه وفكره هو وبس
انا كل ده ماقلتش رايي لسة
بس عامة رايي اني لا فارقة معايا مثقفة ولا جميلة ولا اي حاجة من دي
انا اللي يهمني اني اكون بحبها وهي بتحبني وتكون طيبة وقلبها كبير
والباقي ده كله انا قادر اخليها تتعلمه وهي معايا
والثقافة عمرها ماكانت شوية معلومات بنحشي بيها عقلنا
الثقافة اسلوب حياه
يعني لما تكون انسانة قلبها كبير وبتحبني اكيد هاتعمل اي حاجة علشان تسعدني
والجمال عمره ماكان شويةميكب اب
ولا كان جمال الشكل وبس
يالله معلش طولت عليكم
بس بجد ياضد ياضد ياضد ياضد ياضد ياضد ياضد ياضد ياضد
موضوع رائع فعلا ويستاهل النقاش
لانه بيأرق ناس كتير
تحياتي
مكدبش عليكي انا جربت الاتنين
ولقيت انها تكون جميلة افضل وهقولك السبب
الجميلة كانت ثقافتها قليلة وانا قدرت ازود ثقافتها واخليها جميلة ومثقفة
بس على فكرة مثقفات وسط البلد دول ناس فعلا مسترجلة هما عايشين في المود ده يعني دي مش قاعده ان البنت المثقفة تكون مسترجلة
في مثقفات زي القمر واكيد صحبت المدونة واحدة منهم
;)
ده لزوم التثبيت يعني
:)
تحياتي
بجد الله ينور
تقبلي مروري
كل واحد ليه وجهة نظره
انا بقى عايزها مثقفة جدا جدا
وعايزها جميلة جدا جدا
ساعة منتكلم فى اى موضوع جمالها هيكمن فى ثقافتها
وساعة مرجع تعبان من الشغل جمالها يكمن فى جمالها
بس كده انا مش طماع
هي دي النقاشات ولا بلاش يا جمااعة
فعلا حللتيها واظهرتي سببها لافتقار الرجالة وخاصة الشرقين اهم صفة فيهم وبيحبوها السيطرة على الوضع
يا بختك بالي قالتلك حااضر وجابتلك عيال
بلا ثقافة او جماال...كائنات لزجة حلزونية غريبة
السلام عليكم ورحمة الله وبركاته
ههههههههههه
طب ليه مش بيسألوا البنات عايزها شبه مهند ولا توم كروز ولا السقا واحمد عز
ولا يكون زي شبه عمرو موسي او احمد زويل
اشمعنى هما يدوروا ع الجمال فينا واحنا مطالبين اننا نقبلهم زي ماهما
اعتقد ان البوست ده المفروض ان الساده الرجال هما اللي يردوا عليه
D:
تحياتي
الى اللقاء
مممم موضوع مهم
طب انا عاوزهم الاتنين ...ينفع ؟؟؟..زطب اشترى منين ...هايبر عنده؟؟ :D
بصى فيه ناس بتقول لو مثقفه يعنى هتبقى فاهمة يعنى ممكن تتقلب عليا فى يوم ولا نقاش ...والرجالة مبتحبش تخسر ابدا :D
وفيه ناس فعلا بيفضلوا الجميلة عشان يزودوا ثقافتها ويعلموها اكتر وهيتحكموا اكتر من التانية
بس اصلا اى علاقة بتبقى تبادل..
منا مش هتجوز واحده اتفرج عليها وبس او تخدمنى...لما نحب نرغى هنرغى فى الطبيخ بس ومين من صحباتها اشترى ايه....ولا لازم يكون فيه موضوع حتى ازمة البوتجازات فى ارض الكبريت؟؟؟
لازم يبقى فيه نقاش والا انا متجوز خدامة..:)
وعلى فكرة بقى ..
موجود كتييير بنات حلوييين جدا ومثقفين
خلى الناس تبعد عن وسط البلد والبورصة وهما يلاقوا :D
اهلا بالقمر مودنتك راااااااااااائعه يا جميل لك خالص تحياتى
حنين
السلام عليكم
قال صلى الله عليه وسلم: فيما معناه
(تنكح المرأة لأربع
لمالها
ولحسبها
ولجمالها
ولدينها
فاظفر بذات الدين تربت يداك).
وقال ايضا :
من تزوج امرأة لمالها ما زاده الله إلا فقراً
ومن تزوج امرأة لحسبها ما زاده الله إلا ذلاً
ومن تزوج امرأة لجمالها ما زاده الله إلا قبحاً
الكلام ده هو خلاصة الموضوع كله
احنا اللى بنلف وندرو حوالين بعض
هى دى معايير الاختيار اللى المفروض نختار على اساسها
وعشان احنا بعيد عن ربنا وعمالين نختار على اسس تانية
كانت النتيجة ان 40% من حالات الزواج اللى تمت خلال الـ 3 سنين اللى فاتوا انتهت بالطلاق
وان فى عام 2008 فى حاله طلاق بتحصل كل دقيقة ونص فى مصر
احنا بنختار غلط فبتبقى النتيجة غلط
سلالالالالالالالالالالالالالالالالالالالالالام
الرجاله كلها مبتستحملش تعيش مع ست فاهمه ومثقفه عنهم كده هيحسوا بالخجل من نفسهم
واكتر مثال بيحبوه هو مثال ست امنه وسي السيد والي يقول غير كده من الرجاله يبقي سورري اسمحيلي بيكدب
من انسان المفروض انه قدوة قال بالحرف
كان في الحلقة اللي بعدك
هو الفلسفه بتجيب عيال
ال يعني هو الجمال بيجيب عيال
بصراحه استحقرته اوي
كلام الحلقة خلاني اكتب
انا انسانة
اه انسانه
انت موش شيفني انسانه ليه
بحس وبشعر وبتكلم وبغلط وبفهم وبحب وبكره
زيك تمام
ليه اللي بيحركك ليا جسمي
ليه موش عقلي
ليه موش قلبي
ليه موش تفكيري
ليه اختارت جسمي
ليه استخدمت الحب وسيلة عشان توصله
ليه فاكر القرب مني وسيلة ليه
ليه انت زي الحيوان اللي بيشمشم علي فريسته
وبيدور علي اي طريقه ياكلها بيها
انا موش حيوانه
انا لحم ودم وعقل وروح
لو موش شايفني انسانه
تبقي انت كمان موش انسان
خلص الكلام
اللي بيلهسوا وراء الجمال فقط موش هقول رايي فيهم
المراءه مش جسم وشكل بس
عقل قلب حنان قوة ضعف ثقافه حكمه جلد
دي انسانه موش موميس
اهم حاجه
تكون فاهمانى
والله لو فيه نفاهم مش هايكون فيه اى مشاكل
ايوة طبعا تكون على قدر نمن الجمال
ومثقفه
وذكيه
وقبل دا كله متدينه
ولكن
فاهماااااااااااااااااااااااانى
بس خلاص:))
بصراحه الناس دى مينفعش يتقال عليهم متعلمين أصلا مش دكتور وصحفى وو ...
فعلا الرجاله مبيحبوش الست تبقى أذكى منهم ولا أحسن منهم وده دليل على كمية العقد اللى جواهم .
ربنا يشفى ويهدى !!!
جيل غبي خلف وراه جيل أغبى
لما يكونو نظرتهم للبنت على اساس الجمال بالله عليكي هيربو جيل المستقبل ازاي
وبعدين انا شايفه انو لو اتجوز واحده مثقفه هتنفعو ف ولادو ولما يحب ستشيرها ف حاجه هيلاقي عقل مفكر مش كيس بطاطس قاعد ف البيت و الاسم زوجه حلوه !!
وبعدين الحلاوه ليها وقت وبيتعود عليها بحلاوتها يعني مش معقوله ناس مثقفه ع التلفزيون تقول كدا كلام والله عيب
الناقص يقولو :
وراء كل عظيم امراءه حلوه ومدلعه
بس انا من وجهة نظري :
وراء كل عظيم مثقفه ووحشه فـ بتخليه يقفل على نفسو المكتب يرمي كل همو ف الشغل ويبقى مشهووور
تصدقي الوحاشه ليها ميزه !!
هقول ايه بس
ربنا يهدي :|
لا حول ولا قوة الا بالله
الرجالة دول بقوا هس هس خالص على فكرة
الجمال مش هيدوم لكن بثقافتها وعلمها هتنفع اولادها وهتعرف تدير بيتها
يلا ربنا يهدى
مالها بس الثقافة
دي حتى مفيدة
بجد فكر غبي جداً
وأراء عجيبة ..
مين الناس دي؟
ايه الرودو السطحيه دي؟؟!!!!!!!!
يعني هما عايزين واحده جميله وخلاص!!
قال يعني مفيش واحده من بين عشرات المثقفين جميله !!!
لا لا بجد
منتهي السطحيه والتفاهه
محستش ان فعلا اللي قالوها كاتب مشهور او دكتور!!!
لا لا يا ضد
انا متغاظه
عجبني اوي الكلام اللي كتبته كيارا
إيه ده!!!!
أنا اتعصبت على فكرة...معقولة فى ناس بتفكر كدة و بعدين مين قال إن المثقفة بتكون عاملة زى الراجل...هما تعريفهم إيه للثقافة بالظبط..المثقفة دى بتكون أحلى الف مرة من واحدة مش مثقفة لأنها على الاقل حتعرف تتعامل مع زوجها بذكاء و حتعرف تربى الأولاد و حتعرف تشرف جوزها فى أى مكان تروحه..انما الاخوة اللى قالوا كدة هما عايزين واحدة زيها زى البدلة اللى بيلبسوها حلوة من برة و فاضية من جوة بس اللى ميعرفهوش إن زى ما البدلة حتبور و تترمى اللى هما عايزها كمان حتبقى زيها
لا مش شرط أبدا أن تفقد المرأه واحدة من مزاياها حين حيازتها لمزية أخرى ..
يعنى ممكن جدا تكون جميله و مثقفه و متدينه عن حق و محتشمه و رقيقه و صاحبة شخصيه قويه يفتخر بها الرجل و بها كل المزايا اللى بيحلم بها الرجل ..
بس اللى يدور حيلاقى و الله ..
تقبلى تحياتى و تقديرى ..
إذا كان الرجل يحب السيطره بالفطره فالأنثى تحب ان تتمكن من الرجل
وإن نجحت في ان تتمكن من الرجل فعليه العوض على الاثنين
يعني من الآخر الاثنين ما يعلم بيهم إلا ربنا
بصي انا رأيي إن الجمال جمال الروح
والجمال والثقافة دول مسألة نسبية
يعني ممكن توافرها بنسب في اي شخص سواء راجل او ست قابلة للزيادة او النقص
وبتتوقف علي حسب استعداد الشخص ده بزيادة او نقص او طمس الطرف الاخر ليها
اما الجمال فده شيئ إحنا ملناش دخل فيه يعني هبه من الله سبحانه وتعالي
ودلوقتي مستحضرات وعمليات التجميل بتقوم بالواجب :)
لكن لما تبقي واحدة جميلة بس من جوة زيرو... فهتبقي فاترينه قاعدة ف البيت
يعني هتأثر بالسلب علي حاجات كتير في بيتها زي تربيه ولادها وتعاملها مع الزوج واهله
والمجتمع من حواليا ومش هيكون فيه حوار مشترك ولا اندماج وتوافق
الجواز مش مجرد اتنين شكلهم حلو عاوزين يتجوزا وخلاص
الجواز اندماج للعقول والاجساد والارواح والمسؤليات اندماج للحياة بكل اشكالها
بس اما الاراء دي فهي اراء غير سوية معتقدش ان كل الرجالة نفس التفكير
وبعدين ياستي مفيش احسن من القعدة ف بيت اهالينا ^^
مالها يعني مالها هههههههه وادي ال اخدناه من الثكافة (:
قال أحد الحكماء إذا كانت المرأة الجميلة هى من تثير إعجاب الرجل فإن المرأة الذكية هى التى تثير إهتمامه
رجعت بعد الإمتحانات
بصى يا ستى كل راجل تقريبا له أراء فى المرأة مختلفة عن غيره ، وكل واحد بيحب يختار امرأة حسب شخصيته هوه ، يعنى لو واحد شخصيته ضعيفة عايز مراته تكون أضعف منه عشان يقدر يفرد عليها عضلاته وهكذا .
بس أنا مش عارف إزاى الناس ده ما بتحبش الست المثقفة الفاهمة
دا احسن حاجة إن الواحد يرجع بيته يلاقى ست يقدر يكلم معاها وتفهمه
بس المهم برضه إنها تكون مرحة وخفيفة
يا سلام ...مثقفة ودمها خفيف ، هو فيه أحسن من كده
شكرا ...أرجو قبول مرورى
عاشقه الرومانسيه
---------------
هو الصراحة جميع الاراء كانت مستفزة يادودو مش ده بس
لا ماهى اللى معاها شهادة و متعلمة هتربى عياله بردو .. هو مقالش هياخد واحدة جهله
و كمان العقدة تروح ازاى ؟؟ اذا كان فى جميعة للسي السيد فى مصر بتطالب برجوعه (:
و اهدى كده و بلاش عض .. ده انتى طلعتى شريرة لما تتنرفزى قوى^_^
حاجات جوايا
--------------
مش شرط علشان هو كبير و مشهور و مثقف "مع انى مش معترفة بده" مايفكرش كده
هو ممكن من كتر مقابلته مع المرأة المثقفة فى مجال العمل و المناقشات اللى بتدور ما بينهم
ظهر نقاط ضعف معينه عملت عقدة نفسية و ده واااارد جدااا مهما كانت درجة ثقافته و سنه
اللهم امين
للأسف لحد الان بدور عليها و مش شوفت غير جزء الكوته فقط ):
بس اكيد اللى مش هيقبل ان مراته تكون مثقفة مش هيقبل ان مراته تكون نائب ^_^
منووووووووووووووووووش
------------------
اهدى بس ياقمر مش عايزين تهور ((:
ماهو ده اللى بجد بيحزن الواحد
ان الطبقة المثقفة فى المجتمع اللى المفروض دورها توعية المجتمع و الارتقاء به
تكون فيها نماذج زى دى !!!!!
كيمو
-------------
ولا انا الصراحة مقتنعه بالكلام ده
لان الناس اللى بيقول عليهم مش كلهم كده .. بس من الواضح انه محدود المعرفة و مابيعرفش غير دول ^_^
^^^^
مش غيبة ولا حاجة انا موجودة اهو (:
آيوشة
----------
بصى هو مش كل الرجالة علشان بردو مانظلمش البعض منهم
لكن لو على اللى حواليه ؟؟!!! اى نعم معظم اللى بشوفهم و بتعامل معاهم
بيتكلموا وبس ووقت التنفيذ مافيش "وطبعا ده نتيجة عدم الثقة فى النفس"
لكن بردو شوفت العكس اللى فعلا بيحاول يرتقى بزوجته للأفضل دائما
ماحدش على فكرة ينكر حق البنت فى الاختيار
لكن الصراحة لو فكرت كده انا اول واحدة هكون بلوم عليها
مش معنى ان هما تفكيرهم سطحى يبقى احنا نكون زيهم ولا ايه ياقمر ؟؟
mido
----------
اختلف معاك ان السؤال غبى .. بالعكس ده منطقى وواقعى كمان
و ممكن تسال اى شاب المواصفات اللى عايزها فى شريكه حياتك
هيكون الجمال اول شئ و تانى شئ تكون متعلمة "معاها شهادة"
هتلاقى قليل قوى اللى هيقول فكرها اهم حاجة
و معاك ان فى درجات لكن الاغلبية ايه ؟؟؟
و السؤال هنا عن الاغلبية مش الاقلية
و لازم نكون واقعيين .. نادرة لو لقيت واحدة جميلة جدااا و مثقفة فى نفس الوقت
^^^
طب شوفت اهو اول حاجة الشكل !!!!
^_^
ذو الوجه المبتسم
------------------
عليكم السلام و رحمة الله وبركاته
طبعا ردى على آيوشة واضح ان مش كل الرجالة كده طبعا
لكن
الاغلبية كده (:
يعنى حضرتك شايف ان مافيش مرأة عندها ثقافة كافية تؤهلها انها تكون على درجة علمية عالية
ولا تقصد ايه بالظبط بالسؤال ؟؟
عموما منتظرة عودتك لتكملة التعليق
^_^
nona
--------
الحمدلله ^_^
الواقع بيقول ان قليل قوى هتلاقى فعلا واحدة جميلة و مثقفة فى نفس الوقت
*جميلة يعنى فائقة الجمال و مايختلفش اتنين عليها
موضوع تربية العيال زى ماقولت لدودو هو مش قال جاهله لا هى واحدة معاها شهادة و ده كفاية بالنسبة ليه
والله انا عايزاها مظبوط من فضلك
ههههههههههههههه
بصي يا جميل الرجاله دول الى انتى ذكرتيهم عقلهم مقضيهم على كده يا ماما
ماهو انتى مش واخده بالك حاليا بقت التليفزيونات ما بيجبوش الا الرويبضه
هما دول الى بيتكلموا عالم مخها فى البلاله دول الى ظاهرين ودول الى الناس بتسمعهم
انا ليا كلمه دايما باقولها
ان المرأه فقدت عقلها وفكرها فان اول من يفتقده هو زوجها
الراجل لحد عمر 35 سنه بيحاااااارب عشان يلغي مخ مراته ويخلي منها تابع امين
وبعد كده يبص حواليه يلاقي نفسه بعييييييد عنها
ايه ده انتى فين وانا فين
انا مثقف بافهم فى السياسه وعارف الى بيحصل حواليا
باتكلم عن التغيير الوزاري المحتمل
وهى بتتكلم عن تغير مدرس الولد الى مغلبها
انا عارف الوضع الاقتصادي العالمي وازمته
وهى بتفكر ازاي هاتوفر الشهر ده 100 جنيه عشان تدفع مقدم مروحه جديده
تخلف مش كده ؟؟
ستات مخها فاضي صحيح
وطبعا طبعا من زمان قالها المكياج ده ليا انا بس انا باقولك اهو
واقولك ولا انا كمان مش جايبه احسن تحطي وانا مش واخد بالي هعع هو انا كروديا
هى الست دي بقت شبه طبق الملوخيه البايت كده ليه
لا لا ده بقت عامله زي المايه السخنه الى نازله من الحنفيه فى عز الحر
رخمه وما ترويش ومالهاش طعم
الله شوف بقى الست الى هناك دي
زميلته بقى ولا اي حد
الله عليها
جميله مهتمه بنفسها مثقفه بتتكلم وجريئه كده
لها راي
يااااااااه يا بخت جوزها
اقوله انا بقى
انت كنت جوزها بس ما حبيتهاش كده ما حبتش تخليها تكبر جنبك وتبقى زيها
وانت شاب صغير كسلت تعمل كده وقلت يا واد هاتفهم هاتغلبك
خليها تبقى حماره وخلاص ونسوقها اسهل
مين فيهم حمار بقى يا ضد
فى ستات بترفض تبقى حمار
ولو كانت ذكيه كفايه هاتكلم حياتها صح وتبقى تمام وتعرف تقنعه بوجهة نظرها
لكن فى كتير ما بيعرفوش يعملوا كده وبتنهد حياتهم
وفى اكتر واكتر واكتر بيوافقوا يبقوا دونكي ويعيشوااااااا وخلااااااااااص
زي ما كل الناس عايشين وخلاص
انا رغيت كتير اوي يا ضد فهمتي حاجه ؟؟؟
حواء
---------
خلاص ياقمر غيرنا النظام علشان خاطرك اهو ^_^
^^^^^^
ههههههههههههههههههه
لالالالا مين قال كده بس على فكرة المثقفة بردو بتهتم بنفسها
انا مستغربة فعلا من رد اول واحد ان المرأة المثقفة مسترجلة "من الواضح انه بيشوفه بس فى شاشة التليفزيون فى الافلام"
و على فكرة هو كان كلامه كله على المكياج و هى ماشية معاه مش بس فى البيت ):
السبب التانى و التالت فعلا هم الاصح لاننا مازلنا فى مجتمع ذكورى الراجل شايف ان هو بس اللى فاهم و المرأة مجرد ديكور فقط لا غير لا عقل لها
فعلا الراجل اللى بيفكر كده بيكون معدوم الثقة فى النفس "حتى و ان حاول يظهر العكس"
و طبعا زى ماقولت قبل كده مش كل الرجالة
لكن بردو الأغلبية كده ^_^
شموووووووووووسة
-----------------
مساء الخييييييييييييير "حسب التوقيت المحلى"
^_^
ههههههههههههههههههه شوفتى اى حاجة يذكر فيها المرأة و الرجل لازم يحصل فيها خناقة "ناقر و نقير"
((:
للأسف ياشموسة الاعلام دايما بيحاول يظهر المرأة المثقفة اللى دايما لابسه نظاره كعب كوباية
و زى ماقال الصحفى اللى فى الاول بتكون مسترجلة فيها
بس هما مش قالوا وحشة هما قالوا محدودة الجمال " يعنى جمال عادى" مش هيفاء و نانسى ^_^
ده حتى هيفاء اوحشت بعد مااتجوزت ((:
^^^
ماهو اللى بيفكر كده لما يكبر بردو هيكون على نفس النظام
نزعة سي السيد جواه مش بيتغير
وان حصل حوار هتلاقى بردو بيشخط و يقولها انتى ايه فهمك انتى .. هو انتى تعرفى حاجة خليك فى الطبيخ و المطبخ .. وهكذا
^^
هو مش بيكون مغرور هو بيكون معقد فقط .. الغرور ده ستار علشان يخفى وراه ضعفه ^_^
"بس انتوا اقدروا علي الجواز ومسؤلياته الكبيره"
الله ينور عليك ياشموستى ^_^
عاشقة الأحزان
--------------
عليكم السلام و رحمة الله و بركاته
انتى اللى وحشانى ياقمر رغم انى زعلانه من البوست الاخير ):
انتى الاجمل (:
نرجو ذلك
^_^
esraa
----------
معاك فعلا انها مجرد مبررات واهية ليس الا
بس الرجل الشرقى عموما مش المصرى بس مابيحبش مراته تكون اعلى منه
^_^
ههههههههههههه
انا بقي عايزها مثقفه
وجميله
هو ما ينفعش تبقي كده ولا ايه
ولا الثقافه بقت حكر يعني علي محدودي الجمال
الموضوع غريب
لا بيتقاس لا بالثقافه ولا الجماعه
هي مشاعر بتحرك الانسان ناحيه نصه التاني
بصرف النظر عن ايه اللي بيشده
اكيد كلها علي بعضها
السلام عليكم
على فكرة الرجل بيبقى سعيد لما يقابل مرأة مثقفة الا اذا كانت ثقافتها اعلى
ودي طبيعة اجتماعية
تقبلي مروري
للاسف هو مش محدود المعرفه لكن هو انسان نفسه يبقى ديكتاتور
وعموما انا كنت محتاج اقوله ان الرجاله والرجوله مش فى كده ولا ايه
مفيش فرق
السلام عليكم
علي فكرة الجمال مهم برده
أعتقد ان الثقافة ملهاش دعوة بالشكل
أو الاسترجال
و معتقدش ان المثقفة هتهمل في حق زوجها
اعتقد كلام فاضي مش منطقي
هما لو بيحبوا بعض خلاص
ما فيش الكلام ده
شكرا لفتح لنقاش في هذاالموضوع
طبعاً بدون تفكير تكون متوسطة الجمال و تكون مثقفة افضل من الجميلة و محدودة الثقافة او عديمة الثقافة لأن الثقافة تكسب المرأة جمال يشعر به كل من يتعامل معها و الثاقفة لا تزول بل تزيد مع مرور السنوات لاكن الجمال يمكن ان يقل مع السنوات وعدم اهتمام المرأة بنفسها أو لأى شىء حادث مثلاً او جرح هل سيتركها ام يتحمل و لا يتصف بالنداله ؟
الامر واضح جداً و لاكن اذا تجمع الجمال و الثقافة يكون افضل فكل رجل يحب ان تكون له امرأة جميله حتى لا تزيغ عينيه على غيرها ولاكنى عند رأيي الثقافة من ضمن مكونات المرأة الجميلة.
بوست اكثر من رائع
تحياتى
عزيزتي
لماذا قلتي تعددت الدوافع
في نظري هنا ان الدافع واحد فجميعهم ينظرون للمرأة على أنها لم تخلق سوى لغرض واحد
السلام عليكم
الاول نورتينى فى مدونتى المتواضعة
ثانيا ..بالنسبة للموضوع
اولا الجمال شئ نسبى ..يعنى بيختلف وجهات النظر من شخص لاخر...بالنسبة للجمال
واللى يبص للجمال فقط ...فالجمال يكون لمدة معينة..ثم يتغير بعد ذلك الجمال.
فانا ..افضل المرأة المثقفة ..وخاصة المثقفة دينيا..علشان هى اللى هتربى اطفالى واطفالها...ودة امر محتاج الى وعى ..مش امر هين يعنى ...اما بالنسبة للمرأة التى تتثقف او تتعلم من اجل عمل مثلا...وانما من اجل نفسها ومن اجل ابنائها...ولتكون مقبولة الشكل بالنسبة لى ..
يعنى خير الامور الوسط
تحياتى
ماتيجى بقا نبص للشاب اللى ناوى يتجوز
ده لو اصلا هيقدر يتجوز فى وسط المغالاه فى الطلبات اليومين دول
لو شاب ( غالبا بيبقى عدى مرحلة الشباب علشان بيكون فى مرحلة الشباب بيكون نفسه يعنى قولى فوق التلاتين ع الاقل ) عاوز يتجوز بقا ويتلم ويسيبه من شغل التنطيط لو هو تعليمه عالى بيدور على واحده تعليمها عالى زيه علشان تقدر تفهمه لو تعليمه متوسط بردو بيدور على تعليمها عالى ولو معدوم التعليم صنايعى بقا ولا اى حاجه بردو بيدور على تعليمها عالى يعنى فى الاخر الكل بيدور على الثقافه بس ارجع واقر واعترف ان لازم تكون على قدر من الحلاوه مش الجمال بمعنى ان البنت الحلوه بتختلف من شخص لشخص انا ممكن اشوفها حلوه غيرى لا اما الجمال فلا يختلف عليه 2
زى ما البنات بردو بتبقى عايزه شاب وسيم مش شرط يكون جميل
سويت فيوليت
بصي ... الراجل الشرقي عبر العصور يلبس طربوش .. يلبس عمه ... يلبس طاقية ... يلبس كاب نايك ...يلبس زعبوط حتي ... لكن اللي تحت الطاقية مبيتغيرش
هو عايز لما يرجع البيت يلاقي واحدة مستنياه علي نار ... لو اتكلم تبصله بانبهار و تقوله " الله ... كلامك حلو قوي يا سي احمد" و لو سالها عن رايها تكون من الذكاء انها تقوله الراي اللي في دماغه لانه طبعا الراي الصح
اما بقي المثقفة بتاعه الكلام الكبير اللي مش جايب همه فدي اخرتها معاه انه هيحاول دائما و ابدا يسفه كلامها و يحسسها انها مبتفهمش حاجة و كل كلامها غلط ... يا اما تتعظ و تعرف انه الوحيد او علي الاقل اكتر واحد بيفهم في البيت ده - و تبقي من بتوع كلامك حلو يا سي احمد - يا اما تصر علي موقفها ... و تتطلق - ده طبعا لو غلط و اتجوزها من الاساس -
للاسف ان الرجاله دول بيناقضوا نفسهم لانه في نفس الوقت عايز لما يخرج في عشاء عمل مثلا و ياخد مراته معاه زي كل الموجودين عايزها تقف و تتكلم و تبين ثقافتها
يعني عايزها زي التليفزيون ... في البيت يظبطها علي ميلودي و وقت اللزوم يظبطها عالجزيرة :)))
بس طبعا النوعية دي من الرجاله بيكون عندها نقص ثقة في نفسها و الاسهل انهم يقللوا من قيمة اللي قدامهم عن انهم يعلو من نفسهم
اكيد فيه نوعية تانية عندها ثقة اكبر في نفسها بتخليها تفضل ان شريكة حياتها تكون علي نفس القدر او اعلي من الثقافة بس دول قليلين
بالنسبة لاساس الحياة الزوجية فانا باتفق مع جبران خليل في ان الاساس هو التفاهم الروحي اولا و قبل اي شئ
يفهمو بعض الاول و ارواحهم تتقابل و ساعتها هيقبلو بعض بكل ما فيهم و كل واحد هيحب اللي التاني بيحبه
تحياتي لانك اثرتي الموضوع ده بس الكلام فيه مش هيخلص ... هامشي دلوقت و ارجع تاني اشوف وصلتو لايه
سلام
تعددت الاساليب و الهدف واحد. في مجتمع الجمال فيه صفة استثنائية لا تمل غير الجميلات من التركيز علي الجوانب الاخري مثل الثقافة و الرومانسية و التدين الخ الخ و تصف الرجل الذي يهتم بالجمال و لاشعوريا يشعرها بنقطة ضعفها بكل النواقص من الجهل و السطحية و سي السيد الخ الخ. و يبدو هذا من صيغة السؤال و التخيير المستحيل فاما جميلة او مثقفة. و لهذا اقتصر التفاضل علي صفتين فقط مع ان اختيار شريكة الحياة يخضع للعديد من الصفات و منها علي سبيل المثال الشخصية و التدين الخ الخ.
اذن السؤال من الاصل مغرض. و لماذا لا تكون الزوجة جميلة و مثقفة معا؟ فالجمال متعة العين و الثقافة متعة العقل. و اضيف الرومانسية متعة المشاعر و التدين متعة النفس و جمال الشخصية متعة الصحبة في الحياة.
و لماذا يلام الرجل علي تفضيله للجمال علي الصفات الاخري؟ ان هذا هو ما خلقه الله عليه انه يفضل الجمال. الم يذكر الحديث الشريف ذلك صراحة عندما عدد الاسباب التي من اجلها تنكح المرأة فكان اول سبب هو "جمالها" !!! و جاء مقدما علي مالها و حسبها و دينها و هذا اثبات صريح ان الرجل فطر علي تفضيل جمال المرأة علي غيره من صفاتها و لهذا جاء الحديث الشريف لحث الرجل علي اختيار ذات الدين و لو كان الرجل لا يفضل جمال المرأة بالفطرة علي غيره من صفاتها لما كان للحديث معني و ربما لم يجئ من الاصل.
الاعجب ان تتهم بعض الفيمينستس "مناصرات حقوق المرأة" الرجل الذي يهتم بجمال المرأة بانه يعامل المرأة كجسد فقط متناسيا انها انسان متكامل لها عقل و مشاعر. و هذه فرية مضللة تتنافي مع فطرة الخلق و منطق العقل. فاما الفطرة فهي ان الرجل خلق و في فطرته حب الشهوات من النساء و هذا ليس عيبا او حراما اذا تم بما شرعه الله بلا مبالغة او مغالاة بل انه سبب من اسباب استمرار الحياة. اما منطق العقل فان جمال المرأة لا يمكن الغاءه من منظومتها كما ان جمالها لا يلغي باقي اركان هذه المنظومة. فالرجل يري جمال المرأة بعينيه و يخاطب ثقافتها بعقله و يتفاعل مع احاسيسها بمشاعره و يستمع لارائها باذنيه و وجدانه.
طبعا هناك نوع من الرجال ضعيفي الشخصية يريد بجانبه امرأة معدومة الشخصية او نوع ضحل الثقافة يشعر بعدم الثقة بالنفس من الاقتراب من المرأة المثقفة و هؤلاء نماذج غير سوية لكنها لا تعبر عن معظم الرجال.
لا اتوقع ان غير الجميلات سوف تتفقن معي في كل ما ذكرت
(:
والله يا ضد الواحد زهق منهم
بس مش شرط انها مثقفة تبى مش مهتمة
بنفسها ودليل على كدا كتير من
المثقفات من اجمل الفتيات
واظن انكم اقل دليل على كدا ولا ايه
يا ضددووووووووووووووووووووووود
لسه عاوزة تحطينى على كرسى الاعتراف
وحشتينى بجد وسلام مخصوص لاختى الصغيرة
وردشان
ههههههههههه بصراحه بضحك على رد لاعب الكوره حلوه قوى قوى مثقفه لنفسها دى
هيا يعنى الثقافه شربه هيا اليى هتشربها وتفيدها مثلا مهو بعد كده لولادك هنعلمهم كويس وتربيهم بشكل راقى
فعلا مخه كروى
لا وحتى المتقف رايه انها حتما لازم تبقى جميله عشان تريحه لما يرجع من الشغل
طب يا جماعه مهو جمال الروح ورقى الشخصيه هما اليى بيصنعوا امراه جميله
انتوا ناسيين فيرجينيا جميلة الجميلات جرالها ايه فى النهايه اتحرقت
يعنى الجمال شئ عرضى وزائل انما الشخصيه وجمال الروح ده الدائم
وكل واحد حر فى اختياره لشريكة حياته بئه
بس سيبك انتى وحشتينى وحشتينى وحشتينى
يا بنت العريش انتى
وعلى فكره شكلى بكره لا هنا ولاا هناك ولاا على القمر حتى
طلع عندنا خطوبه لواحده قريبتنا وانا معرفتش الا متاخر شفتى الهنا
اوعى تقولى كلمه
عديها
مساء الخير
انا جيت اشوف اخبار الحرب هنا ايه وكمان عايزه اعرف الاتنين اللي بيلعبوا ريست مين اللي غلب
:)
مش عارفه الرجاله هنا محسيسني انهم داخلين عمر افندي يشتروا
:)
منامينوووووووو
-----------
معاك ان كل مكان فيه و فيه
لكن الحسنة تخص والسيئة تعم
و زى ماقولت مش هننكر ان الاغلبية من الرجال دلوقتى بيفكرو كده
" يبقى هما السبب بقى فى السمعه دى احنا مالنا بس P: "
^^^^^^
معاك ان كل واحد حر فى اختياره مدام مش هيضر حد
لكن ماتجيش تفرض عليا ثقافتك و تختزل المرأة فى انها جسد فقط و اقولك انت حر
هنا فى فرض و تشويه لصورة المرأة المثقفة وهو ده اللى الاعتراض عليه
^^^^^
هقول زى مارديت قبل كده
انا بقول معظم الرجالة مش كلهم .. و مش هنكر فعلا ان فى بعض من البنات فكرها كده للأسف
^^^^^
اما بقى عن رأيك و بما انك ختمتها بمسيرة ضد ياضد
فهقولك زى ماقولتلك فى نقاشنا "كلهم بيقولوا كده فى الاول"
يقولك المهم اكون بحبها .. ولو حب واحدة مثقفة بيكون عايز يحاولها لقطعة ديكور
و يمارس عليها العقدة الذكورية P:
علشان تبقى تقول تانى ضد ياضد
^_^
أنا حر
----------
انت قدرت تزود ثقافتها وده كويس مش وحش
و ارجو فعلا ان الرجال يفكرو كده قولا و فعلا ^_^
و معاك انها مش قاعدة لكن هما بيحاولوا فعلا يعملوها قاعدة
بس انا اختلف معاك فى نقطة مثقفات "وسط البلد"
^_^
kimo
--------
نورت
^_^
مسدس صغير
-----------------
هههههههههههههههههههههههه
فعلا مش طماع .. ماهو ده المفروض
ويارب تلاقيها
^_^
Rooma Qandil
-----------------
اول مرة اسمع الرأى ده
يعنى مش الثقافة بس لا و الجمال بردو !!!!
ليه احنا فى اى عصر بالظبط ؟؟
kmt
--------
عليكم السلام و رحمة الله و بركاته
علشان الراجل مش بشكله الراجل برعايته لبيته و اسرته ^_^
بس على فكرة ده دليل ان تفكيرنا اعمق و اعلى بكتير "شوية عنصرية بقى" ولا انتى ايه رأيك ؟
^_^
safa7_karmooz
------------------
ههههههههههههههههههه
لا كارفور ^_^
عجبنى تعليقك جداااا و بجد احييك على الحيادية
و اكيد طبعا فى بنات مثقفين حلوين بس هما يبعدوا عن الاعلام شوية و هما يشوفوا ^_^
مالها وسط البلد و البورصة بس ؟؟؟
ماكان التعليق ماشى كويس
^_^
7annen
-------------
اهلا بيك انتى واشكرك على رأيك فى المدونة
^_^
حـــــدوتـــــة
----------------
عليكم السلام و رحمة الله و بركاته
كلامك مظبوط طبعا
لكن
مين اللى هينفذ ؟؟؟ !!!!!!
ديالا
--------
معاك فى كلامك
لكن بردو مش كلهم لان لسه فى رجالة واثقة فى نفسها ورافضة شخصية سي السيد و امينة
^_^
كيــــــــــــارا
----------------
اعتقد ان ابلغ رد على الاستاذ ده هو رد عاشقة الرومانسية
عجبنى تعليقك جداااا
لكن اعترض على الجملة الاخيرة
الموميس بردو انسانه بغض النظر عن اخلاقها
ولا ايه ؟
^_^
blue-wave
--------------
ارجو بجد ان يكون ده تفكير الكل
قولا و فعلا
^_^
Butterfly
-------------
اللهم امييييييييييييين
بس على فكرة الثقافة مالهاش دعوة بالعقد النفسية
^_^
Bola 7elmi
--------------
هههههههههههههههههههههههه
وجهه نظر بردو فى الوحاشة ((:
و فعلا ربنا يهدى
^_^
* Alwaan *
------------
بقوا !!!!!!!
دى صفة للأسف فيهم من زمان
^_^
د. ياسر عمر عبد الفتاح
-----------------
مش عايزة فعلا اذكر الاسامى
علشان الصدمة ماتكونش اكبر
):
بس كفاية انهم فعلا من المشاهير فى حياتنا اللى المفروض انهم قدوة للشباب
hager za3bal
---------------
بعد الشر عليك من الغيظ ياجميلة
الثقافة زى ماقولت قبل كده
مالهاش دعوة خالص بالعقد النفسية اللى بتكون فى الانسان
و يااما رجالة على قدر عالى من الثقافة و تلاقيهم ماشاء الله بيقولوا درر
و فى الواقع تتصدمى فى فعلهم و تفكيرهم السطحى
دول ارحم من غيرهم صدقنى على الاقل قالوا الصراحة مش شعارات و بس
^_^
انا ودماغي
----------------
تعريفهم للمثقفة هو تعريف الافلام ليها
نفس الصورة بالظبط
بس على فكرة صدقينى اللى مش يقبل يرتبط بالمثقفة حتى لو شافها جميلة هيحاول يلغى عقلها ولو فشل يبقى هينفصل عنها
لان اللى بيفكر كده بيكون اصلا انسان غير واثق من نفسه
و بعد الشر عليك من العصبية سيبك منهم
^_^
عمرو
-----------
اعتقد ان اللى تفكيره بالشكل ده
مش هيدور على واحدة يفتخر بها اكتر من انه يفتخر بجمالها
):
لورنس العرب
-------------
مش هنكر ان فى بعض من النساء فعلا تفكرهم كده
لكن دى مش فطرة المرأة
لانها لو كده ماكنش ظهر نموذج امينة و ليلى ..ألخ
ولا ايه ؟؟
قلب ارهقته الاحلام
----------------
اتفق مع رأيك
وفعلا مش كل الرجاله لان فى رجاله واثقة من نفسها
واكيد مافيش احلى من القعدة فى بيت الاهل لو بجد هنقابل اللى تفكرهم بالشكل ده
^_^
mohamed ghalia
-------------
حمدلله على السلامة يامحمد
نورت بعد غياب الامتحانات
^_^
راسبوتين
----------------
مابيحبوش المثقفة علشان زى ماقولت كده بالظبط
انه بيكون مهما بلغت درجة ثقافته "ضعيف الشخصية"
^_^
صبرني يارب
------------------
لالالا انت كده طماعة ((:
فهمت طبعا ياجميلة
بس النموذج التالت اعتقد انه صعب
مافيش واحدة واثقة من نفسها "مش هقول مثقفة" هتوافق تعيش و خلاص و ترضى تكون بلا شخصية
بس بجد تعليقك عجبنى جدااااااااااااااااا
وكمان ارغى زى ماانت عايزة البيت بيتك
^_^
أنا زعلاااااااااااااااااااااان
بس كده
ايه حكايه حذف التعليق دى كل شوية
فى حد بيشتم ولا ايه
قولى وانا اقطعو
طبعا انا جيا متأخر كتييييييييييير
عشان ظروف الامتحانات الفتره اللي فاتت
بس عايزه اقولك انك وحششششششششششششتيني وحشششششششششششششششششششششششششششتيني اوي ولله ووحشني لسانك اللمض ده
عامله ايه يا حبيبتي طمنيني عليكي
نرجع بقى للبوست
انا عن رأيي ان خير الامور اوسطها يعني لو انا راجل مثلا مخدهاش وحشه اوي عشان مثقفه ومخدهاش حلوة اوي عشان مش مثقفه احلى حاجه الوسط في كل حاجه وانا ضد اللي بيقول المرأه المثقفه بتكون وحشه في كل الحالات
ده طبعا كلام غير منطقي يعني عندك اكبر مثال انا اهو مثقفه وحلوة نياااهااااهاااااااااااهاااااااااااا
لا بجد الكلام مش منطقي ومش قاعده في عندكم مثقفات وقمررررر وكتييير اوي
وبالنسبه للرجاله اللي مش بتاخد المراه المثقفه عشان نقطه ضعفو انا معاهم وضدهم عشان هيجي يوم ويتناقشو فيه وهتطلع عينو وتقولو بس بس يا جاهل اركن على جمب بقى ههههههههههههه
نرجع نهني مصر تاني ونقول مبروووووووووووووووووووووووووك مبروووووووووووووووووووووك مبروووووووووووووووووووووووووووك لمصر ولولادها على الفوز الجميييييييييل على ايطاليا
حمص حمص حمص كلو الليله هيرررررقص
الحب بلا اسباب
والقدر لا اختيار فيه
يا قمر
انا قولتلك رايى طبعا قبل كده
فى الاراء المستفذة دى
ويا خسارة بجد ان اللى بيقولوا الاراء دى
ليهم كلمة مسموعة
وكتير بيسمعوا فعلا لكلامهم
تحياااااااااتى
تصدقي واحد قالها لي في وشي
اشتغل معاكي بس متجوزكيش
عشان انتي صحافة
فاهلا يعني
هههههههههه
هما عاوزينها غير مثقفه طبعا عشان ما يبقالهاش راى ولا مشورة ويكون هوه كلامه الصح "معظمهم عاوزينها كده"ودول بقى اللى طفحانين من كلام سي السيد
"الراى رايك يا سي السيد والشورة شورتك هوه انا ليا كلام بعد كلامك؟" كلهكلام فاضي
لان البيت لازم يتبنى على اتنين
بمعنى ان راى واحد مش هيكون له معنى وممكن يودى في داهيه
لان مخين احسن من مخ واحد بغض النظر بقى ست ولا راجل
عجبنى البوست جدا
أبو العريف
-----------
انا معاك فعلا انها مشاعر
بس اللى تفكيره بيكون كده حتى لو حب واحدة مثقفة صدقنى بيحاول يمحى عقلها نهائى
):
مصعب صلاح
----------
عليكم السلام و رحمة الله و بركاته
طيب ماهو لو قابل واحدة اعلى منه ممكن يحاول يوصلها بدل مايلغى عقلها و يرفضه اصلا
^_^
كيمو
---------
معاك طبعا بس اللى تفكيره كده بيكون فاكر ان دى هى الرجولة
):
عمرو وجيه
------------
عليكم السلام و رحمة الله و بركاته
اكيد طبعا المثقفة مش هتهمل فى حق زوجها
لكن دى كلها مجرد مبررات واهية زى ماقولت
لاخفاء ضعفه فقط لاغير
^_^
akeed
-----------
اعتقد ان اللى تفكيره كده مش هيتحمل حتى لا يتصف بالنداله
^_^
وطبعا اتفق معاك فى كل كلمة
صانعة الأحلام
-------------
انا اقصد هنا ان كل واحد كان بيدافع عن وجهه نظره فقط لاغير
علشان يعطى مبرر ليه اختار الجميلة وليست المثقفة
^_^
mosooz
-------------
عليكم السلام و رحمة الله و بركاته
انت اللى نورت فى مدونتى ^_^
احييك على تفكيرك اللى ارجو فعلا كل الشباب يكونوا كده
قولا و فعلا
^_^
عايش... ولكن !!!!
---------------
التعليم غير الثقافة
و زى ماقولت فى التعليقات قبل كده
انه فعلا بيدور على جميلة متعلمة لكن مش تكون مثقفة
^_^
براااح
--------------
الله ينورعليك بجد
انتى جبتى المفيد
اما بقى جبران خليل جبران
اعتقد واحد بيقول هى الثقافة هتجيب عيال
تفتكرى هيكون متفق معاه و يقول ان التفاهم الروحى بيجيب عيال ^_^
تنورى فى اى وقت ياقمر
^_^
Love-Guru
----------------
الواضح من مجمل التعليق ان صورة المرأة المثقفة لديك نابعة من الاعلام وليست من ارض الواقع
اما انك نظرت للسؤال بنظرة محدودة جداااا
في كل الاحوال لم يثير هذا استغرابي لانه متوقع ^_^
استاذى الفاضل اى امرأة مثقفة واثقة من نفسها "وواعية" ترفض ان ينظر الرجل لجمالها اولا
سواء كانت جميلة او لم تكن
صيغة السؤال واضحة جدااا
مثقفة "محدودة الجمال" ام جميلة "محدودة (او معدومة) الثقافة"
فهو واقعى و ليس مغرض كما ذكرت
من الجميل ان تكون الزوجة جميلة و مثقفة
ولكن
ان لم يكن فماذا ستختار ؟؟
السؤال من المفترض انه مطروح على رجال ذوى الشخصيات السوية على قدر عالى من الثقافة
لكن جاءت الاجابة لتثبت العكس
فكما ترى أنت الغير جميلات هم الذين يتحدثون بهذه الاشياء
فأنا ايضا أرى ان الرجال الغير واثقين من انفسهم هم الذين ينظرون هذه النظرة للمرأة
^^^^^
لا أحد يلوم الرجل الذى يفضل الجمال عن باقى الصفات بشرط ان لا يفرض هذا على الجميع
^^^^^^^
مين قال ان الحديث اول خصلة قالها الجمال و فضله عن باقى الخصال ؟؟
قال النبي صلى الله عليه وسلم: " تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك"
و اعتقد انه قال "فاظفر بذات الدين" مش "و اظفر بذات الدين"
يعنى الافضل هو الدين و اذا انضاف اليه بعض هذه الخصال فهو احسن
يعنى التفضيل هنا للدين و ليس للجمال
ارجو الرجوع للحديث مرة اخرى و تفسيره اولا قبل الاستشهاد به
^^^^^^
بالفعل فى الموضوع نتحدث عن نموذج الرجل ضعيف الشخصية
و لكن
لنكن واقعيين بعض الشيء ان معظم الرجال بالفعل يفكرون هكذا
^^^^^
"لا اتوقع ان غير الجميلات سوف تتفقن معي في كل ما ذكرت"
و انا ايضا لا اتوقع ان غير الواثقين من انفسهم "من الرجال" سوف يتفقون معي فى كل ماذكرت
^_^
وردتي الغالية
-------------
ده انتى الجميلة ياجميلة و بجد انتى فعلا افضل نموذج للمرأة المثقفة الجميلة
موضوع الكرسى اكييييييييييييييييد انا لن اتنازل عنه ابدا
سلامى ليك انتى ياقمر
بحبك يااجمل و اطيب وردة
^_^
سنسن
---------------
اللى قالت احلى كلام عن البوست فى الجمهورية الفيس بوكية ^_^
امال لو كنتى شوفتى الحلقة كلها بقى كنتى هتعملى ايه
ده اصلا انا وحبيبة كنا هنتشل منه .. ده مافيش خالص معاهم معاهم عليهم عليهم ((:
ياتوتا هما مش بيتكلموا عن جمال الروح خاااااااااااااااالص
ياريت كان كده هيكون ارحم بجد من الاراء العجيبة بتاعتهم
و فعلا كل واحد حر فى اختيار شريك حياته
لكن مش يفرض علينا بقى اختياره (:
^^^^^^
انتى اللى وحشانى يابنت بلدى الجميلة ^_^
و طبعا انا قولتلك فى الجهورية التانية عدم الرد ليه
هههههههههههههههههه عااااااااااااادى ياسنسن ماهو شئ متوقع منك اصلا
خلاص اخدنا على كده اكيييييييييييييييييييد
هههههههههههههههههههههههههه
لالا مش قولت حاجة اهو نيهاهاهاهاهاهاهاهاهاها
ان شاء الله اول لما اشحن اكلمك لانى بجد محتاجك جداااااااااااااااا
بحبك ياسنسن يابنت بلدى
^_^
شمووووووووووستى
-------------------
صباح الخير "حسب التوقيت اللى مش عايز يظبط ده ((: "
اكيد طبعا القمراية هى اللى كسبت "عنصرية بقى (: "
ههههههههههههههههههههههههههههههههه
انا بقول كده بردو بس مش هما بس ده و البناتيت كمان):
بس اهو كويس بردو علشان المدونة فاتحة
^_^
كاتب مصرى
--------------
ليه بس زعلاااااااااااااااااااااااااان
هو ايه حصل ؟؟؟
):
مشمشة
-------------
اولا حمدلله على السلامة ياقمر
لالالا مافيش حاجة .. و كمان مش انا اللى بحذف على فكرة
هو من الواضح ان التعليقات فيها حاجة علشان كده التعليق بينضاف مرتين
فبيمسحوا واحد
^_^
مرمررررررررررررررررررررررررر
--------------------
ولا يهمك ياقمر
حمدلله على السلامة اهم حاجة
^_^
انتى اللى وحشاااااااااااااااااااااانى موت
^^^^
هههههههههههههههههههههههه ايوان انتى اكبر مثال ((:
هههههههههههههههههههههههههههههههههههههههههه
لالالا ماعتقدش ان رد فعل المثقفة هتكون كده
هى ممكن تخلعه بس ((:
مبروك لمصر ياقمر
عقل مهوى
----------------
وجهة نظرك لها احترامها حتى لو مختلفة معاها
^_^
طائر الجميلة
----------------
اولا انا عارفة انى وحشة جدا جدا و مقصرة جدا جدا
ومش قادرة انطق فى كده
):
اما عن كلامك فى البوست اكيد طبعا احنا اتكلمنا كتير و عرفت وجهة نظرك
ماهو ده فعلا المحزن فى الموضوع انه من المفترض انهم قدوة
):
فلسطينية الهوى
------------------
ههههههههههههههههه
طب ده الواحد يحترمه علشان صريح
مش زى غيره
^_^
كلام فارغ اوى
---------------
و انا عجبنى تعليقك
^_^
اسيك ياقمري
********
طبعا الموميس انسانه واكيد بتحس في اوقات بالخنقه والاشمئزاز للنظره اللي بينظر ليها الرجل اعتذر فقد اخطأت التعبير
Love-Guru
***********
استاذ لف
بما ان التعليق المره دي متاح للجميع
وان الحلقة اللي صديقتي اتكلمت عنها انا كنت حاضره الجزء التاني منها
اولا عشان نكون متفقين مفيش بنت مش جميله الا نادر كل بنت هتلاقي حاجه جميله فيها
فكلمة غير جميله من الاساس لا محل لها من الاعراب قي قاموس البشريه لان ربنا مخلقش شي وحش او قبيح
هسالك ... امراه فائقه الجمال بلا قلب بلا مشاعر بلا عقل متسلطه ( هل تقيم حياه زوجيه سعيده )
ام ...... امره محدودة الجمال لكن بها قلب رحيم يرتاح اليه البشر بها عقل راجح بها مشاعر انثي لا يستطيع اي رجل مقاومه مشاعرها المتدفقه ( هل تقيم حياه زوجيه سعيده )
اي الفتاتين تعتقد انها هتخلي للدنيا طعم واحده قبيحه داخليا ولا واحده جميله داخليا :)
بلاش دا
الراجل اللي يفتكر انه لما يختار زوجه جميله يبقي هيكون اسعد واحد في الكون هيبقي غلطاااااااااااان
لان في حاجه اسمها تعود
محدوده الجمال فائقه الجمال يوم ورا يوم هتاخد علي الشكل وهيبقي شي عادي مفهوش شي مختلف العين هيا هيا كل شي هوا هوا
قعدت سنه 10 هتاخد علي وشها مش هيبقي في الحياه الا روحها اللي هتخلي في استمراريه للحياه واللي هيخلي الحياه تفشل من اول يوووووووووووووم
و لماذا لا تكون الزوجة جميلة و مثقفة معا؟
يبقي جميل بس افرض انها اقتصرت علي حاجه منهم هتفضل ايه
عقل ولا شكل
*********
الرجل الذي يهتم بجمال المرأة بانه يعامل المرأة كجسد فقط متناسيا انها انسان متكامل لها عقل و مشاعر ؟؟
هي ان الرجل خلق و في فطرته حب الشهوات من النساء
لا اتوقع ان غير الجميلات سوف تتفقن معي في كل ما ذكرت
(:
رب سكوت أبلغ من كلام حقا
الم يذكر الحديث الشريف ذلك صراحة عندما عدد الاسباب التي من اجلها تنكح المرأة فكان اول سبب هو "جمالها" !!!
*********
عَنْ أَبِي هُرَيْرَةَ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : ( تُنْكَحُ الْمَرْأَةُ لِأَرْبَعٍ : لِمَالِهَا ، وَلِحَسَبِهَا ، وَلِجَمَالِهَا ، وَلِدِينِهَا ، فَاظْفَرْ بِذَاتِ الدِّينِ تَرِبَتْ يَدَاكَ ) .
الحسب : هو الفعل الجميل للرجل وآبائه. وقد فسر الحسب بالمال في الحديث الذي أخرجه الترمذي وحسنه من حديث سمرة مرفوعاً: "الحسب المال؛ والكرم التقوى".
إلا أنه لا يراد به المال في حديث الباب لذكره بجنبه فالمراد فيه المعنى الأول.
قوله: "تربت يداك" أي التصقت بالتراب من الفقر وهذه الكلمة خارجة مخرج ما يعتاده الناس في المخاطبات لا أنه صَلّى الله عَلَيْهِ وَسَلّم قصد بها الدعاء.
قال الشيخ ابن عثيمين رحمه الله :
فالمراة التي ينبغي نكاحها هي التي يتحقق فيها استكمال هذين الغرضين و هي التي اتصفت بالجمال الحسي و المعنوي.
فالجمال الحسي: كمال الخلقة لان المرأة كلما كانت جميلة المنظر عذبة المنطق قرت العين بالنظر إليها و أصغت الإذن إلي منطقها فينفتح إليها القلب و ينشرح إليها الصدر و تسكن إليها النفس و يتحقق فيها قوله تعالى: (( ومن آياته أن خلق لكم من أنفسكم أزواجا لتسكنوا إليها و جعل بينكم مودة و رحمة))-( الروم-21).
الجمال المعنوي: كمال الدين و الخلق فكلما كانت المرأة أدين و أكمل خلقا كانت أحب إلي النفس و اسلم عاقبة فالمراة ذات الدين قائمة بأمر الله حافظة لحقوق زوجها و فراشه و أولاده و ماله، معينه له على طاعة الله تعالى، إن ذكرته و أن تثاقل نشطته و أن غضب أرضته و المرأة الأدبية تتودد إلي زوجها و تحترمه و لا تتأخر عن شئ يحب أن تتقدم فيه و لا تتقدم في شئ يحب أن تتأخر فيه و لقد سئل النبي صلي الله عليه وسلم أي النساء خير؟ قال: (( التي تسره إذا نظر و تطيعه إذا أمر و لا تخالفه في نفسها و لا ماله بما يكره))- رواه أحمد والنسائي .
وقال صلي الله عليه وسلم: (( تزوجوا الودود الولود فاني مكاثر بكم الأنبياء، أو قال: الأمم)) - رواه أبو داود والنسائي-
فان أمكن تحصيل امرأة يتحقق فيها جمال المنظر و جمال الباطن فهذا هو الكمال و السعادة بتوفيق الله.أ.هـ من كتاب الزواج
وفي الحـديث :
إخبار أن الذي يدعو الرجال إلى التزوج أحد هذه الأربع وآخرها عندهم ذات الدين فأمرهم صَلّى الله عَلَيْهِ وَسَلّم أنهم إذا وجدوا ذات الدين فلا يعدلوا عنها.
قال القاضي رحمه الله: من عادة الناس أن يرغبوا في النساء ويختاروها حدى الخصال، واللائق بذوى المروءات وأرباب الديانات أن يكون الدين مطمح نظرهم فيما يأتون ويذرون، لا سيما فيما يدوم أمره ويعظم خطره انتهى.- تحفة الاحوذي-
ودل الحديث على أن مصاحبة أهل الدين في كل شيء هي الأولى لأن مصاحبهم يستفيد من أخلاقهم وبركتهم وطرائقهم ولا سيما الزوجة فهي أولى من يعتبر دينه لأنها ضجيعته وأم أولاده وأمينته على ماله ومنزله وعلى نفسها.
والله تعالى أعلم ...
دا التفسير ياريت تقرا وتقرا تفسير الجمال ايه
واهو اول حاجه مش الجمال
انا مع كيارا جدااااااااااااااااااااا في ردها
لازم نفرق بين كلمتين
جميلةوشكلها مش حلو
لان الانسانة المثقفة اكيد هي جميلة
حتي لو شكلها مش حلو
مافيش واحدة في الدنيا مش جميلة
اكيد كل واحدة فيها حاجة حلوة
والمثقفة اكييييييييييد مليون في المية هاتكون جميلة
روحها جميلة
ممكن يكون شكلها مش حلو بس مانقدرش نقول عليها مش جميلة
وبرضو ده مش معناه ان مافيش مثقفات شكلهم شكلهم حلو
انما بقي لو بنتكلم عليالشكل وبس وحضرته اتجوز واحدة شكلها حلو جدااااااااا ومافيهاش حاجة جميلة
هاتبقي تمثال شكله حلو
بس عمرها ماهايكون اسمها جميلة
سلام عليكم
الأخوة والأخوات انهوا النقاش هنا
وكم كنت اتمنى لوحضرت في الوقت المناسب
ويا اختي
وضعتي يدك عالجرح ولا اكثر ؟؟
لأ أنا من وجهة نظري إن دول هما اللي تفكيرهم قاصر
زي بالظبط اللي تقولك خد القرد على ماله يروح المال ويفضل القرد على حاله
مش معنى انها مثقفة انها هتبقى شبه الراجل ولا قاعدة ليل نهار ماسكة الجرنال وفاتحة الجزيرة والاخبار
المثقفة على الاقل تهتم ببتها اكتر من الجميلة اللي هتهتم بجمالها وبس ودي آخر امنياتها
او لأنه عايزها شكل وصورة يواجه بيها المجتمع وبس وده لنقيصة في ثقته بذاته
إرسال تعليق